www.kashmirilanguage.com

پتہٕ لٔج زوٗن درس




نثار عظمؔ



***

یمہ کتابہ ہند جملہ حقوق چھ بحق مصنف محفوظ
کتابہ ہُنٛد ناو__________ پتہ لٔج زوٗن درس

شاعر_____________ نثار عظمؔ
چھپن ؤری___________2009 عیسوی

سر ورق____________ پراگاش اکیڈمی،رفیع آباد
کمپیوٹر کمپوزنگ_________ تاحان کمپیوٹرس اینڈوِجوَل آرکایوز بارہمولہ
تعداد_____________ پانٛژھ ہتھ
مۅل_____________ ترے ہتھ روپیہ
(Rs. 300)
چھاپ خانہ__________ جے کے آفسیٹ پرنٹرس تاج کمپنی دہلی
ناشر  : فرحان پبلکیشنز  : ڈنگی وچہ رفیع آباد کشمیر، پن کوڑ نمبر : ۱۹۳۳۰۳موبایل نمبر:  ۹۴۱۹۵۲۶۳۳۳

 .......................................................

 انتساب           

زوٗنۍ چانہ ناوٕ ۔۔۔چٲنۍ دادۍ زانہٕ بٔے

 

دوہلہ وچھ تمۍ تھزر شبس پستی                      
وچھ نہٕ کٲنسی یہ جانہٕ وارن وچھ                

دلُک صحیفہ دمے ورقہٕ ورقہٕ پرۍز مگر   
مےٚ سوُٚمبرُمت چُھ لگے آیہ آیہ راچھ کرُس            

ابلق چھ میانۍخاب تہٕ یوتُے پتاہ مے چھم           
"نے ہاتھ باگ پر ہے نہ پا ہے رکاب میں"

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فہرست
پیش کلام: (محمد یوٗسف ٹینگ)

وچھہ بلُک نوٚوباوژ بل: (شہنازؔ رشید)
یہ چھُ کاوس واچ کتھ باواں: (ڈاکٹر رفیٖق مسعوٗدی)
حمد
نعت
کر بہ رووُس تہِ کُل جہانَن وُچھ
آوے نہ تمن راس یہ دٔرۍ یاو کیٛاہ کرَن
مۅلج یہ دگ چھےٚ دلَن ہنٛز ژٕ بایہ رٲچھ کرُس
دٔسۍ یاب چھۅکن روزِ مےٚ بُلغار اگر یکھ
انہ گٹٮ۪ن منٛز چھےٚ آفتابچ کتھ
آش
کٔتجٮ۪ن زنہ گٔیہ ہردچ لَے
دۅہ دگر واتہ لُکھ سحر ژھانڈن
تمام نظرٕ وژھر وٲلۍ لکُھ پرن ٲخر
دیُت نَبَن اسِہ راش
سۅ
صبح دم دل بۯمان خاموشی
راتھ اوسس تہٕ از تہ تنہا چُھس
وساں مےٚ نش چھُ امارَن ہُہ آسماں شامَن
تمۍ تھوو ہمیشہ سونتھ تہ سبزار أچھن تل
مےٚ واراہ کال ووتُم راتھ ژالان

ہنا ژٕ کٔرۍزِ صبرمیانہ یار گاش ییِن
کرٮ۪م رُم رُم مےٚ یُس سٲراب ،سوزُم
دۅہس چھ لانہ لیٚکھتھ ساس انتشار دلس
مےٚ گٔیہ وٲنسا وں پرٮ۪زلاواں کرہُن شب
پچان کیاز منگاں کیاہ چھ جانور صبحٲے

ارزتھ بٔچتھ یہ چھس تہ سُہ خرچاو شہر میٚون
رژھرتھ وُنہ أسۍ تھاووٚکیاہ
پرتھ پدِ سۅنزل
نژو باغن گُل و گُلزار سپدو
نوٗرچ مُہر ڈٮ۪کس تہ أچھن منٛز کتاب تَس
دغا یوٚدوے کوٚرُے واون کرکھ کیا
تھزرَس خلاف اوس نہ کاوس خلاف اوس
جذبن ہُنٛد جأگیٖر چھ دل
یادن ہُنٛد اکھ لشکر وو ٚ تھ
ہوا صبحک پھُلَے ہٮ۪تھ ژاو چشمن

یہ کیُتھ یہ موسم عذاب لوٗکو
رُمہ رُمہ ونہ وُن
وَتھ ژٕ ژھانڈکھ تہ ژھانڈ خابن ہنٛز
لٲزمن چانٮ۪ن وَتن
ہوا ڈلہ وُن فضا خوشوُن بہارُ ک
نَے زمیٖنچ نہ آسمانچ کتھ
رٔژھرتھ تھاوو پگہ ہچ ستھ
گتھ کٔرۍ نہ پوپنٛرٮ۪و نہ دوٚ دُے سانہ کانٛہہ شمع
اورزۅے
کُکل کُو کُو کرٔتھ وُز ناوِ دادٮ۪ن
ہَن ہَن أندری زالاں روٗدُس ہجرُک نار شبَس
بہ چانہ مایہ شبس چھُس وچھان خاب ولو
الگ صوٗرتھ الگ پہچان تھاوَے
اسۍ کُنہ نسلک اسہکُنۍ دگ
در بدر پھیراں سڑک
ژاپان اوس سایہ تہ شیٚہجار آفتاب
خاب
اکھ وعد آدنُک چھ دلَس منز مےٚ ستھا ہیوٗ
انتظارُک اکھ شباہ وۅنۍ  آخری
وو تھیو یارو تہ اسۍ شیٚہجار ژھانڈو

****

پیش کلام

ازۍ کس شاعرس" کٕٹہ شاعرن ہنٛز کتھ چھے ورگہٕ" چھ زن قلمس تژھ بلیوچپ ( (bluechip لٲگتھ آسان یتھ منٛز ستن سدرن ہنٛدۍ ملر گتہ ماران چھ تہ احساسن ہنٛدس اتھ آولنس منٛز شاعرس تہ رکنہ والان چھ۔ لفظن ہنٛدٮ۪ن شیٖشن ہُندآکار ہٮ۪کہ بیون بیون ٲستھ مگر یمن منٛز چھ محسوساتن ہُند کُنُے آلو گریز تُلان۔ امہ بتہ لیجہ ہنٛدۍ کینٛہ پھٔلۍ چھ سٲنس نویٖنہ پُیہ ہنٛدس سُخن گو نثار عظمؔ سنٛدس یتھ مجموعس منٛز تہ موجود تہ امہ خوٲنچچ سٲرے کیفیت ژینہ ناوان۔

آرام یس نہ آو تہ ژٔج چانہ شہر دوٗر         
تس پرۍیہ کا ینات پنُن کوہ قاف اوس

یۅسہ کتھ مےٚسٮ۪ٹھاہ پرٛیہ ونۍ باسییہ سۅ چھ ز کٲشر زبان کتھہ کنۍ چھ امہ نوِ آکاش وٲنی ہنٛز ہم قدم سوٗتر دھار ہیکان بنتھ۔زن تہ امہ کس لفظہ ووترس بجلی پاورچ یہ اکایل تہ خاموش لہر ازلہٕ پٮ۪ٹھے ڈنٛب ٲس۔ نثار عظم چھُ انسانی جذبن ہنٛز کتھ غیر رٮ۪وایتی اندازس منٛز تُلان۔نہ تتھ منٛز ژکھ، نہ ژٮ۪ڈ تہ نہ ژۅکٮ۪ر۔زن تہ کانٛہہ آسمانی جانواراہ وُپھان وُپھان زمیٖنہ ہنٛدۍ وہ وُچھان۔کُنہ شایہ ہرگاہے زیٖر لٔجس، کُلۍ لنجہ آویزان گژھان تہٕ باشُن ہیوان۔ کتھہ کتھہ منٛز اکھ حٮ۪سہ ہُشار بے مطلبی مگر نظر ہنٛز سنہ ونۍ دگ۔

پدِ پدِامس وُزاں چھ ترنۍ ناگ وتن منٛز                          
وتہ گتھ یہ بختہ بوڈ چُھ چھرا وقتہ دعا ہیٛو

تس وُچھ أچھن اندر مے سٮ۪کھٕے یٲژ رات دوٚہ                                  
وُٹھ ٲسۍ یس گُلاب تہ رۅخسار آفتاب

رُکاں مےٚ نش چھُ پہر کھنڈ ہُہ آسماں شامن

سون جہان چُھ نقشہ بناون والیو تہ معدنیات ژھارن والیو اکھ پٹوارۍ شجرہ تہ کمرشل نیلام گھر بنٲوتھ پوسٹرن کھورمُت۔انٹرنیٹ کٮ۪ن سرابن تہ ا عداد وشمارن ہنٛزن پنہٕ داون مڈتھ۔مگر شاعر چُھ بقول مرزا غالبؔ زن تہ خابس منٛزبیاکھ خواب وُچھان تہ خوابن منٛز چھُ ژکہ تلہ ژیٖنۍمتۍ احساس تہ أچھر والن ہنٛدٮ۪ن انزالیٚن سجٲوتھ نظارہ بُکھ دوان۔پٮ۪ٹھہ کُس طلسماتھ آسہ وۅنۍ سانہ آمہ تاو لجہ مژ کشیرہُند ہُیٛو۔ قۅدرتن اتھ مہرنہ ۂندٮ۪ن زُلفن ہنٛدۍ جنگل سجٲومتۍتہٕ انسانن گُلٮ۪ن زن مٲنٛزآراستہ کرمژ۔ مگر نثارعظم چھُنہ استعارن ہنٛز ٲنہ کھنجہ یا تعریٖفن ہنٛز شبد بِنٛدر لاگنچ ضروٗرت محسوس کران۔صرف کیٖنژن خیالن کُن اشار تہ امچۍمانتھر زند گژھان۔

گُل ریزپرن وٲلۍ تہ شہتوس کتن وٲلۍ    
کینٛہ خواب زنتہ لونچہ گنڈتھ تھاو شہر میون

وتھ ژ ژھانڈکھ تہٕ ژھار خوابن ہنٛز                                         
نتہ ژے ژاپی سڑک سرابن ہنٛز

زن زمیٖنن نٲلۍ ژُھن توسُک پھٮ۪رن   
زن تہ کٲنی شال ووٚل ساری نبن

چھُ کُنہ جنگ نامہ بوزان رٲتۍ راتَس       
تہٕ کُنہ کُنہ توسہٕ ابساواں کرٛہُن شب

ترٛیمہ شارُک عالم چھُ دوٚن الگ الگ ایحساسن دوٗنۍدوان۔ دۅشونی مصرعن منٛز چھ ز امیجہ (images) ۔ پیکر تراشی چھےٛ کٲشر ووورۍ وانچ تہ سۅ تہ یتھ انگریزی پٲٹھۍ (Regal) ۔مگر دوٚیمس شارس منٛز چھُ پیکرس منٛز اکھ تمنّا تہ بُتھ ہاوان۔ یُس کٲنسہ نازلہ ہندِسیٖنہ بنٛدچہ تنہ زن مُژراوان چھ۔یعنی کشیر ہند تمدّنی تہ حرفتی فاتح عالم بنہ نُک آرزو ۔ خبر کُس کیا ؤنۍتن کشیرہُنٛد موجود صورت حال چھ اکہ حقیٖقژ ہنٛز نوبت وایان۔ یہ رند پوشہ مال ییلہ پٔزۍ پٲٹھۍ گندنہ نیرِ، سٲرسٕے کرِ ژس ۔ یُس بے نظیٖرگتکہ وُنکین کٔشیر منٛز گنٛدنہ یوان چھُ۔تمہ کس انجامس پٮ۪ٹٚھ آسہ زینن ہار کشیٖر۔سٲنۍ کشیر، للتا دتیہ سنٛز کٔشیٖر،علمدار کشمیٖر سنٛز کٔشیٖر۔شاید چھُ یۅہے کوڈُر نثار سٔندس کلامس شُگفتگی تہ رنگ بستگی ہُندیہ گریزوُن مگر بے شوٗنک شفق پھولراوان۔خٲرجی طور بٲسۍ تن یہ بوبسیُک کترُ ۔ مگر ییٚلہ سُخن فہمی ہنٛز گندھک تُج لگٮ۪س ، اد ہ چھ آتشباز ہنٛدۍ پٲٹھۍ آسمانس پھُلے نیران۔

تُلمل گژھو تہ سٲدسُنٛد اَستان گژھو أسۍ                          
درگاہ وسو بایہ،گژھو ژرٛار اگر یکھ                    

تمس سُرخی بُتھس پٮ۪ٹھ سنگرن ہنٛز            
سۅ زلفن منٛز کھٔٹتھ تھاواں کُرٛہُن شب                      

سُہ یُس پھُلے ژے دلس زعفرٲنۍ خوشبو ہُیٛو                                       
تمس چھُ واو ژھنڈاں گنٛڈ کلایہ رٲچھ کرُس

ژٲنگۍ ریہہ کس سنا شبس پراراں               
موج تھلہ تھلہ وُچھاں چھے بانن وُچھ

بُتھہ چُھکھ تعبیرُک صحراو                
اڈ پھلۍ خابن رٔچھتن دے

نثار عظم چُھنہ رٮ۪وایتی شاعری ہنٛد انہار تھاوان۔مگر ہرنہ سرنہ وز چُھنہ وُول تہ ولیونگ تہ باسان۔تہنٛد شار ہیکہ گامچ کوٗر تہ پرتھ تہ ژیتس تھاوتھ ۔تسنٛد شار ہیکہ یونورسٹی ہُند پورمُت لُیکھمت جوان تہ پٔرتھ تہ خوش گژتھ۔یہ چھُ رحمان رٲہیؔ سُند ارگہ اشُد مورتھ عام پسند بناونُک سنٛز۔ یہ زن مٲنۍ تو میٖر تقی میٖرس ابن انشا کراں روٗد۔یہ چھُ کٲشر شار چہ خوشحٲلی ہُند ثبوت ز رسولؔ میٖر ،راہیؔ تہ شہنازؔ رشیٖد چھ نثار عظمس زن تہ آرو بارو کٔرتھ اتھہ واس کران۔ظاہراآسہ آرو بارو مۅکلتھ شہنازؔ تس آلون بیہ لل کھۅلہ کران تہ اوے چھ تمۍ سُندمفہوم نے تہ عٲں غٲں یمن شارن منٛز زیادے وُزاں باسان۔

دعا کورُن نہ ، نہ دوٚپنم ژ گژھ روٚبس مٹہ چھُکھ                                
مگر مےٚ وُچھ ز تمس آسہ چشمہ تر صبحٲے

شبس دواں چھُ فقط بے کسی تہ تنہٲیی                                            
کراں حوالہ ہجومن مےٚ چُھم شہر صبحٲے

ماجہ ہنٛدۍ آلو بٔنتھ                             
چھم پتے لاراں سڑک

رٲتۍ راتس کُنۍ تہزنۍ                      
آسہ کیٛاہ سونچان سڑک

رٲہیؔ تہٕ رُسلؔ میٖر تہٕ شہنازؔپرن وٲلۍ      
یمہ یور عظمؔ صٲبہٕ پرن چٲنۍ مُدرۍ شار

خبر مُدر ہیکوا عظم صٲبنٮ۪ن شارن ونتھ __ تم نابد فروش مثلاً احمدؔ بٹوٲرۍ،صمدؔ میر،مہجورؔبیترچھ کرتام پننٮ۪ن ہار لونگنٮ۪ن عام خاص کرتھ آسودٕ سپدمتۍ۔عظمنہ شعرچۍ کٔنڈ بٲسۍ تن قند کوفوٗر چے، مگر ییلہ یہ حواسن ہندس تندورس منٛز ویگلتھ رُمن رُمن تیلان، زن چھ یہ سرپھہ زہرُک تیز بٲگراوان تہ پرن وٲلس اکوُہمہ صدی ہندس بازار عکاظس منٛز دورٕناوان۔ آخرس پٮ۪ٹھ ہیکہٕ نہٕ بٕہ تمہ نظمہ ہُند ذکر کرنہ وراے قلمُک دُدسہ ہومراوتھے یۅس عظمنؔ ماجہ متعلق لیٖچھمژ چھے۔ مے چھُ باسان ز سانہ ماجہ متعلق، حوّا پٮ۪ٹھہٕ لل ماجہ تام، چھنہ کٲشر پٲٹھۍیژھ کانہٛہ نظم لیکھنے آمژ۔ماجہ نیارُک یہ میوٗٹھ سوغات گژھیمہ کتابہ ہُند تیوتھ دۅد پیالہ زٲنتھ أندرمٮ۪ن رگن شہلاونہ خٲطر کاشوہ کاشوہ چیوٗن یمن رگن عظمنۍ زمانہ آگاہی ویسے تتُر تُلان روز۔یوت اندر واتہ تیٖژ ٹۅپہ روز دوان تہ دگان۔

صحراوس منٛز ناگہ پوکھر              
گۯشمس اندر واو رنگاہ

زنہ تہ ارامٕچ پل چھ کھٮ۪واں نوسوٗرچ دگ
زوٗن اناں چھٮ۪س سۅنہ تھالٮ۪ن کیتھ مخملۍ خاب   
یلہ تس شخصس
کلہ پیٹھۍ اتھہ پھرناوان موج

موج چشمن تلٕے مےٚ باساں چھم        
از تہ یوٚد کانٛہہ کراں چھُ دانچ کتھ

موج چھے فطرت دٮ۪د ہُنٛد شمایل اختیار کٔرتھ سٲنس تاون زد دورس پل صراطس تارنچ شکتی تھاوان۔ خدایہ سنٛز درٕٛے۔

محمد یو سف ٹینگ   :    وزارت روڑ۔جموں

***
وچھہ بلُک نوٚو باؤژ بل

کمے کال گو ،یمے کٔژتام ؤری ز کمراز پرگنہٕ کہ حمل علاقہٕ ، یتھ پتہ دورِ پٮ۪ٹھہٕ کس کستاں صٲبس خۅش کرنہٕ خاطرٕ ہنگہ منگہ سرکٲرۍ ناو رفیع آباد تھاونہٕ آو ، منٛز ؤژھ اکھ لٲوآواز۔ڈنگۍ ؤژھۍ سریہ ہُنٛد یہ آلو، یُس تھنٕہ پیٚو نُے جُسدار باسیاو تہ ووت زنٛتہ کٔژن تام ژہٮ۪ن منٛزکٔشیر ہنٛدٮ۪ن طرفاتنے یوت نہ، پیٖر پانٛژالہ اپورجوٚم تہ، تہٕ چناب ویلی ہندس گرٮ۪زو نس علاقس منٛز تہ۔ ازۍ کس اصطلاحس منٛز زنتہ انٹرنیٹُک اکھ کلک تہ بس۔ نثار عظمؔ ژاو پننہ علاقہ چہ باڈو دار ادبی تنظیٖمہ، رفیع آباد ادبی مرکزس منٛز،کھسہٕ ونہ پانے،تہ ہیٚژن امہ انجمنہ باپتھ تتھہ کنۍ کٲم کرنۍ، زنتہ کُستاں وٲنٛسٹھ بٲنی کار۔یہ ایوان لٔبتھ لٔبۍ أمۍ شخژن یہ دپۍ ز تہ تخلیٖقی سوٚدرس تار ترنکۍ ہم کھوٗر۔
نثار عظم چھُ شاعر۔مگر سُہ شاعر نہ یم اسہ دۅہ دشۍ سمکھان چھ۔یہ چھنہ کُنہ تہ صوٗرتہ ہجوٗمُک حصہ ۔پزر گو یہ زِ بیٖر بارٕ منٛز تہ بیوٚن۔واریاہس حدس تام بیوٚن۔کٲشر شار مٲدانُک سُہ تاز دم گۅنماتھ
، یُس نہ صرف پننہ کھیر ہندٮ۪ن باجن کتہ کور برٛونٛہہ درامُت چھُ ،بلکہ اگر کتھن تہٕ ورتاوس سر کھرکرن واجنہ نظر " پزنہ پٲٹھۍ "پتہ لٔج زوٗن درس" ناوۍیتھ مجموعس ژلاں ژلٲنی تہ نظر دن، بہ ونہ دعواہ سان ز کاملؔ ، راہیؔ تہ تو پتہ چیٚو کٔژوتام شوٗب دار آوازو ورٲے ما باسہ باقے انبار یٔہے ژھایہ ہلس ہُیٚو بیہان۔نثار عظمنۍ ناوٕتہ آو باگہ سُے سمندریتھ ملرملر انہ گٹِکۍ اتھاہ زُوۍ ڈیرٕ ترٛاوتھ چھ۔ؤں گو چٲنۍ میٲنۍپٲٹھۍژھۅپہ کرنہٕ یا نالہ دنہٕ بجایہ چھ سُہ پننِس باوژ بلس باوقار زٮ۪و دواں۔با ہُنر تہ با غٲرتھ آلو۔

اسہ ژھٲر نہ زرخیز زمیں، ژھور نہ اسہ آب
وچھۍ یتہِ تہ سیٚکلۍ شاٹھ
، ؤوِکھ خاب تہٕ شیٚہجار

نثار عظم چُھنہ محض خابے یوت وُچھان ، سُہ چُھ یمی شہرک بسۍکیٖن، سُہ انسان یس سونُے ہیٚو دل جگر چُھ، تہ تم سٲری فطری کمزور ۍ یہ، وہم تہ وسہ واس تہ ،یم انسانس فطرتن آورٲوتھ چھ۔

تمام رٲژ نٹاں أسۍ چھ گاش پھۅلنس تام
دلن وہم چھُ یُہے زالہ کُس خبر صبحاے

شبس دواں چھُ فقط بے کسی تہ تنہٲیی                    
کراں حوالہ ہجومس
،مےٚ چھُم شہر صبحٲے

تخلیقی ادبکہ حوالہ چھُ عظمؔ واریَہس حدس تام سارنے ریوٚٲیتی تہ تاز پڑاوَن جان پٲٹھۍ وٲقف ۔ سُہ چھُ "عالمی گام" ہشو اصطلاحو سان سٲری چلینج تہ پَزر سمجان۔ امہ حوالہ چھُ میون یہ دعواز نثار عظمؔ چھُنہ محض نٮ۪برمہ دُنۍ یُہک بے رُمل ٲنہتلاش کٔرتھ ہیکان بلکہ یمہ وقتک اصل عالمی دود۔ یعنے ٲندرُیم سیکستان تہٕ وٲراگ نہ صرف محسوس کران، بلۍ کہ اتھ انسان سُنٛد، یا یمہ کُلہُم انسٲنی سماجُک ساروے کھۅتہ بۅڈ وکانہٕ ونان۔یتھۍ حوالہ چھ یتھ شار سوٚمبرنۍ منٛز کرٛکہ دتھ ونان ز یہ اندرۍ ژوٗر آو بہر حال نٮ۪بر پٮ۪ٹھے، اسی اوٚن تہ کرِ پننہ وچھہ چہ ناگہ جۅیہ أمۍسندسٕے سیٚکھ سیمنٹ ٲڑرن وٲلس بیلچس حوالہ۔امہ حوالہ فقط یہ لۅکُٹ مۅکُٹ شار دلیلہ رنگۍکٲفی تہٕ بر وقت تہ ۔

نٮ۪برمۍ سٲری گے پسپا
انسانس پھوٚر أندریُم ٹھگ

نثار چھُ جان پٲٹھۍ زاناں ز ریوایتی سونٛچن ترٛاے یا مُستعمل موضوع شعر بند کرنُک وقت چھُ کتہ کور مۅکلیومُت ۔ سُہ چھُ پانہ ازۍکہ ٹیکنالوجی دورُک زندٕ ثبوٗت، اکثر لیپ ٹاپ نٲلۍ ترٛٲوتھ پکان آسان۔تٔہنٛز گاڑِ انٛدر اگر شُرٮ۪ن بٲژن کیٚوت میوٕ مٹھٲۍ نیرِنہٕ، مگر عالمی ترسیٖلُک یہ لوٚکُٹ ٲنہ پوٹ آسہ اتھ منٛز ضرور موجود۔ سُہ تہِ googl earth/facebook تہ انٹرنیٹس ستۍ وابستہ سٲری ما بٲقی upload ہٮ۪تھ ۔ تس چھُ پتاہ ز ازچۍ کشیر یا کٲشُر ادب ہیکہ نہ کُنہ تہ صورتہ، عالمی نہجو، مسلو تہ سونچن ترایو ہنٛد حوالہ وُنہ تہ پوٚت کُٹھس منٛزیتھ۔تس چھُ تجربن پے زِ أزچ کشیرکیاہ چھٚے، یتہ کہ نبکۍ زوٗن افتاب کتھ حدس تانۍ چھ پرٛٮ۪زلان،یا سانہ اسمانہ کٍتۍ تارکھ ۂرۍ۔امہ صورت حالہ چھُ تسُنددعا تہ وچھ کوران۔یَتھ منٛز نمناک منظر کشی چھےٚ تہ سٍتی گداگر سُند ہلم دارُن تہ وکھر۔

یتُیُک پرٛٮ۪تھ ٲنہ اوٚن ، ژانگٮ۪ن نٹاں ریٚہہ
ژٕ یتھ انہ گٹۍ زُوِس افتاب سوزُم

یتھے کنۍ أزیُک بیاکھ ہٲبتھ ناک چلینج؛ یتہ یوٚدوے عالمگیر چھُ، مگر سانہ لۅکچہ مۅکچہ وار، سیمٹس، سیٚکہ تہ باجر تل دفن کرنکہ اعتبار بوڈ بار مسلہ ۔نیُک روشن دان تے مُژراوو، وٲنج چھےٚ ژھیٚنان۔ ادٕاسہ کیا، تہ سانٮ۪ن سیٲسی انتظامی تہ فکر ی اقتدر والٮ۪ن حضراتن کیا؟ أزۍکس اصطلاحس منٛز چھ اتھ Urbanisationونان۔شہر گُرِس کھستھ گام لاران۔ راتکۍ داں ڈل،ویٖر وار،بادام تہ ژوٗنٹھۍ باغ بُنگلن، لرٮ۪ن،وانن تہ کمرشل ادارن منٛز تبدیٖل گژھان۔ پھِریٚو ورق تہ وچھو ز نثار عظمس کتھہ کنۍ چھ یم سورٕونۍ سبزار تہٕ Landscapeوَچھ ژٹان۔ تَس چھُ راوَن تیوٚل مَژر تُلاں۔۔۔ امہ کھۅتہٕتہ تمن أچھن تہ کنَن پٮ۪ٹھ حٲرتھ گژھان ، یمن ۔۔۔ یمَن یہ لُر پارَے نظر گژھان ، نہامیُک کرٮ۪کہنادے نیٚند ر تُلان۔ تَس چھُ پنُن پان کُن تہ کیوَل باساں۔ توپتہ سرا پا احتجاج بنان ۔

کانسہ أکس چُھنہ گوشن ہوش
گُدرُن بٔلۍ أسۍ باوو کیاہ؟

أتھۍ سٍتۍبیاکھ دود۔یُس اسہ گامکٮ۪ن پھوٚر۔فکری چھُنہ تران اتھ ونہ وا عقلہ ناش ، کنہ گلیمر یا ونوسا احساس کمتری نتا Easy Money ؟ اکثر دوٗر گامکۍ سریَن منٛز، تہ سر یَن ہندۍ شہربسنہ یوان۔پننۍ وراثتھ ترٛاوتھ تہ جدن یا ببن ماجن ہنٛز قبرٕ گامے ترٛٲوتھ، تہ پتہ عیذ دۅہ فاتح پرُنfacesavingموکھہ، ر ژھہ کھنجہ پننہ گاڑ منٛز پنُن گام وسُن۔خدا بوٗزن ز نثار عظمس مہ سپدن یہ واقہ۔متہٕ کٔڈۍتنس ورہ مُل یا شہر چہ pollution لد سڑکہ کل۔تہ کیاز سُہ چُھ پننہ حٮ۪س آگہی کنۍ یہ دگ محسوٗ س کران، تہ گام ترٛاومتٮ۪ن ہُندسُہ آلو بنان، یُس یتھٮ۪ن لُکن شاید کُنہ کُنہ ٲندری شرٛاکہ والاں آسہ۔وچھۍ تو یم ز شار ۔چھا کانہٛہ ماحول رژھراون واجنۍ سرکٲرۍ یا غٲر سرکٲرۍ انجمن ، یُس یم ز شار تُلہ، تہ گامہ پٮ۪ٹھہ شہر گژھن واجنٮ۪ن سڑکن پٮ۪ٹھ بڈٮ۪ن ساین بورڈن لیٖکھتھ تھاو۔ اختلاف کرن والٮ۪ن دوستن ونو ز یہ چھنہ محض سڑکہ ہنٛز کتھ۔نہ یہ ز أسۍ کیاہ چھ سڑکہ بناونس یا ترقی خلاف۔ غزلکۍیم دۅشوے شار چھ Multidimensional ۔ معنوی اعتبار ستہ رنگۍ، فکر ہنٛدۍ حوالہ اگر نے تاز دم، مگر تازٕ ورتاوچ بٔڈ مثال۔کم از کم چُھنہ مےٚ ییٖتہ لۅکٹہ وزنُک (فاعلاتُن فاعلن) یا امہ قبیلُک کانہٛہ شار أزُیٚک تام وُچھمُت۔

ماجہ ہنٛدۍ آلو بنتھ     
چھم پتے لاراں سڑک
گامہ پٮ۪ٹھہ واتتھ شہر
آسہ پشتاواں سڑک

گلوبلایزیشن (Globalisation )،انفارمیشن ٹیکنالوجی ،سیل فون، گاڑِ بیتر ہشہ سہوٗلیژآسنہ باوجود تہ کۅلہ رادو،آرو تہ ویٖر وارو دوٗر شہر ژلتھ بسَن والٮ۪ن گوٚژھ متہِ گرٛشمہٕ یہ شار بوز ناونہ یُن __لَبُن تہ راوُن باسٮ۪کھ دیٖدماں۔

 بولاں چھ یتکۍ آرٕ تہ محفوظ شہُل سون
یمہ گامہ ازُیک تام زندے بوٗنۍ قداوار

یمے چیٖز ، یُہے بےٚ دوٗن ورتاو تہ تاز تریٖن موضوع تہ فکری جنوٗن،چھُ نثار عظمس پنہ نہ کھیر ہندٮ۪ن سارنے شاعرن منٛز مُمتاز بناوان۔نثارس چھےٚ موزوٗن لفظہ راش بدس ۔ تسُند اسلوٗب آسہ کُنہ کُنہ کینٛژن یا کُنہ آلوس پتے لاراں باساں ، مگر اتھ ہیٚکونہ قطعاً شوٚد تقلید ؤنتھ ۔ تس چھُ یقین ، تۅژھ۔سُہ چھُ ہجومہ منٛز نٮ۪بر نیرنُک جُس تہ تھاوانتہٕ خواب تہ۔ دلیلہ مۅکھہ کمے یم ز ژور شار۔

ژےٚ کیاز جوٗن یتھٕے گُل یوان نظرن تل
یواں چھُ یار دسمبر کلینڈرن ٲخر

سانہ عصری کربچ کتھ تُلتھ کُس گژھ نہ نمناک۔مگر عظمُن ورتاو،اتی باکہ ژھٹہ ناواں تہ اتی آش رژھراوان۔

 کوٚت گژتھ راجہ پوٚت نہ پھیرٲنی
کوٚت گژھن ماجہ کُس شہر ژھانڈن

کٔتۍ جن زن گے ہردچۍ لے
تیلہ کُس ونہ اسہ سوٗنتُک پے

توہہ اگر انہ گٹیُک کوٚرو گۅنگُل
اسہ تہ تھل کٔر ؤں آفتابن ہنٛز

از کل یہ بوٗنۍ تام دواں چھم مےٚآمہ تاو
لۅکچار گرٛشمہ کال دواں میوٗٹھ تاپھ اوس

دوٚپمس انہ گوٚٹ چُھم ژاپاں                       
دوٚپنم ہنہ ہنہ چمکاوتھ

ناو تہ رووٚ تہ داو تہ ژھیٚنۍ
پرٛارو کس
، ابساوو کیا؟

نے یندرے نے شہتوسے
راتس ارزتھ ہاوو کیاہ؟

نثارُن باؤژ بَل،مُشٲہد، حٮ۪س آگہی، عصری بیدٲری بیتر چھیی تاریفن لایق مگر یہ چُھ بیاکھ اکھ شاعر، یُس تمن کژن تام صاحب کتابن ہنٛد س لسٹس منٛز شامل چھُ سپداں ، یمو وزن پیمٲیی باپتھ نہ ، بلۍ کہ مثٲلی شاعری کٔرتھ یہ ثٲبتھ دیٚت کٔرتھ ز عربی فارسی بحوٗراوزان چھ کٲشر زبانۍ باپتھ پوٗرپور لگہ ہار۔لگہ ہارے یوت نہ بلۍکہ Genuineشاعر سنٛزن تخیُلی پکھن بے مثال قوّت پرواز بخشان۔ رب بخشن نثار عظمؔ سندس فنس تہ فکر زیاد زیاد بہارتہ، تہ جہار۔

شہنازؔ رشید : جانی پور،جوٚم

***

یہ چھُ کاوس واوچ کتھ باواں

نثار عظمؔ چھُ میٲنۍ کنۍ سُہ گُلاب یُس وُنۍ وُنۍ پھوٚلمُت چھُ۔وُچھن وٲلس متھ گژھان ز ٲچھن تلے تھاوہَن۔صوٗرتھ تہ سیرت دۅشوَےأمۍسندِ شوخ انہارُک پَے دوان ۔مگر ییٚلہ أمۍسےتازے قٲلبہ درٛامتس عظم سنٛدۍشار انسان پران، بوزان چھُ، ہُے بنگہ چھُ گژھان۔أمۍ ساتہ چھُ نثار کُستام سُہ عُمر رسیدٕفنکار باسان، یمۍ زیٖٹھ زندگی آسہ گُذٲرمژ،تہ ذٲتی بییٚہ اجتمٲعی سطحَس پٮ۪ٹھ ان بوٗد سرنۍ وۅگنۍ آسن وُچھہ متۍ تہ سٔرۍ متۍ۔نثارُن شار چھُ اتی ژۅدٲہمہ رٲژ ہُنٛد زوٗنہ شب تہ اتی گرٛشمہ کالُک دُپہر ۔گہے رُسل میرُن لول تہ گہے أزیُک وٲراگ۔بہ چھُس مُطمین ز کیٚنٛہہ ؤری برونٛہہ یُس وۅتھہ وُن گۅنماتھ مےٚ پننِس ٹٲٹھس یارس تہ کٲشر زبٲنۍ ہنٛدس معتبر تہ معروف شٲعر شہناز رشید صٲبَس حوالہ کریوٛو ،تمۍ چھُ وۅنۍ نہ صرف سرو چالہ پنُن فنکارانہ کاڈ کوٚڈمُت، بلۍ کہ یوٗت پُر اعتماد بنیوومُت ز یُتھ ہیوٗ دعواہ کرنَس تہ چھُنہ واے بران ۔

رٲہی تہ رسُل میر تہ شہناز پرن وٲلۍ     
یمہ یور عظم صٲبہ پرَن چٲنۍ مۅللۍ شار

یہ اعتماد پننہ جایہ ،مگر وُنہ چھُ عظمسؔ واریاہ سنگلاخ سرکرنۍ،لہازا یُتھ ہیوٗ دعویٰ کرُن چھُ میٛانہ خیالہ زہر مَٹھ چنَس برابر____بہ پرٛار تَتھ دۅہَس ،ییٚلہ یہ دعویٰ صحیح ثٲبت گژھہ۔خدا دی نَس قدمن مدد تہ قلمَس رُمہ ریٚشہ سُنٛد آے۔

                       
ڈاکٹر رفیق مسعودی : ڈنگی وچہ رفیع آباد

حمد

کایناتُک نظام چانی سٍتۍ

صبح دُپہر تہ شام چانی سٍتۍ

گتھ چھ پوٗنپرۍ کران باغن منٛز

گل پھۅلاں شہر گام چانی سٍتۍ

ماتحت بحر و بر چھ چٲنی بس

واو ناون امام چانی سٍتۍ

ابتدا گوٚ یہ وق تہ چانی سٍتۍ

 سپد یتھ اختتام چانی سٍتۍ

وتھ ژ ہاوان کاروانن چُھکھ

 تم چھ پراواں مقام چانی سٍتۍ

چھُس عبادتھ کراں فقط چٲنی

چوٗن ادنیٰ غۅلام چانی سٍتۍ

شعر میانی نثارؔ ژیےٚ اللہ

 چُھم یہ شیریں کلام چانی سٍتۍ

***

نعت

ذکر کمۍ سُنٛد سپُد یکدم فضا گو شادماں لوٗکو

زمیں سٲرے یہ کُل عالم تہ سورُے آسماں لوٗکو

سہل کتھ ما مدح خٲنی کرنۍ عربی شہنشاہسؐ

یہ باوتھ حزض قرآنس منٛز خدا پانے کراں لوٗکو

شہنشاہ عالمن ہُنٛد یُس چھُ مٲلکھ حوض کوثرکُے

سُہ حُجرس منٛز بساں واللہ یمس خٲطر جہاں لوٗکو

مخٲلف یوٚد مےٚ چھٮ۪م سٲری مےٚ مدتس چھُم رسوٗل اللہ

سفینس بوٚٹھ لگُن میٲنس، مہ ٲسنۍ بادباں لوٗکو

عظمؔ للوان جگرس منٛز فقط اکھ اورزو أندری

دعا کٔرۍ تو وُچھتھ مر ہا مدینک آستاں لوٗکو

***

کر بہ رووُس تہ کُل جہانن وُچھ

کیاز رووُس تہِ میانۍ پانن وُچھ

دوہلہ وُچھ تمۍ تھزر شبس پستی

وُچھ نہ کٲنسی یہ جانہ وارن  وُچھ

زیوٗٹھ صحراو زیٖٹھۍ ہارنۍ دۅہ

خاب یُتھ کیاز بادبانن وُچھ

پرٛتھ پٔدس ناگ پرٛتھ پڑاو گلاب

وتھ عجیبے یہ کاروانن وُچھ

بس بہ بنٛجٲرۍ قسمتن مورس

کتۍ گردش یمۍ آب و دانن وُچھ

ژٲنٛگۍ ریہہ کس سنا شبس پراراں

موج تھلہ تھلہ وُچھاں چھےٚ بانن وُچھ

پہر وو ل شاہ دو جہاںؐ سپدتھ

پہر ہنٛدۍ خاب لامکانن وُچھ

پرٛتھ پٔدس ناگ پرٛتھ پڑاو گلاب

وتھ عجیبے یہ کاروانن وُچھ

***

آوے نہ تمن راس یہ دریاو کیا کرن

پھٔٹ زن بٹھِس پٮ۪ٹھے وں تمن ناو کیا کرن

پرٛاگاش چُھکھ لبُن تہ ژھنٛڈن لوٗکھ پتھ ونن

یوٚدوے نہ آفتاب تتٮ۪ن دۯاو کیا کرن

اتھواس کرنہ خاجہ خضر آکھ وتھ لبن

رٲوکھ اگر ؤں توتہ کہن گاو کیا کرن

چٮ۪ن دامہ ستھ سُدر تہ اگر تاپہ ددۍ بدن

ہمریاکھ نہ یوٚد توتہ منُک تاو کیا کرن

گامچ خبر انن تہ گُزارن یہ شب کتٮ۪ن

میٖجکھ اگر نہ  جایہ  پناہ  کاو کیا کرن

***

مۅلٔج یہ دگ چھے دلن ہنٛز ژٕ بایہ رٲچھ کرُس

یہے صدا چھے گژھاں جایہ جایہ رٲچھ کرُس

یہِ سۅے سۅ ہیر چھےٚ یۅس کھساں عرشس کُن

دُبارکتہ ژلبکھ پایہ پا یہ رٲچھ کرُس

دلُک صحیٖفہ دِمے ورقہ ورقہ پٔرۍز مگر

مےٚ سوٚمبُرمُت چھُ لگے آیہ آ یہ رٲچھ کرُس

سُہ یُس پُھلُے ژے دلس زعفرانۍ خۅشبو ہیوٗ

تمس چھ واو ژھنڈاں گنڈ کلایہ رٲچھ کرُس

یمس چھ تٲبیا سٲری خزانہ تٲبیٖرکۍ

مےٚ از سُہ خاب چُھہ درٛامُت گدایہ رٲچھ کرُس

*

دٔسۍیاب چھۅکن سپد مےٚ بُلغار اگر یکھ

مشہن مےٚ پننۍ دٲدۍ دۅکھ آزار اگر یکھ

مونم ز دتُکھ بونہ پنس نار اما پوز

ہاوے بہ مےٚ نش توتہ چُھ شیٚہجاراگر یکھ

کُس جوٗگۍ لیٚکھتھ گوٚے ژے ڈٮ۪کس گرٛشمہ سٮ۪کستان

کرنے پدٮ۪ن ژے میٖٹھۍ یم سبزار اگر یکھ

ولہ ژیرٕ پھُلے چھاو تہ کُنہ ناگہ بٹھس پٮ۪ٹھ

پانے وُچھکھ ژ پرٚوٗن سُہ دربار اگر یکھ

تُلمُل گژھو تہ سٲد سُنٛد استان گژھو أسۍ

درگاہ وسو بایہ، گژھو ژۯار اگر یکھ

*

انہ گٹٮ۪ن منٛز چھ آفتابچ کتھ

کتھ حُسیننۍ تہ کربلاہچ کتھ

جنگ چُھ اپزس خلاف پزرُک بس

کُلۍ یتن چھنہ یہ اقتدارچ کتھ

یاد ہنگہ منگہ پٮ۪واں مے آل نبیؐ

زنٛہہ تُلاں کانٛہہ اگر گلابچ کتھ

دوٚدسہ چشمن تہٕ وٹھ گژھاں جگرس

ییٚلہ تہ بوزاں بہ چُھس فراتچ کتھ

تو پتن حض کرکھ بےٚ سر موصوم

بس امامو کرییہ امنچ کتھ

*

آش

صبحے صبحے تمۍ مُژروو
                        دروازس تور
تمۍ وُچھ تمہ سند برٛاند پیٹھے
میٲنس برٛاندس تام زیٖٹھ کھیاہ اکھ
یمہ کس سنرس ووٗنتھ نٔہ کانٛہہ
کیول سٔنۍکھے
یتھ منٛزدۅشوےآنگن
سٲری چھجل سرو تہ ساری
برجس پھوٚجمژ تھر تہ تمن ہنٛدۍ
اڈپھلۍ ٹوٗرۍ ہٮ۪نہ آمتۍ ٲسۍ

لُت لُت
گیہ اتھ کھیہ منٛز
سانٮ۪ن پرٛانٮ۪ن نوٗر ٲچھن ہنٛز
سٲرٕے ٲہی
کُلہم ارزتھ دۅیہ خٲرن ہنٛز
صبحکہ نوٗرکہ گۅڈنچہ پرٛو کھۅتہ
شوٗژ تہ شوٚدشُرۍ باشہ تمام

سانٮ۪ن رشتن ہنٛز تتھ نپہ ونہ تارکھ مالہ
زنتہ دواں گوٚ دام اویوٚد
وُمراتن ہُنٛد ہلکٲرۍ گوٚمُت
بلیک ہول۔۔۔۔۔

 راے جدا گیہ
ماے مٹھاں گیہ
آے لباں گیہ لوٚت لوٚت کھے
پُھٹجٮ۪ن کٮ۪تھ میٖراث پنُن ہیٚتھ
اسۍ دۯایہ بازر۔۔۔۔۔۔۔
اسہ نیہ نُنٛد ریشۍبیہ للہ ہنٛز
سٲرٔے ارزتھ لیٖلام کرتھ
کھیہ ۂنٛدۍ انہ گٔٹۍ ہنہ ہنہ آوُر
سون وجوٗد
پرٛزنتھ سٲنۍ

اسہ گیہ سٲرٕے وانٛس
یۂے دگ للناواں
اسہ گوٚو واراہ کال عذابٕچ قبر کڈان

وکھ وۅنۍ آو زِ سانہ امارُک
ارمانن ہُنٛد
سورُے پرٛاگاش
شش جہاتن چھکراوو

ولہ أسۍ دۅشوَے
سٲرٕے دٕے سٲرے نفرتھ
سٲری ہلکٲرۍ ہاوس
اوُچھ چھۅکن ہنٛز سٲرٕے دگ

سٲری شکو شکایتھ
اندرمہ زہرچ سٲرے تیہہ
سورُے سوُٚمبرتھ یکجا کھیہ منٛز دفناوو
تہ پرٛارو سونٛتس
یلہ أتھۍ کھیہ نش پوش پھۅلن۔۔۔
بسیار امارکۍ پوش پھۅلن

*

کٔتجٮ۪ن زن گیہ ہردچۍ لے

تیلہ کُس ونہ اسہ سونٛتُک پے

بُتھہ چھُکھ تٲبیٖرُک صحراو

اڈپھٔلۍ خابن رچھتن دے

شجرٕ چُھ کاغذ تلمن پٮ۪ٹھ

واوس ونہ زٮ۪نہ یورُک پے

چانٮ۪ن یادن ہُند کھنڈر

دلہ کس شہرس ییٖژے شے

نبضس نبضس تُجنم دگ

دوٗر چُھ کستاں وایاں نے

*

دۅہ دگر واتہ لُکھ سحر ژھانڈن

روومُت کیاہ چُھ در سفر ژھانڈن

تن نپاں چھکھ منس تُلیٚکھ کھے کُس

کیاہ کرن کُس کلایہ گر ژھانڈن

یلہ تمن ترٛاوِپتھ ونچ پوٚت کل

کاو نیرن تٕہ کاشغر ژھانڈن

ژم لتن ہنٛز یمس وتن لارے

کتہ سُہ پھیراں چُھ دربدر ژھانڈن

کوٚت گٔژتھ راجہ پوٚت نہ پھیرانی

کوٚت گژھن ماجہ کُس شہر ژھانڈن

*

تمام نظر وژھر وٲلۍ لکُھ پرن ٲخر

 گُلن پھۅلُن چُھ بہارس مگر ہرن ٲخر

 یمن چھے وٲنس گمژ پھاٹہوان ارمانن

 ہوٚکھُن تہ آسہ یمن دوٚن سمندرن ٲخر

 مہ ژٹھ تہ رشتہ سری از ژٕ یتھ شہارس سٍتۍ

 ژیتس یہ تھاولگکھ ما یمن وتن ٲخر

 ژے کیاز جوٗن یتھٕے گُل یواں نظرن تل

 یواں چھُ یار دسمبر کلینڈرن ٲخر

 یمن چھے ماجہ کران انتظار سڑکن پٮ۪ٹھ

 ضۅروٗر نظر تمن تم گبر گژھن ٲخر

*

دیُت نہٕ نبن کانٛہہ راش تٕہ پتٕہ

 پٮ۪و نہٕ پگاہ پرٛاگاش تٕہ پتٕہ

 کنہِ شہرس منٛز دفنٲوکھ

 راتھے شیٖشوٗ لاش تہ پتہ

 جاناوارن پر کترتھ

 اسنہ لوٚگُکھ آکاش تٕہ پتٕہ

 منکس نیٖلس اسمانس

 کوٚڈ نٕہ خیالو واش تٕہ پتٕہ

 صحراوس منٛز رخت سفر

 ابرکۍ کژتاں خاش تٕہ پتٕہ

 انہ گوٹ لٲگتھ سفرس دراکھ

 وتہ زن سمکھی گاش تہ پتہ

(ردیفُک ٲخری رُکُن شعوری طور تجربہ رنگۍ متحرک کرنہ آمُت)

*

سۅ

پرٛتھ کانٛہہ شخصاہ زنتہ لباں
صحراوس منٛزاکھ ناگہ پۅکھٔر
کٹھہ کوٚش کالس ژیرٕ پھُلے
چلے کلانس وچھہ وُشنیر
گٹہ کارس منٛز گاشہ مُنار
گژھنہ گژتھ زنہ نظر وژھر
گرٛیشمس اندر واو رنگاہ
زنتہ ارامٕچ پل چھےٚ کھٮ۪واں
نوسوٗرٕچ دگ
زن تہ کراں
چھٮ۪س گوٗر وچھس منٛز راتھ رٔٹتھ
زوٗن اناں چھٮ۪س
سوٚنہ تھالٮ۪ن کٮ۪تھ مخملۍ خاب

زن تہ کراں چھٮ۪س
سٲری تارکھ
اندۍ اندۍ گتھ
......

زنہ پرٛتھ قدمس
وتہ ہاوُکھ چُھس
خاجہ خضر
آمہ پنَے زنہ ناوِ لگاں چُھس
صدرس تار
یلہ تس شخصس
کلہ پٹھۍ اتھہ پھرناواں
موج

*

صبح دم دل برٛمان خاموشی

 سونٛچہ تھرِ گُل پھۅلان خاموشی

 اندر دم پُھٹۍ گُمُت چُھ سورُے کینہ

 نٮ۪بر پھیراں طُفان خاموشی

 شور محشر چُھ بستین ژاپاں

 از تہ صحرا ژھنڈان خاموشی

 دم پُھٹَے سیٖنہ کس ونس اندر

 سٕہہ چُھ اندریُم گرٮ۪زان، خاموشی

 کٍتۍ پوٗنپرۍ دزن تہ کٍتیٚاہ دٔدۍ

 ریٚہہ چھےٚ شمعس نٹان خاموشی

 خشمہ ۂتۍ گتھ کران پوٗنٛپرۍ اتھ

 ریہٛہ چھےٚ شمعس نٹان خاموشی

 چھٮ۪نہ پتاہ کر یہ کتھ پڑاوس پٮ۪ٹھ

 وانٛسہ ہُنٛدکاروان خاموشی

*

راتھ اوسس تہ از تہ تنہا چُھس

 شب ژۅداہم تہ بییہ بہ تنہا چُھس

 بیٖر بارے چھے لالچوکچ ہش

میانہ پانو بہ کیاز تنہا چُھس

 دل پھۅلٮ۪م یوٚد پھۅلن گُلاب وتن

 یکھ ژکر نوبہار تنہا چُھس

 خشمہ ہوٚت سخ وۅلُر چھُ یااللہ

 تار دی زٮ۪م مے ناو تنہا چُھس

 بے قرٲری دلس چھے شامہ پٮ۪ٹھے

 از سُہ یُن گۅژھ نثارؔ تنہا چُھس

*

وساں مےٚ نش چُھ امارن ہُہ آسماں شامن

 رُکاں مےٚ نش چُھ پہر کھنڈ یہ کہکشاں شامن

 دۅہس کٔرتھ ژےٚ امارچ تہ زندگی ہنٛز کتھ

 وناں ژٕکیاہ یہ نٔوے چُھکھ وں داستاں شامن

 سنگرپھۅلاں تہ پھۅلاں چھم گُلاب ارمانن

 مےٚ نش رُکاں چھ مژُھیل خابہ کارواں شامن

 مےٚ دُے دۅہس چھُ سوٚمبُرمت یہ چانہ رایہ متیٚو

 یہ گاش گوٚژھ نہ گژُھن از تہ رایگاں شامن

 مےٚ واو ونتہ ژ ما میانہ گامہ کنۍآمُت

 توے چُھ نافہ ژھٹاں از مےٚ جسم وجاں شامن

*

تمۍ تھوو ہمیشہ سوٗنٛتھ تہ سبزار أچھن تل

 میٛے روٗد ہرد تاپھ تہ آزار أچھن تل

 تتہ اوس سفید خوٗن وۅزُل آب سٮ۪ٹھا یاف

 بٔلۍ اوس لُکن سونٛتھ تہ سبزار أچھن تل

 تس ٲس گہِج راتھ بستھ زُلف خمن منٛز

 میتہ روٗز لولہ ہانکلاہ شہمار أچھن تل

 تٕر کٔنڈۍ مےٚ پھٹم خاب وُچھتھ گوس ہُشیار یام

 یا خوٗن جگر اوس نتہ تلوار أچھن تل

 تس رودپتے شور تہ کرکہ ناد پیاپے

 تس اوس ونس منٛز تہ سُہ بازار أچھن تل

*

مے وارہ کال ووتُم راتھ ژالان

 فراقکۍ ژہۍ تہٕ کُنرکۍ ساتھ ژالان

 گہے کٹھہ کُش لگاں میٲنس شبابس

 بہٕ گاہے چُھس أندرۍ وہراتھ ژالان

 ؤں وٲنج مامہ کاکس یُس چھُ کوٗراں

 سُہ راون تُیوٚل چُھ ارزن ناتھ ژالان

 پریشاں اکھ اکس نش اسہ چھ دۅشۅے

 بہٕ حالاتن مے چھم حالاتھ ژالان

 کُنٮ۪ر پرٛتھ ساتہ زالاں چھُم مے ہن ہن

 بہٕ چانے لولکُے خٲراتھ ژالان

 نبکۍ آسیب انساں سنٛدۍ مظٲلم

 چھے کیا کیا زر عظم بُتراتھ ژالان

          

*

ہنا ژ کٔرۍز صبرمیانہ یار گاش یین

 دُبارٕ أسۍ تہ وُڑو جانوار گاش یین

 دلاسہ دی زشبس پوٗنپرٮ۪ن صبُح چُھ پکاں

 گولاب تاز پھۅلن وار کار گاش یین

 أزچ یہ راتھ ٹھہر ، نیر کوٚت ژےٚ نیرُن چھی

 رۅبس حوالہ پگاہ ، شہسوارگاش یین

 دتم ژٕ راش زژن ہنٛز نتے کھییم انہ گوٚٹ

 بہٕ زوٗن چھٮ۪س تہٕ ہنا میٚتہ ستار گاش یین

 گہیُل یہ شب تہ ژھنتھ پیو وُچھاں وتن چانٮ۪ن

بٕہ انتظار کراں چُھس نثار گاش یین

*

ژٕ

کرٮ۪م رُم رُم مے یُس سٲراب سوزُم

 زمیٖنس سونچکس سہلاب سوزُم

 مے کر موُٚنگمے مے دی زٮ۪م لال جوہر

 اچھن اندر حیاتکۍ خاب سوزُم

 خیالن دم تھزر اسمانہ والیٛاہ

 دلس نرمی أچھن کُٮ۪تھ آب سوزُم

 یتیُک پرٛتھ ٲنہ اوٚن ژانگٮ۪ن نٹاں ریٚہہ

 ژٕ یتھ انہ گٹۍ زُوس افتاب سوزم

 مے دلہ کس ٲنہ خانس یم تُلَن کھے

خۅدایا بس تمے اسباب سوزُم

*

دۅہس چھ لانہ لیٚکھتھ ساس انتشار دلس

 یواں چھےٚ راتھ تہ زالاں چُھ انتظار دلس

 چھُیے ژےٚیُن تہٕ یتم چھُم ہرُد مےٚ زاگہ بہتھ

 ژٕ پوشہ نوٗلہ ولو وُنہ چُھ نو بہار دلس

 نواں سکوٗن گہے کانٛہہ وۅزُل گُلاب أچھن

 سنا ں مےٚ کان بنتھ گہہ چھُ تاز شعر دلس

 چھ از تہ گرٮ۪ند سۅ کراں تارکن تہ، زوٗنہ شبس

 تمس چھُ ژوٗر نواں از تہ شہسوار دلس

 رگن رگن ژے بٔرتھ چُھے اما ر میوٗن مگر

 خبر مے کیاز یواں چھُم نہ اعتبار دلس

 مے یمۍ سکوٗن دلک نیوٗ تہٕ بیوٗٹھ گژھنہٕ گژتھ

 سکوٗن آسہ نواں تس تہ ما نثارؔ دلس

*

مے گیہ وانٛساہ ؤں پرٛزلاواں کرٛہُن شب

 زتنۍ کُیٚوم چُھس بہٕ پرٛزلاواں کرٛہُن شب

 بہ زالاں چُھس وتن منٛز ژٲنگۍ لولکۍ

 چھُسن کُن زُن بہٕ کھۅژناواں کرٛہُن شب

 کراں عادتھ بہ چُھس تس زندگی ہُند

 تہ گاشُک مس چھُسن چاواں کرٛہُن شب

 تمس سُرخی بُتھس پٮ۪ٹھ سنگرن ہنٛز

 سۅ زُلفن منٛز کھٹتھ تھاواں کرہُن شب

 چھے کُنہ جنگ نامہ بوٗزاں رٲتۍ راتس

 چھُ کُنہ کُنہ توسہ ابساوا ں کرہُن شب

 دۅہُک سورُے تھکُن سٲرے کدوٗرتھ

 تہ سٲری دٲدۍ مشراواں کرہُن شب

 بنتھ زُنہ موج کھونہ منٛز للّناواں

 مے شُرۍ سٔنٛدۍ پٲٹھۍ چھم ساواں کرہُن شب

*

پچان کیاز منگاں کیاہ چھ جانور صبحٲے

 وُچھان کیاز نبس کُن چھے پرٛتھ نظر صبحٲے

 تھکِتھ ژلاں تہ شبس دوٗر گۅپھ رٔٹتھ بیہواں

 وں گو یہ گاش دگاں چُھم مے دار بر صبحٲے

تمام رٲژنٹاں ٲسۍ چھ گاش پھۅلنَس تام

 دلن وہم چُھ یُتُے مار کۅ س خبر صبحٲے

 شبس دواں چھُ فقط بے کسی تہٕ تنہایی

 کراں حوالہ ہجومس مے چُھم شہر صبحٲے

 وتھے ژےٚ چھے نہٕ پتاہ نَے ہیکتھ پکھن چانین

 وں گو گژُھن تہ ژے چھُے کاو کاشغر صبحٲے

 دعا کورُن نہ، نہ دوٚپنم ژ گژھ رۅبس مٹہ چُھکھ

 مگر مےٚ وُچھ ز تمس آسہ چشمہ تر صبحٲے

*

ارزتھ بچتھ یہ چھٮ۪س تہٕ سۅ خرچاو شہر میوٗن

 پرتیٖتھ تمس راو تہ پتہ راو شہر میوٗن

 اکہ دۅہ ہجومہ دوٗر تہ کرٚیکہ ناد نش اپور

 وُچھہ گامہ شہُل سایہ تہ لر ترٛاو شہر میوٗن

 پے چھم ز پیٚواں آسہ نہ پتھ کال تمس یاد

 زانٛہہ کٲلۍپییس یاد تہ اوٚش ترٚاو شہر میوٗن

 گُلریز پرن وٲلۍ تہ شہتوس کتن وٲلۍ

 کینٛہہ خاب موللۍ لوٗنٛچہ گنڈتھ تھاو شہر میوٗن

 ترٚاوٮ۪م مےٚ کُنُے زوٚن تہ دپٮ۪م چھاو وُجٲری

 کہوچہ مےٚ پگاہٚ کھالہ تہ پرٚکھاو شہر میٖوٗن

*

رٔژھرتھ وُنہ أسۍ تھاوو کیا

نوِپُیہ ٲخر ہاوو کیا

ناو تہ رووٚ تہ داو تہ ژھیٚنۍ

 پرٛارو کس، ابساوو کیا

 یتہ چُھنہ کٲنسے گاشُک سۯ یہہ

 بستی بٔلۍ وُزناوو کیا

 نے یندرٕے نےٚ شہتوسٕے

راتس ارزتھ ہاوو کیا

 سونتس کتھ أسۍ ویوٗر تُلو

 رٮ۪تہ کٲلس أسۍ چھاوو کیا

کٲنسہ ٲکس چھنہ گوشن ہوش

 گُدرن أسۍ بلۍ باوو کیا

*

پرٛٮ۪تھ پد سۅنزل

یادن ہنٛدِپتھ ونہٕ پٮ۪ٹھہ ووٚتھ
بُتھۍ پھُیٚور اکھ یُپ خابن ہُنٛد
متہ پرٛژھ تہ یُپس سٍتۍکیاہ کیاہ ووٚتھ
احساس تہ وتھۍ
،جذبات تہ وتھۍ
بیٚیہ ووٚتھ ارمانن ہُنٛد اکھ ینہ وول
بیہ زُوٗل سپُد دلہ کس شہرس
وعدن ہنٛز مُشکہ پھُٹج ہٮ۪تھ

ٲدی ووٚتھ اکھ پنہ پوٗنٛپر
گُلزار کوٚرُن پرٛتھ باغ دلُک
شہجار ووٚوُن پد پد سٮ۪کلین
سوٚنہ پتھر دلٔچ سٲراب کٔرٕن
کھسہ پرٛٮ۪تھ اکہِ پد انہٲر سوٚنٛزل
لیکھہ واو ڈلُک سر تاز غزل
نٔوۍ نغمہ وُزن بادم وارٮ۪ن
پمپوش چھلن زُنہ گاشس تن
بیہ وایہ وۅلُر سنطوٗرُک ساز
ووٚتھ آشن ۂنٛدِ کمۍتاں ونہ پٮ۪ٹھ
خۅشہ وُنٛ چٹہ کوتُر
وُوٚنۍ واش کڈن یژکٲلۍ پکھن
یمہ سٲری پنجرکۍ قٲدۍ پگہٚہ
بیہ چُرۍ گُیٚش گژھ پرٛٮ۪تھ دار نٮ۪برۍ
بیہ کٔتجہ وُڑوٚ آکاش لبن

*

نژو باغن گُل و گُلزار سپدو

 سیٚکلۍ صحرا ژھنٛڈتھ سبزار سپدو

 پکھن سانٮ۪ن ژٮ۪تس اسمان از تاں

 وُڑو یوٚدوے تہ جاناوار سپدو

 وُچھوہے گُل تہ پنہ پونٛپرۍ بنو اسۍ

 پھُلو ہرگاہ تہٕ مُشکنۍ دار سپدو

 وٹتھ روزو تہ ریٖشمۍ تھان باسو

 پھُٹٔج مُژرو تہ اکھ بازار سپدو

 دلُک شستر أچھن ہُنٛد تیز گٲلتھ

 ولو کانژھا نوُے شہکار سپدو

 بنتھ روزو نہ أسۍ دیوار بٔرلن

 ضرب دیٚاوو تہ أسۍ مسمار سپدو

*

نورٕچ مۅہر ڈٮ۪کس تہٕ أچھن منٛز کتاب تس

سمکھی تہٕ وُچھۍز آسنے پھوٚلۍ متۍ گلاب تس

 پُرٛژھنے اگر ژےٚ میوٗن ژٔ ؤنۍ زٮ۪س ز چٲنۍ درٕٛے

 وُنہ تے کھسُن وسُن چُھ شہن ہُند عذاب تس

 لیکھنٲوِزٮ۪س ژ میٖلہ کنٮ۪ن منزلُک پتاہ

 وتہ وتہ پٔدس پٔدس چھ کوَس ہتھ سراب تس

 بخشم مےٚ سٮ۪کھ پدٮ۪ن تہٕ أچھن بوٚر مےٚ یمۍ ہرد

 سوٗزم مےٚ ڈالہ کٍتۍ شہلۍ سوٗنتہ خاب تس

 پے چھُم تمس تہ ٲنہ دلُک صاف گژھ پگہہ

 پشتاو سٮ۪ٹھاہ آسہ ودُن بے حساب تس

*

دغا یوٚدوے کوٚرُے واون کرکھ کیا

 تلُک پٮ۪ٹھ زن کوٚرُن ناون کرکھ کیا

 ژے ہے سالس اوٚ نُتھ صحرایہ گوٗبی

 دژٕے نے ترٛیش دریاون کرکھ کیا

 دلُک آتش فشاں سیٖنس اندر چھُے

 ژ دریاون تہ شہجارن کرکھ کیا

 ژے گٔے اکھ وٲنس بوزاں بوز سورُے

 اگر یم کینہ تہ فرماون کرکھ کیا

 ژ مشراوکھ اگر پتھ ون تہ مٔشرکھ

 ؤنی یوٚد کانہہ ژے شچھ کاون کرکھ کیا

*

تھزرس خلاف اوس نہ کاوس خلاف اوس

 جنگ میانہ گانٹہ بیٚار تہ واوس خلاف اوس

 ازکل یہ بوٗنۍ تام دوان چھم مےٚ آمہ تاو

 لوٚکچارگرٛشمہ کال دواں میوٗٹھ تاپھ اوس

 ریہہٚ روٗز تتھ ہُراں وں گو بیاکھ کتھ یہ ٲس

 پھۅکھ یُس تہ تمۍ دژاو الاوس خلاف اوس

 آرام یس نہ آو تہ ژٔج چانہ شہر دوٗر

 تس پٔرۍیہ کایناتھ پنُن کوہ قاف اوس

 یُس روٗددولہ سینہ سپر واو ہالہراتھ

 رٲیل سُہ موٗلہ دراو جُکاوس خلاف اوس

*

جذبن ہنٛدجٲگیٖر چھُ دل

 خابن ہنٛدتٲبیٖر چُھ دل

 ٲوُٮ۪ل زٲوُٮ۪ل شیٖش محل

 نوزُک اکھ تٲمیٖر چُھ دل

 وند رٲژن منٛز کانگر ہیٚو

 رٮ۪تہ کالس منٛز ویٖر چُھ دل

 پرٛٮ۪تھ کُھر پتہ کنہ ہتہ بدۍ کُھرۍ

 زنہٕ مسلے کشمیر چُھ دل

 کُنہ رہزن کُنہ شٲطر ٹھگ

 کُنہ رہبر کُنہ پیٖر چھُ دل

 وادن ہنٛز خوش ونۍ خوشبو

 یادن ہنٛز زنجیٖر چھُ دل

 گہٚہ کٲملؔ گہٚہ حبہؔ خوتون

 گہٚہ راہیؔ گہٚہ میٖرؔ چُھ دل

*

یادن ہنٛداکھ لشکر ووٚتھ

 دلہ کس کمرس اندر ووٚتھ

 انہ گوٚٹ سورُے نینٛگلووُن

 صبحکہ نوٗرُک پیکر ووٚتھ

 چانٮ۪ن قدمن پرٚاراں چُھس

 دلہ کس صحنس چھُم برٚ ووٚتھ

 زُنہ گاشس از کُستامتھ

 رۅپہ تن ناونہ من سرووٚتھ

 حبہ خوتوٗنہ چھُ سمکھُن تس

 یوٗسف شاہ از پانٛپر ووٚتھ

*

ہوا صبحُک پھُلے ہیٚتھ ژاو چشمن

 یہ کیاہ موسم نوٚوُے از زاو چشمن

 نظر یس کُن وُچھتھ شیہلان ٲسم

 سُہ پُشرتھ گوٚ سیٚکلۍ صحراو چشمن

 لیٚدر بلکُل لیٚدر ژھٹھ پھیٖر سوٚدرس

 یُتھے واوس اندر پھٔٹ ناو چشمن

 گناں روٗزم مےٚ ہنہ ہنہ پتھ ونچ کل

 تچھاں روٗدُم مےٚ راتس کاو چشمن

 ہۅکھن یوٚدوے مےٚ سٲری کیٖرۍ ٲندرم

 وُزاں روزن مگر دٔریاو چشمن

*

یہ کیُتھ یہ موسم عذاب لوٗکو

 نہ پوٗنٛپری نے گُلاب لوٗکو

 دیوٗ مےٚ ژھانڈتھ خزانہ واپس

سۅ میٲنۍ اولچ کتاب لوٗکو

 سُہ وق تہ اوس یلہ گاش پھۅلنے

 کھسان اوس آفتاب لوٗکو

 أندرۍ مےٚ کُستاں مران لوٚت لوٚت

 وُچھتھ یہ نیٚبریُم سراب لوٗکو

 أچھن اندر پھٹنہ لوٚگ وجوٗدے

 بے گنٛڈ چھُ أندرم چناب لوٗکو

 برَن مُژرۍ تو تٲرۍ للّہ

 دیو مےٚ کانٛژھا جواب لوٗکو

*

رُمہ رُمہ ونہ وُن

شیٖنہ تھوٚسۍ سیٖنس اندر ہٮ۪تھ نار ؤتھۍ
ژھٹھ کٔڈکھ سٔرۍ سٕے سوٚرُے یکساں کوٚرکھ
ہردٕ زردی زنہ یمو مسمار کٔر
زنتہٕ زچہ نالے کڈتھ نیہ موسمن
زنہٕ زمیٖنن نٲلۍ ژُھن توسُک پھٮ۪رن
زنہ تہ کٲنی شال ووٚل کُل عالمن
زنہ تہ دٔرۍ گنڈۍ ویٖروارو سٲنۍ کنۍ
بسم اللہ سٔتٮ۪ن ہیوٚتُکھ ونہ وُن کرُن
زن وسُن آکاشہ مہرازس چھُ وُنۍ
زنتہ پوٗرتھ مہرنیا تھٲوکھ زمیٖن

*

وتھ ژ ژھانڈکھ تہ ژھانڈخابن ہنٛز

 نتہ ژے ژاپی سڑکھ سرابن ہنٛز

 تۅہہ اگر انہ گٹُیٚک کوٚروگوٚنگُل

 اسہ تہ تھل کٔر ؤں آفتابن ہنٛز

 یتہ چھ پرٛتھ دار پٮ۪ٹھ نپاں تارکھ

 سٲنۍ بستی چھےٚ ماہتابن ہنٛز

 یمہ وواں روٗدۍ سٮ۪کھ دماغن منٛز

 بس تِمے کتھ کراں گُلابن ہنٛز

 کتہ سُہ دستار شوبدارن ہُنٛد

 کتھ کراں چُھکھ کُمن کسابن ہنٛز

 شب ژۅدٲہم تہ چون دوٗرٮ۪ر اُف

 راتھ نٲزل سپٔز عذابن ہنٛز

*

لازمن چانٮ۪ن وتن

 از پھولن گُل تے سمن

 لٔج پھُلے میانس دلس

 واش کوٚڈ پُونٛپرۍ پکھن

 افتابچ کتھ کٔرتھ

 کُس ؤوتھ گو سٮ۪کھ أچھن

 پتھ ونو دیٚت ہے صدا

 کاوٕ کٔمۍ روٚٹنکھ کتھن

 سونٛچہ کس کرٛہنس نبس

 زوٗن تارکھ کر زۅتن

 تس وُچھتھ یٔژکٲلۍ از

 ٲنہ زنہ گوٗمُت گۅتن

*

ہوا ڈلہ وُن فضا خوش وُن بہارک

 یکھے ساتھا گوٚنگل کرہو امارُک

 نہ ناوے سُیوٚد نہ چُھم ہم کھوٗر دردس

 نہ سنہ رُک پے نہ کانہٛہ پتہے کنارُک

 مُشتھ گوےٚ کیاز ونتم گام ٲخر

 لوٚگُے پرمس ژٕ ون کمۍ سند شہارُک

 کُکلۍ پھیراں ژے ما چُھے میٲنۍ پٲٹھٮ۪ن

 شہلۍ شاٹھُک تہ بیہ تمہ ویٖر وارُک

 یہ شاید بُلبُلنؔ دژ زیٖر سازس

 ضرب یٔژکٔالۍ گوشن گو ستارُک

 ژٕ یوٚد وے یکھ تہ پانےٚ پر ز ناوکھ

 برس کوٚرمُت مے چُھم گچھ انتظارُک

۔۔۔۔۔۔

نَے زمینچ نہ آسمانچ کتھ

 از کرو کُنہ بدل جہانچ کتھ

 ووٚن نہ کانسے وتو وُچھکھ کیا کیا

 کٔر یمی کتھ تہ کاروانچ کتھ

 یتہِ کنٮ۪ن ہنٛدضرب چلان فقط

 یتہ کرٕنۍ پزِنہٕ ٲنہ خانچ کتھ

 نافہ کاغذ ژھٹن ستن پیٖرٮ۪ن

 کمۍ یمن لیٖچھۍ زعفرانچ کتھ

 موج چشمن تلٕے مے باساں چھٮ۪م

 از تہ یوٚدکانٛہہ کراں چھُ دانچ کتھ

*

رٔژھرِتھ تھاوو پگہچ ستھ

 ولہ ژھانڈو کانٛہہ بدلے وتھ

 منٛزۍ منٛزۍ پرٛٮ۪زلاں گاشہ لیاہ

 منٛزۍ منٛزۍ پونپرۍ ماراں گتھ

 تھاو تہ ژوٗر یہ روے پنُن

 اد پانو پانس ہاوتھ

 دوٚپمس انہ گوٚٹ چُھم ژاپاں

 دوٚپنم ہنہِ ہنہِ چمکاوتھ

 شہنازؔنۍ پٲٹھۍ بہٕ تہِ دادیو

 ولہ گُلدانن منٛز تھاوتھ

 ہجرکۍ ناروپوٗرٕ شبس

 ولہ کُن زوٚن چشمو ہارتھ

*

گتھ کٔرۍ نٔہ پوٗنٛپرٮ۪و تہٕ دو ٚ دُے سانہ کانٛہہ شمع

 ووٚل نال انہ گٹیٚو تہ نژاں روٗد بس ہوا

 کیا پے ژٔلۍ کپٲرۍ تمس خاب مالنکۍ

 جگرس سنان کان بنتھ تس چھ گہہ بےٚ گہہ

 اسمانہ پٮ۪ٹھ ؤسو تہ دیوٗ راش گاشہ رژھ

 وٲناکھ راتھ روٗز دواں تارکن صدا

 الغٲبہ سوٗن کُن تہ اگر لوٚگ سُہ میون وق

 کرہس بہ زار پار رُککھ نا مےٚ نش شباہ

 یُن گوژھ نہ از یپٲرۍ دپُن گوژھ نہ گُل پھۅلن

 بوٛمبُر پرُس تہ آو کٔرتھ گو مگر دغا

*

اورزوے

اکھ وٲنٛساہ گُزرتھ شاید اچانک
بیہ وۅتھ ہاہاکار ژۅپٲرۍ
بیہ زنٛد گوواکہ پھرۍ جل اُدھ بھو
نو شکلہ تہٕ نو انمانہ
وں گو
تس ناو بدل پٲراو بدل
سُہ چُھ پھیراں
گامن سرین منٛز

اکھ مدہوشی ہنٛز نے وایاں
یُس بوزاں سُے پتہ پتہ لاراں
سُہ چُھ بدلے برٛم دتھ بۯمراواں
مدہوش خیالن تمبلاواں

سُہ چُھ کوچہ گلٮ۪ن پٮ۪ٹھ وہرتھ زال
یُس نظر گژھاں
،تسۍ نٮ۪نگلاواں
موصوم بہارن لوٗٹھ کراں
گامن تہ شہارن لوٗٹھ کراں

ہے میانہ خُدایا بوزکھ نا
بیہ اکہ پھر یوکُن سوزکھ نا
الغابن کانٛژھا کشپ ریوٚشاہ
یُس کھن دی کھادٔنۍ یارس بیہ
وولےمتۍ دریا خۅشک گژھن
گُل سُنہرۍ بیہ ریشۍ وار پھۅلن
نابوٗد گژُھن گوٚژھ
جل اُدھ بھوٚ...

*

کُکلۍ کوٗکوٗ کٔرتھ وُزناو دادٮ۪ن

ژے کمۍ ووٚن نے اپُز بلراو دادٮ۪ن

سۅ نے راتس مےٚ وٲنج روٗز کوٗراں

بۂ روٗدُس شانکہ از ما ساو دادٮ۪ن

نہ سونٛتن کوٚر نہ رٮ۪تہ کٲلی اثر کوٚر

ششر ماگُک ؤں ماشہلاو دادٮ۪ن

سۅ یۅس کُنرٮ۪ک یندرکتہ رٲتۍ راتس

سۅ بٔلۍ چشمن اندر ابساو دادٮ۪ن

یمن دگہ روٚس دلَن ہیوٗمن مشیٖنَن

 کِٔمس فرصتھ ز یُس منساو دادٮ۪ن

*

ہَن ہَن زالاں روٗدُس أندری ہجرُک نار شبَس

گۅڈ ۂرۍ اکہ اکہ سٲری تارکھ پتہ لٔج زوٗن درَس

تمۍ لٔب کتہ تاں اسلافن ہنٛز نپہ ؤنۍ خابہ پھُٹج

قدمَن تل پَتہ یَکدم سارے تارکھ مالہ وَژھس

چشمَن اندر راتَس روٗدم وُلرکۍ مَلَر وۅتھان

پَے ما لٔجۍ مٕے کِتھہ کٔنۍ ٲخر دل پھوٚٹ یادٕ سرَس

وقتَن اَتھہ موٗرتھ نیہ ٲخر سٲرے اَرزتھ تَس

نے چشمَن منٛز پگہ ہکۍ ارماں ںے کانٛہہ خاب بَدس

اَنہ گٔٹۍ شہرَس منٛز ییٚمۍ ترووُس کُن زوٚن پانَس ژو ٚ ل

تارَکھ نَب تَس ہَلمَس بر ہا نالَس زوٗن جرَس

*

بہ چانہ مایہ شبس چُھس وُچھان خاب ولو

ولو ژ جل ز کھسُن گۅژھ نہ آفتاب ولو

یہ زیٖٹھ راتھ لگے عٲن غٲن چٲنی ہش

دلس سکون دماغس چھُ اضطراب ولو

امار چانہ مےٚ زٲلتھ تھٔوم شمع راتس

بہ ووٛتھرہٮ۪ے ۱گر ژ یکھ وۅزلۍ گُلاب ولو

گٔہج یہ راتھ کُنی زٔنۍکُنُے چُھ ڈل پرٛاراں

 لجٮ۪م مٮ۪ے چشمہ درس میانہ ماہتابہ ولو

ژ سوٗنتہ واو بنتھ یم تہ سیٖنہ شیہلاوُم

 مے ہرد کال کراں چُھم دلس عذاب ولو

 پرُن نہ کٲنسہ تگاں چانہ روٚس لفظ تہ امُیٚک

نثار پرتہٕ ژ ؤلۍ ؤلۍ دلچ کتاب ولو

*

الگ صوٗرتھ الگ پہچان تھاوے

ولو شوٗشا بہ آیُت جان تھاوے

بہ کرہَے مالہ سٲدروار خابن

رچھتھ ٹارٮ۪ن اندر ارمان تھاوے

تھزر پرٛاوُن ژےٚ چھُے پرٛتھ تھزرہُیر ہُیر

بہ چشمن منٛز بٔرتھ اسمان تھاوے

گٹن ہنٛد مملکتہ نش دوٗر تھاوتھ

ژے گاشرۍ گامہ چی پہچان تھاوے

سبق نوو چُھکھ کتاب زندگی  ہُنٛد

بہ کانہہ خوش وُن نوٚوُے عنوان تھاوے

*

أسۍ کُنہ نسلٕکۍ اسہ کُنۍ دگ

أسۍ للناواں لُکہ ہنٛز دگ

ژٮ۪تہ ٲسی سقراط بنُن

ژتہ والکھ نکھہ پزرچ لگ

وُٹھہ تٔلۍ اسنا بیٚبہ منٛز بم

موٗلن درٛوت تہ پٔترن سگ

تھووُن دردس رلہ ملہ وق

کیٖنٛژھا پۯوٚن پۯوٚن کیٖنژھا زگ

نیٚبرمۍ سٲری گیہ پسپا

انسانس پھۅر أندریوٚم ٹھگ

وٲنج مُژرتھ ہاوے کیا

مخملۍ تھانس گٲمتۍگگ

موٚت اوس پھرۍ پھرۍ دۅہراوان

ونہ چٮ۪ن یارٮ۪ن رۅبہ سُنٛد سگ

*

در بدر پھیراں سڑک

 کیاہ سنا ژھاراں سڑک

 ماجہ ہنٛدۍ آلو بنتھ

 چھٮ۪م پتے لاراں سڑک

 رٲتۍ راتس کُنۍ تہ زنۍ

 آسہ کیاہ سونچاں سڑک

 کور کُن پھرۍ پھرۍ وُچھاں

 کس سنا پرٛاراں سڑک

 گامہ پٮ۪ٹھ واتتھ شہر

 آسہ پشتاواں سڑک

 کُن زوٚنُے وُچھنس اگر

 کیاز گیہ حٲراں سڑک

 آسماں نٔوۍ نٔوۍ لبو

 بییہ چھ لُکھ شیراں سڑک

*

ژاپان اوس سایہ تہ شیٚہجار آفتاب

 کوٚت تام ژالہ نیوٗل یہ دِودار آفتاب

 غارن گۅپھن کھہن تہ چہن منٛز ؤستھ دۅہے

 رنٛگ نٔوۍ چُھ بد کڈان یہ فنکار آفتاب

 تمہ میانہ گامہ ٲسۍ شہلۍ تاپہ دۅہ بسان

 یتھ چانہ سریہ کیاز ژھٹان نار آفتاب

 تس وُچھ أچھن اندر مےٚ سیٚکھے یٲژ راتھ دۅہ

 وُٹھ ٲسۍ یس گُلاب تہ روٚخسار آفتاب

 اخبار پۯٮ۪تھ صبح چھُ أچھن ہنٛدژہان آب

 پۯٮ۪تھ دۅہ کھسان کیاز چھُ کُھرۍ دار آفتاب

*

خاب

کاش! پۯتھ دورس منٛز
نیہ ہے یتہ کٮ۪ن شٲہی خانن
کانٛہہ تیمورؔ پانس سٍتۍ
پیٖر پانٛژالہ تہ ہر مۅکھہ دوٗر
کُنہ وسیع تر علاقس کُن
دیٚو آنتھہ روٚس بڈ شاہ گژھہ ہن پٲد

*

اکھ وعد آدنُک چُھ دلس منٛز مےٚ ستھا ہیوٗ

یتھ واو ہالہ از تہ دزاں زوٗرِ شمع ہیوٗ

پد پد امس وُزاں چھ تُرنۍ ناگ وتن منٛز

وتہ گتھ یہ بختہ بوٚڈ چُھ چھرا وقت دعا ہیوٗ

یوٚدوے بساو ہن تہ محل خانہ بساوکھ

روزی نہ دل قرار تہ وٲناکھ ونا ہیوٗ

کُن زُن لبتھ مےٚ ہیٚوک نہ وجوٗدے تہ بالآخر

یمۍ یوٚژھ تہ استعمال کوٚرس نونہ غنہ ہیوٗ

 اکھ خاب یُس شبس مےٚ دلَس تاو تلاں چھُم

سُے گرشمہ کرٚ ایہ منٛز مےٛ لوٛبُم تریشہ دوٚژھا ہیوٗ

*

انتظارُک اکھ شباہ وۅنۍ ٲخری

 ژھٮ۪تہ ہیوٚتُن سپدُن شمع وۅنۍٲخری

ونہ تہ تھر کانٛہہ کانٛہہ گُلابا تھپھ کٔرتھ

پونٛپرٮ۪ن باقی شہا وۅنۍٲخری

پےٚ مےٚ چھم پھیٖرتھ یہ واپس ییہ نہ زانٛہہ

توتہ دمہ ہَس اکھ صدا وۅنۍٲخری

کیاز سوٗرس تل چھُ تھاوُن زٮ۪تہ بٔرتھ

ولہ کرو ٲسۍ کانٛہہ کتھا وۅنۍٲخری

 گاشہ سٔرۍ سٲری گژھن کر سا صبر

رٲژ ہُنٛد واتٮ۪و ژیوٚہا وۅنۍٲخری

*

ؤتھِو یارو تہ اسہ شیٚہجار ژھانڈو

مٔژھج کانہٛہ یٲر کانٛہہ دودار ژھانڈو

ژھۅکاں یتھ جایہ شہہ پرٮ۪ٛتھ شہسوارس

تٔتی زُوٕنکۍ ؤلو آثار ژھانڈو

دورۍ بالن چھےٚ دنۍ شہکار صوٗرَتھ

 نوٚوُے آزر تہ نو فنکار ژھانڈو

یُتھُے واپس یمو ون واس مۅکلتھ

گُمت کُس آسہ پیٖرو پار ژھانڈو

 کرن چُرۍ گُیش تہ أچھ کھولن بہارس

تمے موصوٗم جاناوار ژھانڈو

 یکھےٚ چھٹہ پوٗنپرٮ۪ن پتہ پتہ دوَو أسۍ

 تُیتھُے کیٖنژھا کرو لۅکچار ژھانڈو

 تخیُل کس خزانس ٹھان مُژرتھ

عظمؔ غزلاہ ؤں سٲدروار ژھانڈو