Haraf Daay - Muzaffar Aazim - 2007	حرف ڈاے - مظفر عازم - 2007
* ژٕ دپکھ زى۪تھ کیا زیون بہٕ دپے میوٹھ عذاب ژٕ دپکھ رہبر سون بہٕ دپے خابُک خاب ژٕ دپکھ لوٝسِم پاد بہٕ دپے تی چھُہ مراد ژٕ دپکھ وتھ کوت وٲژ بہٕ تھیکَے بێاکھ سراب ژٕ دپکھ أمـ̡ ؤج ناو یہ وۅلُر کتھ گجہِ زاو بہٕ دپے وِجہِ ژھۆٹ واو وى۪تھہِ کھوت وُلمنہِ آب ژٕ دپکھ من تہٕ بدن کوٕ چۆپرٲوـ̡ دمن بہٕ دپے چٲرتھ تار زیری رٹہِ مضراب ژٕ دپکھ ژھۅپہٕ چھے رِوان بلبل کونہٕ گى۪وان بہٕ دپے زى۪وِ تہِ چھُہ زاپھ کن تہِ سپدـ̡ نایاب ژٕ دپکھ پێجہِ بیچھاے مالِنـ̡ پژھـ̡ آیاے بہٕ دپے رگہِ رگہِ ووت زۅہرالتہِ زہراب ژٕ دپکھ عازمؔ سون تس تہِ مۆھا ادٕ کۯون بہٕ دپے چُھس بہٕ کُتول اتھ پھورى۪م نہٕ جواب ٭٭٭ ژلاں ژلاں تہِ شفق شولنوو جانانن شبس بےٚ نوٝر کھۅتى۪ن گاش ووت غم خانن دٕیاں چھےٚ پہرِ پشٕچ ژھیے درێا سنا روٝدس دِواں چھُہ جوش یہِ چشمن، تہٕ سگ نیَستانن ڈۆلُس نہٕ سونتہٕ ہوا نۆو وۆلُن کلس نلہٕ وۆٹ چھےٚ یٔندرٕ دۅس تہِ ہیکاں تھۅس أنِتھ زمستانن تتان چھُہ رَو تہٕ ژھٹان نور گلِ دُپہرُک رۅے سۅتاں چھُہ پَو تہٕ رِواں شِنہ پپنـ̡ چھےٚ ارمانن سمندرن تہِ چھلُن تۆگ نہ عازمؔس گٲمیُن غزل وُزاں چھہِ دۯمنـ̡ کانجن تہٕ پیچانن ٭٭٭ زرٕد زمین رِہِج کۅنگہ تِہج تہٕ حبہ خوتوٝن ہرُد چھُہ، نب کرِ شب از، ستارٕ ہى۪تھ نژِ زوٝن کنن چھےٚ کارتِکس رس بہٲرـ̡ بلبلہٕ بولـ̡ نکھن دُشالہ سُہ یُس ہارِ ککلہِ پٲٹس ووٝن یوُک سُہ واپھ أچھو بۆر وچھس بہارک تاپھ پگاہ تہِ پێیہ نہٕ پۅہس پرٕ سُہ آفتابُک خوٝن زبر رفیق سفر زٲنـ̡ زى۪ن مژر تہٕ ہژر وۅں گو اگر وتہِ سمکھی سُہ سۅرگواس سکوٝن مگر یہِ آبُ ہوا ہمنوا نہٕ تانس تان وۅلر چُھ ناوِ رٹاں نم تہٕ وِج ژھٹاں چھےٚ جنوٝن تچھان چُھ از تہِ أچھر والہٕ بُرزٕ دى۪ل عازمؔ چھےٚ زیرٕ زبرٕ تِمے تازٕ کیا تھُرى۪کھ مضموٝن ٭٭٭ کتھ چھےٚ یوسف تہٕ زیٖنہٕ رۆس کھاریُک وتھ چھےٚ واول وُنل، تہٕ ستھ وۅرٕ بٲے جامہٕ والى۪ن چھےٚ نٔو گِلن ہاوٕنـ̡ ماگنن پۯانہِ آیہِ سۅرنے وٲے نالہٕ کڈنٲوـ̡ زٔٹ اپزـ̡ رى۪تہٕ کٲلـ̡ یُہکہِ ما پھیرِ ماگ پھى۪رنہٕ ورٲے حٲفظن گى۪وو تہٕ ڈیڈِ مژراوى۪کھ عازمؔن کتھ کریوو تم تتہٕ تٲے ٭٭٭ اورٕ آیوو ہوا بہار ونان سون وٲتِتھ چھُہ نار نار ونان نٲگـ̡ رایس چھُہ پننہِ گامُک ژُکھ سٲنـ̡ ہیمال روزِ زار ونان ٹارِ کھٔژ تس اپارِ زاڈِچ زب وارِ کھاریُک چھُہ خارزار ونان پٲز وُچُھنا نظر دواں ٲلِس شراکہِ بلبل چھُہ بالہٕ یار ونان زانہِ کُس تہنزِ پژھہِ چھُہ کیا معنے یم أشس یُپ وۅشس چھِہ نار ونان اسہِ تہِ چھا عازمؔن امار یِتھے آنجہٲنی تہِ ٲسـ̡ شعر وناں ٭٭٭ گى۪وَن لہر تہٕ سمن بل تہٕ گُر تہٕ گوند تہٕ مشٲلـ̡ یہِ دردٕ نَے چھےٚ اموب آرٕ گرز تہٕ ڈُب ڈُبہٕ وٲلـ̡ یہِ سادٕ ٹیکہٕ بٹنٕـ̡ پونپرِس کران باوتھ ہۅ واوٕ رِنگ تہِ نژاں بونہِ باڈٕوس گیہِ نٲلـ̡ ڈلٕچ لہر چھےٚ دٔہِس سرێہہ کران وُٹھن تہٕ ژلان چھٔنِس وچھس چھےٚ کھى۪لس عرقہٕ ژھٹھ اناں یہِ وُڈٲلـ̡ ہوا ڈلاں تہٕ سرس منز گُرَن گِنداں گراین وۅٹل تہٕ مۆت کرِ ملرن، ڈُنگل تہٕ وسہِ پاتٲلـ̡ تٔتِس ڈى۪کس چھےٚ پھِران بُتلہِ روٝدٕ جٔرـ̡ شێہجار فضا تُمارٕ گنڈاں رامہٕ رامہٕ بدرٕنـ̡ ڈٲلـ̡ مژر تہٕ پوشہٕ دُپھس پى۪ٹھ تُلٕر ژٕہاں مۆدریر سکوٝن سروٕ ہرَن تل جلن تہٕ قمرى۪ن ٲلـ̡ شباہ تہٕ، روٝد چھلاں اتھ مندورِ پش کى۪و بۯاند دۅہا تہٕ، تاپھ ملاں مۅنہِ پھلى۪ن چھہِ پنجرٕکـ̡ زٲلـ̡ گرس چھُہ دارِ گژھاں ٹھُک برس چھُہ دل راوان یہِ وتہٕ وى۪لٲے ہوا کوت یپٲرـ̡ لوگ یژکٲلـ̡ غزل چھُہ ناگہٕ بلس بوسہٕ دِتھ لى۪کھان عازمؔ دپاں یہِ مصرٕ چھُہ مٲنتھٕر، ژٕ ما پرکھ ہیمٲلـ̡ ٭٭٭ آفتابُک ہوس چھُہ اسمانس چشمہٕ ووِ رٲژ ہالہِ مٲدانس پۯانہِ پۅستکہِ پێمٕتـ̡ چھِہ کاغذ کێمـ̡ معنہِ بدلن دۅہَے ؤں فۅرمانس اول وٲلِتھ چھُہ لول ازماواں ہارِ واوُل چھُہ گتھ دِواں پانس ۂسـ̡ کرَس منز دپاں چھُہ موہ ژامُت باگہِ بٔرتِس اگادِ رێہہ جانس دردٕ باغٕچ گرٕد دٕنِتھ جامن ہی گلستاں وناں چھےٚ گلدانس کٔتـ̡ جہِ وُپھ ہِش گٔیایہِ دارِ نیبرـ̡ تالوس أچھ الانزٕ گٔیہِ دێانس جورِ ماراں چھِ پۅختہ چھۅکھ تہٕ عطا بس ونکھ کس أکِس مێہربانس نالہٕ کرِ دٔدونس جگر سٲراب أچھ اگر آب دِن نیَستانس تر زبان پرٲو سر سرن والى۪و شیرِ پمپوش چھِکھ ہُریمانس تیٖر عازمؔ گراں چھُہ پوشہِ تُلِس یار دانا وناں چھہِ دیوانس ٭٭٭ ہوا چھُہ تٍرٕ دٕنان، شِنہٕ پِپنـ̡ شِٹھاں چھےٚ ہُپٲرـ̡ خبر دُبارٕ کرێا ہردٕ روچھ دورٕ یپٲرـ̡ ژےٚ کم کتابہٕ پری وۅنـ̡ بۯمِج تہٕ دچھہِ پونپور ژےٚ نَے تہٕ کس چھےٚ خبر لوزٕ کس کرێایہِ بہٲرـ̡ ژٕ یِکھ تہٕ تۯیشہ ۂتِس جۅے وُزاں سێکستانس گژھکھ تہٕ پٔدـ̡ چھہِ دزاں شب بى۪دار نظرِ ژۅپٲرـ̡ وصالہٕ سانہِ چھےٚ ون وِگنہِ دٔرـ̡ کٔرِتھ نیران فراقہٕ چانہِ پننٕـ̡ وُٹھ بناں دہانس تٲرـ̡ کزُل تہِ اوس کتھا برى۪م دِوان بےٚ سۅکھ نظرن ززُر چھُہ بێاکھ سِرا وۅنـ̡ نِمتھ کپٲرـ̡ کپٲرـ̡ یہ جورِ ہن چھےٚ گرن وٲلـ̡ پننہِ اتھہٕ گٔرمٕژ گُلٲلـ̡ شملہ رَوَس، سنگرِ جاموار انٲرـ̡ یہ مێون چھۅکھ تہٕ یہِ سرسٲوـ̡ چون دستِ شفا رٹان چھےٚ دگ تہٕ سہولتھ پننٕـ̡ پننٕـ̡ انوٲرـ̡ فضا چھُہ نیوٝل تہٕ شہپر بےٚ پھرُک ہوا دوناں مزٲرـ̡ مُزکہٕ چھُہ کُلـ̡ ددرِ ژھایہِ مێون شکٲرـ̡ بہٕ چیرٕ پوژھ سرابس تہٕ لوٕ سپار ہى۪مس وچُھک حباب چھُہ ٲوِلـ̡ اچھر تُھران اچھہِ دٲرـ̡ ژےٚ برونٹھہٕ کنہِ چُھنہٕ عازمؔ پۯى۪ژل کلام کران سفر پسند چھےٚ خۅشبوے تہٕ خۅش ہوا چھُہ سوٲرـ̡ ٭٭٭ وُڈاں گیایہِ نظر پانہٕ وُچھہِ پنُن انہار سُہ مۅہرٕ آسہِ ہے ٲنس تہٕ پراوِ ہے دیدار مےٚ زى۪و دِژٕکھ تہٕ بہٕ گوسکھ اگادِ اڈٕکول شُر زبان دِیوٝم یہِ سوسن سجاوِ مێون مزار سوال سٲلہٕ مٔتِس ازلہٕ آوٕلُن تہٕ شِکٲرـ̡ سفر چھُہ نوٝح تہٕ ناوٕے، مژر چھُہ سٲدروار یێلی یِوان چھُہ تێلی، نێٲوـ̡ پوش ہى۪تھ چھُہ یِوان وُجارٕ پتھرِ غنیمتھ چھُہ مٔتـ̡ مِزازٕ بہار قلم کِمامہِ یہِ کتھ چُھکھ وناں لۅبر لولو کراں سۅ کُکلِہٕ کراماتھ کوسمن چھےٚ ہُشار زرى۪ن کنن چھِہ پراں سٲنـ̡ سادٕ مٔتـ̡ گُلریز ژھرى۪ن مچن چھِہ براں یار ضربہٕ روستُے دیار قصیدٕ چُھو نہٕ پراں تل پتى۪ن یِتھَے عازمؔ امارٕ کٔہندِ چھِہ ژالان وۅپر وَتن ہُند مار ٭٭٭ وسان تہٕ وٲژ یہِ افتابہٕ کھاو خابن منز وُنل وُزیایہِ ونُک ون وۆلُن عذابن منز نٹى۪ن تہٕ کھسہِ نہٕ تُرَے چانہِ میانہِ تعشوقٕچ یہِ تہرِ ٹوک تہِ کاغذ کێمى۪ن کتابن منز ہۅکھَے رٕڈیایہِ سرن منز چھےٚ گاڈٕ وُٹھ پھیشان ستم نصیب سمندر ژماں سرابن منز گراں گرٲنـ̡ چھِہ خابٕکـ̡ کھلونہٕ ؤڈراواں مراں چھےٚ رٲژ ٲچھن منز تہٕ دۅہ دۅلابن منز تُلتِھ نِیَس تہٕ ہوا گوشہِ گوشہِ مندچھاوى۪س وچھس وُزِتھ تہِ چھےٚ خۅشبۅے وۅزُم گۅلابن منز دِلس چھُہ وون٘ت وُچھان از ستم ظریف قلم صبوٝرٕ وول مسٲفر لیۆکھُن بێتابن منز یوٕچ صُرَے تہٕ أزیُک اوم کھوس ہى۪تھ عازمؔ ورل سوال چھُہ تراواں سہل جوابن منز ٭٭٭ آیتَن ازلہٕ واوٕ ہالن وَن کالہٕ اوس پھۯستہٕ پھن٘ب پگَہہ پہـ̡ پہن زاو بالس تہٕ روو وٲنِج ہیو پۆت نظر دِژ نہٕ ژھالہٕ مٔتـ̡ آرن لٔج کُٹھِس منز کٔتِج تہٕ وُمبرن پى۪ٹھ ؤج نیبرـ̡ دٲر عشقہٕ پیچانن وَس تہٕ وسمت تہٕ نستہٕ وٲج کٔنِتھ مٲنز مسول متھان چھےٚ مس والن وۅنـ̡ چھےٚ غارن تہِ نارٕ ژھٹھ ژاپان رێشـ̡ تۅرگ تراوٕہن تہٕ ون رٹہٕ ہن ہوشہِ سان ہێۆچھ نہٕ پوشنوٝلس نِش مۅہرٕ دی دی زٕلاں چھِ زى۪و حرفن لۆدرٕ پھٔلـ̡ ہى۪تھ ملر سوار عازمؔ سۆدرٕ کھۅنہِ منز منگاں چھُہ ندرى۪ن پن ٭٭٭ ژے کیا تھى۪کی یہِ مسٲفر پننـ̡ وُڈو تہٕ پڑاو خبر نہٕ دۅہ کتہِ لوسى۪س، ژى۪تس نہٕ کتہِ پى۪ٹھہٕ آو گٕتَو گٕتَو چھےٚ یہِ کۅل بُتھ تہٕ بانہٕ ازماوان یپارِ گیٖر چھُہ وتہٕ گتھ اپارِ بٹھہِ چھس ناو دپاں سِتارٕ جرى۪س رٲژ ہُند زدل دامن چھُہ دۅہ تہِ درِ تہٕ پھژالس پھى۪رن شکھُر تہِ رٕنیاو سُہ دَور وُچھتہٕ چھُہ ما کێم̡ ژھێچن کتابن منز شۅنجییہِ زوٝنہِ زٕژن تل، وژھٲیہِ سِرـ̡ یہِ کھژاو وى۪تھَو وساں چھُہ ؤسِن،تھکھ اگر چھُہ گگراین ودن ہٹی نہٕ سٔہی، وۅتھ گى۪ون لہر ازماو لوَے گیَس تہٕ ژٕنى۪و مٔنزـ̡ چھہِ یسلہٕ تر دۯامتٕـ̡ نتَے یوَے یہِ ونُک ون مےٚ دۯینٹھمان دزاو أچھن متھان چھےٚ یمبرزل یہِ جاموارُک رنگ بہٲرـ̡ یاوٕ چھُہ وِرـ̡ کیۆم کران زٔری پٲراو وُتُش وى۪داکھ تہٕ سۅرنَے دِلس تُجِن دُبراے یہِ ہَے چھُہ سون سُہ عازمؔ، دپى۪وکھ ہَے سُہ ژجاو ٭٭٭ سرتلہِ سودا کس ییہِ راس بازر دۯاس اتھہٕ ہاوان آس مۅچھہِ منز ٲس ٹِکہٕ واوٕج رٲو بُتھہِ کۆڈ بُتھـ̡ ہُنـ̡ واون ٹاس دپوَے جۅیہِ کُس باڈو اوس یُپـ̡ دیُت بارو بٔٹھـ̡ کھى۪و تۯاس وُہنووُن وى۪تہٕ گژھہٕ وُن نار وۅش دۯاو وقتس خۅش احساس ان اتھہٕ کھن یتھ کنہِ پى۪ٹھ ناو ٲسِتھ گژھہِ دیُن آسن باس سوٝزا عازمؔ صٲبن ڈٲلـ̡ چکہٕ چاو اوسوٝ لۆبوا لاس ٭٭٭ ہی تھرِ بامن وُلوِتھ واو ژۆل زن، کُنہِ وۆتھہٕ سُرٕ بنہِ کاو أچھـ̡ موٝراں وُچھ دۅہ کۆت ووت ٲدی ہے اختابہٕ کھژاو خندٕ کرٕ ناواں چندٕ ژھیۆن پوژھ مۅکھتہٕ دپیوہم رٹھ سۆمبراو أسـ̡ پھٹـ̡ زٲڈِس منز ننہٕ وٲرـ̡ تس اوس گُر گۆند عاصہٕ تہٕ کھۯاو ہاوسہٕ وۆو اسہِ کاوُن ڈون ٲکـ̡ دۆپ زاو، أکـ̡ دۆپ سُہ دزاو وۅلرو لۅلہِ منز للہٕ ناوُن کٔلـ̡ لیۆکھنَے گۯاین پى۪ٹھ ناو وتہٕ بدلنہٕ چھا پٔدـ̡ شیہلان مۆت مُلکس مُلکس پھیریاو یاوٕنہٕ روٝٹُھے یاون راے بـێیہِ ما ٹوٹھی بر ؤتھـ̡ تھاو ٭٭٭ خلقن زن اوس حلقن گنڈ ملکن کوٕ لٔج تالس زى۪و کۅلہِ گٔیہِ گلہِ زى۪و نۆٹ کوٕ پُھٹ کتھٕ گرِ دپھ ادٕ اتھہٕ منزٕ پى۪و تھجہ مژِ وِرِ گو وٲنجہِ ژس کجہِ زى۪وِ کیا وۆن کوستوٝرى۪و زلرى۪ن زامٕتـ̡ بٲزیگر دابہٕ دۆبوٝس ازماواں دى۪و ٭٭٭ ازلہٕ ابد سمسار اۆنہٕ مَے منہٕ وٕنہِ دلِ بیدار اۆنہٕ مَے صبحٕکہ وچھہِ شێہجار اۆنہٕ مَے شامٕکہ نبہٕ دندِ نار اۆنہٕ مَے سونتٕکہ شہہٕ سبزار اۆنہٕ مَے جگرٕکہ چھۅکہٕ وۅزجار اۆنہٕ مَے مژِ وزملہِ ہنز راس رٔٹتھ اوبرٕچہ راگہِ سوار اۆنہٕ مَے کۅہہٕ تٲرِتھ گوم اڈوتہِ رأسـ̡ اۆنہٕ مَے نہ تہٕ صد بار اۆنہٕ مَے حى۪س چھُیہِ کس گتھ ماراں لوٝس پکھہٕ پُھٹ جاناوار اۆنہٕ مَے وِلہِ وِلہِ ٹوٹھییوہم نا شٲہد پۯون اخبار اۆنہٕ مَے حرفس حرفس ٲنہٕ گورُم ژێـ̡ چونُے انہار اۆنہٕ مَے پژھِہ دِتہٕ از وژھہِ وٲنجہِ واس مژھہِ کھش دِتھ شہکار اۆنہٕ مَے ہٲنگنـ̡ تہہٕ تہہٕ مژراوُن عازمؔ صٲبُن شعر اۆنہٕ مَے ٭٭٭ مٔتـ̡ ورٕ میانہِ چھہ روشاں زى۪و کمہِ گفتارٕ چھہِ شعر پھولاں گریشمہٕ کہ تاوٕ چھہ لوٕ وۅپداں لوِ ہندِ نارٕ چھہِ شعر پھۅلاں بێیہِ گو تُلہٕ کترِس گُمہٕ سران نوِ وى۪وہارٕ چھہِ شعر پھۅلان ہردٕکہ وچھہٕ پھٔٹ کۆستوٝرـ̡ بولـ̡ سونتٕکہِ رۅیہِ چھِس شعر پھۅلاں ٭٭٭ ہردٕ وٲے ہردٕ رٲچھـ̡ دردٕچ نَے بونہِ پۯوو پن ۂرِتھ بہارُک پَے رایہِ چانی چھُہ میانہِ آنگٕنہ زول مایہِ چانی چھےٚ سانہِ گامہٕ دِوَے کر اتھس تھپھ تہٕ ستھ سمندر ہى۪تھ پروتن ہِندـ̡ سفر تہِ سپدن طَے تاپہٕ کراین چھےٚ از اۆبر سۅ وُڈنـ̡ شین وى۪گلیوو یێمہِ چہِ گرایہِ دۅہَے پہرِ پوشِن مےٚ چٲنـ̡ پٔدـ̡ پمپوش وارِ ہندـ̡ پوشنوٝل رٔچھـ̡ نَے دَے وى۪تھ چھےٚ پانس پنُن سفر پالان شاٹھ شاٹھس تھى۪کان چھُہ مانٹُک پَے بالہٕ آرس چھےٚ سودرٕ کھۅن پراران نیٖرـ̡ شێہجارٕ میانہِ! گرٕ چھُہ گرَے کینہہ مہٕ پرٕژھ عازمؔن خدا رٔچھـ̡ نس نارٕ بالس اندر چھےٚ نالان نَے ٭٭٭ أچھ گاش ژٕہان آیہِ أچھن منز مےٚ بٔرٕم راتھ سۅے پرٲنـ̡ سپار ٲس بدل آیہِ پٔرٕم راتھ پے آم دُہٕلـ̡ گاشہِ ژٔندٕر کڈِ نہ بُمن واش کھۅر تل روٹم افتابہٕ تٔمی آنہٕ تُھرٕم راتھ لرٕ کانہِ پھٔٹٕم یام تہٕ لرٕ کانہ پھچایم اچھٕ دارِ مژر اوس اچھر ڈولہِ بٔرٕم راتھ تِژھ تٍر یوان ٲس زِ رتھ شِٹھہِ ہے رگن منز اکھ پۯٲنـ̡ چِٹھیا چٲنـ̡ ہُتى۪ن دارِ مٔرٕم راتھ اکھ ساتھ سُہ ٹوٹھیوم زِ اکھ طوٝر دٔزِتھ پى۪وم اکھ گاش پُزُم راتھ تہٕ اکھ لاش ؤرٕم راتھ اکھ طفلہٕ نظر باز تہٕ کُل عُمر تہٕ پرتیٖتھ ہے ٹٲنہٕ ژٹن والہِ یہ کۅسہٕ گراے پھٔرٕم راتھ پمپوش سپٕدـ̡ ژٲنگـ̡ ڈلس نارٕ ملر ؤتھـ̡ نِچہِ گاڑِ نژُن کۆر تہٕ کراماتھ سٔرٕم راتھ تٔتھـ̡ دارِ ہنگس اوس اویزان سُہ عازمؔ تہدار تسٕنز بٲتہٕ لہر فکرِ ترٕم راتھ * اوبرٕ لِشا ٲس، اسہِ دۆپ کینہہ پێیہِ، أچھ لجہِ درٕ اسمانس کُن نظرٕے زٲجِن، ژھایہ تہِ آیہ نہ سٲنِس یتھ وٲرنس کُن کتھ چھنہٕ ونہٕ نٕچ، دتھ گیہِ خابن، کتھ شمہس پتھ راوٕر وٲنس گاہ ژول چشمن بۯى۪م دِتھ پانس، رێہہ پٔچ رسہٕ رسہٕ جانس کُن یہ تہِ چُھنہ وُپھنٕچ تۅژھ کیا ٲس نہٕ، یا ونہِ کیا اوسُم نہٕ شِکٲرـ̡ والہٕ بٔرِس منز زنگ پھٔسرٲوٕم، کل روٝزٕم پھل دانس کُن منہِ پھۆرمُت سٔنـ̡ ژور بےٚ شوٝنکھِس، تنہِ گیہِ ہنہ ہنہِ یرٕوٕنـ̡ ناو ڈى۪کہ نۆمراواں مى۪حرابس کُن، اتھہٕ چھُہ گژھان مس بانس کُن تس چُھنہٕ وقتٕچہِ أچھ بُتھ وُچھمُت یۅس مےٚ چھےٚ بختس ٹوٹھیمٕژ وِلہ وِلہ غزلن منز مۅلہٕ نٲوٕم، گِلہِ نیو گِلوِتھ پانس کُن لوٕ پھیرـ̡ أکـ̡ کٔر سٔدرٕچ باوتھ، پۯوِ اکہِ ؤنـ̡ اختابٕچ کتھ دِل پرٕنووُم کنِرُک ہوٝ ہوٝ أچھ لوسم بُت خانس کُن ژھاراں نیرِ تہٕ کۅم کرِ واوس، پۯٲوِتھ پھیرِ تہٕ سورى۪س تێہہ اسہِ پھۆر شوقس مس مۆت عازمؔ وٲتـ̡ نہٕ تس دیوانس کُن ٭٭٭ شمہٕچہِ رێہہِ سٍتـ̡ چھووُم شام شفقٕکہِ بُتھہِ وۅشلووُم شام ہۅکھہِ متہِ ہٹہِ وۆنمس کیا تام عٲرقہٕ ژھٹہِ أدرووُم شام ییلہ آم ژٔندرُک پے ہى۪تھ آم رى۪تہٕ پتھ رى۪تہٕ ازمووُم شام لۅژِ لۅژِ کتھہِ لۆژرووُم بوس گۅبہِ گۅبہِ شہہٕ گۆبرووُم شام مۅچھہِ مۅچھہِ بۆرمس مۅختہٕ ہلم سۅچھہِ بلہٕ کۅچھہِ للہٕ نووُم شام زخمو پننى۪و کۆرمس زوٝل چشمو چانى۪و چووُم شام رژھہِ رژھہِ زولُم خونِ جگر مژھہِ کھش دِتھ رنزٕنووُم شام پژھہِ اوس کٹھکۆش وى۪گلاوُن وژھہِ وٲنجہِ وُہنووُم شام متھ گوم برٕہن شعرن منز اتھ کتھہٕ کتھہِ منز رووُم شام وقتس تورُم ارٕور تار صبحٕکہِ سِرٕ برى۪مرووُم شام نالس جۆرمس تارکھ نب سحرٕچہِ گرِ وُزنووُم شام یێمہِ کتھہِ حرفن وٲنج پھٔٹ تمہِ کتھہِ حٲرتھ کھێووُم شام چشمن منز گِندٕنووُم تاپھ سیٖنس منز شى۪ہلووُم شام صبحے سوزن تاپس ڈٲلـ̡ راتس کھۅنہِ کى۪تھ سووُم شام زن بہٕ تہِ اوسُس عازمؔ صٲب کم کم وہـ̡ کرٕنووُم شام ٭٭٭ اۆبرٕ دى۪و نَے کاسہِ منتھا تھاوِہے وُزملٕے کرِہے، أچھی شیہلاوِہے آبہٕ جۅے نَے ٲس صحراوس ڈى۪کس شبنمٕے سُلہِ ژیرـ̡ وُٹھ أدراوِہے تاپھ زٲلتھ تراوِ یا شٹھٕراوِ شیٖن زانہہ یہِ موسم تێہہ حدن منز تھاوِہے آفتابس شێہلہِ ہے عٲرق ڈى۪کس زون ہَے ٹِکہٕ واوجا نژٕناوِہے روٝدٕ رانٹھا نےَ ژھرٕے ژھایی سٔہی یتھ الاوس کُن تہِ کێنہ پُشراوِہے کاڈ کڈِہے کانہہ قلم بالا قدس بُت پرس عشقس ألف پرناوِہے ہے بہٕ کُس یوسف، بہٕ کتھ کیٖرس اندر کانہہ یمن قاتل کۅہن نہناوِہے ہر مۅکھس یُتھ گۯایہ کرٕہن تالہِ میوٹھ قلزما انہِ ہے، ڈلس منز تۯاوِہے ہُتھ نبس کرِہے أچھر والو پریُن یتھ بے حى۪س بترٲژ کانہہ دٕنِراوِہے مۆت، دُپہرن مالہٕ کرہے تارکن شامہٕ پٔتـ̡ چھِٹہِ پونپرِس نژٕناوِہے پھۅلنہٕ وقتن ولنہٕ ییہِ ہى۪س واو زن اسہٕ وٕنس ٹوٝرِس تہِ بۯۆڈ کڈٕناوِہے ہرونِس پوشس تہِ پوشن پاے دِتھ شبنمس سادس ودُن مٔشراوِہے پننہِ پاگل نظرِ وٹہِ ہے توسہٕ تۆمبـ̡ شوخ مغرۆرس وتن وتھراوِہے مى۪ون ہیوٝ پھۆر تس تہِ آلژھـ̡ ٹینگہٕ وونـ̡ حرکتھا کرِ ہے، وتھا ازماوِہے شعر چھا اڈٕ ژاپہِ علِمُک بالہٕ گرى۪ز عازمٕؔنـ̡ پٲٹھى۪ن غزل ورتاوِہے ٭٭٭ دارى۪ن پردٕ سجاوان ٲسـ̡ گاشس للہٕ وُن تھاوان ٲسـ̡ تۆبروٝکھ ٲسـ̡ تمہِ شہرٕکـ̡ لوٝکھ تالو ٹنگ سۆمبراوان ٲسـ̡ ٹینکہٕ بران ٲسـ̡ وارى۪ن منز گٔنزراواں گٔنزراوان ٲسـ̡ ناون اوسُکھ ژامُت آب کٔدلن ٹھٹھـ̡ لہراوان ٲسـ̡ حُسنس پننِس زالاں ژھاے ٲنن دُہ دِوناوان ٲسـ̡ قبرن ٲسـ̡ کرناوان ٹیٖپ کفنن تِلہ جرناوان ٲسـ̡ خٲبـ̡ أندٕرـ̡ ٲسـ̡ لایان مُش ولہٕ ویرن الراوان ٲسـ̡ اتھہٕ بُتھ چھلنَے بانگ پٔرِتھ مسجدِ منز لر تۯاوان ٲسـ̡ بٲیِس ژھێیہِ تل تھٲوِتھ ژونگ بارٕنـ̡ اتھہٕ وُشناوان ٲسـ̡ دۅدٕ کۅلہِ مۅکھہٕ ٲسـ̡ بال کھناں امرى۪تہٕ جۅے پُرناوان ٲسـ̡ دۅدٕ ہى۪ڈرن ہندـ̡ بُتھـ̡ پھِرـ̡ خاب مٲنتھٕر دی دی ساوان ٲسـ̡ أندرِمہِ لیہِ ٲسـ̡ چیراں ہۆٹ نێبریُم جٹہٕ جۆش چھاوان ٲسـ̡ جودوٝگر گۅنماتھ تتِکـ̡ کتھہِ روس کتھ ابساوان ٲسـ̡ منہِ مٔچھـ̡ ٲسٕکھ میٲنـ̡ شبیٖہہ ہُنـ̡ قبرن پُشراوان ٲسـ̡ ٭٭٭ یێتہ وٕنـ̡ ہٲرِتھ آس تتہِ کیا چوم تہٕ ہاے رُمہٕ رُمہٕ آبِ حیات گُمہٕ پۯیڈیوم تہٕ ہاے پۯوِ کوڈ تھرِ پى۪ٹھ کاڈ لوٕ ؤژھ واوس سٍتـ̡ تٔتـ̡ نٕے تاپہ ٹیۆکا مےٚ تہِ مازیوم تہٕ ہاے ۂندریمٕژ دُبراے، وۅندِ ٲسـ̡ ژاپاں داغ وُزمل ٹوٹھێایم، وَٹھ وى۪گلیوم تہٕ ہاے تنہِ ہٕندِ آگرٕ آس من سرچٲوِتھ راتھ طوطس زاگل بیور پادن پیوم تہٕ ہاے چھژِ یمبرزلہِ پوٝر چھِٹہِ پونپورِس پان ہٲرِتھ تمہِ دربارٕ حٲرتھ کھیوم تہٕ ہاے تیۆنگلس لٲرِتھ گوس ژُہمس وُہوُن بوش کتھہِ کتہِ اۆن شێہجار متہٕ پرژھـ̡ توم تہٕ ہاے کٹھکۆش اوسم بارِ سونتھٕے روشایوم چۅغہٕ ناموٝسُک راتھ بٔنزرِتھ کھیوم تہٕ ہاے شرزٕسٕنزِ فطرٔژ زاس مزٕ مزٕ ژٲپٕم زوٝن ژٔندرُک بۯونتھٕے گوم تۆندرٕ تتیوم تہٕ ہاے تێلہِ ٲسـ̡ وِرکێمـ̡ پوش تێلہِ آس ہی پھۅلنے ہردٕ گى۪واں مۆت شوق وٕنـ̡ سمکھیوم تہٕ ہاے کھسہٕ وُن دۅہ راویوم ژھاین اتھِ کھیاویوم عازمؔ وتہِ سمکھیوم ڈى۪کہٕ پۯزلى۪وم تہٕ ہاے ٭٭٭ پٲزٕ ارمان دِتِتھ، تازٕ وُڈن پکھ تہِ دِتم ژےٚ ہِوِس پایہِ بڈِس شوٝبہِ نہٕ اُکہٕ توش کرم کالہٕ اوٝبرس چھُہ ننی راگہِ کھسُن مێون پسند وُزملن تھٲپـ̡ کرِتھ یَنہٕ مےٚ وُٹھنـ̡ تجـ̡ لاکم مےٚ چھُہ وُچھمُت سُہ أچھو نارٕ وى۪تھن تارٕ تران متـ̡ کتھا اوس وناں شوق چھُہ موتس محرم تن چھےٚ ییران مٔتِس خابہٕ ۂتِس فضہس منز زیٖن ما چارِ ستارن تہِ مےٚ ہیوٝ شوخ قدم سُہ گۯزاں نیرِ تہٕ سٕہہ گۅردٕ چھہِ سپداں دمہٕ پُھٹـ̡ چھِٹہ پونپر پکھہٕ داران سُہ یتى۪ن تۯاوِ قدم کم نظر دۯاکھ تہٕ باسیوے سُہ مۆہ ہیو یێران مےٚ ژى۪تُرمُت چھُہ سُلی تس چھےٚ کتى۪ن تھپھ محکم شاد مس رقص کراں وُچھ مےٚ پتھر خون تسند ژٕ خبر کیازِ کراں دۯاکھ تمِس پى۪ٹھ ماتم أزـ̡ کہِ شبہٕ آو مےٚ بێیہِ پیش سفر زانہِ خدا دارِ پى۪ٹھ ژٲنگـ̡ ہنا تھوـ̡ زِ ژے چھےٚ مێون قسم أنہٕ کپٹاں چھُہ زٕژن سون مظفّر عازمؔ پوشہ برگن چھُہ سُواں چاکھ سُہ الماس قلم ٭٭٭ لوِ کٔـڈ نوِ سرٕ سونتس کل لالس کونچُھن دلہٕ شیہجار پروِ بۆر بێیہ از بانبرِ ہۆت یمبرزلہِ ٹارى۪ن منز نار کۯہنِس اۆبرس وچھ پۯزلیوو وزملہِ کۅسہٕ کتھ کٔر اظہار کچھہِ منزٕ ؤنـ̡ رووُم اچھہِ پوش چشمو ژوپُم کٔنڈـ̡ انبار ٭٭٭ تماشہِ کیا چھہِ تگاں نوبہارکِس واوس زِچھر تہٕ مویہِ چھژر لوگ ٲکِس زٔنِس داوس ۂجی نظر تہِ سۅ تۯاوى۪م تہٕ ماگ وُشناوى۪م کٔجی بیاض تہ ہاوس تہٕ ہار شێہلاوس شفیق شوخ مزازس چھُہ سوز ساز پسند بہٕ ٹورِ ٹورِ گُلن ہند اسُن کنَو چاوس خیالہٕ کٔہندِ کراں زول چھکھ شبستانس امارٕ مێانہِ وۅتھی یُتھنہٕ ٹیب پٲراوس یہِ سِر اگر بہٕ ونکھ بارٕ کٔنڈـ̡ ژھٹن خۅشبۅے سُہ پوشنوٝل ووان اوس بولـ̡ صحراوس دپس مےٚ زون ژےٚ کٔمـ̡ لولہٕ خابہٕ مُر بۆرنے اگر ثبوٝت منگى۪م عازمؔن غزل ہاوس ٭٭٭ تاجہ تختس لگى۪م پُھلے بختس واجہِ کۯانکس اگر ژٕ لێکھہم ناو سوسنٕچ زى۪و چھےٚ چٲنـ̡ شێچھ باوان چون پٲراو کوسمن ہند کراو شامہٕ تارُکھ امارٕ آیوسے شفقہٕ نارو ژٕ کٔرـ̡ زِ ہے ٹھٔہراو تاپھ چھووُم تہٕ گاشرٕم ہن ہن میانہِ پُژِ آفتاب پھِرـ̡ پھِرـ̡ دۯاو شالمارن چھےٚ کالہٕ اۆبرٕچ ژھاے ڈل ہواوو پنُن اثر ازماو نارٕ بالن چھُہ تُلہ کتُر لۆگمُت میانہِ بترٲژ کٔٹھـ̡ شہ ووگ رٕڈیاو ٲس دٲرِتھ وُچھم ششر گانٹن تۯیش ہى۪تھ یُن گوژھُکھ بہارُک تاو ٭٭٭ زُنہٕ گاہ پنجرٕچہِ لٕیہِ کنـ̡ ژاو کمرُک کمرے وۅلسنہٕ آو ہی تھرِ لنجہِ لنجہِ پى۪ٹھ اوس شین سونتہٕ ہواوچہِ ژنجہِ وى۪گلێاو آنگن منز کۆڈ سرون کاڈ دۅسہِ ہند بُڈٕ نلہٕ وۆٹ وۅشلێاو کارِ وۅگنـ̡ کۅکرن دژ بانگ دارِ دمس پى۪ٹھ رو پرزلێاو تھرِ ہند لوٕ پھیۆر دۯمنس ووت ہۅچھہِ مژِ کانجہِ نۆو تر دۯاو نۆژ بُربتنہِ تہٕ ژھٹہِ کۅڈ واش سُرٕ بنہِ بۯادیوو نارٕ الاو کچھہِ مٲدانٕکہ مہرازو اچھہٕ پوشو وۅتھ تن مشکاو کۅنگہٕ تێہجہِ چھےٚ ٹوٹھیمٕژ زوٝن ہردو! رٹھ نۆو وردن چھاو ٭٭٭ وکھ چھہُ از بخ بى۪دار، پێالہٕ تُلِو سالہ آو بالہ یار، پێالہٕ تُلِو سۅ شہِج مٲرـ̡ منز گۅلابٕچ رێہہ بہٕ وُہاں مۆت امار، پێالہٕ تُلِو سۅ حیا ویٔژ تہٕ زى۪و ژھنِن نینگلتھ بہٕ ونِتھ گوس خار، پێالہٕ تُلِو کوسمو لوسہٕ نوو بوسو سٍتـ̡ لالہٕ چھا داغ دار، پێالہٕ تُلِو از تہِ عازمؔ چھُہ پێالہٕ رۆس ٲسِن کتھ لگن شرم دار، پێالہٕ تُلِو ٭٭٭ زوٝنہِ پتے تارکھ ؤڈرٲوِتھ تۯٲوٕم زۅل تنہٕ گو وقتا ینہٕ دل سٲوِتھ تۯٲوٕم زۅل أزـ̡ کہِ غمٕچ تلوار کٔرٕم شاہ رگہِ پى۪ٹھ تیز پگہٕچ بیقٕل ستھ کترٲوِتھ تۯٲوٕم زۅل زیٖن کورُم دیوارس دۅدٕ مجنون کھۆتُس کۂـ̡ یا دجہِ مہرێنہِ پُژنٲوِتھ تۯٲوٕم زۅل کیا کیا وۆن سرسٲوـ̡ ٲچھو زى۪وِ توگ نہٕ پِھرُن زى۪وِ تہِ أچھن ہند سۅرمہٕ لگٲوِتھ تۯٲوٕم زۅل یُتھنہٕ تۯٕیو کِنـ̡ تاپھ اژى۪م مژِ نێندرِ پھرى۪م دارِ برٕے کیا لٕیہِ تۯپرٲوِتھ تۯٲوٕم زۅل دل ما تمبٕلى۪س، بولہِ، تہٕ صبحے نێندرِ پھرى۪م قُمرِس راتہٕ مۅغُل ۂسرٲوِتھ تۯٲوٕم زۅل ڈلہٕ وٕنـ̡ دِگرن پھۅلہٕ وٕنہِ صبحچ تۯاے رٔٹٕم زلہٕ وٕنـ̡ اکھ مسول برى۪مرٲوِتھ تۯٲوٕم زۅل خٲبـ̡ أندرـ̡ دُبراین ٲسٕم پوشہِ پُھلے لوچہِ کٔمِس تاں نالس چھٲوِتھ تۯٲوٕم زۅل ونہِ یێلہِ کوڈہس کنہِ کنہِ کۆرہس ہم سفرو کنہِ سۆمبرِتھِ اى۪ہرام بنٲوِتھ تۯٲوٕم زۅل فنکارس أکـ̡ کٲکـ̡ تگن گۆر کۆرنم ناو بى۪اکھ غزل تس للہٕ وُن تھٲوِتھ تۯٲوٕم زۅل ٭٭٭ منہٕ سودرس ینہٕ گٕتھ وولے یم، تنہٕ ووتُم تلواس نێندرِ ۂتِس چُھم نى۪کہٕ نى۪ن ژاناں خابن ہند ڈبہٕ ڈاس کۅم کرٕ بالس، تھٲپـ̡ ہواوس، زوٝنہِ زٕژن کرٕ ڈینگـ̡ ہلہٕ بسملا، ہلہٕ بسملا، وُچھ کتھ سفرس دۯاس پِشنس گۯیشمُک زر وى۪تراواں برجس ٲسِم پوش ڈلہٕ وٕنہ دِگرُک گلِ دُپہر ہیوٝ ژمٹاں ژمٹاں آس ٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭ خریدارس مۅلُک انمان رووُم شہر سومُم تہٕ شاہ سُلطان رووُم بہٕ روٝدُس عازمؔس ژھاین دِواں ؤنـ̡ یۆتاں دۅہ ڈول تہٕ، ہے ارمان! رووُم ٭٭٭ بختس گِیُندنس وقتٕکـ̡ پھیرن شالہٕ ٹنگن کرٕنووُن واہ بوزو جب کر امہِ دبہٕ نیرن نَیہِ گو دٔدون نیرِس داہ ٭٭٭ ژھلہٕ گٔرـ̡ قلمن لیوکھ سرابس یُس دِیہِ أنـ̡ تھوپ سُے لبہِ مانٹھ لُکہٕ متـ̡ ہٕکہ ژھنـ̡ وۅٹھ گردابس کُس لگہِ شاٹھس، کس تگہِ ژھانٹھ ٭٭٭ دپێوہس گژھ بتل یژھـ̡ نے ژےٚ چھاونـ̡ سُہ گو بڈـ̡ بابہ نِس بۯاندس اویزان دژوہس ٲنہٕ ستھ اسمان وچھنُک بچارس ٹھۆر أچھن اوسس پنن پان ٭٭٭ جوٲنی منز چھےٚ دارِ بسان دارى۪ن منز بُجرس منز چھہِ آنگن اکھ أکِس پشان ٭٭٭ دٔرـ̡ یاو چھُہ یُپ ہى۪تھ یواں اورے مگرتۯیش ہى۪تھ نہٕ تۯیشہٕ ۂتس چھےٚ کٲر پى۪وان نۆمراوٕنـ̡ ٭٭٭ واو تگی نا مۅچھہِ وى۪پراوُن ! نار تگی نا کۅچھہِ للہٕ ناوُن ! تیلہِ کس آیکھ برى۪م دِنہِ؟ لٲلـ̡ ! ٭٭٭ سٲنـ̡ مشید چھےٚ مٲرـ̡ مٔنز واے ! اگر اتھ امام تہِ آسہِ ہے ٭٭٭ أسـ̡ چھِہ صفا پسند گٔژھـ̡ نا آسٕنـ̡ صفٲیی چھےٚ ژمہِ ۂنز شوب ************************* وى۪تھ ییلہ بٲلـ̡ وسان ٲس یاون مٔژ تنہِ اوسُس واوجہِ واو کراں گۆن یارِ شہُل وتہِ ٲس کنى۪ن، کھۯاشن، کھمبرى۪ن لۆت چھہـ̡ دِتھ شفہُک اتھہٕ ڈالاں وُٹھ پھیشان وُچھِہ ہے کٲنسہِ تہٕ وُٹھ مٔدراوِہے تس بٹھہِ بٹھہِ ٲس لوٝبان نیٲوـ̡ پُھلے لنجہ لنجہ پى۪ٹھ ٲسـ̡ کۆستورـ̡ گى۪واں پونپوٝرـ̡ وُڈاں ہی ٲس وِساں مێـ̡ ٹوٹھیمٕژ چھےٚ یہ بختہ شِہج مستانہٕ قداور رٲیل اوس ٲمـ̡ سٕے پاردـ̡ گترینہِ سٍتى۪ن پنہ نى۪ن ژھاین ور وُٹھـ̡ نہِ دِواں مٔژ ٲس چھِوَر مس چى۪تھ آساں مۆت شوخ بےٚ سۅکھ یاوُن چھاواں سہُ تہِ اوس دۅہا وى۪تھ وٲژ یہ وۅنـ̡ سٔتریرس منز امِہ پۯوو سنى۪ر، امِہ پۯوو کھجر اتھ روٝد نہٕ وۅنـ̡ مدٕ مۅت لوچر اتھ رٲو سۅ تێہہ تہٕ سۅ پارٕدـ̡ خۅے نہٕ چھُہ پان کھیَن کھۯاشن چھاوُن نہ چھُہ رٲیِل ژھاین ور دیاوُن وُٹھ پھیشان ہَے ییِہ تۯیشہ ہۆتا وُٹھ أدراوى۪س ژرِ آلہِ منزے پێیہِ گاسہٕ کۯٹا للہٕ واں پکناوى۪س شانن پى۪ٹھ ٭٭٭ تھر بُتھ ! نوَم نۆوُے سوٝٹھ لٲگتھ پھِرـ̡ پھِرـ̡ اوس پانس بُتھ وُچھان یوسفنٕس ٲنہٕ خانس منز نہٕ پلاسٹک سرجن سندِس کوچس منز وۅتلان تہٕ بۅڈان وۅتلان تہٕ بۅڈان اژا ! اژا !! اژا !!! ٭٭٭ ألف ألِفا ! سێدِ قدٕ قامتہٕ والیا ! ژٕے چُھکھ مێانى۪ن چشمن گاش ب پ ت ث، لرِ پیمٕتـ̡ کێنہہ پھیرى۪ن پى۪ٹھ، کینہ پھیرى۪ن تل جیمس چیمس عٲنس غٲنس کٲوـ̡ گمٕتـ̡ قافس نوٝنس یڈ درامٕژ دالس ذالس کۆب ژامُت کیفس گافس لامس میٖمس کٲنسہِ نہٕ بختس چون سێزر یا چُھکھ ژٕ، زِ یتھ حرفہٕ صفس پى۪ٹھ کُن چُھکھ سێدِقدٕ قامتہٕ وول یا چُھس بہٕ، زِ یتھ اچھرٕ دُپھس منز ژٲرِتھ رۆ ٹمکھ ژٕے تہٕ بێیس مازیوم نہٕ دل ژےٚ تہِ نہٕ دۆیُم تہٕ مےٚ ہیو تہِ نہٕ بیاکھ ارمانا بۯادى۪وم زِ چٲنس کُنِرس انہٕ ہا لولٕچ ڈٲلـ̡ چإنِس نوٝرانس لى۪کھٕ ہا اکھ حمدٕ سپار قلم تُجوم تہٕ کتھہِ گو رۆٹ ب پ ت یہِ روس کتھہٕ کنـ̡ ہێکہٕ دِتھ لفظن واٹھ؟ چٲنِس ژٔھرـ̡ سٕے الـ̡ فہٕ قدس لرِلرِ پھِرواں لٔب قلمن زى۪و ب پ ت کیا نازلہٕ الـ̡ فا ! یہ تہِ ما چُھکھ ژٕے تۯٲوِتھ ڈاپھ عٲنس غٲنس منز ما چُھکھ ژٕے اۆکہٕ ڈۆنگ روزتھ قافس نوٝنس منز ما چُھکھ ژٕے کۅچھ وہرٲوِتھ کیفس گافس منز ما چُھکھ ژٕے پانے پانس ڈکھـ̡ تھاواں حرفس حرفس منز ما چُھکھ ژٕے وِہـ̡ بدلاواں الـ̡ فس منز تہِ چھُہ لاما فےیا لامس تہِ چُھ الـ̡ فا منز باگ کُنہِ نندٕ بانیا ! چانى۪ن انوارن لێکھہٕ ہا اکھ حمدٕ سپار کتھ حرفس ہێکہٕ بى۪ن وى۪ترٲوِتھ؟ کمہِ نشہِ ہێکہٕ دامانہٕ بچٲوتھ؟ ٭٭٭ ترُک؟ أزیُک اخبارتۯُکنہِ آو تہٕ خبر وُچھتھ گو س دُژیۆت ترُکہٕ نے تہٕ نشس کیا کرٕ ! ترُکَےتہٕ ناو کێتھہٕ نیرى۪م ! خبر ٲس : ”تیار اخبارچھُہ راتو رات تۯُکان یێمہِ کنـ̡ یہ واریہن پرن والى۪ن تام واتاں چُھنہٕ سى۪ٹھا تۯُک چھُہ تہٕ کانہہ ژھل چُھسنہٕ پوران عامن تہ خاصن ہنزِ زى۪وِ پى۪ٹھ آس پنُن ناو نژان بوزنہ پۯاژٕ آیس وہراونہ گونژھ گٔیَس دندن تل ... اخبار دۯاو ٭٭٭ زاڈیُک پوش زاڈِکہِ پوشہ ! تٕرنِس آبہ ڈلس منز وُٹھ کملٲوِتھ روز پیچانس کُن وُچھـ̡ وُچھـ̡ یِنہٕ گُمہٕ سٔرـ̡ گژھہ ہم پیچانس چھُہ رزن تھپہٕ دی دی ٹینٹھل ٹاور وُچھنُک شوق پیچانس چھُہ أچھی أچھ پان زاڈِکہِ پوشہ ! چانہِ وجودٕچہِ خۅشبۅیہِ ہند مۅل زانہِ فقط صبحک شۆد واو کچھِہ کۅتھہِ منز یاوُن رژھرووُتھ دکہٕ ملرن ہندـ̡ ہلہٕ وى۪ترٲوِتھ پاگل واوُک لتہٕ کرم ژولُتھ ادٕ ہے زانہہ کُنہِ ہِلہ وتھرٕچ شێہلتھ ؤنـ̡ رٲوٕتھ تمہِ کێے آمہِ پنٕچ کل تھٲوِتھ دگ لۆژرٲوٕتھ زاڈِکہِ پوشہ کارِ وۅگُن چُھکھ راونہٕ چانے أکـ̡ سٕے ہِلہٕ وتھرس تہِ وچھس سنہِ تاپہ تیۆنگُل چانہِ ورٲیے أکـ̡ سٕے گۯایہِ تہِ باسہِ پنُن ژھۆر سینہِ تُرُن تیلہِ دپھ فٲنی کاے کھتٲوٕتھ، مُل مُژ پۯووُتھ ڈلہٕ کس آبِ حیاتس چونُے کارِ تھزر شێہلاوِ جگر ٹینٹھل ٹاور کرـ̡ تن کۅچھہِ کۅچھہِ پنہٕ نے متہِ پیچانچہِ أچھ ٭٭٭ کۆل کۆستوٝر نہ چھُہ تاپھ پى۪وان نہ چھُہ واو ڈلان کتھ کیٖرس منز کۆستوٝرِس کۆرہم اول عطا کِژھہٕ کۅہ ہِشہ قٲتل لبہٕ أندـ̡ أندـ̡ تاپس چھےٚ نِوان زٕژٕ ہیر کڈِتھ واوس چھےٚ ژھنان پر پُژنٲوِتھ یێلہِ دوٝرِ چھُہ کانہہ افتابہٕ وُہاں چہہٕ أندرٕ چھُہ مۆٹ انہِ گۆٹ ۂندران یِمہٕ زٲج چھےٚ ژاپان صبحُک پے کھسہِ گوشن نغمہٕ تہٕ وۅگہٕ ژاپى۪س پھسہِ بولـ̡ وچھس منز، وٹھ سپدى۪س ٭٭٭ پۆت دِگر مانو بۯى۪مہٕ رێنہِ زوٝنہِ ہندس شِہلس انہارس سورِ نہٕ جود سٔدرٕے زنہٕ آو کُنہِ دۅہہٕ وٲنسہ سورے یس مٔژ یاون تێہہ تێلہِ کتھ گژھہِ تتھ گاہ ونہِ کڈـ̡ تھٕے ؤتھـ̡ ؤتھـ̡ پھۆر سٔدرس سپدن گۯایہِ بےٚ سۅر کاڈ کڈتھ وُلمنہِ کھسنٕچ روزى۪س نہٕ سکتھ زگتس ہێیہ سۆت سوو سکوٝنُک سوٝر پھۅلُن سٔدرُک سٔدرٕے شِٹھہِ تُلہٕ کتریُک ٲنہٕ پۆٹا ہیو زوٝن مدے گنڈِ ٲنہٕ پٔٹِس پۯون ٲمیُک وُپھٕ وُن پھۆرکورى۪س وچھہِ کانى۪ن منز یادُک وٹھ ٲنہٕ پٔٹس پى۪ٹھ آسہِ فقط اکھ تھلہِ تھلہِ وُچھنُک باس دپکھ یہ چھُہ نظرِ نى۪سنگاہ لوگمُت ٹھل دے رٔچھـ̡ نم تس سۅے یُتھ عالم ڈیشہ تٔمِس پێیہ سٲنـ̡ ٲدِچ سمکھن وِز یاد ٭٭٭ ونہٕ واندُر تس اوس بالس کھسان کھسان ٹھینچہِ وسان عٲرق پان اوسُس لۅتان آگر پٔچھنہِ آو عار تہٕ کھولُن پنہٕ نى۪ن پٲزٕ پکھن پى۪ٹھ تنہٕ ووت تس ونہٕ واندرس عٲرق بند نٲرن دگ ٭٭٭ شہِج بونـ̡ تۯیشہ ۂتِس چُھم وِزِ وِزِ آیُت زمزم ناگ ژلہٕ وٕنہِ ہردٕنہِ تاپُک دۅہ مۆت سروٕ شِہُل یارِ، تہٕ ماگس وارِ اندر نژِ سونتہٕ ہوا ٹوٹھہِ، تہٕ لوٝسـ̡ مٕتِس کرِ ہنہِ ہنہِ مۅنہِ وُدـ̡ تن کتھِہ کتھہِ رتھہِ کھاراں کٲژا وتہٕ کھاول رٲژ وُہہٕ وٕنہِ وچھہٕ کى۪ن سرپھن ساواں مٲنتھٕر دِتھ لوکى۪ن لاوى۪ن پمپوش کِژ رحمٔژ رود دپہ سَے موج، کٔلِس یِیہِ زى۪و تہٕ مٔندس یِیہِ کۆٹھ دپہ سَے اوش، متى۪ن خابن دِیہ یاوُن زوٝ رحمٔژ روٝدُک شکوٕ کراں چھم زى۪و روشاں، پۆز سٔرـ̡ پى۪ٹھـ̡ گٔژھـ̡ تن زمزم تتھ تہِ ونو سٔہلاب مشکہٕ ہوَس، گُل کترٲوِتھ پٲراواں ہنگ بولہِ عشق ، ٹِھپـ̡ کانى۪ن منز پُھٹراواں جل پونپٕرـ̡ یُس رنزٕنوو، تٔمی ہیۆت لونچہِ گنڈُن ماجہِ اغٲفل بانگہِ لٔٹس دِژنم ہٕکہٕ تھپھ متـ̡ یارن ژُھن ٹِکہٕ واوٕجہِ پُھٹرٲوِتھ دن شُرـ̡ شوقس یێلہ یێلہ گانگل کٔر آدن بٲجـ̡ اتھہٕ وێسرِتھ پى۪و زمزمـ̡ آبُک پێالہٕ پتھر وێہہٕ کھاول ہِش ووٝنگاں وٲنجہِ کھاول راتھ موج پننٕـ̡ وۅرٕ موج بٔنتِھ ونہٕ وٲسـ̡ کراں اوش دپاں تُل ٹونگ سۅ مٔژ شیرین مۅیے ٭٭٭ ملاقات از ازلہٕ وتھى۪ن دۆن دارِ وۅبى۪ن سمکھى۪و کُن ژلہٕ وُن تاپہ ٹیوکا کُٹھہِ اندریُم گۆٹ گو وارے مۆٹ بییہ اۆن گو شاہ یوسوفُن چاہ ٭٭٭ مندِنى۪ن ہارنـ̡ کۯاے تتیایہِ ژھاے ژھۅٹیایہِ پانہٕ پرَن پێیہ دیوارن کس منگـ̡ زِ شِہُل؟ ‎‎٭٭٭ کۆنگی نبہٕ چن تارن ؤنـ̡ دِنہٕ واجِنہِ أچھـ̡ یُس ڈیوٹھ جلوٕ دِواں افتابس، زوٝنہِ، ستارن منز درویشن یُس دِلہٕ کِس ظُلماتس منز سۆر گۅنماتن یُس پۯکرٔژ ہنزِ شوخی منز وُچھ گاش یێمیُک شولاں شبنٔمـ̡ دُردانن منز پھٔلـ̡ لس یێمہِ کِس پوشن ہند وردن چھُہ ظہور کتھہٕ رٹہِ یێمہِ کہِ چھُہ صحراون لۆبمُت آکار اتھہٕ رٹہِ یێمہِ کہِ چھُہ وۅلسنہٕ آمُت پوشہِ چمن چھُہ تہٕ پرتو تمہِ حُسنُک پۯتھ مثقالس پى۪ٹھ کۅنگی چانى۪ن چشمن منز چھُہ کمالس پى۪ٹھ اردو نظمہِ ہند ترجمہ۔ اصل: سلیمیٰ (اقبالؒ) ٭٭٭** سۯو کُلـ̡ ککرِ ہنا اکھ ٹھکہٕ ٹھکہٕ ٹھس کُلـ̡ ددرِ کۆرُن پُژپارٕ وچھس بُچھہٕ وُن تچھہِ تچھہِ کوسُن تس أچھـ̡ کھانکھر وُچھہِ وٕنـ̡ سۯو کرـ̡ نس یِم کُس پُروى۪س؟ ٭٭٭ پنہٕ پونپر سنـ̡ پوشو منزـ̡ ژۆل	* پنن گام اوسم تہٕ دِتـ̡ مس مےٚ گتھ گہے کوچہ پھیُر گوم روٝٹھٕم نہ وتھ تنَے دٲیرُم کن چھُہ أتھـ̡ آلوُن منَے زایہ سرمایہ سِرسٲو کتھ خبر کیا دِوَے ٲس، وۅپر گامہٕ ٲس پۯژھُم اتھ دۆپن غٲر وتھ چھَے غلط مےٚ دۆپمس پننـ̡ وتھ چھما مٲنڈمٕژ دۆپن پۆز سۅ چھَے نا منٕچ مازرتھ مےٚ دۆپمس کھیلِس منز وسا، راوٕ ما دۆپن بُتھ مہ بدلاو، پانے لبتھ بہٕ آس پاسہٕ ہى۪تھ پیشکش تھوومس دۆپن پاسہٕ ٲسِتھ، گرٕتھ چُھے شرط مےٚ دۆپمس یہِ وتھ کٔڈ، تہٕ وۅنـ̡ کوت نِہم دۆپن تانـ̡ شیرتھ، تہٕ پتہٕ بٲگرتھ مےٚ دۆپمس، مگر گۯاکھ کتہِ ژھانڈہکھ دۆپن ہردٕ لونتھ تہٕ سونتس ووتھ مےٚ دۆپمس بہارس چھہِ بلبل پننـ̡ دۆپن ہردٕ رٲچھا، متا سن تہٕ اتھ اۆتن واتنٲوِتھ بہٕ کۆرنس غۅطن نہ حٲضر حواسٕے، نہ حرفن ہـێکتھ دۆپُم عازمؔس وۅتھ ؤں گو دیُن قدم اشارَے چھُہ ٲہی ہشارس چھےٚ ستھ ٭٭٭ وچھس تچھان چھُہ یہ موسم، أچھن عذاب چمن مگر یہ کۅل چھےٚ قیامت، یہ رٹہِ نہٕ کٹھـ̡ شِہ کفن پکھن اندر چھےٚ وُڈن کل گۯى۪کاں گرفتارس ٹھپس اندر چھےٚ جلس تن، وچھس اندر چُھس ون یہنز مےٚ وتھ چھنہٕ سٔرمٕژ، سپار چھنہٕ پرٔمژ نظر چھےٚ سٲلہٕ مژر، گژھہِ تہٕ گژھہِ تمن گامن یہ ژھل چھُہ جلوہ بدل کل کڈاں وفادارن یہِ زٲلـ̡ پردہ محل خانہ کێن ستن درـ̡ چن یوُک کِمام تہ رینچل ورق تہ کاغذ کێمـ̡ أزیک سفر چھُہ، أزیک آفتاب شوبہِ وتن نہ تُلہِ دلیل نظٲمی، نہ پھِرِ سۅخن گٲمی تۆتاں چھِہ بال بےٚ مُروت یۆتاں نہ ووٝنٹھ کھمن پرن پێوان چھنہٕ بلبل ترانہ زیرُ بمس قمرـ̡ زى۪ون نہ یوتامتھ نہ پانہ کٔنڈ پھٹرن توے چھےٚ تس تہِ پننـ̡ طوطہ زى۪و تھێکاں نابد مظفّرس چھہ تگاں، عازمؔس چھُہ تھاواں کن ٭٭٭ تلا بہارٕ ژٕ کر زارٕپارٕ گگراین ژرى۪ن چھُہ پوشہِ تھرى۪ن پى۪ٹھ گى۪وُن گرى۪ن ڈاین سروٝد سونچہ وُتارُک وۅکان چھُہ کاڈى۪ن منز پنن نَگارٕ چھُہ پانس ددارٕ دُبراین پننـ̡ وُجار کھۅپٕر ژٲنگـ̡ تار ہى۪تھ رٲوٕس مشٲلـ̡ دۯاو گى۪وان گاش ہاوِ ہمساین پھژال ہٲر پننـ̡ پۯٲنـ̡ سۅرمہٕ دٲنـ̡ دٕنِن أچھن وُچھان پشیمان أچھو چھےٚ پژھـ̡ باین بہار چھاوِ گٔرا گانٹہٕ بێٲر ہى۪تھ عازمؔ دُتارٕ ہییہِ سُہ گٔنڈتھ سونتہٕ واوٕچن گراین ٭٭٭ رفیق آسہِ رٔٹتھ اتھ شفیق اتھن منز پن چھےٚ گانٹہٕ بیارِ مگر شان٘ش کھٲجمٕژ ہوٕہن چھُہ نالہٕ پانہٕ تہِ یرٕوُن بٹھى۪و تہٕ بالو منزـ̡ ژلان ژلاں چھُہ پۯژھاں توتہِ واوٕ ہالہِ وطن ہوا وِسان چُھنہٕ میٲنس وچھس ؤسِتھ نحقے شہن چھُہ رٲچھ کراں شێچھ نِواں چھُہ طرفاتن ہوا تہٕ یارِ ونُک سۆم شِہُل تہٕ گۆب گٲں گٲں جتن کریایہِ سى۪ٹھا پوز عطا سپد نہٕ سُہ فن سُہ ساز کتہِ انہِ عازمؔ زِ آلوى۪س شش رنگ سُہ مٲنز کتہِ انہِ یۅس تس نشانہٕ شوبہِ اتھن ٭٭٭ نب ٲنہٕ ٲنہٕ تہٕ بتراتھ نیوٝل نیوٝل اسُن سرس چھُہ سال کران از سمندرُک یاوُن خبر تہٕ آسہِ أمِس واو دونژھرِتھ تۯاوى۪س مگر تُلٕر چھےٚ تُلٕر ژھۆر ہلم تگى۪س نہٕ وٹن دِگر چھُہ زاگہِ مگر دامہٕ چێیہِ ہے گُلِ افتاب ہُہ نورٕ نارٕ سمندر، اما یہِ واتێا کُن پۯژھٕے چھےٚ چٲنـ̡ برٕژ دۅژھ تہٕ مێون رینچہِ ہلم ژٕ دیُن یژھکھ تہٕ مبارکھ، مےٚ کتھ اندر چھُہ رٹن یہِ لولہٕ مصرٕ وُچھاں دولہٕ چُھم کتاب پران سُہ یتھ قلم چُھنہٕ یاپاں، سُہ گوب سۅخن چھُہ سرن مقام اگر نہٕ ونکھ، توتہِ ونتہٕ وق کوت ووت شبس تہِ چھنہٕ سۅ شباہتھ، دۅہن تہِ دامن دُن چکر چلى۪وو قہر موسمن کٔرٕن گانگل گلاں نہٕ پرون ششُر کُنہِ تہٕ نۆو ہى۪واں والن کپٲرـ̡ تاں چھُہ کنن عازمؔن کلام گژھان وُچھتھ اگر ژٕ سُہ پۯزناوہن یپٲرـ̡ انن ٭٭٭ ہۅ اوبرٕ لِش چھےٚ بہارٕچ گُڈنـ̡ گٔرِتھ تہٕ ژٔرِتھ نظر نژاں چھےٚ یہِ مٔشرٲومٕژ کتاب پٔرِتھ جلس منگاں چھُہ اکھ اکھ تان کان فضہس منز شکٲرـ̡ کونہٕ چھُہ مازاں یہِ گوس تیٖر تٔرِتھ ہرُد رچھاں چھُہ پننٕـ̡ سانتنتھ بہارس کِژ گرٕد سنبالہِ امانتھ یہِ لنجہِ پیمُت چھُہ ۂرِتھ زٔری تِہج چھےٚ وٹاں ہردٕکس کھلس داتھُر بدن چھُہ بونہِ وُہاں سرسبز عذاب زٔرِتھ خبر دُبارٕ دِواں چھا یپور ترنٕچ وٲرـ̡ نتہٕ ٲس نظرِ ہنا دِنـ̡ وُڈٕر اپور تٔرِتھ دِکھے تہٕ دیٖزِ سمندر وچھس ژۅدٲہم زوٝن یِکھے یپٲرـ̡ ، حباب أنـ̡ زِ آفتاب بٔرِتھ ژیُہا چھُہ کٲف اگر بوس ژھانژٕونہٕ دِیہِ ہے وۅہَو چھےٚ وٲنس دہانس اگر مۅہر چھےٚ کٔرِتھ ٹھِلن گِنداں چھُہ قرارس بہارٕ موت عازمؔ کۅلن شراب رلٲوِتھ پلن گۅلاب گٔرِتھ ٭٭٭ سُہ خانہ مول بہارُک، سُہ نارٕ تِکھ ہیو ٹوٝر شِہُن شُبی نہٕ گۅلابس أندرـ̡ أندرـ̡ کٔمـ̡ کور مٔتِس چھہِ پیالہ بران پوٝرـ̡ کى۪وو پچھمـ̡ کم کم یوتاں نہ لل یِیہِ، نُند کرِ نہٕ دام دیُن منظور کمن کنن پرِ مقبول شاہ دِلٕچ گلریز کمن دِلن دِیہِ کتھ دُب دُبایہِ کن مہجور مندورِ وٲج تٔمس دشمنو تہِ کانہہ کانہہ سیٖر سُہ اوسہٕ پانہٕ تہِ کێنہہ کم بلاے گٔژھـ̡ نس دوٝر نِمیُز کھى۪تھٕے چُھ کمیُل بۯِمجہِ ژھایہِ دُبہٕ پیومُت یپٲرـ̡ نى۪ند تہِ گۅبیمٕژ ہپٲرـ̡ نێندرِ سروٝر مےٚ دوپ از آسہِ مےٚ آمُت غزل ہى۪تھٕے عازمؔ وُچھاں تہٕ سادٕ مٔتِس نٲلـ̡ سُے بى۪گُر سنطور ٭٭٭ ہِنجٲرـ̡ واوٕ رِنگا اکھ تہٕ کھٔژ دِدٕر اسمٲنـ̡ یہِ مٔژ چھےٚ وٲنِجہِ زامٕژ یہ نژِ وُپھان وُپھٲنـ̡ ستارٕ سٲوـ̡ سُلی کالہٕ اوبرٕ ژھایہِ تمام ہُپٲرـ̡ یپٲرـ̡ تہٕ کانہہ کانہہ زُتِنـ̡ چھےٚ زوتاں سٲنـ̡ خبر زبر چھےٚ یہِ سانى۪ن تمام اخبارن مگر اگر نہٕ بدل کانہہ تبر نژاں چھےٚ زبٲنـ̡ پھۆرُکھ پنُن تِہ نہ واتُن دٕنِکھ سۅ مٲلـ̡ مندور ؤں سامہٕن سۅ پُرن، کٔن دِنس تہِ چھنہٕ بہرٲنـ̡ سۅ کھرى۪کھ ہسٲ کھێیہِ کھارِکـ̡ زِ نظرِ ڈٲجِن ڈولـ̡ نتہٕ ٲسـ̡ ڈول وزاں وِگنہِ آسہٕ وُنہِ وَنہٕ وٲنـ̡ خدا رٔچھِن سٲ ونو کیا سُہ دۅہ تہِ ما چھُہ پکان چلی نہ بین تہٕ مٲنتھٕر مَلی نہٕ سوٝر گۅسٲنـ̡ ؤں کُس کمال چھُہ عازمؔ غزل غزل چھُہ لى۪کھاں ہوا ہنا یێلہِ وولاں چھُہ پھۯستہٕ پھمب چھُہ نژٲنـ̡ ٭٭٭ رِندانہٕ رازٕ چھُہ کم کم گِندن تماشہٕ گران بہار بوٝنـ̡ تہٕ بلبل، تبر تہٕ تیٖر کمان بےٚ پژھ فضا چھُہ کراں کٲزٕ پٲزٕ پروازس یہِ لب اگر نہٕ، ہُہ نب شہپرس چھُہ تراش ہى۪وان وچھس اندر چھُہ گژھان بولہِ وٹھ بہارٕ مٔتِس وُتارٕ وٲنسہِ چھُہ وى۪تراں، شِہِتھ تہِ ما چھُہ ہى۪کان سران کیا چھُہ سمندر پنُن سنى۪ر زانى۪س کوَس تہِ روزِ تہٕ بس اوبرٕ ژھاے وُچھِہ اسمان یہ کاروان ؤں گوژھ خٲرٕ سان گرٕ واتُن سڑک چھےٚ بالہٕ تُھنگى۪و پیٹھـ̡ رزَو چھُہ شین وسان یہ برى۪ڈـ̡ مُشِکھ چھُہ دِواں برى۪ڈـ̡ کٔڈِتھ بہارُک پے دٕیان دٕیان تہِ چھُہ عازمؔ اسُن ؤوِتھ نیران ٭٭٭ کفن ؤلِتھ چھُہ رٕڈیومُت الوند سٔرـ̡ پێٹھـ̡ سر سۅ رُدٕ رُدَے چھےٚ دِوان دۯاگہٕ دى۪و چُھ گونژھن ور ژھٹھا متیایہِ پُٹِن بۯى۪ن تہٕ موٝلہٕ پۯٲٹِن پھۯس یہِ زوٝنہٕ ڈب تہِ اویزان ہُہ سِنگلہ پش تہِ پتھر بۯہاں چھےٚ وُزملہٕ ہوٝ ہوٝ أچھن چھےٚ گاش توان سُہ ترٹہٕ بزُن چھُہ زِ ژٕرنى۪ن اژان چھہِ جاناور طُفاں تتێاو زِ توبٕکـ̡ اچھر ژھٕنِن چھٔکرِتھ دعا نى۪راش الٲندِس نبس منگاں چھُہ اثر زمیٖنہِ زورٕ چھےٚ ژۆپ ہى۪تھ ہۅ بونـ̡ باگہِ بٔرٕژ دکا دکا تہِ یوان چُھس پُھٹاں تہِ چھس ہر ہر یہِ واو وۅگتہٕ ونس منز وى۪داکھ وونگاں ہونـ̡ یہ واو کوچہِ گلى۪ن منز گرَن چھُہ ٹھاسان بر زمیٖں شناس چھُہ تھٔج نارِ پى۪ٹھ بہِتھ عازمؔ غزل گى۪واں چھُہ تہٕ گٔنزران چھُہ پانہِ ترٕوٕنـ̡ تر ٭٭٭ نہ چھُہ بُتھہِ بۆٹھ نہ چھُہ گراین عار ہٲنزو وِجہِ واوس منگ تار ژیُہہ اوس، سُے اوس ازلہٕ ابد اتھہٕ گۅو، وتھ گیہِ ناہموار دوٕہُک دیُت تہِ چھُہ نوٝنٕے نوٝن شفہٕ ہُک شکھ تہِ چھُہ بٔلـ̡ بلغار یارن گٔیہِ انصافس ہٲل ال پھٹہِ آبس ڈل رٹہِ مار از چھہِ غذا درینٹھاکن پوش از چھُہ بہارٕے باغس بار عرشس نکھہٕ ووت دۆد فٔرـ̡ یاد فرشس پُٹھہٕ گو استغفار رتھ چھُہ رگن منز پارٕدـ̡ وى۪تھ کتھ چھےٚ قیامتھ، ژھۅپہٕ شہہٕ مار سۅندری چھاو یہِ دمہٕ کوٹھٕر ٲندری پال سُہ وِرِ شیہجار بالو پێٹھـ̡ تھٔچ ژھالر کۅل مالس پۯاراں دعوادار عازمؔ پالان ٲنس منز نالان پکھہٕ پھُٹ جاناوار ٭٭٭ سُہ کتہِ وُڈو کرِ پونپُر پکھَو الاو پُھکان یہِ ماگہٕ واو چھُہ واپٹھ کراں تہٕ مانہِ وٹاں سُہ کتہِ سُہ بلبلِ مس یَس زبور ٲس دردس بدل مۅغل چھُہ وۅگس پى۪ٹھ عجب کتاب پران کرہُن اوبُر تہٕ کۅہَو پێٹھـ̡ مٔہِس اگادِ زلُر سبز دۯمُن تہٕ پتھٕرـ̡ ؤنـ̡ چھُہ والہٕ بٔرـ̡ ییران ڈلُک حباب تہِ ہانژٕھے، کھى۪لُک ہلم تہِ ژھورُے ڈُنگل تہِ کم چھہِ مۅژیمٕتـ̡ ، ڈُنگن تہِ کم چھہِ کھسان زمینہِ کاڈ کوڈا کِنہٕ قدَو تھدیاے لُکھٕے وُچھاں وُچھاں چھُہ مگر بۆن بۆنُے وساں اسمان نہٕ پۯاوِ لچکہٕ نہٕ پورى۪س غلاف سیتارس تُرَے گژھى۪س تہٕ نى۪سنگاہ ہۅچھن کۅلن چھُہ پھٹان غزل ہیواں چھُہ خبر کس زہر زدس عازمؔ نتےَ اموب سُہ آوُر چھُہ وُٹھ سُوِتھ آسان ٭٭٭ ٲنہٕ منزـ̡ ہووٕہس بێتاب کۆرُکھ وعدٕ بُزـ̡ سادٕ دل شباب کۆرُکھ گٔیہِ ہا، گٔیہِ ہا تہٕ آیہِ گۯایہِ ورٲے آرٕ پُروِکھ تہٕ رٲسـ̡ آب کۆرُکھ ویرِ وارس دِتُکھ جہارس دۯوت پوشہِ نوٝلس مٔتِس عذاب کۆرُکھ وٲنسہِ پوٝزٕکھ سۅ بۯاندٕ کٔنـ̡ تہٕ پۆتُس خٲلـ̡ ہلمس زدى۪ن حساب کۆرُکھ پش وُڈووُکھ پنُن بفضلِ خدا کار زونُکھ یۆہوے ثواب، کۆرُکھ ژُھنکھہٕ صبحَے سٔتیُم کدٕل آبس کۆرکھہٕ از کار، ہاں جناب کۆرُکھ ۂدـ̡ یہِ تورُکھ تہٕ گرہنہٕ ماتس زوٝن أچھ ؤٹکھ غٲب آفتاب کۆرُکھ پام اوسُکھ دِوان پنُن پمپوش نام دارو سرس سراب کۆرُکھ تِژھ دپان عازمؔس کٔرٕکھ گانگل خاب مٔشروہس، خراب کۆرُکھ ٭٭٭ سونتُل وردن سُوٕنَے دۯاکھ سانى۪ن بونى۪ن نى۪تھٕہ نٔنـ̡ شاخ ناگن چھنٕہ کُنہِ وُزنہِ کٔمی وى۪تھہِ کوٕ گو نٔٹـ̡ برنس ٹھاکھ وق آو مکھ زن دِودارس داہ گو دۅیہِ خٲر، شاہ گو شۯاکھ سرٕکھے أندروٹ، کتھ نژِ مور پرٕکھے، شرُکھ مُژراوی واکھ لوٕ پھێرِ اکہِ پھۆل ڈى۪کہٕ بوڈ گُل سى۪کھ ٲس وُمبرن شۯانى۪ن گراکھ عازمؔ بٔنزرِتھ ترووُتھ پور کیا ہى۪تھ بازر کیا ہێنہِ دۯاکھ ٭٭٭ سپارا وُمبرِ رٔژھرٲوٕم وچھس منز پۆتس کاغذ کێمى۪ن اتھِ کھیاوٕ ناوٕم سۅ کتھ ٲس میٖٹھ، باوتھ کرنہٕ کھوٝژُس مٔرِتھ ٲسٕم وُٹھن، واون مِٹٲوٕم سنگر پۯاچیم، کۅہہٕ دامٕنـ̡ انےیَم یتھُے جۅے وارِ نِشہ وٲژٕم تہٕ رٲوٕم گنےیَم کل، سمندر زوٝنہِ دورُم منس یێلہِ گراے وۅتلییم، تہٕ سٲوٕم مظفّر عازمؔس ژھاین دِتِم وٕنـ̡ کُٹھِس شینہٕ وٕنـ̡ جہاتن دٲر ترٲوٕم ٭٭٭ ژھایہِ رچھومکھ خابس منز خۅشبۅے ویٔپ نہٕ گۅلابس منز وُہہٕ وُن وَچھ تہٕ شِہُل آنکار زوٝن کھژٕم اختابس منز کێنہ پھول کێنہ نٕکہ ڈلہٕ پمپوش زٕژِ وۆتھ پھۆر گردابس منز خط کیا آم جوابٕے گوم یى۪ژھ دۆبرٲوٕم تابس منز انگ انگ کھى۪وو ارامُک برى۪م رُم رُم زول عذابس منز یُتھ چُھنہٕ وُچھمُت ورزُن واو کانہہ گاڈا چھنہٕ آبس منز انہِ أچھ منہِ کامنہِ ڈۆل کھۅر گرى۪دٕ بچہِ پٲلـ̡ کجابس منز امنٕچہ گونژھہِ چھےٚ کرتلہِ پین گۅنہُک رُح چھُہ ثوابس منز کس اتھہِ دیاوٕ امامس ناد بٲنگی شۆنگ مى۪حرابس منز کم کم ٲسـ̡ أمکـ̡ بسکیٖن ژھایہِ چھےٚ وُنہِ اتھ کعبس منز خابن نم دِنہِ عازمؔ دۯاو آب منداں چھُہ دۅلابس منز ٭٭٭ ہى۪نہٕ آم شِہُل گام سیاہ روٝدٕ جرى۪ن منز ژس ووت دِلس تام سیاہ روٝدٕ جرى۪ن منز رێہہ ہى۪تھ چھُہ کھساں سِرـ̡ یہِ کڈاں بالہٕ ونن ژھٹھ دُہ ہى۪تھ چھُہ یواں شام سیاہ روٝدٕ جرى۪ن منز ژرِ اوس ہُتى۪ن اول ہے افسوس سُہ کمـ̡ زول پرٕ کٲس چھےٚ دردام سیاہ روٝدٕ جرى۪ن منز ادٕ یوٝت توگُکھ تیوٝت دِتُکھ اۆبرٕ نبس نار کیا دیٖزِ تمن پام سیاہ روٝدٕ جرى۪ن منز رٲہی چھُہ پریشان پننٕـ̡ پۯانـ̡ پُرن پھٔٹ عازمؔ چُھ وۅپر گام سیاہ روٝدٕ جرى۪ن منز ٭٭٭ راتٕچ ژھۅپہٕ ٲس دیٖپک راگ گٹہِ ٲس بختس ژٲنگـ̡ پُھلے ژھٹھ ٲس تھچہِ مژٕ پکھہٕ وایاں رێہہ ٲس ہنہِ ہنہِ تیزاں طے بد بُتھہِ اۆبرٕچ دۅکھہٕ لد ژھاے اٹہٕ بارِ ٲسٕس تاپٕچ شے خٲبـ̡ أندرـ̡ ڈۆل خابس کھۅر کعبس تنہٕ بێیہ لٔج نہٕ دِوے وتہِ ٲس شاہ رگ شۯۅکنیمٕژ اسہِ کرٔـ̡ رتہٕ سرٔـ̡ پٔدـ̡ نحقے بترٲژ ہندـ̡ بارٕجـ̡ اولاد پوشس پوشس تنہِ پُژنے تتھ بسٔـ̡ تی پھۆر پاگل واو از چھہ تتى۪ن وٲرانہٕ سرے پھرِ زن گرِ کھنجہِ وارلـ̡ ژھاے بلبل اڈٕ کۆل کرِ نہٕ دۅہے سُرٕ بنہِ برادى۪و زُتِنہِ الاو یس ٹوٹھى۪و تس ٹوٹھى۪و دے وتہِ تۯوو پانس پتھ اختاب تتہِ تور آو اسہِ گاشُک پے پتھ ون اژٕنس کوٕ کھوژیوکھ مۅچھِ منز سٕہہٕ أچھـ̡ تھاویمے ٭٭٭ أچھو سومُم وچھس منز ژوٝرِ تھووُم یہ پھٹـ̡ پھٹـ̡ نیرٕوُن اٹـ̡ اٹـ̡ کڈاں چُھم ژٔھرِس گاشس گٔرِتھ موٝرتھ وۆنم تس یِتھس مصرس دۆیُم ژھونڈُم تہٕ ہورُم اچھر ژٲشِم تہٕ رس وُچھمکھ ژمیومُت کلى۪ن جاناورن ہند دود ژولُم سُہ جلوُک نار، دٔز شیہجارٕ ہن ہن سۅ مشکٕنـ̡ دار شاہ کھالاں چھُہ رُم رُم سۅ زکھمکھ چھہـ̡ دِنے زولُن ونُک ون بہٕ خوش بخ نارٕ بالن سینہٕ دورُم صبح پھۅلہٕ وُن دِگر ڈلہٕ وُن رلٲوِم ژہى۪ن منز دۅن زمانن تار تورُم ژےٚ ہردٕچہ زونہِ ہندس پرتوَس تل ؤہرـ̡ ؤریس بہارُک تاپھ چھووُم گلالس گوو أچھن تل داغ رسوا انى۪ن یمبرزلن سُے راز بووُم مِزازس ٲڈرن چھم آفتابٕچ لگے، تٕرنى۪ن پلن اندر مہ تۯاوُم گٔرا بیوٹُھس مظفّر عازمؔس نش سِرا اوسُم نٹى۪ن پى۪ٹھ کھالہٕ نووُم ٭٭٭ وتہِ مشرف گو کوت پى۪ٹھ دۯایے، ظۅن رود نہٕ کٔمـ̡ موڈن دیُت برى۪م یادس پێے ورقن کاغذ کێمـ̡ وٲناکھ وتن ؤڈرٲوـ̡ قدم مجنوٝنس گو کیاہتاں بُل چُک تٔمـ̡ تہرِ پھلى۪ن کُن کھوس پنُن مژِ لٲلہِ چھُہ نحقے پھۆر پھوران تس پانس برٕ گٲمتـ̡ کوسم یتھ ہردٕ بُتھس کُن یُتھنہٕ گژھکھ یێتہ چھا کانہہ موسم ڈیرٕ دِوان وتہِ وٕنـ̡ وٕنـ̡ سمکُھم سونتہٕ ہوا وژھِہ وٲنِجہ بۆرمس پوشہِ ہلم یِنہٕ وُپھوارس شہپر زالکھ یِنہٕ اظہارس وتہٕ کون کرکھ ینہٕ پرٔـ̡ یہِ محل کُن وتھ لبہِ دى۪و یِنہٕ پۆت کُٹھ اژِ کانہہ نامحرم یتھ وى۪تھہِ چھہِ وۅتھاں مدٕ مٲتـ̡ ملر ہُتھ وۅلرس تہِ چھُہ از پھۆر پھوران شۅدِ شوقہٕ چھےٚ درامٕژ سمکھن کل تعویذٕ چھُہ لیکھاں مێون قلم وارلـ̡ سٕنز رتہٕ سٔرـ̡ تونتھ وُچھتھ تھاریوو بى۪گٕر آواز گٔیَس وُچھ میانہِ زمانُک لولہٕ قُمیُر کمہِ سادٕ صداقٔژ کۆر برہم ٭٭٭ رَو یێلہِ ٹوٹھی منہِ منز وۅپداوی پمپوش رێہہ ییلہ تیزی آلو دێاوی ہوشا ہوش للہِ نازلہِ اوس نى۪تھہٕ ننہِ تنہِ تہدار پھى۪رن حبہٕ خوتوٝنہِ چھُہ شٲہی وردن پۆز اُکہٕ توش چون تہِ اوس رُت مشورہ متہٕ دِتہٕ سفرس تن بہٕ تہِ کیا کرٕہا، مێون مژر اوس خانہٕ بدوش کانہہ کانہہ سیر گۅبى۪وو تہٕ کتھہِ گیہِ شعرٕ ونن زى۪و نینگلاوِتھ وٲنسہِ أکِس دۆبراوى۪وم جوش مێتہِ ؤژھ سٔدرس گۯاے تہٕ سازس زیٖر لٔجم زون بۅڈیمٕژ، تھلہِ تھلہِ ٲس وُچھاں خاموش کارا تۯووُکھ، وُزملہِ ژھایہِ گِتى۪ن کر گۯى۪ند کۯیہنِس اۆبرس پھٔٹ تہٕ أچھن منز گیہِ روپوش مۅلوَن والى۪و نظرن پنہٕ نى۪ن شیرِو سنگ ہلمن لال بٔرِتھ چھِو آمٕتـ̡ لال فروش ٭٭٭ سفر، أنیٖکھ سفر، تھۆک مےٚ آفتاب وتی بێتاب چشمہٕ تہِ کرتم مراد یاب وتی حرف تہٕ میٖل کتھن زوٝنہِ گۯہنہٕ ماتہٕ پھى۪رن قلندرن چھےٚ ؤٹتھ تھٲومٕژ کتاب وتی سُہ دۅہ تہِ ژول دُؤتـ̡ ٹسنہٕ کٔرـ̡ ژھرى۪ن نظرن یہ دۅہ تہِ ووت سٔرِم سِوـ̡ گژھاں سراب وتی بے شوٝنکھـ̡ سٕے چھےٚ پکاں وى۪تھ مگر سمندر کُن یہ وۆتھ سوال وتی اتھ پُشر جواب وتی ؤں یُتھ چھُہ تیُتھ چھُہ سُہ عازمؔ پنُن قبول کرُن قدم تجین حسابَے سُہ گو خراب وتی ٭٭٭ کور یچھن واپھ، بہٕ کوتا باوے رٲژ لوگ شاپھ، بہٕ کوتا باوے وُزملن کٲزہٕ کراں کالہٕ اۆبُر قاف تا قاف، بہٕ کوتا باوے پھۯیٹـ̡ گمٕژ ہٲر تہٕ بۆچھ راتہٕ مۅغُل یہ رتٕچ ژاپھ، بہٕ کوتا باوے دارِ تۯوپراوِ، نیبٕرـ̡ پى۪و شیٖشن وونگٕنُک چھاپھ، بہٕ کوتا باوے لۆگ کٔنس سٍتـ̡ متیومُت دٔرـ̡ یاو گو پشس کۯاپھ، بہٕ کوتا باوے کاو وولیاے قُمرـ̡ کترٲوِکھ ٹاو گو یاپھ، بہٕ کوتا باوے تھٔچ دى۪وس سٍتـ̡ دۅہس گتھ ماراں پٔرـ̡ یہِ تۯو ڈاپھ، بہٕ کوتا باوے واتہِ یێلہِ سون شہر تپہِ کانگٕر شۯاونُک تاپھ، بہٕ کوتا باوے وُٹھ سُوِتھ آس تہٕ معنے بوزُم کتھ چھےٚ اسراف، بہٕ کوتا باوے ٭٭٭ گوش تھوہکھ تہٕ اکھ سۅخن ونہٕ ہے کینہہ تہِ ونہٕ ہے نہ مێون بن ونہٕ ہے اکھ نظر، أڈ نظر تہِ ٲسٕم کٲف یونہِ یٔندرس سى۪ٹھا چھُہ پن ونہٕ ہے مێون نِلہٕ وٹھ ژےٚ کتھ لگی وى۪گلتھ ناو أتھـ̡ پى۪ٹھ شُبی تہٕ کھَن ونہٕ ہے مۅختہٕ بٔنزرُم تہٕ پھوتہٕ رٔژھرووُم پۅختہٕ کارس گٔیَم ونن ونہٕ ہے چانہِ بازٕرـ̡ سُہ ہى۪تھ بہٕ کیا یِمہٕ ہا کھۆٹ ضرب اوس مێون فن ونہٕ ہے صاف، ناصاف، وٲنسہِ وچھ دورُم چانہِ افتابہٕ چن زٕژن ونہٕ ہے چانہِ خلوکھ سرایہِ کھل سم سم یُس چھُہ سُے اکھ حرف مےٚ ون ونہٕ ہے میانہِ دُب دُب سرایہِ منز برتن لامکانٕچ پنٕنـ̡ پُرن ونہٕ ہے پان دٕنہ ہا پنُن اوبر تاپس جان وۅتھراوٕہے وتن ونہٕ ہے سٍتـ̡ اۆنمے غزلسرا عازمؔ مێون ؤنـ̡ ؤنـ̡ پێیی پرن ونہٕ ہے ٭٭٭ وُٹھ پھیشاں کنڈـ̡ وتہِ ہندـ̡ چاکھ دۆپہم تلہٕ پدـ̡ رتہٕ سرچاو ہَتھ ہاوس وُرٕ وتھرِ کرِتھ اکھ آلو دِتھ واپس دراو افتابو ! وُچھ زوٝنہِ چھُہ داغ تگہِ یے تیز پہن گاہ تراو چھٲوِتھ تِمہٕ وتہٕ تۯٲوتھ آکھ زیٹھى۪ن جامن چِھکہٕ وۅتھراو پزِ ووننمہٕ کِنہٕ ٹسنہٕ کۆرن منہِ منز تنہِ ہنز تێہہ وى۪پراو ژےٚ تہٕ ؤجـ̡ وٲنِس دورُتھ نۆٹ مےٚ تہٕ وِجہِ واوٕچہِ پکھہِ لێوکھ ناو آلِچ منگہٕ چھنہٕ آنپَے یوت آگر پٔچھنی پکھہٕ وہراو بۅچھہِ پى۪و تھنہٕ تے گچھہِ کُٹھہِ موٝد یتھ پُیہِ موکل گاٹُل دۯاو ٹینکہٕ لمس رتہٕ چھپہِ دِتھ پان قوروٝنس فاتى۪ح پرٕناو پۆت آلو شہمار الٲندـ̡ دِلہ دۆر وتہٕ گتھ کۆت پى۪ٹھ دۯاو تتہِ شۯوپ ٲدـ̡ اکھ پوشہٕ دى۪ماغ ملہٕ کھاہ دۅسہِ پى۪ٹھ تُج مشکاو عازمؔ مونڈن پڈرن تل غزلٕکـ̡ رخچن پۯٲوـ̡ پڑاو ٭٭٭ اۆبرٕ گۅبیوو أندریُم ساون ہی تھرِ رُدٕ جرِ کرِ ارپن حد، سرحد ژھاراں لوٝسُس اسمانس نیٖلے یم تن پیچانس چھم ہێنـ̡ تعلیم ابساوُن چُھم ٲویُل پن وتہِ وتہِ وۅتلووُن وُسجار ظلماتس ژٔھنـ̡ جپٔھـ̡ شمہن ژٕ تہٕ بہٕ چھہِ تھنہٕ پیمتـ̡ دُکہٕ ویرِ شہہٕ لٕتھِ کیا وۆن سٔہلابن کۅلہِ پى۪و مالِنـ̡ پتھ ون یاد کلہٕ ٹھاساں ٲس آرٕ پلن بُجرس للہٕ وُن لوو ارمان بٲتھا تُھرِہا شُرـ̡ باشن منتھا تھاوکھ، باوکھنا معنے دلہٕ کى۪ن دۅن حرفن ٭٭٭ واو شوریوو موسمس وۆتھ بوش تٍرِ ہانێوو آفتابُک جوش لوٝسـ̡ پونپٕرـ̡ نێبرـ̡ نێبرـ̡ گتھ دِتھ رێہہ چھےٚ فانوسہٕ مٔنزـ̡ وُڈاواں ہوش لولہٕ سازس ؤیِم سۅ جٲدـ̡ نظر نغمہٕ وۅپدیوم رُت رٔسیُل خاموش گوم برونتٕے تہٕ نظرٕ وُنلے یم ہوش روٹُھم قریب اوسُم اوش خام کارس گٔیَم دُبانبرِ کل نہٕ خطا رہبرن نہ شٔتھرن دوش ٭٭٭ أزیُک عذاب بٔنتِھ گو یوٕچ مثال بٔنتِھ مےٚ روو پوشہِ پگاہ پوشٕہ وُن سوال بٔنتِھ سُہ یتھ نہ سونتہٕ ہوا لوگ، سُہ یُس نہٕ بولـ̡ بنیوو سُہ شاہ پھسیوم وچھس منز تہٕ چُھم وبال بٔنتِھ مےٚ وتہ وى۪لٲے نصیبس رٕڈیاے وتہٕ ہاوکھ مےٚ یێلہ ؤ تێلہِ چھہِ سرابٕے پھران سۅکال بٔنتِھ یێمِس تہِ سۅے چھےٚ یواں ولنہٕ سٔدرٕ ہِل لٲگِتھ ہُمِس تہِ سۅے چھےٚ اویزان زٲج نال بٔنتِھ نظر چھےٚ میٲنـ̡ بۯہاں از بےٚ نوٝر گوشہِ دزن وچھس اندر چھُہ مےٚ افتاب نارٕ بال بٔنتِھ سکندرس تہِ دِتُکھ پوشٕوُن مقام یۆہوے قلندرس تہِ یہِ ظلماتھ روٝد حال بٔنتِھ وُچھاں وُچھٲنـ̡ ڈۆلُم نظرِ خۅش زبان عازمؔ بسان بسیوم دى۪ماغس اندر خیال بٔنتِھ ٭٭٭ سنگس پٔچ سونتہٕ واوٕچ گۯاے ساتھا تیتُھے گۆژھ از تہِ بے پرواے ساتھا وچھس گٔژھ نارٕ بالس وارٕ ژھٹھ یِنـ̡ أچھن گٔژھ پوشہِ ٹوٝرِچ ژھاے ساتھا دلٕکـ̡ آلو چھِہ لفظن ہندـ̡ گداگر مےٚ سادس ٲس پانس راے ساتھا دما رٹھ ژلوٕنِس واوس تہِ دامن مٔتِس خابس تہِ کر اتھہٕ لاے ساتھا مہ کر، ژٲنگِس مہ گِند، جامن گنڈی ریہہ تھواں وٲنسن چھُہ للہٕ وُن نیاے ساتھا مُرِس چُھس ازلہٕ ابدٕکـ̡ راز چھاواں ژِہِس بخچاں چھُہ پوشن پاے ساتھا کراں کیا پۯانہٕ وارن چُھکھ پتُک بۯونٹھ مظفّر عازمٕؔنـ̡ رٹھ تۯاے ساتھا ٭٭٭ کھسان چھُہ ہٲرـ̡ تہٕ شۯاوٕنـ̡ تہِ وۅنـ̡ تُرُن اختاب دپاں سُہ پرون شہر از شہن دِواں چھُہ حساب سۅ وى۪تھ چھےٚ شرمہِ ہندس عٲرقس گِنداں گۯاین ہۅکھے چھہ ووکھہٕ متیمٕژ أچھن تہِ روٝد نہٕ آب پُٹٕکھ سۅ پوشہِ پتھٕر پۯانہِ ذٲژ منساوى۪کھ اگر پھۅلى۪س تہِ وۅپر باسہِ پننہِ وارِ گۅلاب تۯٹو تہِ ہىیۆک نہٕ تِمن نیندرِ منز وُرُن ڈٲلِتھ قلایہِ سٍتـ̡ کراں آیہِ گرایہِ چُھکھ سٔہلاب بہٕ کھوژٕہا نہٕ گٹن پۆز یہِ شب چھُہ بدلٕے شب چھُہ گٲمـ̡ گام شۆنگِتھ کانہہ اکھا تہٕ وُچھہِ ہے خاب ژھى۪چو کتھو چھہِ کران اوپ ژوپ معصوٝمن دۅژھو دۅژھو چھہِ وى۪تھن آپراں دۅبن ہند آب سکوٝنہٕ سان چھُہ ہنـ̡ قبرِ منز تتیُک عازمؔ بى۪وار آرٕ پلن پى۪ٹھ لیکھان نارٕ کتاب ٭٭٭ یہ وَچھ تہٕ کوٝرن کیۆم یتُے چھُہ داش نداش کلس چھےٚ مشکل رٲچھـ̡ دِلس رٕڈیوو یاداش کھسُن چھُہ تاپہٕ وُڈٕر نکھس چھےٚ پننی لاش پھى۪رن چھُہ صبرُک اوژھ رٕنیوو تہٕ سِر گو فاش یۆتاں سُہ وایی تونتھ پکھن تہٕ کٔڈـ̡ زِہا واش شُرِس مہٕ پھر ٹینکن مہ ون مخولہٕ چھےٚ آش ژٕ میانہِ لوِ اختاب مےٚ توتہِ چون تلاش نظر تہٕ صبحٕچ درٕے رُمس رُمس پھول گاش دپاں سُہ اوس عازمؔ بُڈا وُچھُم خۅش باش ٭٭٭ وُزملہ ژھۆٹ وژھِہ وٲنِجہ نار پێژِ بنہِ کۆرنم بخ بیدار جنتٕچہِ کۅلہِ وۆل گۯاین منز چھۅرٕ چھۅرٕ کرٕوُن گاڑٕ انبار لونچہِ ہوا ڈۆل اللہ ہو یرٕوٕنہِ ناوِ تہِ دیُتنم تار تاپہٕ وُڈٕر پھٔج دٔزمٕژ تال متہِ شۯاونہٕ ؤتھـ̡ رُدٕ فموار لوٕ پھێرِ دۆد پمپوشُک ژونگ نارٕ الاون پھیُر شێہجار شُرـ̡ باشو کۆر چِرـ̡ گیُش تیز کٔنـ̡ شروپرٲوٕم نٔنـ̡ ملہار زٕژِ اکہِ دِژنم گاشہِ براتھ دِگرن رۆٹ مندنیُک انہار بہٕ تہٕ مێون عازمؔ تکہٕ دِن دِن دُنـ̡ یا یندرازُن دربار ٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭ بحمداللہ طرفاتن کٔرِم سٲل بٔرِم چشمن شہر صحرا سمندر ؤں گو تاپٕلـ̡ وتو یێلہ پاد لوساں پى۪واں چُھس بونہِ تل رێشـ̡ وارِ اندر ٭٭٭ مےٚ نش یکھنا، مےٚ نش یکھنا، ونان تس کھنان روٝدُس منس اندر اہنکار تہِ ما پێوسس پرن دپہس بہٕ آسے بہٕ کۆت نیرے، ژےٚ رۆس کُس چُھم خریدار ٭٭٭ خابس منز کٔڈ وۅٹھ گردابن سٔہلابس گٔیہِ عاشق کۅل ہٕکہٕ آو واوُل بُکہٕ کۆر آبن تیُتھ زِ بٹھى۪ن پى۪و ہورُن مۅل ٭٭٭ أچھن تھۆپ دِتھ دِژن نقشس کُنی رِکھ دۆپُن یێتہ یور گو بیۆن بیۆن بسُن جان یہ گو مشرق: یہ گو اللہ اللہ ہُہ گو مغرب: ہُہ گو شیطان شیطان ٭٭٭ یمن عاشق چھہِ تھاواں پیالہ تٲبین تمن جوین چھُہ تلپاتالہ آگُر سُہ گو یێلہ تاپھ تاوی تۯیش تیزی ژٕ یوٝتا چى۪کھ تہ تیوتا چى۪کھ تہ بییہ ہُر ٭٭٭ اگر راتس تارکھ ووَکھ صبحس لونکھ آفتاب ٭٭٭ تس چھےٚ رٲژ ہنزٕ پٔرـ̡ یہِ روٝشتھ تس چھےٚ نێندٕر ٹٲٹھ ٭٭٭ یوٕ اوسُس پگہس کُن کھسان از چُھس یوَس کُن وسان خبر یہ پھیرٕ کر گوم؟ ٭٭٭ مےٚ دِژ ڈبہِ کنـ̡ نظر سۅٲس داں پتجہِ رٲچھ تنہٕ گے ستہٕ ترہ ؤری سۅ چھےٚ وُنہِ تٔتـ̡ نٕے ********************** سُہ تہِ اوس یوسف سُہ اوس نہٕ یوسف کێنہہ مگر کیٖریُک قٲد اوسُس ڈى۪کس لیٖکھِتھ سُہ پیوس وى۪تراوُن یوسفن ٲس گۯاو کٔرمٕژ وۅرٕ باین ہند اوسُس ونہٕ نس وار تمـ̡ ہیوک نہٕ شِہتھ تہِ پننى۪ن باین ہند کیا ونہِ ہا وۅرٕ باین ٲس کُنی کتھ وۅرٕ بوے اوسُکھ کٕنِتھ کھیون پنٕنى۪ن باین ٲس چھلہٕ چھانگٕر تِم ٲسـ̡ تمـ̡ سٕندس رتس تہِ زاگان تہٕ اکھ اکـ̡ سٕندس تہِ تِم نے تس کیٖرس ژھنہٕ ہن سُہ گژھہِ ہے توتہِ تِہُند حال وُچھتھ پھۯیٹـ̡ تِمو کھتوو سُہ مٲلِس اۆنہس نہٕ رتہٕ پٲژھـ̡ پلو تہِ دۆپُکھ وُچھہِ کى۪تھہٕ تس ٲسـ̡ سُلی منہِ پھٔلـ̡ چھتیمٕتـ̡ سُہ اوس نہٕ یوسُف کێنہہ مگر انہار اوسُس تمـ̡ سندُے اکھتُے اطوار تہِ، تہٕ بختٕہ کہِ ٹانکچـ̡ تھر تہِ مگر تمیُک نانُک نہٕ توے آو نہٕ کانہہ ملایک یُس تٔمِس پدى۪ن تل پل تھاوِہے تِمو کُن سُہ مگر کیوٝر تھووہس پتَے سوداگارن تہِ لوگُکھ کھۅر چھلنس پنُن گُدوم تہِ کۆڈہس نہٕ سوداگارو کٔر تٔمِس منز بازر بوٝلـ̡ سُہ ہیۆت نہٕ ملـ̡ کٲنسہ سُہ ہیوت ملـ̡ عامن خامن تہٕ کٔرہس سوٲرـ̡ ٕے خریدار گے نہٕ تتہِ نظرِ اکھ، سٕترٕ کٲنـ̡ واجینـ̡ (دپاں تس ٲس گرِ رسد مۅکلیمٕژ) بێیہ، بیٖب زلیخا (دپاں تمہِ دوپنکھ : مێون مہرازٕ گو پوزُے مێون مہرٕکتہِ انہِ؟ تہٕ دار تہِ کُس نیرِ أمِس أمس چھےٚ بایو مژھہٕ کرِ مژٕ اژھہٕ، تہٕ سوداگارو آوسٲوـ̡ مٕتـ̡ ڈنگ دِتھ گۅڈ یہ سورِ تہٕ گژھہِ مےٚ ما تگى۪س ناد لایُن میانہِ یوسوفو ولو ! مےٚ چھُہ تمیُک آرتھ موٹھمُت) مرحبا چُھس، پۆز پۆز وۆنُن بہٕ گوس غۅطن کُنہِ دۅہہٕ ما یِن ستھ ہۆکھـ̡ مٕتـ̡ ہێلـ̡ تہٕ دِن ستن زوٝدار ہێلى۪ن دن٘د تیلہِ کُس دِیہ یُپِس تھۆپ یا بیٖب زُلیخایہِ ما پورِ ہرُد سونتہٕ سبزارٕچ مٲنتھر ٲس یوسفہٕ سٕے یوت تگان اگر سُہ دۅہ سپُد باین ییہِ ٲنس منز رامہٕ ہون بوزنہٕ تہٕ ملٲیکس ییہِ پنہٕ نِس شوژرس پى۪ٹھ مندچھہِ ہند عٲرق میے یوت آسہِ رویس رنگ بٕے یوت چُھس چھۅکہٕ لد وٲنجہِ آلو دِوان : ناد لایے میانہِ یوسوفو ولو ! ٭٭٭ موسم وُپھہِ آو وقتہٕ کہِ پۆت برٕ کنـ̡ اکھ پۯون صبح دِگہٕ دی دی وٲنِج کوٝران پۯون صبح یێلہِ پنجرٕ پٹى۪و مٔنزـ̡ ژایو تاپھ واوٕ رنگا آیے تہٕ کریونم میوٝٹھ ڈى۪کس تالو پچہِ پى۪ٹھ ییریو کٔتـ̡ جو پۯژھنے اول بۅچھہِ أچھ میانہِ تہٕ کتـ̡ جِہ وُڑو ٲسـ̡ ہکچہِ کراں وقتکُ شُنـ̡ یا مانڈان مانڈاں کۆت ووت دۅہ تالو پچہِ ہند اول چھُہ جِنہٕ سُند أچھ کھانکھُر ہیو تاپھ چھُہ کرتان گومُت پھۯیٹـ̡ دٲر اگر مژراوو ژھٹھ کرِ کانى۪ن وَٹھ آنتہٕ نظر کتھ دۆل وہرٲوِتھ ! کٔتـ̡ جے یور اژن تہٕ کپٲرـ̡ ! ٭٭٭ دم حُبسہٕ دمس منز کتھ رۆٹتھس واو پھسیومُت ٹھِپـ̡ کانى۪ن منز پُھٹمُت جل ڈلہٕ کِس سیٖنس منز گو دمہٕ پُھٹـ̡ گۯاین وٹھ گُمہٕ کۯاین منز سِونہٕ چھُہ آمُت مێون بدن پننی ژھێٹـ̡ شاہ ہێـ̡ ہێـ̡ وى۪سریاے شوٝشکـ̡ پر سیٖنس پى۪ٹھ چھُہ اپھروٹھ بلبلہٕ پکھہِ پى۪ٹھ پل لنجہِ پى۪ٹھہٕ کِس قُمرِس پى۪ٹھ چھےٚ نا عار یوان زى۪وِ ٲسِس نا آمٕتـ̡ کٔنڈـ̡ شاہ رگ چھس نا شرۅکنیمٕژ ۂٹـ̡ گۅگلس پى۪ٹھ چُھس نا یاہو روٹہٕ گومُت حبسہٕ دمس منز کتھ رۆٹتھس وقتُک اتہٕ گتھ چھا وتہِ ڈولمُت موسم کونہٕ چھہِ بدلاں رنگ تیلہ اوس حُبسہٕ دمس ڈمب آساں رحمٔژ روٝد نب اوس پنہٕ نِس مۅردٕ شریرس لولٕکہِ اۆبرٕکـ̡ جامہ ولاں امرى۪تھ چاواں ددِ متہِ دۯمنٕچ کانٕج کانٕج ٲس نیٖلاں سِومٕژ ژم ٲس شێہلاں بلبلہٕ پکھ ٲس پلہٕ تلہٕ مۅکلان ہۅکھہِ مٕتہِ ہٹہِ اوس نوِ سرٕ یا ہوٝ ہوٝ وۅتلاں زى۪وِ زن روٝز نہٕ لفظن زوٝ دنہٕ واجِنـ̡ تۅژھ دِل چھُے عارٕ کتى۪ن رمزن منز لایاں ناد وقتُک اتہٕ گتھ متہٕ گنڈتن زولانن منز موسم گے موسم یێلہ تِم بدلاں روزن میانى۪ن نادن دِتہٕ تٲثیر یُتھ تِم دمہٕ پُھٹـ̡ موسم وٹہٕ ہن اۆبرس کڈہن سفرٕچ کل تھرِ تھرِ کرٕہن جرِ جرِ سران ٭٭٭ سفراتھ آبہٕ ! ژٕکتھ ولہرٔـ̡ شہ پھسیومُت سٔدرٕ انان چُھے واو پکھن پى۪ٹھ ٹھاسان چُھے کۅہہٕ تینتالى۪ن کھکھرِ نِواں چھے کھنگرو کھۯاشێو منزـ̡ واپس وولیمٕژ وى۪تھ اتہٕ گتھ ما چُھے جیرٕ تُلاں آبہٕ ! دپاں زُوٕ ذٲژ ژٕ چُھکھ بۆڈ اتھہٕ رو ٹ آسکھ دۅہہٕ اکہِ بد خاہ ڈى۪کہٕ ژُکرووُتھ وچھ ہُنـ̡ رووُتھ زُوٕ ذٲژن پُھنـ̡ پھاٹھ کریوتھ دِلہٕ دۆ ر آدم پانے دارس ناو بنٲوِتھ غوصہٕ ہتِس گۯایل سینس نے لتہٕ مونڈ کرِہی از نَے چانى۪ن گۯاین گۯاو کرٕنـ̡ سۆمب آسہِ ہا آدمـ̡ ذاتھ وقتا پاوے یاد زِ گُمہٕ سرـ̡ پان گژھی تاپل سێکلِس منز یێلہ میانى۪و ٹاٹھى۪و تۯیشہِ ہتى۪و معصوٝمو آلو آلو دیُت ہے ژھێپھ دِتھ روٝدُکھ تێلہِ کۅنہٕ تُلنکھ واون پنہٕ نى۪ن پٲزٕ پکھن پى۪ٹھ تیلہِ کتہِ ٲسٕے سۆتھـ̡ ژٹنٕچ دیوانہ ہى۪کتھ دِلہٕ دۆر آدم نے تتھ سێکلِس پنہٕ نی گۯکہٕ وٕنہِ رتہٕ سگ دیہِ ہا ژےٚ تہِ روزوے نہٕ أچھن منز آب اتہٕ گتہٕ باجا ! اکہِ دوہہٕ وُچھمکھ متہِ دُپہرٕکس تاپس دۅہلی خاب وُچھان وچھہٕ کِس منزلِس منزوُچھمے اکھ آدمـ̡ ژھاے ذرٕ ذرٕ مێونے ہیو خطہٕ خال گۯاین ہُند گتہٕ گیُور وُچھم تتھ پھۯستہٕ پھنبس زن ژھٹھ دونان (دوننـ̡ لایق زٲنتھ ٲخرمیٲنی ژھاے) یێلہ ژٕ کھساں چُھکھ کُلـ̡ مولو پى۪ٹھہٕ میوس تام پانس سٍتـ̡ کیا کیا چُھکھ کھالاں؟ واون اوس ژُھنمُت چھکرٲوِتھ آبہٕ ژےٚ اونتھم تی سۆمبرٲوِتھ وقتٕچہِ وتہِ کھى۪و پتہٕ وتھ واٹھ (دل چھُہ گژھاں وُنـ̡ گۯاین کُن، وُنـ̡ گۯاون کُن) آبہ! ژٕ یێلہِ میانى۪ن اڈـ̡ جن ہند سوٝر لبکھ گُلہِ ٹورِس برـ̡ زى۪ن دى۪و میانی پُشتُک کانہہ مۆت عاشق رژھراوى۪س کاڈى۪ن منز ٭٭٭ شۯُکھ بونـ̡ ! ژےٚ گوے یژکالا وۅنـ̡ اتھ کنہِ بالس پى۪ٹھ ننہِ تنہ وى۪تراواں چھکھ تاپھ بونـ̡ ! ژےٚ نِش چُھم گمہٕ سرـ̡ پانس رُمہ رُمہ پھیراں مۆت شیہجار وتھرٕ گنى۪ر چھا آبِ حیات؟ بونـ̡! مگر اتھ چٲنِس مایہِ ہتسِ شێہجارس کیازہ کۯٹاں چھِم پوشہِ چمن وتھرٕ گنى۪ر چھا موتہٕ براتھ؟ چٲنـ̡ منتھ چھےٚ زِ گۯشمس وۅپدووُتھ شێہجار میٲنس لٲوِس پوشس نہ چھُہ نون تاپھ ویاں تہٕ نہ بونہِ شِہُل اکھ دا منگہٕ ہس پوز کیا منگہٕ تس؟ ہے ساعتِ حسن ژٕ تہِ پرارکھنا یوت تانـ̡ نہٕ یہ شۯُکھ کانہہ مژراوى۪م ٭٭٭ دُوۆت پھێہہ پھێہہ کرٕوُن کون دُووت تہٕ یہ تاپل دۅہ آب، تہٕ سیکہِ صحراوس شۯو پمُت واو، تہٕ وُہہٕ وٕنہِ وُرِ زامُت ٲسہٕ منزٕچ ٹنگہٕ ۂٹ چھےٚ دپان وۅتھ نیر دٔچُھن ہُتھ کھنگرٕچہِ جۅیہِ منگ تۯیش دٔزمٕژ ژم چھےٚ دپاں وۅتھ کھووُر پکھ ہُتھ بونہِ چھُہ وُنہِ تہِ شِہُل بونہِ شِہُل آبس کریشاں کھنگرٕچ جۅے ننہِ تاپہٕ دزاں نیرٕ دٔچُھن لگہِ تن تپہٕ تاوس پکہٕ کھووُر گژھہِ خوٝنس پھى۪کھ وتہٕ چھےٚ أکِس نِشہِ اکھ دوٝراں ژھۅکوٕنہِ شہہٕ لٕتھہِ زاگاں گرى۪د ٭٭٭ زوٝن وُنہِ تہِ چھُہ رٲژ پہر کھنڈ باقٕے ٹارى۪ن پى۪ٹھ شولییہِ تہٕ کۆرنم نێندرِ أچھن پى۪ٹھ لوٕ چھِرکاو سونتُک واو چھُہ توتہِ دپو تنہِ چھہـ̡ دِتھ نیران زوٝن چھےٚ ظٲلِم ! اتھ چھےٚ پى۪واں منہِ پھلہِ وٕے سٍتى۪ن مۅنہِ ماہ کٔرـ̡ کٔرـ̡ باوٕنـ̡ ماے کالہٕ تہِ ٲسٕم کالہٕ کُھہس منز گرِ کھنجہِ نى۪ترن نکھہٕ اکھ زوٝن اسہٕ وٕنہِ ہۅنجہِ ؤژھ چشمن منز رُمس رُمس منز ووتُم گاش تاوٕ ۂتِس سیکِلس پى۪و روٝد وقتٕچہِ أچھ پى۪و ژى۪پہِ زنہٕ نوٝن کالہٕ کُھہٕچ لب لب وولییہِ وُچھاں وُچھاں پى۪و زوٝنہِ تہٕ چشمن بختس بى۪ن بٹھہِ بُزـ̡ گٲمٕژ گاڑ چھےٚ کۯیشان زى۪و نى۪نگلِتھ ٭٭٭ ژھاے تێلہِ زٲنِم یێلہِ برمندِنى۪ن گو گرِ کھنجہِ اۆبرس تل افتاب برى۪م کیا اوسُم زیٹھِس سفرس روزى۪م دمہٕ دمہٕ نٲلی نال ٭٭٭** ٲلیو پلیو دۆپُن: بُنـ̡ لہِ وِزِ گژھہِ بانگ پرٕنـ̡ متھ گیوم دپس کیازِ تٔمـ̡ ژى۪تُر مێون سوال دۆپُن: ٲلیو پِلیو ! منہٕ مشتاقن وہراویو دۆل

Haraf Daay - Muzaffar Aazim - 2007

حرف ڈاے - مظفر عازم - 2007

***

ژٕ دپکھ زى۪تھ کیا زیون بہٕ دپے میوٹھ عذاب
ژٕ دپکھ رہبر سون بہٕ دپے خابُک خاب
ژٕ دپکھ لوٝسِم پاد بہٕ دپے تی چھُہ مراد
ژٕ دپکھ وتھ کوت وٲژ بہٕ تھیکَے بێاکھ سراب
ژٕ دپکھ أمـ̡ ؤج ناو یہ وۅلُر کتھ گجہِ زاو
بہٕ دپے وِجہِ ژھۆٹ واو وى۪تھہِ کھوت وُلمنہِ آب
ژٕ دپکھ من تہٕ بدن کوٕ چۆپرٲوـ̡ دمن
بہٕ دپے چٲرتھ تار زیری رٹہِ مضراب
ژٕ دپکھ ژھۅپہٕ چھے رِوان بلبل کونہٕ گى۪وان
بہٕ دپے زى۪وِ تہِ چھُہ زاپھ کن تہِ سپدـ̡ نایاب
ژٕ دپکھ پێجہِ بیچھاے مالِنـ̡ پژھـ̡ آیاے
بہٕ دپے رگہِ رگہِ ووت زۅہرالتہِ زہراب
ژٕ دپکھ عازمؔ سون تس تہِ مۆھا ادٕ کۯون
بہٕ دپے چُھس بہٕ کُتول اتھ پھورى۪م نہٕ جواب

٭٭٭

ژلاں ژلاں تہِ شفق شولنوو جانانن
شبس بےٚ نوٝر کھۅتى۪ن گاش ووت غم خانن
دٕیاں چھےٚ پہرِ پشٕچ ژھیے درێا سنا روٝدس
دِواں چھُہ جوش یہِ چشمن، تہٕ سگ نیَستانن
ڈۆلُس نہٕ سونتہٕ ہوا نۆو وۆلُن کلس نلہٕ وۆٹ
چھےٚ یٔندرٕ دۅس تہِ ہیکاں تھۅس أنِتھ زمستانن
تتان چھُہ رَو تہٕ ژھٹان نور گلِ دُپہرُک رۅے
سۅتاں چھُہ پَو تہٕ رِواں شِنہ پپنـ̡ چھےٚ ارمانن
سمندرن تہِ چھلُن تۆگ نہ عازمؔس گٲمیُن
غزل وُزاں چھہِ دۯمنـ̡ کانجن تہٕ پیچانن

٭٭٭

زرٕد زمین رِہِج کۅنگہ تِہج تہٕ حبہ خوتوٝن
ہرُد چھُہ، نب کرِ شب از، ستارٕ ہى۪تھ نژِ زوٝن
کنن چھےٚ کارتِکس رس بہٲرـ̡ بلبلہٕ بولـ̡
نکھن دُشالہ سُہ یُس ہارِ ککلہِ پٲٹس ووٝن
یوُک سُہ واپھ أچھو بۆر وچھس بہارک تاپھ
پگاہ تہِ پێیہ نہٕ پۅہس پرٕ سُہ آفتابُک خوٝن
زبر رفیق سفر زٲنـ̡ زى۪ن مژر تہٕ ہژر
وۅں گو اگر وتہِ سمکھی سُہ سۅرگواس سکوٝن
مگر یہِ آبُ ہوا ہمنوا نہٕ تانس تان
وۅلر چُھ ناوِ رٹاں نم تہٕ وِج ژھٹاں چھےٚ جنوٝن
تچھان چُھ از تہِ أچھر والہٕ بُرزٕ دى۪ل عازمؔ
چھےٚ زیرٕ زبرٕ تِمے تازٕ کیا تھُرى۪کھ مضموٝن

٭٭٭

کتھ چھےٚ یوسف تہٕ زیٖنہٕ رۆس کھاریُک
وتھ چھےٚ واول وُنل، تہٕ ستھ وۅرٕ بٲے
جامہٕ والى۪ن چھےٚ نٔو گِلن ہاوٕنـ̡
ماگنن پۯانہِ آیہِ سۅرنے وٲے
نالہٕ کڈنٲوـ̡ زٔٹ اپزـ̡ رى۪تہٕ کٲلـ̡
یُہکہِ ما پھیرِ ماگ پھى۪رنہٕ ورٲے
حٲفظن گى۪وو تہٕ ڈیڈِ مژراوى۪کھ
عازمؔن کتھ کریوو تم تتہٕ تٲے

٭٭٭

اورٕ آیوو ہوا بہار ونان
سون وٲتِتھ چھُہ نار نار ونان
نٲگـ̡ رایس چھُہ پننہِ گامُک ژُکھ
سٲنـ̡ ہیمال روزِ زار ونان
ٹارِ کھٔژ تس اپارِ زاڈِچ زب
وارِ کھاریُک چھُہ خارزار ونان
پٲز وُچُھنا نظر دواں ٲلِس
شراکہِ بلبل چھُہ بالہٕ یار ونان
زانہِ کُس تہنزِ پژھہِ چھُہ کیا معنے
یم أشس یُپ وۅشس چھِہ نار ونان
اسہِ تہِ چھا عازمؔن امار یِتھے
آنجہٲنی تہِ ٲسـ̡ شعر وناں

٭٭٭

گى۪وَن لہر تہٕ سمن بل تہٕ گُر تہٕ گوند تہٕ مشٲلـ̡
یہِ دردٕ نَے چھےٚ اموب آرٕ گرز تہٕ ڈُب ڈُبہٕ وٲلـ̡
یہِ سادٕ ٹیکہٕ بٹنٕـ̡ پونپرِس کران باوتھ
ہۅ واوٕ رِنگ تہِ نژاں بونہِ باڈٕوس گیہِ نٲلـ̡
ڈلٕچ لہر چھےٚ دٔہِس سرێہہ کران وُٹھن تہٕ ژلان
چھٔنِس وچھس چھےٚ کھى۪لس عرقہٕ ژھٹھ اناں یہِ وُڈٲلـ̡
ہوا ڈلاں تہٕ سرس منز گُرَن گِنداں گراین
وۅٹل تہٕ مۆت کرِ ملرن، ڈُنگل تہٕ وسہِ پاتٲلـ̡
تٔتِس ڈى۪کس چھےٚ پھِران بُتلہِ روٝدٕ جٔرـ̡ شێہجار
فضا تُمارٕ گنڈاں رامہٕ رامہٕ بدرٕنـ̡ ڈٲلـ̡
مژر تہٕ پوشہٕ دُپھس پى۪ٹھ تُلٕر ژٕہاں مۆدریر
سکوٝن سروٕ ہرَن تل جلن تہٕ قمرى۪ن ٲلـ̡
شباہ تہٕ، روٝد چھلاں اتھ مندورِ پش کى۪و بۯاند
دۅہا تہٕ، تاپھ ملاں مۅنہِ پھلى۪ن چھہِ پنجرٕکـ̡ زٲلـ̡
گرس چھُہ دارِ گژھاں ٹھُک برس چھُہ دل راوان
یہِ وتہٕ وى۪لٲے ہوا کوت یپٲرـ̡ لوگ یژکٲلـ̡
غزل چھُہ ناگہٕ بلس بوسہٕ دِتھ لى۪کھان عازمؔ
دپاں یہِ مصرٕ چھُہ مٲنتھٕر، ژٕ ما پرکھ ہیمٲلـ̡

٭٭٭

آفتابُک ہوس چھُہ اسمانس
چشمہٕ ووِ رٲژ ہالہِ مٲدانس
پۯانہِ پۅستکہِ پێمٕتـ̡ چھِہ کاغذ کێمـ̡
معنہِ بدلن دۅہَے ؤں فۅرمانس
اول وٲلِتھ چھُہ لول ازماواں
ہارِ واوُل چھُہ گتھ دِواں پانس
ۂسـ̡ کرَس منز دپاں چھُہ موہ ژامُت
باگہِ بٔرتِس اگادِ رێہہ جانس
دردٕ باغٕچ گرٕد دٕنِتھ جامن
ہی گلستاں وناں چھےٚ گلدانس
کٔتـ̡ جہِ وُپھ ہِش گٔیایہِ دارِ نیبرـ̡
تالوس أچھ الانزٕ گٔیہِ دێانس
جورِ ماراں چھِ پۅختہ چھۅکھ تہٕ عطا
بس ونکھ کس أکِس مێہربانس
نالہٕ کرِ دٔدونس جگر سٲراب
أچھ اگر آب دِن نیَستانس
تر زبان پرٲو سر سرن والى۪و
شیرِ پمپوش چھِکھ ہُریمانس
تیٖر عازمؔ گراں چھُہ پوشہِ تُلِس
یار دانا وناں چھہِ دیوانس

٭٭٭

ہوا چھُہ تٍرٕ دٕنان، شِنہٕ پِپنـ̡ شِٹھاں چھےٚ ہُپٲرـ̡
خبر دُبارٕ کرێا ہردٕ روچھ دورٕ یپٲرـ̡
ژےٚ کم کتابہٕ پری وۅنـ̡ بۯمِج تہٕ دچھہِ پونپور
ژےٚ نَے تہٕ کس چھےٚ خبر لوزٕ کس کرێایہِ بہٲرـ̡
ژٕ یِکھ تہٕ تۯیشہ ۂتِس جۅے وُزاں سێکستانس
گژھکھ تہٕ پٔدـ̡ چھہِ دزاں شب بى۪دار نظرِ ژۅپٲرـ̡
وصالہٕ سانہِ چھےٚ ون وِگنہِ دٔرـ̡ کٔرِتھ نیران
فراقہٕ چانہِ پننٕـ̡ وُٹھ بناں دہانس تٲرـ̡
کزُل تہِ اوس کتھا برى۪م دِوان بےٚ سۅکھ نظرن
ززُر چھُہ بێاکھ سِرا وۅنـ̡ نِمتھ کپٲرـ̡ کپٲرـ̡
یہ جورِ ہن چھےٚ گرن وٲلـ̡ پننہِ اتھہٕ گٔرمٕژ
گُلٲلـ̡ شملہ رَوَس، سنگرِ جاموار انٲرـ̡
یہ مێون چھۅکھ تہٕ یہِ سرسٲوـ̡ چون دستِ شفا
رٹان چھےٚ دگ تہٕ سہولتھ پننٕـ̡ پننٕـ̡ انوٲرـ̡
فضا چھُہ نیوٝل تہٕ شہپر بےٚ پھرُک ہوا دوناں
مزٲرـ̡ مُزکہٕ چھُہ کُلـ̡ ددرِ ژھایہِ مێون شکٲرـ̡
بہٕ چیرٕ پوژھ سرابس تہٕ لوٕ سپار ہى۪مس
وچُھک حباب چھُہ ٲوِلـ̡ اچھر تُھران اچھہِ دٲرـ̡
ژےٚ برونٹھہٕ کنہِ چُھنہٕ عازمؔ پۯى۪ژل کلام کران
سفر پسند چھےٚ خۅشبوے تہٕ خۅش ہوا چھُہ سوٲرـ̡

٭٭٭

وُڈاں گیایہِ نظر پانہٕ وُچھہِ پنُن انہار
سُہ مۅہرٕ آسہِ ہے ٲنس تہٕ پراوِ ہے دیدار
مےٚ زى۪و دِژٕکھ تہٕ بہٕ گوسکھ اگادِ اڈٕکول شُر
زبان دِیوٝم یہِ سوسن سجاوِ مێون مزار
سوال سٲلہٕ مٔتِس ازلہٕ آوٕلُن تہٕ شِکٲرـ̡
سفر چھُہ نوٝح تہٕ ناوٕے، مژر چھُہ سٲدروار
یێلی یِوان چھُہ تێلی، نێٲوـ̡ پوش ہى۪تھ چھُہ یِوان
وُجارٕ پتھرِ غنیمتھ چھُہ مٔتـ̡ مِزازٕ بہار
قلم کِمامہِ یہِ کتھ چُھکھ وناں لۅبر لولو
کراں سۅ کُکلِہٕ کراماتھ کوسمن چھےٚ ہُشار
زرى۪ن کنن چھِہ پراں سٲنـ̡ سادٕ مٔتـ̡ گُلریز
ژھرى۪ن مچن چھِہ براں یار ضربہٕ روستُے دیار
قصیدٕ چُھو نہٕ پراں تل پتى۪ن یِتھَے عازمؔ
امارٕ کٔہندِ چھِہ ژالان وۅپر وَتن ہُند مار

٭٭٭

وسان تہٕ وٲژ یہِ افتابہٕ کھاو خابن منز
وُنل وُزیایہِ ونُک ون وۆلُن عذابن منز
نٹى۪ن تہٕ کھسہِ نہٕ تُرَے چانہِ میانہِ تعشوقٕچ
یہِ تہرِ ٹوک تہِ کاغذ کێمى۪ن کتابن منز
ہۅکھَے رٕڈیایہِ سرن منز چھےٚ گاڈٕ وُٹھ پھیشان
ستم نصیب سمندر ژماں سرابن منز
گراں گرٲنـ̡ چھِہ خابٕکـ̡ کھلونہٕ ؤڈراواں
مراں چھےٚ رٲژ ٲچھن منز تہٕ دۅہ دۅلابن منز
تُلتِھ نِیَس تہٕ ہوا گوشہِ گوشہِ مندچھاوى۪س
وچھس وُزِتھ تہِ چھےٚ خۅشبۅے وۅزُم گۅلابن منز
دِلس چھُہ وون٘ت وُچھان از ستم ظریف قلم
صبوٝرٕ وول مسٲفر لیۆکھُن بێتابن منز
یوٕچ صُرَے تہٕ أزیُک اوم کھوس ہى۪تھ عازمؔ
ورل سوال چھُہ تراواں سہل جوابن منز

٭٭٭

آیتَن ازلہٕ واوٕ ہالن وَن
کالہٕ اوس پھۯستہٕ پھن٘ب پگَہہ پہـ̡ پہن
زاو بالس تہٕ روو وٲنِج ہیو
پۆت نظر دِژ نہٕ ژھالہٕ مٔتـ̡ آرن
لٔج کُٹھِس منز کٔتِج تہٕ وُمبرن پى۪ٹھ
ؤج نیبرـ̡ دٲر عشقہٕ پیچانن
وَس تہٕ وسمت تہٕ نستہٕ وٲج کٔنِتھ
مٲنز مسول متھان چھےٚ مس والن
وۅنـ̡ چھےٚ غارن تہِ نارٕ ژھٹھ ژاپان
رێشـ̡ تۅرگ تراوٕہن تہٕ ون رٹہٕ ہن
ہوشہِ سان ہێۆچھ نہٕ پوشنوٝلس نِش
مۅہرٕ دی دی زٕلاں چھِ زى۪و حرفن
لۆدرٕ پھٔلـ̡ ہى۪تھ ملر سوار عازمؔ
سۆدرٕ کھۅنہِ منز منگاں چھُہ ندرى۪ن پن

٭٭٭

ژے کیا تھى۪کی یہِ مسٲفر پننـ̡ وُڈو تہٕ پڑاو
خبر نہٕ دۅہ کتہِ لوسى۪س، ژى۪تس نہٕ کتہِ پى۪ٹھہٕ آو
گٕتَو گٕتَو چھےٚ یہِ کۅل بُتھ تہٕ بانہٕ ازماوان
یپارِ گیٖر چھُہ وتہٕ گتھ اپارِ بٹھہِ چھس ناو
دپاں سِتارٕ جرى۪س رٲژ ہُند زدل دامن
چھُہ دۅہ تہِ درِ تہٕ پھژالس پھى۪رن شکھُر تہِ رٕنیاو
سُہ دَور وُچھتہٕ چھُہ ما کێم̡ ژھێچن کتابن منز
شۅنجییہِ زوٝنہِ زٕژن تل، وژھٲیہِ سِرـ̡ یہِ کھژاو
وى۪تھَو وساں چھُہ ؤسِن،تھکھ اگر چھُہ گگراین
ودن ہٹی نہٕ سٔہی، وۅتھ گى۪ون لہر ازماو
لوَے گیَس تہٕ ژٕنى۪و مٔنزـ̡ چھہِ یسلہٕ تر دۯامتٕـ̡
نتَے یوَے یہِ ونُک ون مےٚ دۯینٹھمان دزاو
أچھن متھان چھےٚ یمبرزل یہِ جاموارُک رنگ
بہٲرـ̡ یاوٕ چھُہ وِرـ̡ کیۆم کران زٔری پٲراو
وُتُش وى۪داکھ تہٕ سۅرنَے دِلس تُجِن دُبراے
یہِ ہَے چھُہ سون سُہ عازمؔ، دپى۪وکھ ہَے سُہ ژجاو

٭٭٭

سرتلہِ سودا کس ییہِ راس
بازر دۯاس اتھہٕ ہاوان آس
مۅچھہِ منز ٲس ٹِکہٕ واوٕج رٲو
بُتھہِ کۆڈ بُتھـ̡ ہُنـ̡ واون ٹاس
دپوَے جۅیہِ کُس باڈو اوس
یُپـ̡ دیُت بارو بٔٹھـ̡ کھى۪و تۯاس
وُہنووُن وى۪تہٕ گژھہٕ وُن نار
وۅش دۯاو وقتس خۅش احساس
ان اتھہٕ کھن یتھ کنہِ پى۪ٹھ ناو
ٲسِتھ گژھہِ دیُن آسن باس
سوٝزا عازمؔ صٲبن ڈٲلـ̡
چکہٕ چاو اوسوٝ لۆبوا لاس

٭٭٭

ہی تھرِ بامن وُلوِتھ واو
ژۆل زن، کُنہِ وۆتھہٕ سُرٕ بنہِ کاو
أچھـ̡ موٝراں وُچھ دۅہ کۆت ووت
ٲدی ہے اختابہٕ کھژاو
خندٕ کرٕ ناواں چندٕ ژھیۆن پوژھ
مۅکھتہٕ دپیوہم رٹھ سۆمبراو
أسـ̡ پھٹـ̡ زٲڈِس منز ننہٕ وٲرـ̡
تس اوس گُر گۆند عاصہٕ تہٕ کھۯاو
ہاوسہٕ وۆو اسہِ کاوُن ڈون
ٲکـ̡ دۆپ زاو، أکـ̡ دۆپ سُہ دزاو
وۅلرو لۅلہِ منز للہٕ ناوُن
کٔلـ̡ لیۆکھنَے گۯاین پى۪ٹھ ناو
وتہٕ بدلنہٕ چھا پٔدـ̡ شیہلان
مۆت مُلکس مُلکس پھیریاو
یاوٕنہٕ روٝٹُھے یاون راے
بـێیہِ ما ٹوٹھی بر ؤتھـ̡ تھاو

٭٭٭

خلقن زن اوس حلقن گنڈ
ملکن کوٕ لٔج تالس زى۪و
کۅلہِ گٔیہِ گلہِ زى۪و نۆٹ کوٕ پُھٹ
کتھٕ گرِ دپھ ادٕ اتھہٕ منزٕ پى۪و
تھجہ مژِ وِرِ گو وٲنجہِ ژس
کجہِ زى۪وِ کیا وۆن کوستوٝرى۪و
زلرى۪ن زامٕتـ̡ بٲزیگر
دابہٕ دۆبوٝس ازماواں دى۪و

٭٭٭

ازلہٕ ابد سمسار اۆنہٕ مَے
منہٕ وٕنہِ دلِ بیدار اۆنہٕ مَے
صبحٕکہ وچھہِ شێہجار اۆنہٕ مَے
شامٕکہ نبہٕ دندِ نار اۆنہٕ مَے
سونتٕکہ شہہٕ سبزار اۆنہٕ مَے
جگرٕکہ چھۅکہٕ وۅزجار اۆنہٕ مَے
مژِ وزملہِ ہنز راس رٔٹتھ
اوبرٕچہ راگہِ سوار اۆنہٕ مَے
کۅہہٕ تٲرِتھ گوم اڈوتہِ رأسـ̡
اۆنہٕ مَے نہ تہٕ صد بار اۆنہٕ مَے
حى۪س چھُیہِ کس گتھ ماراں لوٝس
پکھہٕ پُھٹ جاناوار اۆنہٕ مَے
وِلہِ وِلہِ ٹوٹھییوہم نا
شٲہد پۯون اخبار اۆنہٕ مَے
حرفس حرفس ٲنہٕ گورُم
ژێـ̡ چونُے انہار اۆنہٕ مَے
پژھِہ دِتہٕ از وژھہِ وٲنجہِ واس
مژھہِ کھش دِتھ شہکار اۆنہٕ مَے
ہٲنگنـ̡ تہہٕ تہہٕ مژراوُن
عازمؔ صٲبُن شعر اۆنہٕ مَے

٭٭٭

مٔتـ̡ ورٕ میانہِ چھہ روشاں زى۪و
کمہِ گفتارٕ چھہِ شعر پھولاں
گریشمہٕ کہ تاوٕ چھہ لوٕ وۅپداں
لوِ ہندِ نارٕ چھہِ شعر پھۅلاں
بێیہِ گو تُلہٕ کترِس گُمہٕ سران
نوِ وى۪وہارٕ چھہِ شعر پھۅلان
ہردٕکہ وچھہٕ پھٔٹ کۆستوٝرـ̡ بولـ̡
سونتٕکہِ رۅیہِ چھِس شعر پھۅلاں

٭٭٭

ہردٕ وٲے ہردٕ رٲچھـ̡ دردٕچ نَے
بونہِ پۯوو پن ۂرِتھ بہارُک پَے
رایہِ چانی چھُہ میانہِ آنگٕنہ زول
مایہِ چانی چھےٚ سانہِ گامہٕ دِوَے
کر اتھس تھپھ تہٕ ستھ سمندر ہى۪تھ
پروتن ہِندـ̡ سفر تہِ سپدن طَے
تاپہٕ کراین چھےٚ از اۆبر سۅ وُڈنـ̡
شین وى۪گلیوو یێمہِ چہِ گرایہِ دۅہَے
پہرِ پوشِن مےٚ چٲنـ̡ پٔدـ̡ پمپوش
وارِ ہندـ̡ پوشنوٝل رٔچھـ̡ نَے دَے
وى۪تھ چھےٚ پانس پنُن سفر پالان
شاٹھ شاٹھس تھى۪کان چھُہ مانٹُک پَے
بالہٕ آرس چھےٚ سودرٕ کھۅن پراران
نیٖرـ̡ شێہجارٕ میانہِ! گرٕ چھُہ گرَے
کینہہ مہٕ پرٕژھ عازمؔن خدا رٔچھـ̡ نس
نارٕ بالس اندر چھےٚ نالان نَے

٭٭٭

أچھ گاش ژٕہان آیہِ أچھن منز مےٚ بٔرٕم راتھ
سۅے پرٲنـ̡ سپار ٲس بدل آیہِ پٔرٕم راتھ
پے آم دُہٕلـ̡ گاشہِ ژٔندٕر کڈِ نہ بُمن واش
کھۅر تل روٹم افتابہٕ تٔمی آنہٕ تُھرٕم راتھ
لرٕ کانہِ پھٔٹٕم یام تہٕ لرٕ کانہ پھچایم
اچھٕ دارِ مژر اوس اچھر ڈولہِ بٔرٕم راتھ
تِژھ تٍر یوان ٲس زِ رتھ شِٹھہِ ہے رگن منز
اکھ پۯٲنـ̡ چِٹھیا چٲنـ̡ ہُتى۪ن دارِ مٔرٕم راتھ
اکھ ساتھ سُہ ٹوٹھیوم زِ اکھ طوٝر دٔزِتھ پى۪وم
اکھ گاش پُزُم راتھ تہٕ اکھ لاش ؤرٕم راتھ
اکھ طفلہٕ نظر باز تہٕ کُل عُمر تہٕ پرتیٖتھ
ہے ٹٲنہٕ ژٹن والہِ یہ کۅسہٕ گراے پھٔرٕم راتھ
پمپوش سپٕدـ̡ ژٲنگـ̡ ڈلس نارٕ ملر ؤتھـ̡
نِچہِ گاڑِ نژُن کۆر تہٕ کراماتھ سٔرٕم راتھ
تٔتھـ̡ دارِ ہنگس اوس اویزان سُہ عازمؔ
تہدار تسٕنز بٲتہٕ لہر فکرِ ترٕم راتھ

***

اوبرٕ لِشا ٲس، اسہِ دۆپ کینہہ پێیہِ، أچھ لجہِ درٕ اسمانس کُن
نظرٕے زٲجِن، ژھایہ تہِ آیہ نہ سٲنِس یتھ وٲرنس کُن
کتھ چھنہٕ ونہٕ نٕچ، دتھ گیہِ خابن، کتھ شمہس پتھ راوٕر وٲنس
گاہ ژول چشمن بۯى۪م دِتھ پانس، رێہہ پٔچ رسہٕ رسہٕ جانس کُن
یہ تہِ چُھنہ وُپھنٕچ تۅژھ کیا ٲس نہٕ، یا ونہِ کیا اوسُم نہٕ شِکٲرـ̡
والہٕ بٔرِس منز زنگ پھٔسرٲوٕم، کل روٝزٕم پھل دانس کُن
منہِ پھۆرمُت سٔنـ̡ ژور بےٚ شوٝنکھِس، تنہِ گیہِ ہنہ ہنہِ یرٕوٕنـ̡ ناو
ڈى۪کہ نۆمراواں مى۪حرابس کُن، اتھہٕ چھُہ گژھان مس بانس کُن
تس چُھنہٕ وقتٕچہِ أچھ بُتھ وُچھمُت یۅس مےٚ چھےٚ بختس ٹوٹھیمٕژ
وِلہ وِلہ غزلن منز مۅلہٕ نٲوٕم، گِلہِ نیو گِلوِتھ پانس کُن
لوٕ پھیرـ̡ أکـ̡ کٔر سٔدرٕچ باوتھ، پۯوِ اکہِ ؤنـ̡ اختابٕچ کتھ
دِل پرٕنووُم کنِرُک ہوٝ ہوٝ أچھ لوسم بُت خانس کُن
ژھاراں نیرِ تہٕ کۅم کرِ واوس، پۯٲوِتھ پھیرِ تہٕ سورى۪س تێہہ
اسہِ پھۆر شوقس مس مۆت عازمؔ وٲتـ̡ نہٕ تس دیوانس کُن

٭٭٭

شمہٕچہِ رێہہِ سٍتـ̡ چھووُم شام
شفقٕکہِ بُتھہِ وۅشلووُم شام
ہۅکھہِ متہِ ہٹہِ وۆنمس کیا تام
عٲرقہٕ ژھٹہِ أدرووُم شام
ییلہ آم ژٔندرُک پے ہى۪تھ آم
رى۪تہٕ پتھ رى۪تہٕ ازمووُم شام
لۅژِ لۅژِ کتھہِ لۆژرووُم بوس
گۅبہِ گۅبہِ شہہٕ گۆبرووُم شام
مۅچھہِ مۅچھہِ بۆرمس مۅختہٕ ہلم
سۅچھہِ بلہٕ کۅچھہِ للہٕ نووُم شام
زخمو پننى۪و کۆرمس زوٝل
چشمو چانى۪و چووُم شام
رژھہِ رژھہِ زولُم خونِ جگر
مژھہِ کھش دِتھ رنزٕنووُم شام
پژھہِ اوس کٹھکۆش وى۪گلاوُن
وژھہِ وٲنجہِ وُہنووُم شام
متھ گوم برٕہن شعرن منز
اتھ کتھہٕ کتھہِ منز رووُم شام
وقتس تورُم ارٕور تار
صبحٕکہِ سِرٕ برى۪مرووُم شام
نالس جۆرمس تارکھ نب
سحرٕچہِ گرِ وُزنووُم شام
یێمہِ کتھہِ حرفن وٲنج پھٔٹ
تمہِ کتھہِ حٲرتھ کھێووُم شام
چشمن منز گِندٕنووُم تاپھ
سیٖنس منز شى۪ہلووُم شام
صبحے سوزن تاپس ڈٲلـ̡
راتس کھۅنہِ کى۪تھ سووُم شام
زن بہٕ تہِ اوسُس عازمؔ صٲب
کم کم وہـ̡ کرٕنووُم شام

٭٭٭

اۆبرٕ دى۪و نَے کاسہِ منتھا تھاوِہے
وُزملٕے کرِہے، أچھی شیہلاوِہے
آبہٕ جۅے نَے ٲس صحراوس ڈى۪کس
شبنمٕے سُلہِ ژیرـ̡ وُٹھ أدراوِہے
تاپھ زٲلتھ تراوِ یا شٹھٕراوِ شیٖن
زانہہ یہِ موسم تێہہ حدن منز تھاوِہے
آفتابس شێہلہِ ہے عٲرق ڈى۪کس
زون ہَے ٹِکہٕ واوجا نژٕناوِہے
روٝدٕ رانٹھا نےَ ژھرٕے ژھایی سٔہی
یتھ الاوس کُن تہِ کێنہ پُشراوِہے
کاڈ کڈِہے کانہہ قلم بالا قدس
بُت پرس عشقس ألف پرناوِہے
ہے بہٕ کُس یوسف، بہٕ کتھ کیٖرس اندر
کانہہ یمن قاتل کۅہن نہناوِہے
ہر مۅکھس یُتھ گۯایہ کرٕہن تالہِ میوٹھ
قلزما انہِ ہے، ڈلس منز تۯاوِہے
ہُتھ نبس کرِہے أچھر والو پریُن
یتھ بے حى۪س بترٲژ کانہہ دٕنِراوِہے
مۆت، دُپہرن مالہٕ کرہے تارکن
شامہٕ پٔتـ̡ چھِٹہِ پونپرِس نژٕناوِہے
پھۅلنہٕ وقتن ولنہٕ ییہِ ہى۪س واو زن
اسہٕ وٕنس ٹوٝرِس تہِ بۯۆڈ کڈٕناوِہے
ہرونِس پوشس تہِ پوشن پاے دِتھ
شبنمس سادس ودُن مٔشراوِہے
پننہِ پاگل نظرِ وٹہِ ہے توسہٕ تۆمبـ̡
شوخ مغرۆرس وتن وتھراوِہے
مى۪ون ہیوٝ پھۆر تس تہِ آلژھـ̡ ٹینگہٕ وونـ̡
حرکتھا کرِ ہے، وتھا ازماوِہے
شعر چھا اڈٕ ژاپہِ علِمُک بالہٕ گرى۪ز
عازمٕؔنـ̡ پٲٹھى۪ن غزل ورتاوِہے

٭٭٭

دارى۪ن پردٕ سجاوان ٲسـ̡
گاشس للہٕ وُن تھاوان ٲسـ̡
تۆبروٝکھ ٲسـ̡ تمہِ شہرٕکـ̡ لوٝکھ
تالو ٹنگ سۆمبراوان ٲسـ̡
ٹینکہٕ بران ٲسـ̡ وارى۪ن منز
گٔنزراواں گٔنزراوان ٲسـ̡
ناون اوسُکھ ژامُت آب
کٔدلن ٹھٹھـ̡ لہراوان ٲسـ̡
حُسنس پننِس زالاں ژھاے
ٲنن دُہ دِوناوان ٲسـ̡
قبرن ٲسـ̡ کرناوان ٹیٖپ
کفنن تِلہ جرناوان ٲسـ̡
خٲبـ̡ أندٕرـ̡ ٲسـ̡ لایان مُش
ولہٕ ویرن الراوان ٲسـ̡
اتھہٕ بُتھ چھلنَے بانگ پٔرِتھ
مسجدِ منز لر تۯاوان ٲسـ̡
بٲیِس ژھێیہِ تل تھٲوِتھ ژونگ
بارٕنـ̡ اتھہٕ وُشناوان ٲسـ̡
دۅدٕ کۅلہِ مۅکھہٕ ٲسـ̡ بال کھناں
امرى۪تہٕ جۅے پُرناوان ٲسـ̡
دۅدٕ ہى۪ڈرن ہندـ̡ بُتھـ̡ پھِرـ̡ خاب
مٲنتھٕر دی دی ساوان ٲسـ̡
أندرِمہِ لیہِ ٲسـ̡ چیراں ہۆٹ
نێبریُم جٹہٕ جۆش چھاوان ٲسـ̡
جودوٝگر گۅنماتھ تتِکـ̡
کتھہِ روس کتھ ابساوان ٲسـ̡
منہِ مٔچھـ̡ ٲسٕکھ میٲنـ̡ شبیٖہہ
ہُنـ̡ قبرن پُشراوان ٲسـ̡

٭٭٭

یێتہ وٕنـ̡ ہٲرِتھ آس تتہِ کیا چوم تہٕ ہاے
رُمہٕ رُمہٕ آبِ حیات گُمہٕ پۯیڈیوم تہٕ ہاے
پۯوِ کوڈ تھرِ پى۪ٹھ کاڈ لوٕ ؤژھ واوس سٍتـ̡
تٔتـ̡ نٕے تاپہ ٹیۆکا مےٚ تہِ مازیوم تہٕ ہاے
ۂندریمٕژ دُبراے، وۅندِ ٲسـ̡ ژاپاں داغ
وُزمل ٹوٹھێایم، وَٹھ وى۪گلیوم تہٕ ہاے
تنہِ ہٕندِ آگرٕ آس من سرچٲوِتھ راتھ
طوطس زاگل بیور پادن پیوم تہٕ ہاے
چھژِ یمبرزلہِ پوٝر چھِٹہِ پونپورِس پان
ہٲرِتھ تمہِ دربارٕ حٲرتھ کھیوم تہٕ ہاے
تیۆنگلس لٲرِتھ گوس ژُہمس وُہوُن بوش
کتھہِ کتہِ اۆن شێہجار متہٕ پرژھـ̡ توم تہٕ ہاے
کٹھکۆش اوسم بارِ سونتھٕے روشایوم
چۅغہٕ ناموٝسُک راتھ بٔنزرِتھ کھیوم تہٕ ہاے
شرزٕسٕنزِ فطرٔژ زاس مزٕ مزٕ ژٲپٕم زوٝن
ژٔندرُک بۯونتھٕے گوم تۆندرٕ تتیوم تہٕ ہاے
تێلہِ ٲسـ̡ وِرکێمـ̡ پوش تێلہِ آس ہی پھۅلنے
ہردٕ گى۪واں مۆت شوق وٕنـ̡ سمکھیوم تہٕ ہاے
کھسہٕ وُن دۅہ راویوم ژھاین اتھِ کھیاویوم
عازمؔ وتہِ سمکھیوم ڈى۪کہٕ پۯزلى۪وم تہٕ ہاے

٭٭٭

پٲزٕ ارمان دِتِتھ، تازٕ وُڈن پکھ تہِ دِتم
ژےٚ ہِوِس پایہِ بڈِس شوٝبہِ نہٕ اُکہٕ توش کرم
کالہٕ اوٝبرس چھُہ ننی راگہِ کھسُن مێون پسند
وُزملن تھٲپـ̡ کرِتھ یَنہٕ مےٚ وُٹھنـ̡ تجـ̡ لاکم
مےٚ چھُہ وُچھمُت سُہ أچھو نارٕ وى۪تھن تارٕ تران
متـ̡ کتھا اوس وناں شوق چھُہ موتس محرم
تن چھےٚ ییران مٔتِس خابہٕ ۂتِس فضہس منز
زیٖن ما چارِ ستارن تہِ مےٚ ہیوٝ شوخ قدم
سُہ گۯزاں نیرِ تہٕ سٕہہ گۅردٕ چھہِ سپداں دمہٕ پُھٹـ̡
چھِٹہ پونپر پکھہٕ داران سُہ یتى۪ن تۯاوِ قدم
کم نظر دۯاکھ تہٕ باسیوے سُہ مۆہ ہیو یێران
مےٚ ژى۪تُرمُت چھُہ سُلی تس چھےٚ کتى۪ن تھپھ محکم
شاد مس رقص کراں وُچھ مےٚ پتھر خون تسند
ژٕ خبر کیازِ کراں دۯاکھ تمِس پى۪ٹھ ماتم
أزـ̡ کہِ شبہٕ آو مےٚ بێیہِ پیش سفر زانہِ خدا
دارِ پى۪ٹھ ژٲنگـ̡ ہنا تھوـ̡ زِ ژے چھےٚ مێون قسم
أنہٕ کپٹاں چھُہ زٕژن سون مظفّر عازمؔ
پوشہ برگن چھُہ سُواں چاکھ سُہ الماس قلم

٭٭٭

لوِ کٔـڈ نوِ سرٕ سونتس کل
لالس کونچُھن دلہٕ شیہجار
پروِ بۆر بێیہ از بانبرِ ہۆت
یمبرزلہِ ٹارى۪ن منز نار
کۯہنِس اۆبرس وچھ پۯزلیوو
وزملہِ کۅسہٕ کتھ کٔر اظہار
کچھہِ منزٕ ؤنـ̡ رووُم اچھہِ پوش
چشمو ژوپُم کٔنڈـ̡ انبار

٭٭٭

تماشہِ کیا چھہِ تگاں نوبہارکِس واوس
زِچھر تہٕ مویہِ چھژر لوگ ٲکِس زٔنِس داوس
ۂجی نظر تہِ سۅ تۯاوى۪م تہٕ ماگ وُشناوى۪م
کٔجی بیاض تہ ہاوس تہٕ ہار شێہلاوس
شفیق شوخ مزازس چھُہ سوز ساز پسند
بہٕ ٹورِ ٹورِ گُلن ہند اسُن کنَو چاوس
خیالہٕ کٔہندِ کراں زول چھکھ شبستانس
امارٕ مێانہِ وۅتھی یُتھنہٕ ٹیب پٲراوس
یہِ سِر اگر بہٕ ونکھ بارٕ کٔنڈـ̡ ژھٹن خۅشبۅے
سُہ پوشنوٝل ووان اوس بولـ̡ صحراوس
دپس مےٚ زون ژےٚ کٔمـ̡ لولہٕ خابہٕ مُر بۆرنے
اگر ثبوٝت منگى۪م عازمؔن غزل ہاوس

٭٭٭

تاجہ تختس لگى۪م پُھلے بختس
واجہِ کۯانکس اگر ژٕ لێکھہم ناو
سوسنٕچ زى۪و چھےٚ چٲنـ̡ شێچھ باوان
چون پٲراو کوسمن ہند کراو
شامہٕ تارُکھ امارٕ آیوسے
شفقہٕ نارو ژٕ کٔرـ̡ زِ ہے ٹھٔہراو
تاپھ چھووُم تہٕ گاشرٕم ہن ہن
میانہِ پُژِ آفتاب پھِرـ̡ پھِرـ̡ دۯاو
شالمارن چھےٚ کالہٕ اۆبرٕچ ژھاے
ڈل ہواوو پنُن اثر ازماو
نارٕ بالن چھُہ تُلہ کتُر لۆگمُت
میانہِ بترٲژ کٔٹھـ̡ شہ ووگ رٕڈیاو
ٲس دٲرِتھ وُچھم ششر گانٹن
تۯیش ہى۪تھ یُن گوژھُکھ بہارُک تاو

٭٭٭

زُنہٕ گاہ پنجرٕچہِ لٕیہِ کنـ̡ ژاو
کمرُک کمرے وۅلسنہٕ آو
ہی تھرِ لنجہِ لنجہِ پى۪ٹھ اوس شین
سونتہٕ ہواوچہِ ژنجہِ وى۪گلێاو
آنگن منز کۆڈ سرون کاڈ
دۅسہِ ہند بُڈٕ نلہٕ وۆٹ وۅشلێاو
کارِ وۅگنـ̡ کۅکرن دژ بانگ
دارِ دمس پى۪ٹھ رو پرزلێاو
تھرِ ہند لوٕ پھیۆر دۯمنس ووت
ہۅچھہِ مژِ کانجہِ نۆو تر دۯاو
نۆژ بُربتنہِ تہٕ ژھٹہِ کۅڈ واش
سُرٕ بنہِ بۯادیوو نارٕ الاو
کچھہِ مٲدانٕکہ مہرازو
اچھہٕ پوشو وۅتھ تن مشکاو
کۅنگہٕ تێہجہِ چھےٚ ٹوٹھیمٕژ زوٝن
ہردو! رٹھ نۆو وردن چھاو

٭٭٭

وکھ چھہُ از بخ بى۪دار، پێالہٕ تُلِو
سالہ آو بالہ یار، پێالہٕ تُلِو
سۅ شہِج مٲرـ̡ منز گۅلابٕچ رێہہ
بہٕ وُہاں مۆت امار، پێالہٕ تُلِو
سۅ حیا ویٔژ تہٕ زى۪و ژھنِن نینگلتھ
بہٕ ونِتھ گوس خار، پێالہٕ تُلِو
کوسمو لوسہٕ نوو بوسو سٍتـ̡
لالہٕ چھا داغ دار، پێالہٕ تُلِو
از تہِ عازمؔ چھُہ پێالہٕ رۆس ٲسِن
کتھ لگن شرم دار، پێالہٕ تُلِو

٭٭٭

زوٝنہِ پتے تارکھ ؤڈرٲوِتھ تۯٲوٕم زۅل
تنہٕ گو وقتا ینہٕ دل سٲوِتھ تۯٲوٕم زۅل
أزـ̡ کہِ غمٕچ تلوار کٔرٕم شاہ رگہِ پى۪ٹھ تیز
پگہٕچ بیقٕل ستھ کترٲوِتھ تۯٲوٕم زۅل
زیٖن کورُم دیوارس دۅدٕ مجنون کھۆتُس
کۂـ̡ یا دجہِ مہرێنہِ پُژنٲوِتھ تۯٲوٕم زۅل
کیا کیا وۆن سرسٲوـ̡ ٲچھو زى۪وِ توگ نہٕ پِھرُن
زى۪وِ تہِ أچھن ہند سۅرمہٕ لگٲوِتھ تۯٲوٕم زۅل
یُتھنہٕ تۯٕیو کِنـ̡ تاپھ اژى۪م مژِ نێندرِ پھرى۪م
دارِ برٕے کیا لٕیہِ تۯپرٲوِتھ تۯٲوٕم زۅل
دل ما تمبٕلى۪س، بولہِ، تہٕ صبحے نێندرِ پھرى۪م
قُمرِس راتہٕ مۅغُل ۂسرٲوِتھ تۯٲوٕم زۅل
ڈلہٕ وٕنـ̡ دِگرن پھۅلہٕ وٕنہِ صبحچ تۯاے رٔٹٕم
زلہٕ وٕنـ̡ اکھ مسول برى۪مرٲوِتھ تۯٲوٕم زۅل
خٲبـ̡ أندرـ̡ دُبراین ٲسٕم پوشہِ پُھلے
لوچہِ کٔمِس تاں نالس چھٲوِتھ تۯٲوٕم زۅل
ونہِ یێلہِ کوڈہس کنہِ کنہِ کۆرہس ہم سفرو
کنہِ سۆمبرِتھِ اى۪ہرام بنٲوِتھ تۯٲوٕم زۅل
فنکارس أکـ̡ کٲکـ̡ تگن گۆر کۆرنم ناو
بى۪اکھ غزل تس للہٕ وُن تھٲوِتھ تۯٲوٕم زۅل

٭٭٭

منہٕ سودرس ینہٕ گٕتھ وولے یم، تنہٕ ووتُم تلواس
نێندرِ ۂتِس چُھم نى۪کہٕ نى۪ن ژاناں خابن ہند ڈبہٕ ڈاس
کۅم کرٕ بالس، تھٲپـ̡ ہواوس، زوٝنہِ زٕژن کرٕ ڈینگـ̡
ہلہٕ بسملا، ہلہٕ بسملا، وُچھ کتھ سفرس دۯاس
پِشنس گۯیشمُک زر وى۪تراواں برجس ٲسِم پوش
ڈلہٕ وٕنہ دِگرُک گلِ دُپہر ہیوٝ ژمٹاں ژمٹاں آس
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
خریدارس مۅلُک انمان رووُم
شہر سومُم تہٕ شاہ سُلطان رووُم
بہٕ روٝدُس عازمؔس ژھاین دِواں ؤنـ̡
یۆتاں دۅہ ڈول تہٕ، ہے ارمان! رووُم

٭٭٭

بختس گِیُندنس وقتٕکـ̡ پھیرن
شالہٕ ٹنگن کرٕنووُن واہ
بوزو جب کر امہِ دبہٕ نیرن
نَیہِ گو دٔدون نیرِس داہ

٭٭٭

ژھلہٕ گٔرـ̡ قلمن لیوکھ سرابس
یُس دِیہِ أنـ̡ تھوپ سُے لبہِ مانٹھ
لُکہٕ متـ̡ ہٕکہ ژھنـ̡ وۅٹھ گردابس
کُس لگہِ شاٹھس، کس تگہِ ژھانٹھ

٭٭٭

دپێوہس گژھ بتل یژھـ̡ نے ژےٚ چھاونـ̡
سُہ گو بڈـ̡ بابہ نِس بۯاندس اویزان
دژوہس ٲنہٕ ستھ اسمان وچھنُک
بچارس ٹھۆر أچھن اوسس پنن پان

٭٭٭

جوٲنی منز چھےٚ
دارِ بسان دارى۪ن منز
بُجرس منز چھہِ
آنگن اکھ أکِس پشان

٭٭٭

دٔرـ̡ یاو چھُہ یُپ ہى۪تھ یواں اورے
مگرتۯیش ہى۪تھ نہٕ
تۯیشہٕ ۂتس چھےٚ کٲر پى۪وان نۆمراوٕنـ̡

٭٭٭

واو تگی نا مۅچھہِ وى۪پراوُن !
نار تگی نا کۅچھہِ للہٕ ناوُن !
تیلہِ کس آیکھ برى۪م دِنہِ؟
لٲلـ̡ !

٭٭٭

سٲنـ̡ مشید چھےٚ مٲرـ̡ مٔنز
واے !
اگر اتھ امام تہِ آسہِ ہے

٭٭٭

أسـ̡ چھِہ صفا پسند
گٔژھـ̡ نا آسٕنـ̡
صفٲیی چھےٚ ژمہِ ۂنز شوب

***************************

وى۪تھ

ییلہ بٲلـ̡ وسان ٲس یاون مٔژ
تنہِ اوسُس واوجہِ واو کراں گۆن یارِ شہُل
وتہِ ٲس کنى۪ن، کھۯاشن، کھمبرى۪ن
لۆت چھہـ̡ دِتھ شفہُک اتھہٕ ڈالاں
وُٹھ پھیشان وُچھِہ ہے کٲنسہِ تہٕ وُٹھ مٔدراوِہے تس
بٹھہِ بٹھہِ ٲس لوٝبان نیٲوـ̡ پُھلے
لنجہ لنجہ پى۪ٹھ ٲسـ̡ کۆستورـ̡ گى۪واں
پونپوٝرـ̡ وُڈاں
ہی ٲس وِساں مێـ̡ ٹوٹھیمٕژ چھےٚ یہ بختہ شِہج
مستانہٕ قداور رٲیل اوس
ٲمـ̡ سٕے پاردـ̡ گترینہِ سٍتى۪ن
پنہ نى۪ن ژھاین ور وُٹھـ̡ نہِ دِواں
مٔژ ٲس چھِوَر مس چى۪تھ آساں
مۆت شوخ بےٚ سۅکھ یاوُن چھاواں
سہُ تہِ اوس دۅہا

وى۪تھ وٲژ یہ وۅنـ̡ سٔتریرس منز
امِہ پۯوو سنى۪ر، امِہ پۯوو کھجر
اتھ روٝد نہٕ وۅنـ̡ مدٕ مۅت لوچر
اتھ رٲو سۅ تێہہ تہٕ سۅ پارٕدـ̡ خۅے
نہٕ چھُہ پان کھیَن کھۯاشن چھاوُن
نہ چھُہ رٲیِل ژھاین ور دیاوُن
وُٹھ پھیشان ہَے ییِہ تۯیشہ ہۆتا
وُٹھ أدراوى۪س
ژرِ آلہِ منزے پێیہِ گاسہٕ کۯٹا
للہٕ واں پکناوى۪س شانن پى۪ٹھ

٭٭٭

تھر بُتھ !

نوَم نۆوُے سوٝٹھ لٲگتھ
پھِرـ̡ پھِرـ̡ اوس
          پانس بُتھ وُچھان
یوسفنٕس ٲنہٕ خانس منز نہٕ
          پلاسٹک سرجن سندِس
                             کوچس منز
وۅتلان تہٕ بۅڈان
وۅتلان تہٕ بۅڈان
          اژا !
                   اژا !!
                             اژا !!!

٭٭٭

ألف

ألِفا !
سێدِ قدٕ قامتہٕ والیا !
ژٕے چُھکھ مێانى۪ن چشمن گاش
ب پ ت ث، لرِ پیمٕتـ̡
کێنہہ پھیرى۪ن پى۪ٹھ، کینہ پھیرى۪ن تل
جیمس چیمس عٲنس غٲنس کٲوـ̡ گمٕتـ̡
قافس نوٝنس یڈ درامٕژ
دالس ذالس کۆب ژامُت
کیفس گافس لامس میٖمس
کٲنسہِ نہٕ بختس چون سێزر
یا چُھکھ ژٕ، زِ یتھ حرفہٕ صفس پى۪ٹھ
کُن چُھکھ سێدِقدٕ قامتہٕ وول
یا چُھس بہٕ، زِ یتھ اچھرٕ دُپھس منز
ژٲرِتھ رۆ ٹمکھ ژٕے تہٕ
بێیس مازیوم نہٕ دل
ژےٚ تہِ نہٕ دۆیُم
تہٕ مےٚ ہیو تہِ نہٕ بیاکھ

ارمانا بۯادى۪وم زِ چٲنس
کُنِرس انہٕ ہا لولٕچ ڈٲلـ̡
چإنِس نوٝرانس لى۪کھٕ ہا اکھ حمدٕ سپار
قلم تُجوم تہٕ کتھہِ گو رۆٹ
ب پ ت یہِ روس
کتھہٕ کنـ̡ ہێکہٕ دِتھ لفظن واٹھ؟

چٲنِس ژٔھرـ̡ سٕے الـ̡ فہٕ قدس
لرِلرِ پھِرواں لٔب قلمن زى۪و
ب پ ت کیا
نازلہٕ الـ̡ فا !
یہ تہِ ما چُھکھ ژٕے تۯٲوِتھ ڈاپھ
عٲنس غٲنس منز ما چُھکھ ژٕے
اۆکہٕ ڈۆنگ روزتھ
قافس نوٝنس منز ما چُھکھ ژٕے کۅچھ وہرٲوِتھ
کیفس گافس منز ما چُھکھ ژٕے
پانے پانس ڈکھـ̡ تھاواں
حرفس حرفس منز ما چُھکھ ژٕے وِہـ̡ بدلاواں
الـ̡ فس منز تہِ چھُہ لاما فےیا
لامس تہِ چُھ الـ̡ فا منز باگ
کُنہِ نندٕ بانیا !
چانى۪ن انوارن لێکھہٕ ہا اکھ حمدٕ سپار
کتھ حرفس ہێکہٕ بى۪ن وى۪ترٲوِتھ؟
کمہِ نشہِ ہێکہٕ دامانہٕ بچٲوتھ؟

٭٭٭

ترُک؟

أزیُک اخبارتۯُکنہِ آو تہٕ خبر وُچھتھ گو س دُژیۆت
ترُکہٕ نے تہٕ نشس کیا کرٕ !
ترُکَےتہٕ ناو کێتھہٕ نیرى۪م !

خبر ٲس :
”تیار اخبارچھُہ راتو رات تۯُکان
یێمہِ کنـ̡ یہ واریہن پرن والى۪ن تام واتاں چُھنہٕ
سى۪ٹھا تۯُک چھُہ تہٕ کانہہ ژھل چُھسنہٕ پوران

عامن تہ خاصن ہنزِ زى۪وِ پى۪ٹھ آس
پنُن ناو نژان بوزنہ
پۯاژٕ آیس وہراونہ
گونژھ گٔیَس دندن تل ...
اخبار دۯاو

٭٭٭

زاڈیُک پوش

زاڈِکہِ پوشہ !
تٕرنِس آبہ ڈلس منز وُٹھ کملٲوِتھ روز
پیچانس کُن وُچھـ̡ وُچھـ̡ یِنہٕ گُمہٕ سٔرـ̡ گژھہ ہم
پیچانس چھُہ رزن تھپہٕ دی دی ٹینٹھل ٹاور وُچھنُک شوق
پیچانس چھُہ أچھی أچھ پان

زاڈِکہِ پوشہ !
چانہِ وجودٕچہِ خۅشبۅیہِ ہند مۅل
زانہِ فقط صبحک شۆد واو

کچھِہ کۅتھہِ منز یاوُن رژھرووُتھ
دکہٕ ملرن ہندـ̡ ہلہٕ وى۪ترٲوِتھ
پاگل واوُک لتہٕ کرم ژولُتھ
ادٕ ہے زانہہ کُنہِ ہِلہ وتھرٕچ شێہلتھ ؤنـ̡ رٲوٕتھ
تمہِ کێے آمہِ پنٕچ کل تھٲوِتھ دگ لۆژرٲوٕتھ
زاڈِکہِ پوشہ کارِ وۅگُن چُھکھ
راونہٕ چانے أکـ̡ سٕے ہِلہٕ وتھرس تہِ وچھس سنہِ تاپہ تیۆنگُل
چانہِ ورٲیے أکـ̡ سٕے گۯایہِ تہِ باسہِ پنُن ژھۆر سینہِ تُرُن
تیلہِ دپھ فٲنی کاے کھتٲوٕتھ، مُل مُژ پۯووُتھ
ڈلہٕ کس آبِ حیاتس چونُے کارِ تھزر شێہلاوِ جگر
ٹینٹھل ٹاور کرـ̡ تن کۅچھہِ کۅچھہِ
پنہٕ نے متہِ پیچانچہِ أچھ

٭٭٭

کۆل کۆستوٝر

نہ چھُہ تاپھ پى۪وان
نہ چھُہ واو ڈلان
کتھ کیٖرس منز کۆستوٝرِس کۆرہم اول عطا

کِژھہٕ کۅہ ہِشہ قٲتل لبہٕ أندـ̡ أندـ̡
تاپس چھےٚ نِوان زٕژٕ ہیر کڈِتھ
واوس چھےٚ ژھنان پر پُژنٲوِتھ
یێلہِ دوٝرِ چھُہ کانہہ افتابہٕ وُہاں
چہہٕ أندرٕ چھُہ مۆٹ انہِ گۆٹ ۂندران
یِمہٕ زٲج چھےٚ ژاپان صبحُک پے

کھسہِ گوشن نغمہٕ تہٕ وۅگہٕ ژاپى۪س
پھسہِ بولـ̡ وچھس منز، وٹھ سپدى۪س

٭٭٭

پۆت دِگر

مانو بۯى۪مہٕ رێنہِ زوٝنہِ ہندس شِہلس انہارس
سورِ نہٕ جود
سٔدرٕے زنہٕ آو کُنہِ دۅہہٕ وٲنسہ
سورے یس مٔژ یاون تێہہ
تێلہِ کتھ گژھہِ تتھ گاہ ونہِ کڈـ̡ تھٕے ؤتھـ̡ ؤتھـ̡ پھۆر
سٔدرس سپدن گۯایہِ بےٚ سۅر
کاڈ کڈتھ وُلمنہِ کھسنٕچ روزى۪س نہٕ سکتھ
زگتس ہێیہ سۆت سوو سکوٝنُک سوٝر پھۅلُن
سٔدرُک سٔدرٕے شِٹھہِ تُلہٕ کتریُک ٲنہٕ پۆٹا ہیو
زوٝن مدے گنڈِ ٲنہٕ پٔٹِس
پۯون ٲمیُک وُپھٕ وُن پھۆرکورى۪س
وچھہِ کانى۪ن منز یادُک وٹھ
ٲنہٕ پٔٹس پى۪ٹھ آسہِ فقط
اکھ تھلہِ تھلہِ وُچھنُک باس
دپکھ یہ چھُہ نظرِ نى۪سنگاہ لوگمُت ٹھل
دے رٔچھـ̡ نم تس
سۅے یُتھ عالم ڈیشہ
تٔمِس پێیہ سٲنـ̡ ٲدِچ سمکھن وِز یاد

٭٭٭

ونہٕ واندُر

تس اوس بالس کھسان کھسان
ٹھینچہِ وسان عٲرق

پان اوسُس لۅتان

آگر پٔچھنہِ آو عار
تہٕ کھولُن پنہٕ نى۪ن پٲزٕ پکھن پى۪ٹھ
تنہٕ ووت تس ونہٕ واندرس
عٲرق بند
نٲرن دگ

٭٭٭

شہِج بونـ̡

تۯیشہ ۂتِس چُھم وِزِ وِزِ آیُت زمزم ناگ
ژلہٕ وٕنہِ ہردٕنہِ تاپُک دۅہ
مۆت سروٕ شِہُل
یارِ، تہٕ ماگس وارِ اندر نژِ سونتہٕ ہوا
ٹوٹھہِ، تہٕ لوٝسـ̡ مٕتِس کرِ ہنہِ ہنہِ مۅنہِ وُدـ̡ تن
کتھِہ کتھہِ رتھہِ کھاراں کٲژا وتہٕ کھاول رٲژ
وُہہٕ وٕنہِ وچھہٕ کى۪ن سرپھن ساواں مٲنتھٕر دِتھ
لوکى۪ن لاوى۪ن پمپوش کِژ رحمٔژ رود
دپہ سَے موج، کٔلِس یِیہِ زى۪و تہٕ مٔندس یِیہِ کۆٹھ
دپہ سَے اوش، متى۪ن خابن دِیہ یاوُن زوٝ

رحمٔژ روٝدُک شکوٕ کراں چھم زى۪و روشاں، پۆز
سٔرـ̡ پى۪ٹھـ̡ گٔژھـ̡ تن زمزم تتھ تہِ ونو سٔہلاب
مشکہٕ ہوَس، گُل کترٲوِتھ پٲراواں ہنگ
بولہِ عشق ، ٹِھپـ̡ کانى۪ن منز پُھٹراواں جل
پونپٕرـ̡ یُس رنزٕنوو، تٔمی ہیۆت لونچہِ گنڈُن
ماجہِ اغٲفل بانگہِ لٔٹس دِژنم ہٕکہٕ تھپھ
متـ̡ یارن ژُھن ٹِکہٕ واوٕجہِ پُھٹرٲوِتھ دن
شُرـ̡ شوقس یێلہ یێلہ گانگل کٔر آدن بٲجـ̡
اتھہٕ وێسرِتھ پى۪و زمزمـ̡ آبُک پێالہٕ پتھر
وێہہٕ کھاول ہِش ووٝنگاں وٲنجہِ کھاول راتھ
موج پننٕـ̡ وۅرٕ موج بٔنتِھ ونہٕ وٲسـ̡ کراں
اوش دپاں تُل ٹونگ سۅ مٔژ شیرین مۅیے

٭٭٭

ملاقات

از ازلہٕ وتھى۪ن دۆن دارِ وۅبى۪ن
سمکھى۪و کُن ژلہٕ وُن تاپہ ٹیوکا
کُٹھہِ اندریُم گۆٹ گو وارے مۆٹ
بییہ اۆن گو شاہ یوسوفُن چاہ

٭٭٭

مندِنى۪ن ہارنـ̡
کۯاے تتیایہِ
ژھاے ژھۅٹیایہِ
پانہٕ پرَن پێیہ
دیوارن
کس منگـ̡ زِ شِہُل؟

‎‎٭٭٭

کۆنگی

نبہٕ چن تارن ؤنـ̡ دِنہٕ واجِنہِ أچھـ̡ یُس ڈیوٹھ
جلوٕ دِواں افتابس، زوٝنہِ، ستارن منز
درویشن یُس دِلہٕ کِس ظُلماتس منز سۆر
گۅنماتن یُس پۯکرٔژ ہنزِ شوخی منز وُچھ
گاش یێمیُک شولاں شبنٔمـ̡ دُردانن منز
پھٔلـ̡ لس یێمہِ کِس پوشن ہند وردن چھُہ ظہور
کتھہٕ رٹہِ یێمہِ کہِ چھُہ صحراون لۆبمُت آکار
اتھہٕ رٹہِ یێمہِ کہِ چھُہ وۅلسنہٕ آمُت پوشہِ چمن
چھُہ تہٕ پرتو تمہِ حُسنُک پۯتھ مثقالس پى۪ٹھ
کۅنگی چانى۪ن چشمن منز چھُہ کمالس پى۪ٹھ

اردو نظمہِ ہند ترجمہ۔ اصل: سلیمیٰ (اقبالؒ)

٭٭٭

سۯو

کُلـ̡ ککرِ ہنا اکھ
ٹھکہٕ ٹھکہٕ ٹھس
کُلـ̡ ددرِ کۆرُن
پُژپارٕ وچھس
بُچھہٕ وُن تچھہِ تچھہِ کوسُن تس
أچھـ̡ کھانکھر
وُچھہِ وٕنـ̡
سۯو کرـ̡ نس
یِم کُس پُروى۪س؟

٭٭٭

پنہٕ پونپر
سنـ̡ پوشو
منزـ̡

ژۆل

***

پنن گام اوسم تہٕ دِتـ̡ مس مےٚ گتھ
گہے کوچہ پھیُر گوم روٝٹھٕم نہ وتھ
تنَے دٲیرُم کن چھُہ أتھـ̡ آلوُن
منَے زایہ سرمایہ سِرسٲو کتھ
خبر کیا دِوَے ٲس، وۅپر گامہٕ ٲس
پۯژھُم اتھ دۆپن غٲر وتھ چھَے غلط
مےٚ دۆپمس پننـ̡ وتھ چھما مٲنڈمٕژ
دۆپن پۆز سۅ چھَے نا منٕچ مازرتھ
مےٚ دۆپمس کھیلِس منز وسا، راوٕ ما
دۆپن بُتھ مہ بدلاو، پانے لبتھ
بہٕ آس پاسہٕ ہى۪تھ پیشکش تھوومس
دۆپن پاسہٕ ٲسِتھ، گرٕتھ چُھے شرط
مےٚ دۆپمس یہِ وتھ کٔڈ، تہٕ وۅنـ̡ کوت نِہم
دۆپن تانـ̡ شیرتھ، تہٕ پتہٕ بٲگرتھ
مےٚ دۆپمس، مگر گۯاکھ کتہِ ژھانڈہکھ
دۆپن ہردٕ لونتھ تہٕ سونتس ووتھ
مےٚ دۆپمس بہارس چھہِ بلبل پننـ̡
دۆپن ہردٕ رٲچھا، متا سن تہٕ اتھ
اۆتن واتنٲوِتھ بہٕ کۆرنس غۅطن
نہ حٲضر حواسٕے، نہ حرفن ہـێکتھ
دۆپُم عازمؔس وۅتھ ؤں گو دیُن قدم
اشارَے چھُہ ٲہی ہشارس چھےٚ ستھ

٭٭٭

وچھس تچھان چھُہ یہ موسم، أچھن عذاب چمن
مگر یہ کۅل چھےٚ قیامت، یہ رٹہِ نہٕ کٹھـ̡ شِہ کفن
پکھن اندر چھےٚ وُڈن کل گۯى۪کاں گرفتارس
ٹھپس اندر چھےٚ جلس تن، وچھس اندر چُھس ون
یہنز مےٚ وتھ چھنہٕ سٔرمٕژ، سپار چھنہٕ پرٔمژ
نظر چھےٚ سٲلہٕ مژر، گژھہِ تہٕ گژھہِ تمن گامن
یہ ژھل چھُہ جلوہ بدل کل کڈاں وفادارن
یہِ زٲلـ̡ پردہ محل خانہ کێن ستن درـ̡ چن
یوُک کِمام تہ رینچل ورق تہ کاغذ کێمـ̡
أزیک سفر چھُہ، أزیک آفتاب شوبہِ وتن
نہ تُلہِ دلیل نظٲمی، نہ پھِرِ سۅخن گٲمی
تۆتاں چھِہ بال بےٚ مُروت یۆتاں نہ ووٝنٹھ کھمن
پرن پێوان چھنہٕ بلبل ترانہ زیرُ بمس
قمرـ̡ زى۪ون نہ یوتامتھ نہ پانہ کٔنڈ پھٹرن
توے چھےٚ تس تہِ پننـ̡ طوطہ زى۪و تھێکاں نابد
مظفّرس چھہ تگاں، عازمؔس چھُہ تھاواں کن

٭٭٭

تلا بہارٕ ژٕ کر زارٕپارٕ گگراین
ژرى۪ن چھُہ پوشہِ تھرى۪ن پى۪ٹھ گى۪وُن گرى۪ن ڈاین
سروٝد سونچہ وُتارُک وۅکان چھُہ کاڈى۪ن منز
پنن نَگارٕ چھُہ پانس ددارٕ دُبراین
پننـ̡ وُجار کھۅپٕر ژٲنگـ̡ تار ہى۪تھ رٲوٕس
مشٲلـ̡ دۯاو گى۪وان گاش ہاوِ ہمساین
پھژال ہٲر پننـ̡ پۯٲنـ̡ سۅرمہٕ دٲنـ̡ دٕنِن
أچھن وُچھان پشیمان أچھو چھےٚ پژھـ̡ باین
بہار چھاوِ گٔرا گانٹہٕ بێٲر ہى۪تھ عازمؔ
دُتارٕ ہییہِ سُہ گٔنڈتھ سونتہٕ واوٕچن گراین

٭٭٭

رفیق آسہِ رٔٹتھ اتھ شفیق اتھن منز پن
چھےٚ گانٹہٕ بیارِ مگر شان٘ش کھٲجمٕژ ہوٕہن
چھُہ نالہٕ پانہٕ تہِ یرٕوُن بٹھى۪و تہٕ بالو منزـ̡
ژلان ژلاں چھُہ پۯژھاں توتہِ واوٕ ہالہِ وطن
ہوا وِسان چُھنہٕ میٲنس وچھس ؤسِتھ نحقے
شہن چھُہ رٲچھ کراں شێچھ نِواں چھُہ طرفاتن
ہوا تہٕ یارِ ونُک سۆم شِہُل تہٕ گۆب گٲں گٲں
جتن کریایہِ سى۪ٹھا پوز عطا سپد نہٕ سُہ فن
سُہ ساز کتہِ انہِ عازمؔ زِ آلوى۪س شش رنگ
سُہ مٲنز کتہِ انہِ یۅس تس نشانہٕ شوبہِ اتھن

٭٭٭

نب ٲنہٕ ٲنہٕ تہٕ بتراتھ نیوٝل نیوٝل اسُن
سرس چھُہ سال کران از سمندرُک یاوُن
خبر تہٕ آسہِ أمِس واو دونژھرِتھ تۯاوى۪س
مگر تُلٕر چھےٚ تُلٕر ژھۆر ہلم تگى۪س نہٕ وٹن
دِگر چھُہ زاگہِ مگر دامہٕ چێیہِ ہے گُلِ افتاب
ہُہ نورٕ نارٕ سمندر، اما یہِ واتێا کُن
پۯژھٕے چھےٚ چٲنـ̡ برٕژ دۅژھ تہٕ مێون رینچہِ ہلم
ژٕ دیُن یژھکھ تہٕ مبارکھ، مےٚ کتھ اندر چھُہ رٹن
یہِ لولہٕ مصرٕ وُچھاں دولہٕ چُھم کتاب پران
سُہ یتھ قلم چُھنہٕ یاپاں، سُہ گوب سۅخن چھُہ سرن
مقام اگر نہٕ ونکھ، توتہِ ونتہٕ وق کوت ووت
شبس تہِ چھنہٕ سۅ شباہتھ، دۅہن تہِ دامن دُن
چکر چلى۪وو قہر موسمن کٔرٕن گانگل
گلاں نہٕ پرون ششُر کُنہِ تہٕ نۆو ہى۪واں والن
کپٲرـ̡ تاں چھُہ کنن عازمؔن کلام گژھان
وُچھتھ اگر ژٕ سُہ پۯزناوہن یپٲرـ̡ انن

٭٭٭

ہۅ اوبرٕ لِش چھےٚ بہارٕچ گُڈنـ̡ گٔرِتھ تہٕ ژٔرِتھ
نظر نژاں چھےٚ یہِ مٔشرٲومٕژ کتاب پٔرِتھ
جلس منگاں چھُہ اکھ اکھ تان کان فضہس منز
شکٲرـ̡ کونہٕ چھُہ مازاں یہِ گوس تیٖر تٔرِتھ
ہرُد رچھاں چھُہ پننٕـ̡ سانتنتھ بہارس کِژ
گرٕد سنبالہِ امانتھ یہِ لنجہِ پیمُت چھُہ ۂرِتھ
زٔری تِہج چھےٚ وٹاں ہردٕکس کھلس داتھُر
بدن چھُہ بونہِ وُہاں سرسبز عذاب زٔرِتھ
خبر دُبارٕ دِواں چھا یپور ترنٕچ وٲرـ̡
نتہٕ ٲس نظرِ ہنا دِنـ̡ وُڈٕر اپور تٔرِتھ
دِکھے تہٕ دیٖزِ سمندر وچھس ژۅدٲہم زوٝن
یِکھے یپٲرـ̡ ، حباب أنـ̡ زِ آفتاب بٔرِتھ
ژیُہا چھُہ کٲف اگر بوس ژھانژٕونہٕ دِیہِ ہے
وۅہَو چھےٚ وٲنس دہانس اگر مۅہر چھےٚ کٔرِتھ
ٹھِلن گِنداں چھُہ قرارس بہارٕ موت عازمؔ
کۅلن شراب رلٲوِتھ پلن گۅلاب گٔرِتھ

٭٭٭

سُہ خانہ مول بہارُک، سُہ نارٕ تِکھ ہیو ٹوٝر
شِہُن شُبی نہٕ گۅلابس أندرـ̡ أندرـ̡ کٔمـ̡ کور
مٔتِس چھہِ پیالہ بران پوٝرـ̡ کى۪وو پچھمـ̡ کم کم
یوتاں نہ لل یِیہِ، نُند کرِ نہٕ دام دیُن منظور
کمن کنن پرِ مقبول شاہ دِلٕچ گلریز
کمن دِلن دِیہِ کتھ دُب دُبایہِ کن مہجور
مندورِ وٲج تٔمس دشمنو تہِ کانہہ کانہہ سیٖر
سُہ اوسہٕ پانہٕ تہِ کێنہہ کم بلاے گٔژھـ̡ نس دوٝر
نِمیُز کھى۪تھٕے چُھ کمیُل بۯِمجہِ ژھایہِ دُبہٕ پیومُت
یپٲرـ̡ نى۪ند تہِ گۅبیمٕژ ہپٲرـ̡ نێندرِ سروٝر
مےٚ دوپ از آسہِ مےٚ آمُت غزل ہى۪تھٕے عازمؔ
وُچھاں تہٕ سادٕ مٔتِس نٲلـ̡ سُے بى۪گُر سنطور

٭٭٭

ہِنجٲرـ̡ واوٕ رِنگا اکھ تہٕ کھٔژ دِدٕر اسمٲنـ̡
یہِ مٔژ چھےٚ وٲنِجہِ زامٕژ یہ نژِ وُپھان وُپھٲنـ̡
ستارٕ سٲوـ̡ سُلی کالہٕ اوبرٕ ژھایہِ تمام
ہُپٲرـ̡ یپٲرـ̡ تہٕ کانہہ کانہہ زُتِنـ̡ چھےٚ زوتاں سٲنـ̡
خبر زبر چھےٚ یہِ سانى۪ن تمام اخبارن
مگر اگر نہٕ بدل کانہہ تبر نژاں چھےٚ زبٲنـ̡
پھۆرُکھ پنُن تِہ نہ واتُن دٕنِکھ سۅ مٲلـ̡ مندور
ؤں سامہٕن سۅ پُرن، کٔن دِنس تہِ چھنہٕ بہرٲنـ̡
سۅ کھرى۪کھ ہسٲ کھێیہِ کھارِکـ̡ زِ نظرِ ڈٲجِن ڈولـ̡
نتہٕ ٲسـ̡ ڈول وزاں وِگنہِ آسہٕ وُنہِ وَنہٕ وٲنـ̡
خدا رٔچھِن سٲ ونو کیا سُہ دۅہ تہِ ما چھُہ پکان
چلی نہ بین تہٕ مٲنتھٕر مَلی نہٕ سوٝر گۅسٲنـ̡
ؤں کُس کمال چھُہ عازمؔ غزل غزل چھُہ لى۪کھاں
ہوا ہنا یێلہِ وولاں چھُہ پھۯستہٕ پھمب چھُہ نژٲنـ̡

٭٭٭

رِندانہٕ رازٕ چھُہ کم کم گِندن تماشہٕ گران
بہار بوٝنـ̡ تہٕ بلبل، تبر تہٕ تیٖر کمان
بےٚ پژھ فضا چھُہ کراں کٲزٕ پٲزٕ پروازس
یہِ لب اگر نہٕ، ہُہ نب شہپرس چھُہ تراش ہى۪وان
وچھس اندر چھُہ گژھان بولہِ وٹھ بہارٕ مٔتِس
وُتارٕ وٲنسہِ چھُہ وى۪تراں، شِہِتھ تہِ ما چھُہ ہى۪کان
سران کیا چھُہ سمندر پنُن سنى۪ر زانى۪س
کوَس تہِ روزِ تہٕ بس اوبرٕ ژھاے وُچھِہ اسمان
یہ کاروان ؤں گوژھ خٲرٕ سان گرٕ واتُن
سڑک چھےٚ بالہٕ تُھنگى۪و پیٹھـ̡ رزَو چھُہ شین وسان
یہ برى۪ڈـ̡ مُشِکھ چھُہ دِواں برى۪ڈـ̡ کٔڈِتھ بہارُک پے
دٕیان دٕیان تہِ چھُہ عازمؔ اسُن ؤوِتھ نیران

٭٭٭

کفن ؤلِتھ چھُہ رٕڈیومُت الوند سٔرـ̡ پێٹھـ̡ سر
سۅ رُدٕ رُدَے چھےٚ دِوان دۯاگہٕ دى۪و چُھ گونژھن ور
ژھٹھا متیایہِ پُٹِن بۯى۪ن تہٕ موٝلہٕ پۯٲٹِن پھۯس
یہِ زوٝنہٕ ڈب تہِ اویزان ہُہ سِنگلہ پش تہِ پتھر
بۯہاں چھےٚ وُزملہٕ ہوٝ ہوٝ أچھن چھےٚ گاش توان
سُہ ترٹہٕ بزُن چھُہ زِ ژٕرنى۪ن اژان چھہِ جاناور
طُفاں تتێاو زِ توبٕکـ̡ اچھر ژھٕنِن چھٔکرِتھ
دعا نى۪راش الٲندِس نبس منگاں چھُہ اثر
زمیٖنہِ زورٕ چھےٚ ژۆپ ہى۪تھ ہۅ بونـ̡ باگہِ بٔرٕژ
دکا دکا تہِ یوان چُھس پُھٹاں تہِ چھس ہر ہر
یہِ واو وۅگتہٕ ونس منز وى۪داکھ وونگاں ہونـ̡
یہ واو کوچہِ گلى۪ن منز گرَن چھُہ ٹھاسان بر
زمیٖں شناس چھُہ تھٔج نارِ پى۪ٹھ بہِتھ عازمؔ
غزل گى۪واں چھُہ تہٕ گٔنزران چھُہ پانہِ ترٕوٕنـ̡ تر

٭٭٭

نہ چھُہ بُتھہِ بۆٹھ نہ چھُہ گراین عار
ہٲنزو وِجہِ واوس منگ تار
ژیُہہ اوس، سُے اوس ازلہٕ ابد
اتھہٕ گۅو، وتھ گیہِ ناہموار
دوٕہُک دیُت تہِ چھُہ نوٝنٕے نوٝن
شفہٕ ہُک شکھ تہِ چھُہ بٔلـ̡ بلغار
یارن گٔیہِ انصافس ہٲل
ال پھٹہِ آبس ڈل رٹہِ مار
از چھہِ غذا درینٹھاکن پوش
از چھُہ بہارٕے باغس بار
عرشس نکھہٕ ووت دۆد فٔرـ̡ یاد
فرشس پُٹھہٕ گو استغفار
رتھ چھُہ رگن منز پارٕدـ̡ وى۪تھ
کتھ چھےٚ قیامتھ، ژھۅپہٕ شہہٕ مار
سۅندری چھاو یہِ دمہٕ کوٹھٕر
ٲندری پال سُہ وِرِ شیہجار
بالو پێٹھـ̡ تھٔچ ژھالر کۅل
مالس پۯاراں دعوادار
عازمؔ پالان ٲنس منز
نالان پکھہٕ پھُٹ جاناوار

٭٭٭

سُہ کتہِ وُڈو کرِ پونپُر پکھَو الاو پُھکان
یہِ ماگہٕ واو چھُہ واپٹھ کراں تہٕ مانہِ وٹاں
سُہ کتہِ سُہ بلبلِ مس یَس زبور ٲس دردس
بدل مۅغل چھُہ وۅگس پى۪ٹھ عجب کتاب پران
کرہُن اوبُر تہٕ کۅہَو پێٹھـ̡ مٔہِس اگادِ زلُر
سبز دۯمُن تہٕ پتھٕرـ̡ ؤنـ̡ چھُہ والہٕ بٔرـ̡ ییران
ڈلُک حباب تہِ ہانژٕھے، کھى۪لُک ہلم تہِ ژھورُے
ڈُنگل تہِ کم چھہِ مۅژیمٕتـ̡ ، ڈُنگن تہِ کم چھہِ کھسان
زمینہِ کاڈ کوڈا کِنہٕ قدَو تھدیاے لُکھٕے
وُچھاں وُچھاں چھُہ مگر بۆن بۆنُے وساں اسمان
نہٕ پۯاوِ لچکہٕ نہٕ پورى۪س غلاف سیتارس
تُرَے گژھى۪س تہٕ نى۪سنگاہ ہۅچھن کۅلن چھُہ پھٹان
غزل ہیواں چھُہ خبر کس زہر زدس عازمؔ
نتےَ اموب سُہ آوُر چھُہ وُٹھ سُوِتھ آسان

٭٭٭

ٲنہٕ منزـ̡ ہووٕہس بێتاب کۆرُکھ
وعدٕ بُزـ̡ سادٕ دل شباب کۆرُکھ
گٔیہِ ہا، گٔیہِ ہا تہٕ آیہِ گۯایہِ ورٲے
آرٕ پُروِکھ تہٕ رٲسـ̡ آب کۆرُکھ
ویرِ وارس دِتُکھ جہارس دۯوت
پوشہِ نوٝلس مٔتِس عذاب کۆرُکھ
وٲنسہِ پوٝزٕکھ سۅ بۯاندٕ کٔنـ̡ تہٕ پۆتُس
خٲلـ̡ ہلمس زدى۪ن حساب کۆرُکھ
پش وُڈووُکھ پنُن بفضلِ خدا
کار زونُکھ یۆہوے ثواب، کۆرُکھ
ژُھنکھہٕ صبحَے سٔتیُم کدٕل آبس
کۆرکھہٕ از کار، ہاں جناب کۆرُکھ
ۂدـ̡ یہِ تورُکھ تہٕ گرہنہٕ ماتس زوٝن
أچھ ؤٹکھ غٲب آفتاب کۆرُکھ
پام اوسُکھ دِوان پنُن پمپوش
نام دارو سرس سراب کۆرُکھ
تِژھ دپان عازمؔس کٔرٕکھ گانگل
خاب مٔشروہس، خراب کۆرُکھ

٭٭٭

سونتُل وردن سُوٕنَے دۯاکھ
سانى۪ن بونى۪ن نى۪تھٕہ نٔنـ̡ شاخ
ناگن چھنٕہ کُنہِ وُزنہِ کٔمی
وى۪تھہِ کوٕ گو نٔٹـ̡ برنس ٹھاکھ
وق آو مکھ زن دِودارس
داہ گو دۅیہِ خٲر، شاہ گو شۯاکھ
سرٕکھے أندروٹ، کتھ نژِ مور
پرٕکھے، شرُکھ مُژراوی واکھ
لوٕ پھێرِ اکہِ پھۆل ڈى۪کہٕ بوڈ گُل
سى۪کھ ٲس وُمبرن شۯانى۪ن گراکھ
عازمؔ بٔنزرِتھ ترووُتھ پور
کیا ہى۪تھ بازر کیا ہێنہِ دۯاکھ

٭٭٭

سپارا وُمبرِ رٔژھرٲوٕم وچھس منز
پۆتس کاغذ کێمى۪ن اتھِ کھیاوٕ ناوٕم
سۅ کتھ ٲس میٖٹھ، باوتھ کرنہٕ کھوٝژُس
مٔرِتھ ٲسٕم وُٹھن، واون مِٹٲوٕم
سنگر پۯاچیم، کۅہہٕ دامٕنـ̡ انےیَم
یتھُے جۅے وارِ نِشہ وٲژٕم تہٕ رٲوٕم
گنےیَم کل، سمندر زوٝنہِ دورُم
منس یێلہِ گراے وۅتلییم، تہٕ سٲوٕم
مظفّر عازمؔس ژھاین دِتِم وٕنـ̡
کُٹھِس شینہٕ وٕنـ̡ جہاتن دٲر ترٲوٕم

٭٭٭

ژھایہِ رچھومکھ خابس منز
خۅشبۅے ویٔپ نہٕ گۅلابس منز
وُہہٕ وُن وَچھ تہٕ شِہُل آنکار
زوٝن کھژٕم اختابس منز
کێنہ پھول کێنہ نٕکہ ڈلہٕ پمپوش
زٕژِ وۆتھ پھۆر گردابس منز
خط کیا آم جوابٕے گوم
یى۪ژھ دۆبرٲوٕم تابس منز
انگ انگ کھى۪وو ارامُک برى۪م
رُم رُم زول عذابس منز
یُتھ چُھنہٕ وُچھمُت ورزُن واو
کانہہ گاڈا چھنہٕ آبس منز
انہِ أچھ منہِ کامنہِ ڈۆل کھۅر
گرى۪دٕ بچہِ پٲلـ̡ کجابس منز
امنٕچہ گونژھہِ چھےٚ کرتلہِ پین
گۅنہُک رُح چھُہ ثوابس منز
کس اتھہِ دیاوٕ امامس ناد
بٲنگی شۆنگ مى۪حرابس منز
کم کم ٲسـ̡ أمکـ̡ بسکیٖن
ژھایہِ چھےٚ وُنہِ اتھ کعبس منز
خابن نم دِنہِ عازمؔ دۯاو
آب منداں چھُہ دۅلابس منز

٭٭٭

ہى۪نہٕ آم شِہُل گام سیاہ روٝدٕ جرى۪ن منز
ژس ووت دِلس تام سیاہ روٝدٕ جرى۪ن منز
رێہہ ہى۪تھ چھُہ کھساں سِرـ̡ یہِ کڈاں بالہٕ ونن ژھٹھ
دُہ ہى۪تھ چھُہ یواں شام سیاہ روٝدٕ جرى۪ن منز
ژرِ اوس ہُتى۪ن اول ہے افسوس سُہ کمـ̡ زول
پرٕ کٲس چھےٚ دردام سیاہ روٝدٕ جرى۪ن منز
ادٕ یوٝت توگُکھ تیوٝت دِتُکھ اۆبرٕ نبس نار
کیا دیٖزِ تمن پام سیاہ روٝدٕ جرى۪ن منز
رٲہی چھُہ پریشان پننٕـ̡ پۯانـ̡ پُرن پھٔٹ
عازمؔ چُھ وۅپر گام سیاہ روٝدٕ جرى۪ن منز

٭٭٭

راتٕچ ژھۅپہٕ ٲس دیٖپک راگ
گٹہِ ٲس بختس ژٲنگـ̡ پُھلے
ژھٹھ ٲس تھچہِ مژٕ پکھہٕ وایاں
رێہہ ٲس ہنہِ ہنہِ تیزاں طے
بد بُتھہِ اۆبرٕچ دۅکھہٕ لد ژھاے
اٹہٕ بارِ ٲسٕس تاپٕچ شے
خٲبـ̡ أندرـ̡ ڈۆل خابس کھۅر
کعبس تنہٕ بێیہ لٔج نہٕ دِوے
وتہِ ٲس شاہ رگ شۯۅکنیمٕژ
اسہِ کرٔـ̡ رتہٕ سرٔـ̡ پٔدـ̡ نحقے
بترٲژ ہندـ̡ بارٕجـ̡ اولاد
پوشس پوشس تنہِ پُژنے
تتھ بسٔـ̡ تی پھۆر پاگل واو
از چھہ تتى۪ن وٲرانہٕ سرے
پھرِ زن گرِ کھنجہِ وارلـ̡ ژھاے
بلبل اڈٕ کۆل کرِ نہٕ دۅہے
سُرٕ بنہِ برادى۪و زُتِنہِ الاو
یس ٹوٹھى۪و تس ٹوٹھى۪و دے
وتہِ تۯوو پانس پتھ اختاب
تتہِ تور آو اسہِ گاشُک پے
پتھ ون اژٕنس کوٕ کھوژیوکھ
مۅچھِ منز سٕہہٕ أچھـ̡ تھاویمے

٭٭٭

أچھو سومُم وچھس منز ژوٝرِ تھووُم
یہ پھٹـ̡ پھٹـ̡ نیرٕوُن اٹـ̡ اٹـ̡ کڈاں چُھم
ژٔھرِس گاشس گٔرِتھ موٝرتھ وۆنم تس
یِتھس مصرس دۆیُم ژھونڈُم تہٕ ہورُم
اچھر ژٲشِم تہٕ رس وُچھمکھ ژمیومُت
کلى۪ن جاناورن ہند دود ژولُم
سُہ جلوُک نار، دٔز شیہجارٕ ہن ہن
سۅ مشکٕنـ̡ دار شاہ کھالاں چھُہ رُم رُم
سۅ زکھمکھ چھہـ̡ دِنے زولُن ونُک ون
بہٕ خوش بخ نارٕ بالن سینہٕ دورُم
صبح پھۅلہٕ وُن دِگر ڈلہٕ وُن رلٲوِم
ژہى۪ن منز دۅن زمانن تار تورُم
ژےٚ ہردٕچہ زونہِ ہندس پرتوَس تل
ؤہرـ̡ ؤریس بہارُک تاپھ چھووُم
گلالس گوو أچھن تل داغ رسوا
انى۪ن یمبرزلن سُے راز بووُم
مِزازس ٲڈرن چھم آفتابٕچ
لگے، تٕرنى۪ن پلن اندر مہ تۯاوُم
گٔرا بیوٹُھس مظفّر عازمؔس نش
سِرا اوسُم نٹى۪ن پى۪ٹھ کھالہٕ نووُم

٭٭٭

وتہِ مشرف گو کوت پى۪ٹھ دۯایے، ظۅن رود نہٕ کٔمـ̡ موڈن دیُت برى۪م
یادس پێے ورقن کاغذ کێمـ̡ وٲناکھ وتن ؤڈرٲوـ̡ قدم
مجنوٝنس گو کیاہتاں بُل چُک تٔمـ̡ تہرِ پھلى۪ن کُن کھوس پنُن
مژِ لٲلہِ چھُہ نحقے پھۆر پھوران تس پانس برٕ گٲمتـ̡ کوسم
یتھ ہردٕ بُتھس کُن یُتھنہٕ گژھکھ یێتہ چھا کانہہ موسم ڈیرٕ دِوان
وتہِ وٕنـ̡ وٕنـ̡ سمکُھم سونتہٕ ہوا وژھِہ وٲنِجہ بۆرمس پوشہِ ہلم
یِنہٕ وُپھوارس شہپر زالکھ یِنہٕ اظہارس وتہٕ کون کرکھ
ینہٕ پرٔـ̡ یہِ محل کُن وتھ لبہِ دى۪و یِنہٕ پۆت کُٹھ اژِ کانہہ نامحرم
یتھ وى۪تھہِ چھہِ وۅتھاں مدٕ مٲتـ̡ ملر ہُتھ وۅلرس تہِ چھُہ از پھۆر پھوران
شۅدِ شوقہٕ چھےٚ درامٕژ سمکھن کل تعویذٕ چھُہ لیکھاں مێون قلم
وارلـ̡ سٕنز رتہٕ سٔرـ̡ تونتھ وُچھتھ تھاریوو بى۪گٕر آواز گٔیَس
وُچھ میانہِ زمانُک لولہٕ قُمیُر کمہِ سادٕ صداقٔژ کۆر برہم

٭٭٭

رَو یێلہِ ٹوٹھی منہِ منز وۅپداوی پمپوش
رێہہ ییلہ تیزی آلو دێاوی ہوشا ہوش
للہِ نازلہِ اوس نى۪تھہٕ ننہِ تنہِ تہدار پھى۪رن
حبہٕ خوتوٝنہِ چھُہ شٲہی وردن پۆز اُکہٕ توش
چون تہِ اوس رُت مشورہ متہٕ دِتہٕ سفرس تن
بہٕ تہِ کیا کرٕہا، مێون مژر اوس خانہٕ بدوش
کانہہ کانہہ سیر گۅبى۪وو تہٕ کتھہِ گیہِ شعرٕ ونن
زى۪و نینگلاوِتھ وٲنسہِ أکِس دۆبراوى۪وم جوش
مێتہِ ؤژھ سٔدرس گۯاے تہٕ سازس زیٖر لٔجم
زون بۅڈیمٕژ، تھلہِ تھلہِ ٲس وُچھاں خاموش
کارا تۯووُکھ، وُزملہِ ژھایہِ گِتى۪ن کر گۯى۪ند
کۯیہنِس اۆبرس پھٔٹ تہٕ أچھن منز گیہِ روپوش
مۅلوَن والى۪و نظرن پنہٕ نى۪ن شیرِو سنگ
ہلمن لال بٔرِتھ چھِو آمٕتـ̡ لال فروش

٭٭٭

سفر، أنیٖکھ سفر، تھۆک مےٚ آفتاب وتی
بێتاب چشمہٕ تہِ کرتم مراد یاب وتی
حرف تہٕ میٖل کتھن زوٝنہِ گۯہنہٕ ماتہٕ پھى۪رن
قلندرن چھےٚ ؤٹتھ تھٲومٕژ کتاب وتی
سُہ دۅہ تہِ ژول دُؤتـ̡ ٹسنہٕ کٔرـ̡ ژھرى۪ن نظرن
یہ دۅہ تہِ ووت سٔرِم سِوـ̡ گژھاں سراب وتی
بے شوٝنکھـ̡ سٕے چھےٚ پکاں وى۪تھ مگر سمندر کُن
یہ وۆتھ سوال وتی اتھ پُشر جواب وتی
ؤں یُتھ چھُہ تیُتھ چھُہ سُہ عازمؔ پنُن قبول کرُن
قدم تجین حسابَے سُہ گو خراب وتی

٭٭٭

کور یچھن واپھ، بہٕ کوتا باوے
رٲژ لوگ شاپھ، بہٕ کوتا باوے
وُزملن کٲزہٕ کراں کالہٕ اۆبُر
قاف تا قاف، بہٕ کوتا باوے
پھۯیٹـ̡ گمٕژ ہٲر تہٕ بۆچھ راتہٕ مۅغُل
یہ رتٕچ ژاپھ، بہٕ کوتا باوے
دارِ تۯوپراوِ، نیبٕرـ̡ پى۪و شیٖشن
وونگٕنُک چھاپھ، بہٕ کوتا باوے
لۆگ کٔنس سٍتـ̡ متیومُت دٔرـ̡ یاو
گو پشس کۯاپھ، بہٕ کوتا باوے
کاو وولیاے قُمرـ̡ کترٲوِکھ
ٹاو گو یاپھ، بہٕ کوتا باوے
تھٔچ دى۪وس سٍتـ̡ دۅہس گتھ ماراں
پٔرـ̡ یہِ تۯو ڈاپھ، بہٕ کوتا باوے
واتہِ یێلہِ سون شہر تپہِ کانگٕر
شۯاونُک تاپھ، بہٕ کوتا باوے
وُٹھ سُوِتھ آس تہٕ معنے بوزُم
کتھ چھےٚ اسراف، بہٕ کوتا باوے

٭٭٭

گوش تھوہکھ تہٕ اکھ سۅخن ونہٕ ہے
کینہہ تہِ ونہٕ ہے نہ مێون بن ونہٕ ہے
اکھ نظر، أڈ نظر تہِ ٲسٕم کٲف
یونہِ یٔندرس سى۪ٹھا چھُہ پن ونہٕ ہے
مێون نِلہٕ وٹھ ژےٚ کتھ لگی وى۪گلتھ
ناو أتھـ̡ پى۪ٹھ شُبی تہٕ کھَن ونہٕ ہے
مۅختہٕ بٔنزرُم تہٕ پھوتہٕ رٔژھرووُم
پۅختہٕ کارس گٔیَم ونن ونہٕ ہے
چانہِ بازٕرـ̡ سُہ ہى۪تھ بہٕ کیا یِمہٕ ہا
کھۆٹ ضرب اوس مێون فن ونہٕ ہے
صاف، ناصاف، وٲنسہِ وچھ دورُم
چانہِ افتابہٕ چن زٕژن ونہٕ ہے
چانہِ خلوکھ سرایہِ کھل سم سم
یُس چھُہ سُے اکھ حرف مےٚ ون ونہٕ ہے
میانہِ دُب دُب سرایہِ منز برتن
لامکانٕچ پنٕنـ̡ پُرن ونہٕ ہے
پان دٕنہ ہا پنُن اوبر تاپس
جان وۅتھراوٕہے وتن ونہٕ ہے
سٍتـ̡ اۆنمے غزلسرا عازمؔ
مێون ؤنـ̡ ؤنـ̡ پێیی پرن ونہٕ ہے

٭٭٭

وُٹھ پھیشاں کنڈـ̡ وتہِ ہندـ̡ چاکھ
دۆپہم تلہٕ پدـ̡ رتہٕ سرچاو
ہَتھ ہاوس وُرٕ وتھرِ کرِتھ
اکھ آلو دِتھ واپس دراو
افتابو ! وُچھ زوٝنہِ چھُہ داغ
تگہِ یے تیز پہن گاہ تراو
چھٲوِتھ تِمہٕ وتہٕ تۯٲوتھ آکھ
زیٹھى۪ن جامن چِھکہٕ وۅتھراو
پزِ ووننمہٕ کِنہٕ ٹسنہٕ کۆرن
منہِ منز تنہِ ہنز تێہہ وى۪پراو
ژےٚ تہٕ ؤجـ̡ وٲنِس دورُتھ نۆٹ
مےٚ تہٕ وِجہِ واوٕچہِ پکھہِ لێوکھ ناو
آلِچ منگہٕ چھنہٕ آنپَے یوت
آگر پٔچھنی پکھہٕ وہراو
بۅچھہِ پى۪و تھنہٕ تے گچھہِ کُٹھہِ موٝد
یتھ پُیہِ موکل گاٹُل دۯاو
ٹینکہٕ لمس رتہٕ چھپہِ دِتھ پان
قوروٝنس فاتى۪ح پرٕناو
پۆت آلو شہمار الٲندـ̡
دِلہ دۆر وتہٕ گتھ کۆت پى۪ٹھ دۯاو
تتہِ شۯوپ ٲدـ̡ اکھ پوشہٕ دى۪ماغ
ملہٕ کھاہ دۅسہِ پى۪ٹھ تُج مشکاو
عازمؔ مونڈن پڈرن تل
غزلٕکـ̡ رخچن پۯٲوـ̡ پڑاو

٭٭٭

اۆبرٕ گۅبیوو أندریُم ساون
ہی تھرِ رُدٕ جرِ کرِ ارپن
حد، سرحد ژھاراں لوٝسُس
اسمانس نیٖلے یم تن
پیچانس چھم ہێنـ̡ تعلیم
ابساوُن چُھم ٲویُل پن
وتہِ وتہِ وۅتلووُن وُسجار
ظلماتس ژٔھنـ̡ جپٔھـ̡ شمہن
ژٕ تہٕ بہٕ چھہِ تھنہٕ پیمتـ̡ دُکہٕ ویرِ
شہہٕ لٕتھِ کیا وۆن سٔہلابن
کۅلہِ پى۪و مالِنـ̡ پتھ ون یاد
کلہٕ ٹھاساں ٲس آرٕ پلن
بُجرس للہٕ وُن لوو ارمان
بٲتھا تُھرِہا شُرـ̡ باشن
منتھا تھاوکھ، باوکھنا
معنے دلہٕ کى۪ن دۅن حرفن

٭٭٭

واو شوریوو موسمس وۆتھ بوش
تٍرِ ہانێوو آفتابُک جوش
لوٝسـ̡ پونپٕرـ̡ نێبرـ̡ نێبرـ̡ گتھ دِتھ
رێہہ چھےٚ فانوسہٕ مٔنزـ̡ وُڈاواں ہوش
لولہٕ سازس ؤیِم سۅ جٲدـ̡ نظر
نغمہٕ وۅپدیوم رُت رٔسیُل خاموش
گوم برونتٕے تہٕ نظرٕ وُنلے یم
ہوش روٹُھم قریب اوسُم اوش
خام کارس گٔیَم دُبانبرِ کل
نہٕ خطا رہبرن نہ شٔتھرن دوش

٭٭٭

أزیُک عذاب بٔنتِھ گو یوٕچ مثال بٔنتِھ
مےٚ روو پوشہِ پگاہ پوشٕہ وُن سوال بٔنتِھ
سُہ یتھ نہ سونتہٕ ہوا لوگ، سُہ یُس نہٕ بولـ̡ بنیوو
سُہ شاہ پھسیوم وچھس منز تہٕ چُھم وبال بٔنتِھ
مےٚ وتہ وى۪لٲے نصیبس رٕڈیاے وتہٕ ہاوکھ
مےٚ یێلہ ؤ تێلہِ چھہِ سرابٕے پھران سۅکال بٔنتِھ
یێمِس تہِ سۅے چھےٚ یواں ولنہٕ سٔدرٕ ہِل لٲگِتھ
ہُمِس تہِ سۅے چھےٚ اویزان زٲج نال بٔنتِھ
نظر چھےٚ میٲنـ̡ بۯہاں از بےٚ نوٝر گوشہِ دزن
وچھس اندر چھُہ مےٚ افتاب نارٕ بال بٔنتِھ
سکندرس تہِ دِتُکھ پوشٕوُن مقام یۆہوے
قلندرس تہِ یہِ ظلماتھ روٝد حال بٔنتِھ
وُچھاں وُچھٲنـ̡ ڈۆلُم نظرِ خۅش زبان عازمؔ
بسان بسیوم دى۪ماغس اندر خیال بٔنتِھ

٭٭٭

سنگس پٔچ سونتہٕ واوٕچ گۯاے ساتھا
تیتُھے گۆژھ از تہِ بے پرواے ساتھا
وچھس گٔژھ نارٕ بالس وارٕ ژھٹھ یِنـ̡
أچھن گٔژھ پوشہِ ٹوٝرِچ ژھاے ساتھا
دلٕکـ̡ آلو چھِہ لفظن ہندـ̡ گداگر
مےٚ سادس ٲس پانس راے ساتھا
دما رٹھ ژلوٕنِس واوس تہِ دامن
مٔتِس خابس تہِ کر اتھہٕ لاے ساتھا
مہ کر، ژٲنگِس مہ گِند، جامن گنڈی ریہہ
تھواں وٲنسن چھُہ للہٕ وُن نیاے ساتھا
مُرِس چُھس ازلہٕ ابدٕکـ̡ راز چھاواں
ژِہِس بخچاں چھُہ پوشن پاے ساتھا
کراں کیا پۯانہٕ وارن چُھکھ پتُک بۯونٹھ
مظفّر عازمٕؔنـ̡ رٹھ تۯاے ساتھا

٭٭٭

کھسان چھُہ ہٲرـ̡ تہٕ شۯاوٕنـ̡ تہِ وۅنـ̡ تُرُن اختاب
دپاں سُہ پرون شہر از شہن دِواں چھُہ حساب
سۅ وى۪تھ چھےٚ شرمہِ ہندس عٲرقس گِنداں گۯاین
ہۅکھے چھہ ووکھہٕ متیمٕژ أچھن تہِ روٝد نہٕ آب
پُٹٕکھ سۅ پوشہِ پتھٕر پۯانہِ ذٲژ منساوى۪کھ
اگر پھۅلى۪س تہِ وۅپر باسہِ پننہِ وارِ گۅلاب
تۯٹو تہِ ہىیۆک نہٕ تِمن نیندرِ منز وُرُن ڈٲلِتھ
قلایہِ سٍتـ̡ کراں آیہِ گرایہِ چُھکھ سٔہلاب
بہٕ کھوژٕہا نہٕ گٹن پۆز یہِ شب چھُہ بدلٕے شب
چھُہ گٲمـ̡ گام شۆنگِتھ کانہہ اکھا تہٕ وُچھہِ ہے خاب
ژھى۪چو کتھو چھہِ کران اوپ ژوپ معصوٝمن
دۅژھو دۅژھو چھہِ وى۪تھن آپراں دۅبن ہند آب
سکوٝنہٕ سان چھُہ ہنـ̡ قبرِ منز تتیُک عازمؔ
بى۪وار آرٕ پلن پى۪ٹھ لیکھان نارٕ کتاب

٭٭٭

یہ وَچھ تہٕ کوٝرن کیۆم
یتُے چھُہ داش نداش
کلس چھےٚ مشکل رٲچھـ̡
دِلس رٕڈیوو یاداش
کھسُن چھُہ تاپہٕ وُڈٕر
نکھس چھےٚ پننی لاش
پھى۪رن چھُہ صبرُک اوژھ
رٕنیوو تہٕ سِر گو فاش
یۆتاں سُہ وایی تونتھ
پکھن تہٕ کٔڈـ̡ زِہا واش
شُرِس مہٕ پھر ٹینکن
مہ ون مخولہٕ چھےٚ آش
ژٕ میانہِ لوِ اختاب
مےٚ توتہِ چون تلاش
نظر تہٕ صبحٕچ درٕے
رُمس رُمس پھول گاش
دپاں سُہ اوس عازمؔ
بُڈا وُچھُم خۅش باش

٭٭٭

وُزملہ ژھۆٹ وژھِہ وٲنِجہ نار
پێژِ بنہِ کۆرنم بخ بیدار
جنتٕچہِ کۅلہِ وۆل گۯاین منز
چھۅرٕ چھۅرٕ کرٕوُن گاڑٕ انبار
لونچہِ ہوا ڈۆل اللہ ہو
یرٕوٕنہِ ناوِ تہِ دیُتنم تار
تاپہٕ وُڈٕر پھٔج دٔزمٕژ تال
متہِ شۯاونہٕ ؤتھـ̡ رُدٕ فموار
لوٕ پھێرِ دۆد پمپوشُک ژونگ
نارٕ الاون پھیُر شێہجار
شُرـ̡ باشو کۆر چِرـ̡ گیُش تیز
کٔنـ̡ شروپرٲوٕم نٔنـ̡ ملہار
زٕژِ اکہِ دِژنم گاشہِ براتھ
دِگرن رۆٹ مندنیُک انہار
بہٕ تہٕ مێون عازمؔ تکہٕ دِن دِن
دُنـ̡ یا یندرازُن دربار

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
بحمداللہ طرفاتن کٔرِم سٲل
بٔرِم چشمن شہر صحرا سمندر
ؤں گو تاپٕلـ̡ وتو یێلہ پاد لوساں
پى۪واں چُھس بونہِ تل رێشـ̡ وارِ اندر

٭٭٭

مےٚ نش یکھنا، مےٚ نش یکھنا، ونان تس
کھنان روٝدُس منس اندر اہنکار
تہِ ما پێوسس پرن دپہس بہٕ آسے
بہٕ کۆت نیرے، ژےٚ رۆس کُس چُھم خریدار

٭٭٭

خابس منز کٔڈ وۅٹھ گردابن
سٔہلابس گٔیہِ عاشق کۅل
ہٕکہٕ آو واوُل بُکہٕ کۆر آبن
تیُتھ زِ بٹھى۪ن پى۪و ہورُن مۅل

٭٭٭

أچھن تھۆپ دِتھ دِژن نقشس کُنی رِکھ
دۆپُن یێتہ یور گو بیۆن بیۆن بسُن جان
یہ گو مشرق: یہ گو اللہ اللہ
ہُہ گو مغرب: ہُہ گو شیطان شیطان

٭٭٭

یمن عاشق چھہِ تھاواں پیالہ تٲبین
تمن جوین چھُہ تلپاتالہ آگُر
سُہ گو یێلہ تاپھ تاوی تۯیش تیزی
ژٕ یوٝتا چى۪کھ تہ تیوتا چى۪کھ تہ بییہ ہُر

٭٭٭

اگر راتس تارکھ ووَکھ
صبحس لونکھ آفتاب

٭٭٭

تس چھےٚ رٲژ ہنزٕ پٔرـ̡ یہِ
روٝشتھ
تس چھےٚ نێندٕر
ٹٲٹھ

٭٭٭

یوٕ اوسُس پگہس کُن کھسان
از چُھس یوَس کُن وسان
خبر یہ پھیرٕ کر گوم؟

٭٭٭

مےٚ دِژ ڈبہِ کنـ̡ نظر
سۅٲس داں پتجہِ رٲچھ
تنہٕ گے ستہٕ ترہ ؤری
سۅ چھےٚ وُنہِ تٔتـ̡ نٕے

**************************

سُہ تہِ اوس یوسف

سُہ اوس نہٕ یوسف کێنہہ
مگر کیٖریُک قٲد اوسُس ڈى۪کس لیٖکھِتھ
سُہ پیوس وى۪تراوُن

یوسفن ٲس گۯاو کٔرمٕژ
وۅرٕ باین ہند اوسُس ونہٕ نس وار

تمـ̡ ہیوک نہٕ شِہتھ تہِ
پننى۪ن باین ہند کیا ونہِ ہا

وۅرٕ باین ٲس کُنی کتھ
وۅرٕ بوے اوسُکھ کٕنِتھ کھیون

پنٕنى۪ن باین ٲس چھلہٕ چھانگٕر
تِم ٲسـ̡ تمـ̡ سٕندس رتس تہِ زاگان
تہٕ اکھ اکـ̡ سٕندس تہِ
تِم نے تس کیٖرس ژھنہٕ ہن
سُہ گژھہِ ہے توتہِ تِہُند حال وُچھتھ پھۯیٹـ̡
تِمو کھتوو سُہ
مٲلِس اۆنہس نہٕ رتہٕ پٲژھـ̡ پلو تہِ
دۆپُکھ وُچھہِ کى۪تھہٕ
تس ٲسـ̡ سُلی منہِ پھٔلـ̡ چھتیمٕتـ̡

سُہ اوس نہٕ یوسُف کێنہہ
مگر انہار اوسُس تمـ̡ سندُے
اکھتُے اطوار تہِ، تہٕ بختٕہ کہِ ٹانکچـ̡ تھر تہِ
مگر تمیُک نانُک نہٕ
توے آو نہٕ کانہہ ملایک یُس تٔمِس پدى۪ن تل پل تھاوِہے

تِمو کُن سُہ
مگر کیوٝر تھووہس پتَے
سوداگارن تہِ لوگُکھ کھۅر چھلنس
پنُن گُدوم تہِ کۆڈہس نہٕ
سوداگارو کٔر تٔمِس منز بازر بوٝلـ̡
سُہ ہیۆت نہٕ ملـ̡ کٲنسہ
سُہ ہیوت ملـ̡ عامن خامن تہٕ کٔرہس سوٲرـ̡

ٕے خریدار گے نہٕ تتہِ نظرِ
اکھ، سٕترٕ کٲنـ̡ واجینـ̡
(دپاں تس ٲس گرِ رسد مۅکلیمٕژ)
بێیہ، بیٖب زلیخا
(دپاں تمہِ دوپنکھ :
مێون مہرازٕ گو پوزُے
مێون مہرٕکتہِ انہِ؟
تہٕ دار تہِ کُس نیرِ أمِس
أمس چھےٚ بایو مژھہٕ کرِ مژٕ اژھہٕ، تہٕ
سوداگارو آوسٲوـ̡ مٕتـ̡ ڈنگ دِتھ گۅڈ
یہ سورِ تہٕ گژھہِ
مےٚ ما تگى۪س ناد لایُن
میانہِ یوسوفو ولو !
مےٚ چھُہ تمیُک آرتھ موٹھمُت)
مرحبا چُھس، پۆز پۆز وۆنُن

بہٕ گوس غۅطن
کُنہِ دۅہہٕ ما یِن ستھ ہۆکھـ̡ مٕتـ̡ ہێلـ̡
تہٕ دِن ستن زوٝدار ہێلى۪ن دن٘د
تیلہِ کُس دِیہ یُپِس تھۆپ

یا بیٖب زُلیخایہِ ما پورِ ہرُد
سونتہٕ سبزارٕچ مٲنتھر ٲس یوسفہٕ سٕے یوت تگان

اگر سُہ دۅہ سپُد
باین ییہِ ٲنس منز رامہٕ ہون بوزنہٕ
تہٕ ملٲیکس ییہِ پنہٕ نِس شوژرس پى۪ٹھ
مندچھہِ ہند عٲرق

میے یوت آسہِ رویس رنگ
بٕے یوت چُھس چھۅکہٕ لد وٲنجہِ آلو دِوان :
ناد لایے میانہِ یوسوفو ولو !

٭٭٭

موسم

وُپھہِ آو وقتہٕ کہِ پۆت برٕ کنـ̡
اکھ پۯون صبح
دِگہٕ دی دی وٲنِج کوٝران

پۯون صبح
یێلہِ پنجرٕ پٹى۪و مٔنزـ̡ ژایو تاپھ
واوٕ رنگا آیے تہٕ کریونم میوٝٹھ ڈى۪کس
تالو پچہِ پى۪ٹھ ییریو کٔتـ̡ جو پۯژھنے اول
بۅچھہِ أچھ میانہِ تہٕ کتـ̡ جِہ وُڑو ٲسـ̡ ہکچہِ کراں

وقتکُ شُنـ̡ یا مانڈان مانڈاں کۆت ووت دۅہ
تالو پچہِ ہند اول چھُہ جِنہٕ سُند أچھ کھانکھُر ہیو
تاپھ چھُہ کرتان گومُت پھۯیٹـ̡
دٲر اگر مژراوو ژھٹھ کرِ کانى۪ن وَٹھ
آنتہٕ نظر کتھ دۆل وہرٲوِتھ !
کٔتـ̡ جے یور اژن تہٕ کپٲرـ̡ !

٭٭٭

دم

حُبسہٕ دمس منز کتھ رۆٹتھس
واو پھسیومُت ٹھِپـ̡ کانى۪ن منز پُھٹمُت جل
ڈلہٕ کِس سیٖنس منز گو دمہٕ پُھٹـ̡ گۯاین وٹھ
گُمہٕ کۯاین منز سِونہٕ چھُہ آمُت مێون بدن
پننی ژھێٹـ̡ شاہ ہێـ̡ ہێـ̡ وى۪سریاے شوٝشکـ̡ پر
سیٖنس پى۪ٹھ چھُہ اپھروٹھ
بلبلہٕ پکھہِ پى۪ٹھ پل

لنجہِ پى۪ٹھہٕ کِس قُمرِس پى۪ٹھ چھےٚ نا عار یوان
زى۪وِ ٲسِس نا آمٕتـ̡ کٔنڈـ̡
شاہ رگ چھس نا شرۅکنیمٕژ
ۂٹـ̡ گۅگلس پى۪ٹھ چُھس نا یاہو روٹہٕ گومُت
حبسہٕ دمس منز کتھ رۆٹتھس
وقتُک اتہٕ گتھ چھا وتہِ ڈولمُت
موسم کونہٕ چھہِ بدلاں رنگ

تیلہ اوس حُبسہٕ دمس ڈمب آساں رحمٔژ روٝد
نب اوس پنہٕ نِس مۅردٕ شریرس لولٕکہِ اۆبرٕکـ̡ جامہ ولاں
امرى۪تھ چاواں
ددِ متہِ دۯمنٕچ کانٕج کانٕج ٲس نیٖلاں
سِومٕژ ژم ٲس شێہلاں
بلبلہٕ پکھ ٲس پلہٕ تلہٕ مۅکلان
ہۅکھہِ مٕتہِ ہٹہِ اوس نوِ سرٕ یا ہوٝ ہوٝ وۅتلاں
زى۪وِ زن روٝز نہٕ لفظن زوٝ دنہٕ واجِنـ̡ تۅژھ
دِل چھُے عارٕ کتى۪ن رمزن منز لایاں ناد
وقتُک اتہٕ گتھ متہٕ گنڈتن زولانن منز
موسم گے موسم یێلہ تِم بدلاں روزن
میانى۪ن نادن دِتہٕ تٲثیر
                   یُتھ تِم دمہٕ پُھٹـ̡ موسم وٹہٕ ہن
                   اۆبرس کڈہن سفرٕچ کل
                   تھرِ تھرِ کرٕہن جرِ جرِ سران

٭٭٭

سفراتھ

آبہٕ !
ژٕکتھ ولہرٔـ̡ شہ پھسیومُت
سٔدرٕ انان چُھے واو پکھن پى۪ٹھ
ٹھاسان چُھے کۅہہٕ تینتالى۪ن
کھکھرِ نِواں چھے کھنگرو کھۯاشێو منزـ̡ واپس
وولیمٕژ وى۪تھ
اتہٕ گتھ ما چُھے جیرٕ تُلاں

آبہٕ !
دپاں زُوٕ ذٲژ ژٕ چُھکھ بۆڈ اتھہٕ رو ٹ
آسکھ
دۅہہٕ اکہِ بد خاہ ڈى۪کہٕ ژُکرووُتھ
وچھ ہُنـ̡ رووُتھ
زُوٕ ذٲژن پُھنـ̡ پھاٹھ کریوتھ
دِلہٕ دۆ ر آدم پانے دارس ناو بنٲوِتھ
غوصہٕ ہتِس گۯایل سینس نے لتہٕ مونڈ کرِہی
از نَے چانى۪ن گۯاین گۯاو کرٕنـ̡ سۆمب آسہِ ہا آدمـ̡ ذاتھ

وقتا پاوے یاد زِ گُمہٕ سرـ̡ پان گژھی
تاپل سێکلِس منز یێلہ میانى۪و
ٹاٹھى۪و تۯیشہِ ہتى۪و معصوٝمو آلو آلو دیُت ہے
ژھێپھ دِتھ روٝدُکھ
تێلہِ کۅنہٕ تُلنکھ واون پنہٕ نى۪ن پٲزٕ پکھن پى۪ٹھ
تیلہِ کتہِ ٲسٕے سۆتھـ̡ ژٹنٕچ دیوانہ ہى۪کتھ
دِلہٕ دۆر آدم نے تتھ سێکلِس
پنہٕ نی گۯکہٕ وٕنہِ رتہٕ سگ دیہِ ہا
ژےٚ تہِ روزوے نہٕ أچھن منز آب

اتہٕ گتہٕ باجا !
اکہِ دوہہٕ وُچھمکھ متہِ دُپہرٕکس تاپس
دۅہلی خاب وُچھان
وچھہٕ کِس منزلِس منزوُچھمے اکھ آدمـ̡ ژھاے
ذرٕ ذرٕ مێونے ہیو خطہٕ خال
گۯاین ہُند گتہٕ گیُور وُچھم تتھ
پھۯستہٕ پھنبس زن ژھٹھ دونان
(دوننـ̡ لایق زٲنتھ ٲخرمیٲنی ژھاے)

یێلہ ژٕ کھساں چُھکھ کُلـ̡ مولو پى۪ٹھہٕ میوس تام
پانس سٍتـ̡ کیا کیا چُھکھ کھالاں؟

واون اوس ژُھنمُت چھکرٲوِتھ
آبہٕ ژےٚ اونتھم تی سۆمبرٲوِتھ
وقتٕچہِ وتہِ کھى۪و پتہٕ وتھ واٹھ
(دل چھُہ گژھاں وُنـ̡ گۯاین کُن، وُنـ̡ گۯاون کُن)
آبہ!
ژٕ یێلہِ میانى۪ن اڈـ̡ جن ہند سوٝر لبکھ
گُلہِ ٹورِس برـ̡ زى۪ن
دى۪و میانی پُشتُک کانہہ مۆت عاشق رژھراوى۪س کاڈى۪ن منز

٭٭٭

شۯُکھ

بونـ̡ !
ژےٚ گوے یژکالا وۅنـ̡
اتھ کنہِ بالس پى۪ٹھ
ننہِ تنہ وى۪تراواں چھکھ تاپھ

بونـ̡ ! ژےٚ نِش چُھم گمہٕ سرـ̡ پانس
رُمہ رُمہ پھیراں مۆت شیہجار
وتھرٕ گنى۪ر چھا آبِ حیات؟
بونـ̡!
مگر اتھ چٲنِس مایہِ ہتسِ شێہجارس
کیازہ کۯٹاں چھِم پوشہِ چمن
وتھرٕ گنى۪ر چھا موتہٕ براتھ؟

چٲنـ̡ منتھ چھےٚ زِ گۯشمس وۅپدووُتھ شێہجار
میٲنس لٲوِس پوشس نہ چھُہ نون تاپھ ویاں
تہٕ نہ بونہِ شِہُل
اکھ دا منگہٕ ہس
پوز کیا منگہٕ تس؟
ہے ساعتِ حسن
ژٕ تہِ پرارکھنا
یوت تانـ̡ نہٕ یہ شۯُکھ کانہہ مژراوى۪م

٭٭٭

دُوۆت

پھێہہ پھێہہ کرٕوُن کون دُووت تہٕ یہ تاپل دۅہ
آب، تہٕ سیکہِ صحراوس شۯو پمُت
واو، تہٕ وُہہٕ وٕنہِ وُرِ زامُت

ٲسہٕ منزٕچ ٹنگہٕ ۂٹ چھےٚ دپان وۅتھ نیر دٔچُھن
ہُتھ کھنگرٕچہِ جۅیہِ منگ تۯیش
دٔزمٕژ ژم چھےٚ دپاں وۅتھ کھووُر پکھ
ہُتھ بونہِ چھُہ وُنہِ تہِ شِہُل

بونہِ شِہُل آبس کریشاں
کھنگرٕچ جۅے ننہِ تاپہٕ دزاں
نیرٕ دٔچُھن لگہِ تن تپہٕ تاوس
پکہٕ کھووُر گژھہِ خوٝنس پھى۪کھ

وتہٕ چھےٚ أکِس نِشہِ اکھ دوٝراں
ژھۅکوٕنہِ شہہٕ لٕتھہِ زاگاں گرى۪د

٭٭٭

زوٝن

وُنہِ تہِ چھُہ رٲژ پہر کھنڈ باقٕے
ٹارى۪ن پى۪ٹھ شولییہِ
تہٕ کۆرنم نێندرِ أچھن پى۪ٹھ لوٕ چھِرکاو

سونتُک واو چھُہ توتہِ دپو تنہِ چھہـ̡ دِتھ نیران
زوٝن چھےٚ ظٲلِم !
اتھ چھےٚ پى۪واں منہِ پھلہِ وٕے سٍتى۪ن
مۅنہِ ماہ کٔرـ̡ کٔرـ̡ باوٕنـ̡ ماے
کالہٕ تہِ ٲسٕم کالہٕ کُھہس منز
گرِ کھنجہِ نى۪ترن نکھہٕ اکھ زوٝن
اسہٕ وٕنہِ ہۅنجہِ ؤژھ چشمن منز
رُمس رُمس منز ووتُم گاش
تاوٕ ۂتِس سیکِلس پى۪و روٝد

وقتٕچہِ أچھ پى۪و ژى۪پہِ زنہٕ نوٝن
کالہٕ کُھہٕچ لب لب وولییہِ
وُچھاں وُچھاں پى۪و زوٝنہِ تہٕ چشمن
بختس بى۪ن

بٹھہِ بُزـ̡ گٲمٕژ گاڑ چھےٚ کۯیشان
زى۪و نى۪نگلِتھ

٭٭٭

ژھاے

تێلہِ زٲنِم
یێلہِ
برمندِنى۪ن گو
گرِ کھنجہِ اۆبرس تل افتاب
برى۪م کیا اوسُم
زیٹھِس سفرس
روزى۪م دمہٕ
دمہٕ نٲلی
نال

٭٭٭

ٲلیو پلیو

دۆپُن:
بُنـ̡ لہِ وِزِ گژھہِ
بانگ پرٕنـ̡
متھ گیوم
دپس کیازِ
تٔمـ̡ ژى۪تُر مێون
سوال
دۆپُن:
ٲلیو پِلیو !

منہٕ مشتاقن
وہراویو
دۆل

Haraf Daay - Muzaffar Aazim - 2007

حرف ڈاے - مظفر عازم - 2007

وى۪تھ

تھر بُتھ !

ألف

ترُک؟

زاڈیُک پوش

کۆل کۆستوٝر

پۆت دِگر

ونہٕ واندُر

شہِج بونـ̡

ملاقات

‎‎٭٭٭ کۆنگی

سۯو

سُہ تہِ اوس یوسف

موسم

دم

سفراتھ

شۯُکھ

دُوۆت

زوٝن

ژھاے

ٲلیو پلیو

‎‎٭٭٭

کۆنگی