(4)

یَنہٕ زلفو چانٮ۪و نال ووٚلم تنہٕ ووتم یٔژ بیتاب لتی

یاون مےٚ سپدپھلوٲۍ پنن زنہٕ معصومن وچھ خاب لتی
دنیا چھ ونان اتھ تارکھ نب، تہ چھ دوکھٕ لکن، مےٚ چھےٚ وارٕ خبر
ژیٚۍگامٕچہ مسولہ زوٗنہ بوٚرتھ پمپوشو کتریُو قاب لتی
انسان حیاتٕچہ وٮ۪تھہ اندر یرِ ہے بیحیٚس شہتیرا ہیوٗ
یہ چھ امہ کٮ۪ن سنِرن سنۍراواں، الفت چھ زبر گرداب لتی
ییٚمۍسازن فرہادس ہیٚچھنوو بالن تہ کۅہن پُژپار کرن
غم ترٛٲوِتھ، بیٚیہ وُٹھ کملٲوِتھ، تتھ سازس دِتہ مضراب لتی
گترنۍچھےٚزمانچ گیٚوٗر تلتھ کُنہ کُنہ وِزِ مےٚ تہ مجبور کراں
نتہ لولس میٲنس جوش ہمٮ۪ا، نتہ سوٚدرن سوریا آب لتی
پرٛٮ۪تھ انسانس چھُے لولہ مژر، پوٚز دلبر عازم وارٕ وُچھن
یتھۍمتۍ چھی مشکل پٲدٕ گژھنۍ، یتھۍ عاشق چھی نایاب لتی
(اکتوبر 1956)

جلال گیلانی صٲب اوس اکھ نیک تہ شریف انسان۔ پیشہ ور گٮ۪ون وول اوس نہ، مگر کُنہ کُنہ وِزِ اوس گٮ۪ونک تہ شوقا کراں۔ تمۍسند گٮ۪ومت، شاید ساروٕے کھوتہ مشہور، بٲتھ چھ شمس فقیر صٲبن 'اللہ تہ ہوٗ ہوٗ'۔ 1971 تس منز چھ تمۍ میون یہ بٲتھ گٮ۪ومت یُس مےٚپننہ شٲعری ہندس گۅڈٕ کالس منز (اکتوبر 1956ہس) منز لیوکھمت اوس۔ 2005 ژس منز اکہ ملاقاتہ وِزِ ییٚلہ یہ بٲتھ مےٚ رخسانہ جبین صٲبنہ مہربٲنی سٍتۍ بوٗز مےٚ اوٚن یہ رکاڈ کٔرتھ۔ یہ بٲتھ چھ 'زولانہ' نٲوۍ میٚانہ گۅڈنچہ شعر سوٚمبرنہ منز شٲمل۔

(5)

جگر زخمی اوٚشس لٔج دار ٲخر
نظر چٲنی کٔرتھ گیِہ کار ٲخر
حیاتک پیالہ اوسم خٲلۍباسان
بنیٚوو دل الفتک میخوار ٲخر
بہٕ ما ہیٚکہ ہا تھوِتھ پرژھٮ۪ون پنن پان
ژٮ۪تس پووم اوے دلدار ٲخر
غمُک طوناں زرُن توٚگ لولہ والٮ۪ن
کرن حسنس تہ پٮ۪و اقرار ٲخر
کران پژپارٕ زنجیرن تہ زالن
چھےٚلولٕچ شولونۍ
تلوار ٲخر
شِکس دِتھ موتکٮ۪ن حیلن بہانن
چھےٚسپداں زندگی بیدار ٲخر
دما خاموش عازم اوس لیکن
خیالن گو کٔرتھ اظہار ٲخر

سیٚدٮ۪ن سادن لفظن منز یمہ شعر ییٚلہ ناماور گٮ۪ون گلوکار غلام حسن صوفۍصٲبنۍآواز ہٮ۪تھ سازس کھتۍ یم کرۍبوزن والٮ۪و سٮ۪ٹھا پسند۔ تہِ ہیٚکہِ امہ چہ روٗمٲنی لیہ ہند نتیجہ تہ ٲسِتھ تہ گٮ۪ون وٲلۍسنزِ آواز ہندِ جادیُک تہِ۔ نوٚن کۅڈ یہ بٲتھ صوفۍصٲبنۍہٹۍ۔  
شعرک معنے چھہ شٲعرٕ سندِ فنہٕ تہ بوزن (یا پرن) وٲلۍسندِ منہٕ سٍتۍمشخص سپدان۔ زمانا گو، مےٚسمکھٮ۪و اکھ بزرگ دوس سرینگرٕ۔ شانس پٮ۪ٹھ تھونم اتھٕ تہ دوٚپن از ہا کوٚرتھم راتس ڈاکھ۔ بہٕ گوس کیُتھ تاں ہیوٗ تہ پرٛژھمس کیا دلیل؟ دوٚپن 'کالہ دہہِ بجہِ پتہ گو ریڈیو کشمیر پٮ۪ٹھہ موسیقی ہند پروگرام نشر۔ چون شعر گیٚوُکھ ' جگر زخمی اوٚشس لٔج دار ٲخر --- نظر چٲنی کٔرتھ گیِہ کار ٲخر'۔ بس پتہ متہ بوزتہٕ، مےٚدرٛایہ راتھ ودان'۔ خدا کرۍنس مغفرت۔ یہ گو بوزن وٲلۍسند من۔
  

(6)

مستانہ دل قرارو دل ٮ۪تھ ژلن روا چھا
جانانہ دوسدارو وعدس ڈلن دوا چھا
لولک مژر چُھ پانے ننہ وانہ نیٚاے انزران
اشۍوانہِ رٲتۍ راتس دامن چھلن روا چھا
گگراے نارٕ وزمل شیٚچھ ہٮ۪تھ یوان بہارٕچ
اکھ اوٚبرٕ ژھاے ڈیٖشتھ ویٖرَن الن روا چھا

یم شعر چھہ میٚانہ خٲطرٕ قٍمتی امہ کِنۍ زِ یم چھہ محترمہ راج بیگمہ تمہ زمانہ گٮ۪وۍمتۍ ییٚلہ سۅ کٲشرِ موسیقی پٮ۪ٹھ راج کران ٲس، نتے بوزو تہٕ یمہ چھہ مےٚ لۅکچارس منز کرتام ؤنۍمٕتۍ تہٕ یہ دٔپۍزِ تہ منسٲوۍمٕتۍ۔ یتُے چُھم یاد زِ یتھ 'ویٖرٮ۪ن الن' پرنہٕ چُھ آمت سُہ اوس 'ویرن الن روا چھا' ویٖر معنے گیوو بہودر۔

 

 

 

(1)

یِنہ سہ چشمن سرٛیہہ کرکھ سہلاب انہ ہم یاونس
ینہ سہ وۅش ترٛاوکھ لگٮ۪م محبت طفانس تاونس
یِنہ سہ زن٘ہہ میانٮ۪ن غمن ہٮ۪کھ گرٛند کرنۍ
تھاوُن حساب
یِنہ سہ زن٘ہہ تھکھ سپدِ چٲنس لالہ وُٹھ کملاونس
میانہِ سینکۍ
زخم گَنزرٲوِتھ یِتھے ہِش کیاز چھکھ
بم بلن، پرٛاراں چھِ چٲنس اکھ نظر سٮ۪وٚد ترٛاونس
میٲنۍ
پرژھٮ۪نۍ لولہ ہاوس آرٕ کتۍارمان میٲنۍ
پٲرۍ
چٲنس ببرِ تن مسول بدن پٲراونس

یم شعر چھ اصلی اکھ چٹھۍیۅسہ “شیٚچھۍ“ عنوان دتھ “خدمت“ اخبارس منز شایع کرتھ سوزنہ ٲس آمٕژ، اوٕ کنۍتکیازِ تتھ شِٹھٕ پردٕدار گرس منز اوس اخبار واتاں، مگر کورِ ہندِ ناوٕ چٹھۍواتنۍییہِ ہے عٲب ماننہ (کورِ ہند نکاح سپدِتھ تہِ)۔ خدمت اخبارک ایڈیٹر اوس اکھ شریف تہ دل رچھن وول شخص، نند لال واتل، تہ اسسٹنٹ ایڈیٹر اوس یارن ہند یار صوفی غلام محمد۔ بہٕ اوسس پننۍشعر اکثر خدمتس منز چھاپان۔

غلام نبی ڈولوال سند ونُن چھ زِ اکہ دۅہہہ ووٚن تٔمس ریڈیو والیو فورن اکھ گٮ۪ون بٲتھ تیار کرن۔ تٔمس آیہ میانہ کتابہ تھپھ، یم شعر باسیس سہل پہن تہ ترٛیہہ معمولی ساز ہٮ۪تھ، پوٗرٕ تیٲری ورٲے دوریو سٹوٗڈیوہس منز۔ یہ درٛاو تمۍسٕندِ ہٹہِ تمہ آیہ زِ تمۍسٕنز اکھ بہترین پیشکش چھ ماننہ یوان۔ مےٚسپد ڈولوال صٲبس سٍتۍاکی لٹہ ملاقات، سُہ تہ یہ بٲتھ گٮ۪ونہ پتہ واریہہِ کٲلۍ۔ کرِو ڈولوال صٲبنہ خٲطر دعایہ مغفرت (میانہ خٲطر تہِ)، تہ بوٗزِو:

(2)

اسِہ بوٚر وِزِ وِزِ لول حیاتس، وِزِ وِزِ بوٚر اسِہ لول
وِزِ وِزِ بوٚر اسِہ لول حیاتس، قول امارُک پول

اسِہ ژٔٹۍبالن سیٖنہ تہٕ اسِہ تٔج لالن کاسٕنۍترٛیش
اسِہ تھوو صبحُک شبنم لٲگِتھ دُرٕ پھٔلۍجٔرۍجٔرۍدیش
اسۍٲسۍسونتٕکِہ تاپٕچ پرٛو زن گٹہ زوٚل اوٚبرک گول

ییٚلہِ اسِہ داغ تچھُن ہیوٚت ماگن سونتس دیُت اسہِ ناد
سام دِلس ٮ۪تھ، واش نرٮ۪ن کوٚڈ، گلشن کوٚر آباد
ییٚلہ زانہہ تیٖزی وٕچھ گٹہٕ کارس ژونگ امارُک زول

رجزیہ شٲعری چھےٚکٲشرس منز نہ آسنس برابر۔ صوفیانہ شعرن ہنز چھنہ کتھٕے، عام لولہ بٲتھ تہِ چھِ دٕیان زیادٕ تہ وِسان کم۔ شاید اوس 1958۔ موہن لال ایمہ اوس ریڈیو کشمیٖرک اکھ دردمند تہ قٲبل پروگرام افسر۔ تٔمۍکٔر مےٚ فرمٲیش اکھ نغمہ لیکھنٕچ۔ دوٚپن مگر plaintive گوژھ نہٕ آسن، مطلب غمگین، یا ہِجرٕکٮ۪ن چھۅکن ہنز باوتھ گژھٮ۪س نہٕ آسنۍ۔

سیٲسی رایہ چھےٚ بنان تہ پُھٹان، نوان تہ پرٛانان۔ تِمن دۅہن اوس واریہن لُکن ہندۍپٲٹھۍ مےٚ تِہ بانہٲج بالس وچھ ژٔٹِتھ وتھ کڈنس پٮ۪ٹھ فخر۔ میٚٲنس ازلَے پُر امید مزازس اوس یہ 'کمال' ویہِ وُن۔ اتھۍپوٚت منظرس منز چھِ یِم شعر زامٕتۍ۔

موہن لال ایمہ صٲبن دیُت اتھ سازُت یتھ پٮ۪ٹھ تٔمِس ناز۔ تۅتٲنۍاوس ریڈیو پٮ۪ٹھٕ فرمٲیشی پروگرام صرف فلمی بٲتھ آسان۔ تتھۍپروگرامس منز گو تِمنٕے دۅہن کٲشر بٲتھ رلاونُک سلسلہ شروع تہٕ گۅڈنِکۍ زٕ بٲتھ ٲسۍنٲدم صٲبُن 'بوٚمبرو بوٚمبرو' تہٕ مٮ۪ون یِہ بٲتھ، 'اسِہ بوٚر وِزِ وِزِ لول حیاتس'۔ یہ چھ علی محمدن گٮ۪ومت۔ علی محمد اوس اکھ زٲوۍلہ خطہ صفا پسند تہ خۅش آواز گٮ۪ون وول تہ ریڈیو کشمیرکس ملٲزم عبدالحق برق سند بوے۔
پتہٕ آو اکھ وقتا کشمیٖر ینورسٹی کوٚر یہِ کٲشر رجز ینورسٹی ترانہٕ رٔنگۍاستعمال۔ شاید ؤری تارٕ چلٮ۪وو یوٚتٲنۍکٔمِس تٲنۍظۅن پٮ۪و زِ یہِ چُھنہ تتھ لایق تہٕ کڈنٲونس تتہِ ثھِل۔ پکان دورِ فلک

 

(3)

ہردٕ وٲۍہردٕ رٲچھۍدردٕچ نے      بونہِ پرٛوو پن ۂرِتھ بہارُک پَے
رایہِ چانی چھُہ میانہِ آنگٕنہ زو      مایہِ چانی چھےٚسانہِ گامہٕ دِوَے
کر اتھس تھپھ تہٕ ستھ سمندر ہٮ۪تھ      پروتن ہِندۍسفر تہِ سپدن طَے
تاپہٕ کراین چھےٚاز اوٚبر سۅ وُڈنۍ   شین وٮ۪گلیوو ییٚمہِ چہِ گرایہِ دۅہَے
پہرِ پوشِن مےٚچٲنۍپٔدۍپمپوش    وارِ ہندۍپوشنوٗل رٔچھۍنَے دَے
وٮ۪تھ چھےٚپانس پنُن سفر پالان شاٹھ شاٹھس تھٮ۪کان چھُہ مانٹُک پَے
بالہٕ آرس چھےٚسودرٕ کھۅن پراران    نیٖرۍشیٚہجارٕ میانہِ! گرٕ چھُہ گرَے
کینہہ مہٕ پرٕژھ عازمؔن خدا رٔچھۍنس       نارٕ بالس اندر چھےٚنالان نَے

تۅہہِ اگر 'ینہٕ سا چشمن سرٛیٚہہ کرکھ' بٲتھ بوزمت چھہ، تیٚلہ ونہ بہٕ زِ سہ بٲتھ اوس یاونُک آلو، یہ چھ تمہ کی پٲٹھۍپٲغام، لگ بگ پنژاہ ؤری تمہ پتہٕ وننہٕ آمت۔ تمہ حسابہ ونو اتھ مۅہرِمشک۔

کٲشر ڈراما نِگار تہٕ پرٛوٚڈیوسر محمد امین بٹ صٲب چھ قدر شناس یار۔ تِمو دیُت یہ وحید جیلانی صٲبس یم کشیٚرِ ہندۍہاونۍباونۍ لایق گٮ۪ون وٲلۍتۂ موسیقی ہندۍ عاشق چھِ۔ وحید جیلانی صٲبن دِژ اتھ پننہِ ہٹہِ گٮ۪وِتھ نٔو زندگی۔