* یہ چھہ گۅڈنیک حصہ
* دویم حصہ وُچھِو
*  تۯیم حصہ وُچھِو
کتاب ٹھیک پٲٹھۍ پرنہ باپتھ چھہ
گلمرگ نستعلیق فانٹ انسٹال کرن ضروری۔

سرمایہ تہٕ سام

گۅڈنیُک حصہ

غلام نبی آتش

***
﴿
سٲری حقوق چھہ مصنف سٕندِ ناوٕ محفوظ

-------

انتساب

پنہٕ نِس سٮ۪ٹھٕ ہٕے سیود سادٕ تہٕ درویش صفت مٲلۍ سٕندِ ناوٕ
ییٚمۍ
نم ژم گٲلِتھ پھانپھ لووُس تہٕ گانجہ بچھِ لوگُس
اللہ
تعالیٰ کٔرۍنس مغفرت﴿آمین﴾

***

گۅڈٕ کتھ  

"سرمایہ تہٕ سام" چھے میانٮ۪ن تحقیقی تہٕ تجزیٲتی مضمونن ہٕنزپوٗنژِم سۅمبرن۔ اتھ منز چھِ لۅکٕٹۍ بٔڈۍ وُہہ مضمون شٲمِل۔ یِمو منزٕ کینہہ چھِ  آمٕتۍ وِلہ وِلہ سٮ۪منارن منز تہٕ کینہہ ریڈیو کشمیر سرینگرٕ پٮ۪ٹھٕ پرنہٕ۔ اکثر مضمون چھِ رسالن منز شایع سپدٕۍ مٕتۍ۔ پٔتۍمٮ۪ن واریہن ؤرۍین دوران لیکھنہٕ آمتۍ یم مضمون چھِ ادبی تحقیقس سٍتۍ میانہ یٔژ دِلچسپی ہُند نتیجہ ۔  وۅمید چھے پرن والٮ۪ن پاتھِ ییمہ سۅمبرنہ منز دِلچسپ تہٕ معنہ سوو مواد تِکیازِ اَتھ منزچھِ کینہہ سٲدٕروار تہٕ تازٕ دریاف چیز یِمن کُن از تام توجہ اوس نہٕ دِنہٕ آمُت مثالے اکھ نٲدِر نعتِ شریف ، یتھ متعلق وننہٕ یوان اوس زِ سُہ چُھ زین العابدین بڈشاہن لیوکھمُت مگرلیوکھمُت چھُ سعد اللہ سعادتن یا ریشن تہٕ سُلطانن ہٕندٮ۪ن تعلقاتن متعلق کینہہ سوالیہ اشارٕ، یِم توجہ منگان چھِ۔ معراج نامن متعلق سٲدر وار مضمون یا کٲشرٮ۪ن شٲعرن ہٕنزِ بدیہی گوئی ہٕندۍ نمونہٕ۔ بہر حال یہ کینژھا یَتھ کتابہ منز درٕج چُھ تہ چُھ کٲشرِ کلچرکٮ۪ن گوشن تام پِلو کرنُک محض پلہٕ ، تہٕ حتمی فٲصلہٕ تہٕ نہ ٲخری کو شش ۔ تہ ٲسِتھ تہ چُھس بہٕ ہژرٕ سان عرضی گُذار زِ وشفہٕ تہٕ سہو گژھن در گُذر کرنہٕ یِنۍ۔

معروف کشمیرشناس، قداوارادیب، محقق تہٕ تنقیدنگار جناب محمدیوسف ٹینگ صٲبن لیکھۍ میانہ یتھ ادنیٰ کوششہ ہ متعلق توبرکہٕ رٔنگۍ کینہہ خیالات ، اَمہ باپتھ چُھس بہٕ تہُند احسان مند، تہنزِ اَمہ خیالہٕ باؤژ سٍتۍ ہُریوو یتھ مضمونہٕ سۅمبرنہ بوش تہٕ توش۔

میٲنِس ڈیلس پٔلِس  دیہہ کاڈس ٲس نہٕ ییمہ سومبرنہ ہٕندِ اشاعتُک و ولہٕ بور تُلنٕچ سامرتھٕے ، اگرنہٕ میون عزیز ڈاکٹر گُلزار احمد راتھر ہٮ۪متھ کرِ ہے اَمِچ اشاعت ٲس نہٕ مُمکن۔ کتابت کرناونٕچ ، پروٗف پرنٕچ تہٕ طباعتٕکہ انتظامٕچ سٲرٕے ذمہٕ وٲری وٲج تمٔی نکھٕ ، اَوٕ مۅکھہٕ چُھس تسُند شُکر گذار ۔ تِمن ادیبن تہٕ محققن ہُند تہ چُھس شُکر گذار یِمن ہٕندۍ حوالہٕ اکار بکار آمٕتۍ چھِم۔ محمد یوسف میر سُند شکریہ کرُن تہ چھُم لٲزِم زِ تِمو کٔر ییمہ کتابہ ہٕنز کمپیوٹر کمپوزنگ شوٗبہ دار پٲٹھۍ، حالانکہ تِمن پییہ اتھ پٮ۪ٹھ ژٔر محنت کرٕنۍ۔

غلام نبی آتش

مۅکھتہٕ چھکے دۅژھے لو

کٲشرۍ پٲٹھۍ چھُ اکھ باون ہار دٔپیُت ،یُس وۅنۍ زمانچہ وٮ۪وہارٕ تہٕ وٮ۪ستارٕ بدلی سٍتۍ، بییو یِژھو واریاہو ٲنہٕ واجو ہٕندۍ پٲٹھۍ ضراب خانہٕ نیبَر گومُت چھُ " اَسہ تہٕ خۅجو چھے یِکہٕ وَٹہٕ مہن ترٲومٕژ" مہن گٔے سۅ کندئہ ناتراش وَن لکٕر یۅسہٕ جنگلو منزٕ ژٔٹِتھ دٔریاون تراوَن ٲسۍ یُتھ آبہٕ چہ روٲنی سٍتۍ خریدارس نکھٕ ٲبی گھاٹھس نِش رٹنہٕ تہٕ وٹنہٕ ییہ ہے ۔ مہن ٲسۍ حٲکم ، رئیس تہٕ ٹھیکہٕ درے یوت ہٮ۪کان ژھٲرِتھ گٲرِتھ مگر نہ آسن والٮ۪ن کتہ جُڑِ ہے مہن! تِم ٲسۍ خیٲلی شہتیر نووکھن تہٕ ویرٕوُنِس آبس تراوان۔ اتھ دراو خواجن راجن ہٕنزِ مہنہ کھۅتہٕ ژ ۆر دار تہٕ از تہ چھے سانہ پاپر جازبٲنۍ  ہٕنزِ گٕتھِ منز رواں دواں۔

مطلب غرض اوسُم یہ زِ بڈٮ۪ن لوٗکن ہٕندۍ پٲٹھۍ چھے اَسہ عامن خامن تہ جذبن ، گُمانن تہٕ خیالن ہشے ترایہ گرایہ آسان۔ ہرگاہ أسۍ تہ تِمن ہُند ناو ہٮ۪وان ہٮ۪وان پنٕنۍ مہن تراوو ، اَتھ گژھِ نہٕ "من ہستم" ونہٕ ونٕچ ، یتھ انگریزۍ پٲٹھۍ﴿name-dropping ﴾ونان چھِ، ہانژ لاگنہٕ یِنۍ۔ دپان مشہوٗر بنگٲلۍ دٲنشور تہٕ انقلٲبۍ ایم۔ا ین ۔ راے[1]، سٕنزِ دانٲیی تہٕ تیز فہمی ہٕنز ٲس ییژکرٮ۪کھ زِ ہرگاہے تسُند کو نژھ ہم عصر پنڈت جواہر لال نہرو کُنہ محفلہ منزگرٮ۪زان آسہ ہے تہٕ اور پییہ ہے ایم ۔ این ۔ راے وٲتِتھ۔ نہرو جیس ٲسۍ یکدم طوطہٕ کلٕنۍ ہٮ۪وان۔ تہٕ سُہ اوس رٲسہٕ رٲسے کتھ ژٔٹِتھ دَگ تھاوٕنۍ ہیوان.... غلام نبی آتش صٲبنہ زیرِ نظر کِتابہ ہنگہٕ طومار لاگنہٕ وِزِ چھے مےٚ شوٹھس تہ زَن یِژھٕے وَنن گٲمٕژ۔ مے کم سوادس چھے آتش صٲبَس سٍتۍ کٲشرِ تحقیق تہٕ تنقیدچہ براندٕ کنہ پٮ۪ٹھ کُنہ کُنہ لونچہ مِلہٕ وٕن ہش گژھان....یہ چھُ میون سورُے داش نداش مگر تسٕندِ باگہ بٔرتہ تہٕ بابرکت قلمُک بس اکھ لمبُکھ ۔ سُہ چھُ اَمہ علاوٕ اکھ تخلیق کار ، شٲعر ، ممتاز فوک لورِسٹ، کارِ وۅگُن محقق تہٕ تنقید نگار، کٲشرٮ۪ن درسی تہٕ نصٲبی کتابن ہٕنزِ تیٲری تہٕ ترتیب کاری ہُند مٲہر تہٕ شُرۍ ادبُک زبر تخلیق کار۔ پنہٕ نِس خاص مٲدانس منزچھُ وُنکٮ۪ن یکتا۔ کٲشرِس منز چھُ فوک لور ہوس شاندارمضمونس پروفیسر محی الدین حاجنی، سُدرشن کاشکٲری ، موتی لال ساقی، محمد سُبحان بھگت، ناجی منور تہٕ پروفیسر فاروق فیاض تہٕ ا پورٕ تہٕ بییہ کینژَو أدیبو ہلم بورمُت۔ مگر آتش صٲبُن یُتھ الاو چھُ زیادے پہن شولان۔ میانہ خیالہٕ چھُ اَتھ تسٕندِ ذٲتی کمالہٕ علاوٕ اکھ ڈیشہ وُن وجہ تہ۔ سُہ گوو یہ زِ سٲنِس شہرِ سرینگرس منزلسنہٕ بسنٕکۍ ٹنز آسنہٕ باوجود تروو نہٕ تمٔۍ پنُن سۅکھٕ شُہُل آدن گام۔ میٲنۍ کِنۍ چھُ سانہ فوک لورُک اصل پرستان سانٮ۪ن گامن ہُند رۅنہ منزلُے۔ گۅڈٕ چھے وۅنۍ سٲنۍ منز اَتھس سومب کٔشیر موٹرو ، بسو، ٹرکو تہٕ ٹرینو چِنۍ  پیالہٕ ژٔکِس منز موژرٲومٕژ۔ سۅ کۅس جاے شاے چھے یتھ نہٕ گاڑٮ۪و تہٕ بسو سرینگرس سٍتۍ ٹیب چھے دِژمٕژ۔ ساسہٕ بٔدۍ کٲشرۍ ، مرد ، زنانہٕ کیو شُرۍ چھِ دۅہس رزق گارنہٕ پتہٕ ژھمبرِ رلہٕ وُن بییہ پنُن گرٕ شہر یا گام واپس واتان۔ توے زَن چھے سٲرٕے کٔشیر اَکھ زیٹھِ زیوٗٹھ سرینگر بنیمٕژ۔ شہرٕچ بس چھے رحمان راہی سٕنزِ کتھِ گامہٕ چہ پژھِ شہرُک شک برابر بٮ۪بہ منز واتناوان[2] مگر تہ کٔرِتھ چھِ وُنہ گامن منز تِژھٕ وَن چھپہٕ موجود یِمن نہٕ شہرٕچ حٮ۪س آگہی سزیمٕژ تہٕ سنیمٕژ چھے۔ تَتہ چھُ وُنہ صُبحُک شبنم، وۅندن ہُند سریہہ تہٕ أچھن ہُند آب بوزنہٕ یوان تہٕ ڈیشمان ۔ غلام نبی آتش چھُ امے ناگہٕ سبزارُک اکھ حِصہٕ۔ سُہ ٲسۍ تن کالہٕ پگاہ شہرٕ کھسان وسان مگر تمٔۍ چھِ پننہ اندرونی تہٕ اصل  ارزٔژ ہٕنز سۅزہٲرۍ گامہٕ سٕے مَنزرٔژھرِتھ آسان تھؤمٕژ۔ بییہ چھُ مے شوٹھٕ سٕندۍ پٲٹھۍ تس پنُن گٲمیون وُنہ سٲمِتھ تہ شیرِتھ۔ یہ چُھ أزۍ کِس ہاے فاے ﴿ Hi Fi جہانِ خرابس منز تسٕندِ پاسہٕ آسنٕچ بٔڈ ضمانت۔ سُہ چھُ پٔزۍکِنۍ اکھ مردِ شریف تہٕ فردِ معتبر ، یِتھۍ ہوۍ آدم چھِ وۅنۍ زیادٕ خوابنٕے منز نظرِ گژھان۔ توے چھُم دِل یژھان زِ تس کر ہاشمس فقیرن یہ مصرعہٕ گُلہ میوٗٹھ:
                                                                       لالن کرے انبار ، مۅکھتہٕ چھکے دۅژھے لو
زیرِ
نظر کتابہ ورق پھِران پھِران گوو مے گۅڈٕ پننہ زانکٲری منزہُرٮ۪ر تکیازِ صاحبِ کتابن چھُنہٕ صرف بوسیدٕ پوتھِ نٕے یوت ہر تَر تُلمُت بلکہ  چھُن سانہ تہذیبی حسابہٕ کٔشیرِ تازٕ نظرو سٍتۍ نٔوینہٕ ویوٗر تُلمُت تہٕ سنبولمُت۔ سُہ چھُ پہلگام طرفس کُن بسان تہٕ یہ چھُ کٔشیرِ منز پرانہ لسن پتھرِ ہُند سٮ۪ٹھاہ رُستگار تہٕ بختاوار علاقہٕ۔ اَتے ٲس دکن کالیج پونہٕ ہٕکۍ سنکالیہ ہن برصغیرٕچ گۅڈنِچ شِشتٕر تبٕر دریافت کٔرمٕژ۔ از تہ چھِ اَتھ طرفس کُن واریاہ پرانہ بسٔتیہ میژِ ہٕندۍ بُرقعہٕ مُژرٲوِتھ سٮ۪ٹھاہ قدیم تہذیبی نیب ہاوان باوان ۔ اَتھ چھُنہٕ شکھٕے زِ لیدٕر ِ آرُک یہ بوٹھ اوس سٮ۪ٹھاہ کالہٕ پٮ۪ٹھٕ انسانہٕ سُند مسکن تہٕ مالیُن بنیومُت۔

آتش صٲبس چھُ یہ ڈٮ۪کہٕ بجر زِ علمدارِ کشمیر حضرت شیخ نورالدینؒ ولی سٕندِس کلامس سٍتۍ چھے تِمن واریاہ لے۔ اَمہ کتھِ ہٕنزشہادت چھُ " شیخ العالمؒ سٕندِس کلامس منز کٔشیرِ "ناوُک تِہُند مقالہٕ[3]۔

زیرِنظر کتابہ ہُند دسلٲبۍ مضمون چھُ یٔہے میٖٹھ کتھ بییہ ہن میٹھہٕ راوان تہٕ زیٹھہٕ راوان۔ بہٕ گوس یہ وُچھِتھ سٮ۪ٹھاہ بشاش زِ آتش صٲب ہوۍ صاحبِ نظر تہٕ صاحبِ دِل ادیبن تہ چھُ علمدارِ کشمیرؒ  پنہٕ نِس درست نظریٲتی تہٕ عمرٲنی پوت منظرس منز پرٮ۪زنوومُت تہٕ پریزلوومُت ، یعنی حضرت علمدارؒ ٲسۍ اسلامہٕ کہ شرعی روپکۍ علمدارؒ تہٕ بارستہٕ پرہیز گار تہٕ توٲریخن یُس خطِ ارشاد تِمن حضرت میر محمد ہمدانیؒ سٕندِ بابرکت اَتھٕ سپُرد کورمُت چھُ، تِہُند کردار تہٕ کلام دۅشوَے چھِ تمِچ شہادت پیش کران۔ توے تِمن ویدانت یا بییہ کُنہ رلہٕ مِلہٕ عقیدٕکۍ جندٕ لاگٕنۍ چھُ تہندِس نورٲنی وجودس دولہٕ نظرو وُچھنس برابر۔
د
ویم کتَھ زِ لل ماجہ متعلق آتش صٲبنس خیالس سٍتۍ چھُ مے اتفاق تہٕ عبدالوہاب شایق سٕندِس دٲیرٲوِمٕتس سٍتۍ اختلاف۔ یہ چھے اکھ سیز پٔز کتھ زِ ییلہ زاشُر نورالدین اوسنہٕ ماجہ ہٕنز دۅدٕ بب رٹان۔ تمہ وِزِ آیہ لل دٮ۪د کٔشیرِ ہٕندِ ارِدرِ گیان تہٕ عرفانُک مۅمہٕ دام ہٮ۪تھ یُس أمۍ ازلہٕ مقبولن یکدم قبول کور ۔ لل دٮ۪دِ یُس خۅش یِوُن گرینز معصوم شُرِس کوٚر تَتھ منز کوتاہ ٹاٹھ نیار ، ماجنیار تہٕ راستی چھے بریژھٕ بریژھٕ کران۔

"چےٚ مالہ چےٚ ، زٮ۪نہٕ مندچھوکھ نہٕ تہٕ چیٚنہٕ چھُکھ مندچھان!"

بییہ چھے یہ ہم عصر لُکہٕ باوتھ تہ اصل  کٲشرِ زبٲنۍ منزٕے۔ ژورِ ہتہ وُہرۍ امے واقعہٕ ہُک یُس بیان عبدالوہاب شایق " شاہ نامۂ کشمیر " لیکھِتھ کران چھُ ، سُہ چھُ دۅیو وجہو کِنۍ تھُرمُت باسان۔ اول چھُ اتھ وۅپر زبٲنۍ ہُندجامہٕ ؤلِتھ۔ د ویم زِ اَتھ منزچھُ سیود سادٕ تہٕ دۅہدشُرک ہیوٗ پزر بلاوجہ بالافطری بناونہٕ آمُت۔ یعنی لل ماجہ تراوِ شُرۍ سٕندِس دہانس منز  زٕ اونگجہ تہٕ تِموٕے منز دراو دۅد۔ نتہٕ چھا سانٮ۪ن بُزرگن ،یِم بہرحال گۅڈٕ  آدم رنگہٕ تہٕ آدم انہارے ٲسۍ، بالا فطری کتھن ہٕنز کم قلایہ گنڈنہٕ آمٕژ۔ زِ أکِس پٔزِس تہٕ سیدِس معاملس لاگو أسۍ خواہ مخواہٕکۍ انزٲلۍ تہٕ دۅن تہذیبی ملرن ہٕندِس نالہٕ مٔتِس گنڈو زورٕ سوٚتھۍ۔ ہرگاہ شایق احتیاطہٕ کنۍ پِستان نہ ہاونُک التزام چھُ کران مگر تس کیازِ چھُنہٕ ژٮ۪تس پٮ۪وان زِ لل موج چھے پانے اعلان کران زِ پننہ مقدس مژرٕکۍ دٔلۍ ترٲوِتھ درایہ سۅننگے نژنہ یوتام نہٕ تس شاہ ہمدانس ؒ ہیوٗ مردِ کٲمل بُتھِ پیوو تہٕ اَدٕ درایہ کاندٕرۍ سٕندِ توندرٕ منزٕ پۅشاک لٲگِتھ۔

آتش صٲبن چھے یَتھ کتابہ منز واریاہن تِمن نیاین دوٗر بین لٲجمٕژ یِم کٔشیرِ ہٕندِس مالا مال تٲریخس منزوُنہ اصل  آگہی ہٕنز صداقت چھِ ژھاران۔ گۅڈٕ چھُ علم توٲریخ آدنہٕ پٮ۪ٹھے پزرک درپن بننہٕ بجایہ ذٲتی تۯاین گۯاین ہُند ٲنہٕ بناونہٕ آمُت تہٕ لیکھن وول چھُ قلم طبقٲتی تہٕ ذٲتی تعصباتن ہٕندِس مِلہ ہوکس منز وزنٲوِتھ لیکھان۔ یہ نظر بندی ختم کرنٕچ ضرورتھ چھے امہ باپتھ زِ اصل  پزر ، ہرگاہے توٲریخس منز اَمہ ناوٕچ کانہہ نۅدرتھ آسان تہ چھے[4]، تہٕ توٲریخ گژھِ نہ چھۅر چھۅر کران روزُن۔ آتش صٲب چھُ پنُن قلم زَن شوٗژ لیدرٕ وانہ سٍتۍ چھٔلِتھ لیکھان تہٕ توے چھے تمٔۍ سٕنز اکثر رایہ اعتبارس نکھٕ نکھٕ آسان۔ نُندٕؒ  ریوش تہٕ بڈشاہ سٕندِس نظریٲتی ٹکراوس چھُ تمٔۍ نٔو تُلٲنی کٔرِتھ اکھ نوو نظرِ کون عطا کورمُت ۔ آتش صٲبن چھُ زٲنہٕ شاہ صٲبنہ لداخ جلاوطنی ہٕنز پُشنے کٔرِتھ اَتھ بییہ ہن درٮ۪ر کورمُت ۔ اَتھ واد کرن وٲلۍ چھ سوال کران زِ تیلہ کیازِ کرہے پانہٕ بڈشاہ علمدارِؒ  کشمیر سٕندِس جنازس منز شمولیت ۔ اتھ چھُ جواب زِعلمدارسؒ ٲس ییژ عوٲمی مقبولیت تہٕ یژھ پژھ زِ بڈشاہس آسہ پننہ سیاست گٔری کنس تل و ونمُت زِ یِتھِس اہم موقس پٮ۪ٹھ الگ روزنہٕ سٍتۍ اَنہ ِ سُہ پننہ بڈشٲہی کوس۔ مقابلہٕ کرنُک چھُنہٕ منشا مگر أکِس ہمکال توٲریخی واقعہٕ ہس کُن اشارٕکرنہٕ سٍتۍ ماگژھِ کتھِ ہٕنز کۅتھ واضح ۔ پرانہ سرحدی صوبُک خان عبدالغفار خان روٗد وُمبرِ وُمبران پاکستٲنی سلطنتس سٍتۍ پنجہ آزمائی کران تہٕ شُراہ سداہ ؤری گُذرٲوِن تِہندٮ۪ن جیل خانن منز۔ خاص طور اوس سُہ پٲکستانہٕ کِس فوجی حکمران جنرل ضیاالحقس دۅن أچھن کھران۔ مگر ییلہ سُہ تسٕندِسٕے راجس منز رحمتِ حق گوو، ہندوستانہٕ پٮ۪ٹھٕ گوو وزیرِ اعظم راجیو گاندھی پوشہ ہلم ہٮ۪تھ تہٕ پشاورس منز اوس جنرل ضیاالحق گۅڈنچہ صفہ منز جنازس منز شٲمِل۔

کِتابہ منز چھُ آتش صٲبن سونتۍ پنڈتٕنِس کٲشُر۔ فارسی نصابس متعلق اہم مضمون لیوٗکھمُت ، اَمِچ توٲریخی تہٕ تحقیقی اہمیت چھے ٲسۍ تھٕے مگر یُتھ نٲدِر چیز ژھٲرِتھ گٲرِتھ لبُن تہٕ ہمیشہ باپتھ محفوٗظ کرُن چھُ بجایہ خۅد واریاہ اہم ۔ کٲشرۍ پٲٹھۍ فارسی لفظہٕ بدلی ہُندیہ موازنہٕ چھُ واریاہ کتھٕ ننٔۍ راوان۔ یہ چھے بیاکھ کتھ زِ سوٗنتۍ پنڈتس چھِ قدمس قدمس پٮ۪ٹھ کھوندۍ لگان۔ مثالے سُہ چھُ ونان زِ عقرب گوو گُنس﴿کٲشُر﴾،مگر سارِنٕے چُھ پے زِعقرب گوو بِچ﴿Scropion ۔ سُہ چھُ ونان زِ کریم گوو سنگ پُشت مگر فارسی وٲلۍ چھِ سنگ پُشت کٔچھوس ونان۔ کٔچھوٕ چُھنہٕ کٔشیرِ منز آسانٕے مگرکریم یعنی مگر مچھ اوس کٲشرٮ۪ن سرن تلاون منزکھونکھُن مُژراوان۔ وۅنۍ چھُ واریاہن بیین زُوذٲژن ہٕندۍ پٲٹھۍ نابوٗد گومُت۔ سرن نہٕ وۅنۍ پنُن سترِ عورت کرنہٕ خٲطرٕ آب، کریم یا کریل کتہ روزِہے ؟ یِتھے کٔنۍ سوٗنتۍ پنڈتُن ٹنگس امروٗد تہٕ ٹانچن امرودَک وَنُن گوو شِلوتس گِلہ وِتھ واٹُن ۔ مٲنشہ کرٲڑِ "نانِ شیر" وَنُن چھُ دِلچسپ مگر یہ ترِنہٕ کٲشُر نہ زانن والٮ۪ن فِکرے ۔ سونتۍ پنڈت چھُ "ییزار" یعنی" شلوارس"" زنگہٕ بستوٗر"لیکھان۔ اَمہ سٍتۍ چھُ فِکر تران زِ کُنوُہمہ صٔدی تام تہ ٲس نہٕ کٲشرٮ۪ن بٹن اَمِچ خبرٕے تہٕ کٲشرٮ۪ن لوگ ییزار مسلمانوے ۔ سوٗنتۍ پنڈت چھُ غلط ونان زِ سٲد گوو دولت مند۔سٲد چھِ سیدِس[5] ونان تہٕ تِم ما آسہٕ ہن پننہ خاندٲنی وجاہتہٕ کِنۍ تمٔۍ سٕندِ وقتہٕ ہارٕ دیارٕ وٲلۍ۔ اتھ پٮ۪ٹھ چھُ واریاہ لیکھُن ممکن مگروُنکٮ۪س چھُنہٕ وار۔

اکھ کتَھ چھم قلمہٕ پیتِس پٮ۪ٹھ چھۅرٕ چھۅرٕ کران۔ دِل چھُم یژھان لیکھِتھ تھاوٕہن تکیازِ یژھ کتھ وٮ۪پہ تہ آتش صٲب ہوِس کٲشرِس زباندان سٕندِس دامانس منزٕے۔ کٲشرۍ چھِ زنانن ہٕندِس مقٲمی رقصس غلط العام بنٲوِتھ "ر وہ" ونان، ییلہ آتش صٲبٕنۍ مۅہر تہ اتھ پییہ یہ ما گژھِ برونہہ کُن سَند بٔنِتھ۔ دراصل چھُ یہ"رۆ ب"[6]  ﴾کرُن۔ ر ۆب گوو سُہ ڈُلووم دٲیرٕ یُس کٲنسہ کٲنسہ خوبصوٗرت کورِ وُٹھ کُملاونہٕ وِزِ دۅن رخسارن نِش پھۅلان چھُ۔ یہ چھُ کینژنٕے خوب روین قدرتُک زیور تورے سٍتۍ آسان ، یۅہے آوٕلٕنۍ چالہ ہیوٗ ﴿کٔشیرِ ہٕندِس توٲریخس منزتہ آسن خبر کٍتٮ۪ن بادشاہن ہٕندۍ تخت و تاج یِتھٕ نٕے آولٕنٮ۪ن منزوُکراونہٕ آمٕتۍ۔ خبر گۅڈنِکہ سٕے ملاقاتس منز ماو ۆل یوسُف شاہ تہ حبہ خوتونہ ہٕندۍ اَمی آولٕنۍ!  انگریزۍ پٲٹھۍ چھِ اَتھ﴿Dimple ونان تہٕ ڈمپل چھُ کورٮ۪ن ہُند اکھ دِلکش ناو تہ مثلن فلم بوبی ہٕنز ڈمپل کپاڈیہ ، تس چھنہٕ پانس یہ عطٲیی مگر شرمیلا ٹیگور تہٕ أزچہ پریتی زنٹا یہ سٕندٮ۪ن روین پٮ۪ٹھ چھُ یہ از تہ وُچھن والٮ۪ن آولُن أنِتھ گتہٕ گیوٗر کرناوان۔ اَسہ  کٲشرٮ۪و چھُ یہ پننہ بتہٕ ترامہ تہ سجوومُت ، بتہٕ رۆب ، تیُتھُے گول تہٕ سڈول ۔حٲرٲنی چھے اُردو تہٕ ہندی ہشو زبانو چھُ اَتھ "گڈھے" ہیوٗ پھُہُر تہٕ پھیشُل ناو دیُتمُت ، تِمن ما اوس کانہہ آنند وردھن سمکھیوومُت۔

صاحب ِ "باغِ سلیمان" میر سعد اللہ سعادت شاہ آبادی سُند نٲدِر نعتِ شریف چھُنہٕ صِرف زیر نظر کتابہ ہٕنزے یٲژ شوٗب بلکہ  کٲشرٮ۪ن ہٕندِ باپتھ حُبِ رسول تہٕ عقیدتُک پوشہ گوند، اَمکۍ ژور مٲرۍ مٔندۍ کٲشِرۍ شعر چھِ کٲشرِ زبٲنۍ توش تہٕ بوش عطا کران ، یُتھ مۅلُل نعت دریافت کٔرِتھ محفوٗظ کرُن چُھ خاص تحقیقی اہمیت تھاوان[7]۔  آتش صٲبن چھُ جدید اکھتُے ہم کال دورٕ کٮ۪ن کینژَن ادیبن تہٕ شٲعرن مثلن مہجور، عبدالاحد آزاد، لسہٕ خانِ فدا، مرزا عٲرف ، امین کامل ، مرغوب بانہالی سٕنزِ شٲعری تہٕ کُلہُم کنٹِر بیوٗشنَس متعلق مضمونن منزکُنہ تعارُفی تہٕ کُنہ تنقیدی راین ہُند اظہار کورمُت۔ عبدالاحد آزادس متعلق مضمون چھُ پزی آتش صٲبُن تحقیقی ذوق وشوق تہٕ بل بِتُر پیش کران۔ فٲضِل مضمون نگارن چھُ ہر لحاظہٕ کٲشرِس ادبس دامنس لاد مُژرٲوِتھ واش کوڈمُت۔ کٲشرِ بدیہہ گوئی پٮ۪ٹھ تمٔۍ سُند مضمون چھُ از تام کُن تہٕ کیول تہٕ واریاہ دِل رنز ناون وول۔ کٲشرٮ۪ن معراج نامن پٮ۪ٹھ تسُند مقالہٕ چھُ نہٕ تِہندُے یوت علمی عبور  ہاوان بلکہ  اَتھ خاص شعرٕ ذٲژ منزکٲشرِ زبٲنۍ ہٕنز خۅش نظری تہٕ خۅش فکری ظٲہرکران۔ییتۍ باون ہار تہٕ رنگہٕ ؤلۍمعراج نامہٕ اَسہ کٲشرِس منزچھِ تہ وُچھِتھ ییہ اُردو ہشن بجن زبانن تہ رشک ۔ سانٮ۪ن ہمسایہ بولٮ۪ن ہٕنزچھنہٕ کتھٕے ۔ آتش صٲبُن یہ مضمون تہ چھُ سٲدر وار تہٕ سکل انہار۔آتش صٲبُن کٲشرِ زبٲنۍ منز مثنوی صِنفہ ہٕندِس ابتداہس، ارتقاہس ، سماجی تہٕ ادبی ضرورتس تہٕ توٲریخی اہمیتس متعلق مضمون چھُ سٮ۪ٹھاہ پُرمتن تہٕ مُدلل ، اکھتُے چھکھ کینژَن مثنوین تنقیدی سام تہ ہیژمٕژ۔ أکِس صاحبِ نظر تنقید نگار سٕندۍ پٲٹھۍ چھکھ لکھمن کول سٕنزِ مثنوۍیہ بجا طور تھُر کھٲجمٕژ تہٕ امیر شاہ نِس سامنامس مقابلہٕ وہاب حاجنی سُند شاہ نامہٕ کم پایہ مونمُت۔

آتش صٲبُن نثٕر چھُ ییمہ کتابہ ہٕندِس رنگہٕ بُشکابس منزپننہ تحقیقی نظرِ ہُند زبر بِتُر ہاوان تہٕ زوتہٕ ناوان۔ تسٕندِس أکِس مشتاق قٲری سٕندۍ پٲٹھۍ روزٕ بہ منگان زِ تسٕندِس وجودس سٍتۍ سٍتۍ روٗزِن تسٕندِ قلمٕچ روٲنی تہٕ جوٲنی وارٕ کارٕ تہٕ سُہ روٗزِن مےٚ ہوِٮ۪ن تریشہ ہتٮ۪ن کِتۍ زانکٲری ہٕندۍ مَس کھٲسۍ یتھے کٔنۍ ارزان تھاوان، مہجور نہ کتھِ:  

آفتابٕکۍ پٲٹھۍ پرٮ۪زلِن دم بدم پیمانہ چون
ییمہ
پیش کلامُک قیل و قال گوو ژ ورُے پہن زیوٗٹھ تہٕ شاید بے سوم مگر ییلہ عٲلمن تہٕ فٲضلن ہٕندس دربارس منز تہندٮ۪ن انکشافن ہٕنزِ آتش بازِ موجود آسن۔ یِمن گندکھ تُج لاگنہٕ وِزِ چھِ واریہن رنگن ہٕنزٕ زُتنہ وَہراتھ لگہٕ ؤنی:
ژےٚ
چھی گیسوٗ پریشان مے گٔے شہمار نٲلی

راولپورہ ۔سرینگر محمدیوسف ٹینگ / 7جُلے 2011   ٕ

حضرت شیخ العالمؒ

کٲشرِ تمدنُک بالہٕ ہزٲرۍ

کٲشرِ کلچرٕچ دۯمن راٹھ تہ کٍژاہ ورل تہٕ وُٹھنٮ۪ل واہراوَل مگر سدا بہار چھٚے زِ اکہ اندٕ چھٚے ژمان تہٕ ژٔمِتھ ہۅکھان تہٕ بییہ اندٕ چھٚے نوو زایُن پۯاوان، أمۍ کلچرن وُچھ توٲریخٕکۍ قدیم ترین دور، أمۍ چییہ ویدانتٕکٮ۪و آگرو تۯیش ، أمۍ پۯوو بودھ متکٮ۪و ناگو سگ ،اَمی کلچرچہ لنجہ پھوٹ شِومت ہیوٗ گب، یمٔۍ ییتہ جہار پروو ، کلہُم پٲٹھۍ لٔج فلسفن تگ، ریژن ریوایژن کھٔتۍ تہن پٮ۪ٹھ تَہہ، کٍتۍ آرکیٹایپ گٔے سینہٕ بہ سینہٕ اکہ پُیہ پٮ۪ٹھ بییس پُیہ تان واتان ۔ ٲخرس پٮ۪ٹھ آو ا ِسلام ،اَمہ دینِ مُبین خٲطرٕ ٲس ؤرۍیہ وادو پٮ۪ٹھٕ کٔشیرِ ہٕنز وۅپزن ہار میٔژ بٲجراونہٕ یِنٕچ عمل جٲری ،رسہٕ رَسہٕ اوس غٲر محسوس پٲٹھۍ واپھ تہٕ ویلہ سمان، اَتھ بامے فرقہٕ بندی تہٕ تھزِ تہٕ ؤسۍ پایہ ذٲژن درمیان بٮ۪ن آسنٕکۍ دۅکن وٲلۍ پھٮ۪ل تہٕ پھیلن دٮ۪ل تُلن وٲلۍ تہٕ مُفلسن نٮ۪تھ ہٮ۪نہٕ وٲلۍ ہنگدار ذمہٕ دار ٲسۍ یا بے شُمار ریژن رواجن ہٕنزِ عمل آوری ہٕندِس بورس تل دبہٕ وٕنہٕ آمٕتۍ غریب غُربات ، نتہٕ بییہ تہ واریاہ سمٲجی ، سیٲسی تہٕ اقتصٲدی وجوہات، اماپوز یہ کتھ چھے ثٮ۪قہٕ زِ کٲشرٮ۪و کور نہٕ اِسلام کُنہ زور زبردستی سٍتۍ قبول۔

سُلطان صدرالدین سٕند 1320ءمنز کٔشیرِ ہُند تاج تہٕ تخت سامنہٕ برونہہ واراہ کال اوس یتھ مُلکس کُن اِسلامُک آو آو شروع گومُت۔ حتاکہ توٲریخن منز چھُ حمیم نٲوۍ أکِس عرب مسلمانہٕ سُند ذِکر آمُت زِ ییلہ محمد بنِ قاسم سٕندِ یلغارٕ وِزِ سندھک رازٕ د ا ہر شکس قبول کران چھُ تسُند نیچوو جیا چھُ زُو بچاونہٕ موکھٕ کٔشیرِ منز ژھیپھ دِنہ واتان تہٕ حمیم چھُ تس سٍتۍ آسان۔ دپان أمی عرب مسلمانن بسوو مٔلچہ مر محلہٕ تہٕ اَتہ کٔرٕن اکھ لۅکٕٹ مسجِد تہ تعمیر ۔ یِتھے پٲٹھۍ چھُ سُلطان محمود غزنوی تہ کٔشیرِ ہٕندٮ۪ن سرحدن تاں واتان بلکہ  چھُ مورخ حسن شاہ کھۅیہ ہٲمۍ رامو ہ ریش سٕندٮ۪ن حالاتن منزلیوکھمُت زِمحمودن کٔر کٔشیرِ اندر چھاوٕنۍ قٲیم تہٕ راموہ ریشۍ سٕندۍ کمالات بوٗزِتھ کورن تس سٍتۍ مُلاقات تہ۔ یا رازٕ ہرش دیو چھُ پنہٕ نِس فوجس منز تُرک مسلمان کمانڈرن جاے دِوان حتاکہ کلہن تہ چھُ اشارٕ دِوان زِ ہرش اوس "ترُشکا" یاں زِ "ترُک مسلمان" اماپوز پزر چھُ یہ زِ اسلام اون باضٲبطہٕ پٲٹھۍ ساداتِ کرامو کشیرِ، یِمو ساداتِ کرامو اون ایران تہٕ وسط ایشیاپٮ۪ٹھٕ تشریف ، یہندِ دٔسۍ پھٲلیوو ییتہ اِسلام اماپوز اسلامہٕ کِس تصوفی نظامس منز ٲسۍ ایرٲنی اثرات تہ شٲمل ، سادات آیہ نوو مذہب ، نوو و ولُت ، نوِ حرفٔژ ، نٔوۍ طور طریقہٕ، نٔو زبان تہٕ کلہُم پٲٹھۍ اکھ بارستہٕ تمدن ہٮ۪تھ ،یتھ تمدنس منز وسطِ ایشیاہکٮ۪ن رنگہٕ رنگہٕ تمدنن ہٕنز خۅش بوے تہ شٲمل ٲس ، روئے زمینٕکۍ تمٔۍ حِصن آسہٕ ویدانت ، بُدھ مت زرتُشتیت تہٕ نو افلاطونیت ہشہ تحریکہٕ تہ چھاوِمژٕ۔

حضراتِ سادات کرامو کور تبلیغہٕ سٍتۍ اسلامُک پٲغام سرکٲرۍ ایوانن ،سیٲسی دیوان خانن تہٕ خۅجہ گرن منز دٲخل ، تِہُند تبلیغ اوس زیادٕ پہن علمی تہٕ سیٲسی گاچہ ،ہُپٲرۍ ٲسۍ عام لوٗکھ نہ عربی زانان تہٕ نہ فارسی ، گو کہ سادات وٲتۍ  گامہ گوم، اکھ اوس تِمن مقٲمی زبان نہ زانہٕ نُک مسلہٕ ٹھوٚر پٲدٕ کران ، د وٚیم کتھ ٲس زِ ِتِم ٲسۍ نہٕ کشیرِ ہنزن ساسہٕ بٔدۍ ؤری پۯانٮ۪ن ریژن روایژن تہٕ تمدنی یٹن یلن ، قرارن تہٕ غٲیلن ہٕندۍ پزنہٕ پٲٹھۍ وٲقف کار،حتیٰ کہ اسلام چھُنہٕ ہرگز پنہٕ نٮ۪و مقررہ اصولو ڈلہٕ نٕچ آزٲدی دِوان،اَتہ چھنہٕ ژَٹھ واٹھ کرنٕچ گُنجٲیش لہٰذا اوس ضروری  زِ دٲنشور طبقس منز پییہ ہے سید صٲبن علمی بحث تہ کرُن مگر عام انسان یَس نفس پالہٕ نٕکۍ ژھۯٹھ تہٕ زُوٕنٕکۍ اَرٕ سرٕ ٲسۍ، یُس مذہبی رسمٕے یوت عادتہٕ تہٕ مجبوری موکھٕ پالان اوس ، یُس ناخواندٕ تہٕ بے عٔلم اوس ، اوس نہٕ سہل پٲٹھۍبحثہٕ تہٕ علمی بجرٕ سٍتۍ قٲیل سپدن وول ، پٮ۪ٹھٕ ییلہ نہٕ سُہ عٲلِم و فٲضِل مسلمان صوٗفۍ ین تہٕ ساداتِ کرامن ہٕنز زبان تہ سمجھان اوس، پرٮ۪تھ دورس منزچھُ پرٮ۪تھ مُلکس منز ناخواندٕ ، غریب تہٕ حٲکۍ من ہُند ظُلم ژالَن والٮ۪ن لوٗکن ہُند تعداد واریاہ زیادٕ آسان ،ہرگاہ زَن یِتھٕ وٕے لُکو ہٕندۍ بارٕ تعدادن نٔوِس مذہبس نرِ آلہٕ ناوِ اَتھ منز چھُ ساداتن ہٕندِس عٔلمَس سٍتۍ سٍتۍ سماجی حالاتن تہ زبردس عمل دخل بلکہ  کور ساداتو سیٲسی حلقن منز، بادشہن ،ا میرن وزیرن منز فوری طور اسلامُک اثر قٲیم ، یۅسہٕ پٔزۍ پٲٹھۍ اہم ترٮ۪ن کامیٲبی ٲس ، مگر عام لوٗکھ ، یِمو کُنہ تہ وجہہ کِنۍ سۅدِلہٕ اسلام قبول کور، ٲسۍ عجیب صورتِ حالٕکۍ شِکار، تِکیازِ آبٲیی دین تہٕ ریژن روایٔژن ہٕندِ شکست و ریختُک عمل وُچھِتھ ٲسۍ تِم ہے بُنگہٕ ، یہ صورتِ حال ٲس کٲشرٮ۪ن ہٕندِ خٲطرٕ بقولِ محمد یوسف ٹینگ اکھ  Cultural Shock۔یۅہے اوس وق تہٕ ویلہٕ ییلہ ماجہ کٔشیرِ پیوو حضرتِ شیخ نور الدین ریشی ہوِس وُشِنۍ بٮ۪ب، شِہج کھون تہٕ مُدٕر زٮ۪و تھاون وٲلِس ببہٕ سُند حاجتھ ۔یہ بب اوس نو مسلمن ہٕنزِ د ویمہ پیرِ ہُند تھَو، ییمۍ عرفانٕکہ آگرٕ سگ لوب ،کاڑ کوڈُن ، جُت جہار پرووُن تہٕ توٲریخکِس اَتھ اہم موڑس پٮ۪ٹھ کٲشرٮ۪ن شِہُل دِنہٕ خٲطرٕ چھج وہروو۔ حضرتِ شیخ اوس پاسہٕ مسلمان ، تمٔۍ اوس حضرتِ سید میر حسین سمنانی سٕندِس صحبتس منز روٗزِتھ کسب فیض کورمُت ، مقٲمی روایٔژن ہٕندۍ آرکِٹایپ ٲسۍ تِہندِس ذہٮ۪نس منزمگر توحید، رسالت تہٕ باقٕے اسلٲمی عقٲیدن ہٕندۍ شمع ٲسۍ تِہندِس دِل و دماغس منز سادات کرامن ہٕندِ صحبتہٕ سٍتۍ روشن سپٕدۍ مٕتۍ۔ دینِ اسلامُک نوٗر یودوَے اوت تام ووتمُت چھُ آسان یٔمہ خٲطرٕ سید السادات حضرت میر سید علی ہمدانی ؒتہٕ باقٕے ساداتو کو ششہ تیز کرِمَژٕ آسہٕ ۔اماپوز عام لوٗکن ہٕندٮ۪ن ذٮ۪ہنن تام یسلہٕ پٲٹھۍ یہ نوٗر واتناوُن اوس باقٕے۔ یہ کٲم کٔر حضرت شیخ العالمنؒ کٔشیرِ منز قدیم زمانہٕ پٮ۪ٹھٕ چلن وٲلِس ریشی سلسلس تجدید کٔرِتھ تہٕ اسلٲمی ریشُت اکھ عوٲمی تحریک بنٲوِتھ پیش کرنہٕ سٍتۍ۔ اَمہ تحریکٕکۍ مرکز آے کشٔیرِ ہٕندٮ۪ن طرفاتن منز قٲیم کرنہٕ، حضرتِ شیخ العالمنؒ واتہٕ نوو اِسلامُک پاغٲم عوامس واریاہ نکھٕ یِتھ بلکہ  تِمنٕے منزروٗزِتھ ، تِہنزے زبٲنۍ منزتِمن تام، یتھ زٮ۪وِ وٮ۪تھِ ہٕنز روٲنی تہٕ نیٲوۍ پوشہ نرمی ٲس ،تس اوس مقٲمی مزازٕ ویود، حضراتِ ساداتن تہٕ ریشن ہٕندِس تبلیغس منزٲس ٹاکارٕ فرق مگر مقصد اوس کُنُے یاں زِ دینِ مُبینُک پھٲلاو ، حض شیخن دیُت عٔلمہٕ کھۅتہٕ ژور زور عملہ پٮ۪ٹھ ،ذات پات، خشمکٲری ہاو باو، دُپن دلٲزی تہٕ شِکم پرستی کرٕن نفرت، توٲریخکِس اَتھ موڑس پٮ۪ٹھ دِیتُن پرتہٕ پان ہیوٕے زانہٕ نس پٮ۪ٹھ زور۔ کٕٹہٕ پیرن، اَپزٮ۪ن عٲلۍمن تہٕ ٹھبابہٕ درویشن پٮ۪ٹھ چلٲوِن طنزٕکۍ تیر، ہرگاہ نہٕ تسٕندِس وقتس منز اَمہ قسمٕکۍ لوٗکھ موجو ٗد آسہٕ ہن تسٕندٮ۪ن شرُکٮ۪ن منزکیازِ آسہ ہا تیلہ تِمن ہُند ذِکر سپُدمُت !ساروٕے کھۅتہٕ اہم کتھ چھے زِ تمٔۍ دیُت بٲے برادٔری تہٕ پانہٕ وٲنۍ اَتھٕ واسس پٮ۪ٹھ سخ زور ، تسُندفرمان چھُ زِ پَرٕدۍ سُند مُہمِ پانس ہیون تہٕ بوچھ کھیاوُن چاوُن چھِ بٔڈ بہودُری ، اکھ أکۍ سُند دۅکھ سۅکھ ژینُن تہٕ تَتھ منز شریکھ سپدُن، ہمسایہ سٕندۍ حقوق ادا کرٕنۍ، وۅپر زنانہ کُن نہٕ أچھ تُلنہ ، پوژھ رَنزناوُن، ماحول صاف تھاوُن ، کٲنسہ پٮ۪ٹھ نہٕ ظُلم کرُن، کٲنسہ ہُندحق نہٕ کھیون ،کم زبانن تہٕ نیکلٮ۪ن نہٕ نیتھ تُلن ، یِمن بنیٲدی انسٲنی تہٕ اخلٲقی قدرن پٮ۪ٹھ چھُ حض شیخنؒ زور دیتمُت ، یِم قدرٕ چھے قریب قریب سارِنٕے مذہبن منز مُشترک ، تہٕ یِم چھے اسلٲمی اخلاقیات چہ تہ بُنیٲدی قدرٕ، توحیدُک تصور اوس برونہٕے شِومتس منزموجود، شِومتس منز ٲس پۅتٕلۍ  پوٗزا تہ منع ، اسلامن کور کٔشیرِ وٲتِتھ رسالتُک تہٕ ٲخرتس پٮ۪ٹھ پژھ آسہٕ نُک اِضافہٕ ،حض شیخن دیُت نرمی تہٕ میچھرٕ سان عملی طور یِمن چیزن پٮ۪ٹھ زور، تہٕ بلالحاظہ مذہب، دٕے تہٕ حسد ترٲوِتھ ژٕھننس دِژکھ اہمیت ، فرمووُکھ زِ ہیوند ٲسۍ تن یا مسلمان، کانہہ مَہ دِینِ دِلس منز عداوتہٕ پُژھۍ دٕے تہٕ نفرتس جاے
أکِس مٲلِس ماجہ ہٕندین                                     یِمن دٕے ترٲوٕتھ تہٕ کیاے
مسلمانن
کیاوٕ ہٮ۪ندٮ۪ن                                            کربندن توشہ خداے

حالانکہ پۅختہٕ مسلمان آسنہٕ کِنۍ چھُ کلام شیخ اسلامُک ٲنہٕ ،کٔشیرِ منز آو اَتھ کلامَس کٲشُر قرآن وننہٕ، ییلہ سُہ ونان چھُ زِ "ہٮ۪ندٮ۪ن ہٕنزٕ کامہ ترٲوۍتو " تمہ وِزِ چھُ سُہ مسلمان مُبلغ سُند فرض پوٗرٕ کران ، اماپوز ییلہ ویژھناوان چھُ زِ پوز مسلمان کُس گوو یاں زِسُہ گژھِ حلال خور آسُن ، سُہ گژھِ نہٕ پننٮ۪ن یا وۅپرن مسلمانن یا غٲر مسلمن پٮ۪ٹھ ظُلم کرُن، یا یہ مقبول عام د وٚپ یُس تٔسۍ کُن منسوب چھُ زِ"کریہ کھۅتہٕ چھُ انصاف بوڈ" تسُند کلام چھُ پھِرۍ پھِرۍ یاد پاوان زِ مسلمانس پزِنہٕ خشم کرُن، کروٗد چھُ عبادتس ناش کراں۔
کروٗدٕے
سوٗد راوی پانس                             کروٗدٕے کرے تہٕ کارن دزے
کروٗدٕے
ژوٗر پییی خزانس                               کروٗد نو مسلمانس پزے
صٲحب
سٍتۍ ییی مہمانس                                  تِہنزِ لۅلرِ کینژھا دِزے
یہ دِکھ پرس تی چھُے پانس                             کروٗد
نو مسلمانس پزے

تبلیغہٕ کہ اَمہ نرم تہٕ شیہلہ طریقہٕ سٍتۍ یتھ منز علمی طُم طراق تہٕ بحثابحثی ہٕنز گُنجٲیشی ٲس نہٕ، لوب کٲشریو ، نو مسلموتہٕ غٲر مسلموحض شیخسؒ نِش پانہٕ نیار ،یِم غٲر مسلم وُنہ تہ غٲر یقینیتٕکۍ تہٕ کنفوجنٕکۍ confusion شِکارٲسۍ ، تِم آے حض شیخس تہٕ باقٕے ریشن نکھٕ ،ا سلام کورُکھ قبول ریشن ہٕنز نرمی، سادٕگی، انکسٲری تہٕ بٲے برادری ہٕنزِ تعلیمہ کٔرۍ تِم زبردس مُتٲثر ،یتھٕ پٲٹھۍ سندور کٲشرِٮ۪و تمہ کلچرل شاکہٕCultural Shockنِش، یُس دۅن تمدنُن ہٕندِ اکھ أکِس سٍتۍ مُتصٲدم سپدنہٕ کہ خطرٕ رنگۍ محسوس کرنہٕ آیوو تہٕ یُس تصادُم سپدنے آو نہٕ دِنہٕ۔

یودوَے زَن ساداتِ کرامن تہٕ ریشن ہٕندِس طرز تبلیغس منز فرق ٲس مگر ساداتن تہٕ ریشن درمیان اوس نہٕ کانہہ ٹکراو،14 رجب 814 ھ منزیُس خطِ ارشاد بٲنی مسلمانی حضرت میر سید علی ہمدانیؒ سٕندۍ فرزندِ ارجمند حضرت میر محمد ہمدانی ؒ صٲبن حض شیخس عطا کور ،تتھ منز چُھ حض شیخ سٕندٮ۪ن کمالاتن ہُند اعتراف کران حضرت میر محمدہمدانی ؒ تٔمِس کبروی سلسلس منز دٲخل سپدنُک اجازت دِوان،اَمہ توٲریخی دستاویز کھۅتہٕ کیا ثبوت ہیکہ ٲسِتھ ساداتن تہٕ ریشن ہٕندٮ۪ن رٔتٮ۪ن تعلقاتن متعلق ،وۅں گو علماءسو کتھ زمانس تہٕ کتھ سماجس منز چھِنہٕ آسان، تِمن ہٕنز کتھ چھے وکھرٕ ۔ یہ تہ چھِ کتھ زِکینہہ سادات چھِ حض شیخسؒ نِش روحٲنی تربیت تہ حٲصِل کران ۔مثلن حضرت بابا غلام الدین ، حضرت سید عالی بلخیؒ ۔ شمس العارفین شیخ العالم حضرت شیخ نور الدینؒ ریشی چھُ کٔشیرِ ہُند علمدار ، اَمِچ بشارت آے روایتہٕ مُطٲبق حض شیخ سٕندِس ٹٲٹھِس خلیفس حضرت بابا نصرالدینس خابس منز دِنہٕ، اَتھ علمہ تَل چھ ِ سٲری کٲشِرۍ بامے تِم مسلمان چھِ یاہیندۍ پرٮ۪تھ کٲنسہ کٲشرس چھِ حض شیخ سٕنز یژھ پژھ ،تسُند عقیدت تہٕ احترام ، اماپوز یِتھے پٲٹھۍ چھے شِومتٕچ قٲیِل تہٕ موثر ترجمان شِو یو گٕنۍ للہٕ ایشوری تہ پرٮ۪تھ کٲنسہ کٲشِرۍ سٕندۍ خٲطرٕقٲبلِ احترام ، حتاکہ کٲشرٮ۪و دیت تس بلا لحاظہ مذہب و مِلت سارِنٕے ہٕنز "دٮ۪د" ؤنِتھ زبردس احترام تہٕ عقیدت ،سٲری چھِ تس"لل دٮ۪د" ناوے زانان۔ حضرتِ شیخ العالمؒ تہٕ للہٕ دٮ۪دِ ہٕندِس تعلقس متعلق یُس سِرسوو استعارٕ بلکہ  اسطور کٔشیرِ اندر عام چھُ ، زِزٮ۪نہٕ وِزِ رٔٹ نہٕ حض شیخن سٔدرٕ ماجہ ہٕنز بب تہٕ للہٕ دٮ۪دِ اون تشریف، ترٲونس پنٕنۍ بب دہانس حالانکہ عبدالوہاب شایق چھُ لٮ۪کھان زِ للہٕ دٮ۪دِ دِژ حض شیخس اونگٕج ژٕہٕنۍ تہٕ وونہٕ نس__زٮ۪نہٕ مند چھوکھ نہٕ تہٕ چنہٕ چھُکھ مندچھان"  أتی چوو حض شیخن دۅد ، سُہ چھُ کٲشرِ قدیم تمدن چہ بٲطن پسند ترایہ ہُند ترجمان تہٕ یہ اسطوٗر چُھ نٔوِس تہٕ پرٲنِس درمیان کانُل تاران، اَتھ واقہٕ ہس چھُ عقیدتُک یوٗت د ور ڈوکھ زِ اَمہ کِس پوز آسہٕ نس یا نہ آسہٕ نس پٮ۪ٹھ ہیوک نہٕ کٲنسہ سوال تُلِتھ۔ لل دیدِ ہٕندِ فیضانُک چھُ پانہٕ حض شیخ اعتراف کران :
 تس
پدمان پورچہ للے             تمہ گلہ گلے امرٮ۪ت چو
سۅ
سٲنۍ اوتار لۅلے           تیُتھ مے ور دِتو دِو
تہٕ
عبدالوہاب شایق تہ چھُ یہ واقہٕ نظماوان یِتھٕ پٲٹھۍ :
زِپستانِ
مادر نہ نوشید شیر                                    بہ طفلی زِ شیخ آمدہ کارِ پیر
لَلہ
عارفہ درکنارش گرفت                            بہ انگشت شیرش بداد اے شگُفت
دو
انگشت بی بی دوپستان شُدہ               لبن در گلویش ازاں آمدہ

مسلمان تذکرٕ نگارو کٔر لل دٮ۪د" للَہ عارفہ" ؤنِتھ یاد تہٕ ہیندٮ۪و دیُت حضرت شیخ العالمسؒ اعتمادٕ، اعتقادٕ تہٕ احترامہٕ پُژھۍ "سہزانند" ہیوٗ معنہ سوو تہٕ منہٕ مون ناو ، سہزیا سہج چھُ خۅد بیدٲری ہُند سُہ مقام یٔتہ پان تہٕ وۅندٕ اکی رایہ ترایہ پکن، بودھ چھِ اَتھ سُہ مرتبہٕ مانان یٔتہ نِروانہٕ باپتھ وَتھ پانے ہموار سپدان چھِ، شِومتس منزچھِ یہ سَہ فطری حالتھ،یتھ منز خۅد آگہی تہٕ آتما ہم نام بنان چھِ، حض شیخن تہ چھُ یہ لفٕظ پنہٕ نٮ۪ن شروکٮ۪ن منز کٔہۍ یاہ لٹہ ورتوومُت ، آنند گواطمینانِ قلب لٔبِتھ ابدی سروٗد پراوُن ، بودھ چھِ اَتھ نِروانہٕ پتہٕ پٲدٕ سپدن واجینۍ حالتھ مانان، پروفیسر کٲشی ناتھ دَر چھُ "سہزانند" ناوس متعلق لیکھان:
 "کٲشرٮ۪و پنڈۍتو کور حضرت ِ شیخ العالمسؒ "سہزانند" ہیوٗ میوٗٹھ ناو ، آنند دِشا یا ذہنی حالتھ چھے تنترن ، بودھ دھرمس ، شومتس تہٕ ویدانتس ہشی ترایہ ٹٲٹھ تہٕ میٖٹھ ، اوے بنیوو یہ  سہزا نند ناو سانہ کلچرک قدیم زمانہٕ پٮ۪ٹھٕ از تام اکھ نمایندٕ،سانہ کلچرچہ وٮ۪تھِ گو اکہ نوِ یارٕ بلُک اضافہٕ ،اَتھ روٗمٲنی وتہ پٮ۪ٹھ کھٔژ بیاکھ میلہٕ پٔٹ ، یہ اوس اِسلامُک نافراموش دیُت أکۍ بہلہ پایہ انسانن ،أکۍ باکمال مسلمانن کور امیُک دسلابہٕ" ﴿شیرازٕ نُندٕ ریوش نمبر ص 35﴾

٭٭٭
کتاب
نامہٕ:

شمس العارفین ،شیخ العالم شش صدسالہ تقریبات کمیٹی سرینگر                      شیرازہ نُندٕ ریوش نمبر           بُرج نور، شیخ العالم شش صدسالہ تقریبات کمیٹی سرینگر              شیخ العالم ،شش صد سالہ تقریبات کمیٹی       کلیات شیخ العالم،کلچرل اکادمی۔

گوو گورَس ژاٹھا ژورو

﴿1

مطلعِ نور و مخزنِ اسرار                                                             مفخرِ ریشیانِ نیکو کار                      
زین
الدینؒ آنکہ مست عرفان بود                                  ساقی#¿ بزم مے پرستان بود
                                                                                                                      ﴿ریشی
نامہ ، ملا بہاو الدین متو﴾
شینہٕ
دستار گٔنڈۍ گٔنڈۍ تھدم تھدٮ۪ن بالن ہٕنزِ کۅچھِ منز کٔشیرِ ہُند پوشہ پتھُر ، چھُ ساسہٕ بدٮ۪و ؤرۍیو پٮ۪ٹھٕ رنگہٕ رنگہٕ مذہبن ، عقیدن تہٕ تہذیبن ہُند مانٹھال روٗدمُت ۔ أمۍ وُچھ ما قبل توٲریخٕکۍ اسطوٗری، دیومالٲیی تہٕ خرافٲتی دور تہ، یہ چھُ ستی سر تہ کشپ مر ، تہٕ باغِ سلیمان تہ۔ اَمہ کٮ۪و بسکینو تُل ویدن، سوٗترن تہٕ پوٗرانن تہ ہر تر تہٕ دپان ایرٲنۍ زرتشتیتچن روایٔژن ہُند اثر تہ روٚٹکھ۔ یہ بنیوو شاردا پیٹھ، علم تہٕ ادبُک گاشہ مُنار، أمۍ دیُت کٲشُر شِو مت۔ أمۍ چھٲوۍ سونتھ ، دۯاگ تہٕ ماگھ، أمۍ ویترٲوۍ بُنِلۍ ، نار تہٕ مار۔ أمۍ سۅمبرٲوۍ تہٕ ویپرٲوۍ مختلف قوم یکہٕ وَٹہٕ۔ توٲریخ کِس پرٮ۪تھ دورس منز کٔر اَمہ کٮ۪و بسکینو پنٕنۍ بے بدل ذہانت تہ ثٲبت تہٕ جنگی لیاقت تہ، حملہٕ آورن بیہہ ناوٮ۪کھ زسمہٕ۔ یتھ زمینہ ژکلس منز کھٔتۍ رسمن، ریژن روایژن، عقیدن ، اسطورن، بالا فطری خیالن تہن پٮ۪ٹھ تاہ۔ ٲخرس آو اسلام ، توحید ، رسالت تہٕ مساواتُک نوٗر ورشاوان۔ یہ نوٗر سوم کٲشرٮ۪و کُنہ زور زبردستی ورٲے بلکہ  کورہس یژھِ پژھِ لۅلہٕ متہٕ لاے، اسلامٕچ بُنیٲدی تعلیم یس تام وٲژ تمٔۍ کٔر سۅدِلہٕ قبول۔ کٔشیر بنییہ ریشۍ وٲر تہٕ ساداتن ہٕنز قرار گاہ ۔

﴿2        ریشُت چھُ کٔشیرِ منز تیوٗتُے پرون یوٗت کشٔیر تہٕ کٔشیرِ ہُند توٲریخ چھُ۔ پانہٕ کشپس سٍتۍ چھُ ریوش پوت لوگ موجود۔ ہندو دورس منز تہ ٲسۍ ریش تہٕ بودھ دورس منز تہ۔ اسلٲمی ریشتٕکۍ سالار حضرت علمدار کشمیر شیخ العالمؒ نور الدین ریشی، یِمو ژۅدٲہمہ صدی عیسوی منز اسلٲمی ریشتِچ اکھ منظم تحریک بارسس أنۍ، تہ چھِ اَمہ صدی برونہہ گُذریمتٮ۪ن کینژن کٲشِرٮ۪ن مسلمان ریشن ہُندذِکر کران،ریش ٲسۍ اسلامہٕ چن بُنیٲدی تعلیماتن پٮ۪ٹھ عمل کران۔ ذٲتی عملہ سٍتۍ اسلام تہٕ انسان دوستی ہٕنزتعلیم دِوان، اللہ تعالیٰ سٕندِس عبادتس منزمحو روٗزِتھ دٕے ، حسد ، ژکھ ، لالٕچ تہٕ دُنیاہٕچ مالے زالان، نفٕس وش کران، پانہٕ کماوان، کم تہٕ سادٕ غذا کھیون ، زیادٕ وقتس زورٕ دار روزان، سادٕ پلو لاگان، اکثر خاندرٕ ورٲے روزان، پریتھ کٲنسہ سٍتۍ ہوُے رُت سلوٗک کران تہٕ کٲنسہ نہٕ کُنہ قٕسمُک آزار واتناوان، میوٕکُلۍ رُوان تہٕ گوشہ نشینی اختیار کران۔ ریشو چھُ کٲشرِ تہذیبُک پرٮ۪تھ کانہہ انہار پولمُت، حتاکہ تہندۍ ناو تام چھِ خٲلِص کٲشرۍ مثالے نو روز ریوش ، سٕہہ ریوش ، لالہٕ ریوش ، رۅپہٕ ریوش وغٲرٕ۔
"مورخو چھُ لیوٗکھمُت زِ ترے ہتھ شیٹھو ریشو ٲس حضرت شیخ العالم نور الدین ریشی ؒ یس نِش تربیت پرٲومٕژ ، ریش تحریک ٲس سٲرۍسٕے کشٔیرِ منز رٲیج ، چنانچہ اکثر جاین ٲسۍ ریشن ہٕندۍ باقٲعدٕ تربیت گاہ، یِمن مقام ونان ٲسۍ، وترٕ ہٮ۪ل مقام ، عش مقام ، قویل مقام، جنجلٔنۍ مقام، شاٹھ مقام۔ یِمن مقامن پٮ۪ٹھ ٲسۍ تِم نفس وَش کرنٕکۍ طریقہٕ آزماوان تہٕ اَتھ سٍتۍ سٍتۍ قیل و قالہٕ بجاے پاکیزٕ کردار ، تحمُل ، صبٕر، برداش، برادری تہٕ خدمت خلقٕچ تعلیم دِوان۔ ریشن ہُند یہ طور طریقہٕ چھُ وادی منز اسلام برونٹھ پکہٕ نَس واریاہس حدس تام ذمہٕ دار تکیازِ یہُند طریقہٕ اوس مقبول۔ اتھ طریقس منز اوس مختلف تہذیبن ہُند عطر گرایہ ماران۔ یہ چھے حضرت شیخ نورالدین ریشی ؒ سٕنز تعلیم زِ کٲشُر چھُ پرٮ۪تھ حالس منز خندٕ جبین تہٕ پُرسوز۔ ریشن ہٕنزِ اَمہ تعلیمہ رٔٹ پتہٕ ہنا برۅنہہ وٲتِتھ بدل تراے ، یۅسہٕ صوٗفی شٲعرن ہٕندِس اظہار س منز نیشنیایہ۔ یانے ریشو پٮ۪ٹھٕ صوٗفی شٲعرن تام چھُ پرٮ۪تھ کانہہ بُنیٲدی عقیدٕ لحاظہٕ مسلمان، مگر قدیم کٲشرِ تہذیبٕچ ستہٕ سٲسۍ سۅنزل چھے اَتھ بُنیادی روٗحس تِتھے کٔنۍ کٲشُر وردن لاگان یِتھٕ کٔنۍ اسلٲمی تہذیبُک شمع بیین جاین وٲتِتھ مقٲمی تہذیبی رنگن ہٕندِس فونوٗسس منززُوتان روٗد"[8]۔

﴿3        یِمن خۅش نصیبن حضرت شیخ نور الدین ؒ ریشی سٕنز تربیت نصیب سپٕز تہٕ یِمو ہٮ۪تھے اسلامٕچ تہٕ انسٲنیتٕچ خدمت کٔر، یِمو زندگی عباداتن تہٕ مجاہداتن منز گُذٲرِتھ روٗحٲنی کمالات حٲصِل کٔرۍتہٕ یِمن رُب الجلیل مہربان سپُد، تِموٕے منز چھِ حضرت بابا زین الدین ریشی ؒتہ، یِم حض شیخ نورالدین ریشی ؒسٕندۍ د ویم خلیفہٕ ٲسۍ۔ یِم سخی زین الدین تہٕ زٲنہٕ شاہ ناوَو تہ مشہورو معروف چھِ۔
توٲریخ
کٮ۪ن طٲلب علمن چھُ معلوم زِ سٲرۍسٕے ہندوستانس منزچھے کٔشیرٕے سۅ جاے ییتہ کلہن پنڈۍتن راج ترنگنی ﴿سن تالیف 49-1248ئ﴾ لیکھِتھ توٲریخ نٔویسی ہُند باضٲبۍطہٕ پٲٹھۍ دس تُل بلکہ  اَمہ باپتھ اکھ قٲبلِ بَور بُنیاد فراہم کٔر۔ یہ سلسلہٕ روٗد چلہٕ وُن مگر بد قسمتی کنۍ آے نہٕ سانٮ۪ن ریشن ، اَمہ باوجود تہ زِ تِمن اوس قبول عام حاصل  تہٕ ریش تحریک ٲس کٲشرِ تمدن سٲزی منز زبردس رول ادا کران، ہم عصر مورخو دٔسۍ تہ توٲریخن منز جاے دِنہٕ۔ بڈشاہ سٕندۍ دربٲرۍ مورخ زونراجن چھُنہٕ پننِس ہم عصر حضرت شیخ نورالدینؒ ریشی سُند ناو تہ پنہٕ نِس توٲریخ "زونہٕ راج ترنگنی"منز درٕج کورمُت۔ سید علی ﴿تٲریخ کشمیر ،سن تالیف :957 ھ﴾، حضرت بابا داد خاکی ﴿سِن وصال: 994 ھ﴾ تہٕ بہارستان شاہی ﴿سن تالیف : 1023ھ﴾ ہُند مولف چھِ حض شیخ سُند سرسری ذِکرکران۔ اوے چھُ سالار ریشیت حضرت شیخ نورالدین ؒ ریشی سُند تفصیلی تذکرٕ تِہندِ یٔمہ عالمہٕ گژھنہٕ پتہٕ زٕ ہتھ ؤری کھۅتہٕ زیادٕ زمانہٕ گٔژِھتھ، حضرت بابا نصیب الدین غازی نور نامس﴿سن تالیف: 1023ھ﴾ تہٕ حضرت بابا داد مشکواتی اسرار لابرارس ﴿سِن تالیف: 1036ھ﴾ منز کران۔

اماپوز عام لوٗکھ چھِنہٕ اَتھ معاملس منزمورخن آویزٕ روزان۔ تِم چھِ ژینۍ مٕتۍ، بوٗزمٕتۍ، وُچھمٕتۍ تہٕ سٔرۍمٕتۍ واقعات پننہ پننہ آیہ اکہ پُیہ پٮ۪ٹھٕ بییس پُیہ تام سینہٕ بہٕ سینہٕ واتناوان روزان۔ یِتھٕ پٲٹھۍ چھِ اہم توٲریخی واقعات تہ لُکہٕ و وترکۍ حِصہٕ بنان۔ یُس واقعہٕ لُکہٕ و وتریُک حصہٕ بنان چھُ، تتھ چھے ژٹھ واٹھ سپدان روزان تہٕ وق گُذرنس سٍتۍ سٍتۍ چھُ اسطوٗری، دیومالٲیی تہٕ بالا فطری رنگ تہ رٹان تہٕ غلوہُک شِکار تہ سپدان۔ یی چھُ سانٮ۪ن ریشن ہٕندٮ۪ن اکثر حالاتن سٍتۍ تہ سپُدمُت۔ حالانکہ أہنزن زِندگین تہٕ کارنامن ہٕندۍ اصل  واقعات چھِ فوک لورٕکِس وشال سٔدرس سٍتۍ رَل گٔمٕتۍ تہٕ تِم چھِنہٕ دون دِتھ تہ بدس یوان، اوے چھے بوز بوزایہ پٲٹھۍ زیادٕ کھۅتہٕ زیادٕ کرا مٲژٕے یوت برۅنہہ پچمٕژ تہٕ کرامٲژن ہٕندۍ یِم انبار چھِ بعض اوقات ریشن ہٕندِس زاد و بوٗمس ، پریتھٕ نس پوٹھٕ نس ، جسمٲنی تہٕ روٗحٲنی کاڈ کڈنس ، سمٲجی کارنامن تہٕ موٗلہٕ مذہبی عقیدن ٹھرِ یوان۔ حتاکہ کرامٲژن کس چھُ نکار مگر کرا مٲژ کرن وٲلۍ سٕنزِ سمٲجی، مذہبی تہٕ روحٲنی زندگی ہٕندۍ ارتقٲیی پڑاو چھِ یِمو سٍتۍ کم توجہ طلب بٔنِتھ وارٕوارٕ رٲوِس تل گژھان۔وۅں گو لُکہٕ ووترِس زٲلۍ دِتھ ہٮ۪کن کینہہ صحی واقعات ضروٗر بدس یِتھ مگر اَمہ باپتھ گژھن دید ٕ ور محقق آسٕنۍ، یِمن ژُکھ ، عٔلم، فن تہٕ ژٮ۪ڈ آسہ۔ زانُن گژھِ زِ یوٗت یوٗت کانہہ واقعہٕ پرانان گژھِ تیوٗت چھُ تَتھ عقیدت ، عقیدٕ ، تہٕ لُکہٕ پژھِ ہُند د ور ڈ وکھ تہٕ پوکھ پاتھان۔

﴿4        حضرت زین الدین ریشی سُند زٮ۪نہٕ ؤری چُھنہٕ کُنہ جایہ درٕج، اماپوزتمام مورخو، تذکرٕ نگارو تہٕ ریش نامہٕ تالیف کرن والٮ۪و ، یِمن منز واریاہ تھدٮ۪ن روحٲنی مرتبن پٮ۪ٹھ تہ ٲسۍ، یُس واقہٕ ، حضرت زین الدین ریشی سٕندِس کٔشیرِ واتنس متعلق بوومُت چھُ تہٕ یتھ پٮ۪ٹھ لُکہٕ پژھِ ہٕنز مُہر تہ ثبت چھے،أزکۍ محقق تہٕ مقالہٕ نگار تہ چھِ تٔتھۍ پٮ۪ٹھ اکتفا کران آمٕتۍ ۔ واقہٕ چھ یہ زِ تِہُند تعلق چھُ کشتواڑٕ کس بندار کوٹ ،﴿باندر کوٹ یا بھنڈار کوٹ﴾علاقس سٍتۍ۔اہُند مول اوس جش سنگھ، بُڈۍ بب جیشوش سنگھ۔ پانس اوسُکھ ناو زیا سنگھ۔کینژَن تذکرٕ نگارن ہُند وَنُن چھُ اۅہُند مول جش سنگھ اوس بوڈ بارٕ زمیندار[9]۔ مگر عام اتفاق چھُ یتھ کتھِ پٮ۪ٹھ زِ جش سِنگھ اوس رازٕ ، حالانکہ"زٲنہٕ نامُک" مولف بابا مصطفی عش مقامی ، ییمِس زٲنہٕ نامہٕ تٲلیف کرنہٕ وِزِ واریاہ پرٲنۍ تہٕ معتبر توٲریخ زیرِنظر روٗدمٕتۍ چھِ، تہ چھُ ونان زِ حضرت زین الدین ریشی ؒاوس باندار کوٹہٕ زامُت تہٕ مول اوسُس رازٕ۔ اماپوز پروفیسر اسد اللہ وانی تہٕ جانکی ناتھ گنہار چھِ ونان زِ تِہُند آبٲی گام اوس ملچاڈ ، یُس بندار کوٹ علاقہٕ کُے اکھ مُلحقہٕ گام چھُ[10]،

رازٕ جش سنگھ سپُد خاندٲنی مُژکری تہٕ اقتدارچہ رسہٕ کٔشی دوران دُشمن سٕندۍ دٔسۍ مارٕ تہٕ زیاسنگھِس پیوو یہ دٔپۍ زِ تہ ٹھوٗلہٕ منز واو۔ تسٕنزِ ماجہ اوس وُنہ اتھ چھۅکس انگ یِنے زِ موصُم زیاسنگھ پیوو بیمار۔ دوا سپٕدۍ نہٕ تس کار گر۔ أتھۍ دوران وُچھ زیا سنگھنہ ماجہ خابس منز ﴿ کینژَن تذکرٕ نگارن ہٕندۍ کِنۍ بیدٲری ہٕندۍسٕے حالتس منز مثالے پیر حسن شاہ کھۅیہٲمۍ سٕندِ وننہٕ﴾ اکھ نوٗرٲنی شخصا ، تِمو و ونس ییمِس بچہ سٕندِ باپتھ منگہٕ بہٕ خدایس شفاعت مگر بٔلِتھ پییی یہ مے نِش کٔشیرِ واتناوُن۔ ماجہ کور وعدٕ تہٕ زیا سنگھ بلیوو مگر سُہ کٔشیرِ نِنس دیتُن کنہٕ ڈول ۔ بچہ پیوو بییہ بیمار۔ تہنزِماجہ آو نوٗرانی شخص بییہ خٲبۍ تہٕ د وپنس ژے کٔرٕتھ وعدٕ خلٲفی ۔ زیاسنگھ بلیوو تہٕ ماجہ واتنوو بُمہٕ زُو، حضرت بابا بام الدین ؒ سٕندِس تربیت گاہس منز حضرت شیخ نورالدین ریشی صٲبن ا ون بُمہٕ زُو تشریف ، زیا سنگھس تھووُکھ زین الدین ناو تہٕ کورُکھ بابا بام الدینس حوالہٕ۔ کیوٗنژ کالا حضرت بام الدین صٲبس نِش روزِتھ نیہ زین الدین صٲب علمدار ؒ صٲبن پانس سٍتۍ۔ أکِس مُدتس روٗدۍ تِم علمدار صٲبس دَس بستہٕ۔

عبادتس ، ریاضتس ،خدمتس ، مشٲہدس تہٕ نفس کُشی منزکمال پراونہٕ پتہٕ لوبُکھ حضرت علمدار صٲبس نِش عش مقام چہ گۅپھِ منزقیام کرنُک اجازت تہٕ تِہٕنز یہ قیام گاہ بنییہ ریشن ہٕنزبیاکھ بارٕ تربیت گاہ ۔ یہ گۅپھ چھے تھزرس بالہٕ کۅچھِ منز، یتھ دامٕنۍ دامٕنۍ لِدر دٔرۍیاو وُہرۍ ؤریس گرٮ۪زان چھُ تہٕ لامٕنۍ لامٕنۍ چھَس شاہ کۅل گرایہ ماران پکان۔ یتھ وُڈر پٮ۪ٹھ عش مقام آباد چھُ،لُکہٕ روایٔژ تہٕ زٲنہٕ نامہٕ مطٲبق چھُ اتھ عش وُڈر ناو تہٕ دپان اتہ چھُ کتھ تام زمانس منز شہر آباد اوسمُت، یُس کمٔۍ تام رازن یٔمِس عشوش[11] ونان ٲسۍ بسوومُت اوس۔ تہٕ گۅپھ تہ ٲس أمی کھنہٕ نٲومٕژ، مگر جغرافیٲیی نۅکتے نظرٕ کِنۍ چھُ باسان گۅپھ چھے قدرتُک شاہکار۔ وننہٕ چھُ یوان زِ اَتھ گۅپھِ منز اوس سٮ۪ٹھاہ قدیم زمانس منز خونخوار دٮ۪و، ییمۍ سٲرۍسٕے علاقس کٲتۍ نوم اوس کورمُت ۔پہلوانا ہ آو کتہ تاں پٮ۪ٹھٕ ییمس بُمہٕ سین ،ناو اوس تہٕ مورُن یہ دٮ۪و ۔ فوک لو ر تہ کوت کوت چھُ پِلو کرناوان تہٕ کمن زمانن ہٕنزلوٗنٹ رلاوان۔ پہلوانن مور دٮ۪و تہٕ پاپھ چھلنہٕ باپتھ کورُن سٲلی ﴿سالیہ﴾ نٲوۍ گامس منز"پاپہٕ ہرن" ناگس منز سران۔ اماپوز اکھ راے چھے یہ تہ زِ دٮ۪و مور زانہٕ شاہ صٲبن ، مگر بابا مصطفےٰ عش مقامی چھُ زانہٕ نامس منزلیکھان:

روایت سیرہ والٮ۪و کٔر یتھے پٲٹھۍ                                          خبر بروٗنٹھِم ؤنِکھ ڈینٹھٕکھ یِتھے پٲٹھۍ

شہاہ اوس پرانہ وقتہٕ نام عیشوش                                 مقامس منز بسن باحشمت و توش

دپن نام عش وُڈٕر تہندٕس مکانس                              سٮ۪ٹھاہ تعمیر کٔرۍمٕتۍ تتھ زمانس

تسندے وقتہٕ دیواہ اوس در غار                                         ستمگارا مکارا اوس خونخوار

تمے وقتہٕ بُمہٕ سین پہلوانا                            بزور رُستُم قوی ہیکل جوانا

مُنجن یٲری پہلوانن ز داور                             دٮ۪وس دب دِتھ جگر ژوٹنس بہ خنجر

چھُ لیوکھمُت بعضیو کینژَن دۅہن روٗد    ضیافٔژ کھیتھ اَدٕ تشریف نیوٗن زوٗد

لیکھان بعضے کٔرٕن تمٔۍ پادشٲہی               کٔڈِتھ عُمرا بہ عقبیٰ گوو سُہ رٲہی

﴿ریشی نامہ زین الدین ریشی ، مولف : مولوی غلام مصطفی عش مقام چھاپ ۳۷۹۱ئ﴾

گۅپھ ٲس سر پھَو تہٕ گُنسو سٍتۍ بٔرِتھ، بابا خلیل سٕندِس ریش نامس منزچھُ درٕج زِ زٲنہٕ شاہ صٲبن کور سارِنٕے سرپھَن ، گُنسن تہٕ پۅہرٮ۪ن حُکم زِ گۅپھ آیہ ریشن دِنہٕ، یہ کٔرۍ ووٗن خٲلی، تِم دراے تہٕ وٲتۍ پُہرۍ پجن جایہ۔ اسرار ُالاخیار ﴿ تذکرہ اولیائے کشمیر﴾ ، یاں زِ تاریخِ حسن کِس ترییمِس جلدس منز چھُ درٕج زِ گۅپھِ منز قیام کرنہٕ پتہٕ مونگ زٲنہٕ شاہ صٲبن پنہٕ نِس ٹٲٹھِس خلیفس ییمِس حاجی شمس الدین ناو اوس، کھینہٕ خٲطرٕ کینژھا ۔ شمس الدینن دیتُس أکِس پونسس مرٕژ أنِتھ۔ پیرن پرژھس کٍتِس اونُتھ؟ أکِس پونسس حض ، خلیفن دیتُس جواب۔ أکِس پونسس کوتاہ تومُل ییہ؟ پیرن پرژھُس؟ خلیفن و ونُس، اکھ سیر۔ زٲنہٕ شاہ صٲب سپٕدۍ یہ بوٗزِتھ حٲران تہٕ و وننس ، اکہ سیرٕ سٍتۍ ہٮ۪کن ژو ر انسان اکہ وقتہٕ سیر سپدِتھ۔ بہٕ تِیاہ ریوش ، یُس اکی ساتہٕ ژورن نفرن ہُند کھٮ۪ن کھییہ۔ مرٕژ کر وٲنِس واپس۔ تیُتھ چیزا اَن یُس اَمہ کھۅتہٕ ٹیوٹھ آسہ۔ اَمہ پتہٕ دِژٕس حاجی شمس الدینن ڈوٗنۍ گۅل أنِتھ، ییمہ سٍتۍ تِم واریہس کالس نفسس لاکم دِوان روٗدۍ۔

تمام ریش نامن تہٕ توٲریخی تذکرن منزچھے حضرت زین الدین ؒ ریشی سٕنزٕواریاہ کرامٲژ درٕج، عوامس منز تہ چھے تِمہٕ مشہوٗر تہٕ مقبول، مثلن اکہ دۅہہ اوس حاجی شمس الدین بۅن دٔریاوس پٮ۪ٹھ آبہٕ نٔٹِس ووتھمُت ، سُلطان زین العابدین بڈشاہ سٕندۍ اہلکار ٲسۍ شاہ کۅل کھنان[12]۔ تِمو لوگ شمس الدین کامہ۔شامس و ون تمٔۍ پیرس پنُن حال۔ پیر دراو اَمی ساتہٕ تہٕ ترووُن سربل جایہ عاصہٕ لِدٕر دٔرۍیاوس منز دٔریاو گوو خُشک۔ سرکٲرۍ اہلکار وٲتۍ اتھ جایہ تہٕ ریشِس کورُکھ سخ زار پار۔ زٲنہٕ شاہ صٲبن تُل عاصہٕ تہٕ دریاو گرٮ۪زیو، اَمی وقتہٕ پٮ۪ٹھ چھِ زانہٕ شاہ صٲبٕنۍ خدمتگار ، اکھ خاص رٕکھل دستار کلس دِوان ،یَتھ "کاژن" ونان چھِ۔ یُتھ تِم دوٗرے پرٮ۪زٕناونہٕ یِن۔

تمام ریش نامہٕ چھِ یتھ کتھِ سٍتۍ اتفاق کران زِ زٲنہٕ شاہ صٲب ٲسۍ سٮ۪ٹھاہ بے باک تہٕ خۅد دار، یہ زَن اولیاہن ہٕنز خصوصیت آسان چھے۔ سُطان زین العابدین بڈشاہ ییلہ تِمن سمکٕھنہ گژھان چھِ ،تِم چھِ اَمہ ساتہٕ مراقبس منز آسان۔ بڈشاہس چھُ پٮ۪وان یٔژ کال پرارُن، مراقبہٕ پتہٕ تہ ییلہ زٲنہٕ شاہ صٲبن بڈشاہس موزنہٕ ، بقول بابا خلیل "دُوبادشاہ در اقلیمے نہ گنجند" ونان ونان دراو تہٕ ووت راز دانہ، أتی کوڈُن حکم زِ زانہ شاہ گژھن پنٕنۍ خلیفہٕ ہٮ۪تھ جلاوطن کرنہٕ یِنۍ۔ زٲنہ شاہ صٲب چھِ خلیفہٕ تہٕ خٲدِم ہٮ۪تھ تبت واتان۔ صاحبِ اسرارالابرار حضرت بابا داد مشکواتی چھِ لیکھان زِ یپٲرۍ دراے زٲنہ شاہ تبت کُن تہٕ ہُپٲرۍ پیوو بڈشاہ بٮ۪مار۔ زٲنہٕ شاہ سٕندِ اثرٕ سٍتۍ کور شاہ تبتن ، ییمۍ سُند نہٕ کٲنسہ تذکرٕ نگارن یا ریشۍنامٕکۍ مولِفن ناو درٕج کورمُت چھُ، اسلام قبول ۔ أتھۍ دوران پیوو شاہ تبت سُند نیچوُ تہ بٮ۪مار۔ یہ تہ چُھ لیکھنہٕ آمُت زِ زٲنہ شاہ صٲبن کور خدایس منگہٕ منگ کٔرِتھ سُہ ٹھیکھ۔ اتہ دراے تہٕ ہُپٲرۍ سوز بڈشاہن پنُن نیچُو حیدر خان زارٕ پارس زِ زٲنہٕ شاہ صٲب گوژھ شٲہی دربارس منز تشریف اَنُن مگر تِمو مون نہٕ تہٕ گٔے خلیفہٕ ہٮ۪تھ عش مقام۔ تِہندِ تبتہٕ پٮ۪ٹھ واپس یِوان یوانٕے بلیوو بادشاہ [13]۔

﴿5

یہ آو برونہہ تہ وننہٕ زِ عقیدتُک چھُ یہ عالم زِ سانٮ۪و تذکرٕ نگارو تہٕ ریشۍ نامہٕ لیکھن والٮ۪و چھُنہٕ ریشن ہٕندۍ حالات درٕج کرنس کُن خاص توجہ دیُتمُت بلکہ  چھِ تِہنزن کرامٲژن زیادے پہن لور روٗدۍمٕتۍ، باسان چھُ یِم واقعات چھِ زیادٕ پہن لُکہٕ و وترِکہ خزانہٕ منزے تُلنہٕ آمٕتۍ، تکیازِ تِمو چِھنہٕ مورخانہٕ نظرِ واقعات وُچھمٕتۍ بلکہ  چھُ یِتھٮ۪ن تذکرن تہٕ نامن ہُند محرک صرف بے پناہ عقیدت ۔ اَوے چھُنہٕ حضرت زین الدین ریشی ؒ سُند حال اوحال پوٗرٕ پٲٹھۍ دسیاب ، وۅں گوو کلام شیخ العالمٕچ دٲخلی شہادت ، پانہٕ حضرت زین الدین ریشی سٕندِ کلامُک متن ،تہٕ لُکہٕ روایٔژ چھے أمِس پایہ بٔڈِس ریش سٕندِس شخصیتس تہٕ تہندٮ۪ن کارنامن کُن نہ صرف اشارٕ کران بلکہ  تِمن متعلق گوٲہی تہ پیش کران۔ یہ زِ تِم ٲسۍ ریش تحریکٕکۍ مضبوٗط ستون ، تِم ٲسۍ جسمٲنی طور مضبوط ، اکثر ٲسۍروزٕ دار روزان، کم کھیوان تہٕ دُنیانِش الگ روزان۔ سٮ۪ٹھاہ بے باک تہٕ نِڈر ٲسۍ۔

ریشۍ نامن منزچھُ زٲنہٕ شاہ صٲبُن واریاہ کلامہٕ موجود۔ حالانکہ یہ چھُ الگ بحث زِ حضرت شیخ العالمؒ سٕندِ گرٕکۍ سٲری بٲژ تہٕ تِہندۍ ژۅنوَے خلیفہٕ ٲسیاہ پزی شٲعر! کِنہٕ تِمن سٍتۍ منسوٗب واقعات چھِ کٲنسہ لُکہٕ شٲعرن موزوٗن کٔرۍمٕتۍ تہٕ عقیدت تہٕ جذبن ہٕنزِ شدٔژ سبہٕ سپُدکھ قبول عام حٲصِل۔ وۅں گوو ریش نامو چھُ اُہند کلام تہٕ منظوٗم مکالمہ بیترِ درٕج کٔرۍمٕتۍ تہٕ تاحال چھِ سٲری تذکرٕ نگار تِم نقل کران آمٕتۍ۔ حضرت زین الدین صٲبن کٔر گۅڈٕ گۅڈٕ بابا بام الدین سٕندِس تربیت گاہس منز تربیت حٲصِل، امہ پتہٕ روٗدۍ حضرت شیخ العالمؒ سٕندِس خدمتس منز یوتام خدمت ، ریاضت، عبادت تہٕ نفس کُشی منز واریاہ درجات حٲصِل کٔرِکھ ، روٗحٲنی کمالات حٲصِل سپدِتھ کورُکھ پیرس عرض ، مے دِیو عش مقام چہ گۅپھِ منز قیام کرنُک اجازت ۔ پیرس اوس ژاٹہٕ سٕندمرتبُک عٔلم ، تمٔۍ فرمووس:

رنہٕ ہے بتہٕ ژے کیوٗنژھ ویہ نہٕ                                      نِمہٕ ہتھ گرٕ، ژے کُنہ شَے نہٕ

پکہٕ ہے سٍتۍ ، ژے کٲنسہ سٍتۍ لے نہٕ                                               توت زٲنہٕ و وتُکھ ییتہ میٲنۍ شَے نہٕ

زٲنہ شاہ صٲبن و ون پھیرتھ :                                         

پیرٕ ہے کندٕ ژٕ اَسہ مارکھ ژے نبس تارکھ مے ہوۍ کٍتۍ           جنتہٕ منزٕ یود و ون دِتھ گارکھ پُلِ صراط تارکھ پانس سٍتۍ

یُتُے یوت نہٕ زِ حضرت علمدار کشمیرن کور پننِس أمِس ژاٹہٕ سٕندٮ۪ن روٗحٲنی کمالن تہٕ کشف و کراماتن ہُند اعتراف بلکہ  سید علی چھُ بابا حاجی ادہمی سٕندِ حوالہٕ لیکھان:

"حضرت میر محمد ہمدانی ین کور حضرت شیخ العالمس تہٕ تہندٮ۪ن ژۅن خلیفن سٍتۍ ملاقات ، بییہ کورُکھ حضرت شیخ العالمسؒ تتھ دۅدٕ پیالس متعلق امتحان ، یُس تِمو اوسُکھ عنایت کورمُت۔ سٍتی پرژھہکھ زِ تۅہہ نِش کٍتہ ہو چھُ از تام فٲض حٲصل کورمُت۔ حضرت شیخ العالمنؒ فرمووُکھ زِ حضرت ژورو زنٮ۪و یِمن منز بابا بام الدین ؒ ، بابا زین الدین، بابا لطیف الدین تہٕ بابا نصرالدین چھِ، یِم بہ طریقِ اسلام عبادت چھِ کران"[14]۔

حضرت شیخ العالمنؒ چھُ پننہ مناجات نظمہ منز وارٕیہن بر گُزیدٕ ریشن تہٕ خدا دوستن ہُند ذِکر کورمُت تہٕ أتھۍ منزچھِ ونان:

زٲنہٕ میون چھُے امرٮ۪تہٕ گورو تمٔۍ أدٕرِ سمسار کِوو                                  گوو گورس ژاٹھا ژ ورو تِتھۍ مے ور دِتو دِوٕ

یتھ شروکِس منزچُھ حض شیخ العالمؒ ژۅنہٕ وٕنۍ خلیفن متعلق ونان:

بُمہٕؒ، نصرؒ تہٕ بابہٕ زٲنوؒ                                             لطیف رنبہٕ وُنُے چُھس

خدٲے دِژٕم تُروٹھا سۅمبرونو                                               یِمے میٲنۍ بہٕ یہندُے چُھس

حضرت زین الدین ریشی سٕندۍ یِم شعر چھِ تِہندِس جلاوطنی ہٕندِس واقہٕ ہس کُن نون اشارٕ ، یِم وۅنۍ ضرب المثل بنیمٕتۍ چھِ:

أسۍ تتہ دراییہ پننہ دِشہ دٮ۪و کُنہٕ نیرِ ہے ریشی ناو                                              ییتہ اَسہ کُٹھیا و تتکہ نِشہ ریشن کیاہتام دِشن آو

یا

أکِس دیتُن نرٕم تہٕ خاصہٕ اکھ گوو تُلُن آسن                                      أکِس دِیتُن برٕ نیرِتھ ناسہ اکھ گوو ژھور آو لاسن

ریشۍ نامن منزچھُ زٲنہٕ شاہس تہٕ تسٕندِس ژاٹس حاجی شمس الدینس درمیان اکھ دِلچسپ منظوٗم مکالمہٕ درٕج، ییلہ حاجی شمس الدینس ؒ بڈشاہ سٕندۍ اہلکار کامہ لاگان چھِ تہٕ شامن چھِس یَلہٕ تراوان، شمس الدین چھُ آب ہٮ۪تھ کھسان تہٕ لگان چُھس دَب، پیرس نِش وٲتِتھ چھُ شمس الدین شکایت کران زِ آب نہ آسنہٕ سبہٕ چھَ نہٕ یہ جاے مُنٲسب ۔

حاجی شمس الدین: عش اسہ کودش رہن آو

زانہ شاہ صٲب: عش اَسہ سودش رہن آو

حاجی شمس الدین:

دَب لوگو ، کوٹھِس لوگو ، دہ بگو نوٹ پھُٹو، نوٹ سودراو                               بابس نہٕ زانہہ انڈ لگو عش اسہ کۅدش رہن آو

زٲنہ شاہ صٲب:

کرتو نُندٕ سنزس ورشُن وہرَس پلس درشُن ہاو                                 مُرکھس پرنُن ۂسۍتِس کشُن عش اَسہ سۅدِش رہن آو

حاجی شمس الدین: ییتہ اَسہ سرپھ تہٕ گُنسہٕ مارن شال ، سٕہہ ، نیلہٕ گاو

زٲنہ شاہ صٲب:  تِم اسہ بووُت اخلاص برن عش اَسہ سۅدِش رہن آو

﴿انتخاب﴾

﴿6

حضر ت زین الدین ریشی سُند سالِ وصال چھُ واقعات کشمیرس منز خوا جہ اعظم دیدٕ مٔرۍ 857 ہجری تہٕ صدر الدین محمدن،ذکرالصادقینس منز ۷۵۷ ہجری درٕج کورمُت۔ تاریخ کبیرس تہٕ اسرار الاخیارس منزچُھنہٕ سال وِصال درجی کرنہٕ آمُت ، مولوی غلام مصطفےٰ عش مقٲمۍ چھُ زانہٕ شاہ صٲبُن سالِ وصال ۲۵۸ ہجری لیوکھمُت تہٕ کٲشرِس انسائیکلوپیڈیا کِس گۅڈنکِس جلدس منزچھُ  1448ءلیکھنہٕ آمُت۔ یتھ کتھِ پٮ۪ٹھ چھِ سٲری اتفاق کران زِ حضرت زٲنہٕ شاہ چھِ بٲہمہ وہٮ۪کھ ییمہ عالمہٕ گٍمٕتۍ۔ اسرارالاخیار وول چھُ لیکھان زِ" اۅہُند عرسِ مبارک چھُ کٲشرِ حسابہٕ مطٲبق بٔہمہ ویشاکھی ﴿وہٮ۪کھ زوٗنہ مطٲبق﴾ پریتھ ؤریہ مناونہٕ یوان"۔ یِم چھِ عش مقامس بالہٕ لٲز پٮ۪ٹھ تٔتھۍ جایہ اوسوٗدٕ ، ییمِچ نشاندہی أکِس یارس خابس منز کٔرمٕژ ٲسٕکھ۔ أتی چھے أہندٮ۪ن ارداہن یارن تہٕ ژاٹن ہٕنز قبرٕ تہ، یِمن متعلق صاحبِ اسرارالاخیارلیکھان چھُ زِ "یِم ریشۍ چھِ اَتٮ۪ن مرشدِ بزرگوار سٕندِ مقبرُک ژھوپ شہرآباد کٔرِتھ" یِمن ہٕندۍ ناو چھِ أمی مورخن دِتۍمٕتۍ:

حاجی شمس الدینؒ، وترٹھاکرؒ، مبار ک ریوشؒ، اکہدار ریوشؒ، ہاکہٕ ریوشؒ، داوود ریوشؒ، افضل ریوش، کنڈل ریوش ، تٔپۍریوش، فقیر ریوش، صفی ریوش، درٕ ریوش، نوروز ریوش ، ریگۍ ریوش، روٗپۍ ریوش، بابہٕ ریوش۔

یِمو ریشو علاوٕ چھِ زٲنہٕ شاہ صٲبٕنۍ ژاٹھ کٔشیرِ ہٕندٮ۪ن مختلف علاقن منز ریشی تحریک برۅنہہ پکناونس منز آوٕرۍ ٲسۍ مٕتۍ، یِمو منز بابا شکو ر الدین ﴿مدفن: کوہ شیر کوٹ﴾ ، بابا لُدی ملؒ، بابا حنیف الدینؒ ﴿ مدفن:داراش﴾ ، بابا پیام الدینؒ﴿مدفن: رنبوہ﴾ دریادینؒ ، مستہٕ ریشیؒ، بابا سنگیؒریشی، ﴿مدفن: پھاگ﴾ بیترِ مشہور و معروف چھِ۔

عش مقامہٕ چھے حضرت بابا زین الدین سٕنز زیارت گاہ بالہٕ لٲزپٮ۪ٹھ۔ اتھ تام واتنہٕ باپتھ چھُ کُنہ ہیرن کھسُن پٮ۪وان۔ زیارت گاہ چھے عام ریش طرزِ تعمیرٕچ مٲرۍ مٔنز مثال۔ چار بام پشس پٮ۪ٹھ تھود پرٮ۪نگ تہٕ تتھ پٮ۪ٹھ ٹوٗر ۔ امِچ پنجرٕ کٲری چھے رنبہٕ وٕنۍ۔

کٔشیرِ منزمناونہٕ یِنہٕ والٮ۪و مٲلو منزچھُ عش مقامہٕ زٲنہٕ شاہ صٲبنس زیارت گہس پٮ۪ٹھ مناونہٕ یِنہٕ وول مٲلہٕ سٮ۪ٹھاہ مشہوٗر۔ ہتہٕ بدٮ۪و ؤرۍیو پٮ۪ٹھ چھُ پرٮ۪تھ ؤرۍیہ زٲنہٕ شاہ صٲبنِس یومِ وصالس پٮ۪ٹھ یہ مٲلہٕ مناونہٕ یوان ، برۅنہہ اوس پانژَن دۅہن چلہٕ وُن روزان تہٕ وۅنۍ چھُ ترٮ۪ن دۅہن تام جٲری روزان۔ کٲشِرِکلنڈرٕ حسابہٕ چھُ وہٮ۪کھ بہارُک ابتدا تہٕ زمستانُک اند۔بٔہمہ تٲریخہٕ چھِ رٲتۍ راتس درودو اذکارتہٕ ختماتن ہٕنز روح پرور مجلسہٕ منعقد یوان کرنہٕ۔ اتھ مٲلِس منزچھِ ساسہٕ بٔدۍ لوٗکھ شٲمل سپدان، اکھتُے چھِ کشتواڑ پٮ۪ٹھٕ تہ عقیدت مند یوان ۔ تُروٲہمہ تاریخہٕ شامن چھُ لشہ زوٗل یوان کرنہٕ تہٕ أتھۍ سٍتۍ چھِ لُکہٕ فنکار دمالہ مٔتۍ روٲیتی دمٲلۍ کٔرِتھ لگ پالان۔ زوٗل تہٕ دمٲلۍ چھِ اَمہ مٲلٕکۍ زٕ اہم منظر۔ کینژَن ہُند خیال چھُ زِ زوٗل چھُ یوان زٲنہٕ شاہ صٲبنہ دٔسۍ دٮ۪ومارنہٕ یِنہٕ چہ خۅشی ہٕندِ یاد گارٕ رٔنگۍ مناونہٕ تہٕ دمٲلۍ کٔرِتھ چھِ کٔشیرِ ہٕندۍ بانڈ پنُن عقیدت پیش کران، اَمہ دۅہہٕ شامن چھِ أندۍ پٔکھۍ گامن منز تہ لوٗکھ گاسہٕ لٲوۍ زٲلِتھ زوٗل کران، برونہہ ٲسۍ تِم تہ لٔش زالان۔ اتھ سٲرۍسٕے مٲلس چھِ اصطلاحس منزپھروو ونان۔ پھروو چھُ بوڈ دۅہہ، پھروو چھُ دٮ۪وٕ سٕنزِ غلٲمی نِش جشنِ آزٲدی، پھروو  چھُ جشنِ بہار، پھروو  چھُ بٲے برادری تہٕ روادٲری ہٕنز مثال ، پھروو چھُ سانہ کلچرک حِصہٕ۔ یہ وَنُن چھُنہٕ صحی زِ اتھ مٲلس کیا چھِ ونان"پھروو زالُن" "زوٗل زالُن" چھِ ونان "پھروو زالُن" نہ ٕ۔عام پٲٹھۍ چھِ ونان پھروو لگُن، پھروو لاگُن، پھروو کرُن، پھروو مناوُن۔

ڈکشنری منزچھُ پھروو یِتھٕ پٲٹھۍ وٮ۪ژھناونہٕ آمُت:  "پھروو۔ پھروو زالُن۔ن۔ موٗل۔ پھراو >ک۔ پردو۔ پراد

س: پراپ۔ ٲشِدس منزلشہ یا گاسہٕ لٲوۍ بیترِ زالنٕچ دِوَے یا مٲلہٕ۔ روایتھ چھے زِ پتھ کالہ ٲسۍ یچھ وندٕ کٮ۪ن شٮ۪ن رٮ۪تن بالو تہٕ وَنوپٮ۪ٹھٕ وادی منز روزنہ وسان۔ ازکل تہ چھِ اننت ناگ علاقس منزیِم دۅہہ مناونہٕ رٔنگۍ ٲشِدس منز گاسہٕ مشالہ زالنہٕ یوان"۔ ﴿کٲشِر ڈکشنری ، جلدٕ ۲۔ص:۳۵۱﴾

ٲشد رٮ۪تھ سوٗرۍتھٕے چھُ ہرُد ہٮ۪وان یُن، اتھ رٮ۪تس منز گاسہٕ لٲوۍ زٲلِتھ زوٗل کرنس چُھنہٕ پھرٲوِس سٍتۍ کانہہ تعلق۔ بنان چھُ  پتھ کالہ ما آسہٕ ہے ٲشدِس منزتہ گاسہٕ زوٗل کرنہٕ یوان، ییمیُک تعلق یچھن یا پشاجن ہٕندِس وندس دوران کشٔیرِ منزٕے روزنس سٍتۍ آسہ ہا، مگر از چھُنہٕ یہ سپدان۔ وۅنۍ چھے یہ کتَھ کتَھ تہ ؤژھمٕژزِ پھروو چھُ  زرتُشتی عقیدُک پھُٹہٕ پھراٹہٕ یاد گار ۔ ڈاکٹر گُلشن مجید چھُ لیکھان زِ:

"ایرانُک اکھ قومی جشن چھُ "جشنِ فرورگان" مبدا ایں جشن دہ روز ماندہ.... در مُدتِ ایں دہ روز زیارت دخرہا کُنند و براے ارواح مردگان نیاز فرستند و موبداں و برہمناں برائی گُذشتگاں ژند خوانند و ایں لفظ "فرور" ماخوز است کہ بضبط بعضی بہ معنی روٗح مجرد باشد و عقیدئہ پارسایاں مطابق صریح اوستا چنیں بودہ است و ایں عید درحقیقت عید امواتِ پارسایاں است ﴿ جلال الدین ہمائی تاریخ ِ ادبیات ایران 379 ھ﴾ پھروو لفظ چھُ فرور لفظٕ پٮ۪ٹھ آمُت۔ امہ تلہٕ چھُ ننان زِ یہ رسم تہٕ عقیدٕ کٔشیرِ منز رواج دِنہٕ وٲلۍ آسہٕ ہن پارسی عقیدٕ تھاون وٲلۍ یا یِمن ریشن ہٕندٮ۪ن خانقاہن کُن یہ رسم منسوٗب چھُ تِم تہ ماآسہٕ ہن مشرف بہ اسلام سپدنہٕ برونہہ زرتُشتی عقیدٕ تھاوان"[15]۔ ﴿ نقدِ شعر: ص: 95۔96﴾

عش مقامہٕ پھروو اند وٲتِتھ چھِ وۅرسہٕ وٲنۍ پنٕنۍ گٔشتی دوکان وٹان تہٕ مرازٕ کٮ۪ن بیین گامن کُن نیران۔ اتہ ٮ۪پٹھ چھُ وۅرسن ہُنداکھ زیوٗٹھ سِلسلاہ شروع گژھان تہٕ مختلف گامن منز چھِ مختلف دۅہن پٮ۪ٹھ زوٗل تہ کران تہٕ دمٲلۍ تہ۔ دراصل  چھِ أندۍ پٔکھۍ گامن ہٕندۍ یِم لۅکٕٹۍ بٔڈۍ وۅرسہٕ پھراوِکی حِصہٕ۔ پھروو چھُ کٲشرِس لُکہٕ و وترس منز پِھرۍ پِھرۍ ورتاونہٕ آمُت۔

٭٭٭

کتاب نامہٕ:

1 خواجہ اعظم دید مری ۔ واقعات کشمیر ﴿اُردوترجمہٕ: پروفیسر شمس الدین احمد﴾           2  غلام حسن شاہ کھۅیہٲمۍ۔ اسرارالاخیار ﴿کٲشُر ترجمہٕ: پروفیسر شمس الدین احمد﴾     3 بابا کمال الدین ژراروی ۔ ریشی نامہ عنبر شمامہ           4 بابا غلام مصطفی عش مقامی۔ ریشی نامہ بابا زین الدین ریشی ﴿ کٲشُر منظوم﴾                 5  ملا بہاو الدین متو۔ ریشی نامہ منظوم                6 برجِ نور کلچرل اکاڈمی    7 شیرازٕ نُند ریش نمبر کلچرل اکاڈمی    8 بابا خلیل ریشی نامہ۔      9 علمدار ؒ کشمیر کلچرل آرگنائیزیشن۔     10  کٲشُر انسائیکلو پیڈیا ، جلد ۱ کشمیر کلچرل          11 ریشُت تہٕ سٲنۍ ریش پروفیسرشید نازکی۔

***

اکھ نٲدِر نعتِ شریف

اَن نِلت یاریح الصّباح یوماً الیٰ اَرضِ الحرم                           بَلِغ سَلامِی رَوضَة فیہا النبی المُحترم

مِن وَجہہ شمس الضحیٰ مِن خدہ بَدرُ الدّجیٰ                                        مِن ذاتہ نورُالہُدیٰ مِن کفِہ بحرالہمم

یہ مشہوٗر عربی نعتِ شریف چھُ کٔشیرِ ہٕنزن اکثر مسجدن اندر دُعائے صُبحس سٍتۍ سٍتۍ پرنہٕ یوان۔کینہہ چھِ ونان زِ یہ چھُ حضرت امام زین العابدینؓ صٲبن و ونمُت تہٕ کینژَن ہُند خیال چھُ زِ یہ چھُ سلطان زین العابدین بڈشاہ سُند۔ کٲشرِ ادبُک توٲریخ﴿گۅڈنیُک ایڈیشن﴾ "یُس ناجی منور تہٕ ڈاکٹر شفیع شوقن یکہٕ وَٹہٕ تٲلیف کورمُت چھُ ، تہ چھُ اَتھ بڈشاہ سُندُے تخلیق مانان۔ اَتھ منز چھُ وَننہٕ آمُت زِ یہ چھُ اکھ مشہوٗر قصیدٕ تہٕ اَتھ منز چھِ عربی، فارسی تہٕ تُرکی زبانن ہٕندۍ شعر۔ اصل  عبارت چھے یہ :

"مشہوٗر قٔصیدٕ اِن نِلت یاریح الصبایتھ عام لوٗکھ امام زین العابدین ؓ سُند قٔصیدٕ ونان چھِ چھُ دراصل  بڈشاہ سُندُے تکیازِ أکِس قلمی نسخس منز چھُ صاف ہٲوِتھ زِ یہ قٔصیدٕ چھُ سُلطان زین العابدین بڈشاہ سُند۔ یہ قصیدٕ چھُ عربی، فارسی ، تُرکی تہٕ کٲشرِ زبٲنۍمنز لٮ۪کھنہٕ آمُت ۔ییمہ تلہٕ ننان چھُ زِ بڈشاہ چھُ یِمہٕ زبانہٕ زاننہٕ علاوٕ یِمن منز شعر تہ ونان اوسمُت۔کٲشُر چھُ اَکُے شعر تہٕ سُہ گو یہ:

زٲوِیُل کمر، ٲویُل بدن، شوقس چمن، ذوقس چھُ پَن               یادُک سنٮ۪ر ، رادُک تھزر، فرشس چھُ کٕن، عرشس چھُ تھَم

اماپوز "ان نِلتَ یا ریح الصباح" ییمِچ گرٮ۪ز سانٮ۪ن مٔشیدن منز پرٮ۪تھ صُبحس چٔشمن شیہلتھ تہٕ وۅندن شیہجار بخشان چھے، چھُ فقط اکھ نعت ۔ "نورٕ آگُر" سۅمبرنہ ﴿مطبوعہ کلچرل اکادمی﴾ منزتہ چھُ یہ نعت حضرت امام زین العابدینؒ سٕنز تخلیق ماننہٕ آمُت۔ وۅنۍ گو أکِس قلمی نسخس اندر ﴿بیاضِ سید امیر الدین رفاعی کُبروی﴾ چھِ اَتھ داہ شعر تہٕ داہوَے چھِ عربی زبٲنۍ منز۔ نوٗرٕآگرس منزچھِ خبرکیازِ داہو بدلہٕ ستے شعر درج سپدٕۍمٕتۍ۔

اَمہ نعتِ شریف علاوٕ چھُ اَتھ قلمی نُسخس اندراکھ تیُتھ زیوٗٹھ تہٕ لوٗبہٕ وُن نعتِ شریف میلان ،ییمِکۍ اَجزٲے ترکیبی اَتھ اکہ قٔصیدٕچ ہیت ﴿Style﴾بخشان چھِ۔ اَتھ منز چھِ نہ صِرف عربی ،فارسی ،تُرکی تہٕ کٲشرِ زبٲنۍ ہٕندۍ شعر بلکہ  چھِس تتھ زبٲنۍ منزتہ کینہہ شعر، یتھ ہندوستٲنی یا پنجٲبی زبان وَننہٕ آمُت چھُ۔ کٲشِرۍچھِ اتھ منز ژور شعر ییلہ زَن کٲشرِ ادبکس توٲریخس ﴿مولف ناجی منور تہٕ ڈاکٹر شفیع شوق﴾ اندر فقط اکہ کٲشرِ شعرُک ذِکر آمُت چھُ۔

ثٮ۪قہٕ پٲٹھۍ چھُنہٕ معلوم زِ یہ نعتِ شریف کٔمِس قادرالکلام عاشقِ رسول اللہ سٕندِ عشقُک ماحصل چھُ اماپوز یِتہ چھُ خیال یوان کرنہٕ زِ یہ چھُ میر سعد اللہ شاہ آبادی سُند کلام ۔میر صٲبس متعلق چھُنہٕ کٲنسہ تہ مورخن لیوکھمُت زِ سُہ کیا اوس کٲشرِ زبٲنۍ منز تہ شعر لٮ۪کھان۔"آش" رِسالہٕ کِس پٲنژمِس شُمارس منز چھُ گۅڈنِچہ لٹہ نٲجی منورن توبرٕکہ رٔنگۍ میر سعد اللہ شاہ آبادی سُند اکھ کٲشُر غزل چھاپ کورمُت۔ اَمی غزلٕکۍ کینہہ شعر چھِ تمٔۍ پتہٕ کٲشرِ ادبُک توٲریخ نٲوۍ کتابہ منزتہ شٲمل کٔرۍمٕتۍ۔

تٲریخ کبیرس اندر چھُ درج زِ"میر سعد اللہ شاہ آبادی اوس عربی تہٕ فارسی زانن وول باکمال شخص۔ تسٕندۍ واراہ تصانیف چھِ مشہوٗر ۔ منظوٗم تواریخِ کشمیر ،یتھ باغِ سُلیمان ناو چھُ چھے أمی لیچھمٕژ۔ مغازی النبی ، رسالہٕ گُل و بُلبُل تہٕ تفسیرِ قرآنِ مجید تہ چھُن لیوکھمُت ۔یِمو کتابو ہُریمانہٕ چھِن نعت تہٕ غزل تہ ؤنۍمٕتۍ ۔سُہ چھُ شاہ آباد پرگنہٕ کِس منڈاہ نٲوۍ گامس منز دفن۔ بقا بابا شاہ آبادی سٕندٮ۪و مُریدو منزٕ چھُ اوسمُت "۔ ناجی صٲبن چھُ لیوکھمُت زِ تسٕنز قبر چھِ حال حالٕے میر گنڈ شاہ آباد دریافت سپٕزمٕژ۔ "باغِ سُلیمان چہ دٲخلی شہادٔژ موٗجُب چھُ میر سعد اللہ سُند بابہٕ صٲب مجنون شاہ تشکاتی،شہرِ بدخشانُک اکھ عٲلِم تہٕ تٲجر اوسمُت، موج چھَس ٲسمٕژ کوبلٕچ ۔ بدخشان پٮ۪ٹھ آو مجنون شاہ تہٕ لوگ کھۅیہ ہامہ بسنہ ۔ 1145ھ منز ییلہ سعد اللہ کہہ وٕہُر اوس، گوس مول مٔرِتھ ۔اَمہ پتہٕ گوو مامَس سٍتۍ سرینگر، ستن ٲٹھن ؤرۍین تتہ زیرِ تعلیم روزنہٕ پتہٕ ووت سُہ ۴۵۱۱ھ منز شاہ آباد ،ییتہ تس کینہہ زمین حٲصل سپُد، خاندر تہ کورُن أتی۔ مۅرشِد اوسُس مُلا ابو البقائَ۔میر سعد اللہ اوس محمد رضا مُشتاق ﴿سن وفات 1151ھ﴾ تہٕ عبدالحکیم ساطع ﴿سن وفات 1143ھ﴾ ہوِٮ۪ن بہلہ پایہ سخنورن ہُند ژاٹہٕ بوج تہٕ کو نژھ ہم عصر تہ" ﴿سون ادب 1984ء باغِ سلیمان از ڈاکٹر مرغوب بانہالی﴾ میرسعد اللہ شاہ آبادی اوس سعادت تخلص ورتاوان:

کافران را است اعتبار امروز                                             اہلِ اسلام ماندہ زار امروز

تابۂ راجور جورِ کُفار است                                                         چہ سِتم دور دورِ کُفار است

اے سعادت ازیں محوسہ چند                                            دم مہ زن خامہ را زبان بربند

﴿ باغِ سلیمان،درذکرِ صوبیداران حکومتِ چغتہ﴾

مۅرشِد تہٕ کالہٕ باجن ہُند ذِکر چھُن یِتھٕ کٕنۍ کورمُت:

آخر نامہ بہتر آنکہ طراز                                          ذکرِ اُستادِ خود کُنم آغاز

بادئہ آبِ بقا است در خامش                زانست مُلا ابوالبقا نامش

والدم بود خود بدخشانی                                        شاہ مجنون بنام تشکانی

شاعرانِ زماں بسے زِ اشواق                      دیدہ ام ہمچوں ساطع و مُشتاق

ماسہ ہمدرس بودہ ایم شفیق                          روز و تاشب بہم ندیم و رفیق

﴿انتخاب ، باغِ سلیمان﴾

میر سعد اللہ شاہ آبادی سپُد  1202ھ منز اَرہٲٹھ ؤری وٲنس پرٲوِتھ میرٕ گنڈشاہ آباد رحمتِ حق، أکۍ عقیدت مندن لیوٗکھُس تٲریخِ وفات "سعادتِ ابدی یافتہ زِ جامِ بقا 1202 ھ"۔

پانژَن زبانن ہٕندٮ۪ن شعرن پٮ۪ٹھ مُشتمل یہ نعتِ شریف چھا میر سعد اللہ شاہ آبادی سُند کِنہٕ نہ ، یہ کتھ چھِ وُنہ أنزرنَے ،وۅنۍ گو اَتھ منز چھُ سعادت تخلص موجودتہٕ یِم ژور کٲشِرۍ شعراَتھ اندر چھِ تِمن ہُند سِٹایل چھُ تَتھ غزلس سٍتۍ رلان یُس ناجی منور صٲبن آش رسالس اندر چھاپ کورمُت چھُ۔ کتھِ اند بور دِنہٕ خٲطرٕ ییلہ راقم الحروفن ڈاکٹر شفیع شوق صٲبس سٍتۍ أکِس خطس منزیٔہے کتھ تُج ، تِمو لیوٗکھ در جواب __

" خاص کٔرِتھ چھُ چون یہ وَنُن زِ سُہ قصیدٕ یُس اَسہ بڈشاہ نِس ناوس سٍتۍ منسوٗب چھُ کورمُت چھُنہٕ بڈشاہ سُند تہٕ شاید سعد اللہ شاہ آبادی سُند۔ حالانکہ یہ معاملہٕ گوژھ ناجی صٲبس سٍتۍ تُلُن مگر مے چھُ ژے سٍتۍ اتفاق تکیازِ یِم کینہہ غزل سعد اللہ شاہ آبادی سٕندۍ ناجی صٲبنہ دٔسۍ دریافت سپدۍ تِمن ہُند اسلوٗب چھُ ہوٗ بہوٗ تتھ شعرس سٍتۍ رلان یُس کٲشُر شعر اَتھ قٔصیدس منز شٲمل چھُ، اتھ پٮ۪ٹھ لیکھۍ زِ ضروٗر تفصیلہٕ سان"﴿ شفیع شوق﴾۔

سٲنِس سیٲسی تہٕ ادبی توٲریخس منزچُھ مُفتی محمد سعادت سُند تہ دِیُت مگر تسُند شٲعر آسُن چھُنہٕ ثٲبت ۔ سُہ اوس 1298ھ منز زامُت ۔ ناو اوسس مُفتی محمد شاہ ،مٲلِس اوسُس ناو مُفتی غلام محی الدین ،مُفتی محمد شاہ اوس عٲلم ،مورخ، مُدرِس تہٕ فقیہہ آسنس سٍتۍ سٍتۍ جان سرکٲرۍ عہدن پٮ۪ٹھ تہ روٗدمُت 1372ھ چھُ تسُند سنِ وفات۔

ییمہ قلمی بیاضہ پٮ۪ٹھٕ یہ نعت شریف راقم الحروفن نقل کور، سۅ چھے پیرامیر الدین رفاعی صٲبن سٮ۪ٹھاہ مٮ۪حنتہٕ سان تیار کٔرمٕژ۔ پیر امیر الدین رفاعی ٲسۍکبروی تخلص ورتاوان۔زٲمتۍ ٲسۍ گوجوارِ سرینگرٕ تہٕ 1963ءمنز ییلہ تِم حج کٔرِتھ واپس یوان ٲسۍ،سپٕدۍ وٲصِل ِ حق۔ نٲنِل اننت ناگہٕ آے حضرت بابا نیکو ؒ ریشی سٕندِس استانس نکھے سپرد خاک کرنہٕ۔پیر صٲب ٲسۍ جان خۅش نویس ، تِہنزِ اَتھ بیاضہ منزچھِ ہتہٕ بٔدۍ عربی، فارسی ،اُردو تہٕ کٲشِرۍ نعت تہٕ منقبت درج ،یِم مختلف شٲعرن ہٕنزتخلیقہٕ چھے۔ کبروی صٲبنہ مطٲبق چھِ اَتھ نعتس منزژور شعر تُرکی زبٲنۍہٕندۍ تہ ،یِم مے فِکرِنہ ترنہٕ باوجود تہ ہوبہوٗ نقل کٔرۍ۔

فارسی:

بُلبُل بگُل بانگ دلا سرکردہ باگُل صُبحدم                                  مدح و تحیّات و ثناءنعت نبی محترم

اے دِل توہم در وصفِ او[16]  خامہ کُن تاشوی                     جاری سخن ، گوہر فگن ، شکر شکن ، شیریں رقم

آں سرورِ خیلِ رَسُل واں رہبرِ اہلِ سُبُل                                     آں مُفخز ہر جُزوِ کُل ، واں مصدرِ فیض عمم

آں شاہدِ دورِ قمر سر تابپا پاتابہ سر                                                         مہرو وفا ، لطُف و صفا ، عفو و شفا فضل و کرم

سُلطان دین ، ایمان دِل ، جانانِ جان، برہانِ تن            شمس الضحیٰ ، بدرالدُجیٰ ، صدرالعلےٰ ، کہف الاُمم

زینِ فلک ، زیب ملک ، ذخرالزمان ، فخرالزمن                    امی لقب ، مکی نسب، یثرب مکان، بطحٰی حرم

شاہ شہاں، جانِ جہاں، خیلش ملک ، تختش فلک            تیغش قضاءتیرش قدر، جوزاکمر، شعریٰ علم

خواہد چو قہرش در زماں از جا ردو برپا شود                                               عصر فنا، قصرِبنا ، شانِ وجودِ آں عدم

تا عزم و جزمش کرد رو[17] شُد حال او                                                       از نصرحک ، باخسرخم از فتح فک باکسر ضم

گراو نہ بودے کے شُدے موجود ہر شان وصور                                               جِن و بشر ، شمس و قمر ، ارضِ و سما، لوح و قَلم

ہر نص اعجازش گواہ، ہر شے ز ماہی تابہ ماہ                                ظبے حجر، زبِ شجر، شق القمر ، فک الظلم

جُزاو کرا از انبیاء،گشت این نوا از حق عطا                                       معراجِ اودر لا مکان ، محتاجِ اوہر بیش و کم

ہرشانِ او در قربِ حق از انبیاءبردہ سبق                                     اعجاز ہم اکرام ہم انجام ہم ، آغاز ہم

تا نوٗرِ شرعش شُد مُبین ، مفقوٗد گشت از ہر زمین                    جورو جفا ، شوروشقا، رنج و دغا، درد و الم

در دورِ آں خیرالبشر، آفاق راشُد جلوہ گر                                                  جُرِ ملِل، رفع ذلل ، نصرِ صمد ، کسرے صنم

در خدمتش اہلِ سماہم انس و جاں، ہم انبیائ                                                دِل بر حُنین کف ہر جبین رو بر زمین سر برقدم

ہستند جمع مُرسلین از رۅے قدرش شرمگین                             آدمؑ سرافگن ، نوح ؑ تر،موسیٰؑ غریق عیسیٰؑ ندم

داوودؑ قوالِ برش ، بر در سُلیمانؑ چاکرش                                           یوسُفؑ غلامِ کمترش ،یونسؑ کم تر از خدم

نازم بہ نامِ مُصطفیٰ کِزوے بہر شاہ و گدا                                     تن را تُواں، جاں رابقاءدِل را صفا ، سر راسلم

گردد بدل از نامِ او باراحت و عیش و طرب                                رنج و محن، فنج و فتِن، سنج و حزن اندوہ و غم

از نامِ او ، ازجامِ او، از نامۂ و پیغامِ او                                             غایب کرب ، عاقب طرب ، روشن عرب، گُلشن عجم

طٰہٰ نشانِ مقصدش یٰسین خطابِ امجدش                                      درشانِ ابروے و قدش، نازِل شُدہ نون وقلم

نوشِ لبش، جوشِ دِلش، دوش نتش ، ہوشِ منش                   شورِ زماں، سوزِجہاں ، طورِ عیان، نورِ قدم

بالعلِ لب، باماہ رخ، بانوٗر بَر، باموئے تر                                  کانِ نِگین، مہرِ مُبین، صُبح یقین، شام ہمم

چشم و قدو روئے و لبش ، نادیدہ رفت زلُطفِ آں              نرگس رخش ، سرو ارزوش، گُل در عرق مُل در سدم

کٲشر:-

زٲویُل کمر ، ٲویُل بدن ، شوقس چھُ پن ، ذوقس چمن            یادُک سنٮ۪ر ، رادُک تھزر فرشس چھُ کٕن ، عرشس چھُ تھَم

نورُک بدن ، طورُک وطن ، سومبرِتھ سخن، امرٮ۪تھ چھکن       مِترس چھُ سَتھ شِسترس چھُ لتَھ، خٲرس چھُ وَتھ ،شرس چھُ سم

غیرت پنُن مٲرِتھ یِمہ، ژھٲرِتھ وتے، آرُت ہٮ۪مہ                   چٲرِتھ بُمہ، مٲرِتھ غمہ، لٲرِتھ یِمہ، دٲرتھ ہلم

روزُم وَنے ، بوزم کنَے ، سۅکھ تے گِلے ، دۅکھ تے وِلَے               زَر چھُم وۅندے تھر چھم کندے ، ورشن بٮ۪ہم، درشُن دِتم

فارسی:

دردِ دِلش ،جامِ غمش، دارد نصیب از ....[18]                                  راح و رجب ، عیش و طرب ، سازونوا ، نازو نعم

در پیشِ ابوابش بسے، ہست از گدا کمتر کسے                               خاقانِ چین، سُلطان رے ، کسریٰ وکے، ضحاک وجم

ہر دوستدارانش رجب ، گردید فرض از فضلِ رب                 ذوق لِقا ، دارالبقائ، قصرِ جنان، باغِ اِرَم

اعدائے دینش را بود، بے شک نصیب از....[19]                  روئے سیاہ ، راے تباہ، حالِ بدو خالِ دِژم

در ہر دو عالم حاسدش ، و حاسِد یاران او                                           خوارو خجل ، زارو زبوں ، نحس و نجس ، بیس و بہم

یارانِ خاص مصطفی چار اند اربابِ صفا                                     بے گُفتگو ، بے شُبہ ریب ، بے شکِ وظن بے کیف و کم

ابنِ قحافہ است عمرؓ ، عثمانؓ، عفوان علیؓ                                      آنِ وِلا، جانِ عُلا شانِ حیا کانِ حلم

صدق و صفا، عدل و وفا ، شرم و حیا ، جود و سخا                         ایں چار ارکان جا بہ جا مستنضراست و معتنم

اصحاب و آل مصطفی ہستند جُملہ مجتبیٰ                                          والا نسب ، اعلیٰ حسب ، منیوشمم، نیکو شیم

عربی:

یا معشراخیر الرسل اطوار کم خیرالسبل                            مِنکم لنا خیرالنزل انتم مصابیح الظلم

العیش حقا عیشکم انا فتحنا جیشکم                                            الدین و الدنیا لکم فاسنصرونا باالحشم

انتم معاریج اللقا فہا مدرایج البقائ                             اَلغم بہ مَن مُتَقٰی اکرمِ بہ من مُعتصم

اُنظُر اِلیٰ اہل الورا وافتح لنا باب الہدی                  واشفع غرا فیما عدا عنا مِن اثام المَظم

اِنّ الھُدیٰ قد غرنا من بعد ماقد سَرنا                             واکشف بلُطفِک ضرنا یا من بَہ دفع الالم

یافَرة البصار نا یا سرة اسرار نا                                          بافضل عُدا سخارنا اِنا ورد نافی السقم

فارسی:

یا سیدی و الشمس روٗ یا جیّد و لیل مو                             یا ماحی جرم و ہفَو، یا شافع جمعِ اُمم

بر حالِ ما بے چارگاں، ورتیہ غم آوار گان         بنگر زِ بَس لطف و عطا ، مہرو وفا فیضِ اُمّم

از مانمے آید بجا ، جُزشین عین وافترائ                     جُز عجب و بہتان و ریا، تقصیر وکُفران و ستم

رہگذُر از تقصیرات ما ،بکشائے ہرحاجاتِ ما        دستِ دُعا چشمِ کرم، فضل رجا بابِ نعم

تُرکی:

سن سَن اول کرست کچی حقدر سنکا یر یوغچی                               رحمت سنکا ای بولچی ، کب کُب اخص دِن ہم اعم

سن من اولنغ نامور ،تنکری سنگ چام عفوٗ تر                            یارغ چمن ہرنیچہ بزقز کرندن ہم بیش وکسم

شمع جمالنک یار توب از ساوتنگری نکنک از قوت              کینک برافنک دن قبوت معراج شامی یکدرم

ننگا چو حقدن پستار السنک کر فلسنک نظر                                         امت لرنک حقیدہ بر محشر کہ بخشے برم

پنجٲبی:

اے خواجۂ ہر دوسرا مُجھ کو تیرا ہی آسرا                    سب کو تُہی سرکارن مرا رب کے آگے حقکے قسم

لولاک کے لحان میں افلاک جیتا آن میں           تج شان کان فرقان میں نازل ہوا سب کوچ مژم

تیرا محبت کار میں جان میں[20]                                        تج باغ....[21]....دِل میں جنون ہے دَم بہ دَم

یارحمت اللعالمین پیارانبی ہے حق کے تئیں                    پیارا نبی تج ہن نہیں ماتا پتا چلتا درم

فارسی:

نبود سعادت را اماں از دستِ ایں بد گوہراں                            جُز لُطفِ تو جُز عفو تو ، جُز فضلِ تو اے محتشم

یارب شود روزیکہ من ، از جذبہ#¿ شوقِ درش                       خیزم بدل آیم بہ جان ،پویم بسر راہ حَرم

از مرقدت یا ہم شرف گردم بگردِش ہر طرف                                                لبیک زَن غلغل فگن ،فریاد کُن در ہرقدم

از چشمِ و مو روبم درش، سایم پس از بوسہ برش                                                 روح وتن و جان و جگر، پشت و سر و روے وشکم

گویم بصد عجزو بیان، کای شمع روئے مہربان                          شمع ہدا، جمع عطا ، دہش و سخا، بحرِ کرم

درمن نگر برمن گُذر، دادم بِدہ شادم بکُن                                     یا مجتبیٰ یا مصطفی یا با حشم یا محترم

شُد در ہوا عمرم تلف ،اکنوں نماند اصل ا بکف                                               در تن توان ، درجاں اماں در دِل سکون و دیدہ نم

ہم زور ہم نفس دنی،ہم گرد شیطان رہزنی                                 درماندہ ام ، شرمندہ ام ،من بندہ ام زارودژم

گردید از فرط گناہ رویم سیاہ ،عالم تباہ                                                     ۔۔۔۔
دستم
بدہ ، پستم مکُن، شیطان زبردستم مکُن                                     یا ذالعلیٰ یا ذالولیٰ یاذالحیاءیا ذالکرم                           

جُز ذِکرِ نعتت اے سُلطانِ دین فکرم مبادا برزمین             روز و شب ، شام و سحر اناً فاناً دم بدم                    

بادالتحیات و ثناءبر روحِ پاک مصطفی                                            ہر آل و اصحابش زما بر اہل بیتش مُلتزم

نوٹ: تُرکی تہٕ پنجٲبۍ لفٕظ لیکھِم عٲن غٲن تِتھے کٔنۍ یِتھٕ کٔنۍ قلمی نسخس منزلیکھِتھ چھِ۔

کٲشِرۍ معراج نامہٕ

تِمن سارِنٕے زیٹھٮ۪ن کیو ژھۅٹٮ۪ن منظوٗمن چھِ معراج نامہٕ ونان یِمن اندر سیدالمرسلین نبی کریم حضرتِ محمد مصطفی صلی اللہ علیہ وسلم سُند معراجِ شریف تہٕ اَمِکۍ واقعات بیان آسن سپٕدۍمٕتۍ۔ بے شمار دروٗدو سلام ٲسِن بر ذاتِ حضرت خیرالانام یِمن ہٕندوجودِ پاک کایناتُک موٗل تہٕ مُژ چھُ۔عالمینن ہٕنز شوٗب چھُ تہٕ یِہُند ذکرِ خیر باعِث سعادت تہٕ شفاعت چُھ۔ عالمٕچن مختلف زبانن اندر و وتھ نورِ اسلام کہ ظہوٗرس یِنہٕ کہ وقتہٕ پٮ۪ٹھے مدحِ رسولس سٍتۍ سٍتۍ معراج نامہٕ ونہٕ نس ،لٮ۪کھنس ونہٕ ناونس تہٕ وکھناونس تہ دس۔موٗلہٕ تلہٕ چھے سۅ کُلہُم شٲعری نعت یتھ منز حضرت محمد عربی سٕندٮ۪ن کمالاتن ،معجزاتن تہٕ وصفن ہُند ذکر خیر آسہ تِہندِ جلال و جمالُک شکل و شمٲیِلُک تہٕ کلہُم پٲٹھۍ سیرتِ پاک کٮ۪ن مختلف اَنہارن تہٕ وٮ۪وہارن ہُند بییہ مٲرۍ منزرُک سٮ۪ٹھاہ شوٗژِ شانہ ِ مگر غُلو ورٲے تذکرٕ سپُدمُت آسہ۔ شٲعری منز چھُ باضے باضے غلو تہ یوان تہٕ مالایٲنی تہ اوَے چھے نعت گویی زبردس احتیاط منگان ۔چھُنا وننہٕ آمُت باخدا دیوانہٕ باش و بامحمد ہوشیار ۔ییمِس پایہ بٔڈِس پیغمبرس رب ِ الجلیل تعریف تہٕ توصیف فرماواں چھِ تہٕ یہندِ لولہٕ تہ سورُے پٲدٕ کرنہٕ آویہ موجود چھُ۔ تمہ ذاتِ اقدسٕکۍ تعریف کرنہٕ وِزِ ہے اِنسانن ہٕنز زٮ۪و کلہ ، قلم لرزِ تہٕ وٲنِج وُپھِ تٲجِب چھُنہٕ کینہہ ۔و وں ییلہ معراجِ شریفس یتھ متعلق باونہٕ آمُت چھُ زِ"بود معراج تاجِ معجزاتش" محدوٗد تہٕ عٲجِز اِنسٲنی عقلہ ہٕندِ زورٕ شعرن منز باوَتھ کرٕنۍ آسہ۔شٲعر ہے کمال کرِ تہٕ کوتاہ! تہ کیازِ سرِ ساوِرُک تہٕ خۅش یِوٕنہ حٲرتُک یہ عالم چھُ سُہ یور عقلہ ، فِکرِ تہٕ ظۅنس کانہہ پِلو چُھنہٕ۔ اماپوز اَمہ مجبوریہ ۔ ٹھرِ تہٕ اَٹکاوٕ باوجود تہ چھِ حضرت رسول رحمت خاتمِ النبین صلی اللہ علیہ وسلم سٕندۍ حُبّن ،لولن تہٕ امارَن دُنۍیہٕکۍ بہترین دماغ نعت تہٕ معراج نامہٕ لٮ۪کھٕ ناو نٲوۍ مٕتۍ ۔نعت ییلہ مدح رسول چھُ معراج نامن منزتہ چُھ عظمت رسول اکرم بیان سپدان ۔ اَتھ سِرسٲوۍ عظیم تہٕ لامثال افلاکن ہٕندِس تہٕ عرشِ مجید کِس عزت تہٕ عظمت وٲلِس سٲلس دوران عظمت کٮ۪ن کمن کمن مقاماتن پٮ۪ٹھ نیوٗ حضرت رسول کریمن تشریف،انبیائے کرام کمہ اشتیاقہٕ ٲسۍ تِمن انتظارس ، عرش تہٕ فرشس کیُتھ پٲراو اوس آمُت کرنہٕ۔ اَمہ کلہُم صوٗرتِ حالُک بیان نَے نعت چھُ تہٕ اَدٕ کیا چھُ؟

یہ چھے وکھرٕکتَھ زِ شعر زٲژ رٔنگۍ ییہ اَتھ معراج نامہٕ وننہٕ۔ کٲشِر زبٲنۍ منز وَننہٕ آمٕتۍ اَلہٕ پلہٕ سٲری معراج نامہٕ چھِ وژن۔سارنٕے یِتھٮ۪ن وژنن منز چھِ ژور مِصرعہٕ وٲلۍ بندتہٕ پرٮ۪تھ کُنہ بندس چھُ ترییو مِصرعو پتہٕ کنُے ووجہ مصرعہٕ، وۅں گو و تعشوقہٕ وژنو مقابلہٕ چھِ اَمہ قبیلٕکۍ سٲری وژَن ژھۅچَن بحرن منز وننہٕ آمٕتۍ۔اَمہ گاچِکۍ وژَن یِمن ہُند موضوع تہٕ مواد معراج شریف تہٕ اَمِکۍ واقعات چھِ اکثر صوٗفیانہٕ مجلسن منز تہ گٮ۪ونہٕ یوان تہٕ کامٮ۪ن کارن دوران تہ مثالے نٮ۪ند کالس ، گۅڈٕ رٔوۍ کالس بیترِ منز۔ یِمن وژنن منز سمٲجی ، سیٲسی یا عشقیہ واقہٕ بیان سپدۍمٕتۍ چھِ تِم چھِ مختلف موقن پٮ۪ٹھ گٮ۪ونہٕ یِنہٕ علاوٕ دہر ٹھسَس پٮ۪ٹھ لڈی شاہ رٔنگۍ تہ وکھناونہٕ یوان۔ دراصل  چھُ یِمن وژنُن ہُند گرُت تہٕ آرُت یوٗت ژھوٹ تہٕ لۅتہٕ وٲے زِ یِم ہٮ۪کن کُنہ تہ شایہ تہٕ کُنہ تہ موقس پٮ۪ٹھ گٮ۪ونہٕ یِتھ۔ اماپوز یَتھ یَتھ وژنس معراجِ شریف تہٕ اَمِکۍ واقعات موضوع تہٕ مواد رٔنگۍ باگہ آیہ تمہ سعادتہٕ سٍتۍہُرٮ۪و تَتھ بوش۔ کٲشِر زبٲنۍ ہُند اکھ تہٕ معراج نامہٕ چھُنہٕ تَتھ شعرٕ زٲژ منز وننہٕ آمُت یتھ اصطلاحس منز مثنوی ونان چھِ۔ یِمن وژنن منز معراجِ شریف بیان سپُدمُت چھُ تِمن ہٕندٮ۪ن بندن ہٕنز گرند چھنہٕ گٔنڈِتھ۔

کٲشرِ زبٲنۍ منزچھِ نُندٕ بانٮ۪ن نعتن سٍتۍ سٍتۍ معراج نامہٕ ونہٕ نٕچ روایتھ سٮ۪ٹھاہ قدیم۔ محمود گٲمیِس برونہہ چھُ میر عبداللہ بیہقی سُند ناو بڈٕ اہم۔اَوٕ کِنۍ زِ تمٔۍ کٔر پننہ شٲعری منز دین اسلام تہٕ اَمہ کٮ۪ن مختلف موضوعاتن ہٕنز مختلف شعر زٲژن منز باوَتھ ، گۅڈنچہ لٹہ کٔرِن بییو زبانو پٮ۪ٹھٕ قصہٕ ترجمہٕ ۔مثنوی نگٲری تُلُن محمودس برونہہ دَس۔ اگرمحمود گٲمی سُند مرن سنہٕ1855 ء دُرس مانو تیلہ چھُ سُہ میر عبداللہ بیہقی یَس﴿ سال وفات1807 ء ﴾ پتہٕ ارتٲجی وُہرۍ ییمہ عالمہٕ گژھان ۔ دراصل  چھِ میر عبداللہ سٕندِ دٔسۍ فارسی زبٲنۍپٮ۪ٹھ ترجمہٕ کٲری ، حکایت نگٲری، مثنوی نگٲری تہٕ دینی مسلن ہٕنز سیود سادٕ باوَتھ کٲری ہٕنز مالہٕ پھۅلنہٕ ہٮ۪وان یٔہے عمل چھے محمود گٲمیِس تاں واتاں واتاں یہ دٔپۍ زِ تہ گاشہٕ مندیُن پراوان ۔ میرعبداللہ بیہقی سٕنز شٲعری چھنہٕ کانہہ تھٔز تخلیقی شٲعری بلکہ  چھے سۅ دینی تہٕ عقیدتی خیالن ہٕنز سیود سادٕ تہٕ باضے جایَن اوگرٕ تھوگرٕمنظوٗم باوَتھ ۔

میر عبداللہ بیہقی سُند معراج نامہٕ چھُ ژۅیتٲجہن ژُ مِصرل بندن ہُند، پرٮ۪تھ بندُک ووجہ مصرعہٕ چُھس"صلی اللّٰہ علی النبی"شعرن ہُند کُل تعداد چُھس 228، اماپوز معراجِ شریفٕکۍ واقعات چھِ فقط اکھ ہتھ دۅیتٕر ہن شعرٕنٕے منز باونہٕ آمٕتۍ، شعر ہتھاہ چُھنہٕ سیدِسیود معراج شریف کٮ۪ن واقعاتن سٍتۍواٹھ تھاوان۔ یِمن منز چھُ شٲعرن پننہ انکسٲری ہُند ، غم قیامتُک تہٕ باقٕے یِتھِ نٕے معاملاتن ہُند ذِکر کورمُت اکھ واقعہ تہ چھُ بیان آمُت کرنہٕ یُس آنحضوٗرصلی اللہ علیہ وسلمن ہٕندِ معراج شریف پٮ۪ٹھٕ پھیرِتھ تشریف اننہٕ پتہٕ ظہور پذیر سپدان چھُ تہٕ اَکھ یہودی چھُ کلمہٕ پران۔ دراصل  چھُنہٕ میر عبداللہ شعرو شاعری ہٕندِ فنک کمال نہٕ پراوُن یژھان تہٕ نہٕ ہاوُن۔ سُہ چھُ عام ان پر کٲشرٮ۪ن سیود سادٕ تہٕ عام فہم زبٲنۍ منز دین تہٕ دینٕکۍ مسلہٕ سمجھاوان تہٕ یِتھٕ پٲٹھۍ اَجر و ثوابُک توقع کران ۔ یہ کتَھ چھِ سٲری زانان زِشٲعری چھے تخلیقی عمل، یَتھ منز مُشٲہدس تہٕ تخیُلہٕ کِس وُپھٕ وارس زبردُس عمل دخل چھُ۔ اماپوز دینی موضوعن ہٕنزِ باؤژ دوران چھے تھزِ خیال آفرینی تہٕ تخیُلہٕ چہ جولٲنی روٹہٕ گژھنٕچہ کینہہ مجبورۍ یہ تہ بُتھِ یوان۔ پٮ۪ٹھٕ معراج شریف ہیوٗ معجزہ لامثال بیان کرنہٕ وِزِ چھنہٕ یِمن چیزن ہٕنزگنجٲیشی روزان ۔ہرگاہے کُنہ کُنہ تخلیقی عملہ تہٕ پیکر ترٲشی خٲطرٕ موقعہٕ میلہٕ تہ،تمہ وِزِ گژھہ کانہہ قادرالکلام سخنور آسُن۔ ییمِس استعارٲتی شعرٕ زبان ورتاونس ،پیکرترٲشی اِبہام تہٕ ایہام پٲدٕ کرنس تہٕ مختلف صنعژ بارسس انہٕ نَس پٮ۪ٹھ وۅستادانہٕ دسگاہ آسہ مثالے فارسی زبٲنۍ ہُند نظٲمی ، گنجوی تہٕ عبدالرحمان جامی۔ میر عبداللہ بیہقی سُند شعر مِزازٕ چھُ بیون تہٕ بدوٗن۔ سُہ چھُ اکھ تیتُھ ڈِکشن پٲدٕ کران ییتہ اَندٕ وند سادگی ، سٮ۪زر تہٕ شوٗزَر چھُ۔ تسُند کانہہ شعر چھُنہٕ بسیار جہژل، سُہ یہ ونان چھُ تہ چھُ بوزن وٲلِس پوٗرِ پوٗر پلہ پٮ۪وان ، تمٔۍ نہ چھِ استعار ورتٲوۍمٕتۍ تہٕ تشبیہہ ژھارٕ مژٕ تہٕ نَہ پیکر تھُرۍ مٕتۍ۔ شاید چھِنہٕ تسٕندۍ موضوع یِمن چیزن ہٕندۍتقاضہٕ کران۔ تسُند سیود سادٕ لہجہ چھُ بوزن وٲلِس فورن متٲثر کٔرِتھ آوٕراوان۔ انسان چھُ سوت سوت تہٕ لوت لوت مگر روٲنی دار مِصرعو سٍتۍ اندر ۍ أندری باؤژ ہُند ہر تر محسوٗس کران ۔ اَمہ شعرٕ لہجٕچ مثال چھُ تسُند معراج نامہٕ۔ یتھ منز واقعاتن ہٕندِٮ۪ن تفصیلاتن کُن زیادٕ دیان دِنے آمُت چھُنہٕ۔ اَتھ منز بیان کرنہٕ آمتٮ۪ن واقعاتن ہٕنز ژھۅٹرن چھےے یِتھٕ پٲٹھۍ ۔

"آنحضورن ہٕندِ نبووتٕکۍ باہ ؤری ٲسۍ مکمل سپدٕۍمٕتۍ، ماہ رجبُک اوس شتہٕ وُہم تٲریخ ، رٲژ ہٕندِس گۅڈنکِس پہرس منز گوو حضرت جبرئیلؑ امین حضوٗر اقدسس نِشہ بُراق ہٮ۪تھ حٲضِر تہٕ عرض کورُکھ ،حضرت تۅہہ چھُ حضرت رب العالمینن سال کورمُت ، آنحضور سپٕدۍ بُراقس سوار، وٲتۍ مسجدِ اقصیٰ ۔ییتہ سٲری انبیائے کرامؑ انتظارس ٲسۍ۔ سارِوٕے کٔر نماز ادا۔ پیشو ا سپدُکھ نبی آخر الزمان پتہٕ کھٔتۍ زَمُردچہ ہیرِ تہٕ افلاکن ہٕندِس سٲلس دوران سپدُکھ واریہن انبیائے کرامن سٍتۍ ملاقاتھ۔ سدرة الُنتہیٰ وٲتِتھ آکھ رف رف پیش کرنہٕ ۔ اتہ اور ہیوک نہٕ جبرئل تہٕ بُراق گٔژِھتھ۔ اَتی پٮ۪ٹھٕ وٲتۍعرش اعلیٰ ہس پٮ۪ٹھ ییتہ عاشقس تہٕ معشوقس ما بین راز و نیاز سپُد أتی آو اُمتہٕ خٲطرٕ گۅڈٕ پانژٕہن تہٕ پتہٕ پانژَن روزانہٕ نمازن ہُند حُکم۔ ماہ رمضان سپُد فرض"۔

کتَھ چھے صاف زِ میر عبداللہ سُند وٲحد مقصد چھُ تبلیغ تہٕ تفہیم دین نَہ زِ شٲعرانہٕ ہُنر مندی ہاوٕنۍ

معراج رسول اللہ

بوزتہٕ ونی میر عبداللہ                  چھُے سارٮ۪ن تِہُند پناہ                   صلی اللّٰہ علی النّبی

شتوہم ماہ رجب                             بود خوفتن در اوّل شب           آو جبریل باصد ادب                  صلی اللّٰہ علی النّبی

باہ ؤری نبووتس                            گٔیہ ییلے آنحضرتس                           نوٗرٕ گاہ پیوو شش جہاتس               صلی اللّٰہ علی النّبی

دوپُے ربن ژے پٮ۪ٹھ سلام ہیور کھٔسِن خیرالانام                  اون مے براق کیا خۅش خرام                   صلی اللّٰہ علی النّبی

ییلہ نبی سپٕنۍ سوار                          گوو تہٕ اقصیٰ ہیوتن قرار            انبیا ٲسۍ در انتظار                                                    صلی اللّٰہ علی النّبی

زُمردٕچ تہٕ سونٕچ ہیر                     برونٹھ آیکھ تہٕ کھٔتۍ سوار                  گٔیہ کھٔسِتھ تاباں چوماہ                     صلی اللّٰہ علی النّبی

ییلہ ووتُے سُہ زیر فلک        اوس دربان تتہ اکھ ملک       اوس اسماعیلسؑ ہیوٗ سُہ اکھ      صلی اللّٰہ علی النّبی

اوس آدم بہتھ تتے                    یا نبی ژٕ اوسُکھ کتے                                                 جان وندے چانی وتے       صلی اللّٰہ علی النّبی

﴿معراج نامہ از میر عبداللہ بیہقی﴾

امی قبیلُک معراج نامہ چھُ کٲشِر زبٲنۍ ہٕندۍ مشہوٗر بسیار گوتہٕ بسیار پاسل شٲعِر محمود گٲمی یَن تہ لیوٗکھمُت۔ تسٕندِس اَتھ عقیدتی منظوٗمس چھِ ستَتھ ژُ مِصری بند ۔پرٮ۪تھ کُنہ بندُک ووجہ مِصرعہٕ چُھس :

"صلی اللہ عَلَیکَ یَا رَسُولُ اللہ"

اَمہ کٮ۪ن شعرن ہٕنز گرند چھے ترے ہتھ تہٕ ٲٹھن شعرن تام واتان ۔اَتھ منزچھِ واقعات ہنا تفصیلہٕ سان بیان آمٕتۍ کرنہٕ۔ اَمہ باوجود چھَنہٕ اَتھ منز کانہہ تھٮ۪کٕنۍ لایق فنی خوبی نظرِ گژھان۔ یہ تہ چھُ واقعاتن ہُند سید سیود بیان۔محمودن تہ چھُ یہ ثواب تہٕ اجر حٲصِل سپدنکہ امارٕ تہٕ طمہہ مۅکھٕ لیوٗکھمُت۔ حالانکہ اوسط سوتھرکِس اتھ منظومَس منز یُس سِر ساوِرُک تھٔتھرل ماحول وۅتلاونہٕ یُن گوژھ سُہ چھُنہٕ وۅتلیومتُے۔ موضوع تہٕ موادکہ حوالہٕ یۅسہٕ وُپھٕ وٲری تہٕ وُژھٕ وٲری اتہ نظر گژھٕنۍ گٔژھ سۅچھنہٕ کُنَے ۔ محمودن چھِنہٕ اتہ شٲعرانہٕ ول ورتٲوۍمٕتۍ۔ دراصل یہ کینژھاہ تمٔۍ پورمُت اوس یا بوٗزمُت اوس ۔تی بووُن سیّدِسیود۔تتَھ ہیوکُن نہٕ ژینمتہ یا سٔرۍمتہ تجربٕکۍ پٲٹھۍ شعرٕ وردن لٲگِتھ۔ باسان چھُ تمٔۍ تہ چھُ اَتھ ٲولِس مقدس موضوعس تہٕ اَمہ کٮ۪ن متعلقاتن پھٔرۍ پھاہ تہٕ تخیّل چہ کوندِ منز پَین جوش دِنُک جُرتھ کرُن ننہٕ وورُے شمشیر دارِ پیٹھۍ پکہٕ نَس برابر بلکہ  تمہ کھۅتہٕ تہ مُشکل زونمُت ، اوے کیا زَن مۅلانکون ہیکہ اتھ وژنس سپدِتھ ،البتہٕ وارٕیہن جاین چھُ سُہ خبر کیا زِ ، اتھ منظومس منزاوسط درجچہ شٲعری ہٕندِ سوتھرِ پٮ۪ٹھٕ تہٕ بۅن وسان ۔ہرگاہ کُنہ ساتہٕ تشبیہہ ورتاوان تہ چھُ تتہ تہ چھس رِکٕنۍ گژھان:

حمدتس ییمۍ پٲدٕ کٔرۍ انبیائ   تِمن منز ژورُن رسولِ خدا       تس پتہٕ تہندٮ۪ن ژورن یارن                        صلی اللّٰہ علیک یا رسول اللہ

﴿دۅن شعرن چھِ قٲفیہ رلان تہٕ ترییمِس نہٕ کہیں﴾

ژوٗرمِس فلکس کھٔتۍ توشن      نوٗرٕ تہندِ آفتاب گو روشن            عاشقی کٔرٕس تتہ پمپوشن            صلی اللّٰہ علی النّبی

﴿ترییم مِصرٕ عہ چھُ بتس منززنتہٕ دٔنز دانہٕ﴾

سَتھ ساس ملٲیِک برونٹھٕ آمٕتۍ                                               نوٗرٕکۍ خان چھِکھ پٲراوۍمٕتۍ        ژیے بییہ چانٮ۪ن یارن کِتۍ   صلی اللّٰہ علی النّبی

تورٕ دراو از زبانِ قدرت یی   السلام علیک ایہُاالنّبی          سوٗزمے رحمت برکت ژیے                   صلی اللّٰہ علیک یا رسول اللہ

ووتھ تورٕ عرشہ کو ت خۅش سپُن               جبریلن تس تعریف وون      ژوٗرۍمِس فلکس پٮ۪ٹھ واتہٕ وُن                    صلی اللّٰہ علیک یا رسول اللہ

﴿ناقِص قٲفیہ بٔندی﴾

اماپوز قٲری سٕنزِ ذہنی آورن کٲری خٲطرٕ  چھُ محمودن حُبِ رسول تہٕ تِہُند شفیع المذنبین آسُن تہٕ اَتھ مقدس تہٕ مُحترم جذبس تہٕ احساسس پزنہٕ پٲٹھۍ باوَتھ کٔرمٕژ ، اکثر شعر چھِ سادٕ تہٕ اَمہ سادگی سٍتۍ چھُ ذِکر رسول کرنہٕ وِزِ تعظیم تہٕ تکریم یٔژ پٲٹھۍ رچھنہٕ آمُت

دوپ نس یا رسول کیا آکھ ہٮ۪تھ                    دوپ نس یا اللہ غمِ اُمت  اُمتس کر تہٕ مے مغفرت        صلی اللّٰہ علیک یا رسول اللّٰہ

دوٗرِ اوس تتہ اَدٕ قاب و قوسین                 رگہ سُنمب دوٗرٮ۪ر اوس مابین                       سورُے سپُد تتہ عین الیقین  صلی اللّٰہ علیک یا رسول اللّٰہ

وننہٕ چھُ یوان زِ کانہہ سِری شٲعرٕے چھُ موضوعاتن تہٕ موادٕچ دِلچسپ تہٕ پٔز بلکہ  وَنو جنیون Genuineشعرٕ باوَتھ کٔرِتھ ہٮ۪کان یہ خیال تہٕ راے چھِ سانٮ۪و کٔہۍ یاہ صوفی شٲعرو صحی ثٲبت کٔرمٕژ۔ اَمِچ مثال چھِ وہاب کھار ، شمس فقیر تہٕ اسد پرے ہوٮ۪ن صوٗفی شٲعرن ہٕندۍ ؤنۍ مٕتۍ معراج نامہٕ۔ نی تون وہاب کھارُن معراج نامہٕ تہٕ اَتھ چھِ کُل بِل پانژٕ وَنزٕہے ﴿ 55 شعر مگر یِمو شعرو چھُ اَکھ تھٔتھرل وۅسہٕ درۅسہٕ وول تہٕ وُپھل وال سری ماحول وۅتلوومُت ۔عاشقن چھُ معشوقس سال کورمُت ۔ فرشس تہٕ عرشس چھُ پٲراو سپدان ، رازن چھِ ٹھانہٕ ؤتھۍ گژھن وٲلۍ بے حد سِرسٲوۍشبانہٕ محفلہ منز چھِ عاشقس تہٕ معشوقس درمیان راز ونیا ز چہ کتھٕ سپدن واجنہ ، صوٗفی شٲعرن نِش چھُ ظُلمتٕے نوٗر۔ سیاہ تہٕ سیاہی چھِ صوٗفین ہٕندۍ زٕ اہم اصطلاح ، معراج شریف چھُ رٲژ منز سپدان۔ اماپوز یہ چھُ سیٲہی تہندِ خٲطرٕ یِم غٲفل محوِ خواب چھِ ۔یۅہے چھُ سُہ ویلہٕ ییلہ کایناتن ہٕندۍ زروزرات ،ارض و سماوات نوٗرٕ سٔرۍ سپدان چھِ۔ فرشس پٮ۪ٹھ تہ چھِ انبیائے کرامؑ استقبالہٕ خٲطرٕ پراران تہٕ فلکن پٮ۪ٹھ انبیائے کرام تہ تہٕ فرشتہٕ تہ، پانہٕ چھُ رب الجلیل انتظارس۔ نبی کریمو نیوٗ معراجِ شریف خٲطرٕ بہ جسد تشریف۔ اماپوز اَمیُک سِرساوٮ۪ر ، اَمیُک تقدیس ، نوزکی اَمہ کٮ۪ن واقعاتن ہُندظہور پذیر سپدُن چھُ تاقیامت عظیم ترین تہٕ لامثال سِرسٲوۍ واقعہ۔ معراجِ شریف ہوس نوزک تہٕ عقلہ ہٕندٮ۪و حدو گژھنہٕ گٔژِھتھ موضوعس تحت یِنہٕ وٲلۍ واقعات بیان کرنہٕ خٲطرٕ بلکہ  وَنو شٲعرانہٕ باؤژ کٲری خٲطرٕ چھَنہٕ مُروجہ اسطوٗرن تہٕ استعارن ہٕندِ ورتاوٕچ گنجٲیش آسان۔اوے چھِ صوٗفی شٲعر یِمن ہٕنز شعرٕ زبان،غٲر صوٗفی شٲعرن ہٕنز زبٲنۍنِش واریاہس حدس تام مختلف آسان چھے۔ سری تجربات زیادٕ رٕتۍ پٲٹھۍ بٲوِتھ ہٮ۪کان۔ یہ چھے بیاکھ کتَھ زِ یِمن لوٗکن نہٕ یِمن تجربن ہُند واوٕے زانہہ ڈولمُت آسہ تِمن چھِ یِتھۍ شعر محض پرژھٕ باسان تہٕ پلہ چھُکھ نہٕ کینہہ پٮ۪وان۔

وہاب کھار﴿وفات 1912ئ﴾ سٕندِس اَتھ معراج نامَس منزچھُ آورن کٲری ہُند تیوٗت زور زِ قٲری یا بوزُن وول چھُ زنتہٕ پانہٕ وُپھ تُلِتھ سٲری واقعات چشمو وُچھان ۔زنتہٕ سُہ واقعاتن ہٕندِظہور پذیر سپدنہٕ وِزِ حٲضر آسان چھُ۔ اَتہ چھُ واوُک ہیوٗ ؤژھ تہٕ بانبرُن۔معراجُک مہرازٕ حضرتِ تاجدارِ دو عالم صلی اللہ علیہ وسلم چھِ معراجس نیران۔ کایناتس منز چھُ زنتہٕ اکھ ہلچل پٲدٕ سپدان۔ وۅسہٕ درۅس چھے ییژ زِ پرٮ۪تھ کانہہ تہٕ پرٮ۪تھ کینہہ چھُ استقبالچہ تیٲری سٍتۍ آوُر ۔یوٗت زِ حضرتِ جبرئلؑ چھِ بنان علمدار، حضرت اِسرافیل ؑرکاب دار، حضرتِ میکایل ؑ زینٕکۍ پٲراو کار تہٕ حضرتِ عزرائیلؑ چوب دار ! خوشی ، شٲدۍ یانہٕ وُژھ ، بانبرُن ،پٲراو سکھراو تہٕ حٲرت ۔بُراق سُند حُلیہ تہٕ افلاکن ہُند سٲل چھُ اَکھ تٲجُب انگیز تہٕ حٲرتن کرن وول خۅش یِوُن ماحول۔ مرحبا چھُ سٲنِس وہاب کھارس زِسُہ چھُ یہ ماحول پنہٕ نِس قٲرۍ یَس وُچھِ ناوان تہ تہٕ ژینہٕ ناوان تہ۔ وہاب کھار چھُ واوٕکۍ پٲٹھۍ پانہٕ بانبرِ منز، استقبالچہ تتھ عملہ سٍتۍ آوُریتھ منز عرش و فرشٕکۍتہٕ افلاکن ہٕندۍ مٔکین اَتھ سعادت تہٕ عظمت واجنہ عملہ سٍتۍ آوُرۍ چھِ۔ سُہ چھُ معراجہ خٲطرٕ تشریف نِنہٕ وٲلِس جانانہٕ پیغمبرِ کریمس تشریف نِنہٕ وِزِ رۅنہ رُمالہ سٍتۍ واو کران تہٕ أتھۍ خوشی آمیز ترپہ ترپہ ہٕندِس حالس منز اعلان کران زِ حضرت تاجدارِ دو عالم دراے معراجس ۔ شعرن ہٕنز روٲنی منزے چھُ اکھ رۅنہ وَزٕوُن تہٕ واوٕ کۍ پٲٹھۍ بانبریومُت سازُت تہ وزان ۔ واقعاتن ہٕندۍ تفصیل تہ چھنہٕ اتہ بلکہ  افلاکن ہٕندِس سٲلِس دوران انبیائے کرامن سٍتۍ سپدیمتہ مُلاقاتُک ذِکر تہ چھُنہٕ اَتہ :

کریو رۅنہ رومالے واو                                         تاجدار سون معراجس دراو

اَلسلامُ علیکم تازٕ اخلاص                                   ؤتھِو حض پانس کٔرِو پٲراو                                تاجدار سون معراجس دراو

حضرتِ جبریلؑ روٗد علمدار        اسرافیلؑ بہ پاے برکار

میکایلنؑ کور زین پٲراو                تاجدار سون معراجس دراو

حضرتِ عزرایل روٗد چوب دار                   ۂسۍ تھَر براقس سَپٕز اظہار

چشمہٕ چھس رف رف یمبرزلہ چھاو        تاجدار سون معراجس دراو

ترییمہ اَسمانے پٮ۪ٹھ وُچھکھ ہیر                                              پانس ٲسۍ دپان اَسہ گوو ژیر

دست خۅد نگین تس بخشنہٕ آو                     تاجدار سون معراجس دراو

ژوٗرمہ آسمانے ترٲوکھٕ نظر                              سارِوٕے وُچھِ ہے رۅپہٕ جانور

سۅنہٕ کانپھ ٲس تِمن خصلت کاو              تاجدار سون معراجس دراو

پٍنژمہ اَسمانے مَس ملرٮ۪ن                           ٲخر زمانہٕ کٮ۪ن تی چاون

عٲرفن تہٕ عاشقن تی بٲگراو                            تاجدار سون معراجس دراو

شییمہ آسمانے شینہٕ کۅہاہ                             مۅے والس گٔنڈِتھ از درگاہ

جانورا بٔسِتھ در صحراو                                                تاجدار سون معراجس دراو

سٔتۍمہ آسمانے خۅطبہٕ ہیرا                             سیاہ تخت پوش جاے گمراہ

لانہایت وُچھکھ کو ت بورُک چاو                                      تاجدار سون معراجس دراو

یۅہے حال چھُ شمس فقیر﴿ وفات 1901ئ﴾ سٕندِ معراج نامُک بلکہ  چھُ تَتھ منز سِری اظہار زیادے کاڈ کٔڈِتھ گومُت۔ اَتھ منظومس چھِ صرف پانژٕ تٲجی شعر۔امیُک صوٗفیانہٕ طرزِ اظہار چھُ اَتھ اکھ چُس ، خوبصورت تہٕ حیرت انگیز فن پارٕ بناوان۔حٲرت تہٕ آورن کٲری چھِ زیادے ہُران ییلہ صنعتِ تضاد وٲلۍ شعر نظرِ گژھان چھِ۔ اَمیُک سورُے حُسن چھُ موٗلہٕ تلہٕ تمہ لفظہٕ و وترِ تہٕ ترکیبہٕ تھُریہ سٍتۍ بارسس آمُت۔ یۅسہٕ بہ ظٲہر شعوٗری کو ششہ سٍتۍ سپدیمٕژ چھنہٕ۔ بلکہ  أمِس وٲتِس پرٲتِس صوٗفی تہٕ صوٗفی شٲعرٕ سٕنز ازلہٕ باگہ آمٕژِ ناگہٕ وُزیہ سٍتۍ پٲدٕ چھِ گٲمٕژ۔ یِمہٕ لفظٕ ملہٕ وَنہٕ تہٕ زیرِ نظر پیکر تہٕ شبیہہ وٲلۍ شعر چھِ اَسہ ہوٮ۪ن عام قٲ رین ہٕندِ خٲطرٕ محض پرژھٕ باسان۔ اماپوز یِم چھِ تِم اکٲیل تجربہٕ یمن تجربن کاے بخشنہٕ خٲطرٕ شمس فقیر س ہیوٗ معرفتہٕ موت صوٗفی شٲعرٕے آسُن گژھِ۔ صوٗفین تامَتھ چھِ سیرِ اسرارن ہٕنز باوَتھ پیر در پیر سینہٕ بہ سینہٕ سپدان روزان یِم چھِنہٕ ظٲہری عٔلِمس لٲرۍ یِم چھِ بٲطنٕکۍ طٲلب تہٕ وتہٕ گتھ۔ اوَے چھُنہٕ شمس فقیرنس معراج نامس منز تہ واقعاتن ہٕندِس بیانس کُن خاص ظۅن دِنہٕ آمُت ۔ بوزوے تہٕ یہ معراج نامہٕ چُھیی نہٕ بیان، یہ چھُ اکھ سِری تجربہٕ تہٕ أتھۍ سِری تجربس چھِ شعرٕ وردَن پٲرنہٕ آمُت۔ شعرٕ زٲژ کِنۍ چھُنہٕ یہ سانٮ۪ن روایتی معراج نامن نِش مختلف ۔اتہ چھِ وہاب کھارنہ معراج نامٕکۍ پٲٹھۍ وُپھٕ وٲری ،وُژھٕ وٲری ،حٲرٕتُک تہٕ وۅسہٕ درۅسہ ہُندماحول وۅتلاونہٕ آمُت۔ یِتھِ ماحولہٕ خٲطرٕ چھِ شعرن ہٕنز روٲنی ضروری  تہٕ شمس فقیرُن پرٮ۪تھ کانہہ شعر چھُ روٲنی دار :

دویمہ آسمانے ترٲوٕکھ نظر        ساروٕے وُچھ ہے رۅپہٕ جانور

عابِد تہٕ زٲہد سٍتۍ عالمن                ظہور تمہ کُے چھُے دۅن عالمن

 

تریمہ اسمانے وُچھِکھ ترے ناگ             ترٮ۪ن اوس آب تے أکِس ناداغ

تِم زٕ ٲسۍ پانہٕ وٲنۍ آب بٲگران                 ظہور تمہ کُے چھُے دۅن عالمن

شییمہ اَسمانے وُچھکھ دٔرۍیاو                     تتھ منز ٲس پکان نوحؑ سٕنزناو

پانہٕ ٲس پکان کانہہ نہٕ واین                   ظہور تمہ کُے چھُے دۅن عالمن

سٔتۍمہ اَسمانے وُچھکھ سَتھ باغ                   ستن باغن اندر سَتھ ٲسۍ ناگ

بیون بیون جویَن لذتھ نیران                                                ظہور تمہ کُے چھُے دۅن عالمن

ٲٹھۍ مہ اسمانے وُچُھکھ ملکاہ                                                کنو کِنۍ پھل کھٮ۪وان بے انتہا

دہانہٕ کِنۍ اوسُے یوٗرۍ تراوان                     ظہور تمہ کُے چھُے دۅن عالمن

سدرة المنتہیٰ کیا زبر مقام                                نہ چھُ تتہ صُبح نہ چھُ تتہ شام

نوٗرٕ مشالہ ہٮ۪تھ حوٗرٕ ونہٕ وان                              ظہور تمہ کُے چھُے دۅن عالمن

شیٹھ ترے ہتھ کتھٕ تِمو کرِ ظٲہر                                                شیٹھ ترے ہتھ کتھٕ تِمو کرِ بٲطن

دوستس کیا سنا وون دوستن                      ظہور تمہ کُے چھُے دۅن عالمن

ازلٕکۍ گرٕ وٲلۍ ییلہ گرٕ آے                                    نولچھ نو ساس نَو ڈالہ آے

معراج کور ہے بیک ساتن                       ظہور تمہ کُے چھُے دۅن عالمن

صُبح پھول سیر تِمو بوو یارَن                            اصحابن سارِنٕے کِبارن

سینہٕ بہ سینہٕ ہووہے نِش صوٗفین       ظہور تمہ کُے چھُے دۅن عالمن

یِتھے پٲٹھۍچھِ اَسد پرے ﴿وفات1916ئ﴾ تہٕ شاہ لسم سٕندۍ معراج نامہٕ تہ کٲشرِزبٲنۍہٕنز ارزتھ۔ یم دۅنہٕ وے صاحِب ٲسۍ سٲنۍ ناودار صوٗفی شٲعر۔معراج شریفس متعلق یہ کینژھاہ تِمو پنہٕ نٮ۪ن مُرشِدن نِش تہٕ اسلافن نِش بوزمُت اوس تہ چھُکھ صوٗفیانہٕ آیہ منظوٗم کورمُت۔ باؤژ ہٕنزو خوبیو کِنۍ چھِنہٕ أہندۍ معراج نامہٕ وہاب کھار تہٕ شمس فقیر نِس معراج نامہٕ کِس پایس تام وٲتتِھ ہیکۍمٕتۍ ۔اماپوز معراج شریفُک موضوع چھُ یوٗتاہ نوزُک زِ کمن کمن عٲلمن چھُ قلم لرزان۔ حتیٰ کہ حضرتِ سید سلیمان ندوی ہوس عٲلمس تہٕ محققس تام پیوو ا حوالِ معراج بیان کران کران ونُن زِ

"راز ایں پردہ نہاں است، ونہاں خواہد بود"

تاہم چھِ سانٮ۪و واریہو صوٗفی شٲعرو یِمو عام طور دنیاوی علوٗم پرٔۍمٕتۍ ٲسۍ نہٕ عقیدت ، حبہ تہٕ احترام کیو ثوابہٕ پُژھۍ، معراج نامہٕ ؤنۍ مٕتۍ ۔اللہ تعالیٰ کٔرِن تِمن سارِنٕے ہٕندۍ تہٕ اَسہ ناکارن ہٕندۍ سہو و خطا تہٕ گۅناہ معاف﴿آمین﴾۔

وہاب پرینہ معراج نامہٕ کٮ۪و اَتھِ آمتٮ۪و دُستتھو شعرو منزچھِ نمونہٕ رٔنگۍ کینہہ شعر پیش:

حضرت سون کھوت معراجس                                         بہٕ وندس زُو تہٕ جان اسرارس

مٲل پیوس پانس نیوٗن سالَس                   بہٕ وندس زُو تہٕ جان اسرارس

رنگہٕ رنگہٕ قدرت وُچھ نووُن                          تس نِش کینہہ نہ سَہ ژھایہ تھووُن

ظہور دِتھ گو پننہ کُنِرس                                           بہٕ وندس زُو تہٕ جان اسرارس

شعریعت عامس بییہ خاصس                    طریقت سیرا بووُن تس

دوپ نس رِندن دِ اَمیُک مَس              بہٕ وندس زُو تہٕ جان اسرارس

حقیقت دیدو وُچھ نووُن                                     چووُن معرفت حیات تھووُن

چھِوِرِن تمٔۍ سٕندۍ کورنے مَس                   بہٕ وندس زُو تہٕ جان اسرارس

وہاب کھار تہٕ شمس فقیرنٮ۪ن معراج نامن اندر رٕ تٮ۪ن فن پارن ہٕنز واریاہ خصوٗصیٔژ ٲسِتھ تہ چھُ یہ پزر پننہ جایہ موجود زِ فنی اعتبارٕ چھُنہٕ سانٮ۪و شٲعرو کانہہ تیُتھ معراج نامہٕ بارسَس أنِتھ ہیوکمُت یُس مثالے فارسی زبٲنۍ ہٕندِکُنہ بہلہ پایہ معراج نامس ٹھۅلہ نے تہٕ لرِ لور تھونہٕ ہیکہ یِتھ۔ اوے چھُ رحمان رٲہی تہ ونان۔

"شاید پییہ مانُن زِکم از کم فارسی زبٲنۍ ہٕندٮ۪ن " خۅش بیانن" مقابلہٕ چھِ کٲشِرۍ نعت گو معراج نامہٕ ونان ونان باسان زنتہٕ سٔتٕرکٲنۍ ہٮ۪تھ یوسف مٔلۍ ہینہ درامٕتۍ"              ﴿اَکھ شاہکار معراج نامہٕ، انہار نعتیہ ادب نمبر ۔ص 61۔﴾

کٲشرِ زبٲنۍ منز چھِ بییہ واریہو شٲعرو معراج نامہٕ ؤنۍ مٕتۍ،مثالے امیر شاہ کریری ، غلام محمد حنفی سوپورۍ، مولانا انور شوپیانی، غلام قادر درویش، رجب حامد تہٕ رسول بٹ بیترِ۔ یِمو منزٕ امیر شاہ کریری تہٕ مولانا انور شوپیانی سٕندۍ معراج نامہٕ پورٕ تفصیلہٕ سان بیان سپٕدۍمٕتۍ چھِ۔ امیر شاہن چھِ قرآن تہٕ احادیثن ہٕندۍ پوٗرِ پوٗر حوالہٕ دِتۍ مٕتۍ تہٕ یہ معراج نامہٕ أکِس بجہ مثنوی ہٕندِس صورتس منز پیش کورمُت تہٕ مولانا انور شوپیانی صٲبن تہ چھُ پوٗرٕ احتیاطس کٲم ہٮ۪تھ معراج نامہٕ لیوکھمُت یُس شایع تہ سپُدمُت چھِ، موجودٕ دورٕ کٮ۪ن شٲعرن منز چھُ ڈاکٹر رشید نازکی سُند لیوکھمُت معراج نامہٕ" اسریٰ" فنی لحاظٕ تہٕ عقیدتہٕ پُژھۍ سٮ۪ٹھاہ اہم۔

﴿ناتمام﴾

٭٭٭

سوٗنتۍ پنڈتُن کٲشُر فارسی نصاب

 

سونتۍ پنڈۍتٕنہ کٲشُر فارسی نصابٕکۍ ترے قلمی نُسخہٕ چھِ از تام دسیاب سپدۍمٕتۍ ،زٕ سپدٕۍ انیس الرحمان صٲبنہ دٔسۍ دریافت تہٕ تِمو کٔرۍ دۅنویو منزٕ الہٕ پلہٕ 85 شعر نقٕل، یِم 1973ءکہ کٲشرِ شیرازٕکِس گۅڈنکِس شمارس منز اکہ مۅخصر معلوٗمٲتی تہٕ تجزیٲتی مضمونہٕ سان شایع کرنٲوِکھ ۔ تِمو چھِ کینہہ مصرعہٕ تہٕ نیم مصرعہٕ تہ نقل کٔرۍمٕتۍ۔ بیاکھ نصاب سپُد شیرازٕکِس امی ؤرۍیکِس ژوٗرمِس شمارس منز شایع یُس نوم حرف لیکھن وٲلِس دسیاب سپُدمُت اوس۔ اَمہ پتہٕ آو سید انیس کاظمی صٲبس دسیاب سپُدمُت بیاکھ نصاب ﴿ یُس باسان چھُ سونتۍ پنڈۍتُن چھُنہٕ﴾ تِہُنداکھ نوٹ ہٮ۪تھ کٲشرِ شیرازٕکہ دۅیترٕہمہ جلدٕکِس أکِس شمارس منز چھاپنہٕ۔ یِمن سارِنٕے نصابن ہٕنز بحر چھے اکٕے، فاعلاتُن، فاعلاتُن، فاعلاتُن، فاعلات۔ اَمیُک مطلب گوو کشیرِ منز چھُ یِتھۍ نصاب لیکھنُک رواج اوسمُت تہٕ تِمن ہٕندۍ نسخہٕ آسن کُنہ کُنہ لوٗکن نِش ضروٗر موجود۔ وۅں گوو یِمن ہُندضروٗرتھ نہ روزنہٕ کِنۍ تہٕ زمانہٕ کٮ۪و حٲدۍثو سبہٕ آسن اکثر ضایہ تہ گٔمٕتۍ مگر ضروٗرتھ چھُ یِمن ژھۅنڈ ژھٲر دِنٕچ۔ تہٕ دسیاب سپدۍمٕتۍ نصاب شایع کٔرِتھ محفوٗظ کرنٕچ بلکہ  محفوٗظ کٔرِتھ گوژھ اُہند تقوبلی مُطالعہٕ تہ یُن کرنہٕ۔

یِم چھِ پننہ وقتہٕ فارسی ہیچھن وٲلِس تہ تہٕ کٲشُر ہیچھن وٲلِس تہ فٲیدٕ واتناوان روٗدۍمٕتۍ، از یودوَے أہٕنز اہمیت محض توٲریخی چھے مگر یِم نصاب برۅنہہ کنہ تھٲوِتھ ہیکہ دۅہدشرٕکٮ۪ن عام ورتاوکٮ۪ن ضروری لفظن ہُند اکھ لۅکُٹ مۅکُٹ لۅغت تہ تیار کرنہٕ یِتھ، از ییلہ فارسی زبان زانن وٲلۍ اونگجہ ٹینڈٮ۪ن پٮ۪ٹھ گٔنزراونہٕ یِنس یوتاہ روٗدِمٕتۍ چھِ ، ہٮ۪کن یِم نصاب توتہ فارسی لفظن ہٕنز زان دِتھ۔

اَمہ نصابُک یُس قلمی نُسخہٕ مے نِش موجود چھُ تَتھ منزچھِ 160 شعر، یہ نُسخہٕ چھُ اصل نُسخہٕ پٮ۪ٹھ نٲنِل اسلام آبادٕکۍ پیر محی الدین محزوٗن صٲبن ۵۴۳۱ھ منز نقٕل کورمُت۔ محزوٗن صٲب ٲسۍ نہٕ چھرا گۅنماتھٕے یٲتۍ بلکہ  عربی فارسی زبٲنۍ ہٕندۍ عٲلِم آسنہٕ ہُریمانہٕ جان خۅش نویس تہ۔ دپان سونتۍ پنڈت اوس عشق کرنہٕ کِس رٹس پٮ۪ٹھ قٲد کرنہٕ آمُت،ییتہ تمٔۍ فارسی زبٲنۍ ہٕندِس قدردان حٲکمس خۅش کرنہٕ خٲطرٕ یہ نصاب لیوٗکھ تہٕ اَتھ منز کٔشیرِ ہٕندٮ۪ن صحت افزا مقامن ہُند تہ ناو ہیوت تہٕ شییہ ترٕہن پرگنن ہُند تہ، حالانکہ گرند کٔرِتھ چھِنہٕ یِم پرگنہٕ شییہ تٕرہ سمان۔ بییہ چھِ ستن اقلیمن تہٕ ستن دٔرِیاون ہٕندۍ ناو تہ گٔنزراونہٕ آمٕتۍ۔

سونتۍ پنڈتس متعلق چھُنہٕ معلوم سُہ کتھ زمانس منز چھُ اوسمُت۔ وننہٕ چھُ یوان سُہ اوس پٹھان دورس منز۔ کینژَن ہُند گُف چھُ زِ سُہ اوس ڈوگرٕ رازٕ امر سنگھ نس زمانس منز ،ہُپٲرۍ ییلہ سُہ لیکھان چھُ" از اُمید التفاتِ بندگان نادشاہ ،تمیُک مطلب گوو نادشاہ چھُ کستام حٲکم ، یہندِس زمانس منز سونٕنۍ پنڈت اوسمُت چھُ ، تمٔۍ سٕے خۅش کرنہٕ باپتھ چھُن نصاب تہ لیوکھمُت ۔ زیرِ نظر نصابس چھُ مرٲزۍ پھور ، بنان چھُ نقٕل کرن وٲلۍ مرٲزۍ ما آسٮ۪س پھور بدلوومُت نتہٕ ما چھُ سونتۍ پنڈۍ تھٕے مرٲزۍ اوسمُت ۔ بہر حال ، امہ نصابٕکۍ 158 شعر چھِ پیش:

ابتدا کردم باسمِ اعظمِ پروردگار                                           درفن فرہنگِ کشمیری نصابِ اختصار

فارسی گو حرف کشمیری و کشمیری بہ فرس         تاشوی آموختہ چوں طوطٸ آموزگار

خوب تر از بحر ہا بحرِ رمل شُد اتفاق                                 خامہ درفنِ نصاب از بحر دُر شاہوار

فاعلات فاعلات فاعلات فاعلات شعر﴿پد﴾ وزن است ﴿تولُن﴾ چار بار

دے ﴿خدا﴾ سوزمُت رسول........شہریار                                  ﴿شُرۍمُرۍ﴾ داں اہل بیت و چہار﴿متراں﴾ ژوریار

چار کرُسی ﴿ژور پیٹری﴾ چار عنصر ﴿ژور ذات﴾                چار مذہب ﴿ژور وتہٕ﴾ ﴿ژورٕوے﴾ داں ہر چہار

....................                                                                                                      

 ﴿مول﴾پدر﴿موج﴾مادر﴿بوے﴾ برادر آمدہ                           پِسر﴿گوبُر﴾ و ﴿بینہ﴾ خواہر ﴿کو ر﴾ دختر نامدار

﴿مام﴾ خالو﴿ماس﴾ خالہ عمہ﴿پۅپھ﴾ ﴿پیتٕر﴾عمو             نٲنۍ﴿نانہ﴾ جد ﴿بُڈۍبب﴾ بوگیہ صاحب کامگار

ینگہ ﴿کاکٕنۍ﴾ ﴿نۅش﴾ کیلن خۅش دامن نامِ﴿ہش﴾                         خُسر ﴿ہہرو﴾ خُسرپوٗرہ ﴿ہہرٕے﴾ شُد نامدار

﴿رازٕدیت﴾ بیگم است ﴿رازٕرنۍ﴾ بیگم شاہ است            شاہزادہ ﴿رازٕپوتُر﴾ روے او خورشید وار

.................................... ارکان ملک                                   ﴿پتروٗ﴾ میداں بنیرہ ﴿زُر﴾ نواسہ را شُمار

٭

﴿نب﴾ فلک شُکر سنیچر زہرہ را دانی زحل                                ﴿بوم﴾ مریخ ﴿بُد﴾ عطارد ﴿مشتری﴾ برہسپت شُمار

کالچن ﴿بیگاہ﴾ صُبح گوو صباح و شام ﴿کال﴾                    کوج ﴿ننگہ چاشت﴾ است و ﴿مندِنو﴾ نصف النہار

﴿سرِیہ﴾ اسمِ آفتاب و ماہ را ﴿زوٗن﴾ است نام           ﴿گنگہٕ آرہ﴾ کہکشاں و ﴿رات﴾ لیل و ﴿ دۅہہ﴾ نہار

............                                                                                                                       ﴿رنگ میٹھُن﴾ گرمٸ ہنگامۂ ہرکاروبار

﴿رۅنہ لاگنہ﴾ زُنگلہ بستن ﴿نژنو﴾ رقصیدن است        ﴿بانڈ﴾باشد مردمِ رقاص ﴿سونتھ﴾ آمد بہار

﴿رنگہٕ راچھ﴾ شحنہ و جشنِ چراغاں ﴿زوٗل﴾ است              ﴿نوو ؤری﴾ نوروزِ عالم جشن خاندر طے کار

﴿........ نشوو نماٸ مرد و زن                                                              نوجوانی ﴿یاوُن﴾ است و ﴿للہٕ کھول﴾ سودای کار

﴿پانژھ دۅہہ سمسار﴾ دنیا پنج روزے بیش نیست             اے خوشا عمرے کہ گردَد صرف در سوداٸ یار

﴿ہٕنزرٕ﴾ حمایل بود عقد گلو بندِ زنان                                                     زیورِ معشوق ﴿سِنگار﴾ است ﴿پدماں﴾ داں نِگار

﴿دِش﴾ شہر و حرب ﴿جنگ﴾ و ﴿گیون﴾ داں زمزمۂ           ................................................

﴿کنہٕ وولو﴾ گوشوارہ، دسوانہَ ﴿بُنگری﴾                                          پایلہ ﴿خلخال﴾ دانی، لینکرن ﴿گہنہَ﴾ شُمار

آبِ حیات ﴿زندگانی﴾ ﴿ویہہَ﴾ نامِ زہر شُد                       ﴿گٹہٕ﴾ تاریکی بود ظُلمات نامِ ﴿گٹہٕ کار﴾

لینکرن کابین ﴿وردن﴾ جامہائے نو عروس                                                 ﴿دٲنِتھ﴾عاج و﴿شنکھ﴾ناقوس است﴿ہار﴾خرمہرہ شُمار

﴿ٹوٗپ﴾ تکمہَ، ﴿نستہٕ وٲج﴾ حلقۂ بینی بداں                     ﴿وُڈنہ پوٗژی﴾ سربند و رشتۂ دُر ﴿مۅکھتہٕ ہار﴾

﴿منروٗ﴾ حکاک آمد، نامِ کھنن وول ﴿مُہرکُن﴾                                               ﴿کرینکھ﴾ شُد نامِ نگین و ﴿وٲج﴾ انگشتر شُمار

............

﴿ہٲر﴾ مینا ﴿شوگہٕ﴾ طوطہ ﴿اول﴾ نامِ آشیاں                     فاختہَ ﴿کُکِل﴾ کبوتر ﴿کوتُر﴾ ﴿بچرو﴾ راگو ہزار

شہن شاہین ﴿وارِلو﴾ باسند طماغہ                                                         ﴿اتھٕ.... تہیلہ دست ﴿پٲزوولوٗ﴾ بازدار

قاز﴿انٕز﴾ زاغ ﴿کاو﴾ ﴿مۅنگ﴾ قشقل ﴿نیلچو﴾             ﴿نیلہٕ کرٲشی﴾ سبزک آمد ﴿بریگ﴾ عقار

چغد نام﴿ راتہٕ مۅغُل﴾ سبپرہ شُد ﴿راتہٕ کریل﴾                قفس ﴿ٹھوٗپوٗ﴾ کبک ﴿کُکو﴾ جنکے اندرشتوار

﴿پوشہ نوٗل﴾ عندلیب و داں گراغش ﴿ہاگرو﴾          ................................................

﴿ستہٕ توٗ﴾ ہُدہُد بداں و ﴿تونتھ﴾ رامنقار دان                            گُفتگو داں ﴿کتھٕ کرنہ﴾ زدن ﴿لایُن﴿چھۅکھ﴾ نزار

﴿سونہٕ چِچُڑ﴾ مُرغِ زرین ،گوزن ﴿ہانگل﴾ بال﴿پکھ﴾    ﴿ژٔڑ﴾ کنجشک ، صعوہ﴿کانٹُر﴾ ﴿دٮ۪دٕر﴾ مینو را شُمار

﴿دیدری﴾ باشد تذرو ﴿زرککُو﴾ داں دراج                                ﴿کتجی﴾ راگو ﴿ابیل﴾ خوش شگوٗنِ نوبہار

﴿پینژٕکٲنی﴾ صعوہ دانی﴿پونپرو﴾ پروانہ دان                          ﴿مانچھ تُلٕر﴾ ہست زنبوٗرِ عسل اے ہوشیار

........

﴿خام سیری﴾ خشتِ خام و ﴿پختہ سیر﴾ آجر بداں﴿کٔنۍ﴾ سنگ و خاک ﴿میژ﴾ تورہ﴿بُرٕز﴾ کونڈ﴿خار﴾

﴿کٕن دیُن﴾ بُنیاد نہادن ﴿لٔر لدٕنۍ﴾ تعمیر دان                   ﴿پچہ برن﴾ تختہ بندی ، حجرہ ﴿کُٹھ﴾........

﴿سٮ۪ند﴾ بحری است، دریایکہ نامش نالہ شُد                          وٮ۪تھ ﴿بہُت﴾ تالاب وولُر................

﴿سرپٔچھِن﴾ مرغانِ آبی، سرخروشاں ﴿کلرو﴾                      ﴿کاو﴾ زاغ و ﴿گٲنٹھ﴾ کرگس ﴿کستوروٗ﴾ باشد چمار

سگ ﴿ہوٗنو﴾ گربہ﴿برٲر﴾ موش باشد﴿ گگروٗ﴾                    شیر ﴿سٕہہ﴾ خرس﴿ہاپت﴾ ﴿شال﴾ شغال درندہ کار

﴿رامہ ہوٗنو﴾ گرگ باشد ﴿کینکہٕ لٔٹ﴾ سوسمار                      ﴿پُہُر﴾ کژدم ﴿گُنس﴾ عقرب، درٕکھ ﴿دلو﴾ ﴿سرُپھ﴾مار

بوزنہٕ ﴿واندُر﴾ ﴿پونز﴾ میمون ﴿لوہ﴾ روباہ آمد                      ﴿مِنہ مٔڑی﴾ نیلہٕ گاو و گوزن﴿ہانگُل﴾ شاخدار

﴿وودُر﴾ نام سگِ آبی ﴿کریم﴾ باشد سنگ پُشت       ﴿مِنہ منڈک﴾ غوک باشد ................

کیک﴿پشو﴾ پشش﴿زووٕ﴾ پشہَ ﴿موہ﴾ ﴿مٔچھ﴾ مگس           ﴿ریے﴾ مور و عنکبوت داں ﴿زرلوٗ﴾ بافندہ تار

﴿سور﴾ خوک و ﴿مور﴾ طاوس ﴿مٲنش﴾ باشد ﴿گاومیش﴾              میِش نامِ ﴿گٔب﴾ شُد، گوسفند﴿ہنڈو﴾ شُمار

﴿گاو مٲجی﴾ مادہ گاو، گوسالہ﴿ووژھ ، وژھرٕے﴾              فیل ﴿ہوستوٗ﴾ شُتُر ﴿ووٗنٹ﴾ ﴿خچُر﴾ اُستر ﴿خر﴾حمار

طایراں ﴿پرند﴾ چرندٕ بود بے بال و پر                    منش﴿آدم﴾ جِن ﴿دیو﴾ ﴿ملک﴾ فرشتہ نیک کار

............

سر ﴿کلہٕ پاے ﴿زنگہٕ﴾ دست ﴿اتھٕ﴾ گوش ﴿کن﴾ چشم ﴿أچھ﴾ نس ﴿بینی﴾ ﴿ٲس﴾ دہان زندہ دار

﴿مس﴾ موے و زُلف﴿وانکہٕ﴾ ﴿أچھر وال﴾ مژگاں بُود            ﴿دند﴾ دندان ﴿زٮ۪و﴾ زبان ﴿ژھوگ﴾ کاکُل یاددار

﴿دٲڑ﴾ ریش ﴿ڈیکہٕ﴾ جبین، ﴿یڈ﴾شکم ﴿تھڑ﴾ پُشت                         ﴿پھیوک﴾ کتف﴿بُتھ﴾ روے ﴿کٲڈ﴾ گردن را شُمار

﴿کوٹھ﴾ زانو ﴿اونگٕج﴾ انگشت ﴿نم﴾ ناخُن رابِگو                رودٕ ﴿أندرم﴾ جگر ﴿کرہنہٕ ماز﴾ ﴿لکھچُن﴾ خاردار

حلقہ﴿ہوٹ﴾ ﴿ببہٕ﴾ پِستان ﴿ہۅنگن﴾ زنخدان رابداں                    ﴿بُمہٕ﴾ ابرو، لب﴿وُٹھ﴾ ﴿گونژھ﴾ بروت اے دوستدار

﴿ٹیوک﴾ قشقہ، صندل ﴿ ژندُن﴾ شانہ آمد کنگووٗ                                            ﴿اَسُن﴾ خندیدن گریستن ﴿ودنو﴾ اے ہوشیار

پرِ بینی ﴿نکہٕ وورو﴾ ﴿کنہٕ تِہج﴾ نرمہ گوش                                                        کیر از اعضائے مخصوٗص است نامش گوشدار

﴿ٹۅکُن﴾ چوگان﴿پرِیوت﴾ پیچک تیغ ﴿کرتل﴾ آمدہ     ﴿.... ﴿........ و ﴿ویر﴾ پہلوان ﴿ہڑکرٕنۍ﴾ شُدکارزار

﴿باغہٕ روچھو﴾ باغبان ﴿پوش﴾ دانی گُل فروش            ﴿پوش﴾ گُلہائے گُلستان ﴿رنگہٕ واری﴾ لالہٕ زار

صحن ﴿آنگُن﴾ صفہٕ ﴿پینڈی﴾ ﴿معرکہ﴾ درشنگہٕ است                    ﴿پوکھری﴾ حوض است ، نامِ ﴿ناگ﴾ را چشمہ سار

﴿تھم﴾ ستون و سقف ﴿تالو﴾ ﴿شاہ تیر﴾ چوبِ دراز                                                 ﴿تول﴾ آمد منجنیق و چاہ ﴿کہرو﴾ ﴿دۅس﴾ دیوار

﴿بوڈ دیُن﴾ کہگل نمودن، نردباں را ﴿ہیٹر﴾ شُمار             ﴿بُتراتھ﴾ آمد زمین و ﴿ژالُن﴾ داں بردبار

............

﴿بر﴾ در است و ﴿دٲر﴾ دریچہ ،دود روزن ﴿وۅگہٕ﴾ شُد                       مشعلہ﴿دریر﴾ است﴿ژونگو﴾ داں چراغ و ﴿ریہہ﴾ شرار

﴿وٲڑہٲڑی﴾باغ و بُستان﴿میوٕ﴾ پھل﴿کُل﴾ درخت                         ﴿ٹنگ﴾ امروت است ﴿ڈوٗن﴾ چار مغز ﴿دٲن﴾ انار

﴿ٹنگہٕ ہٹی﴾ خشک امروت﴿ہۅکھٕ دچھو﴾ آمد مویز               فندق﴿وِرنۍ﴾ ﴿برییہ﴾ عناب ﴿ژۅکہٕ لڈر﴾ ترشکار

﴿ژونٹھ﴾سیب، انگور﴿دَچھ﴾ ﴿بمہٕ ژونٹھ﴾ مے دان بہی                ﴿ژیر﴾ زرد آلو بِداں ﴿ٲر﴾ آلو خوش گوار

﴿تریلہٕ﴾ سیبک ﴿ٹانچہ﴾ امرودُک بداں اے جانِ من                   ﴿ژٕنُن﴾ شفتالو بُود نزدِ بُزرگاں ناگوار

﴿ٲلچہ﴾ آلوچہ میداںہم﴿گلاسہ﴾ داں گلاس                             سیب تُرش ﴿ژۅکہٕ ژوٗنٹھ﴾ ﴿مُدر﴾ را شیرین شُمار

﴿یٲڑ﴾ عر عر ﴿سروٕ﴾ شمشاد نام ﴿ژندُن﴾ صندل است                ﴿ویر﴾ بیدو ﴿پھرس﴾ سفیدو ﴿بوٗنی﴾ دانی چنار

طوغ﴿برمجی﴾برٮ۪ن﴿پد﴾ است و ﴿تُلہٕ کُل﴾ درختِ توت       ﴿مَس﴾ شراب، بنگ﴿بنگہٕ﴾ ہردُوآمد کیف دار

﴿گاڑ﴾ ماہی، دام﴿زال﴾ و ﴿گاڑٕ ہانجی﴾ ماہی گیر                                ﴿گوڑ﴾ سنگار است مغزش﴿گوڑکونڈو﴾ نامِ خار

گُل نیلوفر بود ﴿پمپوش﴾ بیخش﴿ندڑو﴾                                                                     ﴿.... ذخیرہ ﴿سِیُن﴾ سالن، میخورد شہرو دیار

﴿ڈیمنب ہا﴾ نام جزیرہ میر بحری حاصل  است                                       ﴿لٲنکھ﴾ در دریا عمارت سیرگاہ شہریار

ہیمہٕ وہیزم بود﴿زیُن﴾﴿ژٕنہ﴾ انگشت میبود                                                    ﴿ینگر﴾ زگالِ کلاں و نیز ﴿انگشتِ چنار﴾

کُندہ ﴿مونڈو﴾ ﴿ہکٕر﴾ حطب نامِ شہتیر﴿رایل﴾ است                                                ﴿مکھ﴾ تبٕر﴿.... سرکوب ﴿گوٹِل﴾ آمد تبردار

﴿ہاکھ﴾ ساگ و ﴿سۅژل﴾ دبکین﴿ہند﴾ کاسنی﴿مُج﴾ ترب       ﴿گۅگٕج﴾ شلغم ﴿ال﴾ کدو، ﴿وانگُن﴾ بادنجاں شُمار

ساگِ جنگلی ﴿ووپل ہاکھ﴾ ﴿اُبجی﴾ میداں حماض           ﴿ژۅکہٕ ژٔنی﴾ ترشک آمد ﴿ژۅکہٕ لڈر﴾ ترشکار

﴿ٹیکہٕ بٹنی﴾ ضمیران ﴿بطخ لیوٗنٹو﴾ نسترن         ﴿لالہٕ﴾ گلالہٕ ﴿ببٕر﴾ ریحان، نرگس ﴿یمبرزل﴾ کاسہ دار

............

﴿رژٕپھولوٗ﴾ سُرخہ باشد ﴿دٲنۍ﴾ دٲنی شش سُرخ                 ﴿ماشہ﴾ میدان ہشت سُرخہ﴿ترکٹٕر﴾ ترازو را شُمار

﴿ہیور﴾ بالا بۅن ﴿پایین﴾ ﴿پتھ﴾ پس و برونٹھ ﴿پیش﴾                  ﴿د وچھنوٗ﴾ را راست گوئی ﴿کھووروٗ﴾ چپ گُذار

﴿لۅے﴾ روئین﴿ناگ﴾ سرب﴿شورٕ﴾ باروت آمدہ   ﴿زسُد﴾ جسدو ﴿لٕدٕر﴾مرجان ﴿سۅٹھ﴾ بلور اے ہوشیار

﴿مۅکھتہٕ دُر ﴿ژومبُن﴾ بود سُفتن ﴿کھنُن﴾ کندن بود     ﴿مۅہر﴾ باشد اشرفی پینسَہ﴿فلوسہ﴾ کوڑی ﴿ہار﴾

مِس﴿ترام﴾ ﴿شٕشتٕر﴾آہن، ﴿سۅن﴾ زراستَ وسیم﴿رۅپھ﴾         رنج﴿سرتل﴾ ارنج﴿ارتل﴾ ﴿کاژٕگرو﴾ شیشہ ہار

﴿کُرٕکٹوٗ﴾ ریمِ آہن ﴿کیلمو﴾ قطران وقیر                                           ﴿پارود﴾ سیماب می داں........ اے ہوشیار

﴿کۅنگ﴾ دانی زعفران و ﴿کۅنگہٕ پتٕر﴾ جاگہش                      ﴿کۅنگہٕ واری﴾ زعفران زار است﴿روچھوٗ﴾ چوکدار

﴿رنگروٗ﴾ داں رنگریز و اسمِ ﴿کاندر﴾ نانوا                                     نامِ ﴿نٲیِد﴾ شُد حجام و ﴿آرمو﴾ داں سبزکار

﴿سۅنُر﴾ زرگر ﴿کھار﴾ آہنگر﴿دوب﴾ گازر سٕژ ﴿خیاط﴾                       ﴿دوٗن﴾ نداف ﴿وووُر﴾ بافند ﴿دٔسل﴾گِلکار﴿چھان﴾ نجار

﴿ناو﴾ کشتی حہنہ﴿کھوٗرو﴾ ﴿ژاکہ واری﴾ زورق است                    ﴿ناوٕ روچھو﴾ ہانجی آمد پُل ﴿کٔدل﴾ ﴿بوٹھ﴾ کنار

اَژٕ پھولو ﴿سرخ﴾ باشد                                                     ............

﴿گٔہُن﴾ سایدن است و ﴿چھانُن﴾ داں بیختن                 ﴿مُنن﴾ استعمال آمد کوفتن ﴿ژیٹُن﴾شُمار

﴿وُربتہٕ﴾خشکہ داں و ﴿دال﴾ مقشر خُلت         طعامِ تر﴿وُگرٕ﴾ غذٲیی مردمِ بیمار و زار

﴿ژوک﴾ تُرش ﴿مُدُر﴾ شیرین﴿صاد﴾ نامِ مزہ شُد             تلخ﴿ٹیوٹھ﴾ ﴿نوٗن﴾ نمکین ﴿میوٗٹھ﴾ دانی خوش گُوار

خُم﴿مٔٹ﴾ ﴿اوٹ﴾ آرد ﴿کُٹھ﴾ صندوق آمدہ                    ﴿بتہٕ﴾ طعام نان﴿ژوٹ﴾﴿سیُن﴾ سالن شُد قرار

﴿رتھ﴾ خون و ﴿ماز﴾ گوشت ﴿مل﴾ برازوٗ بول﴿زل﴾                   پیادٕ رفتن ﴿پتھٕرۍپکُن﴾ ﴿گُرِسکھسُن﴾ گُڑۍسوار

﴿وازٕ﴾ باورچی و نامِ ﴿پانِروٗ﴾ شُد آبکش              ﴿بانہٕ کُٹھ﴾ موت خانہَ باورچی خانہ ﴿سولہار﴾

﴿ٹٹھلوٗ﴾ نامِ تغارہ ﴿لژھجی﴾ جاروب داں     ﴿کتری﴾ باشد سفال و نامِ ﴿کرال﴾ آمد کمار

﴿کۅکڑ پوٗتُو﴾ چوزہ مُرغ و ﴿کۅکڑی﴾ داں ماکیاں                   ﴿ٹھوٗل﴾ نامِ بیضہ باشد خروس ﴿کۅکُڑ﴾ بانگ دار

﴿گُر﴾ یا بو ﴿ٹٹۍوولوٗ﴾ نام مرکباں بود....                  ................................................

﴿ژکھ لاگُن﴾ میل بندی ﴿باچھ کرنہ﴾ شاخ بار                 ﴿رز وُٹھٕنۍ﴾ ریسمان تٲبی﴿پُلہٕ ہوڑو﴾ پوٗلہ شمار

پتک ﴿ڈۅکُر﴾ ﴿اِرٕنۍ﴾ سندان ﴿پھُہرٕواو﴾ سوہان بداں                     ﴿شرنز﴾ انبوٗر است ﴿مور﴾ پنجرہ سوراخ دار

﴿چُمٹہٕ﴾ آتش گیر ﴿ارہٹھ﴾ رابود دولاب نام                                                 ﴿ہگڑو﴾ را گو ارابہ ﴿کروژھ﴾آتش کش شُمار

اسمِ ناخُن گیر ﴿نیارِیُن﴾ نامِ ﴿کھوٗر﴾ اُسترہ دان               نامِ ﴿بِلو﴾ دان فانہَ ، موکش﴿ووژ﴾ بداں اے ہُشیار

نامِ ﴿کھہرٕنۍگور﴾ بود صیقل گرو ﴿قصاب﴾ پُج                 نامِ ﴿کاڈ﴾ آمد حلاج و ﴿ٹٹۍیندٕر﴾چرخس شُمار

شالباف ﴿کھنڈٕواو﴾ آمد﴿کانلو﴾ داں شاخساز                                                ﴿قٲلین وونن وول﴾ میدان قالباف اے نیک کار

﴿پٲٹۍگور﴾ داں علاقہ بند﴿ ٹوپوٗ﴾ تکمہ داں        نامِ ﴿وارنۍ﴾ قابلہ است ﴿محلہ راچھو﴾ محلہ دار

﴿ٹھوٗنٹھرو﴾ مِسگر کہ سازد ظرفہاے روئین و برنج                 ﴿ژمرو﴾ داں کفش دوز نعلبند داں نالہٕ کھار

.... .... .... .... .... ﴿مُسلہٕ﴾ گوو دوال                                           ﴿بُنگِر وولوٗ﴾ پیلہ ور شُد ﴿بُہُر﴾ میدانی عطار

﴿درال﴾ را دانی دلال و نامِ ﴿وانی﴾ شُد بقال              ﴿کنجرنی﴾ ہافظی و قحبہ گر ﴿گانی﴾ شُمار

﴿منڈنو﴾ مالیدن و مالیدہ گر ﴿منڈن گوروٗ﴾                                  ﴿شوٗپۍواتُل﴾ چَج ساز و ﴿آرمو﴾ داں ملیار

﴿گٮ۪و﴾ روغن ،عسل ﴿مانچھ﴾ ﴿لِدٕر﴾ زرد چوب آمدہ       ﴿دانہ ول﴾ کشنیز و شکر ﴿قند﴾ و سُرخ شکر گوڑ شُمار

﴿ٲلہٕ﴾ را دانی الاچی، رۅنگ باشد قرنفل                                  قرنفل ریزہ بگوئی ﴿رنگہٕ ژٍن﴾ اے ہوشیار

﴿قند﴾ گوو قندِ سفید و﴿کھنڈ﴾ داں شکر ترین                              نامِ ﴿نابد﴾ شُد نبات و ﴿کھزٕر﴾ را خرما شُمار

مرچِ سیاہ ﴿مرٕژ﴾ داں و ﴿شونٹھ﴾ آمد زنجبیل                        ﴿زیوٗر﴾ زیرہ ، سیر ﴿ر وہُن﴾ پران ﴿پیاز﴾ گوشدار

گرداں طبرزد ﴿مَوَل﴾ شُد تاجِ خروس                                            ﴿نوٗن﴾ نمک ﴿ادرک﴾ آدر ﴿مٔلۍہیون﴾ خریدن شُمار

﴿ گُلگونہ دان﴿آسرو﴾ خردل بداں                                         ﴿پنبہٕ ژالن﴾ را بِگو ریوند اے ہوشیار

................................................                                               مرچِ سُرخ ﴿مرژٕوانگن﴾ ﴿ینگہٕ﴾ انگوزہ شُمار

﴿شراکہٕ پُچو﴾ چاقو آمد، نامِ کارد﴿شراکھ﴾ شُد                              ﴿بٔرِش﴾ میدان نیزہ ﴿مٮ۪قراض﴾ ﴿دُوکاژٕے﴾ شُمار

﴿توٗر﴾ تیشہَ ﴿لیتٕر﴾ آرہ اسکنہَ ﴿ ژورٕژ﴾ بود                               ﴿تورکہٕ چھان﴾ آمد ﴿درود گر﴾ چوب ساز گوو ﴿کندہ کار﴾

﴿دۅد﴾ شیر و مسکہ ﴿تھٔنی﴾ نامِ ﴿گُرُس﴾ دوغ شُد     نام............................................

زما روغ وسماروغ ﴿کنہٕ گٕچھ﴾ و ﴿ہٮ۪ڈر﴾ داں                        ﴿ہوکھۍ گرُن﴾ زنتور............................

﴿مونشہ کراڑی﴾ نانِ شیرو نامِ ﴿ژامن﴾ شُد پنیر            ﴿اوم دۅد﴾ شُد شیرِ خام و جغرات ﴿زامُت دۅد﴾ شُمار

دست شُستن﴿اتھٕ چھلُن﴾ ﴿کھورچھلُن﴾ پاشوی            ﴿سران کرُن﴾ غسُل باشدو ﴿سرانہٕ پٔٹ﴾ غسلیچہ دار

﴿لید﴾ سرگین ﴿درمبہٕ﴾ پاچک، ﴿مینگنو﴾ سرگن میش                    ﴿بوٹھ﴾ آمد خشک سرگین سبد﴿پٔجی﴾ را شُمار

﴿فوطہٕ﴾ ڈیٹون پگ ﴿دستار﴾ دان ﴿نڑوٗ﴾ آستین          ﴿ٹوٗپۍ﴾ کُلاہ ، کُرتہٕ ﴿پھیرن﴾ ﴿زنگہٕ بستوٗڑ﴾ داں یزار

﴿وتھرنو﴾ رختِ خواب ﴿وگوو﴾ داں بوریا                              کُہنہ ﴿پرونوٗ﴾ نو ﴿نوو﴾ دوخت ﴿سُوُن﴾ ﴿پن﴾ تار

﴿بُربتن﴾ فر فر است و ﴿مرژٕپِپن﴾ بادفر                                  باد بیزن﴿واوجی﴾ دان ﴿تاپہٕ دانہَ﴾ سایہ دار

﴿یِندٕر﴾ چرخ ﴿یندٕرتُلوٗ﴾دوک دانی پشم ﴿موٗن﴾                 ﴿کتُن﴾ ریسیدن بداں ﴿وونُن﴾ بافیدن شُمار

گلہ بان نامِ ﴿گلوان﴾ ﴿پوہول﴾ چوپاں آمدہ                    ﴿گُڑۍ راچھو﴾ نامِ سایس اسپ گوو﴿ گُڑ﴾ راہوار

﴿گژھ﴾ بَرو بہ نشین ﴿بیہہ﴾ برخیز ﴿ووتھ﴾ ﴿وولہٕ﴾بِیا                      ﴿روزُن﴾ باشد بماں ﴿شونگُن﴾ خفتن را شُمار

﴿سٲد﴾ دولت مند باشد﴿بیچھِ وُن﴾ می داں گدا              ہست پردیسی ﴿مسافر﴾ ﴿گٕروولوٗ﴾ خانہ دار

گیر ﴿رَٹھ﴾ بِگُذار ﴿تراوُن﴾ بستہ کُن﴿گنڈُن﴾ بود              ﴿مُژراوُن﴾ واکردن است و خواستن ﴿منگُن﴾ شُمار

﴿واتناوُن﴾ گوو رسانیدن ، رسیدن ﴿واتنوٗ﴾                               ﴿ووتمُت﴾ گوو رسیدہ ﴿پژھ﴾ بگوئی اعتبار

﴿بِہُن﴾ بنتستن است ﴿ووتھُن﴾ برخاستن                        ﴿ژھوٹ﴾ کوتہ ﴿زیوٗٹھ﴾ طول آنگا اے مردِ عیار

﴿رٮ۪تہٕ کول﴾ نامِ تاپستان ﴿ہُرد﴾ است فصلِ خزان                        برف﴿شین﴾ و ﴿روٗد﴾ باراں ، ژالہ﴿ڈونٹھ﴾﴿وُنر﴾ غبار

﴿وندٕ﴾ را میداں زمستاں ﴿رب﴾ بداں کل چرکدار       ﴿تُلہٕ کتُر﴾ یخ بندی ﴿پانژادر﴾ آبشار

........ ﴿تُلہٕ کتُر﴾ یخ دانہ داں                                                              ﴿بٔڈتٍڑ﴾ بردِ عجوز و شدتِ سرما شعار

﴿نارہ پھَہہ﴾ داں کانگڑی آتش گرفتن در بغل                   کنگ نامِ ﴿آتشخانہ﴾ اندر رہگذار

﴿پونۍ﴾ آب و ﴿یُپ﴾ سیلاب باد ﴿واو﴾ و ﴿میژ﴾ خاک          منبع و ینبوع ﴿نیرن جاے﴾ آب از چشمہ سار

برق ﴿وُزمل﴾ رعد ﴿گگراے﴾ ﴿رامہ دوٗنۍ﴾ قوسِ قزح                 ﴿بُنِلوٗ﴾ تپ لرزہ دانی،﴿بُتراتھ﴾ غبرا شُمار

خُم ﴿مٔٹٕے﴾ کوزہ ﴿نٹوٗ﴾ ﴿ژوڈ﴾ باشد گاو دوش                   شیر دوشیدن دراں ﴿دۅد ہیون﴾ بداں اے نیک کار

﴿وازٕ﴾ آشپز ﴿پانِروٗ﴾ آبکش ﴿بانہٕ ناوُن﴾ دیگ شوی                                              ﴿بانہٕ کُٹھ﴾ گوو موت خانہ باورچی خانہَ ﴿سولہار﴾

﴿راز مہہ﴾ لوبیا ﴿مُسر﴾ عدس ﴿تۅمُل﴾ برِنج                        ماشِ سیاہ ﴿مَہہ﴾ باشد گوسفند ﴿ہنڈو﴾ شُمار

﴿کٕنکھٕ﴾ گندُم ، جو ﴿وِشکہ﴾ ﴿سندِج﴾ سرشف ﴿ألِش﴾ کتان    شنگ ﴿کڈٕ﴾ ﴿دانہ﴾ شالی ، ﴿ترۅمبہ﴾ ترنبہ را شُمار

گال ﴿شولو﴾ ﴿پِنگہ﴾ ارزن ﴿تیل﴾ را کنجد بدان             خام ﴿نیوٗلو﴾ پختہ ﴿پوپو﴾ دَرو ﴿لونُن﴾ در شُمار

از زراعت گاہ بہ خرمن گاہ بردن ﴿گیجہ سٲر﴾                        چہار پوٗلہ ﴿ژاکھ﴾ باشد یک ﴿ کھروٗ﴾ شش ژاکھ دار

﴿شوٗپ﴾ چھج ﴿پرِیُن﴾ غربال ﴿گریٹہٕ﴾ آمد آسیا                ﴿یندرٕ مہلوٗ﴾ پائے کوب و ﴿وۅکھُل﴾ یاون شُد قرار

جام پیالہ ساغر ﴿صُرَے﴾ صراحی رابداں                                 ﴿انٹو﴾ سرپوش دیگ و ظرف ﴿بانہ﴾ را شُمار

............

راحتِ کشمیریاں بعد از زمستان دربہار                      سیر تالاب ڈل است و برارِ نمبل شالہ مار

سندٕ براری ، گنگہٕ براری از عجایب حکمت است                 ویرناگ و اچھِ بل و مچھِ بون چشمہ سار

........

شنبہ و یکشنبہ و دوشنبہ و سہ شنبہ است                                         بٹہ وار و آتھوار ژندروار و بوم وار

چار شنبہ ﴿بودوار﴾ و ﴿برٮ۪سہٕ وار﴾ پنج شنبہ است           نامِ ہفتہ ﴿سَتھ دۅہہ﴾ ﴿جمعہ﴾ دانی شُکر وار

پرگناتِ ملکِ کشمیر

پرگناتِ مُلک کشمیر شاہ آباد و بانہال                     آڈونۍ با دیوسر برنگ است دیگر کوٹہار

مارتنڈ و کھاور پورہ دوچُھن پارہ مُتصل                         درمیان آبِ لدرِ جاری است بہر کشتکار

اننت ناگ و شکروہ شاورہ سیر و سمن                                                زینہ پورہ اولر و وہی دادہ قرار

مانچھہامہ درنج ناگام بییہ چھراٹھ                                  فہاک لعل گرد کنار آب ڈل جاری است مار

ہرہ پورہ و بارہمولہ سۅنہ درنگ و ریہہ درنگ     درنگ نامِ رہگذار و درنگہ راچھو راہدار

اندر کوٹ پرسپور تیلہ گام و پٹن است                    پرگناتِ مُلکِ کشمیر سی و شس آمد شُمار

اقسام ہفت دریا

قُلزم و جیحون و سیحون و عمان و فرات                                                رود نیل و دجلہ باشد ہفت دریائے کہار

ہفت اقلیم

ہندو روم و چین و ترکستان ماورالنہر                               بلخ و خراسان بگویم ہفت کشِور در شُمار

سونت پنڈت ﴿بستہ﴾ گنڈِتھ ﴿کھۅڈ ژھنُن﴾ در چاہ کُن                     تا بگیرد عبرتی ہر کس کہ است انبار دار

باوجودِ اصل  خود از دِل کشیدم آہ سرد                                                                          عشقِ من در حیرت دیدار او چوں لالہ زار

﴿دیار منگٕنۍ﴾ زر گرفتن ﴿رُشوہ﴾ کوژھ ﴿لایُن﴾ زدن                            ﴿چیٹۍ﴾ جریمانہ است ،تہمت لولہ چی شُد نا گوار

٭٭٭

 

 

 



[1] پورٕ ناو منابندر ناتھ راے: وُہم صٔدی شروٗع گژھنہٕ وِزِ اوس عالمی پیمانس پٮ۪ٹھ کمیونسٹ تحریکہ ہُند اکھ بارستہٕ تھونگ ماننہٕ یوان۔ تمٔۍ کٔر چین، روٗس، یورپ تہٕ میکسکوہس منز تہ کٲم۔ سُہ اوس وی ۔ آئی ۔ لینن تہٕ ماوزی تُنگُن تہ وٲقفِ کار۔ پتہٕ آیس نہٕ تِمن سٍتۍ برابری تہٕ ووت ہندوستان واپس ، ییتہ ترٲوٕن 43-1942ءمنز ریڈیکل ڈیموکریٹک پارٹی ہٕنز بنیاد۔ اَمہ پارٹی ہُند زیُٹھ اوس کٔشیرِ منز پنڈت پریم ناتھ بزاز۔ راین چھے واریاہ اہم کتابہٕ لیچھمژٕ ۔ سُہ گوو 1954ءمنز سۅرگہٕ واس﴿م۔ ی ۔ ٹینگ ﴾

[2] شہرچ مٔژ وتھ کھٔژ پوٚت ون / یتھہٕ کنہ پژھہ میانہ شک بییہ ژاو

[3] یہ مقالہٕ چھُ" کٔشیر حضرت شیخ نورالدین ؒ ریشی سٕندِس کلامس منز"  کتابہ منز حضرت علمدارس متعلق بییہ کینژَن مقالن سٍتۍ 1981ءمنز شایع سپدُمُت ۔ ﴿آتش﴾

[4] مشہور المانوی فلسفی تہٕ سٲنِس علامہ اقبال سٕندِس "مجذوب فرنگی" نطشے سُند قول چھُ:  There are no facts, only interpretations ﴿واقعہٕ چھُنہٕ کُنے آسان ، البتہٕ چھ تشریح تہٕ تفسیر داہ در داہ﴾   ﴿م۔ ی ۔ ٹینگ﴾

[5] کٲشرس منزچھُ"سٲد" "ژوٗر "لفظُک ضِد تہ تہٕ عام کٲشرٮ۪و چھُ "سیدصٲب" بدلہٕ" سٲد صٲب"لفظ ورتاوس لوگمُت مگر "سٲد" چُھکھنہٕ ، دیارٕ وول" آسنہٕ کِس معنہ یس منز ورتومُت۔﴿آتش﴾

[6] اصطلاحس ژٔکِس تام واتنہٕ کِس سلسلس منزچھُ ٹینگ صٲبُن یہ تحقیق دِلچسپ تہٕ معنہ سوو۔ بنان چھُ " ر ۆب کرُن" آسہ ہفتا کالہ پٮ۪ٹھ ورتاوس منز روزنہٕ پتہٕ ورتاوٕ نیبر گومُت، تہٕ وۅنۍ چھُنہٕ امہ کہ ورتاوُک امکان روٗدمُت یایِتہ چھُ مُمکن واریاہ کالہٕ کہ ورتاوٕ سٍتۍ آسہ"ر ۆب" لفظ " ر ۆف تہٕ ر ۆو یا ر ۆہ لفظن منز بدلیومُت۔﴿آتش﴾

[7] یہ نٲدر نعتِ شریف کور مے از برونہہ واریاہ کال بازیافت ، گۅڈٕ کرنووُم کٲشرِس شیرازس منزتہٕ پتہٕ اُردو شیرازس منز شایع تہٕ از چھُ گۅڈنچہ لٹہ یتھ کتابہ منز شٲمل یوان کرنہٕ۔ ﴿ آتش﴾

[8]  شیرازٕ،  نُندٕ ریوش نمبر۔ "نُندٕ ریوش تہٕ ریشی سلسلہٕ" مقالہٕ نگار ڈاکٹر رشید نازکی: ص :36-35

[9] کشمیری زبان اور شاعری ، جلدٕ2  ۔ عبدالاحد آزاد۔نٲشر : کلچرل اکادمی۔

[10] بُرجِ نور، مقالہٕ، حلقہ یاران ، کلچرل اکاڈمی۔

[11] کٲشُر انسائیکلوپیدیا کِس دویمِس جلدس منز چھُ أمِس بادشاہ سُند ناو" عشوش سین" وننہٕ ٓامُت۔ یِمو مورخو دعویٰ کورمُت چھُ زِحضرت عیسیٰؑ اوس کٔشیرِ آمُت، تِم چھِ ونان سُہ ووت پہلگام تہٕ اَتھ نکھٕ عش مقام تہ حالانکہ حضرت عیسیٰؑ سٕنز قبر کٔشیرِ منز آسنُک دعویٰ چھُ کٔہۍیاہ مسلمان عٲلمو رد کورمُت تکیازِ یہ چھُ اسلٲمی عقیدس خلاف ۔تِمو چھُ تسُند کشٔیر یُن اختلٲفی مسلہٕ قرار دیتمُت۔ بہرحال چھِ حضرت عیسیٰؑ سٕندِس عش مقام واتہٕ نس متعلق پروفیسر فدا محمد حسنین تہٕ سوزینی اولسن لیکھان:

"After his arrival in the valley of Kashmir, Jesus and his companions stayed in the Buddhist Monastery at Aish Muqam, in the vicinty of Pahalgam. There are several caves in the hills, which were used by the Bhikshus for meditation in the past. In various Rishi Namas, which deal with the lives of Saints, it is mentioned that during ancient times, a prince named Yesh-Eseen came to meditate in this monastery and it is after his name, this place came to be known as Ashosh Muqam or the resting place of Ashosh or Issa. The cave at Aishmuqam is about thirty feet long and ten feet wide, lined with stone Shelves on both sides. For centuresthe cave was the site of pilgrimage and worshiped by Hindus, Christians and Buddhists. During the regin of Sultan Zain-al-Abidin ﴿1420-1470 A.D Zia Singh, A saint of Banderkot, Kishtwar entered the cave at Ashmuqam for meditation. Zia Singh, who is tittled now as Baba Zain-ud-din Rishi performend many miracles. Baba Sheikh Zain-ud-din is buried in the cave at Aishmuqam. Since then, this holy place has become centre of pilgrimage by his devotees.

﴿The Rozabal-Beyond the Da-vinci code 34: by. Fida. M. Hassnian & Suzanne OLSSON-pages 269-272

[12]  شاہ کۅل ﴿مارتنڈ کنال﴾ مورخ حسن شاہ کھۅیہ ہٲمی چھُ وقایع کشمیرمولفہ مُلا احمد بعہدِ بڈشاہ زین العابدین کہ حوالہٕ ﴿یُس رتنا کرپوران برونہہ کنہ رٔٹِتھ لیکھنہٕ آمُت اوس﴾ لیوکھمُت زِ یہ نہر ٲس پانڈو رازٕ رام دیون کھننٲومٕژ ،یۅسہٕ واریاہ وق گُذرِتھ کانیمٕژ ٲس تہٕ رازٕ للتا دتن کرنٲوٕس مرمت۔ حالانکہ اکثر مورخ چھ لیکھان زِ یہ نہر ٲس للتا دتنٕے کھننٲومٕژ تہٕ سُلطانن ہٕندِس دورس تام ٲس وُجارٕ گٲمٕژ تہٕ بڈشاہن کھنہٕ نٲو نَوِ سرٕ۔ اوے چھِس شاہ کۅل ونان۔ ییتٮ۪ن چھُ سوال وۅتھان زِ سُلطان زین العابدین بڈشاہ سُند دورِ حکومت اوس کٲشرٮ۪ن ہٕندِ باپتھ سۅکھُک تہٕ پاپر جٲیی ہُند زمانہٕ ﴿یہ زَن عام طور وننہٕ آمُت چھُ﴾ ،انصاف اوس مُہیا۔ ریش سُند خٲدِم جبرن کامہ لاگُن ماچھُ تیلہ اَتھ زمانس منز تہ بٮ۪گٲرۍ عام آسنس کُن اِشارٕ!

[13] حضرت زین الدین ریشی سٕنزِ جلا وطنی ہٕندِ اَمہ واقہٕ سٍتۍ تہ چھُ اکھ سوال وۅتلان ، بڈشاہ اوسا پزی ریشِس پٮ۪ٹھ ژکھِ گومُت؟ بڈشاہ ییلہ ؤلی عہد اوس حضرت شیخ نورالدینؒ ریشی سپدۍ رحمتِ حق ، بڈشاہن کٔر تہندِس جنازس منز شرکتھ۔ اَمیُک مطلب گوو سُلطانن اوس نہٕ ریشن سٍتۍ کانہہ ٹکر بلکہ  اوسُکھ تہُند عقیدت ، وۅں ییلہ بڈشاہ بادشاہ اوس۔ بارستہٕ ریش سُند مُلاقات نہ بٮ۪ٹنہٕ سبہٕ یا توجہ نہ پاتھنہٕ مۅکھٕ کِتھٕ گژھِ ہے سُہ ژکھِ تہٕ دِیہ ہے ریش وطن بدر کرنُک حُکم، بییہ ییلہ زَن تٔمِس ریشن ہُند طرزِزندگی نظرن تل اوس۔ تِہنزِخُدی ، خۅددٲری ، بے نیٲزی ، دنیا بیزٲری تہٕ خدا دوستی ہُند تہ پے اوس۔ یہ ما چھُ یتھ کتھِ کُن اشارٕ زِ ریشُت اوس اکھ طاقتور تہٕ مقبولِ عام تحریک تہٕ بڈشاہس ما ٲس اَمہ تحریکٕچ مقبولیت أچھ منز کِٹُر باسنہ لٔجمٕژ۔اگر تہ آسہ نہٕ تیلہ ما چھے اَمہ حُکمہٕ سٍتۍ بڈشاہ سٕندِس بجرس پٮ۪ٹھ ؤسۍ پایہ گی ہٕنز ژھاے پٮ۪وان۔ بہر حال چھ یِتھۍ معاملہٕ توجہ طلب۔ کینژو ہند و مورخو چھُ لیوکھمُت زِ بڈشاہ بلیوو حکیم شری بٹ سٕندِعلاوٕ سٍتۍ نہَ زِ زٲنہٕ شاہ سٕندِ دُعا سٍتۍ۔

[14] حضرت باباحاجی ادہم ٲسۍ حضرت شیخ نورالدین ؒ ریشی سٕندۍ ہم عصر تہٕ ہم صحبت۔ تِہند رسالہٕ "مقاماتِ اولیا"چُھ وۅنۍ نایاب۔ سید علی ماگرے ین چھُ یہ اقتباس تمی رسالہٕ پٮ۪ٹھ نقٕل کورمُت حضرت سید میر ہمدانی ابن امیر کبیر حضرت میر سیدعلی ہمدانی سٕندِ امی ملاقاتہٕ پتہٕ کور حضرت سید میر محمدؒ ہمدانی ین حضرت شیخ نور الدینؒ ریشی یس خطِ ارشاد عطا ، یُس تِمو 814 ہجری منز ژۅدٲہمہ رجب سرینگر خانقاہ معلی جایہ تحریر کورمُت چھُ۔

[15] ریاستی کلچرل اکادمی ہٕندِس ادبی تہٕ ثقافتی خبرنامہٕ "اکادمی" ہٕندِس 1989ءکِس د ویمِس شمارس منزچھے یہ خبر تہ شایع سپٕزمٕژ زِ تہران یونیورسٹی سٍتۍ منسلک أکۍ سرکردٕ عٲلم ڈاکٹر صادق کِیا سُند دعویٰ چھُ زِ قدیم ایرانٕچ عظیم شخصیت تہٕ آتش پرستن ہُند پیغمبر زُرتشت اوس کشمیری الاصل ۔زرتُشتی مذہبٕچ د ویم بٔڈ ہستی آزر کیوانی تہ اوس کٔشیرِ آمُت۔ کٔشیرِ ہٕندِس توٲریخس اندر چھِ آتش پرستن تہٕ آتش پرستی متعلق واریاہ حوالہٕ میلان۔ کٔشیرِ ہٕندۍ کینہہ رسم مثلن پھروو یُس ایرٲنۍ ؤریکِس آغازس منزعش مقام وُڈٕر پٮ۪ٹھ نارٕ الاو کِس صورتس منز روشن کرنہٕ چھُ یِوان، چھُ اَمی روایتُک پتھ کُن بچومُت اکھ جُزوننہٕ یوان۔

 

[16] یہ لفظ توٚگم نہ پرُن, اوٕ سبہ توٚرم نہ معنے فکرِ۔

[17] یہ لفظ توٚگم نہ پرُن, اوٕ سبہ توٚرم نہ معنے فکرِ۔

[18] یہ لفظ توٚگم نہ پرُن, اوٕ سبہ توٚرم نہ معنے فکرِ۔

[19] یہ لفظ توٚگم نہ پرُن, اوٕ سبہ توٚرم نہ معنے فکرِ۔

[20] یہ لفظ توٚگم نہ پرُن, اوٕ سبہ توٚرم نہ معنے فکرِ۔

[21] یہ لفظ توٚگم نہ پرُن, اوٕ سبہ توٚرم نہ معنے فکرِ۔