Kashmiri songs sung by various well-known singers (detailed in the notes), and written by Muzaffar Aazim, and other audio items.

Click on the link to listen, and/or read the accompanying notes below.

(1)

یِنہ سہ چشمن سۯیہہ کرکھ سہلاب انہ ہم یاونس
ینہ سہ وۅش تۯاوکھ لگى۪م محبت طفانس تاونس
یِنہ سہ زن٘ہہ میانى۪ن غمن ہى۪کھ گۯند کرنـ̡  تھاوُن حساب
یِنہ سہ زن٘ہہ تھکھ سپدِ چٲنس لالہ وُٹھ کملاونس
میانہِ سینکـ̡  زخم گَنزرٲوِتھ یِتھے ہِش کیاز چھکھ
بم بلن، پۯاراں چھِ چٲنس اکھ نظر سى۪ۆد تۯاونس
میٲنـ̡  پرژھى۪نـ̡ لولہ ہاوس آرٕ کتـ̡  ارمان میٲنـ̡
پٲرـ̡  چٲنس ببرِ تن مسول بدن پٲراونس

یم شعر چھ اصلی اکھ چٹھـ̡  یۅسہ “شێچھـ̡ “ عنوان دتھ “خدمت“ اخبارس منز شایع کرتھ سوزنہ ٲس آمٕژ، اوٕ کنـ̡  تکیازِ تتھ شِٹھٕ پردٕدار گرس منز اوس اخبار واتاں، مگر کورِ ہندِ ناوٕ چٹھـ̡  واتنـ̡  ییہِ ہے عٲب ماننہ (کورِ ہند نکاح سپدِتھ تہِ)۔ خدمت اخبارک ایڈیٹر اوس اکھ شریف تہ دل رچھن وول شخص، نند لال واتل، تہ اسسٹنٹ ایڈیٹر اوس یارن ہند یار صوفی غلام محمد۔ بہٕ اوسس پننـ̡  شعر اکثر خدمتس منز چھاپان۔
غلام نبی ڈولوال سند ونُن چھ زِ اکہ دۅہہہ وۆن تٔمس ریڈیو والیو فورن اکھ گى۪ون بٲتھ تیار کرن۔ تٔمس آیہ میانہ کتابہ تھپھ، یم شعر باسیس سہل پہن تہ تۯیہہ معمولی ساز ہى۪تھ، پوٝرٕ تیٲری ورٲے دوریو سٹوٝڈیوہس منز۔ یہ دۯاو تمـ̡  سٕندِ ہٹہِ تمہ آیہ زِ تمـ̡  سٕنز اکھ بہترین پیشکش چھ ماننہ یوان۔ مےٚ سپد ڈولوال صٲبس سٍتـ̡  اکی لٹہ ملاقات، سُہ تہ یہ بٲتھ گى۪ونہ پتہ واریہہِ کٲلـ̡ ۔ کرِو ڈولوال صٲبنہ خٲطر دعایہ مغفرت (میانہ خٲطر تہِ)، تہ بوٝزِو:

(3)

ہردٕ وٲـ̡ ہردٕ رٲچھـ̡ دردٕچ نے
بونہِ پۯوو پن ۂرِتھ بہارُک پَے
رایہِ چانی چھُہ میانہِ آنگٕنہ زول
مایہِ چانی چھےٚ سانہِ گامہٕ دِوَے
کر اتھس تھپھ تہٕ ستھ سمندر ہى۪تھ
پروتن ہِندـ̡  سفر تہِ سپدن طَے
تاپہٕ کراین چھےٚ از اۆبر سۅ وُڈنـ̡
شین وى۪گلیوو یێمہِ چہِ گرایہِ دۅہَے
پہرِ پوشِن مےٚ چٲنـ̡  پٔدـ̡  پمپوش
وارِ ہندـ̡  پوشنوٝل رٔچھـ̡ نَے دَے
وى۪تھ چھےٚ پانس پنُن سفر پالان
شاٹھ شاٹھس تھى۪کان چھُہ مانٹُک پَے
بالہٕ آرس چھےٚ سودرٕ کھۅن پراران
نیٖرـ̡  شێہجارٕ میانہِ! گرٕ چھُہ گرَے
کینہہ مہٕ پرٕژھ عازمؔن خدا رٔچھـ̡  نس
نارٕ بالس اندر چھےٚ نالان نَے

تۅہہِ اگر 'ینہٕ سا چشمن سۯێہہ کرکھ' بٲتھ بوزمت چھہ، تێلہ ونہ بہٕ زِ سہ بٲتھ اوس یاونُک آلو، یہ چھ تمہ کی پٲٹھـ̡  پٲغام، لگ بگ پنژاہ ؤری تمہ پتہٕ وننہٕ آمت۔ تمہ حسابہ ونو اتھ مۅہرِمشک۔
کٲشر ڈراما نِگار تہٕ پۯۆڈیوسر محمد امین بٹ صٲب چھ قدر شناس یار۔ تِمو دیُت یہ وحید جیلانی صٲبس یم کشێرِ ہندـ̡  ہاونـ̡  باونـ̡  لایق گى۪ون وٲلـ̡  تۂ موسیقی ہندـ̡  عاشق چھِ۔ وحید جیلانی صٲبن دِژ اتھ پننہِ ہٹہِ گى۪وِتھ نٔو زندگی۔   

(5)

جگر زخمی اۆشس لٔج دار ٲخر
نظر چٲنی کٔرتھ گیِہ کار ٲخر
حیاتک پیالہ اوسم خٲلـ̡  باسان
بنێوو دل الفتک میخوار ٲخر
بہٕ ما ہێکہ ہا تھوِتھ پرژھى۪ون پنن پان
ژى۪تس پووم اوے دلدار ٲخر
غمُک طوناں زرُن تۆگ لولہ والى۪ن
کرن حسنس تہ پى۪و اقرار ٲخر
کران پژپارٕ زنجیرن تہ زالن
چھےٚ لولٕچ شولونـ̡  تلوار ٲخر
شِکس دِتھ موتکى۪ن حیلن بہانن
چھےٚ سپداں زندگی بیدار ٲخر
دما خاموش عازم اوس لیکن
خیالن گو کٔرتھ اظہار ٲخر

سێدى۪ن سادن لفظن منز یمہ شعر یێلہ ناماور گى۪ون گلوکار غلام حسن صوفـ̡  صٲبنـ̡  آواز ہى۪تھ سازس کھتـ̡، یم کرـ̡  بوزن والى۪و سى۪ٹھا پسند۔ تہِ ہێکہِ امہ چہ روٝمٲنی لیہ ہند نتیجہ تہ ٲسِتھ تہ گى۪ون وٲلـ̡  سنزِ آواز ہندِ جادیُک تہِ۔ نۆن کۅڈ یہ بٲتھ صوفـ̡  صٲبنـ̡  ہٹـ̡ ۔
شعرک معنے چھہ شٲعرٕ سندِ فنہٕ تہ بوزن (یا پرن) وٲلـ̡  سندِ منہٕ سٍتـ̡  مشخص سپدان۔ زمانا گو، مےٚ سمکھى۪و اکھ بزرگ دوس سرینگرٕ۔ شانس پى۪ٹھ تھونم اتھٕ تہ دۆپن از ہا کۆرتھم راتس ڈاکھ۔ بہٕ گوس کیُتھ تاں ہیوٝ تہ پۯژھمس کیا دلیل؟ دۆپن 'کالہ دہہِ بجہِ پتہ گو ریڈیو کشمیر پى۪ٹھہ موسیقی ہند پروگرام نشر۔ چون شعر گێوُکھ ' جگر زخمی اۆشس لٔج دار ٲخر --- نظر چٲنی کٔرتھ گیِہ کار ٲخر'۔ بس پتہ متہ بوزتہٕ، مےٚ دۯایہ راتھ ودان'۔ خدا کرـ̡نس مغفرت۔ یہ گو بوزن وٲلـ̡  سند من۔

(2)

اسِہ بۆر وِزِ وِزِ لول حیاتس، وِزِ وِزِ بۆر اسِہ لول
وِزِ وِزِ بۆر اسِہ لول حیاتس، قول امارُک پول

اسِہ ژٔٹـ̡  بالن سیٖنہ تہٕ اسِہ تٔج لالن کاسٕنـ̡  تۯیش
اسِہ تھوو صبحُک شبنم لٲگِتھ دُرٕ پھٔلـ̡   جٔرـ̡  جٔرـ̡  دیش
اسـ̡  ٲسـ̡  سونتٕکِہ تاپٕچ پۯو زن گٹہ زۆل اۆبرک گول

یێلہِ اسِہ داغ تچھُن ہیۆت ماگن سونتس دیُت اسہِ ناد
سام دِلس ہى۪تھ، واش نرى۪ن کۆڈ، گلشن کۆر آباد
یێلہ زانہہ تیٖزی وٕچھ گٹہٕ کارس ژونگ امارُک زول

رجزیہ شٲعری چھےٚ کٲشرس منز نہ آسنس برابر۔ صوفیانہ شعرن ہنز چھنہ کتھٕے، عام لولہ بٲتھ تہِ چھِ دٕیان زیادٕ تہ وِسان کم۔  
شاید اوس 1958۔ موہن لال ایمہ اوس ریڈیو کشمیٖرک اکھ دردمند تہ قٲبل پروگرام افسر۔ تٔمـ̡  کٔر مےٚ فرمٲیش اکھ نغمہ لیکھنٕچ۔دۆپن مگر plaintive گوژھ نہٕ آسن، مطلب غمگین، یا ہِجرٕکى۪ن چھۅکن ہنز باوتھ گژھى۪س نہٕ آسنـ̡ ۔
سیٲسی رایہ چھےٚ بنان تہ پُھٹان، نوان تہ پۯانان۔ تِمن دۅہن اوس واریہن لُکن ہندـ̡  پٲٹھـ̡  مےٚ تِہ بانہٲج بالس وچھ ژٔٹِتھ وتھ کڈنس پى۪ٹھ فخر۔ مێٲنس ازلَے پُر امید مزازس اوس یہ 'کمال' ویہِ وُن۔ اتھـ̡  پۆت منظرس منز چھِ یِم شعر زامٕتـ̡ ۔
موہن لال ایمہ صٲبن دیُت اتھ سازُت یتھ پى۪ٹھ تٔمِس ناز۔ تۅتٲنـ̡  اوس ریڈیو پى۪ٹھٕ فرمٲیشی پروگرام صرف فلمی بٲتھ آسان۔ تتھـ̡  پروگرامس منز گو تِمنٕے دۅہن کٲشر بٲتھ رلاونُک سلسلہ شروع تہٕ گۅڈنِکـ̡  زٕ بٲتھ ٲسـ̡  نٲدم صٲبُن 'بۆمبرو بۆمبرو' تہٕ مى۪ون یِہ بٲتھ، 'اسِہ بۆر وِزِ وِزِ لول حیاتس'۔ یہ چھ علی محمدن گى۪ومت۔ علی محمد اوس اکھ زٲوـ̡ لہ خطہ صفا پسند تہ خۅش آواز گى۪ون وول تہ ریڈیو کشمیرکس ملٲزم عبدالحق برق سند بوے۔
پتہٕ آو اکھ وقتا کشمیٖر ینورسٹی کۆر یہِ کٲشر رجز ینورسٹی ترانہٕ رٔنگـ̡  استعمال۔ شاید ؤری تارٕ چلى۪وو یۆتٲنـ̡  کٔمِس تٲنـ̡  ظۅن پى۪و زِ یہِ چُھنہ تتھ لایق تہٕ کڈنٲونس تتہِ ثھِل۔ پکان دورِ فلک

(4)

یَنہٕ زلفو چانى۪و نال وۆلم تنہٕ ووتم یٔژ بیتاب لتی
یاون مےٚ سپدپھلوٲـ̡  پنن زنہٕ معصومن وچھ خاب لتی
دنیا چھ ونان اتھ تارکھ نب، تہ چھ دوکھٕ لکن، مےٚ چھےٚ وارٕ خبر
ژێـ̡  گامٕچہ مسولہ زوٝنہ بۆرتھ پمپوشو کتریُو قاب لتی
انسان حیاتٕچہ وى۪تھہ اندر یرِ ہے بیحێس شہتیرا ہیوٝ
یہ چھ امہ کى۪ن سنِرن سنـ̡ راواں، الفت چھ زبر گرداب لتی
یێمـ̡  سازن فرہادس ہێچھنوو بالن تہ کۅہن پُژپار کرن
غم تۯٲوِتھ، بێیہ وُٹھ کملٲوِتھ، تتھ سازس دِتہ مضراب لتی
گترنـ̡  چھےٚ زمانچ گێوٝر تلتھ کُنہ کُنہ وِزِ مےٚ تہ مجبور کراں
نتہ لولس میٲنس جوش ہمى۪ا، نتہ سۆدرن سوریا آب لتی
پۯى۪تھ انسانس چھُے لولہ مژر، پۆز دلبر عازم وارٕ وُچھن
یتھـ̡  متـ̡  چھی مشکل پٲدٕ گژھنـ̡ ، یتھـ̡  عاشق چھی نایاب لتی
(اکتوبر 1956)

جلال گیلانی صٲب اوس اکھ نیک تہ شریف انسان۔ پیشہ ور گى۪ون وول اوس نہ، مگر کُنہ کُنہ وِزِ اوس گى۪ونک تہ شوقا کراں۔ تمـ̡  سند گى۪ومت، شاید ساروٕے کھوتہ مشہور، بٲتھ چھ شمس فقیر صٲبن 'اللہ تہ ہوٝ ہوٝ'۔ 1971 تس منز چھ تمـ̡  میون یہ بٲتھ گى۪ومت یُس مےٚ پننہ شٲعری ہندس گۅڈٕ کالس منز (اکتوبر 1956ہس) منز لیوکھمت اوس۔ 2005 ژس منز اکہ ملاقاتہ وِزِ یێلہ یہ بٲتھ مےٚ رخسانہ جبین صٲبنہ مہربٲنی سٍتـ̡  بوٝز  مےٚ اۆن یہ رکاڈ کٔرتھ۔ یہ بٲتھ چھ 'زولانہ' نٲوـ̡  مێانہ گۅڈنچہ شعر سۆمبرنہ منز شٲمل۔
٭٭٭

(6)

مستانہ دل قرارو دل ہى۪تھ ژلن روا چھا
جانانہ دوسدارو وعدس ڈلن دوا چھا
لولک مژر چُھ پانے ننہ وانہ نێاے انزران
اشـ̡  وانہِ رٲتـ̡  راتس دامن چھلن روا چھا
گگراے نارٕ وزمل شێچھ ہى۪تھ یوان بہارٕچ
اکھ اۆبرٕ ژھاے ڈیٖشتھ ویٖرَن الن روا چھا

یم شعر چھہ مێانہ خٲطرٕ قٍمتی امہ کِنـ̡  زِ یم چھہ محترمہ راج بیگمہ تمہ زمانہ گى۪وـ̡ متـ̡  یێلہ سۅ کٲشرِ موسیقی پى۪ٹھ راج کران ٲس، نتے بوزو تہٕ یمہ چھہ مےٚ لۅکچارس منز کرتام ؤنـ̡ مٕتـ̡  تہٕ یہ دٔپـ̡ زِ تہ منسٲوـ̡ مٕتـ̡ ۔ یتُے چُھم یاد ‎زِ یتھ 'ویٖرى۪ن الن' پرنہٕ چُھ آمت سُہ اوس 'ویرن الن روا چھا' ویٖر معنے گیوو بہودر۔