مہجورنہ شٲعری منز

* یہ چھہ تۯیم حصہ
* گۅڈنیک حصہ وُچھِو
*  دویم حصہ وُچھِو

کتاب ٹھیک پٲٹھۍ پرنہ باپتھ چھہ
گلمرگ نستعلیق فانٹ انسٹال کرن ضروری۔

نِسوٲنۍ جذبن ہٕنز ترجمٲنی

خواجہ حافظ شیرازی گوو "سیاہ چشمانِ کشمیری و ترکانِ سمر قندی" ؤنِتھ کٲشرٮ۪ن زنانن ہٕنزِ محبوٗب روئی ہُند اعتراف کٔرِتھ تہٕ بقول محمد یوسف ٹینگ "مرزا غٲلب یودوَے کٲشرٮ۪ن ہٕنزِ اَمہ خوب روئی ہُند فریفتہٕ اوسنہٕ اماپوز قٲیِل تہٕ اوس ۔ سُہ ہیوکنہٕ زانہہ کٔشیرِ یِتھ۔ کاش سُہ یِتھ آسہ ہا ہیوکمُت اماپوز پَے چھُنہٕ اکبر آبادیاشاہ جہان آبادکِس کتَھ کوچس منزکور تسُند دِل کٔشیرِ ہٕنزِکمہ نازٕ تھَرِ ،پُلِ صراطہٕ کہ بَیہ نِش تہٕ بے نیاز ، تہٕ جنتٕچ حوٗر تہ لٔج تس برونہہ کنہ وۅش تراونہ ، اَمہ لحاظہٕ چھُ سُہ "بُت کشمیرِ" ورتٲوِتھ حافِظ سٕندِس "سیاہ چشمانِ کشمیری تہٕ اقبال سٕندٮ۪ن دختر کے برہمنے ، لالہ رخ ، سمن برے" استعارن درمیان اَکھ نوزُکھ مگر ناز آفرین کدل شیران

حورِ بہشتی زیاد آن بُتِ کشمیر بُرد              بیمِ صراط از نہاد آں دمِ کشمیر بُرد"         ﴿تفسیر غالب حصہ د ویم

سون پوشہ موت مہجور یُس حُسن نواز تہ اوس تہٕ حسین تہ ییمۍ کشیرِ ہٕندِ پتھ کالہٕ کہ عظمتٕکۍ آلو تہ دِتۍ مگر فاقہٕ پھرِ کٲشرٮ۪ن ہٕندۍ اَرٕ سرٕ تہ ژینۍ ، گوو کشیرِ ہٕندِ حُسنٕکۍکٍتۍ گوشہ نظماوان ، تمٔۍ نظموو نَوِ کشٔیرِ ہُند تصور تہٕ انقلابٕچ ڈابٕر وٲیِتھ کورُن ٲخرس آزٲدی ہٕنزِ سۅرگہٕ حوٗرِ پٮ۪ٹھ طنزُک تیرِ باران تہ۔ تاہم چھُ تسٕنزِ کلہُم شٲعری منز تسٕندِٮ۪ن تِمن تاشوقہٕ وژَنن ہُند حِصہٕ زیادٕ حسین تہٕ نمایندٕ یِمن منز حُسنس تہٕ حُسن نوٲزی للہٕ کھول تہٕ لۅلہٕ متہٕ لاے کرنہٕ آمُت چھُ ،یِمن ہٕنز سارِوٕے کھۅتہٕ اہم کتَھ چھے زِ مہجورن چھُنہٕ پتھ پرستان چن پٔرۍ ین ہُند حُسن وکھنوومُت ، بلکہ  چھُ اَتہ کٲشُر حُسن گرایہ ماران تہٕ دِل وۅلساوان ۔ یِمن وَژنن ہُند نِسوٲنی لہجہ چھُ لۅتہٕ وٲے مگر متٲثر کرن وول۔

مہجورن لیوٗکھ نہٕ د ویمٮ۪ن ہٕندۍ پٲٹھۍ عام کٲشرٮ۪ن زنانن ہُند سراپا ٲکھۍتھٕے رنگ روغن مٔتِھتھ کُنہ جایہ الگ پٲٹھۍ ، سراپا لیکھۍ مثنوی نگارو، مبالغہ ؤنۍ ؤنۍ کھٲلِکھ اَپزٮ۪ن تعریفن انبر۔یہ تہ چھُ پوز زِ تِمن اوس بیین زبانن ترجمہٕ آسان کرُن تہٕ ترجمہٕ کران ٲسۍ سراپا لیکھنہٕ وِزِ اصل  کتابہ ہٕندِ اَثرٕ ہُریمانہٕ پننہ طرفہٕ تہ تھُر کھالان ۔مہجورٕنۍاَکھ اَڈلیچ مثنوی"پھا ہ پھاہ کُٹٕنۍ" تہ چھے کُلیاتِ مہجورس منز شٲمل ، اتہ تہ چھُ سُہ سراپا لیکھان لیکھان مۅحتاط روٗدمُت ۔اماپوز مہجورس اوس کٲشرِ زنانہ ہٕندِس مٲرۍ مٔندِس بُتھِس پٮ۪ٹھ غلٲمی تہٕ آویزٕگی ہُند ہایہ پھَش نظرن تَل ژیوٗنمُت اوسُن ہرگاہے یہ ہاے زانہہ وۅتھرنہٕ ییہ حُسن تراوِ پانے گاہ۔ اوَے تہٕ کٔرۍ تمٔۍ تاشوقہٕ وَژنن منز کٲشرِ زنانہ﴿سیدِ سیودنَے تہٕ ورگہٕ پٲٹھۍ ضروٗر﴾ ِہندِ حسنٕکۍ تعریف تہٕ بییہ دِژٕن تمٔۍ سٕندٮ۪ن وٲنسہ وادو پٮ۪ٹھٕ دَم پھُٹۍ گٲمتٮ۪ن دادٮ۪ن ،دۅکھن تہٕ وٮ۪داکھن زٮ۪و۔نِسوٲنی جذبن ہٕندٮ۪ن یِمن آلون ہُند گۅڈ اوس ہیوتمُت أرۍنہ مالہ تہٕ حبہ خاتونہ واراہ کال برونہہ ۔ا ماپوز مہجورنٮ۪ن یِتھٮ۪ن آلون ہُند پِلو چھُ نوٮ۪ن کُشادٕ سرحدن تام واتان۔ رسول میر چھُ کۅنگہٕ مالہ ہٕنزِ پٲٹۍ زُلفٕچہ ژھایہ تَل زُوان تہٕ محمود گٲمی چھُ "سوالِ خدا" ؤنۍ ؤنۍ بدول جمالہ ہٕندِس دِلس منزجاے ژھاران ۔ مہجورنہ تاشوقہٕ شٲعری منزچھے یِمے کٲشرِ نازٕ تھرِ ، جبر پسندتہٕ ظُلم کرن والہ سماجچہ شکار آسنہٕ مۅکھٕ یہ دٔپۍ زِتہ ژھیپہٕ ژھٮ۪پ کران۔ یِمن چھُ وَچھس وَٹھ تہٕ زُلفن زَٹھ گومُت ،مون زِ تمٔۍ چھُنہٕ پننہ کٲشرِ شٲعری منزیِژھ کٲنسہ تہ کٲشرِ یا غٲر کٲشرِ نوش لبہ ہُند ناو ہیوتمُت ۔ اماپوز تسٕندۍ یِم شعر چھِنا کٲشرٮ۪ن زنانن ہٕنزِ بے بٔسی ،تہندِ لولٕچ کھسہٕ وٕنہ تہٕ لوسن والہ یاونٕچہ باکہٕ

ژے کس سٍتٮ۪ن گٔیی سٲزِش ، دویم چھا بیاکھ کانہہ مے ہش             ژٕ میانے رشکہٕ پانس نِش ر وٹکھ کمہ مسولے بومبرو

شوقہٕ چانہ پانس کریوم پٲراو                          مَدٕنو اَدٕ نو ہیوتتھم ناو                                                 ضایہ گٲم مٲنزِ نم تہٕ مہرینہ تون                  بہَ نو زَرٕ مدٕنو دوٗرٮ۪ر چون

سنگدِلا سِتم گرا رحم ژے چھُے نہٕ اَکھ زرا                        ضایہ گٔیس بہٕ سۅندرا ماے بران بران وۅلو

کمہ میانہ پِترینہ کن ژے بٔری میٲنۍ مَٹھٕے ماے                   پرٮ۪تھ ساتہٕ پوکُکھ لُکہٕ ہٕنزے ترایہ ونے کیا

کسٕے ہاوٕ یاوُن بٲلۍیے

داوس بہٕ لٲجِس بالہٕ یٲری یے             ناوس بہٕ لگہٕ سَے پٲرۍ پٲری یے

ییہ دِلبر ہی وَتھراوَس سر تراوس پادن تَل

یِتھۍتہٕ یِتھۍ ہوۍ کٔہۍ یاہ شعر چھِ کٲشرٮ۪ن زنانن ہُند بوس لوژراوان ۔ "پوشے متہ جانانو" وَژُن چھُ صاف ہاوان زِ یِم وٮ۪داکھ تہٕ باکہٕ چھے کستام بَنن لٔدۍ نہ زنانہ ہٕندۍ۔ ہرگاہ یہ پوز آسہ زِ مہجورن اوس یہ نُندٕ بون وژُن ، حبہ خوتوٗنہ ہُند مشہور وژُن "وۅلو میانہ پوشے مدٕنو" بوٗزِتھ لیوٗکھمُت تیلہ چھُنہٕ شاید یہ گُمانہٕ غلط یا ویوٹھ ہیوٗ زِ مہجورن وژُن پران پران چھے زنتہٕ حبہ خوتوٗنٕے گُدرن گرٮ۪کہ منز یوسف شاہ ژکس ناد دِوان تہٕ گراوٕ گُذراوان۔ا ز تام روٗد یہ وَژُن کٍژٕہن کٲشرٮ۪ن زوٗنن ہٕندٮ۪ن دِلن ہُند بار لوژراوان:

 وۅلہٕ ویسۍ گژھٕ وے کامے                     یٲرۍ ہے کٔرنس تھامے                                گٲجنس تہٕ لٲجنس پامے         پوشے متہ جانانو

وۅلہٕ ویسۍ گژھٕ وے وَن تے                 تس کمٔۍ بٔرۍ مے کن تے                           کر سنا بییہ ڈیشن تے                  پوشے متہ جانانو

بالہٕ پٮ۪ٹھٕ لایے نادو                     پوت پھیر ہا شہزادو                     گۅڈٕ پال میونُے وعدو                 پوشے متہ جانانو

1952ءتام چھُ کلہُم کٲشرِ شٲعری منز مہجورُے سُہ گۅڈنیُک شٲعر ییمۍ زنانن مُتعلق زٕاہم وژَن لیکھۍ ، گریسۍ کو ر تہٕ کٲشِر زنانہٕ۔ یہ وَنُن تہ چھُ منٲسب زِ واریہو کٲشرٮ۪و شٲعر و لیکھۍ زنانن متعلق واہیات۔ "مکرِ زن نٲوۍ چھے اَسہ نِش کٍژٕ مثنوی چالہ نظمہٕ ، یِمن منز زنانَن ہٕندۍ فقط عٲب دٲیراونہٕ آمٕتۍ چھِ تہٕ شٲعرن چھُنہٕ زنانہ ہٕندِ حسُنُک اکھ تہ پہلو باتہ آمُت، تہندِ اہمیتکہ احساسٕچ ٲس توتہ کتھا! مثالے اکبر بٹ بڈگٲمۍ سٕنز "مکرِ زَن " نظم بوٗزِتھ گو عبدالاحد آزاد شرمندٕ ۔تمٔۍ چھُ لیوٗکھمُت زِ واہیات آسنہٕ سببہٕ کور نہٕ مے اَمہ نظمہ ہُندنمونہٕ تہ درٕج۔ یِتھے پٲٹھۍ چُھ غلام محمد آخون اسلام آبٲدۍ سٕنز نظم"مکرزَن" تہ کٲشرٮ۪ن زَنانن ہٕنزِ شرمدٲری پٮ۪ٹھ اَکھ یچھ حملہٕ ۔ گریسۍ کو ر تہٕ کٲشِر زنانہٕ وژن لیکھِتھ دیُت مہجور ن اکھ نوٮ۪ر تہٕ تِمن کتھن کُن پھرُن سون ظۅن یِم اوتام تُلہٕ نے آسہٕ نہٕ آمژٕ۔

گریسۍ کو ر وَژُن یودوَے اکہ خاص طبقہٕ چَن زنانن سٍتۍ مخصوص چھُ، توتہ ہیکہ یہ کٲشرِ زنانہ ہُند خدوخال تہٕ صورتِ حال بَدِ کڈنس منز اَتھٕ ر وٹ کٔرِتھ ۔ دپان مہجورُن یہ وَژُن بوٗزِتھ اوس ٹیگورن تہ واہ واہ تہٕ شابش کورمُت۔ ییتٮ۪ن چھِنہٕ اَمہ وژنٕکۍ فنی محاسن وٮ۪ژھناوٕنۍ۔وۅں گو اَتھ منز چھے گریسۍ کورِ ہٕنز یہ تصویر اظہار لبان۔

"گریسۍ کو ر چھے جورٕ ر وس حسین ، پوشہ وٕنہ باغٕچ پوشہ گۅندٕر ہش نتہٕ کوہ قافٕچ پٔری یا سۅرگٕچ ہی مال اَماپوز پۅشاک چُھس سیود سادٕ ، اَتھ نہ چھُ گوٹہٕ چھٲوِتھ تہٕ نہ زٔری۔ سۅنہٕ وَسو بدلہٕ چھِس بدنس پوش جٔرۍ جٔرۍ ، نہ چُھس رویس غازٕ تہٕ نہ مویس پھٔلۍلہٕ مٔلِتھ ۔ خۅجہ بایہ چھے دارِ بَر تروپرِتھ دیوان خانن منز آسان،مگر گریسۍ کورِ چھے گُلن سٍتۍ دِلبری۔ رازٕ بومبرنہ أمِس لولرِ چھے چشمہٕ حیہ ہٕکہ آبہٕ باربُکہٕ۔ نٔرۍوارپھِرِتھ گرشمہٕ ژنجن منز فصلس ژوٗر دِوان ، بُمن پٮ۪ٹھ چھِس شبنمٕکۍ گُمہٕ پھیرۍ شفقہٕ تراوان۔ گریسۍ کو ر چھے حیادار ،غٲرت مند ، محنتی تہٕ مٔژھِج۔ گریسۍ کورٮ۪ن متعلق مہجورٕنۍ یٔہے شٲعرانہٕ تصویر چھے از تہ تِہنز حقیقتھ ۔یٔہے چھے گریسۍ کورِ ہٕنز اصل  صورتِ حال ،حُسن ،حیا ، محنت ، وفا تہٕ سادٕگی ۔ پَزر ہے بوزَو تہٕ یِم چیز چھِ زنانہ ہٕنز خٲصیت تہ تہٕ یِمو ورٲے ہیکنہٕ زنانہٕ ، زنانہٕ ٲسِتھ ۔

جبر پسند انسٲنی سماجن وُچھ قرنہٕ وادَو پٮ۪ٹھٕ زنانہٕ ذٲژ ر وگ ۔ یہ آیہ دۅہے کمزور تصور کرنہٕ۔ سماجن تھٔوۍ تٔمِس پٮ۪ٹھ کٍتۍ ظُلم تہٕ جبر جٲری ۔ ریاکارتہٕ استحصٲلی سماجن زٲنۍ نہٕ تسٕنز اہمیت۔مردٕ سٕندِ کھۅتہٕ زیادٕ محنت کرنہٕ باوجود آو تس آویزٕروزنُک احساس گٔنۍ راونہٕ تہٕ دٔرراونہٕ ۔ تس ییلہ نہٕ آزٲدی سان شہہ ہٮ۪نُک زانہہ موقے دِنہٕ آو ،تٔمِس گوو وَچھس وَٹھ!

وَتہٕ چانہ وُچھ ہا وارٕ نظرن رٲچھ چھِم کم تام                بوٗزُم وۅں کرنم رٲچھ دِلہٕ چے رایہ ونے کیا

کٲشرِ زنانہ آو یہ باور دِنہٕ زِ سۅ چھے سماجہٕ خٲطرٕ اکھ گوب بور ۔ زنانن ہٕنزِ آزٲدی ہُندمطلب چھُنہٕ بے راہ روی تہٕ بے پردٕگی بلکہ  شرمدٲری ہٕندٮ۪ن حدن منزتِہندِ سونچٕچ تہٕ تِہنزِ خۅد دٲری ہٕنزقدرٕ۔ زنانن ہُند چھا اَتھ منززیادَے قصوٗر زِکورِ مٲلِس چھُ داجُک خرچہٕ وٮ۪تراونہٕ کمرس کوب گژھان۔ یہ چھَنا کو رٕے یۅسہٕ أکِس زمانس منز گوبرٕ مٲلِس نقد بوگ ہٮ۪تھ کٕننہٕ یوان ٲس ۔ سَتہٕ ؤرۍ شے اوسنا بٮ۪گارِ دٮ۪وس بلایہ دِنہٕ خٲطرٕ گرٕ زامتُر اَننہٕ یوان۔ از چھَنا کٍژٕ خانہٕ ماجہ کُڈٕرۍ وٲرِوۍ تانہٕ سببہٕ تہ کم داج میلنہٕ مۅکھٕ کھسہٕ وُن یاوُن آبہٕ بُزۍ تہٕ نارٕ بُزۍ کران۔

رنگہٕ رنگہٕ دۅکھ تہٕ دٲدۍ ژالان آیَس        لولَس چھَس کران لۅلہٕ مَتہٕ لاے

مہجورس آسہٕ یِمہٕ ساریے کتھٕ نظرِ تَل ، تسُند وژُن"کٲشرِ زنانہٕ " ییتہ زنانہ ہٕندِ س عظمتس ٲنہٕ ہاوان چھُ ، تَتہ چھُ اَتھ منز موجود أمِس اَژھٕ رژھِ ہُند کلہُم حزن تہٕ ملال پرَن وٲلِس وُدٲسۍ تہ کران تہٕ أمۍ سٕنزِ بے بسی ہٕندۍ نیزٕ ترُسۍ دِوان۔

کٲشرِ زنانہٕ چھے پنہٕ نِس یاوَن رایس ناد لایان لایان، گراوٕ گُذراوان گُذراوان پنُن سورُے وۅندٕ باوان، تسُند یہ یاون راے چھُنہٕ کانہہ ما فوق الفطرت معشوق یا اساطیری کردار۔یہ چھُ نٔنۍ پٲٹھۍ تسُند مرد ، یُس أمۍ سُند مٔژھۍ جار مٔشرٲوِتھ مالَے مٔشرِتھ تہ گومُت چُھس !

میٲنِس بے پرواے یاوَن رایس چھَنہٕ میٲنۍ ماے ۔ بہٕ زایس پننہ مرضی بغٲر ، یِتھ پٲٹھۍ پرٮ۪تھ کانہہ دُنیا ہس چھُ یِوان ہرگاہے مے پانس تام آسہ ہا ، بہٕ یِمہٕ ہا نہٕ یَتھ دۅکھل دُنیاہس منز میانہ زٮ۪نہٕ گوو میانٮ۪ن انگن ٲشناوَن دَم تہٕ شرم ،افسوس بہٕ کتھ کِژ آیَس تہٕ کیازِ زایس۔ بہرحال بہٕ آیس رحمہٕ کہ مارٕ متہ رَچھنہٕ ۔ خداین دِژٕم کھسہٕ وٕنۍ جوٲنی۔ واریا سِتم تہٕ صدم ژٲلِم پنٕنۍ در دِل مٲج روٗزٕم دایس۔ رَنُن پاکہٕ وُن ہیچھ نٲونس ، اَماپوز کانہہ کسب کار ہیوچھمنہٕ ۔ میٲنِس حُسنہٕ سرمایس کٔرشرمہ تہٕ حیہ ہن رٲچھ۔ صبرٕ کِس قلایس تہٕ شرمہ ہٕندِس سایباس تَل ر وچھُم پنُن حُسنہٕ سرمایہ، محفوٗظ تھووُم۔ انگو ٲشناوَو پُشرٲوٕس کس تام وۅپر مردس۔ میٲنۍ مرضی کٔرنہٕ کٲنسہ معلوٗم۔ مے کور تی منظوٗر۔ کُنہ تہ نیایَس دِژٕم نہٕ تَن" ۔ مہجورنِس اَمہ وژنہٕ کِس گۅڈنکِس حِصس منزچھے پٔزۍپٲٹھۍ سۅے صوٗرتِ حال نظماونہٕ آمٕژ یۅسہٕ وٲنسہ وادَوپٮ۪ٹھ کٲشرٮ۪ن کورٮ۪ن ہُندلون بنے مٕژ ٲس تہٕ وُنہ تہ چھے قٲیم۔ کو ر چھے زٮ۪وان۔ مٲلِس ماجہ چھے دِلَس گراے لگان۔ تعلیم تربیت دِنہٕ ورٲے چھِس کینژَن ؤرۍین رَچھان۔ لاوِ جوٲنی منزٕے چھِن کٲنسہ پُشراوان تہٕ بَس ۔ یہ ِ چھے د ویم کتھ زِوۅنۍ چھے اَتھ صوٗرتِ حالس منز تبدیلی یِنہٕ لٔجمٕژ۔

مہجورس اوس توتہ کٲشرِ زنانہ ہٕندِ عظمتُک احساس ۔ اَمی عظمتٕکۍ احساسَن تہ افتخارن کور مہجور پنہٕ نِس شعری مۅرشد رسول میرس تام گراو گذراونس پٮ۪ٹھ مجبور

شاہ آبٲدۍ میر کیازِ اوس ژھاران قندٕ ہارٕچ زوٗن                      تس کونہٕ ژٮ۪تس ٲس پٮ۪وان ژندٕ ہارٕچ زوٗن

زوٗن چھِ یوٗسف شاہ ژک سٕنزِ مٔلۍ کانہ ونان، ییمِس تازٕ تحقیقہٕ موجُب حبیبہٕ ناو اوسمُت چھُ تہٕ مٔلۍکٲنۍ بٔنِتھ و ونہس حبہ خاتون۔ دپان سۅ ٲس پانپرس نکھے ژندٕ ہار نٲوۍ گامس منزأکِس گریسۍ گرس منز زامٕژ۔ تسٕندِ حُسنُک شۅہرٕ بوٗزِتھ گو یوسُف شاہ ژک شہزادئہ کشمیر تس پتَھ دیوانہ ٕ۔ ٲخٕر ییلہ یوٗسُف شاہ رازٕ بنیوو تمٔۍ أنۍ زوٗن پنہٕ نِس نکحَس منز تہٕ بنٲوٕن محلہٕ خانٕچ شوٗب ۔ زوٗن ٲس نہٕ فقط یوسُف شِہنہ محلہٕ خانٕچ کۅنگہٕ تِہج بلکہ  سارِنٕے کٲشرٮ۪ن زنانن ہٕنز ڈٮ۪کہٕ ٹکہٕ ۔ سۅ ٲس شٲعر تہ تہٕ موسیقار تہ ، جُرت مند تہ ٲس تہٕ مُلکی نظم و نسق چلاونُک اَٹھ تہ اوسُس ۔ رسول میرن ہیوت نہٕ تسُند ناو کُنہ جایہ بلکہ  فارسی ادبُک مُطالہٕ آسنہٕ مۅکھٕ چھے تمٔۍ "ماہ نخشب "مطلب نخشبٕچ زوٗن، پنہٕ نِس کلامس منزنہایت فن کٲری سان کٍژِ پھِرِ ورتٲومٕژ ۔ماہ نخشبس چھِ قندٕہارٕ چ زوٗن تہ وَنان۔ نخشب چھُ روٗسی وسطِ ایشیاہس منز قندٕ ہارٕ پٮ۪ٹھٕ کینہہ میل دوٗر۔ روایت چھے زِ اٍٹھۍمہ صٔدی ہجری منزٲس اَتھ جایہ حکیم ابن عطا نٲوۍ أکۍ شعبدٕ بازَن پننہ کیمیا گری سٍتۍ اکھ نقلی زوٗن بنٲومٕژ ،ییمیُک گاش کینژَن میلن تام واتان اوس۔یہ ٲس پرٮ۪تھ شامَس بالہٕ دامنس نِش اکہ چاہ منزٕ کھسان تہٕ صُبحٲے ٲس أتھۍ منز واپس وَسان۔دپان یہ زوٗن ہیچ صِرف ترٮ۪ن رٮ۪تن تام قٲیم روٗزِتھ تہٕ پٲنۍ پانے گو اَمیُک نظام واورِ۔ فارسی شٲعرو کور ماہ نخشب تلمیح رٔنگۍ استعمال تہٕ رسول میرنتہ ورتٲو یہ تلمیح:

چُھے خال تیُتھے شوٗبان زن ماہ نخشب زان                               در چاہ زنخندانہٕ جانانہٕ وَندٕ یو سَر

بُتھِ پٮ۪ٹھٕ یام زُلف اَتھٕ تراوان                     زالہٕ ولان پتھ کُن تھاوان

کالہٕ اوبرس تَل ماہ نخشب                                                 آفتِ جان شوٗبان عجب

آفتابِ بُلغار مہتابِ قندٕ ہار                        ژے ڈیشِتھ مندچھانہٕ چھُکھ جان جانانہٕ

اَماپوز مہجورن ٲس کٲشرِ زنانہ ہٕنز عظمتَھ محسوٗس کٔرمٕژ تہٕ توے گنڈِن أمِس رَژھِ رَژھِ حُسنس طُمارٕ تہ تہٕ تسُند کروٗٹھ تہٕ میوٗٹھ دود کورُن اِظہار تہ ،سٍتی کٔرِن حبہ خوتوٗنہ تہٕ لل دیدِ ہشَن تٲریخی شخصیٔژن کُن نہ صرف اِشارٕ بلکہ "کٲشرِ زنانہٕ" وژنہٕ کِس د ویمِس حِصَس منزکورُن تِہُند تذکرٕ فخرٕ سان ،یہ زٲنِتھ زِدۅنوَے خوتوٗنہٕ آسہٕ کٲشرِ تہٕ دۅنوٕنۍ ہُند توٲریخی کردار چھُ واراہ اہم ۔ دۅنٕوَے چھے توٲریخو علاوٕ عوامہٕ کِس ژٮ۪تہٕ ؤترِس منز مایہ تہٕ عقیدٕ تہٕ سان محفوٗظ

للہ مٔژ ییلہ مٔنزۍ بازرۍ درایس                                         شاہ ہمدانن وُچھ میٲنۍ ژھاے
مَردَس
برونہہ کُن پردٕسان آیس                                    یاوَن رایس چھَنہٕ میٲنۍ ماے
دۅہہٕ
اکہ ژندٕ ہار گریسۍ گرِ زایس                                            بختن بنٲوٕس پادشاہ باے
تَتھ
شٲہی منز تہ کھوٗژس خدایس                                      یاوَن رایس چھَنہٕ میٲنۍ ماے

حضرت اقبال چھُ زنانہ ہٕنز اہمیت یہ ؤنِتھ بَدِ کڈان زِ

وجودِ زن سے ہے تصویرِ کائنات میں رنگ

اماپوز کٲشرِ زنانہ ہٕندِس عظمتس پھیُر دِوان و ون مہجورن تہ ،یہ پرٮ۪تھ زمانس منز زنانہ ہٕنز حقیقت ٲسمٕژ تہ چھے تہٕ آسہ تہ۔ امالوٗکھ کیازِ أمِس سماجہ خٲطرٕ بورزانان ،ییلہ تِمن تسٕنزِ ییمہ پوشہ وٕنہ حقیقتُک پَے چھُ

مےے لٲج شوٗب یَتھ فٲنی سرایس                      اولیاءتہٕ دِوتا مےے کِنۍ  آے
تیلہ
لٔج بٔستی ییلہ بہٕ ٹھہریایَس                                           یاوَن رایَس چھَنہٕ میٲنۍ ماے

مہجورنہ شٲعری منز کٲشرِ زنانہ ہُند خط و خال ژھارنہٕ خٲطرٕ چھُ تمٔۍ سٕندٮ۪ن تاشوقہٕ وَژنن تہٕ تِمن دۅن وَژنَن پیٹھ یِمن ہُند گۅڈَے تذکرٕ سپُد تٔکۍیہ کرُن ضروٗری۔ تاہم چھَنہٕ تسٕندِس کلامَس منزکٲشرٮ۪ن زنانن ہٕندِ پۅشاکٕچ ژینہٕ وَن تام تہ میلان ۔ تعُجب چھُ زِ رسول میر ییتہ فارسی ادبہٕ کٮ۪و ناگو منزٕ تریش چٮ۪تھ، فارسی تلمیحات، تراکیب تہٕ محاکات ورتاوان چھُ، تَتہ چھُ تسُند معشوق خٲلِص کٲشرِگٔہنہٕ سٍتۍ پان پٲراوان ۔تمٔۍ چھِ یِم چیز تخیلچہ کوندِ منزپٔیِتھ ورتٲوۍمٕتۍ۔رۅنہ گۅڈ ،سٲلۍ، چھٲلۍ ،کنہٕ پھول، ٹاکٲنۍ ، زٲلۍ وانکہٕ،پھُلکٲرۍ،ہنگہٕ طوٗمار،باؤٹ ،گوشوارٕ، چاردان،کنٹھٕ مال تہٕ بِندرٕ بیترِ۔مہجورن چھُنہٕ تالہٕ رَز، دوٗرتہٕ زٲلۍ وانکو ورٲے کُنہ تہ یِتھِ پٲراوٕکہ چیزُ ک ناو ہیوتمُت ،تسُند محبوٗب چھُ سیود سادٕ تہٕ قدرتی حُسنُک پیکر دراصل  چھِ مہجورنس کلامس منززنانہ ہٕندۍ جذباتھ رقٕص کران۔یہ کلامہٕ چھُ زنانہ ہٕندِ حُسنہٕ تہٕ حزنُک سنگم۔ سُہ چھُنہٕ کٲشرِ زنانہ ہٕندۍ خط و خال بدنہٕ کٮ۪و آکارو سٍتۍوۅتلاوان بلکہ  تسٕندٮ۪و دَم پھُٹۍ گٲمتٮ۪ن جذباتن ہٕندِاظہارٕسٍتۍ۔ تسٕندِس کلامَس منز چھے کٲشرِ زنانہٕ اَزلے حسین ۔ظٲہری پٲراوٕ ر وستُے ،مٔژھِج ،شرمدار، مٮ۪حنتی،سماجٕچ لتہٕ داس، شفیق تہٕ ہمدرد مٲج، رازٕ بومبرٕ سٕنزلولٕر، یوسُف شِہٕنۍ حبہ خاتوٗن،شِو یوگنۍ للہٕ دٮ۪د،فٲنی سرایہ ہٕنز شوٗب تہٕ یاوَن رایس سرپادن تَل تراوَن واجینۍ۔ یٔہے حافظ سٕنز سیاہ چشمہٕ واجینۍ ، اقبال سٕنز "لار رُخ، سمن برے"تہٕ غٲلب سٕنز "بُت کشمیر" چھے ،مہجور نہ شٲعری منز وٮ۪داکھ دِوان دِوان سینس کٔنۍ ڈکھٕ تھٔوِتھ ،جانِ مَنس پٮ۪ٹھ یِنہٕ پتہٕ باکہٕ ژھٹنہٕ کِس یتھ اندازَس منز جُرت ہیوٗ ہاوٕنۍ ہٮ۪وان

بہٕ نیرٕ نٔنۍ پٲٹھۍ باوٕ لوٗکن تسٕندۍ امارن مے زٲج ہن ہن                                                 نہ کھوژٕ پامن کتھَن وۅلامن نہ کٲنسہ شِترس ڈرے ہا لالو

کلامِ مقبول امرتسری

تبصرٕ تہٕ تُلنے

چھاپ خانٕچ سہولیت یاف سپدنس تام ٲس کٲشِر شٲعری عوامہٕ کِس اجتمٲعی ژیتہٕ ؤترِس منز محفوٗظ سپدِتھ اکہ پُیہ پٮ۪ٹھٕ بییس پُیہ تام واتان روزان، لُکہٕ شٲعری ہٕندۍ خٲلق چھِ اویدۍ آسان، یہ شٲعری ورتاونس دورانچھِ عام لوٗکھ اَتھ منز ژٹھ واٹھ کران روزان تہٕ ٲخرس
چھے یہ اجتمٲعی زِہٮ۪نٕچ پٲداوار بنان، لُکہٕ شٲعری ہٕنز عمل چھے یِتھے پٲٹھۍ جٲری۔ کٲشرٮ۪و چھِ ہفتاکالہ پٮ۪ٹھٕ ٲنتہٕ رُسۍ غٲیلہٕ، وۅگتہٕ تہٕ دۅلابہٕ وُچھمٕتۍ ، ژینۍمٕتۍ تہٕ ژٲلۍ مٕتۍ، مثالے لوٗٹھ مار ،نار ،وۅباہ ، بُنِلۍ ، سٔہلاب ، دراگ تہٕ بٮ۪گٲرۍ۔یِمو غٲیلو کٔرۍ خبر کٍتیاہ تمدنی یادگار تباہ تہٕ نابوٗد ،بے شُمار شعرٕ سرمایہ گو یِمو سٍتۍ ضایہ، ہناہ گو تِمن خواندٕ لوٗکن ہٕنزِ کنجوٗسی تہٕ لاپروٲہی کِنۍ تہ از دس،یِمو یہ شعر سرمایہٕ پنہٕ نے یوت خٲطرٕ نقل کٔرِتھ یانقٕل کرناوٕنٲوِتھ غِلافن تہٕ سوزارٮ۪ن منز قٲد کٔرِتھ تھوو تہٕ بییس تام دیُت ہس نہٕ واتہٕ نے! تِہندٮ۪و شُرٮ۪و مُرٮ۪و تہٕ زُرٮ۪و موزُس نہٕ تہٕ گوضایہ۔ تعلیم ٲس نہٕ عام ، ناخواندٕ اجہلٮ۪ن ہے کاغذ بودراہ، بیاضاہ ، بُرزٕ تِلۍماہ اَتھ لجایہ، بے قدری ہُند اوس یہ حال زِیِم مۅلٕلۍ تہٕ رچھِن لایق چیز ٲسۍ ناسِتہ پھُٹجہ وٹہٕ نَس لاگان ، باضے ٲسۍ یِم چیز عوامچہ لا عٔلمی سبہٕ سٔدرٕ کٲنز پاوٮ۪ن تہٕ آبہٕ نٹٮ۪ن ہٕندِس پٮ۪ژرٕس لٔگِتھ ژَن بنان[1] یہ چھِ اکھ المناک صورتِ حال۔تاہم یہ کینژھاہ اَمہ ورزٕ واوٕ نِش بچوو ،سُہ بچوو تِمن بے شُمار شوقہٕ والٮ۪ن کٲشرٮ۪ن ہٕندسٍتۍ ،یِمو منز اکثریت ناخواندٕ ٲس ، تہٕ یِمو کٲشرٮ۪ن شٲعرن ہُند کلام یاداشت کٮ۪ن تہہ خانن منز ر وچھ تہٕ نوٮ۪ن نوٮ۪ن پُین تام واتنوو۔ بے شُمار شوقل موسیقار ، نقل نویس ،صاحبِ ذوق ذٲلدار ،رٔئیس ،مولوی صاحبان تہٕ مُبلغ حضرات تہ چھِ کٲشِر شٲعری ہٕندۍ ژُکۍ دَریِمو پنہٕ نِس پنہٕ نِس مزازس ویہ وُنۍ شٲعری نقٕل کٔر،یاد کٔر یا مسودن منزمحفوٗظ کٔر۔ اماپوز اَتھ سٲرۍسٕے کامہ منز چھُ یِمن لوٗکن محض پننہ دلچسپی ہُندخیال روٗدمُت ، چھل تہٕ چھٲنۍ دِنُک اوس نہٕ زمانٕے ،زگ تہٕ پرون ژارنُک اوس نہٕ خیالٕے ، اوے چھُ خبر کٍتہ ہن شٲعرن ہُند کلام لُکہٕ شٲعری سٍتۍ رل گٔژِھتھ روومُت، کلامٕچ چھنہٕ کتھٕے ، اَسہ چھِ شٲعر تام رٲوۍمٕتۍ ، شٲعر راونہٕ سٍتۍ چھِ ادبی توٲریخٕکۍ زیٹھۍ دورتاں نظرو ژھایہ روٗزِتھ۔اماپوز ادبی تحقیق چھُ اکھ گنڈُل عمل، تچھِ تچھِ کرنہٕ سٍتۍ ،ژھونڈ ژھٲر دِنہٕ سٍتۍ تہٕ تلاشچہ نوِوتہٕ بَدِ کڈنہٕ سٍتۍ چھَ نہ صِرف نوِ کتھٕ برونہہ کُن یوان بلکہ  رٲوۍمٕتۍ گۅنماتھ تام چھِ بازیاف سپدان،ادبی تحقیقہٕ تلہٕ کڈنہٕ آمُت کانہہ نتیجہٕ ہیکہ نہٕ حتمی ٲسِتھ اماپوز کتھِ منزچھِ کتَھ نیران، ہرگاہ سٲنۍ بُزرگ تحقیق کار گوش دِتھ تہٕ نیپھ ہٮ۪تھ بیٹھۍ مٕتۍ آسہٕ ہن ، شاید واتہ ہے نہٕ وہاب پرِیُن، اسد پرِیُن تہٕ مولوی صدیق اللہ سُند سٲلِم کلام نہ اَسہ تاں تہٕ یِنہٕ واجہٕ نٮ۪ن پُیَن تاں، ساڑِ ترییہ ہتہ وُہری نہ صحی مگر حبہ خوتونہ ہُندکُلیات کتہ وسہ ہے اسمانہٕ ،مہجورن ،رسول میرن مقبول کرالہٕ وٲرۍ سُند ،پرمانندن تہٕ کرشنہٕ جورازدانَن کلام تہ مالگہ ہے واوٕ گلٮ۪ن[2]۔ بُزرگ تہٕ جوان ،پرٲنۍ کیو نٔوۍ، سٲنۍ محقق چھِ دَنہٕ پنہٕ پتھکُن بچے مٕتِس شعرٕ سرمایس بدِکڈٔتھ محفوٗظ کرنہٕ چہ عملہ سٍتۍ آورٕۍہرگاہ یہ عمل تھا مہ گژھِ ، ہا یہ لد پِٹارن ، تومبۍلۅنگہٕ نٮ۪ن ، چمرٕغلافن تہٕ صندوقن منز سڑن والٮ۪ن کاغذن ہُند نیال نوم تہ میلہ نہٕ۔وُنہ چھُ موقہٕ زِ سرین، گامن گُٹھن تہٕ کنجن منز دِمو ژھٲر ، بناں چھُ پوت ژھارِ مالَبو کینہہ نتہٕ کینہہ مۅلُل تہ ۔بہرحال معتبر تحقیق کارن ہٕندِس فہرستس منزچھُ ناجی منور سُند ناو نُمایاں، میر عبداللہ بیہقی سٕندِ کُلیاتہٕ پتہٕ چھُ نٲجی منور ، مقبول امرتسرۍ سُند کلام بازر تراوان۔

مقبول امرتسرۍ چھُ اکھ تازٕ دریاف شٲعر، عبدالاحد آزادس تہ چھُنہٕ أمۍ سُند پے اوسمُت ،تذکرٕ نگارو چُھنہٕ تسُند ناوٕے ہیوتمُت ،ا ماپوزدۅیو محققو، پروفیسر غلام محمد شاد تہٕ ناجی منور ن تُج عیسٲے سنہٕ کہ ٲٹھمہ دٔہلہ پٮ۪ٹھے کتھ کتھ زِ مقبول امرتسری ناوٕکِس کستام گٲل کھاتس گٍمتِس شٲعر سُند کلام تہ چھُ قلمی نۅسخن اندر نظرِ گژھان ، یہ کتھ کِتھٕ وٲژ ٲخر سنجیدٕ تحقیق کِس مرحلس تام،دۅنوے تیز نظر تحقیق کار لٔگۍأمِس رٲوۍمٕتِس گۅنماتہٕ سُند کلام سومبراونہ،حتاکہ ناجی منورن لیکھۍمقبول امرتسٔرِس متعلق کینہہ مۅخصر مضمون تہ، وُنہ اوس سُہ سانٮ۪ن ادبی حلقن تہٕ کٲشرٮ۪ن شعر پسندن ویود گژھٕ نَے زِناجی منورن کور أکِس اہم کٲشرِس شٲعرٕ سٕندِحثۍیتہٕ۔ "کٲشرِادبُک توٲریخ "کِس أکِس بابَس اندر شٲمل ، پروفیسر غلام محمدشاد صٲبن کور دعویٰ زِ مے نِش چھُ مقبول امرتسری سُند واریاہ کلام جمع گومُت ،یتھ منزمثنوی یوسُف زلیخا ،ہتھ شَتھ غزل تۯہ


ژتجہہ منقبت تہٕ نعت شٲمل چھِ، تسُند کلیات چھُ مے زیر ترتیب، یتھ سٍتۍ تسٕندۍ مفصل خاندٲنی حالات تہ چھِ [3] راقم الحروف تہ چھُ وٲقف زِ پروفیسر غلام محمد شاد صٲبس نِش چھُ پزی مقبول امرتسری سُند واریاہ کلام ، حتاکہ1986ءکِس وندس منزکٔرۍ مے تہ مقبول امرتسری سٕندۍ اَٹھووُہ بٲتھ شاد صٲبَس اَمہ غرضہٕ حوالہٕ زِ سُہ کرِ تِمن زیر ترتیب کُلیاتِ مقبول امرتسرۍیس اندر شٲمِل۔ مے اوس أمِس مقبولن یہ کلام 3 جنوری 1984ءدۅہ کٹہٕ ہار علاقہٕ کِس نوگام گامَس منز دسیاب سپُدمُت ، اَتہ وُچھ مے پیر نوٗر الدینس نِش اکھ بیاض ،یتھ منز مقبول امرتسری تہٕ محمود گامی سُند کلام درٕج اوس، بیا ضہ ہُندکٲتب چھُ،محمد یوسف نقشبندی گُلزار ساکن نوگام ابنِ پیر علی شاہ، دردربارِ درین پیر غلام الدین ، سن کتابت، 27 ماہ ربیع الثٲنی1372ھ" ۔پیر علی شاہ اوس اَمہ وِزِ الہٕ پلہٕ ڈۅڈ ِہتہ[4]۔

سانٮ۪ن پتھ کُن بچے متٮ۪ن قلمی نۅسخن منز چھِ واریہن مقبولن ہٕندِ کلامٕکۍ نمونہٕ میلان ،مثالے مقبول کرالہ ٕ وٲرۍ ، مقبول امرتسری ،مقبول خاکی ، مقبول ابنِ پیر غلام محمد[5] ، اکثر بٲتن چھُ لیکھُت مقبول ،اوَے چھُ باضے باضے مُشکِل گژھان وَنُن یا دعویٰ کرُن زٕ کُس بٲتھ ثٮ۪قہٕ پٲٹھۍ کسُند ہیکہ ٲسِتھ، ادبی تحقیقس منزنہ چھِ تھپہٕ تھپہ چلان تہٕ نہَ أنۍ گٮ۪لہٕ، وۅں گو کُنہ کتھِ ہٕندِس صحی آسہٕ نس یا نہَ آسہٕ نس پٮ۪ٹھ یام شک گنان چھُ، تحقیق چھُ نوینہٕ سرحدن ہُند پے ہٮ۪وان،پزرس تاں واتان یا پزرس تاں واتہٕ نٕکۍ اِمکان بدِ کڈان، یی کور تحقیقن مقبول امرتسرۍیس سٍتۍ تہ، ناجی منورن کور تسُند کلام شایع ،پروفیسر غلام محمد شاد صٲبن د وپ زِمقبول امرتسری چھُ اکھ حقیقت[6] ، راقم الحروفن لٔبۍ تسٕندۍالہ ٕ پلہٕ پانژٕ ترٕہ بٲتھ۔

ناجی منور سٕنز یہ تازٕ تحقیقی کٲم چھے وارٕیہو وجہو کِنۍ تعریفن لایق۔ تٔمِس یُس کلام دسیاب سپُد سُہ ترووُن"کلامِ مقبول امرتسرۍ" ناوس تحت ، اکھ ہتھ تہٕ شُنمتھ صفن ہٕنزِ اَتھ کتابہ منز چھِ  28 غزل، 14 وژن ، زٕ نعت تہٕ زٕ منقبت،پٔہلۍ نامہٕ تہٕ مثنوی یوسف زلیخا۔ تمٔۍ چھُنہٕ شاید اوٕ سبہٕ اَتھ کُلیات ناو دیتمُت زِ تسٕندِ مزید کلامہٕ کہ اَتھِ یِنٕکۍ چھِ اِمکانات ، بییہ چھُ پروفیسر شاد صٲبس نِش واراہ کلام، یٔمہ ورٲے زیرِ نظر کتاب کُلیاتِ بٔنۍتھٕے ہیکہ ہے نہٕ۔ کُلیات کر چھپہ تہٕ کِژھ چھَپہ،﴿خدا بوزن جلدٕے چھپِن﴿آمین﴾ مگر مقبول امرتسری سٕندِکلامہٕ بازیاف کرنٕچ اولیت آیہ ناجی منور سٕے باگہ ، تہٕ اولیتُک یہ پھیوت شولہ ہمیشہ تسٕندۍ سٕے ہنگس ،زندگی تہٕ زمانہٕ کِس گردِشس پٮ۪ٹھ کیا وسا چھُ ،نٲجی منورن کور کٲشرِس شعر ادبس بیاکھ احسان زِ مقبول امرتسری سُند کلام لٔبِتھ واتنووُن پرن والٮ۪ن تام، نتہٕ زَن چھُ تس احساس زِ مقبولٕنۍ حالات ،تسٕنز زاتھ بُتراتھ آیہ نہٕ تس بدس ، فقط ناو تہٕ کلام۔تسُند کلام ژھارنہٕ خٲطرٕ یِم بیاضہٕ تمٔۍ وُچھِ خصوصن مہجور سٕنزِ لائبریری منز باباعبداللہ ٹینگہٕ پُنۍ سٕنز بیاض یۅسہٕ 1852-54ءمنزلٮ۪کھنہٕ آمٕژ چھِ، تِم چھے پزی قٲبلِ اعتبار،نٲجی منور سُند تحقیق چھُ مقبول امرتسرۍ یس متعلق نۅمن کتھن ہٕنز نشاندہی کران مگر یِمو منز ہٮ۪کن کینہہ کتھٕ غلط تہ ٲسِتھ ، تسٕندۍ حٲصِل کٔرۍمٕتۍ نتیجہ چھِ محققن ہُند توجہ منگان:-

مقبول امرتسری چھُ محمود گٲمی سُند ہم کال شٲعر۔

محی الدین مسکین سرایہ بٔلۍ  سٕنزِمثنوی یوسُف زلیخایہ ﴿چھاپ 1320ھ﴾ منز یمِٔس مقبول بابا ساکن مونگہٕ ہامہ سُند ذِکرسبب تالیف عنوانس تحت کرنہٕ آمُت چھُ، شاید گژھِ سُے مقبول امرتسری آسُن۔

کٔشیرِ دوٗر روزنہٕ کِنۍ چھُ مقبول امرتسری گُمنٲمی ہٕندِس حالس منز روزان مگر قلمی نۅسخن منزچھُ باقٕے شٲعرن ہٕندِس کلامس سٍتۍ تسُند کلام تہ میلان۔

مقبول امرتسری سُند اسلوٗب چھُ مقبول کرالہ ٕ وٲرۍ سٕندِ اسلوٗبہٕ نِش بِلکُل وکھرٕ ۔

محمود گٲمی تہٕ مقبول امرتسری سُند زبٲنۍ ورتاو چھُ اَکھ أکِس نِش بیون۔

مقبول امرتسری سٕندۍ موضوع چھِ تِمے یِم باقین ہٕندۍ چھِ۔

از تام چھُنہٕ کٲنسہ مثنوی نگارن یَسلہٕ پٲٹھۍ مقبول امرتسری سٕندِ طریقہٕ مختلف معنیو خٲطرٕ پنُن ناو یا تخلص ورتوومُت،مثنوی یوسُف زلیخا یہ منزچھُ مقبول تخلُص مختلف معنہ یو خٲطرٕپھِرۍ پھِرۍ ورتاونہٕ آمُت۔

مقبول امرتسری سُند یُس کلام زیرِ نظر کتابہ منز شٲمل کرنہٕ آمُت چھُ ،تمہ سٍتۍ چھُ پٔزۍ پٲٹھۍ تمٔۍ سُند اکھ بیون بدوٗن ڈِکشن برونہہ کُن یوان، سُہ چھُ اکھ پۅختہٕ کار غزل گو، غزل گویی ہٕندۍ کُلہُم لوٲزِم چھِ تس نظرِتل روٗدۍمٕتۍ، وژنن منزچھِنہٕ غٲر ضروری  گوبۍ فارسی لفٕظ ورتاونہٕ آمٕتۍ ، کلہُم پٲٹھۍ چھُ اَمہ ڈکشنُک پریز ناون نشانہٕ سلاست تہٕ لۅتہٕ وٲے لہجہ ۔ فارسی لفظ تہٕ ترکیبن ہُند استعمال تہ چھُن کٲشرس مزازس تہٕ لہجس ویہ وُنہ آیہ کورمُت ۔

ژے کس اغیارٕ سے سٍتٮ۪ن لوگُے دِل بے وفا یارے                                                 بہ چانے ویرِ چھس پٮ۪ٹھ شیرِہٮ۪تھ نعمٕژ ژھرے بومبرو۔

خامن منز کوٕ لٲجنَس پامن تمٔۍ سیم اندامن                                     کامٕنہ تِہنزے زربف جامن دامن سٔرۍ اَشہ گوم

ہانژلہٕ از وولہٕ سون وۅلو کرون وندٲیو                                                   کاژٕ زوٗنہ دیت تھم گرون وۅلو کرون وندٲیو

ترتیب کارن چھِ واریاہ چیز مزید چھل تہٕ چھٲنۍ دِنہٕ کہ غرضہٕ ترٲوۍمٔتۍ،تمٔۍ چھُ مقبول امرتسری سُند منفرد اسلوٗب نظرِ تل تھٔوِتھ تہٕ قلمی نۅسخن ہُند تقابُلی مُطالعہٕ کٔرِتھ منتخب کلامے یوت کتابہ منزشٲمل کورمُت، صحی تحقیقُک تقاضہٕ تہ اوس یی ،نتہٕ زَن کیازِ کرِہے نہٕ سُہ، ژُمِصری اکتٲجہن شعرن پٮ۪ٹھ مٕشتمل تسُند مُناجات یتھ کتابہ منز درج یٔمِکۍ سَتھ شعر یونیورسٹی ہٕندِ کٲشرِ شعبہٕ کِس "انہار1991ئ"رسالس منز ، مقبول امرتسرۍ یس متعلق پنہٕ نِس أکِس مضمونس منزدرٕج ٲسِن کرٔۍمٕتۍ ،یِم شعر چھِ اَمی مناجاتٕکۍ

بوزتم تہٕ ونہٕ ہے زار یا بار اِلٲہی                                  ژٕے میون وفا دار یا بار اِلٲہی

احتیاط تہٕ چھان بین چھُ ضروری  ، واریاہ بٲتھ چھِ تِم یِم أکِس قلمی نۅسخس منزمحمود نہ یاں زِمحمود گٲمی سٕندِناوٕ درٕج چھِ تہٕ بییس نۅسخس منزبدل کٲنسہ ہٕندِناوٕ مثالے مقبول کرالہٕ وٲرۍ ، مقبول، نٲظِم بیترِ "مصحفہٕ اندرے بوز آلو"وژُن چھُ مے أکِس نۅسخس منزمحمود گٲمی سٕندِ ناوٕ نظرِ گومُت مگر یۅہے چھُ ناجی صٲبس مقبول امرتسری سٕندِناوٕ دسیاب سپُدمُت ،مے نِش چھِ وُنہ تہ مقبول امرتسری سٕندِ ناوٕ کینہہ بٲتھ ،یِمن منزیہ منہٕ مون بٲتھ تہ شٲمل چھُ، کاش یہ آسہ ہا اَتھ کتابہ ِمنز درٕج سپُدمُت

دِلبر یٔمِس دِل آوٕرے                                        کر جان تمٔۍ سُند واوٕرے
یُس
گو شہیدِ کربلا                                                       تس ونتہٕ پتھ کُن کیا مرے
یَس
ہول عشقُن سون دِلس                       دٲدِس دواہ تس کیا کرے
وون کیا سُہ پوشن کُن دِے                         یَس گُل ہرن پوشے تھرے
سُے
زانہ عشقُن آمہٕ تاو                                 یَس نار لوگ پانس لرے
یَس
نار دوکانس ہیوتُن                                    کیا کرِ ، دیا نارس نرے
معشوق
یٔمۍ سُند ژھایہ روٗد                                تعشوقہٕ کمٔۍ سٕندِ حُب برے
ٹھٔرۍ
کاس ترٲوِتھ ژٕھن خودی                 دردِل سُہ کوتاہ دۅکھ برے
مقبولہٕ
یارس وون دِتو                                       وُچھتن سُہ ما آسی گرے

﴿بیاضِ یوسف نقشبندی﴾

بہرحال چھِ زیرِ نظر کتاب اکھ سر تازٕ ڈٲلۍ، کٲشرِشٲعری ہٕندِس سرمایس منز اکھ مۅلُل ہُرٮ۪ر تہٕ ؤرۍیہ وادن ہٕندِ مٮ۪حنتُک نتیجہ ، یہ چھِ اَوٕ کِنۍ تہ اہم زِ مقبول امرتسری سٕندِس زادوبوٗمس تہٕ کلامس پٮ۪ٹھ گژھِ نَوِسرٕزوردار بحث شروع تہٕ پزر نیرِنون،وۅمید چھے پروفیسر غلام محمد شاد صٲبٕنۍ ترتیب دِنہٕ آمٕژ"کُلیاتِ مقبول امرتسری" مُژراوِسِرن گنڈ،کتھن کڈِواش ، کلامس ہییہ سام تہٕ أمِس اہم شٲعر سٕندۍ حالات واتن پرن والٮ۪ن تاں تہٕ اَدٕ کرن نقاد تسُند تہٕ تسٕندِ کلامُک مۅل مرتبہٕ سرٕکھرٕ۔ناجی منور سُند یہ وَنُن زِ فل حال یہ کینژھاہ اَسہ وُنیوٗس تام دسیاب سپُد تہ چھُ تۅہہ برونہہ کنہ[7] چھُ ادبی تحقیق کہ حوالہٕ بِلکُل صحی۔

کٲشرٮ۪ن شٲعرن ہٕنز بدیہہ گوئی

بدیہہ لفظُک معَنہ چھُ "ہٕکہٕ وَنُن، سونچنے وَنُن ، بُتھِس پٮ۪ٹھ ننہ وانہ ٕ وَنُن"اوے چھِ یوان بدیہہ گوئی برمحل حٲضِر جوٲبی ماننہٕ۔ کُنہ کتھِ ، وقتہٕ برونٹھٕے تیٲری کرنہٕ ر وستُے بُتھِس پٮ۪ٹھ جواب وَنہٕ نَس ، بامے سۅ تُک بٔندی ٲسۍ تن یا باضٲبطہٕ شعر گوئی ، چھِ عام پٲٹھۍ بدیہہ گویی ونان۔ اَمہ قسمہٕ کٮ۪ن شعرن منزچھِ ہزل ،چاٹھ، پام، طنزو مزاح ، زیرکی ، ٹھٹھٕ ، وکٕروالٕنۍ ،نصیحتھ ، تنبیہہ ،غصہٕ ، ملالہٕ ،خوشی ، غم بیترِ مختلف جذبات تہٕ احساسات یوان باونہٕ۔ اَماپوز جوٲبی شعرکہ مزاجُک تہٕ موادُک دارو مدار چھُ شٲعرٕ سٕنزِ قادرالکلٲمی پٮ۪ٹھ۔تسٕندِس حٲضِر دماغ  آسنس پٮ۪ٹھ تہٕ موقہٕ کٮ۪ن حالاتن پٮ۪ٹھ۔ بدیہہ گویی ہُند وصف چھُنہٕ سارِنٕے سخنورن منز موجود آسان۔ کینژَن چھُ اللہ تعالیٰ ہن یہ وصف تہ عطا کورمُت زِ تِم چھِ اَتھ منظوٗم حٲضِر جوٲبی منز تِتھٕ پٲٹھۍ تٲریخ گٔنڈِتھ ہٮ۪کان زِ بوزن وول چھُ حٲران گژھان ۔ دُنۍیہچن کٔہۍ یا زبانن اندر چھِ فی البدیہہ تٲریخ گنڈنچہ تہٕ حٲضر جوٲبی ہٕنزِ منظوم مثالہٕ میلان ۔ کٲشِر زبان تہ چھَنہٕ یِژھو مثالو نِش خٲلی ۔ اماپوز بد قسمتی کِنۍ چھِنہٕ اَسہ بدیہہ گویی ہٕندۍ نمونہٕ رٔژھرِتھ تھٔوۍ مٕتۍ نَہ چھُ از تہ کٲنسہ اورکُن ظۅن گژھان زِ ہمعصرن ہٕندۍمنظوٗم حٲضِر جوٲبی ہٕندۍ نمونہٕ کرٕ ہو جمع ۔ یِژھٕ مثالہٕ پَرنہٕ تہٕ بوزنہٕ سٍتۍ چھے دِل بَہلٲیی سپدان ۔ بدیہہ گو سٕنز ہۅنر وُچھِتھ چھے حٲرٲنی سپدان۔ شٲعرن ہٕنزِ منظوٗم حٲضِر جوٲبی ہُند قوّت چُھ معلوم سپدان۔ گُزریمتٮ۪ن شٲعرن بُتھِ پیمٕتۍ کینہہ واقعات چھِ أچھن تل یوان ۔ تہٕ یِمن منز موجود طنز و مزاح چھُ اَسناوان تہٕ وِسناوان تہ تہٕ بعضے سوچناوان تہ۔ کٲشر ز بٲنۍ ہٕندۍ بدیہہ گویی ہٕندۍ اکثرنمونہٕ چھِ تحریرس منز نہ یِنہٕ سبہٕ ضایہ گٲمٕتۍ اَوٕ مۅکھٕ یہ کینژھا سینہٕ بہ سینہٕ برونٹھ کُن پوک۔تَتھ منز گٔیہ مالایٲنی تہٕ بد اخلٲقی شٲمل سپدان ، ناشٲیِستہٕ واقہٕ رَل سپدان۔ نتہٕ چھا ممکن زِ محمود گٲمی ہوِس بسیار گو ، زود گو تہٕ پُر گو ، مثنوی نگار تہٕ نعت نِگارس سخنور س تہٕ رسول میر ہوِس قادرالکلام شٲعرس نِش کیا میلن نہٕ اَسہ تہنزٕ شٲیستہٕ یا مزاحیہ بدیہہ گویی ہٕنزمِثالہٕ ! البتہٕ چھِ لوٗکو یِمن سٍتۍ کٔہۍ یاہ وٲہیات منسوٗب کٔرۍمٕتۍ ۔ یِم اخلاق تہٕ شٲیستگی ہٕندٮ۪و حدو نٮ۪بر چھِ۔

زیر نظر مضمونس منز چھِ کینژن کٲشرٮ۪ن شٲعرن ہٕنزِ بدیہہ گوئی ہٕندۍ کینہہ نمونہٕ یکجا آمٕتۍ کرنہٕ ۔یِمو منزچھِ اکثر عبدالاحد آزادن"کشمیری زبان اور شاعری" کتابہ اندر دَرٕج کٔرۍمٕتۍ۔ راقم الحروف چُھ تِمن سارِنٕے أدیبن ہُند شُکر گُزار یِمو یِم نمونہٕ مختلف جاین دَرٕج کٔرِتھ چھِ تھٔوۍمٕتۍ تہٕ وُنۍ کٮ۪ن ہیکۍ یِم یکجا سومبراونہٕ یِتھ۔

محمود گٲمی ﴿1765-1855ئ﴾

محمود گٲمی چھُ عام زندگی منز بڈٕ زِندٕ دِل اوسمُت۔ تس کُن چھِ بے شُمار منظوٗم مذاق منسوٗب مگر اکثر مذاقن ہٕنز زبان چھے فحش تہٕ باسان چھُ ﴿یہ زَن برونہہ تہ وننہٕ آو﴾ زِ عام لوٗکو ما آسَن یِم فحش مذاق پننہ طرفہٕ بٔدِتھ تمِٔس کُن منسوٗب کٔرۍمٕتۍ، وۅں گو مشہوٗر طٲیفہٕ عزیزِ سٍتۍ تسُند معاشقہٕ چھُ وُنہ تہ مشہوٗر۔ دپان یَتھ بٲتس منز چھُ ورگہٕ پٲٹھۍ روے سخن تاشوانچہ عزیز ِ کُنُے

ازمےے لول آو وُچھہتھ وارے                                  از مےے ہاو دیدارے لو
محمود
گٲمیس بوززارٕ پارے                                                      از مےے ہاو دیدارے لو

دَپان دَراصل چھِ یِم شعر یتھٕ کٕنۍ ٲسۍمٕتۍ

عزۍ میے لول آو وُچھہتھ وارَے                                      عزۍ مےے ہاو دیدارَے لو

أمِس عزیزِ متعلق چھُ محمود گٲمین ژۅدہن شعرن پٮ۪ٹھ مشتمل اکھ فارسی غزل لیوکھمُت۔ کینہہ شعر چھِ نۅم

نقدِ جاں باید بہائے بو سکے                      آں لبِ لعل بدخشانِ عزیز
نارسیدہ
دستِ زاہد پارساست                 بَرکنارِ نارِ پستانِ عزیز
درشہر
مشہور محلّہ تاشوان                                  بر سرِ بازار دو کانِ عزیز
دخلِ
درگہش بزور و زار نیست                    زر بنہ دردستِ دربانِ عزیز

پتھ کالہ اوس کٔشیرِ منز روٚ و کرنُک اکھ طریقہٕ یہ تہ زِ اکہ طرفہٕ ٲسۍ مرد دوٚر کٔرِتھ روزان تہٕ بییہ طرفہٕ زنانہٕ۔ اکھ د وٚر اوس ر وٚوۍ ہُریُک اکھ مِصرعہٕ تُلان تہٕ د ویم د وٚر اوس بیاکھ مِصرعہ ونان۔ محمود گٲمیس متعلق چھے یہ لوک روایت تہ مشہور زِجوٲنی منز اوس تس بدول جمال نٲوۍ أکِس یاوَن مژِ ہُند لول سنیومُت۔اَکہ لٹہ ییلہ زوٗنہٕ گاشس منز ر وٚو چلان اوس محمود گٲمی گوورسہٕ پٲٹھۍ دٔرِس منز أژِتھ ۔ تہٕ لوگُن فی البدیہہ سُہ مشہوٗر وژُن وَنُن یتھ منز روے سخن بدول جمالہ کُن اوس ۔ زنہ تہٕ مرٕد ٲسۍ روٚو کرنس سٍتۍ محو تہٕ یُس یُس مصرعہٕ محمود ونان اوس زَنہ آسہٕ سُے سُے مصرعہٕ پھِران تہٕ پھِران۔ ییلہ محمودن لیکھٕتۍ مصرعس منز بدول جمالہ ہُند ناو ہیوت ، یۅسہٕ زنانہٕ دٔرِس منز ٲس، تمہ ژٕھنۍ درِ منزٕ تھپھ یَلہٕ تہٕ پھرکہٕ ہژِ روٗسۍ کچہ ہٕندۍ پٲٹھۍ ژٔج۔ اَتھ وژنس چھِ 25 شعر، کینہہ شعر چھِ یِم :

وتَے وُچھان پتہٕ لارے بہٕ بٲلۍ یے                                                 ہتٲے ویسۍیے متہٕ کرتم اوڈٲلۍیے
سنمبُل
دستے کیا چھِ زلُف رنبٲلۍ یے                          رنبول زُلف چٲنۍ گٔمٕتۍ مے نٲلۍ یے
ژھٹَے
مَے مار مارِ زُلفن ژھٹٲلۍیے                               ہتٲے ویسۍیے متہٕ کرتم اوڈٲلۍیے
گٹے
منزے پریزنٲومکھ گاٹٲلۍ یے                                  محمود گٲمی چھُے ژے آمُت سوٲلۍیے
سوال
خدا چھُے ژے بدول جمٲلۍیے                       ہتٲے ویسۍیے متہٕ کرتم اوڈٲلۍ یے

دپان اکہ لٹہ گٔے محمود گٲمی یس آشنہ سٍتۍ مُژکری، دِل برداشتہٕ گٔژِھتھ دراو سُہ گرِ تہٕ ووت پیٹھٕ بُگ۔ یہ گام چھُ دیالہٕ گامَس نکھے ۔ اتہ روٗد أکِس یارس نِش۔ میزبانن کٔرٕس لۅلہٕ متہٕ لاے ، اماپوز شامن ییلہ أکِس کُٹھرِ منز سووُکھ، اتہ لٔگِس پِش۔پِش ٹۅپو تھوو رٲتۍ راتس ہُشیارے ۔ أتی و ونُن پِش نامہٕ﴿15شعر﴾ ، صُبحٲے دراو تہٕ ووت کیموٗہ۔ دپان عبدالاحد ناظمن تہ چھُ پِش نامہٕ و ونمُت ، مگر تَمِکۍ چھِ ژورے شعر بدس آمٕتۍ۔ محمود نہ پِش نامٕکۍ کینہہ شعر چھِ یِم:

چھِوٕ نہٕ کۅکر کروو ہٕشو                                               ہَبا پِشو ژٔلِونا!
ژر
تہٕ مانکن چھِ پتھ دِشو                 وٲنکن اندر زنانن
شینکنہٕ
روستُے گٔیم رٕشو                ہَبا پِشو ژٔلِو نا!
کشُن
ووتھم مے ٲرِشو                 تہ یارٕ مے نو مشی زانہہ
محمود
گامی پٮ۪ٹھٕ بُگۍ دِشو                ہَبا پِشو ژٔلِو نا!

﴿کلیات محمودگٲمی،ناجی منّور﴾

عبدالاحد ناظم۔﴿1816-1851ئ﴾

عبدالاحد نٲظم چھُ مشہوٗر مثنوی نگار، نعت گو تہٕ ہجو گو۔ سُہ اوس ویجہ بیار روزان۔ کمال یاونس منز چھُ گُذریومُت۔ نوجوان نٲظم سٕنز شہرت ٲس دوٗر دوٗر تام وٲژمٕژ۔ یۅسنہٕ واریِہن لوٗکن برداش گژھان ٲس۔ یِموٕے منز اوس ویجہ بیارچہ جامع مسجدِہُندامام عبداللہ شاہ تہ اکھاہ۔ اکہ لٹہ ییلہ أمِس یارٕ بلس پٮ۪ٹھ ناظم سمُکھ، عبداللہ شا ہن و و نُس نَس تالہ لٔدِتھ، بٔلۍچھُکھ شٲعری کران ،شٲعر گو محمود گٲمی بوز کیاہ چھُن و ونمُت

تمثیلِ آدم پرژھام حُبابس رِندٕ چھُکھ زِندٕ کتھ آبس سٍتۍ

نٲظمن و ونس اَدٕ حض تہٕ ،أتھۍ زٔمینس منززَن وَنہٕ بہٕ تہ تیلہ ، مٲنۍوا میتہ شٲعر ۔ عبداللہ شاہن و ونُس، آ، آ تیلہ مانتَھ بہٕ ۔ أتی و ونس عبدالاحمد نٲظمن:

عبداللہ بابہٕ اوس منز محرابس                    خرگوشہ سٕندۍ پٲٹھۍ خابس سٍتۍ

خابہ مٔنزۍ لٮ۪کہٕ اوس ژاران سابس     رِندٕ چھُکھ زِندٕ کتھ  آبس سٍتۍ

أمِس ملہٕ بابَس رٕش چھے سٍتۍ  آبس     تِژھے یژھ کٲفرس کعبس سٍتۍ

پژھ نے یی تےَ گرِپرژھ سابَس            رِندٕ چھُکھ زِندٕ کتھ آبس سٍتۍ

سابہٕ ٲس عبداللہ شاہس آشینۍ۔ یِم شعر بوٗزِتھ گو سُہ خجل تہٕ دراو کلہٕ بۅن کُن ژٕھنِتھ گرٕکُن-

﴿کشمیری زبان اور شاعری، جلد۲۔ عبدالاحد آزاد﴾

اکہ لٹہ لٔج ناظمس کتہ تام راتھ ، اَتہ ٹۅپنو و پِشَو ، جیرٕ یِتھ و ونُن پِش نامہٕ ییمِکۍ ژور ے شعر اَسہ تام وٲتۍ مٕتۍ چھِ :

نہ چھوٕ دینہٕ تہٕ چھِوٕ دِشو                                        ہَبا پِشو دارووٕ کیا
سٔمِتھ
آیہ ووم کھییہ ووم مِشو                                                ہَبا پِشو دارووٕ کیا
شَشو
کپُر ترٲویوم ترِشَو                                                                       پِشو ژوٹُم تہٕ مے کیا راہ
لَرکانہ
پھُٹریم وگوٕۍ ترشَو                                   ہَبا پِشو دارووٕ کیا

دَپان ناظمس اوس پۅپھتٕرِ بینہ سٍتۍ خاندر صحی سپُدمُت ، نشٲنۍ کٔرِتھ گوو یہ رشتہٕ ناصحی۔ اَمہ واقہٕ ہٕچ تلخی روٗزنٲظمس وٲنسہ للہٕ وٕنۍ۔پنُن مشہوٗر ہجو " اَسہ بوٗز انگریز زٔرۍیے آے "یتھ کُن وُچھِتھ أمِس آزادن "کٔشیرِ ہُند خاقٲنی" و ونمُت چھُ، چھُ نٲظمن أمۍ سٕے پوپھتٕرِ بینہ ہٕندِس یینہ وٲلِس پٮ۪ٹھ و ونمُت۔

یہ ہجو تہ چھُ أتھۍ یینہ وٲلِس سٍتۍ تعلق تھاوان:

کاژُر کھٔسِتھ کٲتر کھریچہ                                           قُدٕ چیچہ مُبارک
وَنہٕ
وُنہ درایس آپہ تہٕ پیچہ                              قُدٕ چیچہ مُبارک
مہرازٕ
لالس مچھِ ٹیچہ                                                  رویس زٕژٕ تراوٲنی
چھانگٕرِ
پانس کانگٕرِ گریچہ                                    قُدٕ چیچہ مُبارک
برونٹھٕ
درایس کۅکر بایہ                                        اَجہ آمژٕ اَجہ آسہٕ پرایہ
اَجہ
زیچھِ تہٕ اَجہ آسہٕ ژھۅچہ                                قُدٕ چیچہ مُبارک
رسوٗل
صٲبَن کیا کٔر کٲم                                    شَن شَن نفرن ترٲوٕن ترٲم
اَتھِ
آیکھ زٕے زٕے میچہ                                    قُدٕ چیچہ مُبارک
تفتانہ
بٲکِر خانہٕ                                                         تی بوٗز خدا زانہ
اَنٮ۪کھ
تہٕ لزکھ ییچہ                                                           قُدٕ چیچہ مُبارک

﴿کُلیات ِ ناظم۔مرتّب: پروفیسرغلام محمد شاد﴾

پروفیسر غلام محمد شاد صٲبَن چھُ لیوکھمُت زعزیز یا عٔز ٲس طوٲیِف۔ اکہ دۅہ اوس نٲظم پکان تاشوان کِنۍ، مُدٕر آواز بوٗزِتھ لوگُس دِل تارِ۔ پوزدارِ دروازٕ ٲسۍ بند، معموٗلی شخص زٲنِتھ آونہٕ تس اور اژنُک اِجازت دِنہٕ۔ناظمن ؤنۍ فی البدیہہ غزل أتی تہٕ سوزٕنٲوٕن عزِنِش ﴿ زر بہ نہَ دردستِ دربانِ عزیز۔محمودٗگٲمی﴾ ۔یٔمہ سٍتۍ تس باریٲبی ہُند شرف حٲصِل سَپُد۔ اَمہ غزلہ ہٕندۍ کینہہ شعر چھِ یِم:

دِل گو م ژے پتھ تارِ مُژر دارِ عزیزو                                                        مِیُل گوم دیوانس تہٕ زُلفٕچہ تارِ عزیزو
چھَے
چیشمہٕ نرگس ، زُلف سنمبل ،روے گُل ہی تن       یِم ژور گُل اَکہ تھرِ پھولۍ کتَھ وارِ عزیزو
منز
چینِ زُلفس خالِ ہندو دُزدِ رسن باز                                              زوٗنہٕ ڈبہ حُسنٕچہ پان ہانکلہ کھارِ عزیزو
موجِ
مَے چھِ لبن چٲنۍ طٲلب لعلِ لبن منز                              فوجہ فوجہ یوان وُچھنہ چھی گوجوارِ عزیزو

﴿کُلیاتِ عبدالاحد ناظم۔ مرتّب: پروفیسرغلام شاد﴾

مہدٕشاہ دیکہٕ

مہدٕ شاہ دیکہٕ چھُ اکھ مشہوٗر بدیہہ گو اوسمُت ۔کٲشِر تہٕ فارسی زبٲنۍ ہٕندٮ۪ن فی البدیہہ شعرن اندر تٲریخ ونہٕ نس منزاوسُس کمال۔ عبدالاحد آزادن چھُ لیوکھمُت زِمٲلِس اوسُس ناو عظیم شاہ۔لۅکچارٕ پٮ۪ٹھے ٲسِس دماغس منز جنوٗنٕکۍ تہٕ شوٗریدگی ہٕندۍ آثار۔ اکہ لٹہ پھٔرِس لوٗٹٕرۍ ، نٲلۍ پلو تام نی ہَس تہٕ کورُکھ قتٕل۔ دپان پانپرٕ اوسُکھ دٔریاوس دٲرِتھ دیتمُت۔ پتہٕ سپٕز تمٔۍ سٕنز لاش أمرا کٔدلہٕ وٮ۪تھِ منز برآمد۔ "غریقِ آب" چھُ تسُند تٲریخِ وفات ، یُس ۶۱۲۱ھ بنان چھُ۔

اکہ لٹہ اوس سُہ خانقاہ کِنۍ پکان ۔ اپٲرۍ دراو أکِس گوٗرۍ سُند توبوٗدٕ۔ أکۍ وتہ پکہٕ وٕنۍو ونُس ، یٔمِس غلام گوٗرس بچارس ؤنۍ  تو تٲریخ، مہدٕ شاہ دیکن و ون یکدم :

بُتھِ بُتھِ دِوان درایے کورِ                                   تٲریخ وون مے "غلام گورِ"

"غلام گورِ" مرکبس چھُ 1302ہجری سنہٕ نیران۔

یِتھے پٲٹھۍ چھُ مہدٕ شاہ دیکن کٔہندِس تام خاندر س پٮ۪ٹھ تٲریخ وونمُت :

مادئہ تٲریخ بوز جٹھ پٹھ                                          عربی پٲٹھٮ۪ن کٲشُر رَٹھ

کٲشُر لفٕظ"زٹھ" ییلہ عربی زبٲنۍ منز ترجمہٕ کروون ، سُہ گوو "خُذ" ۔ أتھۍ چھُ  1300 ہجری سنہٕ نیران۔

سری نگرٕ اوس شخصا ہ ، ناو اوسُس پنڈت کنول رام،عام لوٗکھ ٲسِس ونان پنڈت کول رام۔ مٲلِس اوسُس ناو پنڈت لکھمن۔ یہ اوس یژھان پننہ واجہ پیٹھ تیُتھ شعر کھنہٕ ناوُن یتھ منز تِمن مٲلۍ پوترن ہٕندۍ دۅنوے ناو یِوان آسہٕ ہن۔ اکہ دۅہہ اوس مہدٕ شاہ دیکہٕ اہندۍ کِنۍ پکان، پنڈت کول رامن کورُس آلو تہٕ و وننس پنُن مُدعا ۔ کتَھ بوزان بوزانٕے دورمہدٕ شاہ دیکُن اتھٕ تہٕ ووننس:

اگر بیت خوٲہی بِدہ یک ڈبل                   بہ گُلزارِ لکھمن شگفتہ کول

﴿اگر شعر یژھان چھُکھ ، کڈ سَہ ڈبل رۅپے، لکھمن سٕندِس باغس چھُ پمپوش پھولمُت﴾ یِتھٕ پٲٹھۍآے أکِس مصرعس منز دۅنوے ناو۔

حضرت بابا پیام الدین ریشی سٕندِس زیارت گہس منزاوس اکھ نوو ریوش گٔدی نشین سپُدمُت تِکیازِ أمِس برونٹھِم رِیوش اوس وٲصِل حق گومُت۔ مہدٕ شاہ دیکن وُچھ اَتہ یہے وۅسہٕ درۅس ہش۔ أتھۍ دوران ژاو سُہ نوو ریوش وُچھنہ۔ نٔوِس ریشِس اوس ناو  نٲدر شاہ۔ مہدٕ صٲبن دِژ اَژان اژانٕے کرٮ۪کھا

مبار ک شاہ نادر بیوٗٹھ تختس

خبر د ویم مِصرعہٕ کیا ونہ ہے ، نٲدِر ریش ژٕھناونوو بے وُکری کٔرِتھ اَتہ کٔڈِتھ، مہدٕ صٲبس دیتکھ نہٕ ریشس تام واتہٕ نے۔ نیرا ن نیران و ون مہدٕ صٲبن :

لیاقت چھَس نہٕ کولَس تیرٕ بختس

﴿1﴾کشمیری زبان اور شاعری جلد۲ عبدالاحد آزاد۔﴿2﴾ مادئہ تاریخ از محمد امین رفیقی ، شیرازٕ۔ اگست 1966ئ﴾

اسد شاہ دیو- ﴿وفات ۔1325ھ

اسد شاہ دیو اوس ویجہ بیارِ روزان۔ ٲخر گوو گُجرات ﴿حال پاکستان﴾ فوت۔ سُہ اوس ویجہ بیارِکہ ژوے ہنگہٕ منزٕ، اَمہ خاندانہٕ منزٕ چھِ بابا محمدخلیل ہوۍ صاحبِ تصنیف بُزرگ ؤتھۍمٕتۍ ۔ اسد شاہ سُند مول معلی شاہ المعروف مالہٕ پیر چھُ عبدالاحد نٲظم سُند کو نژھ ہم عصر اوسمُت۔ اسد شاہ اوس ہزل گو۔ فی البدیہہ مادئہ تٲریخ ونہٕ نَس منز ٲسٕس خاص مہارتھ ۔ تسٕندٮ۪و فی البدیہہ تٲریخو منز چھِ کینہہ مشہوٗر تہ تہٕ فِکر انگیزتہ۔ مثلن اَکہ مسجدِ ہٕندِ تعمیرُک تٲریخ چھُن یِتھٕ کٕنۍ   وونمُت :

"زیبا بانگی عمر شیخ"

یہ تٲریخ چھُ بنان 1313ھ ۔امیُک دلچسپ پہلوٗ چھُ یہ زِ عمر شیخ چھُ اَمہ مسجدِ ہُند بٲنگۍ تہٕ زیبا چھُ تسٕنزِ آشنہ ہُند ناو۔

ییلہ خانقاہ اللہ دادٕ  ریشی د وٚد ، اسد شاہن و ون فی البدیہہ تٲریخ

درشب بہ ارادئہ اِلٰہی                                      ناگاہ دوٚد خانقاہ ریشی
دَپ
بے سرِ  آہ بہرِ تاریخ                           ہَے ہَے دوٚد خانقاہ ریشی

سعدٕ بابہٕ اوس أکِس شخصس ناو۔ تسٕندِس گُذرنس پٮ۪ٹھ و ونُن یِتھٕ کٕنۍ تٲریخ

گُفت دِل بے ادب بے ایمان                شُکر لِلّٰہ فسادِ بابا رفت

اسد شاہس اوس صدیق شاہ ڈورٕ ہم عصر۔تسٕندِس مرنس پٮ۪ٹھ وونُس اسد شاہَن تٲریخ

ڈورٕ زِ دنیا گریخت ڈورٕ و کاژن گسیخت                          از صدفِ تن بریخت دُرِ ثمینِ روح را
سالِ
وفات آں رفیق گُفت زِ غیبم سروش      واے زِ دنیا صدیق رفت بدارالبقا

ییلہ سعدٕ بابہٕ نٮ۪و نوو مکانہٕ شیوٗر﴿سعدٕ بابہٕ اوس چھا نہٕ ہنگس تہٕ اسد شاہ ژۅیہ ہنگس سٍتۍ تعلق تھوان﴾ اسد شاہن و ون یِتھٕ پٲٹھۍ تٲریخِ تعمیر:

عبُن نبہٕ ووتھ قبیلس کُن لۅتی دوپنکھ ارے چھانو                                              لٔراہ کرٕ ہا بِنا چھُم خطرٕ شِترن ما ژرے چھانو
سٔمِتھ
دوپہس ژیے أسۍ ہمدم مَہ بر غم تھاو دِل خورم                               پہتھ گریٹہ نے شِتٕر چٲنی پہتھ پرنیے کرے چھانو
پُرِتھ
کھۅڈ حسہٕ بابُن لٔز نبن لٔر ، د وپ ابن تٲریخ                      "دِگا دِی دِی گٔرِتھ واراہ یِکٕل لودہکھ لرے چھانو
﴿۸۱۳۱ھ﴾

مٲلۍ سٕندِس مرنس پٮ۪ٹھ و ون اسد شاہن یتھٕ کٕنۍ تٲریخ

دراو از دنیائے فٲنی واے زیبا مالہٕ پیر                                              ژاو در جنت خراماں پائے رعنا مالہٕ پیر
لٮ۪کھ
ؤری فوتُک کنس تَل و ون میے غٲبی ہاتفن                 "ژاو در جنت زِ دُنیا دراو بینا مالہٕ پیر"

﴿ 1305ھ﴾

﴿کلیاتِ ناظم: مرتّب: پروفیسر غلام محمد شاد﴾

مولوی صدیق اللہ حاجنی    ﴿1834-1900 ئ﴾

مولوی صدیق اللہ حاجنی ییلہ کُنہ مجلسہ منز آسہٕ ہن سٲرٕے مجلس ٲس ہمہ تن گوش سپدان۔ مجال اوس نہٕ کٲنسہ زِمولوی صٲبَس برونہہ کنہ کرِ ہاکانہہ کلامہٕ۔ پانہٕ ٲسۍ نہٕ زانہہ تُرش رو سپدان۔ اگر کانہہ انسان اَتُر کرِ ہے ، فہمٲیِش ٲسِس تَمہ آیہ کران زِ دِلس اوس نہٕ لگان۔دپان اکہ دۅہہ ٲسۍ سوپور أکِس گرس منز سالَس ۔ اَتہ نیرن وِزِ وُچھُکھ کمٔۍ تام اوہُند کھۅربانہٕ ژوٗرِ نیوٗمُت ۔أتی و ونکھ اَسوٕنہ چانٹہ

وَنُن چھُم خبر یُتھ ونُن ما چھُ عٲب              مے حض گوم یتھ شایہ پاپوش غٲب
﴿وۅلرٕکۍ
ملر۔صدیق اللہ حاجنی نمبر﴾

عبدالرحیم اعمیٰ بانہٲلۍ ﴿وفات 1332ھ﴾

عبدالرحیم اعمیٰ بانہٲلۍ  سٕندٮ۪ن شعرن ہٮ۪ڈان ہٮ۪ڈان مونگ اکہ دۅہہٕ بانہالہ ہٕندِس رئیس تہٕ مہارا جہ رنبیر سنگھ نِس وزیرِ وزارت خوا جہ صمد جو سٕندٮ۪و دۅیو نیچوٮ۪و ،یِم عبدالرحیمس ژاٹہٕ بٲج تہ ٲسۍ، یتھ اَڈٕ گرس مصرعس جواب

دو بینا یک کور ایں جا نِشست

عبدالرحیمن و ونکھ
خدایا
یِمن دۅن تہ ان جل شکس

دپان عبدالرحیم اعمیٰ سٕندٮ۪ن تلخ جوابن ٹھور لاگنہٕ خٲطرٕ کور تسٕندٮ۪و دُشمنو بانہال بسنہ آمتِس مشہور حکیم تہٕ کیمیا گر محمدنسیم پٹھانس کُن رجوع۔نسیم اوس فارسی دٲنی تہٕ ریختہٕ گوٗئی خٲطرٕ مشہوٗر۔ اعمیٰ صٲب تہٕ نسیم آیہ ڈلیگامہ کِس بونہ باغس منز واتناونہٕ۔ اعمیٰ صٲبن تھوو شرط زِ جواب گژھِ برداش کرنہٕ یُن۔ شرط آو منظوٗر کرنہٕ ۔ محمد نسیمن مونگ یتھ مصرعس جواب:

مجھے کیا ہے عجب داڑھی چو جنگل ہا

عبدالرحیم اعمیٰ صٲبن و ونُس:

نِکالو بال اس کے اور بنا کھیش و کمبل ہا

﴿ڈاکٹر مرغوب بانہالی۔ سون ادب ۹۷۹۱ئ﴾

حسن گنائی تہٕ محمد اکرم درد مند۔

حسن گنائی تہٕ محمد اکرم درد مند ٲسۍ ہم عصر۔ دۅنوَے ٲسۍ ژرارِ شریف روزان۔ حسن گنائی اوس عبدالاحد آزادنِس مٲلِس محمد سُلطان ڈارس دوس۔ آزادن چھُ لیوکھمُت زِ 1948ءبرونہہ یۅہے سَتہٕ ترٕہ ، اَرترٕہ ؤری ہیوٗ آسہ ہا حسن گنائی یٔمہ عالمہٕ گومُت ۔ سُہ اوس ناخواندٕ مگر شعر گویی ہُند جوہر اوسُس اَزلے عنایت سپُدمُت۔ محمد اکرم بقال درد مند﴿ سُہ اوس دٲدۍ لد تہ تخلص کران تہٕ درد مندتہ﴾ اوس پنُن کلام پیر مقبول شاہ کرالہٕ وٲرۍ صٲبس ہاوان تہٕ اَتھ اصل اح کرناوان۔ تس ٲس نہٕ حسن گنایی سٕنز شٲعری چِکارس کھسان۔ اکہ لٹہ اوس حسن گنائی بازٕرۍ پکان۔ دٲدۍ لدس پییہ نظر تہٕ کورنس آلو۔ د وپنس بہٕ چُھستھ نہ ژٕ شٲعر مانان۔ وُنۍ کٮ۪ن وَنَے اکھ مصرعہ فورَن واٹس یٔتی بیاکھ مِصرعہ تہٕ شعرکر مکمل ، مصرعہ و وننس دٲدۍ لدن

گُلس تے بُلبُلس باہم چھے وُژمٕژ
حسن
گنہٕ ین و ونُس فورَن یہ مِصرعہ
وَدان
بُلبُل یہ مَسوَل کمٔۍ چھے پُژمٕژ
یِتھُے
دٲدۍ لَدن یہ مِصرعہ بوٗز د وپنس مون مَکھ از شٲعِر۔ کاش ژٕ آسہٕ ہکھ تعلیم یافتہٕ۔

اَکہ دۅہہ ٲسۍ زٕ شخص اِسمال تہٕ قٲدر ژُوان۔ واریاہ لوٗکھ ٲسۍ تماشہ وُچھان دٲدۍ لد تہ ووت اَتھ جایہ ۔ اسمالن پووو قٲدِراکی ضَربہٕ پتھر۔ قادر گو بے ہوش۔ دٲدۍ لد گابرٮ۪و تہٕ ژ ول ۔ وَتہ پرژُھس أکۍ دوستن اَمہ لڑایہ ہُند حال ۔ ژلان ژلانٕے و ونُس محمد اکرم دٲدۍ لدَن
شنیدم
کہ آں قادر خستہٕ حال                      بہ یک ضربِ اِسمال شُد پایمال

حسن گنائی اوس اکہ دۅہہ ژھمبرِ میلہٕ وُن ہیوٗ أکِس ہمسایہ سُند گرٕ گومُت۔ اکھ ہمسٲے بایاہ ، یمِٔس "ہُنۍ" ناو اوس ، لٔج حسن گنہٕ یِنہ آشنہ سٍتۍ ژُونہ ۔ حسنن بوٗز کرٮ۪کہٕ ناد تہٕ وو ت پنہٕ نِس آنگنس منز۔ اَتہ وُچھِن ہمسٲے باے سخ بد زبٲنی کران۔ أتی و ونہٕ نَس

اَسہ سٍتۍ مَے تُل پردٕ ہُنی                              بوزی غنی شاہ
چھَے
راتھ گٔٹ تہٕ لوٗکھ چھِ أنی                                                بوزی غنی شاہ

غنی شِہُن ناو بوٗزِتھ کٔر ہُنہ ژھۅپہٕ تہٕ کلہٕ بۅن کُن ژٕ ھنِتھ ژایہ گرٕ۔
﴿کشمیری
زبان اور شاعری، جلٕد۲﴾

پیر عزیز اللہ حقانی -﴿۶۴۳۱ھ-۱۷۲۱ھ﴾

حضرت شاہ قاسِم حقانی ؒ چھِ یہندۍ جدِ بُزرگوار ۔ پیر عزیز اللہ حقانی صٲبنہ قلمہٕ چھِ فارسی تہٕ کٲشرِ منظوٗم کِہو منشوٗر الہٕ پلہٕ زٕ درجن کتابہٕ درامژٕ۔ تِمن اوس فاریابی تہٕ انواری سٕندِس نقشِ قدمس پٮ۪ٹھ پکہٕ نس منز فخر محسوٗس سپدان
دردِ
حقٲنیِس چھُ شاہدِ حال                               فاریٲبی تہٕ انواری لولو

اَماپوز کٲشرٮ۪ن بُزرگ شٲعرن تہ ٲسۍ حقٲنی صٲب احترامچو نظرو وُچھان۔ قدیر شاہ اوس شاعراہ ۔ تخلص اوس کران قادر۔ أمی اوس قصۂ یوسف زُلیخا ترو وہن شتَن شعرن منز و ونمُت ۔ بڈٕ چکہٕ چاوٕ سان آو یہ قصہٕ ہٮ۪تھ حقٲنی صٲبَس نِش۔ اَمہ خیالہٕ زِ حقٲنی صٲب دِیہ شوٹھس مٹھِ مَٹھِ تہٕ لوگ تِمن پنٕنۍ شعر بوزناونہ۔ پران پران ییلہ سُہ یَتھ شعرس پٮ۪ٹھ ووت " گٲمی زانہ کیا ہ شعرٕچ نزاکت" حقٲنی صٲبس سپُد محمود گٲمی سُند یہ تضحیک سخ ناگوار ، فورن تُلن قلم ،کاغذس پٮ۪ٹھ لیکھِن نۅم ترے شعر۔ قٲدِر اوس چکہٕ چاوٕ سان پرانٕے تہٕ حقٲنی صٲبن تھٲوِس شعر ترے برونٹھٕ کنہ

تہ کر زانہہ یوسفس کورمُت چھُ بایو                                  یہ یَتھ قٕصس چھُ کورمُت ناخدایو
چھُ
یتھ قٕصس سٮ۪ٹھاہ بس قولِ جامی                              پتو گو ختم بر محمودگامی
تٔمِس
پتہٕ ہاوِ کانہہ نورُک خیٲلی                    تمس کِژ جاے اونگجن ہٕنزچھِ خٲلی

قدیر شاہ گو خٔجِل تہٕ لٔجِس گُمنٲمی ہٕنز مُہر۔

﴿کشمیر زبان اور شاعری جِلدٕ۲﴾

کرشن جو راز دان۔﴿1926ئ-1850ئ﴾

وَنپوہُک کرشن جو راز دان اوس کٔشیرِ ہُند مشہوٗر شٲعر، شعر شِناس ، مجلس آرا،گیانی تہٕ رٔئیس۔ اکہ لَٹہ ٲسۍ أکِس مجلسہ منز گٲمِیَن سٍتۍ سٍتۍ کینہہ شہر باش تہ ۔ أکۍ شہر باشن و ون ، رازدان صٲب گوژھ آسُن شہرس منز زامُت تہ تہٕ روزان تہ، گام گو گامٕے ! رازدان صٲبن و ونس ، وَن سٲ کیازِ؟ شہرباش اوس تُک باز تہٕ تمٔۍ و ون

گامس کینہہ نَے شہرس پٮ۪ٹھٕ کنہ ترے پھیرۍ چھی

رازدان صٲبن و ونُس

گامَس﴿گ﴾ تے شہرس پٮ۪ٹھٕ کنہ شِنیاہ چھُے
گامس﴿ا﴾
تے شہرس منز باگ ہٮ۪ہاہ چُھے
گامس﴿م﴾تے
شہرس پتہٕ کنہ رٮ۪ہاہ چھُے

﴿شِنیاہ=وٲران ، شُنۍ۔ ہٮ۪ہاہ=ہ، ہیہہ ،دٮ۪ق۔ ریہہ =ر،نار﴾ سٲری بوزن وٲلۍ گٔے شرمندٕ ۔ سٍتی و ون راز دان صٲبن

کشمیر صدف دُر است وَنپوہ                        از لعل وگہر پُر است وَنپوہ

﴿کلیات ِ کرشن جو رازدان۔ مرتّب: سومناتھ ویر﴾

عزیز میر سۅیہ بُگ﴿۶۴۳۱ھ-۶۷۲۱ھ﴾

عزیز میر گوو اکہ دۅہہ سالس ،أتی و ونُن:
دوش
رفتم بہ خانۂ بھائی               ہمہ شب بود مجلِس آرائی
مگساں
نغمہ ساز می کردند                           کیک رقصاص و پشہ سرنائی

مطلب زِ بہٕ گیٔوس بٲے سُند گرٕ ، رٲتۍ راتس سپٕز مجلس آرٲیی ،مچھِ آسہٕ نغمُک ساز رٔٹِتھ، پِش ٲسۍ نژان تہٕ مُہۍ ٲسۍ سۅرنے وایان۔

اکہ دۅہہ اوسُس أکۍ شخصن ، یٔمِس گا ش اوس ناو، مسجدِ منز کھراوٕ ہور ادلہٕ بدل نیوٗمُت۔ نیران نیران و ونُن:

عجٲیب تماشا ژٕ بوز ہوش و گوش                    چھُ گاشس گومُت گاشہ سٕے منز دُگوش

﴿انہار ، جلد۳، شمارٕ۱، عزیزمیر۔ مضمون نگار ڈاکٹر بشر بشیر﴾

لکھمن جُو بُلبُل ناگٲمۍ

لکھمن جو بُلبُل ناگٲمۍ چھُ دُستتھ ؤری وٲنس کٔڈِتھ 1942 بکرمی منز سۅرگہٕ واس سپُدمُت ۔ دَپان تس تہ اوس بدیہہ گویی منز کمال حٲصِل مگر تسٕنزبدیہہ گویی ہٕندۍ نمونہٕ چھِنہٕ باقٕے شٲعرن ہٕندٮ۪ن نموٗنَن ہٕندۍ پٲٹھۍ اَسہ تام وٲتِتھ ہیکۍمٕتۍ۔ وننہٕ چھُ یوان زِ ییمہ دۅہہ سُہ سۅرگہٕ واس سپُد تمی دۅہہ تھووُن پنُن تٲریخ وفات موزون کٔرِتھ

بیا اے باغبان بُلبُل قفس انداخت درگُلشن                          نہ آبِ شبنمش غسلے ز برگِ گُل کفن افگن
چمن
کے بیچ میں سبزے کے تختے پر لٹادینا                          ہر اِک گلبن کی شاخوں سے مسا کرو روتن
صبا
با عندلیب گو کل از بُلبُل نوا برگو                                                 کہ "زیرِ پائے عفو رام جی آمد شرن لخمن"

دپان دوران نزع و ونُن زِ "کہ" ترٲوِتھ کٔرۍ زٮ۪و شُمار۔ اکہ لٹہ وون مہانورٕ کۍ پنڈت مکندرامن بُلبُلس مہانور ِماچشمہ روش است

بُلبُلن و ونس بنا کردہ رام یا لخمن است
﴿کشمیری
زبان اور شاعری﴾

غلام محمد لون- ﴿۵۳۹۱ئ-۲۵۹۱ئ﴾

پارے پوٗر تحصیل بیروُک غلام محمد لون اوس اکہ لَٹہ مکہا مہ أکِس مجلسہ منز۔ اَتہ اوس شخصاہ اکھ مقبول شاہ کرالہٕ وٲرۍ سُند گریسۍ نامہٕ پران، سُہ ییلہ یہ شعر پرنہ لوگ

وَنان چھی برونہہ کنے نیک پوت کنے بَد                                   چندس منز رویہ ہتھ ہٮ۪تھ گریسۍ مُرتَد

لون صٲبن کٔر فی البدیہہ شعر ؤنِتھ ناراضگی ظٲہر

چھے گریسۍ  سٕنز خصلتھٕے ہٲوِتھ تہٕ بٲوِتھ                                                    کھٮ۪وان لُقمہٕ اَتھو پنہٕ نٮ۪و کمٲوِتھ
چھُنہٕ
زانہہ مَلہٕ ژھاران خٲر عامُک                                 کٔرِتھ حیلہٕ کھٮ۪وان روزی حرامُک
أتی
کورُن وعدٕ زِمَلہٕ نامہٕ ؤنِتھ دِمہٕ مقبول شہس جواب۔ ٲخرس کورُن وعدٕ پورٕ تہ۔

دپان لون صٲب اوس جمعہ نماز پرنہ ہمیشہ سرینگر گژھان۔ ڈیرٕ اوسُس چھَژٕ بلہٕ ۔ اکہ دۅہہٕ ییلہ ڈیرس پٮ۪ٹھ گژھان اوس ڈیرٕ واجینۍ أمۍ سٕنز ٲس اَمی ساعتہٕ أکِس ہمسٲے بایہ سٍتۍ ژُوان۔لون صٲب وُچھِتھ دِژ ہمسٲے بایہ لون صٲبنہ ڈیرٕ واجنہ کُن پام " ٲے ہے،أکیاہ؟" لون صٲبن تہ بوز یہ أتی و ونُن

غلام محمد لونس دِلدارن دِل تھپہ نیوٗنس                                       ؤسۍ پیوس عشقُن جمبَر تھرِنٕے چھِ بِہاں بمبر

خۅش رۅیہ نسرین عنبر تھرِ نٕے چھِ بہاں بمبر

﴿آگر نامہٕ مصنفہٕ غلام محمد لون۔ مطبوعہ کلچرل اکادمی﴾

مہجور -﴿1887ئ-1952ئ﴾

غلام نبی عٲرِض سُند برادرِ اکبراوس اَکہ لٹہ پنچایتُک سَرپنچ ۔ تس اوس ناو غلام محمد بٹ۔ کتَھ چھے تِمن دۅہن ہٕنز ییلہ مہجور صٲب﴿1887ء - 1952 -ئ﴾ وترڑٕ پٹوٲرۍ اوس۔ تسٕندِ حلقہٕ کِس أکِس شخصس اوس بٹ صٲبنِس پنچایتس منزمُقدمہٕ ۔غلام محمد بٹ اوس نہٕ صرف عٲرِض سُند بوے بلکہ  اوس عبدالاحد آزادُن بٮ۪نتھٕر تہ ۔مہجورن دیُت مُقدمہٕ وٲلِس سٲیلس اکھ سُفٲرشی خط۔ غلام محمد بٹ اوس مزازٕکِنۍ تروش ۔ سٲیلس تہ کٔرٕن بے عزتی تہٕ مہجور صٲبنِس خطس تہ۔ سٲیِل گو دُبارٕ مہجور صٲبس نِش۔مہجور صٲبَن دیتس کاغذ پرچس پٮ۪ٹھ یہ شعرلیکھِتھ

کٲف کوتاہ چھُے ژے کھوتمُت مَس چَنَے                                   مامہٕ صٲبو گامہٕ جج چھُکھ کیا ونے
یہ شعر پٔرِتھ نرمٮ۪و مامہٕ صٲب تہٕ گو سٲیلس
پٮ۪ٹھ مہربان۔
﴿موتی
لال ساقی، تعمیر ، مہجورنمبر﴾

فتح بٹ۔

فتح بٹ ہوگام سری گفوارہ اوس پننہ زمانہٕ اکھ جان شٲعر ماننہٕ یوان، صوندٕ پوریُک أمبِر ڈار اوسُس ہمعصر ۔ اکہ لٹہ اوس أمبِر ڈار دورِ بہتھ ژادر و ونان ، فتح بٹن تروو دروازٕ تہٕ و ونُن

یِمے گرِ ، یِمے ساتھ، غنیمتھ چھُ مُلاقات                     یم گرِ ٲخٕر سپدن گُم، وۅستادٕ والسلام علیکم

أمبِر ڈارن و ونُس جواب

کُنی کتَھ ،کُنی وَتھ ، کُنِرس منزچھُے اتوگتھ                                              کُنِرُک معنہ کلمے چھُم ، ژاٹہٕ میانہ وعلیکم
﴿وٮ۪تھٕ
آگُر۔مراز ادبی سنگم﴾

کٲشِر کتاب

کٲشرِ تمدنُک رنگہٕ ؤلۍ  زٲنۍ گنج

محمد یوسُف ٹینگ سٕندٮ۪ن تخلیقی ، توٲریخی تہٕ تجزیٲتی مقالن ہٕنزِ تازٕ سومبرنہ چھُ ناو "کٲشِر کتاب" اتھ منز چھِ لۅکٹۍ بٔڈۍ شتہٕ وُہ مقالہٕ۔ چھپن ؤری چُھس 2008ءصفہٕ چھِس 364تہٕ قٍمتھ  500رۅپیہ۔ اَمیُک پٲراو ، کاغذ ، چھپٲے تہٕ سرورق وُچھِتھ چھُ لوٗب یِوان۔ برونہمِس مَل ورقس أندرۍ کِنۍ چُھس پروفیسر رحمان راہی سُند یہ مۅلُل خراج درٕج زِ میانٮ۪ن خابن ہٕنز کٔشیر آسہ سۅ  یتھ منز مے اکہ طرفہٕ آچاریہ ابھینو گُپت تہٕ بییہ اَندٕ محمد یوسف ٹینگ آسہ﴿9اپریل 2007ئ۔ایس ۔پی ۔ ہایر سٮ۪کنڈری سکو ل سرینگر ۔زیرِصدارت ڈاکٹر آغااشرف﴾۔ کٲشِر کتاب چھے محمد یوسف ٹینگ سٕنزِ عٲلمانہٕ رٔنگۍ ؤلۍ کامہ ہُندPanorama ۔ زٲنۍ گنجس تہٕ اَمہ کِس مزازس کُن اشارٕ کران چھِ محمد یوسف ٹینگن پننہ پرٮ۪تھ کتابہ ہٕندِس أکِس أکِس صَفس پٮ۪ٹھ پنہٕ نٮ۪ن کیو وۅپر عٲلمن ، فٲضِلن تہٕ شٲعرن ہٕندۍ دٔپۍ تہٕ شعر درٕج کٔرۍمٕتۍتہٕ یتھ کِتابہ منز تہ چھن یہ لگ پٲجِمٕژ۔

گۅڈٕ گۅڈٕ چھُ خیال یوان زِ کٔشیرِ ہٕندِس أمِس عاشقس تہٕ تمدنُس وون تہٕ زول دِنہٕ وٲلِس تیز نظر محققس کونہٕ سَنا یتھ سٲدٕر وار مقالہٕ سومبرنہ باپتھ تنبلاون وول ناوا پاتھیومُت! یِتھٕ پٲٹھۍ اَمہ بروٗنٹھۍمٮ۪ن کتابن مِثالے راش، شش رنگ یا رنگہٕ دِوَے ہوۍ متھ کرن وٲلۍ ناو تھٲومٕتۍ ٲسِن۔اماپوز اَتھ کتابہ کینہہ پھِرۍ دِنہٕ پتے چھُ مے ہیوٗ پرن وول حٲرتس یوان لایِنہٕ ، ییلہ وُچھان چھُ زِ اَتھ منز چھے سٲرٕے کٔشیر۔ ہفتا کالہ ہٕنز تہ تہٕ از کالٕچ تہ۔ اَتہ چھُ ڈوٗنۍ گۅلرِس منز کٲشرِ کلچرُک وۅلُر سٲمِتھ۔ اَتھ منز چھے سانہ تمدنچن میلہٕ کٮ۪نن ہٕنز کتَھ۔ نہہ وَنہ آمژن ، لتہٕ مۅنجہ گٔمژن ، راوِ مژن تہٕ موٗجود روزمژن میلہٕ کنٮ۪ن ہٕنز۔ا تھ منز چھُ تمدُنی ارزٔژ ہُند راون تیول تہ موجود مگر تمدنکہ عظمتٕکۍ گۅن تہٕ ہنگہٕ پھیتۍ تہ چھِ شولان تہٕ کتابہ منز چھُ کٲشرِ کلچرکٮ۪ن کٔہۍ یاہ وٮ۪تھٕ ؤترٮ۪ن تام کانٕلۍ پِلو تہٕ بیین علاقن تہٕ قومن منز تمدنی دَس دارٕژ ہٕنز تارٕ کانجہ۔ اتہ چھُ لُکہٕ ؤترِ کٮ۪ن نوٮ۪ن سرحدن ہُند نیب ۔ مُصنفن چُھ اتھ تمدنی ارزٔژ لرِلۅہ کورمُت تہٕ پرن والٮ۪ن خٲطرٕ تہ خوانِ نعمت شیوٗرمُت۔ یہ وُتشاول کِتاب چھے صحت مند بحثابحثی تہٕ دل چھل دِنٕچ طلبگار۔ یہ سورُے نظرِ تل تھٲوِتھ چھے پانَے کتھِ پھُٹھ نیران زِ" کٲشِر کتاب" چھ پزی یٔمہ مقالہٕ سومبرنہ باپتھ ثٮ۪قہٕ تہٕ سِپہٕ ناو، وُچھ تو کتابہ ہُند"انتساب "چھُ مصنف سٕندِ کٔشیرِ تہٕ کٲشرِ تمدنکہ تعشوقُک پے دِوان ۔

"تِمن امارٕ ہتٮ۪ن تہٕ پوشہ متٮ۪ن تہٕ ازلہٕ مقبولن ہٕندۍ نٲوۍ یِمو کشٔیرِ ہٕنزِ سردٲری تہٕ سُرخ رویی ہٕندۍ خاب وُچھان وُچھان پنُن لوو تہٕ سوو پان چھپہ دیُت

وونُے کیا عشقہٕ پیچانو کنو بوز                            چھُ نے کینہہ پانہٕ مٲرِس کیازِکھٔتۍیے
﴿انتساب،ص۶﴾
"

دِلچسپ تہٕ معنہ ساوِ پیشِ کلامہٕ پتہٕ چھے زیرِ تبصرٕ کتابہ منز گۅڈنِچ ڈٲلۍ" محمود گٲمی سُند شِنہٕ شار" ۔ سوت سوت مزاح واجینۍ لڑی شاہ طرزس پٮ۪ٹھ یہ نظم ، یۅسہٕ پٍنژہن بند ن ہٕندٮ۪ن ارنمتھن شعرن پٮ۪ٹھ مُشتمل چھے، چھے اَکھ تازٕ تہٕ نٲدردریافت۔ وۅں گوو فٲضِل تحقیق کارن چھُنہٕ تمہ آگرُک تہٕ ؤسیلُک پے پتاہ کھۅکھلٲوِتھ دیتمُت یٔتہ یہ نظٕم دسیاب چھے سپٕزمٕژ۔

الہٕ پلہٕ شے نٔوشتہٕ چھِ محض أکِس یا دۅن دۅن صفن پٮ۪ٹھ، اماپوز اُہند اختصار چھُ کٔہۍ یاہ زیٹھم زیٹھٮ۪ن مقالن پٮ۪ٹھ واریاہ گوب ۔یِمن منز چھ کٲشرِ تمدنکہ حوالہٕ تِتھۍ انکشاف یِم محققن تہٕ تمدن شِناسن ہٕندِ باپتھ نوٮ۪ن مٔنزِلن تام پٔدۍ وتن ہٕنزکٲم دِن۔ کِتابہ منز چھِ یِتھۍ واریاہ انکشاف بحث طلب ، اماپوز کتاب شایع سپدنہٕ پٮ۪ٹھٕ گٔیہ وۅنۍ ٲٹھ رٮ۪تھ ،کمٔۍ تُل کُنہ بحثس دَس یا کمٔۍ کور کُنہ انکشافس واد، کمٔۍ کور اختلافِ راے! نومن بیانن تہٕ انکشافن متعلق چھنا ہ راے باونٕچ یا صحت مند بحث کرنٕچ گنجٲیش۔

سانہ گٮ۪ون وانچہ چھکرِ ہُند ناو چھُ راجپوٗتانہٕ کہ صحرا پٮ۪ٹھ آمُت ۔ اتھ ٲسۍ اوے کٲشرۍ پٲٹھۍگۅڈٕ "صحرائی " ونان﴿ ص 38 ۔ بھارت ناٹٮ۪م زاو کٔشیرِ منز﴿ص85﴾، پیپر مٲشی یودوَے ایرانہٕ پٮ۪ٹھ یو ر وٲژ مگر ژکہ چھُ یہ فَن چینُک ایجاد﴿ص288 ، دپان کٲشُر شال ٲس نوشیر وان عادل سٕنز ملکہ معّظم تہ ولان۔ سۅ ٲس کٲشرِ پشمینُک ییزار تہ لاگان﴿ص109 ۔ رگ وید چھُ خروشتی خطس منز تہ لیکھنہٕ آمُت﴿ص53 کالہٕ داس اوس کٲشُر﴿ ص268﴾۔پٲتھٕر ہش سِپہٕ تہٕ ہمہ گیر اصطلاح چھنہٕ شاید ہندوستانچہ کُنہ زبٲنۍ منز۔ پٲتھرس بانڈٕ ناٹٮ۪م وَنُن گوو کٲشِر زبٲنۍ ہُنداکھ زوتہٕ وُن فانوٗس وٮ۪تہٕ کرنٕچ کو شش کرٕنۍ﴿ص272﴾۔ کٔشیرِ ہُند کالہٕ حساب چھُ پچھِ وار۔ مرازٕکِس چھتٕر گُل گامس منز چھِ أکِس 300 ؤری پرٲنِس قبرستانس منز قبرن پٮ۪ٹھ شاندٕ کنہ یعنی لوح مزار استادٕ، یِمن پٮ۪ٹھ صاحبِ قبر سٕندِس ناوس سٍتۍیہ تہ لیکھِتھ چھُ زِ سُہ گوو زوٗنہٕ پچھ کہ فلٲنۍ دۅہہ یٔمہ عالمہٕ، یہ عبارت چھے کٲشِرۍ پٲٹھۍ﴿ص194 ، کٔشیرِ منزچھِنہٕ ژور بلکہ  چھِ شے موسم آسان﴿ص194﴾۔

محمد یوسف ٹینگ چھِ کلچرکٮ۪ن رنگا رنگ انہارن و ون ،ژھٲنڈ ، چھٲنۍ تہٕ زول دِنہٕ باپتھ باقٕے قابلِ بروسہٕ تحقیقی ؤسیلو علاوٕ زبان اکھ موٗلی ماخذ مانان ۔ اوے تہٕ چھِ تِم لفظن ،محاورن ، دٔپۍ تٮ۪ن تہٕ لُکہٕ و وتِر علاوٕ تحریری ادبس سٔنِتھ سٔزِتھ تمدنس تہٕ اَمہ کٮ۪ن وِہٮ۪ن ژھونڈ ژھٲر دِوان روزان۔ تہندۍ کِنۍ چھِ پرٲنۍ لفٕظ تہٕ محاورٕ لِسٲنی فوسِل تہٕ ورتاوس منز یِنہٕ وٲلۍ بدس لفٕظ کلچرٕکۍ زِندٕ نُمایندٕ ۔باضے چھُ مختلف قومن درمیان تمُدنی رِشتن ہُند و ون زبانن ہٕندِ مطالعہٕ سٍتۍ مُمکن تہ سپدان تہٕ سہل تہ۔ اَوے چھُ فٲضِل مقالہٕ نگارن" لفظہٕ راش تہٕ وٲنجہ گاش" عنوانس تحت لفظن وَچھ پھُشِتھ تہٕ وٹھ کٲسِتھ دِلچسپ زان آیٔژ تھاوٕنُک اکھ سِلسلہٕ شروع کورمُت تہٕ از تام چھَن ہتھ پیٹھی لفظن ہٕنز وضاحت کٔرِتھ تِمن اندر گُپِتھ تمدنی ژھاین گراین ہٕنز زان تہ دِژمٕژ۔ زیرِ نظر کِتابہ منز چھِ 76 تھن صفن پٮ۪ٹھ ژتجہن لفظن ہٕنز وضاحت درٕج، یۅسہٕ بجائے خود اکھ کارنامہٕ چھے۔ پزر چھُ یہ زِ یژھو کامٮ۪و خٲطرٕ گژھن عٲلمن ہٕنزٕ کمیٹیہ آسنہ، یُتھ اجتماعی طور سٔرِتھ سوٗنچِتھ کٲم سپدِ۔ ٹینگ صٲبٕنۍ یہ کٲم چھے اکہ وسیع تہٕ نَوِ انہارچہ تمدُنی لۅغژٕ سٲزی ہٕنزِ عمارٕژ باپتھ یہ دٔپۍ زِ تہ کٕنٕچ ہش کو شش ، یتھ پٮ۪ٹھ کُنہ زمانہٕ شاندار لٕر تعمیر سپدِ۔ تہُند عٔلِم،مطالعہٕ تہٕ مشٲہدٕ چھُ وسیع تہٕ سرون ، اماپوز تہ ٲسِتھ تہ چھُنہٕ ضروری  زِ تِمن کیا ہٮ۪کہ نہٕ وشفہٕ گٔژِھتھ یا تہٕنز پرٮ۪تھ کانہہ وضاحت تہٕ راے کیا چھے حتمی۔ اَتھ سَنُن چھے عٲلمن تہٕ محققن ہٕنز کٲم فرہنگِ" زُفان گویا وجہاں پویاں"چھے اُتر پردیش کہ جونا پور قصبٕکۍ أکۍ شخصن ییمِس بدربن ناو چھُ ، از برونہہ637ؤری تالیف کٔرمٕژ۔ ٹینگ صٲبن چھُ زٕتووُہن صفن پٮ۪ٹھ پھٔہلِتھ فرہنگ زُفان گویا أکِس کٲشِرۍ سٕنزِ نظرِ منز"عنوانس تحت اَمہ ڈکشنری ہٕندٮ۪ن لفظن و ون دِوان تِتھۍ واریاہ لفظ وَنہ کٔڈۍمٕتۍ،یِمن متعلق لیوکھمُت چھُکھ زِ" یِم لفظ چھِ واریاہن صوٗرتن منز کٲشرِس اظہارس تیوٗت سُمِس سوم سپٕدمٕتۍ زِ از چھِ ماز تہٕ نَم ہوۍ اکھ أکِس سٍتۍ وٲٹِتھ تہٕ وابستہٕ۔ یِمن لفظن چھُ کٲشُر رۅخ مۅکھ تہٕ انہار﴿ ص 88،90﴾۔یِتھے پٲٹھۍ چھُ کٲشرِ کتابہ منز"دراوڈ تہٕ کٲشُر" سِلسِلُک ژوٗرِم مقالہٕ درٕج ۔ یِمن سارِنٕے موضوعن متعلق چھے مزید کٲم کرنٕچ تہٕ بیانن تہٕ انکشافن دَل چھَل دِنٕچ ضروٗرتھ ، یُتھ نوٮ۪ن سرحدن تاں نظر تہٕ پِلن واتہ ۔"کٲشِرۍ لُکہٕ بٲتھ تہٕ آنند کمار سوامی" مقالس منز چھُ کٲشرِ لُکہٕ شٲعری ہٕندٮ۪ن تحقیق کارن ہٕندِ باپتھ اکھ معنہ سوو نیب ۔ آنند کمار سوامی اوس 1877ءمنز لنکایہ منز زامُت۔ سُہ اوس ہندوستٲنۍ عٔلمن تہٕ فنن ہُند نقاد۔ امریکہ ہس منز اوس 8ستمبر 1947ءتام بوسٹن میوٗزیمُک Curator۔ 1911ءمنز آو سُہ انگریز آشینۍ ، یٔمِس ہندوستٲنۍ ناو رتن دیوی اوس ،ہٮ۪تھ کٔشیرِ ۔ یٔتہ کٔرِکھ لُکہٕ بٲتھ جمع۔ 1913ءمنز آیہ یِم بٲتھ شایع کرنہٕ۔ اَتھ سۅمبرنہ چھُ ناوThirty songs from Punjab and Kahsmir by Cummaraswami۔

سۅمبرنہ منز چھِ نٮ۪صف پنجٲبۍ بٲتھ تہٕ نٮ۪صف کٲشِرۍ ۔ لُکہٕ و وترِس سٍتۍ تعلق تھاون وٲلۍ بییہ تہ کینہہ خاص مقالہٕ چھِ کٲشرِ کتابہ منز مثالے "بیون بیون کٔرۍنکھ نقاش" چھُ کٔشیرِ منز کتِر صنعٔژ تہٕ کترِبانن ہٕندِس استعمالس متعلق یا کٲشرۍ رنگ ، پٲتھٕر ، کٔشیرِ ہُند لُکہٕ تھیٹر تہٕ سری نگر چہ کینہہ آورینہ۔"پکھٕ ، پنجہ تہٕ پڈر" عنوانس تحت اکھ سٮ۪ٹھٕ ہے دِلچسپ ، نوو ، معلومٲتی تہٕ پننہ قسمُک گۅڈنیُک مقالہٕ چھُ 42ہن صفن پٮ۪ٹھ۔ اتھ منز چھے سِوۍ ،فطری ، بالا فطری تہٕ خیٲلی جانورن ، جاناوارن ، پشن ، دیومالٲیی کردارن ، اسطوٗری زُو زٲژن تہٕ انسٲنی توہماتن متعلق خاص زانکٲری تہ درٕج تہٕ یِمن زُو زٲژن ہُند انسٲنی سماجس سٍتۍ تعلق بلکہ  مختلف قومن ہٕندِس کلچرس پٮ۪ٹھ فی زمانہٕ اُہند اثر تہ ہاونہٕ آمت۔مختٕلف قومن تہٕ مُلکن منز انسانن ہٕندٮ۪ن یِمن زُو زٲژن ہٕندِ تعلقہٕ تَوہُمن ، اعتقادن تہٕ مفادن ہٕنز کتَھ چھنہٕ ساینسی نۅکتے نظٕر کِنۍ کرنہٕ آمٕژ بلکہ  یہ کینژھا وَننہٕ آمُت چھُ سُہ چھُ زبان تہٕ لُکہٕ و وترکہ انبار منز ژھارنہٕ گارنہٕ آمُت۔ الہٕ پلہٕ چھُ شیٹھن زُو زٲژن ہُند ذِکر آمُت یِم بہر حال لُکہٕ ووتُرکی کِردار چھِ۔ اَسہ برونہہ کنہ یِم جانور ، جاناوار تہٕ پٔشۍ از تہ کٔشیرِ منز وارٕ کارٕ موجود چھِ ، تِمو تہ چھے وٲنسہٕ وادو پٮ۪ٹھٕ کٲشرِس تخلیقی ادبس تہٕ لُکہٕ و وترِس منز جاے پرٲومٕژ۔ فٲضِل مضمون نگارن چھِ پننہ آیہ سونچِتھ یِمن سارِنٕے زُو زٲژن متعلق زٲنۍ ہٕندۍ توٗدٕ آیٔتۍ تھٲومٕتۍ۔ آگر پچٔھنہ متعلق چھُ تہُند خیال زِ آگر پچھِٔنۍ ، عنقاتہٕ سیمُرغ چھِ اکھ أکِس نِش بیون بِدوٗن۔ وننہٕ چھُ آمُت یِتھٕ پٲٹھۍ چینِٮ۪ن ہُند Logoڈریگن چھُ یا یِتھٕ پٲٹھۍ ہندوستانُک أزیُک لوگوٗLogoتہ چھُ ژورن سٕہن ہُند Capitolیُس شہنشاہ اشوک اعظم﴿273ق۔م﴾ سُند نِشانہٕ چھُ ،یِتھے پٲٹھۍ چھُ آگر پچھِٔنۍ کٔشیرِ ہُند سِمبٕل۔ اصل عبارت چھے یہ :

"کٔشیرِ ہٕنز تہذیبی خۅد مختٲری ہُند اکھ شولہٕ وُن تہٕ بولہٕ وُن سِمبل چھُ آگر پٔچھِنۍ۔أسۍ چھِنہٕ چین، ایران تہٕ عربٕکۍ پٲٹھۍرادٕ زیٹھۍ تہٕ ہونزٕ کھٔلۍ۔ ستن ٲٹھن ساسن مُربع میلن ہُند اکھ زٔمینہ ژَکُل یا پوشہ پینڈ مگر اَسہ چھے پننہ تہذیبی خۅد مختٲری ہٕنز پنٕنۍ وٮ۪تھ یۅسہٕ سٲنۍ سٕے آنگہٕ نَس منز تھنہٕ پٮ۪وان تہٕ اَمہ کِسٕے گڑونجس پٮ۪ٹھ پنُن آب سومبرٲوِتھ وۅلُر چھے بناوان۔ اَسہ چھُ پنُن گنگہٕ بل، پنُن پریاگ تہٕ پنُن پُشکر ۔اَسہ چھُ پنُن مدینةُ الثٲنی تہٕ پنُن عروقُ الوثقیٰ۔اَسہ چھُ پنُن مادر زاد لُکہٕ تھیٹر ،ضیافٔتی نظام وازٕوان ،خاص ہانگل تہٕ خاص الخاص کۅنگ۔ یِتھے کِنۍ چھُ اَسہ ڈریگن تہٕ سی مُرغ سٕندۍ پٲٹھۍ پنُن مثٲلی جانور۔آگر پچھِنۍأمۍ سٕندِس وجودس منز چھِ دینو سارٕ Danosarپٮ۪ٹھٕ ڈریگن تہٕ سی مُرغس تام سٲری أکۍسٕے سُلیمان ٹینگس پٮ۪ٹھ سمان تہٕ پنٕنۍ عجٲیبات ہاوان"﴿کٲشِر کتاب، ص 165﴾۔

"ناون ہٕندۍ آوٕلٕنۍ،ییلہ آثارن ہٕندۍ آثار نہہ نٲوِکھ" نٲوۍمقالس منزچھِ سری نگرٕ کٮ۪ن ادبی تہٕ تمدنی مٲنٹھن تہٕ بیٹھالن ہٕنز میٹھ تہٕ معلوٗمٲتی داستان ،یِمو منز کینہہ موجود چھِ تہٕ کینہہ ختٕم چھِ گٲمٕتۍتہٕ کینژَن ہُند استعمال چُھ بدلیومُت ۔نومن مانٹھن متعلق چھے تفصیلی زانکٲری دِنہٕ آمٕژ: شیر گڈِھ ہُند دربار ہال۔ نصرت الاسلام مدرسُک ہال نُمٲیش گاہُک ہال۔ ایس ۔پی کالجُک آڈِٹوریم۔ مُجٲہدِ منزِ لُک ہال ۔ ٹیگور ہال یُس نارٕ بُزۍ سپدنہٕ پتہٕ بییہ تعمیر کرنہٕ آو۔ ٹورسٹ سٮ۪نٹرٕکۍ زٕہال نیڈوزہوٹلُک ہال۔ وومٮ۪ن کالیج امرا کٔدلُک ہال تہٕ شیرِ کشمیر انٹرنیشنل کنونشن کمپلیکس یِمن مانٹھن مانٹھالن ہُندذِکر لذیذ کران کران چھُ فٲضِل مقالہٕ نگارن تہذیب محل کہ منصوبہٕ تہٕ تمہ کہ بعمل نہ یِنُک مویوٗس کُن حال اوحال تہ درج کورمُت۔ یُس کٲشرِتمدنہٕ باپتھ اکہ اَلمیہ چھُ۔

زیر نظر کتابہ منز چھے رحم صٲب سوپوٗرۍ ، نعمہٕ صٲب ،دیناناتھ نادم تہٕ شہناز رشید سٕندِ کلامٕچ مۅلہٕ آنکون تہ آمٕژ کرنہٕ۔ فٲضِل مضمون نگار چھِ نہ صرف اہم محقق بلکہ  ممتاز نقاد تہ۔ از تام چھُ تِمو وارٕیہن شٲعرن ہٕنز تخلیقی صلاحیٔژن تہٕ تہندس کلامس مۅل تُل کورمُت بلکہ  چھُ تہُند قلم تہٕ مخصوٗص اسلوٗب گاسہٕ کرٮ۪چن سۅنہٕ سٲوۍ کران اَمہ موادٕ علاوٕ چھُ "قداوار" عنوانس تحت صاحبِ کتاب سُند اکھ انٹروِو تہ تہٕ مرحوم محمد ایوب بے تابس متعلق اکھ مضمون تہ۔

بہرحال چھے محمد یوسف ٹینگ سٕنزیہ "کٲشِر کتاب" کٲشرِس نثری سرمایس منز اکھ مۅلُل تہٕ معنہ سوو ہُرٮ۪ر، یِژھوٕے کتابو سٍتۍہیکہ کٲشرِزبٲنۍ اوبٮ۪ر گۅبٮ۪ر بوش تہٕ بوَر حٲصِل سپدِتھ ۔

٭٭٭

مرزا غلام حسن بیگ عارف

کٲشرِ زبٲنۍ ہُند ژُکۍ در

"یِتھٕ کٕنۍ ژونگ ژٲنگِس زالان چھُ تہٕ زوٗل چھُ بنان، تی گو وارٕ وارٕ بعمل یوان ،اَڈٮ۪و ژانگٮ۪و تروو زیادٕ پرٮ۪و ۔ وُنکٮ۪ن اَگر 1952ءپتہٕ کٲشرۍ مُصنّف دعویٰ کرن زِاَسہ کور زبٲنۍ وُسعت پٲدٕ بجا چھُ ، زوٗل بٔنِتھ کس چھُ روزان یاد گۅڈٕ کُس ژونگ گٔیوو روشن،﴿آلو ، جِلدٕ 4، شُمار 3 مرزا عارف ، بہٕ کیازِ چُھس لٮ۪کھان﴾"

یِم لفظ چھِ جنّت گار مرزا عارف صٲبٕنۍ ،یِمو منز ورگہٕ پٲٹھۍ تسٕنز سۅ گراو ، باوَتھ لبان چھے یۅسہٕ تس یٔمہ عالمہٕ گژھنس تام دِلس اندر جایُن کٔرِتھ ٲس تہٕ مٔنزۍ مٔنزۍ اوس سُہ پنہٕ نِس مخصوٗص طنزیہ لہجس منز اَمیُک اِظہار تہ کران مثالے تَتھ خطس منز یُس تمٔۍ غلام نبی خیال صٲبس 2000ءمنز سوٗزمُت اوسُن تہٕ"آلو"رسالہٕ کِس پٲنژِمہ جلدٕ کِس پونژمِس شُمارس منز شایع سپُدمُت چھُ یا پروفیسر شفیع شوق سٕندِناوٕ 6نومبر 1997ءلٮ۪کھنہٕ آمُت خط ۔ ییمیُک ا وڈ حِصہٕ یونیورسٹی ہٕندِس انہار رسالہٕ کِس 1998ءکِس شُمارس منز چھاپ سپُدمُت چھُ۔ مرزا عارف سٕنز یہ گراو تہٕ تسُند ملالہٕ چھُ تسٕندِس یتھ شعرس منز تہ ٹاکارٕ

میانہ سٍتی آو یتھ باغس بہار                          یاد روزیاہ کٲشِرس احسان میون

کتَھ چھے صاف زِ عارف صٲبس ٲس تمہ وُٹکرِ یارٕچ تہٕ جفا کٔشی ہٕنز یاد تازٕ یۅسہٕ تمٔۍ کٲشرِ زبٲنۍ ہٕنزِ ترقی خٲطرٕ تحریک شروع کرنہٕ پٮ۪ٹھٕ، اَمہ تحریکہ ہٕندِس وونہٕ ژار پراونس تاں، کاڈ کڈنس تہٕ باڈو ہُرٕراونس تاں، وَژھِ وٲنۍ جہ برداش کٔر۔

حضرتِ پیرِ رومی ؒ سٕندِس مریدِ ہندی حضرتِ اقبالؒ سُند مُرید مرزا عٲرف ۱آو طالبِ علمی ہٕندۍ سٕے زمانس منز لاہورٕ پیرٕ سُند یہ د وپ زِ "کٲشُر چھُ قوم، مگر اَتھ گژھِ قومی خودی تہٕ زندٕ قومی زبان آسٕنۍ﴿آلو جِلدٕ4شمارٕ 3" لونچہ منز رٔژھرِتھ کٔشیرِ ۔ کتَھ چھے 1943ءہٕنز ییلہ پیرٕ سٕندِس د وپِس تعبیر دراو زِواراہ جکھ تہٕ جِتن کرنہٕ پتہٕ دیُت وارٕیہو پٔرۍمتٮ۪و کٲشرٮ۪و عارف صٲبنس نادس داد تہٕ سُہ گو کشمیر بزمِ اَدب نٲوۍ اکھ ادبی تنظیم بناونس منزکامیاب ۔ پرٔۍمتٮ۪ن کٲشرٮ۪ن ٲس نہٕ کٲشِر زبان چِکارس کھسان تہٕ تِم کٲشرِس کُن پھِرٕنۍ ٲس کُڈٕر کٲم،عٲرف صٲبس

 

۱ بہ چُھس پیرروٗمی سٕندِس مریدِ ہندی حضرت اقبالؒ سُند مُرید ﴿مثنوی لیلےٰ ومُصطفیٰ ﴿سرنامہٕ﴾ مرزا عارف

اوس پننہ جایہ فخٕر زِ تمٔۍ کٔرۍ واراہ قلم کار کٲشُر لٮ۪کھٕ نس آمادٕ ، یِمو منز پتہٕ وارٕیہو سٮ۪ٹھاہ تھود مقام پروو مثالے میر غلام رسول نازکی تہٕ دیناناتھ نادم۔ نٲدِمَس متعلق چھُ سُہ فخرٕ سان ونان۔"اگر مے پنُن دور یہ پرِژھٕ زٕپانژٕہَن شیٹھن ؤرۍین کٲشرِ زٮ۪وِ ییژ خدمتھ کٔرِتھ کیا چھُے ژے ہاو ُن لایق ، بہٕ ونہٕ اِنتہٲیی خۅشی تہٕ فخرٕ سان۔ دینا ناتھ نادم۔﴿شیرازٕ نادم نمبر ص 58 دویمٮ۪ن زبانن منز لٮ۪کھن والٮ۪ن کٲشرِس کُن پھِرنہٕ خٲطرٕ زور زار کرنس دوران آو عارف صٲبس تسٕندے وننہٕ واراہ ٹیوٹھ مُدر وَننہٕ ، اڈٮ۪و دوپ کٲڈۍ چھِس ڈٔلۍ مٕتۍ اڈٮ۪و د وپ اُردوٗ زبٲنۍ ہُند چھُ دُشمن نتے یہ صحب ٹوٗپۍ دِتھ انگریز چالہ سائنسدانا چُھ تَتھ زبٲنۍپتہٕ لوگمُت یتھ نہَ رسمُ الخط چھُ، نہٕ علمی تہٕ خاص ادبی تحریر و خٲطرٕ بِتُر چھُ۔ یہ سورُے برداش کٔرِتھ روٗد سُہ دنہٕ پنہٕ اَتھ کامہ پتہٕ ، یوتام کشمیر بزمِ ادب تنظیمہ ہٕندِ طرفہٕ گُلریز نٲوۍ اُردو کٲشُر رسالہٕ شایع کرنہٕ آو ، اَمہ کٮ۪ن گۅڈنکٮ۪ن ترٮ۪ن شُمارن ہُند۔

ترتیب کار اوس محمد امین کامل،تمہ پتہٕ روٗدۍ اَتھ پروفیسر محی الدین حاجنی،عبدالحق برق تہٕ پتہٕ غلام نبی خیال ترتیب کار۔گُلریز ُک مدیر تہٕ شایع کاراوس محمدصدیق کبروی، عارف صٲب اوس اَمیُک نگران۔ یہ رسالہٕ بنیاو تمہ وقتکٮ۪ن سارِنٕے قلمکارن ہٕندِ اَتھٕ واس سٍتۍ کٲشرِ زبٲنۍ ہٕندِ خٲطرٕ ترقی ہٕندٮ۪ن تھزرن کُن لانپھ نِنَس تہ پِلو کرنس کیُت اَکھ د ور نٮ۪مہٕ ڈوکھ ۔أتھۍ زمانس منز دیُت عارِف صٲبن آلو

پرزٮ۪وَو کٔلرٲوۍ أسۍ نٔشرٲوۍ أسۍ                                            پننہ ہنہ نِش ڈٲلۍ ٲسۍ مٔشرٲوۍ أسۍ
کو نز
ییلہ آسہ گنجینس پنٕنۍ                                                           ویُژ تھوو شیرتھ بنَو سۅنہٕ سٲوۍ أسۍ

کشمیر بزمِ اَدبہٕ پتہٕ بناوِ تمٔۍ بییہ تہ واراہ تنظیمہٕ تہٕ وارٕیہن سرکٲرۍ تہٕ غٲر سرکٲرۍ تمدنی ادارن سٍتۍ روٗد وابستہٕ ۔1948ءمنز بنیوو سُہ مہجورنہ سربرٲہی منز قٲیم سپدن والہ کلچرل فرنٹُک گۅڈٕ نیُک جنرل سیکریٹری ، اَمہ تنظیمہ کور کونگ پوش رسالہٕ جٲری تہٕ عارف اوس اَتھ سب ایڈیٹر ۔کشمیر رِیسرٕچ کونسلُک اوس سُہ داہن باہن ؤرۍین منتخب صدر تہٕ جموں وکشمیر اقبال اکاڈمی ہُند تہ اوس سرپرست۔

مرزا غلام حسن بیگ عارف زاو  13ستمبر 1910ءمنز اننت ناگ سریہ ہٕندِس کٲڈۍ پوٗرۍ محلس منز،لاہورٕ کورُن بی ، ایس ،سی تہٕ علی گڈھ آو زالوٗجی منز ایم،ایس، سی کٔرِتھ۔ زندگی ہٕندۍ 93بہار چھٲوِتھ گوو 2004ءمنز یٔمہ عالمہٕ ،تمٔۍ کٔر تھدٮ۪ن سرکٲرۍ عۅہدن پٮ۪ٹھ کٲم، سُہ اوس ریڈیو کشمیرُک تہٕ جومیُک گۅڈنیُک شیٹشن ڈائریکٹر یہ عۅہدٕ ترٲوِتھ گوو ٲخرس ڈائریکٹر سری کلچر سٕندِ حٔثۍ یتہٕ سبکدوش ۔ کٔشیرِ منز ریشم صنعتس نٔوینہٕ آیہ ترقی دِنس تہٕ دیاوٕنس منزچھُ عارف صٲبُن واراہ حِصہٕ، اَتھ سلسلس منزکور تمٔۍ چینُک تہ دورٕواپس یِتھ لیوکھُن "میون چینُک سفر" نٲوۍ سفر نامہٕ تہ،انگریزۍ زبٲنۍ منزلیکھۍتمٔۍ نہ صرف ریشم صنعٔژ ہٕندِس وۅتھٕ بوس متعلق واراہ ساینسی نوعیتٕکۍ مضمون بلکہ  اسلامیاتس متعلق تہ لیکِھن کٍتۍ پُر مغٕز مقالہٕ ۔تمٔۍ کٔرگۅڈنِچہ لٹہAnatomyکٲ شُر روٗپ دِتھ "آدمۍ مور" نٲوۍ کتاب چھاپ، یہ کران کران پیو و تس اصطلاح ساز تہ بَنُن۔ رسم الخط شیرنہٕ خٲطرٕ عشائی کمیٹی ہٕندِس أکِس معتبر ممبر سٕندِ حثۍ یتہٕ کور عارف صٲبن اَتھ منز تہ پنُن حِصہٕ ادا۔ سائنس دان ٲسِتھ اوس نہٕ سُہ صرف انجمن ساز،تُمدنی کارکُن تہٕ صحٲفی یوت بلکہ  اکھ ممتاز ترجمہٕ کار تہ۔ تمٔۍ أنۍ فارسی ادٕبکٮ۪و شاہکارو منز حضرتِ شاہ ہمدان ؒ سُند چہل اسرار تہٕ عُمر خیام سٕنزٕ رُبایہ کٲشُر منظوٗم روٗپ دِتھ کٲشرٮ۪ن ڈالہ رٔنگۍ ۔1958ءمنز چھٲپٕن An Anthology of Kashmiri poetsیتھ منز شٲمل کرنہٕ خٲطرٕ پنہٕ نٮ۪ن کیو بیین شٲعرن ہٕنزن درجن واد نظمن انگریزیس منز ترجمہٕ کورُن۔ رابندرناتھ ٹیگور سٕندِ Cycle of spring ڈرامہٕ ہُک ترجمہٕ کورُن"سونتُک اتہٕ گتَھ" ناوٕ۔ہندوستانُک ٲین کٲشرِس منزپھِرنٕچ کٲم تہ کٔر تمٔۍ سۅرگہٕ وٲسۍ پروفیسر پُشپ صٲبس سٍتۍ رٔلِتھ ۔ اماپوز بہ حیثیتِ کارِوۅگُن کٲشُر ترجمہٕ کار چھُ مرزا عارف سُند عظیم کارنامہٕ قرآنِ شریفُک منظوم تہٕ نثری ترجمہٕ تہٕ تفسیر ، یُس شایع سپُدمُت چھُ۔

مرزا عارفن چھے نثٕرتہٕ شٲعری ہٕنزِ الہٕ پلہٕ تمام ونٕتۍ زٲژ پنہٕ نٮ۪ن خیالن تہٕ تجرُبن ہٕنزِ باؤژ کٲری خٲطرٕ ورتاوِمژٕ،تمٔۍچھول گۅڈنِچہ لٹہ وارٕیہن ؤنٕتۍ ذٲژن ہُند پرشٮ۪ہلُن۔ تسٕنزِ وٲنسہ ہُند ویُژ تہٕ مُژ چھُ تسٕندٮ۪ن تخلیقاتن ہُند انبار ،یتھ منز اٮ۪سے،تحقیقی تہٕ تنقیدی مقالہٕ،تبصر تہٕ تجزیہ ،سائنسی تہٕ اِسلامی موضوعاتن پٮ۪ٹھ لیکھۍمٕتۍ مقالہٕ، سفر نامہٕ، ترجمہٕ، نعت، حمد، نظم ، غزل، وژن، واکھ تہٕ ژاکھ ،مرثیہ، آزاد نظمہٕ ،قصیدٕ ، انقلٲبی تہٕ قومی نغمہٕ ،مثنوی تہٕ منقبت پرٮ۪تھ کینہہ چھُ۔ سُہ چھُ بُنیٲدی طور شٲعر بلکہ  پننہ اسلوٗبہٕ تہٕ طرزِ اظہارٕکہ حوالہٕ اکھ نُمایندٕ شٲعر ، سُہ اوس ادب براے زندگی نظریُہک قٲیِل، تسٕندۍ کِنۍ گژھِ شٲعری سمٲجی تہٕ اخلٲقی مقصد پوٗرٕ کرٕنۍ، سُہ اوس کٲشرٮ۪ن روایٔژن ہُند ترجمان تہ تہٕ پاسبان تہ، آزاد نظمہٕ آیہ نہٕ تسٕندِس مزازس براہ، غزلُک پٲز تہ آو نہٕ تس پزنہٕ پٲٹھۍ لیہ، حتاکہ تسٕندۍ کینہہ غزل گٔے عوامس منز سٮ۪ٹھاہ مقبول مثالے، رُم گٔیم شیس بٮ۪گُر گو بانہٕ میون بیترِ مگر غزل گوئی منزہیوک نہٕ تمٔۍ امتیاز پرٲوِتھ۔ اماپوز عٲرِف صٲبنس شٲعرانہ ٕ شخصیتس یۅسہٕ صنف سخن اکھ شوٗبہ دار ہنگہٕ پھوت وٲٹِتھ عزت، وٮ۪قار ، اعتبار تہٕ تھزر بخشان چھِ ، چھے "ژاکھ" یِمن رحمان رٲہی صٲبن"ژُمِصرٲے" ناو کور مگر عارِف صٲبن و ونُکھ ژاکھ، ژاکھ چھِ عارِف صٲبنِس مِزازس گو تہٕ یِمن منز چھِ تمٔۍ تَہہ بہ تَہہ تجربہٕ تہٕ خیال بٲوۍ مٕتۍ ، رُباعیات لٮ۪کھُن وول سون پایہ بوڈ سخنور اوس میر غلام رسول نازکی تہ مگر ییتٮ۪ن چھُنہٕ موقہٕ دۅنوٕنۍ بزرگن ہٕنزن رُباین ہُند تقوبُل کرنُک۔ ترقی پسندی ہٕندِس دورس منز لیچھِ مرزا عارفن قومی تہٕ اِنقلٲبی نظمہٕ، یِمہٕ جٲگیردارن، سرمایہ ِ دارن تہٕ ڈوگرٕ شٲہی ہٕندِس کٲشرٮ۪ن پٮ۪ٹھ سپدن وٲلِس ظُلم وسِتمس خلاف آسہٕ ، اَمہ دورٕچہ تسٕنزٕ یاد گار نظمہٕ چھے دُسہٕ ، ا ہرٕبلُک آبشار ، بانہٲج بال تہٕ گریوٗس ، موزرینۍ ، شہید بٔستی، نعرئہ شباب، ترانۂ وطن تہٕ مگر کاروان سون برونہہ برونہہ پکان گوو ۔دُسہٕ نظمہ متعلق چھُ ممتاز شٲعِر تہٕ نٲقد رحمان راہی ونان۔"کٲشرِس سماجس منز محنت تہٕ مٮ۪حنٔژ ہٕندِس استحصالس متعلق یِمن موضوعن مرزا عارفن شعرُک جامہٕ و ولمُت چھُ، تِمن منز چھِ دُسہٕ اکھ مٲرۍ منزنظٕم ،یتھ پننہ بُربُکہٕ آمٕژِ لیہ، وٮ۪گلہٕ وُنہ لہجہ تہٕ خلوکھ ہار لفظٕ ژٲر تہٕ تخلیقی وحدٔژ ہٕندِ لحاظہٕ عٲرِفنس کلامس منز تھٔز جاے چھے ۔﴿کہہ ؤٹ ،رحمان راہی ص 186 "۔ اماپوز 1976ءپتہٕ ییلہ تمٔۍ غریبَن غُرباتن پٮ۪ٹھ نوٮ۪و نوٮ۪و طریقو استحصال سپدان وُچھ، نٔوِس جمہوری نظامس ہیژن پنہٕ نٮ۪ن شعرن اندر پُرنہ تام خبر۔ از تام چھے تسٕنزٕ نومہٕ شعرٕ سومبرنہٕ شایع سپدیمٕژ : رموزِعارف﴿1984ئ﴾ ، بانگِ اول﴿1954ئ﴾ آگر وونۍ﴿1971ئ﴾ ،لولہٕ ویژار﴿1984ئ﴾ عالم آشوٗب ، یوسُف نامہٕ، نغمۂ دِل، بُجرُک بہار۔

یِمن سارِنٕے شعرٕ مجموٗعن اندر چھے یہ کتَھ نٔنۍ تہٕ ٹاکارٕ زِمرزا عارف اوس اکھ یژھِ پژھِ وول مسلمان تہٕ رسولِ رحمت صلی اللہ علیہ وسلم سُند عاشق، تسٕندۍ بے شُمار ژاکھ تہٕ واراہ نظمہٕ چھے حُبِ رسولِ مقبول سٍتۍ بربُکہٕ

دوچھِنۍ کھووُرۍ مے چھُم اللہ محمد                                     بٔہ زَن چُھس کعبہ قوسینَس اندر مد
اِللہی
کیا وُچھان چُھس کیا ونان چُھس                      بٔہ کیا چُھس کانہٕ چُھس یِم میٲنۍ سرحد

٭

نیندرِ وُزنوونس دوپُن عٲرِف                                                                        نوٗر چُھس جاے دِم مے سینس منز
چشمہٕ
ؤنزمَس دوپُس مے بِسم اللہ                                  ان ژٕ تشریف بیہہ مدینس منز

٭

یُتُے یوت نہٕ زِ مرزا عارف صٲبس آو"آدٕمۍ مور" کتابہ ِ پٮ۪ٹھ کلچرل اکاڈمی ہُند ایوارڈ دِنہٕ تہٕ لولہٕ ویژار کتابہ میوٗل تِمن ساہتیہ اکاڈمی ایوارڈ، یا 1974ءمنز آو تِمن کلچرل اکاڈمی ہُندِ طرفہٕ اعزٲزی خلعت تہ عطا کرنہٕ، کٔشیرِ منز تہٕ کٔشیرِ نیبر تہ آیہ تِمن ادبی تہٕ ثقافتی تنظیمو دٔسۍ عزت افزٲیی کرنہٕ بلکہ  چھُ تسٕندٮ۪ن علمی ، ادبی، ثقافتی کارنامن ہُند اعتراف تسٕندٮ۪و مۅمتاز تہٕ پایہ بڈٮ۪و ہم عصرو تہ فِکروفن تہٕ مرزا عارف سائیٹسٹ پویٹ Mirza Aarif Scientist poetنٲوۍ کتابن منزتہ کورمُت ، حتاکہ غلام نبی خیال سٕندٮ۪ن لفظن منز۔

عٲرف چھُ اکھ مٲہر سائنسدان ، اکھ ژُکۍ درماہرِ زبان ، اکھ درد مندو طندار ، اکھ صاحبِ دِل تہٕ صاحب فضیلت ادیب ، شٲعر، نقاد، محقِق تہٕ توٲریخ دان۔

﴿آلو، جلٕد5، شمارٕ5، 6،ص 42"

ضروری  چھُ زِ مرزا عارف سٕندٮ۪ن ادبی کارنامن تہٕ تسٕنزِ بسیار پاسل شخصیٔژ ہٕندٮ۪ن مختلف گوشن ییہ دِل دِتھ سام ہٮ۪نہٕ، چھل تہٕ چھٲنۍ دِنہٕ، تُلنے تہٕ وٮ۪ژھنے کرنہٕ، نتہٕ روزَو أسۍ تسٕندۍقرضدار اماپوز یہ صبر آزما کٲم چھے بل بِتُر تہ منگان تہٕ بوزٕ شوژ تہ تِکیازِ بقولِ ممتاز محقق تہٕ ناقد محمد یوسف ٹینگ۔ عارف چھُ وُہمہ صدی ہٕندِ کٲشرِ ادبُک متن تہ تہٕ میزان تہٕ ، توژھ تہ تہٕ توٲریخ تہ۔﴿راش ص171

مثنوی لیلےٰ و مصطفی

مرزا عارفن چھے نثر تہٕ شٲعری ہٕنز الہٕ پلہٕ تمام ونٕتۍ زٲژ تجربن تہٕ خیالن ہٕنزِباوَتھ کٲری خٲطرٕ ورتاوِمَژٕ، اوَے چھے تسٕندِس شعری تخلیقن ہٕندِس انبارس منز واریاہ مثنوی چالہ نظمہٕ تہ موجود تہٕ کینہہ لۅکچہ بجہ مثنویہ تہ۔ مثنوی ہٕنز یِہے فارم یٔژ پٲٹھۍکاپہ أنِتھ تہٕ کامہ لٲگِتھ اوس تمٔۍ قرآنِ مجیدس کٲشُر منظوم ترجمہٕ بامل اَنہٕ نٕچہ بابرکت ،باسعادت پوز مُشکل تہٕ صبر آزما کامہ واریاہ کال برونہہ "احسن القصص" نظمٲوِتھ دس تُلمُت ، الحمد اللہ تسُند قرآن مجیدُک منظوم تہٕ نثری ترجمہٕ چھُ وۅنۍ شایع تہ سپدیومُت۔

1946ءیَس منز" رموزِعارف"شعرٕ سومبرن شایع کرنہٕ پتہٕ ترٲو مرزا عٲرفن پنٕنۍ گۅڈنِچ مثنوی "لیلےٰ و مصطفےٰ" بازر۔ گۅڈنکہ پھِرِ آیہ1947ءمنز اَمچہ اکھ ساس کاپیہ چھاپنہٕ۔ کٲشرِزبٲنۍ منزچھے مثنوی نگٲری ہٕنز پرٲنۍ تہٕ دٔرروایت موجود، بزمیہ تہٕ رزمیہ مثنوی چھے لٮ۪کھنہٕ آمژٕ،اماپوز "لیلےٰ ومصطفےٰ" چھے پننہ قٕسمٕچ گۅڈنِچ تہٕ ٲخری مثنوی۔ رٮ۪وایتی طور چھُ سانٮ۪ن لولہٕ مثنوین منز عام ہندوستٲنۍ فِلمن ہٕنز کہٲنین ہٕندۍ پٲٹھۍاکھ عاشق ، معشوق تہٕ تِہندۍ مددگار تہٕ کژھ کۅیہ کردار آسان۔ عاشق چھُ معشوقس حٲصِل کرنٕچہ کو ششہ دوران باضے جانہٕ مرگ تہ گژھان تہٕ باضے وٲصِل سپدنس منز کامیاب تہ، یِہندِس جنسی عشقس چھِ سمٲجی، فطری یا مٔنزۍ بالا فطری ٹھٔرۍ تہٕ ٹھاکھ تہ بُتھِ یوان، کینہہ تِژھٕ لولہٕ مثنویہ تہ چھے اَسہ یِمہٕ مجٲزی عشقچہ ہیرِ کھٔسِتھ حقیقی عشقس تام واتہٕ نٕچ ژینہٕ وَن دِوان چھِ۔ اکثر مثنویہ چھے وۅپر زبانو پٮ۪ٹھٕ ترجمہٕ کرنہٕ آمٕژ یا تہٕ چھے تِمن ہُند تلخیص۔ جنگنامہٕ تہ چھِ اَسہ د ویمٮ۪و زبانو پٮ۪ٹھے پہہٕ أنۍمٕتۍ، اماپوز مقبول کرالہ ٕ وٲرۍ سٕنز"گریسۍ نامہٕ" مہدی ترالی سٕنز"اعجازِ قرآن" ، حبیب اللہ ٹھوکر سٕنز الہ ٕ شہر تہٕ مرزٕ میرُن مۅقدم نامہٕ بیترِ چھے کٔژ تامٕے مثنویہ یِمن منز احتجاج ، بغاوت تہٕ ظلم و سِتم باوَتھ لبان چھُ، مثنوۍین ہٕندِس اَتھ سٲرۍسٕے منظر نامس منزچھے مرزا عارف سٕنز مثنوی بیون بدوٗن تہٕ منفرد۔ اَتھ منز چھُ زمینی لولس ،مٲلِس ماجہ تہٕ بینہ بٲے سٕندِس محبتس پٮ۪ٹھ جہادس تھود درجہ دِنہٕ آمُت ، اتہ چھُ جنسی جذبہٕ تہ، خوٗنی رشتہٕ تہ،نِسوٲنی حُسن تہ تہٕ جہاد تہ۔

مثنوی ہُندخُلاصہٕ:

دپان یتھ زمانس منز ترُکن، اٹلی سٍتۍ جنگ سپدان اوس تہٕ عرب ٲسۍ اَتھ جنگس منزتُرکن لرِلوراِٹلی ہٕندِس فوجس سٍتۍ لڈان ، بن غازی نٲوۍ جایہ اوس اکھ عرب پہلوان روزان،أمِس ٲسۍ سَتھ نیچوۍ کٍنِسس أکِس اوسس ناو مصطفےٰ ۔جہادُک ڈُمہٕ ڈُمہٕ وزان وزانٕے درایہ مصطفےٰ سٕندۍ شٮ۪نہٕ وے بٲے جہادَس ،مصطفےٰ روٗد جہادٕ نِش لوب۔أمِس اوس مامہٕ تٕرِ بینہ سٍتۍ عشق گومُت، مامہٕ تٕرِ بینہ اوس ناو لیلےٰ۔ لیلا یہ ہُندمارٕ موت اوسُس جہادس نیرنس ٹھرِ یوان۔مول موج، بینہ سٲری لٔگِس لعنہٕ طعنہٕ کرنہ۔ نامردی تہٕ بے غٲرتی ہٕنزٕپامہٕ دِژہَس،جہادٕچ اہمیت تٲرہَس فِکرِ لیلےٰ ٲس یہ سورُے گفتگو بوزان ، تمہ و ون سارِنٕے تھی پنہٕ نِس عاشقس زِ جہادٕ وِزِ چھا نٔجدٕ موت لاگان، عام زنانن ہُند مَہر چھُ یوان زر تہٕ زیور مقررکرنہٕ اماپوز بہٕ چھس مُجٲہدکو ر ہرگاہ میون لول چھُے تیلہ چھَسے بہٕ پنُن مہر پانہٕ مقرر کران جہادس نیر تہٕ داہ دشمن کرُکھ مارٕ، یۅہے چُھ میون مُہر۔ یِتھٕ پٲٹھۍچھُ مصطفےٰ جہادس نیران، واریاہ دُشمن قتل کٔرِتھ چھُ چھۅکہٕ لد گٔژِھتھ بے ہوش گژھان ، لیلےٰ تہ چھے مردانہٕ رخ لٲگِتھ مٲدانِ جہادس منزآسان۔ سۅ چھے پنہٕ نِس چھۅکہٕ لد یاوَن رایس تُلان ، دارو دواکران تہٕ ٲخرس تس سٍتۍ خاندر کران۔

وٮ۪ژھنے تہٕ تُلنَے:

لیلےٰ تہٕ مصطفےٰ نٲوۍ یہ لۅکٕٹ مثنوی چھے از تام ترییہ لٹہ چھاپ سپٕز مٕژ، 1947ءمنز اکھ ساس کاپیہ،1969ءمنز پنداہ شتھ کاپیہ تہٕ1990ءمنزاکھ ساس کاپیہ۱۔شعرن ہٕنز گرند چھَس فقط أکِس ہتس تہٕ پانژنمتھن تام واتان ، ونہٕ وُن عنوانس تحت چھِس بییہ تہ نو شعر ،یِم نہٕ چھِ وَنہٕ وُن تہٕ نہ چھِ اصل  قِصُک حِصہٕ بٔنِتھ ہیکۍمٕتۍ،یِم نو شعر چھِ بٔلۍ لٮ۪کھنہٕ آمٕتۍ تہٕ مثنوی منز شٲمل تہ کرنہٕ آمٕتۍ۔

مرزا عٲرفن چھے یہ مثنوی کمال یاونس منز تخلیق کٔرمٕژ یاوُن چھُ زندگی ہُند سُہ دور ییلہ جنسی جذبُک تژرتہٕ حُسنس ویوٗر تُلنُک مژر طوٗفٲنۍ دٔریاوٕکۍ پٲٹھۍ بٔٹھۍ تہ سوتھۍ ژٹہٕ نُک مٲیل آسان چھُ، یۅہے چھُ وق ییلہ کھور تہ ڈلہ تہٕ رِکٕنۍ تہ ہیکہ گٔژھِتھ اَسہ ٲس لولہٕ داستان منظوم کرنٕچ روایت موجود تہٕ عٲرف ہیکہ ہاکُنہ تہ جنسی قصٕس وسیلہٕ بنٲوِتھ یاونس منز[8] وَچھُک وُپھاٹھ ژٔھٹِتھ ،اماپوز تمٔۍ کٔر روایتس سٍتۍ بُتھۍلاگے یاونُک حوصلہٕ اوسُس ڈٔکھس تہٕ لوگ جہادُک مۅل مرتبہٕ لوٗکن تام مثنوی ہٕند ؤسیلہٕ واتناونہ۔ یہ چھُ سُے مرزا عارف ییمۍ ترقی پسندی ہٕندِس دورس منز نہ صرف دُسہٕ موزرینۍ، بانہٲج بال تہٕ گریوٗس ،اہرٕ بلُک آبشار ہشہ انقلٲبی نظمہٕ لیچھِ بلکہ  نعرئہ شباب تہٕ انقلاب ہوۍ جنگی ترانہ ٕ تہ دِتِن ۔نیا کشمیر کہ خابُک تعبیر ژھارنہٕ مۅکھٕ"البانہ وٲلِس جنڈس" استعارٕ تہٕ علامتھ بنٲوِتھ چُھ شخصی راجس خلاف ونان

ژٕ چھُکھ کٔشیرِ ہُند جوان                                             تُلن ژے چھُے آلُک نِشان
وُچھان
ژے کُن درُس جہان                   شہید نوجوان بن

وۅنۍ گو توجہ طلب نۅکتہٕ چھُ زِ تمٔۍچھُنہٕ کُنہ جایہ تہٕ تِمن نظمن منز"جہاد" لفظ تتھ سیاق و سباقس منز ورتوومُت ،یتھ سیاق سباقس منزیہ لفظ مثنوی لیلےٰ و مُصطفےٰ ہَس منز ورتاونہٕ آمُت چُھ، اتہ چھُ یہ پوٗرٕ قرٲنی اصطلاحکِس معنہ یس منز ورتاو لبان۔ اَتہ نہٕ چھُ جنسی جذبُک تژَر سوتھرس پٮ۪ٹھ یوان تہٕ نہٕ چھُ ترقی پسند تحریکہ ہٕندٮ۪ن خیالن ہُند باس لگان ،یہ چھُ پوز زِ اَتہ تہ چھُ قوم تہٕ وطن گژھان نظرِ مگر اتھ سٍتۍ چھے جہادٕچ سۅے تشریح یۅسہٕ اَتھ مُحدثَو تہٕ عٲلمو کٔرمٕژ چھے ۔ وُچھِو:

زندگی ہُند ویوژ مسلمانس جہاد                                                زندگی اسلام کُفرس سوٗر ساد
فرض
اَوٕ کِنۍ پرتھ مسلمانس جہاد                                        فِتنہ نادانس تہٕ شیطانس فساد

مِلّتس ، مالس تہٕ عزت و عصمتس رٲچھ کرنُک تہٕ کرناونُک موثر رول کِتھٕ کٔنۍ چھے باغیرت زنانہٕ ادا کران تہٕ تِہندِس نصیحتس منزکوتاہ اثر ہیکہ ٲسِتھ، یہ سورُے چھُ اَتھ مثنوی منز نظرِ گژھان،ماجہ ہُند رول وُچھِو

قومہٕ کِس مالس امانت دار موج                                      نوجواں فوجس سپاہ سالار موج
مۅردٕ
قومَس زِندٕ کرِ دلدار موج                                                                        شیر چٲوِتھ شیر کرِ ہُشیار موج
یٔہے
موج چھے مصطفےٰ ہس ونان

حٲف تس مردس جوانس کٲہلَس                                     دُشمنِ دینس غدارس جٲہلس
مِلتُک
وطنُک ییمِس احساس کم                                       یُس بے غٲرت ہٮ۪تھ ژٔھری وسواس غم
آسہ
وطنس منز زبردس اِنقلاب                                       بے حمیّت مردِ آہن محوِ خواب

فاطمہ چھے ییمہ آیہ مصطفےٰ ہس غٲرتھ اَنان:

بایہ میانیو ضایہ مو کر زندگی                                                    روزِ محشر ما تُلکھ شرمندٕگی
کیا
ونکھ پرژھنے ژے ییلہ تتہ آنجناب                         شرمہ سٍتی ماگژھکھ تَتہ آب آب
غٲزِیو
کھییہ گولہ نامردو کباب                                               خونِ دِل چیوو غٲزیو، لانژھو شراب
زندگی
نو بایہ میانیو کھٮ۪ن تہٕ چن                                        زندگی ہو چھے شہیدن غازین
وۅتھ
کمر کس بایہ اَسہ دِل شاد تھاو                              زورِ حیدرؓ زور خالدؓ یاد پاو

ییمہ مثنوی ہٕنز چھے یہ تہ اکھ خصوصیت زِ روایتی مثنوی ہٕندۍ اجزاے ترکیبی چھِ اَتہ موٗلے مٔشراونہٕ آمٕتۍ ، اَتہ نہ چھُ وجہہ تصنیف ،وجہہ تالیف ، حمد ، نعت تہٕ منقبت تہٕ نہ چھے کُنہ جایہ مالا یٲنی ورتاونہٕ آمٕژ۔ افسانوی رنگ آمیزی چھنہٕ اَتہ کانہہ جاے دِنہٕ آمٕژ۔ یہ مثنوی نہ چھے تٲلیف تہٕ نہ ترجمہٕ ،أکِس مۅخصر گۅڈٕکتَھ منز چھُ مرزا عارف لٮ۪کھان زِ"اَمہ قصُک اوس مے ذٮ۪ہنس پٮ۪ٹھ نقش ، یہ نہَ چھُ تالیف تہٕ نہ ترجمہٕ ،یہ آو مے آوٕ مۅکھٕ خۅش زِنہَ اوسُس بہٕ تِمن دۅہن بے عملی ہُند شکار تہٕ نہ چُھس از اَ میُک قٲیِل ،سنیاس ، بن باس ، گۅپھ تہٕ غار رٹن وٲلۍ چھِ پنہٕ نی یوت باپتھ ابدی زندگی ہٕندِس تلاشس منز آسان۔ مردِ مومن چھُ پانہٕ تہ باعمل آسان تہ اَمہ کُے پیغام بیین تہ دِوان، اکہ مکمل ، بامقصد تہٕ صالح زندگی ہُند"۔                       ﴿ مثنوی لیلےٰ مصطفےٰ ۔ص 5چھاپ ۔1990ئ﴾

یہ کس چھنہٕ خبر زِ شٲعری منز چھُ مرزا عارف مقصد یتُک تہٕ افٲدیتُک قٲیِل روٗدمُت ،سُہ چھُ حرکت ، جہد ، عمل تہٕ مقصد زندگی ہُند لُب لُباب مانان، اوے و ون از برونہہ 51ؤری تنہا انصٲری ین زِ

"مرزا عارف سٕنز اَتھ مثنوی پٮ۪ٹھٕ غورو فِکرکرنہٕ پتہٕ چھُ مانُن پٮ۪وان زِ تسٕندِس طبیعتس پٮ۪ٹھ چھُ علامہ اقبال ؒسٕندِ فکرو فنُک تہٕ فلسفُک اثر"۔

﴿گلریز 1952ئ﴾

کُلہُم پٲٹھۍ چھِ مثنوی منز شے کردار، مول،مصطفےٰ ، مُصطفےٰ سٕنز موج، فاطمہ ، لیلےٰ۔قصٕس چھِ ترے کو نج مُصطفےٰ یُس لیلےٰ یہ ہُند عاشق چھُ، لیلےٰ یۅسہٕ مُصطفےٰ سٕنز معشوق چھے،مول ،موج تہٕ بینہ،یِم جہادٕکِس حقس منز چھِ ، ٲخرس پٮ۪ٹھ چُھ اَتھ ترکو نجل دٔلیلہ منز پرتھ کُنہ کو نجُک کردار پنُن پنُن مقصد پراوان ، اماپوز اَمہ ترکو نجل دٔلیلہ ہُند عنوان چھُنہٕ منہٕ مون، شاید چھنہٕ شٲعرن شعوری طور، اَتھ خٲطرٕ دِلچسپ عنوان ژھارنٕچ کو شش کٔرمٕژ۔ وۅنۍ گو 1969ءمنز اوس عارف صٲبن اَتھ "شانِ مومن " ناو تھوومُت تہٕ اَمی ناوٕٲسن شایع تہ کٔرمٕژ۔ ترُکو نجل قصٕکۍ سٲری کردار چھِ اَلہٕ پلہٕ کُنہ سٕے سوتھرس پٮ۪ٹھ وۅتلان یودوَے زَن مصطفےٰ قٕصُک ہیرو چھُ تہٕ لیلےٰ ہیروئن ، تاہم چھِنہٕ تِہندۍ کردار زور دارپٲٹھۍدویمٮ۪ن کردارن ہٕندِ کھۅتہٕ تھود وۅتلِتھ ہیکۍ مٕتۍ ، اتھ ہیکہ شاید یہ تہ وجہ ٲسِتھ زِ دٔلیلہ ہُند مرکزچھُ جہاد تہٕ جنسی عشق چھُ ہیرو سٕندِ حیثیتہٕ لعنہٕ طعنہٕ تہٕ پامہٕ و وترِ سٍتۍ گۅڈَے کمزور، ڈیول ،پول تہٕ ناپسندیدٕ بنان۔ بییِس کُنہٕ ہس ہے گٔژھۍ زِمثنوی ہٕندِس روایتی طرزِ اظہارس بُتھ پھِرِتھ ما چھے مرزا عارف سٕنز یہ دٔلیل مثنوی ہٕندِس وانگس منزیِوان ، یہ ماچھے محض اکھ زیٹھ أکۍسٕے بحرِتہٕ وزنس منزلٮ۪کھنہٕ آمٕژ نظم؛وۅں گو اَمہ قبیلچہ واریاہ لۅکچہ مثنوۍیہ چھے ضروٗر اَسہ نِش موجود تہٕ یِمن بہرحال مثنوۍ یے وننہٕ یوان چھُ تہٕ یِمو منزٕ کٔہۍ یا مرزا عارف سٕنزِاَمہ مثنوی پتہٕ لٮ۪کھنہٕ آمٕژ چھے۔

مرزا عارف سٕنزِ اَتھ مثنوی منز چھے زبردس روٲنی موجودپرٮ۪تھ مصرعس منز چھُ زور تہ جوش ،تعجب چھُ جوان شٲعر س کٍژاہ تھپھ چھے کٲشرس لفظہٕ و وترس تہٕ محاورس پٮ۪ٹھ، سٲرۍسٕے مثنوی منزچھِ دُردانہٕ ہوۍ چُس تہٕ چاق و چوبند الفاظ تہٕ محاورٕ وٲلۍ شعر موجود۔مثنوی ہٕندِ چھاپ گژھنہٕ پٮ۪ٹھ از تام گٔیہ 56ؤری ، یِمن ؤرۍین کوڈ نہٕ مرزا عارفن لیکھنس زانہہ تھکھ تس ٲس بُنیاد موجود ،تجربہٕ ،مشاہدٕ تہٕ ورتاو سٍتۍ بنیووسُہ سون زباندان تہٕ تسُند لفظٕ راش چھُ یٔژ مۅلُل اوے چھُ محمد یوسف ٹینگ ونان۔

"مے چھُ ظۅن ہیوٗ زِ یِنہٕ وٲلِس زمانس منز آسہ پرانٮ۪ن اُردوٗ وۅستادن ہٕندۍ پٲٹھۍ لفظُک صحت تہٕ سواد وُچھنہٕ خٲطرٕعٲرفن کلام تہ آگرُک نیب ژھانڈنہٕ خٲطرٕ ورتاونہٕ یوان"۔

﴿راش ص نمبر173 نوم شعر وُچھِو نمونہٕ رٔنگۍ

چھا گبٮ۪ن ہٕندۍ پٲٹھۍ روزان شیرِ نر                                
لولہٕ
پیالن کو ت بے خۅد تھوونکھ
کھارِ
سر دارس یُسُے سردارسُے                                      
شیرِ
لٲگِتھ شیر یودوَے چھُکھ دلیر
سوونکھ
ہاپت اَشُد زن کھیوونکھ

٭٭٭

کتاب نامہٕ:-

1۔ راش۔ محمد یوسف ٹینگ         2 ۔ آلو﴿فایل﴾ ،محکمۂ انفارمیشن کشمیر       3۔ شیرازٕ ، اکتوبر1995ءکلچرل اکاڈمی                     4۔ فکرو فن۔ریسرچ کونسل 1990ئ   5۔ مرزا عارف سائنٹسٹ پویٹ۔ ریسرچ کونسل 1990ئ      6۔ انہار۔ کٲشُر شعبۂ کشمیر یونیورسٹی                        7۔ گُلریز۔ فایل، کشمیر بزمِ ادب    8۔ کٲشر ادبُک توٲریخ۔ پروفیسر شفیع شوق ، ناجی منور 9۔ احوال نامہٕ۔ کٲشُر شعبۂ کشمیر یونیورسٹی سرینگر۔      10۔ کَہہ ؤٹ۔ رحمان راہی

کامِلنہ لہجہ کُے مُدُر ایقرار

امین کامل صٲب ٲسۍ گۅڈٕ گۅڈٕ اُردو پٲٹھۍ لیکھان ۔ پانہٕ چھِ ونان زِ "گۅڈٕ گۅڈٕ اوسُس بہٕ اُردو پٲٹھۍ لیکھان۔ فراق گورکھپوری تہٕ علامہ اقبالؒ سُند اوس مے سٮ۪ٹھاہ اثر  1947ء تام یُس کلام مے لیوکھ سُہ گوو ضایہ۔ مہجوراوس مے سخ کو شِش کران زِ ژٕ لیکھ کٲشر ۍ پٲٹھۍ۔مے زَن اوس نہٕ رۅے سمان ۔ییلہ مہجور صٲب 1952ءمنز رحمتِ حق سپُد، مے لیوکھ تٔسۍ پٮ۪ٹھ گۅڈنیُک مرثیہ۔ بہٕ کورنس نہٕ کٲشرِس منز کٲنسہ أکۍ متٲثر۔ یوتام نہٕ کٲنسہ ہُند نظریہ مے ہٹہ وَسہ بہٕ کرنہٕ ہنگتہٕ منگہٕ قبول۔ غزلس منز  کور مے حقیقت پسندی ہٕندِس دورس منز روٗمٲنی رنگ اختیار ۔ مے کور روایتی مزازٕترک، یہ رنگہٕ ر وٹ پتہٕ ساروٕ ے "۔             ﴿ آش ،جِلدٕ 1 شُمارٕ 5 ۔ 2006ئ﴾۔

اللہ تعالیٰ ہن چھے کٲمل صٲبس بے پناہ تخلیقی صلٲحیژ عطا کرِمژٕ۔ تہنز یِمہٕ صلٲحیژٕ آیہ کٲشرِ ادٕبکہ توٲریخ کس أکِس خاص موڈس پٮ۪ٹھ اَتھ زبٲنۍ تہٕ ادبس بکار۔ اَتھ زمانس منز اوس باصل ٲحیت شاعرو علاوٕ عٲلِم تہٕ زباندان نثر نگارن ہُند سخ ضروٗر تھ ۔أسۍ چھِ وُچھان زِاَتھ زمانس منز اوس خالٕے کانہہ ادیب یا شٲعر ،یُس اکی صِنفہ ہٕندِس ٹِکلس سٍتۍ گٔنڈِتھ آسہ ہا ۔ یۅہے اوس ویلہٕ تہٕ وق ییلہ کٲشِر زبٲنۍ  تہٕ ادبن وۅتھٕ واشرس کُن قدم تُلن ہیوت ۔ شخصی راج اند واتہٕ نس سٍتۍ اوس پرٮ۪تھ کانہہ چیز تبدیلن ہُند تہٕ نورُک طلبگار ۔ نٔوۍ مضمون ،نٔوۍ موضوع تہٕ نِو صِنفہٕ گٔیہ متعارف۔ ادیبن تہٕ شٲعرن پیوو پرٮ۪تھ کینہہ پانے بنُن۔ پرٮ۪تھ کٲنسہ وہرٲوۍ پرٮ۪تھ صِنفہ کُن اتھٕ، افسانہٕ نگارس پیوو شٲعر تہ بنُن تہٕ نٲفذ تہ۔ شٲعرس پیوو محقق تہ بنُن تہٕ ترجمہٕ کار تہ۔ ترجمہٕ کارس پیوو ترتیب کار تہ بنُن تہٕ ناول نگار تہ۔کٲشرِ ادبٕچہ لرِ لٲج پرٮ۪تھ کٲنسہ سیر سیر تہٕ لٔر گٔیہ تھدان۔ وارٕ وارٕ ہیوت واریِہو أکۍسٕے ادبی صنفہ کُن ژ ور توجہ کرُن۔ کینژَس کالس اَتھ لرِ سیر سیر پِلونہٕ خٲطرٕ نٮ۪مہٕ ڈکھِچ کٲم دِنہٕ پتہٕ پھٹرٲوۍ کینژَو قلم تہ۔ اماپوز کینہہ بالہٕ ہزٲرۍ چھِ تِم تہ یِمو پرٮ۪تھ صِنفہ ہٕندِ فنُک پٲز لیہ ا ون۔ زبٲنۍ تہٕ ادبس معیارٕ ، مٮ۪قدارٕ تہٕ اعتبارٕ رٔنگۍ تھٮ۪کُن لایق پوشہ وُن ہُرٮ۪ر کور۔ تِتھۍ کارنامہٕ أنِکھ بعمل زِ خاص امتیاز پرووُکھ۔ یِمن بالہٕ ہزارٮ۪ن منز چھِ بقولِ خود"مردِ زبان " تہٕ" غزلہٕ بنجٲرۍ" امین کٲمل تہ اَکھ۔ یِم سانٮ۪ن پیش رو روایت ساز ادبین تہٕ شٲعرن ہٕنزِ تگہ منز تھزرس پٮ۪ٹھ جاے پرٲوِتھ چھِ۔

حٲرانٕے چھُ گژھان انسان یہ وُچھِتھ زِ کٲمل صٲبنس ذٮ۪ہنہٕ پِٹارس منزکیا کیا چھُنہٕ اوسمُت ۔ تہنز تخلیق کٲریہ ہٕنزِ کوندِ ہُند جوش روٗد الہٕ پلہٕ نٮ۪صف صٔدی کھۅتہٕ تہ زیادٕ کالس قٲیم۔ مرد یادمِس کٲمل صٲبس چھُ علمی تہٕ ادبی دم خم یتھ وٲنسہ منز تہ موجود، وۅں گوو شعر گوئی چَھکھ وۅنۍ ترک کٔرمٕژ۔ ییمیُک گۅڈٕ"مَس مَلر" شعرٕ سۅمبرن چھے تہٕ لٮ۪کھُت "یِم میٲنۍ سۅخن" شعرٕ مجموعہٕ۔ کٲشرِ زبٲنۍ تہٕ ادبُک کانہہ شعبہٕ چُھنہٕ یتھ منز نہٕ تہنزِ کامہ ہُند حوالہٕ لٲزمن دیُن چھُ پٮ۪وان۔ آیندٕ تہ روزِ یہ سلسلہٕ جٲری۔ أہنزن شایع شُدہ کتابن ہُندفہرست چھُ واریاہ زیوٗٹھ:

1۔ شعرٕ مجموعہ:

1۔ مس مَلر﴿1955ئ﴾ ۔          2۔ لوٕتہٕ پروٕ﴿1965ئ﴾ ۔                       3۔ بییہ سُے پان﴿1967ئ﴾      4۔ پٔدِس پود ژھاے ﴿1972ئ﴾     5۔ یِم میٲنۍ سۅخن﴿2007ئ﴾ ۔

2۔ تحقیق تہٕ ترتیب:

1۔ صوفی شٲعر ، ترےے جلدٕ﴿65-1964ئ﴾۔     2۔نوٗر نامہٕ﴿1966ئ﴾   3۔ کٲشرِ اَس ترایہ ِ﴿1982ئ﴾۔  4۔ روٗحٲنی فلسفہٕ﴿1984ئ﴾۔        5۔ کُلیاتِ حبہ خاتون﴿1995ئ﴾۔  6۔مہجورنٮ۪ن بونٮ۪ن تل﴿1999ئ﴾۔

3۔ ترجمہٕ:

1۔ بہا اللہ تہٕ نوو زمانہٕ﴿1957ئ﴾ ۔         2۔ زٕژٕ ہلم﴿1974ئ﴾     3۔ ڈاک گھر ۔     4۔ رازٕ تہٕ رٲنۍ           

4۔ سٹیج ڈراما:

1۔ حبہ خاتون۔    2۔ زِنۍ مزوٗر۔           3۔ پگاہ چھُ گاشدار ﴿1تہٕ 2ڈراما چھِ شایع گژھن﴾

5۔ اوپیرا:         

 1۔ بومبر تہٕ لولٕر ﴿ریڈیو پٮ۪ٹھٕ نشرسپُدمُت﴾۔

6۔ ریڈیو ڈراما:

1۔ دٮ۪د رٲنۍ ۔           2۔ مۅمہٕ سٕژ ﴿ریڈیو ڈراما چھ تِمو واریاہ لیکھۍمٕتۍ ، یِم نہٕ چھاپ سپدیمٕتۍ چھِ﴾۔

7۔ اچھر زان﴿1966ئ﴾

8۔ تحقیق تہٕ تنقید:

1۔ جوابن چھُ عرض ، جلِدٕ 1﴿1999ئ﴾۔    2۔ جوابن چھُ عرض جِلدٕ 2﴿ ء﴾۔   

9۔ ناول : گٹہ منز گاش﴿1958ئ﴾۔

10۔ افسانہٕ : کتھِ منز کتھ ﴿1966ئ﴾۔

افسانہٕ نگٲری منز چھُ کٲمل صٲبس پنُن خاص ڈِکشن ۔ مُلہٕ تلہٕ یودوَے تِم شٲعر چھِ مگر افسانن منزچھکھ نہٕ شٲعری کٔرمٕژ، یاں زِ افسانہٕ لیکھان لیکھان چھکھ نہٕ شعرٕ زبان ورتٲومٕژ۔ مُنٲسب لفظٕ ورتاو تہٕ سوت سوت لطیف طنزٕ چھُ أہندٮ۪ن افسانن ہُند گہنہٕ۔ تِمو دِتۍ" جانہٕ بِژ، عظیم بب ، عشہ پھیٲر، رمض مام،غلام خان ہوۍ لازوال کردار سٲنِس افسانوی ادبس۔ "سوال چھُ کلُک" ہیوٗ افسانہٕ چھُ پرن وٲلِس ہبرٕ کارن کران۔ بقول تِہندِ "یُس خیال نہٕ مے شعر بنیوو تتھ بنووم افسانہ ٕ"﴿کتھِ منز کتھ، سرنامہٕ﴾ ،اماپوز بقولِ مشعل سلطانپوری "کٲمل چھُنہٕ افسانہٕ نویس کٲملس نِش شٲعر کٲملس وۅٹہ کڈنہٕ دِوان"﴿شیرازٕ مارچ ، اپریل 1989ءص  32 ۔ "کۅکر جنگ" چھُ وُنہ تہ اختر محی الدین سٕندِ "دندٕ وزُن "افسانٕکۍ پٲٹھۍ بے مثال تہٕ لاجواب افسانہٕ ، یُس پرٮ۪تھ زمانس منز ہوُے مقبول روٗد تہ تہٕ روزِ۔

کٲمل صٲبن چھے پنہٕ نٮ۪ن کینژن کالہٕ باجن ہٕندۍ پٲٹھۍ زبان سٲزی ہٕنز فٲیدٕ مند کٲم تہ انجام دِژمٕژ۔ ادبی کامٮ۪ن دوران ٲس تِمن زبٲنۍ ہٕنز تنگ دامٲنی بُتھِ پٮ۪وان، بامَے تخلیق آسہ ہا ، ترتیب یا تحقیق ،تِمن ٲسۍ نٔوۍ لفٕظ ژھارٕنۍ یا نایٲبی ہٕندِس صورتس منزتھُرٕنۍ پٮ۪وان ۔نٔوۍ لفظ تہٕ اصطلاح گٔرِتھ ٲسۍ تِم زبٲنۍ تہٕ ادبٕچہ ترقی باپتھ نَوِ وَتہٕ سوتراوان۔ ضروری  چھُنہٕ تُہنزِ پرٮ۪تھ کتھِ سٍتۍ آسہ اتفاق مگر یتھ کتھِ سٍتۍ کرِ نہٕ شاید کانہہ تہ اختلاف زِ یہ کینژھاہ تِمو کور تہ کورُکھ أکِس کٲمل وۅستہٕ کارٕ سٕندۍ پٲٹھۍ أکِس قدیم ادبی لرِ نٔوۍ پور ہُرراونہٕ باپتھ، درٮ۪رکرنہٕ باپتھ، پرانٮ۪ر رژھراوان رژھراوان نوٮ۪ر دِنہٕ باپتھ تہٕ وُسعت دِنہٕ باپتھ۔ اَمیُک مطلب چھُنہٕ زِ پرٮ۪تھ کینہہ کور تِمہٕ وٕے یوت ، تہندٮ۪و کینژَو کالہٕ باجوتہ دیُت أتھۍ مقصدس سگ بلکہ  بعضو کٔرۍ بعضے معاملن منز أہندِ کھۅتہٕ تہ جکھ جِتن، اکھ کتَھ چھے ضروری  زِ اَسہ پزِ پنہٕ نٮ۪ن پیش رَون ہُند شُکر گُذار روزُن زِ یتھ چیزس تِمو دَس تُل أسۍ چھِ تتھ وۅنۍ دل چھَل دِوان تہٕ مۅل مرتبہٕ مُشخص کرنٕچہ کو ششہ کران۔ کٲمل صٲبَن محققانہٕ اندازٕ چھُ عٲلمانہٕ ۔ تحقیقی مٲدانس منز حٲران کرٕوُنۍ انکشاف کٔرِتھ تُل تِمو نوٮ۪ن بحثن دَس۔ از برونہہ واریاہ کال و ون تِمو عبدالاحدزرگر صٲبنہ شٲعریہ زِ یہ چھے Horror poetry، یتھ پٮ۪ٹھ وۅنۍ وۅنۍ نَوِ سَرٕ سوچنہٕ یوان چھُ ۔ کُلیاتِ حبہ خاتون آیہ بازر تہٕ اَتھ منز اوس پنُن مخصوص تحقیقی انداز ورتٲوِتھ کٲمل صٲبَن أرنہ مالہ ہٕندِس وجودس اِنکار کورمُت۔ یہ کُلیات گٔیہ  1995 منز شایع ، دنیاہن وُچھ زِ کٲمل صٲب چھُ اَتھ منز ونان زِ أرنہ مالہ ہُندوجود چھُ فرضی ، اماپوز پرن وٲلۍ گٔیہ زَن یژکالاہ روٗزِتھ ہیوٗ۔ گوژھ تہٕ اتہ پٮ۪ٹھ زبردس بحث و ۅتھُن ، نجی مجلسن منز آسہٕ سۅسرِ گۅسرِ سپدان مگر یژ کالاہ تُل نہٕ قلم کٲنسہ ، اَتھ اوس میانہ خیالہٕ کٲمل صٲبُن زوردار تحقیقی اندازے ذمہٕ دار۔یوتام  2004ءمنز ارجن دیو مجبورن "أرنہ مال "  کتابٕچہ شایع کور یتھ منز کٲمل صٲبنٮ۪ن سوالن جواب دِنہٕ آمٕتۍ چھِ تہٕ محمد یوسف ٹینگن صٲبن تہ شش رنگ کتابہ منز جواب لیوٗکھ ۔ اَمہ برونہہ پہن اوس " آلو " رسالس منز ناجی منورن کٲمل صٲبُن استدلال زیرِ بحث اونمُت ۔ بَس اَمہ بحثُک چھُ یی گۅڈ تہٕ یی ا ند۔ "جوابن چھُ عرض کتابن منزچھِ کٲمل صٲبن وارٕیہن تحقیقی تہٕ تنقیدی معاملن پٮ۪ٹھ بحث تُلۍمٕتۍ مگر از تام زنتہٕ سنیاوُے نہٕ کانہہ یِمن معاملن ، کٲنسہ نہ کور کُنہ پٮ۪ٹھ اعتراضٕے ،نہ تقاضے تہٕ نہ بحثٕے۔

1958ءمنز آیہ کٲمل صٲب کلچرل اکاڈمی منز کٲشرِ زبٲنۍ ہٕندۍ کنونیئر مقرر کرنہٕ ،پتہٕ بنے یہ ایڈیٹر۔1979ءمنز سپٕدۍ اَمی عہدٕ پٮ۪ٹھٕ سُبکدوش ۔اَتھ سٲرۍسٕے وقتس دوران روٗدۍ سون ادب تہٕ شیرازٕ ترتیب دِوان۔ دۅنوٕے رسالہ ٕ وٲتۍ تھٔدِس معیار س تام۔ تیز بین تہٕ باریک بین ایڈیٹر سٕندۍ حٔثۍیتہٕ کرِ تِمو کینہہ رٕژٕ ریوایٔژ قٲیم۔ مثالے زیادٕ کھۅتہٕ زیادٕ لیکھن وٲلۍ نثر نٔویسی کُن پھرٕنۍ۔ تنقیدس تہٕ تحقیقس کُن ذمہ دارانہٕ پٲٹھۍ ظۅن دِیُن۔ غٲر معیٲری چیز شایع نہ کرٕنۍ۔اَکھ اہم کتھ چھے یہ تہ زِتِم ٲسۍ نہٕ کٲنسہ تہ نو آموز سُند مضمون یا نظٕم بیترِ ہتنہٕ مِتہٕ ژھۅٹس منز دٲرِتھ دِوان۔ لِکھٲرِس ٲسۍ ناد دِتھ اَنان، رٕتۍ رٕتۍ مشورٕ دِوان ، تمِٔس سٍتۍ کتَھ باتھ کران،تمِٔس حوصلہٕ دِوان ،اَدٕ ژورِژورِ پھرِ کیازِ پییہ ہے نہٕ اَکُے چیز شیرُن۔تَھپھ ٲسۍ نہٕ تُلان یوتام نہٕ سُہ چیز ٹارِکھسُن لایق بنہ ہا۔ یِتھٕ پٲٹھۍ اوس لیکھن وول مٮ۪حنت کران، مطالعہٕ کران تہٕ لیکھنہٕ وِزِ احتیاط ورتاوان۔ نوم حرف لیکھن وٲلِس سٍتۍ چھُ کٲمل صٲبن واریاہہ پھِرِ یتُھے سلوٗک کورمُت۔ تُہنزِ ایڈیٹری ہٕندِس زمانس منز آیہ شیرازٕکۍکینہہ خصوٗصی نمبر شایع کرنہٕ، یِم از تام تہ پوٗرٕ ادبی دستاویز چھِ ما ننہٕ یوان۔ یِمو سٍتۍ و وتھ بوزوے تہٕ ذمہٕ دارانہٕ تنقیدس تہٕ تحقیقس دَس۔ مثالے نظم نمبر ،افسانہٕ نمبر ، ڈراما نمبر، لولہٕ مثنوی نمبر، جنگ نامہٕ نمبر، سون ادبُک زبان تہٕ ادب نمبر، کٔشیرنمبر۔تِمو چھِ یِمن نمبرن ہٕندٮ۪ن سرنامن منز واریاہ اہم تنقیدی تہٕ تحقیقی نۅکتہٕ ویژھنٲوۍمٕتۍ ، یِتھٕ پٲٹھۍ کٲمل صٲبٕنۍ افسانہٕ نویسی ٲسۍ تن یا تحقیق کٲری تہٕ تنقید نگٲری ، پرٮ۪تھ معاملس منزچھُ تِمن پنُن خاص انداز تہٕ لہجہ۔ 1979ءمنز ییلہ تِم کلچرل اکاڈمی ہٕندِ ملازمتہٕ نِشہ شبکدوش گٔیہ، تمام ادیبن تہٕ شٲعرن سوٗزُکھ یہ خط ،یُس از تہ ادبی کامٮ۪ن منز خلوٗص ورتاوٕنُک تہٕ انکسٲری ہٲوِتھ کٲمل صٲبنہ بجرُک عکاس چھُ:

جموں وکشمیر کلچرل اکاڈمی

شہیدگنج سری نگر

مکرمی آتش صٲب

بہٕ سپدُس یُکم مارچ 79 ءکلچرل اکاڈمی ہٕنزِ ملازمتہٕ نِشہ رٹایر۔ تِمن تمام حد بندی ین اندرتہ، یِم أکِس سرکٲرۍ تہٕ نیم سرکٲرۍ ادارس وِہاطہٕ کٔرِتھ چھِ آسان، کٔرمے پننہ مقدوٗرٕ موجوب کٲشرِ زبٲنۍ ، ادبس تہٕ ادیبن کِہو شٲعرن ہٕنزخدمت۔ بہٕ چُھس تِمن تمام دوستن ہُند سۅ دِلہٕ شُکر گذار یِمو مے ہر وِزِ پنُن اتھٕ بندُت آیُت تھوو تہٕ ہرگاہ مے اکاڈمی اندر کانہہ رٕژ رٮ۪وایتھ قٲیم کٔر، سۅ چھے پٔزۍ پٲٹھۍ تُہندے دیُت تہٕ یہ کینژھا تتھ کامہ اندر کوتٲہی روٗز سۅ چھے میانہ فِکرِ تہٕ علمی ویژھیہ ہُند نتیجہ۔

مے چھے وۅمید زِاکاڈمی اندرٕ نیرتھ تہ مٔشراون نہٕ مے یِم فن کار دوس تِکیازِ تِمن سٍتۍ چُھ اَکھ دِلی رشتہٕ پٲدٕ سپُدمُت یُس میانٮ۪ن نظرن منز سٮ۪ٹھاہ پایدار تہٕ پوشہ وُن چھُ۔

بہٕ چُھس بییہ اکہ لٹہ تمام دوستن ہٕندِ محبتُک تہٕ اَتھٕ بندتیُک شُکریہ ادا کران تہٕ یژھ پژھ تھاوان زِ میانہ جایہ یُس کانہہ تہ ییہ تس تہ کرن سُے اَتھٕ بندُت تہٕ سُے محبت۔
﴿امین
کامل﴾

ایڈیٹر شیرازٕ

کٲشرِس ادبی صحافتس منزچھُ نیب رسالس اکھ خاص مقام حٲصِل۔ اَمیُک گۅڈنیُک شُمارٕ دراو اکتوبر 1968ءمنز۔ 1971ء کِس اکتوبرس تام درایہ اَمِکۍ17  شُمارٕ۔ کٲمل صٲب ٲسۍ اَمِکۍبٲنی کار تہٕ ایڈیٹر تہ۔ سرکٲرۍ مُلٲزِم آسنہٕ سبہٕ اوس پرٮ۪تھ شُمارس منز اوہُند ناوبٲنی کار سٕندِ حثۍیتہٕ درٕج آسان۔ انیس الرحمان صٲب ٲسۍ مدیر ، پرنٹر تہٕ پبلشر ، فاروق مسعودی صٲب ترتیب کار تہٕ غلام فاطمہ محبوب مددگار۔ پوٗنژمِس شُمارس منز چھ محمد یوسف ٹینگ ، علی محمد لون ، محمد احمد اندرابی تہٕ غلام رسول کٲتِب رسالٕکۍ مشیر تہٕ مدد گار ہاونہٕ آمٕتۍ۔ شییمہ شُمارٕ پٮ۪ٹھ چھِ بییہ یِم ناو حذف آمٕتۍ کرنہٕ۔ أمۍ رسالن کور اکھ نووُے ہوانوا پٲدٕ ، نٔوۍ لیکھن وٲلۍ درایہ بدِتہ تہٕ کھتہ تہ۔ یہ دٔپۍ زِ تہ اکھ پلیٹ فارم سپُد مُہیا۔ نیبُک معیار ترتیب تہٕ گیٹ اَپ اوس سٮ۪ٹھاہ جان۔ نہہ دَو، کہہ وچہ سام، سوالنامہٕ بیترِ عنوانس تحت چھپن وٲلۍ موادن کور لیکھن والٮ۪ن منز ہلچل پٲدٕ۔ نیب بنیوو تتھ وقتس منز کٲشرٮ۪ن ادیبن ہٕنز آواز۔ طرفاتو پٮ۪ٹھٕ وٲتۍ نیبس تعریفی خط:

۱۔ مرزا عٲرفن لیوکھ کٲمل صٲبس "ژٕکۅسہٕ پھیٹ چھُکھ۔ نہٕ کٲماہ کٔرِتھ تعریفن لایق۔ یہ ہیکہ ہکھ ژٕے کٔرِتھ۔ بییہ کٲنسہ ہُند چُھنہٕ یہ جبروٗت ﴿نیب شُمارٕ 2 ، ص 35﴾۔

۲۔ غلام رسول سنتوشن لیوکھ کٲمل صٲبس۔ " وۅنۍ ونتہٕ سیودُے غرض کیا چھُے ، یازِ آیندٕ گژھِ نہٕ کٲنسہ تہ کٲشُر رسالہٕ کڈنٕچ صوٗرتھ روزٕنۍ۔ یُتھ معیار قٲیم کرُن گژھِ واریاہ کروٗٹھ ۔ اَدٕ سا خدا گٲلۍ نَے یہ نوو بدِتھ نوو راونہٕ خٲطرٕ"۔﴿نیب شُمار ٕ 2 ص 63

۳۔ بنسی نِردوشن لیوکھ۔" اگر چہ وق چھُنہٕ میلان لیکھٕ  پرِ سنمب مگر نیبچ کٔشِش تراوناوِ دَہ کامہ پتھر تہٕ قلمَس ہاوِ کاکد س کُن وَتھ۔

﴿نیب شمارٕ2 ص 63

۴۔ مظفر عازمن لیوکھ :

کٹھ کشہ دیتتھم سونتُک نیب کِتھٕ باوے کوتاہ خۅش گوس                                                 اَتھٕ ر وٹ کروُنہ بخ پھولۍنے کتھٕ رٔٹۍ اوسُم تُلمُت توس

۵۔ کراچی پٮ۪ٹھٕ لیوٗکھ غلام احمد نازکۅلگٲمۍ __"نیب ووت۔ ڈٮ۪کس کورمس میوٗٹھ۔ واریاہ نیب ٲنِن ۔﴿نیب ۷﴾۔

ترتیب تہٕ موادکہ نورٕ کنۍ ،لیکھن وٲلۍ اکھ أکِس نکھٕ اننہٕ کِنۍ تہٕ ادبی دلوانزُل لاگنہٕ کِنۍ﴿یتھ منز یَسلہٕ پٲٹھۍ ادیب شٲمل سپدان ٲسۍ﴾ روٗد نیبُک امتیاز قٲیم ، اَتہ ِ دراو کٲمل صٲبُن مخصوص انداز، مخصوٗص لہجہ نُمایاں۔ وۅنۍ چھُ جوٗن 2005ءپٮ۪ٹھٕ کٲمل صٲبُن فرزند منیب الرحمان نیب بییہ امریکہ پٮ۪ٹھٕ شایع کران۔

یوتام کٲمل صٲبنہ شٲعری ہُند تعلق چھُ ، سَہ روز وُہمہ صدی ہٕندِس شییمِس تہٕ سٔتۍ مِس دٔہلس دوران کُلہُم کٲشرِس شعری منظر نامَس پٮ۪ٹھ حٲوی۔ واریاہ لیکھن وٲلۍ گٔیہ یوٗت متٲثر بلکہ  مرعوٗب زِ تہندِس طرزِ بیانس پتہٕ پتہٕ پکُن زونکھ یہ دٔپۍ زِ تہ سعادت ۔تنقید نگارو دیُت أہندِس کلامَس دَل۔ کٲمل صٲبن لیچھِ نظمہٕ تہ تہٕ غزلہٕ تہ۔ اماپوز پرٮ۪تھ کٲنسہ دِژ أہندِس غزلس کہہ ؤٹ۔ کانہہ تنقید نگارا چھُنہٕ یمٔۍ نہٕ أہندِس غزلس منز لہجُک نوٮ۪ر تہٕ رٮ۪وایتٕچ بغاوت ژینۍ تہٕ ہٲوِتھ دِژ۔ محمد یوسف ٹینگ چھِ گۅڈنِکۍنقاد ، یِمو کٲمل صٲبنہ لہجُک نوٮ۪ر بدِ کوڈ تہٕ بییہ سُے پان"شعرٕ سۅمبرنہ منز درٕج کٲمل صٲبنہ شٲعری ہٕندِ لہجہ چہ خصوٗصۍ یٔژ الگ کٔڈِتھ دِژٕ۔ ٹینگ صٲبن اوس لیوکھمُت زِ کٲمل صٲبُن لہجہ چھُ واریہن لہجن ہُندمرکب ، بے بٲکی خۅد اعتمٲدی ۔ گونژھِ تٔلۍ اسنُک زہرٕ بورُت انداز، لفظن ہُند وریبہٕ معنہ، مزاح ، مکالمُک انداز، سرون غم ، شہر آشوب بیتر چھِ کٲمل صٲبُن لہجہ تعمیر کران۔ کٲشرِ ادبُک توٲریخس منز لیوکھ پروفیسر شفیع شوق تہٕ ناجی منورن:

" امین کٲمل چھُ کُنہ تہ اختلافہٕ ر وس نَوِ غزلُک پیغمبر۔ نوو امین کٲمل آو 1915 ءمنز "لوٕ تہٕ پروٕ " شعرٕ سومبرن ہٮ۪تھ۔ کٲملٕنہ غزلٕکۍ مقبول گژھٕ نٕکۍ چھِ خاص کٔرِتھ زٕ اہم وجہ، اکھ یہ زِ تمٔۍ کورکٲشُر غزل روٲیتی زبٲنۍ نِش آزاد، د ویم یہ زِ تمٔۍ کرِ نوِ بحرٕ استعمال۔ کٲمل چھُ لفظن ہٕندۍ سٲری معنے نظرِ تل تھٲوِتھ زبان غٲر روٲیتی طریقہٕ ورتاوان۔ زبٲنۍ ہٕندٮ۪ن سارِنٕے اصوٗلن تہٕ قٲیدن ہُند احترام کٔرِتھ چھُ کٲمل لفظن تخلیقی اندازٕ ورتاوان۔زنتہٕ تٔمِس لفظس لفظس پٮ۪ٹھ اختیار چھُ۔ ییمہ آیہ خۅش کرٮ۪س تمہ آیہ ورتاوٮ۪کھ۔ پرٲنۍ، نٔوۍ تہٕ بنٲومٕتۍ لفظ چھِ خاص ورتاوٕ سٍتۍ اکھ منفرد لہجہ بارسس انان، یتھ أسۍ وثوٗقہٕ سان کٲملن لہجہ ؤنِتھ ہٮ۪کو۔ طنزٕ چھُ کٲملنس غزلس منز حقیقتھ وُچھنُک تہٕ ژینہٕ نُک سٮ۪ٹھٕ ہے کامیاب ذٔرۍیہ۔﴿ کٲشرِ ادبُک توٲریخ ، چھاپ 1978ء۔ص 196﴾۔فٲضِل تنقیدنگارن ہٕنز اَمہ رایہ پتہٕ برابر26  ؤری گٔژھتھ تہ چھے تہنزٕ یہ راے قٲیِم۔ پروفیسر شوق صٲب چھِ ونان۔ "غزل چھُ کٲملس نِش اکھ تجربہٕ گاہ۔سُہ چھُ پننہ مرضیہ اَتھٕ نوٮ۪ن سرحدن ہٕنز تریش چاوناوان۔روایتی لفظتہٕ بجایہ ورتاوٕچہ زبانہ ہُند وۅپزاو ، روایتی سنجیدگی بجایہ گُفتارُک بے پھروک لہجہ، قٲفین ہُند نوٮ۪ر ، نوِ بحرٕ،نٔوۍ زُحاف تہٕ لُکہٕ شٲعری ہٕنزن مٔشراونہٕ آمژن لَیَن ہٕنز بازیٲبی چھے کٲملٕنٮ۪ن غزلن پرانہ کیو نوِ شٲعریہ نِشہ اکھ منفرد تہٕ بدوٗن رنگ دِوان"﴿انہار غزلُک فن ،ص 161

پننہ غزل گوٗیی ہٕندِس منفرد لہجس متعلق چھِ کٲمل صٲب ونان

کٲملن لہجہ کٲشِرس بدلوو                                                         راے ظٲہر کران چھِ کم تامَتھ
کٲمل
چٲنۍ طرح کھٔتۍ عرشس                                                 غزلُک فن وُپھٕ ناوُن چھُے سا
کٲمل
یہ ونان چھُ بٔلۍ تہ باضے                                         تٔتھۍ حض چھِ ونان غزل جنابو
غزلہٕ
بنجٲرۍ یہ کٲمل چھُ دِوان نارٕ طرح                                               بختہٕ شٮ۪ہجٲرۍ لُکن پیمٕژ چھے نیہہ آبس منز
کٲملن
بوٗزِتھ طرح دار کلام                                                    سونچ پیوو بدلُن غزل خوانن تاں
دٮ۪و
کانہہ کٲمل بخشکھ رنگ                                                    اَسہ تُل خٲلِص لہجن دَس

کٲشرِ زبٲنۍ ہٕندِس ممتاز شٲعر، نقاد تہٕ گیان پیٹھ ایوارڈ یافتہٕ ادیب پروفیسر رحمان رٲہی صٲبٕنۍ راے چھے۔

"فارسی کیو اُردو آیہ کلاسکِل غزلٕچ مُروجہ ادبی زبان تہٕ اوسلوب بیان نظر انداز کٔرِتھ عام ورتاوٕچ زبان، روایتی اصولو ر وس طرزِ اظہار تہٕ کتھ باتھِ ہُند رسمہٕ ہین پاننیٲرۍ لہجہ پاننٲوِتھ یتھ لولہٕ باؤژ تہٕ طنز کٲر یہ نٲدِمُن غزل مازییو و تِمو لوب کٲملٕنہ دٔسۍ موضوعی اعتبارٕ زیادٕ وہراو ،مُشٲہدٕ حسابہٕ ژٔر مونوسی، واتنارٕکِنۍ مزید وُژھ ، رٔوِیہ حسابہٕ فریب شکنی ، پردٕ چٲکی تہٕ بے خوفی تہٕ لہجہ ِ کہ حسابہٕ گونژھِ تٔلۍ اَسُن۔ کٲملن پروو امتیاز جدید کٲشرِ نظمہ ہُند زایُن وُچھان وُچھان۔ جدید آگہۍ یہ ہُند اندرٕ نیبرٕ سَرٕ گژن وول ہوا چھاوان چُھوان تہٕ ناصِر کاظمی سٕندِ قبیلٕکۍجدید اُردوغزل بوزان پران کالہٕ پگاہ درپیش یِنہٕ وٲلۍ مختلف نوعن ہٕندۍواقعات ، وٲرۍداتھ دۅہ دٮ۪نچہ تازٕ باس زبٲنۍ تہٕ طنز کار لہجہ دٔسۍ توجہ طلب بناوان بناوان حالاتن ہٕنزِ تبدیلیہ ہُند ظۅن ، روایتی لب و لہجہ کہ نالگہٕ ہار ِرُک نیب تہٕ اَمہ ظۅنہٕ تہٕ نتیجہ برکٔژ کٲشِرس غزلس منزروایتی کیو غٲر روایتی موضوعن نٮ۪سبتھ بظٲہر غٲر شٲعرانہٕ لب و لہجہ دٔسۍ اکھ زیادے پانہٕ نیٲرۍ تہٕ بے پھرک اسلوٗب بیان پھانپھٕ لاونس منز یُس کار کٲملن کور تمہ کِنۍ بنیوو تسُند غزل زیرِ تبصرٕ سفرُک اکھ نون پڑاو۔ واقعہ چھُ یہ زِ بییو کتھَو علاوٕ بنیوو کٲملن غزلہٕ اوسلوٗب تہ تسٕندِٮ۪ن ذی حٮ۪س ہمکالن وقتُک پھیرٕ زیادٕ واضح پٲٹھۍ ژیننُک بٲعث۔ تہٕ فاروق نازکی تہٕ رفیق راز ہوٮ۪ن تمہ وقتہٕ کٮ۪ن واریہن نوجوان کٲشرٮ۪ن شٲعرن باسیوو حدٕر وس منہٕ مون ۔ تہٕ تَتھ سپٕز تہندِ دٔسۍ پٲروی تہ واریاہ"۔

﴿کٲشرِ غزلُک سفر کینہہ نٔنۍ پڑاو۔ انہار، غزلُک فن ص، ۶۱، ۵۱﴾

کٲشرِ غزلہٕ کِس أتھۍ پڑاوس پٮ۪ٹھ  ییلہ کٲمل صٲبُن نیب تہ پوٗرٕ جہارس تہٕ بہارس منز اوس کٔر پٔزی پٲٹھۍ واریہو نوجوان شٲعرو تہٕندِ "لہجٕچ " نہ صر ف پٲروی بلکہ  اَتھ دیتُکھ پنہٕ نٮ۪ن شعرن منز تھود ؤتھۍ ؤتھۍ داد۔ کینہہ مثالہٕ چھے حٲضِر۔ فاروق نازکی ٲسۍ 76-1975 ءمنز جرمنی منز۔ اَتی پٮ۪ٹھٕ سوزُکھ یہ غزل لیکھِتھ ،یُس 1976ءمنز شیرازٕکِس تُروٲہمہ جلدٕ کِس ترییمِس شُمارس منز شایع سپُد:

راتھ کٲمل مے وُچھُم خٲبۍ ،گٮ۪وان آو غزل                                       تارکن چوٗنہ جران ، زوٗنہ گندان آو غزل
بالہٕ
تنیتالہ پٮ۪ٹھن اوس بہتھ دَم دِتھ پٲز                                            کٲملن ناد دیتُس ، ژھالہٕ تُلان آو غزل
زانہ
کتَھ شایہ بہتھ اوس کُلٮ۪ن منز ژھٮ۪پھ دِتھ                                 صُبح دَم ووت تہٕ بے وایہ وُپھان آو غزل
پرژھ
تٔمِس یارِ حُسن گارٕ ژے ما سٲ وُچھتھن                                      نامہٕ دیتنم تہٕ وُچھم باشہ کران آو غزل
لوو
انہور بدن نار ژھٹان چھُم کۅچھِ منز                                                  چھِہہ وُٹھن سٍتۍ لجِس جمکہٕ دِوان آو غزل
ناز
بردارٕ ہرُد پوشہ مٔتِس مس سونتس                                                      پٔہۍ پنٕکۍ لالِ بدخشان جران آو غزل
پیر
پانژال تلُکھ نمبلہ اندر دیتہس دَب                                                  سٔنۍ وۅگٕنۍ چھٔتۍ کرِہنۍ کٍتۍ وُچھان آو غزل
سٲر۱
دٔرِیاوٕ یِمن یارٕ بلن ہُرِنے آے                                                   چانہ رفتارٕ مے نِش از تہ پکان آو غزل
﴿جرمنی
پٮ۪ٹھٕ﴾

فاروقس ون ژٹھ وۅنۍکتَھ    کٲمل نارٕ قلم ہٮ۪تھ آو
﴿فاروق
نازکی نیب  1969ئ﴾

نوزٕکن تُل غزل نوے لیہ از                                               کٲملٕنہ لہجہ کُے مُدُر اقرار
﴿رشید
نازکی﴾

چھِ شٲعر واریاہ اکھ دراو کٲمل                                                 امینس سٍتۍ شوٗبان ناو کٲمل
یہ د وپ سورگس اندر مہجورن صٲبن                            کران
غزلس عجب پٲراو کٲمل
ژے
چھُے پتہٕ پتہٕ پکان اکھ کاروانا                                 دۅہے اکھ تازٕ طرحا تراو کٲمل
مہ
گژھ غمگین مہ دَپھ تھاوٮ۪م نہٕ کانہہ پیوٗر         ژٕ کرتم راضیس تیلہ گراو کٲمل
﴿شیخ
رٲضی﴾

گگرِ کن زیٹھُے یہ غزل کٲملو مۅکلاو با
﴿غلام
رسول سنتوش﴾

رفیق گہے راز گہے گاہ بٮ۪گاہ کٲمل                                  دۅہے وُتٲشۍ خیالو تُجِم وُتل واوو
﴿رفیق
راز﴾

غزلس نوو رنگ بر سجود       نتہٕ حض کٲمل ییی شلکس
﴿سجوٗدسیلٲنی،
نیب  1969ئ﴾

کانچھے یوم بہ تہ وُنہٕ ہا طایِر                                                  کٲمل صٲبٕنۍ پٲٹھۍ غزل
﴿سید
مصطفی طایِر،نیب جون 1970ئ﴾

دِلداراکھنڈۍ پھُٹۍ غزلس                 زانہ خدا ونہ کیا کٲمل
﴿دِلداراموہن﴾

چھِ یِم اشعار میٲنی مُستند موزوٗن بامعنی                   ییِی نَے پژھ حریفا گژھ ژٕ پرِژھ کٲمل سخندانس
﴿شیر
علی مشغول﴾

حٲصِل کلام چھُ یِیی زِ کٲمل صٲبنہ منفرد لہجُک اقرار تہٕ اعتراف کور الہٕ پلہٕ سارِوٕے مگر یہ تہ چھُ پوز زِ یتھ زمانس منز نوجوان شٲعرو تہٕ لِکھٲرٮ۪و کٲمل صٲبنس لہجس تعریف کٔرۍ یا تتھ مٔتۍ مٔتۍ گٔیہ ۔ سُہ اوس تہندِ باپتھ پنٕنۍ پنٕنۍ شناخت قٲیم کرنُک تہٕ ادبی دنیاہس منز مقام پراونُک تلاش جٲری تھونُک زمانہٕ۔ تِمو نوجوانو منزٕ کور پتہٕ واریہو پنُن مخصوص لہجہ پٲدٕ، تِم گٔیہ وق گذرنس سٍتۍ سٍتۍ کٲمل صٲبنہ گرفت نِش آزاد تہٕ مخصوٗص اسلوٗب تہٕ لہجہ ہٮ۪تھ وٲتۍ تھزرن تام۔ پروفیسر مجروح رشید چھِ کٲمل صٲبنہ شٲعری متعلق بحث کران یتھ اہم نۅکتس کُن اِشارٕ کران زِ کٲمل صٲبنٮ۪و سارِوٕے ہمعصرو کورنہٕ تہُنداثر قبول۔ کٲملٕنٮ۪ن غزلن ہٕندۍ قافیہ چھِ عام طور محترک آسان۔ اَمہ قسمٕچ قافیہ بندی چھے تمٔۍ سٕندٮ۪ن غزلن منز تمٔۍ سُند آہنگ تہٕ لہجہ قٲیم کرنس منز پنُن مخصوٗص رول ادا کران۔ یہ چھُ پوز زِ کٲملن کور اکہ ِ نوِتہٕ جُداگانہ شعرٕ مزازک تجربہٕ تہٕ یہ چھُ اَکھ خۅددار تہٕ زخمی مزازٕچ آواز مگر یہ وَنُن چھُ پوٗٹھُے پہن باسان زِ تمٔۍ سٕندۍ واریاہ ہمعصر کیا لٔگۍتمٔۍ سُند مِزازٕ وُچھِتھ لٮ۪کھنہ ۔تمٔۍ سٕندٮ۪ن اہم ہمعصرن منزچھِ نادم تہٕ راہی ہوۍ شٲعر تہ شٲمل تہٕ یِمن دۅن شٲعرن ہُند کلامہٕ پٔرِتھ چھُنہٕ کُنہ تہ جایہ باس لگان زِیِمن ہٕندِس تہٕ کٲمل سٕندِس مزازس منزچھُ کانہہ واٹھ۔ یِم چھِ ترے مختٕلف آوازٕ تہٕ یہُند رٔوِیہ چھُ زبٲنۍ متعلق الگ الگ ۔ترینہٕ وے چھِ زبٲنۍ پننہ پننہ آیہ وارتاوان ،یٔمہ سٍتۍ یہُند مزازٕ بیون تہٕ بدوٗن چھُ سپدان۔ آ، یہ چھُ پزر زِ نوجوان شٲعر و منز ر وٹ کٲنسہ کٲنسہ کٲملن اثر"﴿عصری کٲشِرشٲعری ،ص 106,124

٭٭٭

پروفیسر مرغوب بانہالی

سنگِستانُک جوہَر

﴿ا﴾

زِنِس پٮ۪و ژٕنہ گٔژھتھ فۅلاد کارُن

پروفیسر مرغوب بانہالی چھُ اَسہ سارِنٕے وِیود ،اماپوز کمہٕ نٕے مرغوب شناسَن تہٕ تسٕندٮ۪ن مداحن کیوپرن والٮ۪ن آسہ پَے زِ أمِس شریف النفس مگر سخت جان تہٕ کاروا بالہٕ اپٲرۍ مِس بالہٕ ہزٲرِس کیا کیا پیوو ورزٕ واوس منز حیاتُک ژونگ دزوُن تھاونہٕ خٲطرٕ سرُن تہٕ زَرُن۔ مرغوب صٲبُن موٗلی ناو چھُ خوا جہ غلام محمد گیری، اُہند جنتی بابہٕ صٲب ،خوا جہ اسد اللہ جُوگیری، اوس اکھ خدا دوس ، خدا شِناس تہٕ خدا ترس مسلمان آسہٕ نس سٍتۍ سٍتۍ اکھ اوسودٕ حال تٲجِر تہ۔ مرغوب صٲبُن زاسنہٕ چھُ 5مارچ1937ء۔ أمۍ سُند لۅکچار گُذرٮ۪و ، اسٕنزِ زٮ۪نہٕ جایہ بونہٕ کو ٹ بانہالہ ، ہٲج بوانٮ۪ن[9] ہٕندِس تھدَم تھٔدِس واوٕ منزلِس منز۔ ماجہ ہٕنز پوٗرٕ شفقت ،تسُند پھٔرۍ پھاہ تہٕ ماجِنیار اوسُس نہٕ ڈٮ۪کس لیکھِتھ ، تکیازِ سَہ جنتی ٲس اَسٕندٮ۪ن موصمیارٕ کٮ۪ن دۅہن منزٕے یٔمہ عالمہٕ درامٕژ ۔ مرغوب صٲب اوس دٔہمہ جمٲژٕے پران زِ بابہٕ صٲب تہ سپدُکھ رحمتِ حق۔ مٲلِس ماجہ ہُند زیُٹھ گوبُر آسنہٕ مۅکھٕ پیوو لوہ لنگرُک وولہٕ بور أمِس موصوٗمس لاوٮ۪ن پھیکٮ۪ن پٮ۪ٹھ آدٕراوُن۔ میٹرک پاس کٔرۍتھٕے گو سُہ تعلیمہ ہٕندِس محکمس منز ٹیچر سٕندِ حثۍیتہٕ بٔرتی۔ بھدرواکِس ٹیچرس ٹریننگ سکو لس منزمیوٗل أمِس جفا کش تہٕ ذہین نوجوانس مرحوٗم غلام رسول آزاد ہوِس جوہر شناس مٲہرِ تعلیم تہٕ بہترین منتظم ، یُس پتہٕ ناظِم تعلیمات تہ اوس ، سُند ڈ وکھ تہٕ ڈکھ۔ أتھۍ زمانس منز سپدتیِ یہ کرن وٲلِس کرُن اوس زِ گۅڈٕ گۅڈٕ  آے مرحوم عبدالقدوٗس رساجاودٲنی صٲبس مرغوب صٲب وُچھِتھ سوٗرس منز زِتِنۍ لبنہٕ ، اماپوز پوٗرٕ کَہہ دِتھ لوب کۅہستانٕکۍ أمۍ کاہنَن[10]  سنگستانُک جوہر مرغوب بانہٲلی،تہٕ ڈولہٕ نس دستِ شفقت۔ اَدٕ اَمہ پتہٕ دِژ نہٕ مرغوب صٲبن زانہہ پوت نظر تہٕ شُکر چھُ زِ تسٕندِس قلمَس نہ لوگ زانہہ ہیُک تہٕ نہ تھکھ ! تسٕندِ لۅکہٕ چارٕکۍ تہٕ یاوٕنٕکۍ صبر آزماحالاتھ ٲسۍ نۅمن ہوِٮ۪ن شعرن منز باوَتھ لبان

مَہ کر گرند وٲنسہ ہٕندٮ۪ن حٲرۍثاتن                                   زِنِس پیوژنہ گٔژھتھ فۅلاد کارُن
ڈٮ۪کہٕ
تاپھ یخس بن مرغوبا                                                         تھیکہٕ ناوتھ شہرو گام پگاہ

گرُک لۅہ لنگر چلاونہٕ خٲطرٕ سرکٲرۍ نوکری دیانت دٲری سان انجام دِنس دوران پیووتس ڈوکن تہٕ ڈٕکرٮ۪ن پھیر ُن ، اتھ سٍتۍ سٍتۍ وہروون پنُن ژھور تہٕ چھون ہلم دسیاب علۍمہٕ آگرن برونہہ کنہ ، فارسی ، عربی، اُردو تہٕ انگریزی زبانن ہٕندٮ۪ن دسیاب آبہٕ چھوٗلن پٮ۪ٹھ گو علم تہٕ ادبُک پیپاس ہومراونہ، سٔنِتھ تہٕ سٔزِتھ لوگ نصٲبی تہٕ غٲر نصٲبی کتابن تہٕ علم و ادبہٕ کٮ۪ن شاہکارن ہر تر تُلنہ ۔ پرائیویٹ طور کورُن بی، اے تہ بی، ایڈتہ تہٕ فارسی زبٲنۍتہٕ ادبس منز ایم ۔ اے ، تہ۔ اہندِ ذہانتُک تہٕ مٮ۪حنتُک چھُ یہ اہم ثبوت زِ یِم سٲری امتحان کٔرِن اے گریڈس "Grade A" منز پاس۔ ہائی سکول ہیڈ ماسٹر تہٕ تحصیل ایجوکیشن آفیسر ہوٮ۪ن عۅہدن پٮ۪ٹھ کینژن ؤرۍین کٲم کرنہٕ پتہٕ گٔے تِم  1970ءمنز کشمیریونیورسٹی ہٕندِس فارسی شعبس منز بہ حیثیتِ لیکچرر۔الہٕ پلہٕ داہن ؤرۍین اتھ شعبس منز تدریسی تہٕ تحقیقی کٲم انجام دِتھ  آے یِم أتھۍ یونیورسٹی ہٕندِس منز ایشیاخٲطرٕ مطالعٲتی مرکز س منز ریڈر مقرر کرنہٕ ، 1986ءمنز بنیاے یِم پروفیسر تہٕ آے کٲشرِ شعبٕکۍ سربراہ مقررکرنہٕ۔ فارسی شعبس منز کٲم کرنس دوران آو یِمن" شاہمیری دورس منز فارسی زبان تہٕ ادب" نٲوۍ عٲلۍ مانہٕ تحقیقی مقالس پٮ۪ٹھ پی ،ایچ ، ڈی عطا کرنہٕ۔ یونیورسٹی منز مختٕلف سوتھرٮ۪ن پٮ۪ٹھ کٲم کرنس دوران کٔرمرغوب صٲبن وارٕیہن سکالرن پی،ایچ ،ڈی یا ایم، فِل خٲطرٕ مقالہٕ تیارکرنس منزاِنتہٲیی ہمدردی ، شفقتہٕ تہٕ جانفشٲنی سان رہنمٲیی ۔ أہندٮ۪ن طٲلبِ علمن منز چھِ اکثر علم تہٕ ادبٕکِس مٲدانس منزپنٕنۍ پرزنتھ پراونس منز یٔژ پٲٹھۍ کامیاب سپٕدۍ مٕتۍ۔ مرغوب صٲب روٗدۍ تھدٮ۪ن عٔلمی، ادبی ، سمٲجی سرکٲرۍ تہٕ نیم سرکٲرۍ ادارن منز سیدِ سیود یار ورگہٕ پٲٹھۍ اہم کامٮ۪ن سٍتۍ وابستہٕ ، مثالے تِم روٗدۍ ریاستی کلچرل اکاڈمی ہٕندِ جنرل کونسلٕکۍ رکُن تہ ، ساہتیہ اکاڈمی ہٕنزِ کٲشرِ خٲطرٕ مشاورتی کمیٹی ہٕندۍ رکُن تہ، پبلِک سروس کمیشنٕکۍ تہ بہ حیثیت لینگویج ایکسپرٹ ممبر، یونیورسٹی کونسلٕکۍ ممبر، کشمیر یونیورسٹی ہٕندِ اکاڈمِک کونسلٕکۍ ممبر، تہٕ وُنۍکٮ۪ن تہ چھِ وارٕیہن تمدنی ادارن تہٕ ثقافتی انجمنن اہٕندۍ مۅلٕلۍمشور اکار بکار یوان۔ کشمیر یونیورسٹی منزاٹھووٕہن ؤرۍین گنڈُل پٲٹھۍ مختلف باوٮ۪قار عۅہدن پٮ۪ٹھ روٗزِتھ ، علمی ، ادبی، تنظیمی تہٕ تدریسی خدمات انجام دِنہٕ پتہٕ گٔے مرغوب صٲب 1997ءمنز کٲشرِ شعبہ کہ صدرٕ سٕندۍ حثۍیتہٕ باعزت پٲٹھۍ سبکدوش ، یتھٕ پٲٹھۍ پرٮ۪زلیو بالُک یہ لال تہٕ رسا جاودٲنی سٕندِ دُعائے خٲرُک حٲصِل کٔشیرِ ہٕندٮ۪ن تھدٮ۪ن علمی تہٕ ادبی عنوانن منز

تَمِچ وَتھ ہیکہ نہٕ کانہہ پربت رُکٲوِتھ                              سودُر منزل چھُ یتھ آبِ روانس
﴿مرغوب﴾

﴿ب﴾
میوٗٹھ
شٲعرِ بانہالُک پۅختہٕ کار                                          کٲشرٮ۪ن ناماورن منزناو دار
ماہرِ
فن تے زبان، محبوٗب میون                                شٲعرن اندرچھُ خوبن منزشُمار
﴿مرزا
عارف﴾[11]

کٲشرٮ۪ن ناماورن منز ناو دار

پروفیسر مرغوب بانہالی سُند ادبی سفر چھُ عیسٲے سنہٕ کِس پوٗنژمِس دٕہلس منزشروع سپدان، گۅڈٕ گۅڈٕ اوس سُہ اُردوٗ زبانہ منزشعر موزوٗن کران تہٕ پتہٕ پھیوٗر کٲشرس کُن، سٍتی کورُن نثر نٔویسی کُن ژور توجہ، یوٗت زِ تسٕندۍدرجن واد عٲلی مانہٕ تہٕ محققانہٕ مقالہٕ روٗدۍ پُروٮ۪قار تہٕ با اعتبار مقٲمی تہٕ مُلکی سوتھرکٮ۪ن رسالن اندر شایع سپدان بلکہ  پرٔۍ مرغوب صٲبن اعلیٰ پایہ چَن کانفرنس منزپٕننۍ کٔہۍیاہ مقالہٕ، یِم بہرحال کٔشیرِ ہٕنزعظمتچہ بازیافت چہ عملہ تہٕ ییتہ چن مثبت قدرن ہٕنز سوتھرِس پٮ۪ٹھ اَنہٕ نہٕ چہ کامہ ہٕندِس مرکزی نۅقطسٕے أندۍ أندۍگتَھ ماران چھ ،تمٔۍ دِژ کٔشیرِ ہٕندٮ۪ن فارسی توٲریخن دوٗنژھ، حضرت شیخ العالمس ؒ ، لل دٮ۪د ، حضرت شاہمدانس ، تہٕ ساداتن ہٕندٮ۪ن احساناتن ، صوفی سِلسلن تہٕ علامہ اقبالؒ، مولانا روٗمی ہوِٮ۪ن محسنن ہٕندۍ کٔشیرِ تہٕ کٲشرٮ۪ن پٮ۪ٹھ کرنہٕ آمٕتۍسوچھ پھِرِن علمی کتابن،ریشۍ نامن ، تذکرن تہٕ توٲریخن ہندمطالعہٕ کٔرِتھ کٲشرِ زبٲنۍ منز۔2009ءمنز سپٕز مرغوب بانہٲلۍ سٕنز تحقیقی مقالن ہٕنز اکھ خوبصوٗرت سۅمبرن شایع، یتھ منز لل دٮ۪دِ پٮ۪ٹھٕ از تام منتخبہٕ تہٕ نمایندٕ ژووُہن کٲشرٮ۪ن شٲعرن ہٕنزِ روادٲری تہٕ انسان دوستی ہُند بسیار پاسل مطالعہٕ پیش کرنہٕ چھُ آمُت۔ حضرت شیخ العالمؒ صٲبس متعلق تسٕنز تحقیقی کٲم چھے تٔمِس کٔشیرِ ہٕندٮ۪ن شیخ شناس عٲلۍمن تہٕ محقق ہٕنزتگہ تندلہ منزاہم مقام دِوان تسٕنز کتاب۔ "Some glittering milestones of ancient Kashmiri (with special reference to Shaikhul-Aalam)"

چھے شیخ شنٲسی ہٕنز اکھ رٕژ کو شش ،یتھ منز حضرت شیخ نورالدین ریشی سٕندِس کلامَس ،زبٲنۍ ہٕندِس ورتاوس ، ورتاونہٕ آمٕژ زبٲنۍ ہٕندِس پوت منظرس ، حضرت شیخ سٕنزِ شٲعری تہٕ شخصیتُک لُکہٕ و وترِس پٮ۪ٹھ پیمہ تِس اثرس تہٕ باقٕے اہم موضوعن متعلق تحقیقی تہٕ تجزیٲتی مقالہٕ درٕج چھِ۔ مرغوب صٲبٕنۍ حض شیخ العالمسؒ متعلق کرنہٕ آمٕژ کٲم نظر تل تھٲوِتھ آے یِم تہ کشمیریونیورسٹی منز قٲیم مرکز نوٗر خٲطرٕ غلام نبی گوہر تہٕ اسد اللہ آفاقی ہوٮ۪ن شیخ شناسن سٍتۍریسرٕچ فیلو مقرر کرنہٕ تہٕ دپان شایدکٔرنہٕ مرغوب صٲبن یہ فیلو شِپ قبول۔

أکِس معتبر محقق سٕندِ حثۍیتہٕ کور تمٔۍ کٔشیرِ ہٕندٮ۪ن فارسی توٲریخن، فارسی اَدبُک تہٕ کٲشِر ادبُک پزنہٕ پٲٹھۍ مُطالعہٕ، اصل کتَھ چھے یہ زِ تسُند دِل و دماغ چھُ اسلٲمی جذبہٕ تہٕ خلوٗص سٍتۍ بُربکہٕ ، سُہ چھُنہٕ عام وٲعظ مگراِسلٲمی فکرو نظر تھاون وول آسنہٕ کِنۍ چُھس علمی تہٕ ادبی سوتھرس پٮ۪ٹھ قلمی کٲم کرنہٕ وِز امیُک ظۅن روزان۔ تسٕنزِ رہنمٲئی منز یِمو سکالرو ایم،فل یا پی، ایچ ، ڈی خٲطرٕ مقالہٕ تیار کٔرۍ تِمن مقالُن ہُند فہرست وُچھِتھ چھُ اَمہ کتھِ ہُند ثبوٗت میلان ،مثالے سہروردی صوٗفی سِلسلہٕ تہٕ حضرت شیخ حمزہ مخدوٗمؒ کشمیری ،منقبت الجواہرُک تنقیدی جٲیزٕ، وسطِ ایشیاہُک کبروی صوٗفی سِلسلہٕ ، بیہقی ساداتن ہُند رول کٔشیر منز، کٲشرِ زبٲنہ تہٕ ادبس منز اِسلٲمی عنصر،بیربل کاچروٗ سٕنزِ منتخب اُلتواریخُک تنقیدی جٲیزٕ وغٲرٕ۔ "کٔشیرِ بالہٕ اَپارِ" نٲوۍ تحقیقی کتابہ ِ منز چھِ پوگلی تہٕ کشتوارۍ بوٗلٮ۪ن متعلق زٕ اہم باب درج۔مرغوب صٲبٕنۍیہ کتاب گٔے  1982ءمنزشایع۔اَتھ منز چھُ جومۍصوبس اندرکٲشُربولن والٮ۪ن علاقن ہُند تمدنی تہٕ تہذیبی توٲریخ تہ باونہٕ آمُت۔ مرغوب صٲبن لیکھۍ بالہٕ اَپٲرۍمٮ۪ن کارِ وۅگہٕ نٮ۪ن شٲعرن ،عبدالرحیم اعمیٰ غلام رسول کامگارتہٕ رساجاودانی یَس متعلق مونو گراف ،یِم بہرحال تسٕنزِ تحقیقی تہٕ تنقیدی کامہ ہٕندِسٕے وانگس منزیوان چھِ۔اَمہ علاوٕچھُ تِمو ولی اللہ مٔتِس متعلق تہ مونو گراف لیوٗکھمُت ۔ 1982منزٕے کٔر یِمو کٲشرِس رسم الخطس متعلق"مرغوب تھیوری" پیش اماپوز کٲشُرلیکھُن والٮ۪و عملٲو نہٕ یہ تھیوری ،نتہٕ زَن اَتھ متعلق سپٕدۍ بحث تہ تہٕ واد واد تہ، اماپوز توٲریخ کرنہٕ اَتھ کو ششہ نظر انداز۔

یِتُے یوت نہٕ زِ پروفیسر مرغوب بانہٲلۍ کور ساہتیہ اکاڈمی ہٕندِ اہتمامہٕ شایع سپدیمٕتٮ۪ن مرزا غالب ، سروجنی نٲیڈوتہٕ قاضی نذر السلامس متعلق مونو گراپھن ہُندکٲشرِزبٲنۍ منزترجمہٕ ،بلکہ  پھِر تمٔۍ مشہوٗر فارسی دٔلیلہٕ کتاب "کلیلہ و دمنہ" کٲشرِس منز۔اَتھ کتابہ منز درٕج دانٲیی ہٕنزن دٔلیلن متعلق چھُ وننہٕ یوان زِیِمن ہُند مالیُن چھے کٔشیرِ۔

﴿ج﴾

شاعرن اندر چھُ خوبن منزشُمار:

پروفیسر مرغوب بانہٲلی چھ ُکٲشرِ زبٲنۍ ہُنداکھ ممتاز شٲعر،تسٕنز شٲعری منزچھے سمٲجی خدمتٕچ تہٕ افٲدۍیتٕچ زیادے پہن کل لبنہٕ یوان،اَتہ نہ چھُ تُم تڑاخ تہٕ نہ ویکھُت لفظہٕ و وتُر، اتہ چھُ خۅش یوان سوت ساوٮ۪ر ، سیزر تہٕ سنٮ۪ر ۔ اتہ ِ چھِ مثبت فکری رٔوۍیِچ تہٕ مثبت انسٲنی قدرن ہٕنز پاسدٲری تہٕ ترجمٲنی ۔پنٕنۍ مشاہدات ، خیالات تہٕ احساسات فنکارانہٕ پٲٹھۍ باونہٕ خٲطرٕ ورتاوِ تمٔۍ شٲعری ہٕنزاَلہٕ پلہٕ سارے ؤنتۍ زٲژ، غزل ، گیت ، وژُن ٹُکھ ، رُبٲعی ، آزاد نظٕم ، پابند نظم ،نثری نظم، منقبت تہٕ نعت لٮ۪کھنہٕ علاوٕ کور تمٔۍ تصویری نظمہٕ لٮ۪کھٕ نُک اکہ نوو تہٕ نٮ۪رل تُجربہٕ تہ، اماپوز یہ تجربہٕ ژھۅکٮ۪و تسٕنزنٕے کٔژ تام نظمن پٮ۪ٹھ تِکیازِ اَتھ موزنہٕ پتہٕ سانٮ۪و شٲعرو۔ مرغوب صٲبنہ شٲعری منزچھے نٔوحٮ۪ساگہی تہ تہٕ اَتہ چھُ خۅش یوان طنز تہ میلان، یُس باضے اخلٲقی بے راہ رٔوی یا انسٲنی قدرن ہٕنزِ مِسمٲری پٮ۪ٹھ کرنہٕ آمُت چھُ ،مثلن نوم شعر

یۅہے چھا نر سری رچھِ نُک تقاضا                              پھبن کِتھٕ ژوٗنٹھۍ بامن ڈوٗنۍ شِہلس!
یا
جہنم
پگہہ بسکین انہٕ نَے                                                       اگر بُلبُلن کاوٕگی آپراوکھ
یا
نظراہ
بہارٕ دٔدۍونس میٲنِس تہ کٔرۍزِ ہے                                       پوشُل کونڈُے رٕنیمتِس ہلمس تہ بٔرۍزِ ہے

بقولِ ڈاکٹر شفیع شوق۔ "مرغوب نہ شٲعری ہٕنز اہم خصوٗصۍ یت چھے یہ زِ یہ چھُنہٕ عشقہٕ کٮ۪ن تہٕ ذاتہٕ کٮ۪ن رٮ۪وٲیتی موضوعن آویز، تمٔۍ سٕنزشٲعری ہُند فکری عنصر چھُنہٕ صرِف عصری آگہی پیش کران بلکہ  چھُ سُہ پٔزۍ پٲٹھۍ اِسلٲمی جذبس الہٕ کھول کران ، نیرل پیکر،حسین تہٕ ٲوِلۍ استعارٕ چھِ مرغوب نہ شٲعری اکھ منفرد مقام بخشان،تمٔۍ کٔرۍ ہیژ منز واراہ تجربہٕ تہٕ ہووُن زِ کٲشرِشٲعری منزکٲژاہ گُنجٲیش چھِ موجود"۔﴿کٲشِر ادبُک توٲریخ ،چھاپ  1978ئ﴾۔وارٕیہو ؤرۍیو پٮ۪ٹھ چھُ مرغوب صٲب نعت گوئی کُن زیادٕ توجہ کران، نعت چھُ تسُندمحبوٗب صنِف سخن ، تسٕندۍ وجدآور نعت چھِ حیاء،لولہٕ تہٕ پان بنزراوٕنکہ جذبہٕ سٍتۍ بربُکہٕ

سون رہبر سُہ اِنسانِ کٲمل رشکِ شاہی چھے یمٔۍ سٕنز غۅلٲمی           سون محور سُہ محمود و احمد ، فخرِآدم چھُ یَس نام نٲمی
سوزِ
مرغوب نوٗرانہٕ سینُک ازتہ مقبول ازلن چھُ باسان                           شعرِ حسانکے خلعتٕچ درٕے نعت گوٗیی چھے تھٔز خۅش کلٲمی

"پرتوستان" چھے مرغوب صٲبٕنۍ گۅڈٕنِچ شعرٕ سۅمبرن ، یۅسہٕ 1979ءمنزشایع سپٕز۔اتھ میوٗل مرغوب صٲبَس ساہتیہ اکاڈمی ہُندایوارڈ تہ ۔یِمو اعزازو علاوٕ تہ آے مختلف سمٲجی تہٕ ادبی ادارو طرفہٕ تِمن عزت افزٲیی کرنہٕ۔"تجلستان " نٲوۍ شعرٕ سۅمبرن ،یۅسہٕ2007ءمنز شایع گٔے۔اتھ منزچھِ ندٲیی تہٕ غٲر ندٲیی عنوانن تحت مرغوب صٲبٕنۍ وجد آوَر نعت درٕج کرنہٕ آمٕتۍ تہٕ اکثر غزلن تہٕ نظمن منزچھے کٔشیرِ ہٕندِ موجودٕ صورتِ حالٕچ فنکٲرۍ آیہ باوَتھ کرنہٕ آمٕژ۔ یِمن غزلن تہٕ نظمن منز چھے کٔشیر اکھ علامتی رنگہٕ ژٔر یا پھنبہٕ سیرحٲوی موضوع بنےمٕژ۔

پنہٕ نٮ۪ن روٗشِتھ پردٮ۪ن توٗشِتھ کاوٕ دِگن لٕج کۅسہٕ پھنبہٕ سیر                                   کُنۍ زٔنۍکٍتٮ۪ن ہیکہ وۅنۍ پوٗشِتھ پنہٕ نی بُلہٕ نن کٔر دِلگیر

اُردو زبٲنۍ منزتہ کٔر مرغوب صٲبن واریاہ علمی تہٕ ادبی کٲم۔ "اخلاقیاتِ مرغوب " تہٕ" کلامِ اقبال کے مشرقی سرچشمے" کتابہٕ چھکھ شایع کرِمَژٕ، ییلہ زَن کشمیر شناسی ، کلامِ اقبال کی زیرین لہر، آدم گری ، کشمیری اِملا کی علمی بُنیاد اور معیار بندی ،بیادِ امین تہٕ خزینۂ امین نٲوۍ کتابہٕ چھے وُنہ مسودن ہٕندۍ سٕے صوٗرتس منز مرغوب صٲبس نِش ، یِم شایع سپدنہٕ پتہٕ پراوِ مرغوب صٲبٕنۍ دینی، علمی تہٕ ادبی شخصیت زیادٕ کھۅتہٕ زیادٕ باڈو۔ پروفیسر مرغوب بانہٲلۍ صٲبُن یودوَے انگریزی تہ اُردو زبانن منز تہ لیوٗکھ ،تاہم چھُ سُہ کٲشرِ زبٲنۍ ہُند اکھ اہم ژُکۍ دَر، تس چھے کٔشیر ،کٲشرِزبان تہٕ کٲشرِ ثقافت ٹٲٹھ، کٲشرِ زبٲنۍ ہٕنزِ أہمیٔژ متعلق چھُ سُہ ونان

مَہ راوَر وَلو لٕچ عظمتھ مَہ راوَر                                                پنٕنۍ سیٔز وَتھ یہ کٲشرِ کتھ مَہ راوَر
ہرُد
پردارٕ کٮ۪ن پوران کجر دِتھ                                                 بیانٕچ پوشہ وُنۍ دولتھ مَہ راوَر
یۅہے
نِلہٕ ناگ آگُر سانہ لسنُک                شِہُل ونہٕ وُن مٔژھیُل جنتھ مہ راوَر

1۔جیمۍ صوبس منزکٲشرِ زبان و ادبُک توٲریخ،مرتبہ، منشوٗر بانہالی، شایع کار، ساہتیہ اکاڈمی دہلی زیادٕ پہن آو اَمہ منزٕ مرغوب صٲبس متعلق نوشتُک استِفادٕ کرنہٕ یمٔہ خٲطرٕ بہ مرتب سُند شُکر گذار چُھس۔          2۔کٲشرِادبُک توٲریخ ،مرتب ڈاکٹرشفیع شوق تہٕ ناجی منور ۔     3۔احوال نامہٕ حصۂ اول ، کشمیر یونیورسٹی ،مرتّب بشیر اختر تہٕ چمن لال چمن ۔ 4۔ مرغوب صٲبنہ کتابہٕ ، خاص پٲٹھۍ  پرتوستان ،کٔشیر بالہٕ اَپارِ مونوگراپھ وغٲرٕ۔    5۔سون ادب ﴿زبان تہٕ ادب نمبر﴾ کلچرل اکاڈمی 6۔ انہار﴿فایل﴾ کشمیر یونیورسٹی

کٲشُر منی افسانہٕ

بوزوَے تہٕ نوٮ۪و ادبی صِنفو منز آیہ سٲنِس افسانس سارِوٕے کھۅتہٕ زیادٕ خۅش بختی باگہ۔ الہٕ پلہٕ شُونزہن ؤرین دوران مٲنڈۍ أمۍ واریاہ پڑاو۔ کُنہ ادبی صِنفہ ہٕنز ترقی باپتھ چھُ یہ محض شُرۍلٲزی ہُند وق۔ اماپوز کٲشرۍ افسانن کوڈ نہٕ صرف کاڈ بلکہ  روٗد وِیہہ تہ بدلاوان۔ افسانہٕ چھُ بِذٲتی مغربی ایجاد ، تتہ چھے اَمِچ وٲنس زٕ ہتھ ؤری کھۅتہٕ تہ زیادے ۔ مشرقی دُنیاہس اوس کتھٕ کرنُک تہٕ داستان ونہٕ نُک فن ہفتا کالہ پٮ۪ٹھے بدس ، اوَے ییلہ افسانہٕ اور ووت ، اتہ لٔج نہٕ اَتھ وہراولبنس تہٕ باڈو پراونس تٲر۔ کٔشیرِ تہ ووت افسانہٕ واریاہ ژیرۍ۔ ۷۴۹۱ءپتہٕ ا ون افسانہٕ تِمو ادیبو بانہالہ یپور یِمو تھٔز تعلیم پٔرمٕژ ٲس ۔ یِمن اُردو ، انگریزی تہٕ ہندی بیترِ زبانن ہٕندِ ادبُک مُطالعہٕ اوس۔ ترقی پسندی تحریکہ دوران آیہ واریاہ طٔویل افسانہٕ لیکھنہٕ ، یِم سمٲجی حقیقژن ہُند پورِ پوٗر عکس ہاوان چھِ۔ یہ تحریک ٲس نوٮ۪ن آشن تہٕ امارن ہٕندۍ خا ب وُچھان ، عوامس ٲسۍ نُنہٕ گُرۍ تہٕ تلہٕ تلاو ہاونہٕ آمٕتۍ، اوے اوس تمہ زمانُک افسانہٕ نگار عام انسانہٕ سٕندۍ حالات بٲوِتھ استحصٲلی عنصرن تہٕ ہمیشہٕ پوشہ وٕنۍ اعلیٰ میارٕکۍ افسانہٕ مثالے امین کٲملُن"کۅکر جنگ" اختر محی الدینُن"دندٕ وَزُن" یا "دٔریایہ ہُند ییزار" بیترِ۔ وۅں گوو دۅد ٕ کۅلن تہٕ تِلہٕ تلاوَن ہُند برم پھُٹِتھ پیوو نوو افسانہٕ۷۶۹۱ءپٮ۪ٹھے کٲشرِ شیرازٕ کِس خصوٗصی افسانہٕ نمبرس سٍتی تھنہٕ۔ یہ کتَھ آیہ ٹاکارٕ پٲٹھۍ برۅنہہ کُن زِ کٲشُر افسانہٕ نِگار چھُ نوٮ۪ن حالاتن منز گذارنہٕ یِنہٕ واجینہ سمٲجی زندگی ہٕنزِنوِ حقیقٔژ نوِ رنگہٕ باوُن یژھان۔ مثلن فاروق مسعودی سُند افسانہٕ "سٮ۪ٹھاہ معمولی" رتن لال شانت سُند" ژھایہ گِتۍ" یا اختر محی الدینُن" گہے تاپھ گہے شِہُل" تہٕ بنسی نردوشُن " پنُن مرُن"۔

کٲشرِ افسانُک سفر روٗد تھزرن کُن جٲری۔ افسانہٕ نگارن ہُند اکھ کاروان آو بارسَس ۔ اتھ کاروانس منز روٗدۍ نٔوۍ نٔوۍ تخلیق کار تہ شٲمل سپدان۔ افسانہٕ نٔویسی ہٕندِس مٲدانس منز سپٕدۍ نٔوۍ نٔوۍ تجرُبہٕ۔ ترقی پسند تحریکہ ہٕندِس اثرس تحت لیکھنہٕ آمتٮ۪و افسانو پتہٕ آیہ جدیدیتکِس رحجانس تحت تہ افسانہٕ لیکھنہٕ ۔ موضوع تہٕ اسلوٗبٕکۍ نٔوۍ نٔوۍ تجربہٕ آیہ کرنہٕ۔ تمثیلی، علامتی تہٕ ورگہٕ اظہار آو کامہ لاگنہٕ۔ افسانہٕ نگارو ورتوو خۅد کلٲمی تہٕ خٲلص مکالمٲتی ول تہ۔ داستانن منز ورتاونہٕ آمٕتۍ اسطوٗر تہٕ ا سطوٗری کردار ورتٲوِتھ افسانہٕ لیکھنٕچہ معنہ ساوِ تہٕ پھروٗژ کو ششہ تہ کرٮ۪کھ۔ افسانہٕ نگارن ترٲو نہٕ صرف سماجہ کِس بلکہ  فردٕ سٕندِس اندروٗنس تہ نظر ۔ انسانہٕ سٕندٮ۪ن اندرٹٮ۪ن تہٕ ویکھژارن دیتُن کھۅلُو۔ یۅہے مواد تخلیق کٲری ہٕندِس قٲلبس منز شیرِتھ تھُرِن نٔوۍ نٔوۍ افسانہٕ۔ نوٮ۪ن تہٕ پرانٮ۪ن قدرن لٔج ٹھۅل، نوِ تہٕ پرانہ پُیہ ہٕندٮ۪و تضادو کٔرۍ نٔوۍ مسلہٕ پٲدٕ، ساینسی ترقی سٍتۍ بنیاے زندگی منز آرامٕکۍ تہٕ آسٲیشہ ہٕندۍ نٔوۍ نٔوۍ سامانہٕ ، انسانس گۅو دولتُک پیپاس اگادِ، یہ پیپاس ہومراونہٕ باپتھ پیوس دۅہس راتس وۅٹہٕ پونز لاگُن، سورُے پاتھیوس مگر اکہ بے انتہا دولتہٕ نِش چھۅلُن اتھٕ ، سۅگٔیہ فُرصتھ ، فراغتھ تہٕ کلہُم پٲٹھۍ سکو ن ۔ تمۍ یودوَے زمینی تہٕ زمٲنی دورِرس کانٕلۍ تٲرِتھ دوٗرِکۍ نکھٕ أنۍ مگر دِلن لوگُس دوٗرٮ۪ر۔ بے فُرصتی ہُند یہ ہوا نوا چھُ دوٗر گامن گُٹھن تہ ژھٹھ کڈنہ لوگمُت۔ وۅنۍ چھَنہٕ انسانس انفارمیشن ٹٮ۪کنولوجی ہٕندِس یتھ انقلٲبی دورس منز طویل دٔلیلہٕ ، زیٹھۍ داستان تہٕ صفہٕ وادن پٮ۪ٹھ واشرِتھ افسانہٕ پرنس سمنب فُرصتھ۔ ناولہ ہٕنز تہ چھے یِہے صورتِ حال ۔ اوَے بدلٲوۍ ضروٗرتہٕ مطٲبق واریہو ادبی صِنفو وِیہہ ۔ تِہُند باڈو آو ژۅمراونہٕ تہٕ بعض صورتن منز آیکھ ہیت تہ بدلاونہٕ۔ کٲشرِ زبٲنۍ منز آیہ طویل آزاد نظمو پتہٕ مۅخصر تہٕ مۅخصر ترین نظمہٕ تہ لیکھنہٕ۔ یی سپُد افسانس سٍتۍ تہ ۔ گۅڈٕ گۅڈٕ آیہ زیٹھۍ بلکہ  واریاہ زیٹھۍ افسانہٕ وجودس، تمہ پتہٕ مۅخصر افسانہٕ تہٕ مۅخصر افسانو پتہٕ گوو سٮ۪ٹھاہ ژھۅٹٮ۪ن افسانن ہُند رواج ، یِمن مِنی افسانہٕ یا پوسٹ کارڈ افسانہٕ تہ ونان چھِ، یِمو منز واریاہ افسانہٕ صرف کینژنٕے سٔطرن پٮ۪ٹھ پھٔہلِتھ چھِ۔پتھ کُن گُذریمتٮ۪ن ترٮ۪ن دٔہلٮ۪ن دوران لیوٗکھ کٲنسہ کٲنسہ افسانہٕ نگارن منٔزۍ مٔنزۍ مِنی افسانا تہ۔ واریاہ افسانہٕ نگار آیہ بارسس یِمو صرف مۅخصر تہٕ سٮ۪ٹھاہ مۅخصر افسانے یٲتۍ لیکھۍ۔ شاید اوس تِمو ژرُژمُت زِ یہ چھے وقتٕچ منگ تہ تہٕ مۅخصر کتھ چھے ہمیشہ ژ ور معنہ تھاوان تہٕ تہدار آسان۔ہُپٲرۍ ٲسۍ باقٕے مُلکی تہٕ غٲر مُلکی زبانن منزتہ مِنی افسانہٕ لیکھنٕکۍ تجربہٕ تہ پاسہٕ درامٕتۍ۔ سانٮ۪و واریہو افسانہٕ نگاروکور اور کُن ژ ور توجہ،یِمن منز چھِ مثالے رحیم رہبر، نذیر جہانگیر، محی الدین ریشی، مُشتاق مہدی، سید یعقوب دِلکش، مُشتاق احمد مُشتاق، ناصِر منصوٗر، عبدالاحد وٲحِد ،رشید سرشار، غلام محمد مٲہر، رتن جوہر، اوتارہوگامی، وجے ساگر، مکھن لال پنڈِتاتہٕ اشوک کول بیترِ۔ پنڈِتا صٲبس چُھ پنُن اکھ خاص ڈِکشن، تِہندۍ طویل افسانہٕ چھِ گٲمی زندگی وحاطہٕ کران ، وۅں گو مۅخصر افسانہٕ لیکھان لیکھان چھِ انسان سٕندٮ۪ن نفسیٲتی اندرٹٮ۪ن تہ کھۅلو دِوان ۔

کٲشرِ زبٲنۍ منزآسہٕ وُہمہ صٔدی عیسوی ہٕندِ سٔتۍمہ دٔہلہ پٮ۪ٹھے مۅخصر کھۅتہٕ مۅخصر افسانہٕ لٮ۪کھنہٕ چہ مالہٕ پھۅلنہٕ لجمٕژ"سُہ کُس اوس " چھُ اَتھ سلسلس منز شاید گۅڈنکٮ۪و قدمو منز اکھ ، امین کٲمل سُند یہ افسانہٕ گٔیاو تٔتھۍ زمانس منز نیب رسالس منز شایع۔ ٲٹھۍ مِس دٔہلس منز گٔیہ، شیرازس منز فاروق مسعوٗدی سٕندۍکینہہ مۅخصر افسانہٕ شایع ۔ رحیم رہبرٕنۍ کینہہ مِنی افسانہٕ تہٕ گٔیہ أتھۍ وقتس منز ریڈیو کشمیر سرینگرٕ پٮ۪ٹھٕ نشر۔ افسانہٕ ہیکہ نہٕ ٲسۍتھٕے کہٲنی ورٲے ۔ کتھ ،و اقعہٕ یا کہٲنی علاوٕ چھِ کُنہ تہ افسانٕکۍ اجزائے ترکیبی کردار، مکالمہٕ تہٕ لکھٲرۍ سُند یِمن سارِنٕے سٍتۍ مخصوٗص Treatment، افسانہٕ وونان وونان گژھِ مخصوٗص ماحول یا وَنو ہوانوا وۅتلاونہٕ یُن۔ اَتھ منز ہیکہ پیام تہ ٲسِتھ، طنزٕ تہ ، تہٕ صرف تاثُر تہ مگر افسانہٕ چھُ اَمہ باوجود زِ اَمیُک کرنز رَتھ تہٕ ماز چھُ سماجہ منزے حٲصِل سپدان تہ تخلیقی چیز ، اتھ منز اگر تخلیقی جوہرآسہ نہٕ تیلہ روزنہٕ اتھ تہٕ لُکہٕ کتھِ منز یاعام قٕصن منز کانہہ فرق۔ مِنی افسانہٕ تہ چھُنہٕ یِمو چیزو نِش مُچھِ۔ وۅں گوو منی افسانہٕ لیکھَن وٲلِس چھے کم لفظن منز بٔڈ کتھ باوٕنۍ پٮ۪وان۔ اوَے گوو مِنی افسانہٕ یہ دٔپۍ زِ تہ نٔٹۍ وارِ منز ناگ برُن۔ لۅکُٹ کنواس ، پُلاٹہٕ پیوٗنت،ا کھ زٕ کردار تہٕ واقعہٕ رژھا! مِنی افسانس چھُ یِتُے بُتھ بانہٕ، اماپوز اتھ منز باونہٕ آمُت واقعہٕ پیوٗنت چھُ بڈِ کھۅتہٕ بٔڈِس واقہٕس، سٮ۪ٹھاہ وسیع صورتِ حالس یا واریہن پانہٕ وٲنۍ جورنہٕ آمتٮ۪ن مسَلن، نمایندگی کران یا بُتھِ پٮ۪ٹھ پردٕ تُلان اختر محی الدین سٕندۍ مِنی افسانہٕ چھِ اَمچہ بہترین مثالہٕ۔ مثلن تسُند افسانہٕ "ببلہ روو مالیُن" چھُ کٲشرٮ۪ن پنڈتن ہٕنز نقلِ مکٲنی سٍتۍ پٲدٕ سپُدمُت۔ سیٲسی ، سمٲجی تہٕ نفسیٲتی صورتِ حال جذبٲتۍ آیہ پیش کران ۔ یوتاہ بوڈ واقہٕ، یتھ سٍتۍ واریاہ واقہٕ جوٗرِتھ چھِ، کٔژتام سٔطرن منزباون چھُ اَمہ منِی افسانُک کمال۔ کتَھ چھے یہ زِ ببلہ چھُ جنج گرس منز خاندر سپدان، ییلہ کٲشرٮ۪و پنڈِتانٮ۪و ونہٕ وُن گرٮ۪ز تُل "وَنہ ہے چھکھ مالنِچہ ہیرے پٮ۪ٹھ"ببلہ ہٕندۍ مٲلۍ ژٔھٹ باکھ...."یہ مہارا چھُ جنج گٕر، مالیُن مہرا چھُنہٕ، اَدٕ چھُ سجٲوِتھ !سۅ کتہ چھس بوٗنۍ ، سُہ پھرس۔ سۅ کُٹھ تہٕ کچھُ ہٕنز ہیر یتھ پٮ۪ٹھ بِہتھ مہرا ببٕل دارِ دجن گِندان ٲسٕم!" یتھے پٲٹھۍ چھِ اختر محی الدینٕنۍ موج ، رییہ تہٕ جلہ ہٕندۍ دندٕ پھٔلۍ مِنی افسانہٕ تھیکٕنۍ لایق۔ "جلہ ہٕندۍ دندٕ پھٔلۍ" افسانس منز چھُ کٔشیرِ ہُندِ عصری صورتِ حالُک نقشہ کٔژ تام سٔطرن منز وۅتلاونہٕ آمُت۔ کرفیوٗہس دوران چھُ اکھ وٲنسٹھ شخص سڑکہ اپور ترنٕچ کو شش کران ، پُلسہٕ وول چُھس رُکاوان ،أمِس شخصہٕ سٕنز تھٔز تعلیم یافتہٕ کو ر، یۅسہٕ ؤکیل ٲس چھے پُلسہٕ وٲلِس سٍتۍ سوال و جواب کران، پُلسہٕ وول چھُ گوٗلۍ چلاوان ، کو ر چھے گژھان مارٕ، مول چھُ کورِ ہٕندۍ چھکراونہٕ آمٕتۍ دند سۅمبراوان۔ اَتھ بہ ظٲہر عام نوعیتہ کِس لۅکٹِس واقہٕ ہس چھُ افسانہٕ نگار سُند Teatment واریاہ معنہ خیز بناوان۔

رحیم رہبر چھُ بسیار نویس افسانہٕ نگار۔ تہنز واریاہ افسانہٕ سۅمبرنہٕ چھے شایع سپدیمٕژ۔ تِم روٗدۍ نہٕ زانہہ تہ طویل افسانہٕ لیکھہٕ نَس لور۔ تہندٮ۪ن مۅخصر تہٕ واریاہ مۅخصر افسانن ہُند محوّر چھُ کٔشیرِ ہُند عصری کرب ، انسٲنی حقوٗقن ہٕنز پامٲلی۔ تہندۍ اَمہ قبیلٕکۍمِنی افسانہٕ چھِ حُزن انگیز تہ تہٕ سوچس درسہٕ دِنہٕ وٲلۍ تہ۔ یِم افسانہٕ چھِ فنکٲرۍ آیہ سانہ أندۍ پِکھچ عکس بندی کران۔ مثلن آدٕمۍ کرنزن ہٕنز پریڈ ، موج لٔج یو، فوٹو، سُرخی ، تمہ رٲژ تہٕ کنہ شہر۔ رحیم رہبرٕنۍ یِم تہٕ یِتھۍ ہوۍ واریاہ افسانہٕ چھِ سانہ پُرآشوب دورٕچ نشاندہی تہٕ ترجمٲنی کران۔

محی الدین ریشی سٕندۍ مِنی افسانہٕ چھِ نوٮ۪ن مسلن ہُند ایحساس کرناوان مثالے تُہند "نکھ" افسانہٕ چھُ بہ ظٲہر اکھ لۅکُٹ واقعہٕ باوان ، مگر بنیٲدی طور چِھ اتھ مسلس سٍتۍ واریاہ مسلہٕ نٔتھۍ سپدان تہٕ اکہ بڈِ مسلک احساس کرناوان، افسانہٕ نگارن چھُ یہ لۅکُٹ واقہٕ جذبن ہٕنزِ کوندِ منزٕ پویمُت،انسٲنۍ ہمدردی ہُند جذبہٕ، مذہبی وابستگی ہٕندۍ جذبہٕ، کُنِرک احساس ، پانہٕ پننہ اتھٕ کٲم نہ کرنُک یچھ عادت، کٔژن تام سٔطرن پٮ۪ٹھ مشتمِل أمۍ معنہ سٲوۍ افسانن کیاکیا چُھنہٕ سٲمِتھ تھوومُت۔ واقعہٕ چھُ یہ زِمامہٕ صٲب چھُ گرس منز کنُے زون۔ نیچوۍ چھِس تھٔز تعلیم حٲصِل کرنہٕ پتہٕ انگلستانس منز دیار وٹہٕ نس تہٕ دُنیا چھاونس سٍتۍ آوٕرۍ۔ مامہٕ صٲب ییلہ موٗد، کالوٗنی ہند ٮ۪و بے مُروّت تہ غٲر زان ہمسایو اَنہٕ نٲوۍ کینہہ بہٲرۍ مزوٗر۔ یِمہٕ نٕے اتھِ تُلنووکھ مامہٕ صٲبُن توبوٗدٕ۔ توبوٗدٕ پکناوان پکناوان و ون أکۍ بہٲرۍ مزوٗرن" رام نام ستیہ ہے۔ سب بولو" رام نام ستیہ ہے "د ویم مزوٗر لوگُس وننہ" یہ مسلمان تھا" گۅڈنٕکۍ دیتس مسلمان تھا تو کیا ہوا، رام نام ستیہ ہے "غلام رسولن ، یُس یہ حال وُچھان اوس، و ون گرٕ وٲتِتھ آشینہ زِ أزۍ کہ پٮ۪ٹھٕ گژھن شُرۍ گرُک کٲم کار کرناوٕنۍ، وۅنۍ پورُکھ سٮ۪ٹھاہ اگر تھٔز تعلیم پٔرِتھ سٲنۍ شُرۍ تہ Foregin گٔیہ، اسہ کُس دِیہ نکھ!

مثالہٕ ہٮ۪کن واریاہ ٲسِتھ مگر یہ چھے حقیقت زِ مِنی افسانن چھے قبولیت میلان تہٕ مِنی افسانہٕ لیکھہٕ نُک رحجان چُھ دۅہہ کھۅتہٕ ہُران، وۅں گوو ییمِس نہٕ اَمہ فنُک پٲز لیہ ییہ تسٕنز کو شِش گژھِ رایگان۔

زان

اصل ی : غلام نبی پنڈت
قلمی
ناو : غلام نبی آتش
زاسنہٕ
: 27اپریل 1949ئ
سکو نت
: نٲنِل اننت ناگ کشمیر
تعلیم
: ایم۔ اے ۔ بی ایڈ
پیشہ
: ریاستی محکمے تعلیمس منز ژتجہن ؤرین شٮ۪ن رٮ۪تن تہٕ
پانژَن
دۅہن ٹیچر، ماسٹر تہٕ لیکچرار﴿کشمیری﴾ سٕندِ
حیثتہٕ
کٲم کرنہٕ پتہٕ سپُد30اپریل 2007ءدۅہہ سبکدوش۔
تصانیف
:
1
۔ شیشہ یِندٕر﴿شٲعری﴾1966ئ۔ 2۔زوٗل امارن ہُند﴿شٲعری﴾1978ءکلچرل اکادمی انعام یافتہٕ کتاب۔ 3۔ کینژھا مینژھا﴿شُرۍ بٲتھ: اشتراک: محمد سلطان سُلطان﴾1981ء۔ 4۔ تحقیق﴿ادبی تحقیقی مقالہٕ﴾ 1982ئ۔5۔ کٲشِرۍ تلمیح﴿اشتراک : موہن لال آش﴾ 1985ء۔6۔ پُشکِن سٕنز نظمہٕ﴿منظوٗم ترجمہٕ: اشتراک : شام لال پردیسی﴾1981ءسوویٹ لینڈ نہرو ایوارڈ یافتہٕ کتاب۔7۔ کٲشِرۍ لُکہٕ بٲتھ جلد8۔﴿تحقیق تہٕ ترتیب کلچرل اکادمی 1988ئ۔ 8۔ کٲشِرۍ لُکہٕ بٲتھ جلد9﴿ تحقیق تہٕ ترتیب﴾ کلچرل اکادمی 1989ء۔ 9۔کٲشِرۍلُکہٕ کتھٕ جلد6﴿تحقیق تہٕ ترتیب﴾ کلچرل اکادمی 1990ء۔ 10۔ کٲشِرۍ لُکہٕ بٲتھ جلد11﴿تحقیق تہٕ ترتیب﴾ کلچرل اکادمی 2007ء۔11۔ محمد سُبحان بھگت﴿تحقیق تہٕ ترتیب﴾:مونو گراپھ ۔ ساہتیہ اکادمی 2000ئ۔12۔ کٔشیرِ ، حضرت شیخ نور الدین ریشی سٕندِس کلامس منز﴿تحقیقی مقالہٕ﴾1994ء۔13۔ وُہمہ صٔدی دوران کٲشرٮ۪ن زنانہٕ لکھارٮ۪ن ہُند دیُت﴿ساہتیہ اکادمی﴾ 2002ئ۔ 14۔ بازیافت﴿تحقیق تہٕ تنقید﴾ 2005ء۔ ساہتیہ اکاڈمی ایوارڈ یافتہٕ کتاب۔ 15۔ کٲشِر لُکہٕ شٲعری﴿وکھنے تہٕ ویژھنے﴾ 2007ء۔16۔ کٲشُر لُکہٕ ووتُر﴿ تحقیق تہٕ تجزیہ۔ 2009ء﴾ ۔17۔ نوو کینژھا مینژھا ہ﴿شُرٮ۪ن ہٕندِ خٲطرٕ نظمہٕ تہٕ کہٲنیہ﴾ 2009ئ۔ 18۔ حکایاتِ رومیؒ﴿مثنوی معنوی منز ژارنہٕ آمژن حکایٔژن ہُند ترجمہٕ﴾ 2010ئ۔ 19۔ پروفیسر شمس الدین احمد﴿مانو گراپھ﴾ ۔ساہتیہ اکادمی دہلی 2011ئ۔20۔سرمایہ تہٕ سام﴿تحقیق تہٕ تنقید﴾ 2011ئ۔21۔ اقبال ناتھ ونپوہ﴿مانو گراپھ﴾ کلچرل اکیڈیمی 2011ئ۔

رُکنیت

1۔ ساہتیہ اکادمی ہٕندِ کٲشرِ مشاورتی بورڈُک ممبر2000تا 2006ئ
2
۔ممبر ٹکسٹ بُک پرپریشن کمیٹی برائے کشمیری ،اسٹیٹ بورڈ آف سکول ایجوکیشن۔
3
۔ ممبر ٹکسٹ بُک رِوجن کمیٹی براے کشمیری واُردو اسٹیٹ بورڈ آف سکول ایجوکیشن۔
4
۔ سابقہ ممبر مشاورتی بورڈ کٲشُر سرینگر ٹائمز۔

ایوارڈ:

1۔کلچرل اکیڈیمی ایوارڈ   1979ٕٕٕ      2۔ سوویٹ لینڈ نہرو ایوارڈ  1982ٕ   3۔بیسٹ ٹیچر ایوارڈ  2005ٕ            4۔ساہتیہ اکیڈیمی ایوارڈ  2008ٕ            5۔ شُرۍ ادبہٕ باپتھ ساہتیہ اکاڈمی ایوارڈ 2011ٕ                    



[1] مرحوم پروفیسر محی الدین حاجنی تہ چھُ وہاب حاجنی سٕندِ کلامٕچ ژھانڈدِنس دوران یِتھِ اکہ واقہٕ ہُک ذِکرکران لٮ۪کھان زِ__"وہاب نہ رحمت حق گژھنہٕ پتہٕ ییلہ أمۍ سٕندِس گرس سرکارٕ تہٕ بٔلۍ وٲرِثن ہٕندِذٔرۍیہ لوٗٹ سپُد ،أکِس ہمسایس آیہ یہ کتاب﴿کار گُذٲری﴾ دردست، واتنٲوٕن گرٕ، اتہ تھٲوٕن تریشہ نٔٹِس ٹھانڈ،پرٮ۪تھ دۅہ اوس اتھ اکھ اکھ ورقاأدران تہٕ ژھینان ۔ہمسایہ اوس پرٮ۪تھ دۅہ اودُرورق ژٔٹِتھ کتاب بییہ نٔٹِس پٮ۪ٹھ تھاوان ،پتہٕ ییلہ مے بوز تہٕ یہ کتاب وہاب نِس باپتھرس اَتھِ واپس انہٕ نٲوٕم،اتھ ٲسۍ کینہہ ورقٕے بچےمٕتۍ"﴿تفصیلہٕ خٲطرٕ وُچھو وۅلرٕکۍ ملر،وہاب نمبر،ص ۴۶۳،۴۸۹۱ءحلقہ ادب سونا واری،حاجن﴾۔

[2] یِم چھِ محض کینہہ مِثالہٕ ،نتہٕ آے از تام درجن واد کُلیات تہٕ شعرٕ سۅمبرنہ شایع کرنہٕ ،یِمو خٲطرٕ سانٮ۪و کۂۍیاہ محققوزبردس مٮ۪حنت کٔر۔

[3] وُچھو انہار ،محمودگامی نمبر ،ص ۹۷۔۲۵۔

 [4]  پیر محمد یوسُف ابنِ پیرعلی شاہ ساکن نوگام کُٹہٕ ہار ۔أمۍ اوس یہ کلام دِوسر علاقہٕ کِس درین گامَس منز پیر گُلہٕ صٲبس نِش حٲصِل کورمُت۔

[5] پیر غلام محمداوس کٹہٕ ہار علاقہٕ کِس کوٲرۍ گوم گامَس منزروزان، أمۍ سٕنز لیچھمٕژ پانژھ مثنوۍیہ چھے أکِس شخص نِش مے وُچھمٕژ ،بلکہ  کورُم رٮ۪تس کھنڈس تہُند مُطالہٕ تہ تہٕ پیر غلام محمدس تہٕ تسٕنزن یِمن مثنوۍین متعلق لیوکھُم مقالہٕ تہ ،یُس وٮ۪تھٕ آگر رسالس منزٕ شایع تہ سپُد ، یہ چھُ اکھ تازٕ دریافت شٲعر، تسُند نیچو مقبول شاہ تہ اوس شٲعر ،أمِس مقبول شِہنۍکو ر چھے نوگام کٹہٕ ہارٕ کس پیر نورالدینس باگٕنۍ آمٕژ۔

[6] وٮ۪تھٕ آگر ۶۸۔۷۸۹۱ءمراز ادبی سنگم۔

[7] کلامِ مقبول امرتسرۍ ،تحقیق تہٕ ترتیب ،ناجی منور۔

[8]  1969ءمنز گٔیہ یہ مثنوی "شانِ مومن" نٲوۍشایع۔

[9] پیر پانژالہٕ طرفہٕ رٮ۪تہٕ کٲلِس دوران یِنہٕ واجہٕ نٮ۪ن شٮ۪ہجن تہٕ تٕرنٮ۪ن واوٕ گراین چھِ مرازس منز ہٲج بوانہ ٕ ونان ،ہرگاہ ہۅکھ دٕرِتہٕ ننہ نبہٕ کُنہ وِزِ أتھۍ موسمس منزمعموٗلی وُزمل گژھان چھِ، اَتھ تہ چھے یوان ہٲج بوانہ ِ وَننہ تہٕ دپان اَمہ سٍتۍ چھُ کھہن اندر داں کُلٮ۪ن گۅڈٕ پٮ۪وان تہٕ پوچھر میلان ۔﴿آتش﴾

[10] کاہن گوفال وُچھن وول، غٲبچہ کتھٕ ونن وول ۔کہہ دٔنۍ گوو کہوچہ پٮ۪ٹھ پرکھاوُن ۔

[11] یہ چھُ مرحوم عارف صٲبُن ژاکھ ، یتھ متعلق تمٔۍ لیوکھمُت چھُ زِ عقیدتُک یہ ژاکھ آو 10 دسمبر 1997ءدۅہ جٔمہ تتھ بہلہ پایہ مشاعرس منزپرنہٕ ،یُس پروفیسر مرغوب سٕندٮ۪ن ادبی کارنامن ہٕنزِ سپاس گذاری مۅکھٕ رساجاوِدٲنی میموریل کمیٹی تہٕ جموں یونیورسٹی ہٕندۍ اُردو شعبن منعقد کورمُت اوس۔ پتہٕ اوس مرحوم عارف صٲبن یہ ژاکھ29 دسمبر97ءدۅہ پننہ دستخطٕ مرغوب صٲبس لیکھِتھ سوزمُت ۔﴿آتش﴾