*

بدلٕے صورژ بدلٕے کتھ
تنہٕ تتۍ اوسس از تامت
چھِٹہ پونپرۍ ژہۍ روزتھ گے
بونٮ۪ن تل ٲس ننۍ قۅدرتھ
برزٕ پشن پھۆلۍ بانٕلۍ[1] پوش
وُنہ چھم ماتامالٕچ ستھ
کۅہہٕ دامنۍ دامنۍ سندِج
باسان چانی گامٕچ وتھ
دۅدٕ کۅلہ آگر چونُے گام
سۅنہرۍ سنگر مالن پتھ
دٲن تھرٮ۪ن تل تاپہٕ ٹیۆکا
یاد پییَم لۅکچارٕچ کتھ
نٲگِنہ بۆٹھ، پۆت ہردُک تاپھ
پانو کوتا وہراوتھ
عرفکۍ رۅنہ ہٹۍ کتھ مێژِ شۯپۍ
پُرنٮ۪ن منز وٮ۪سران حٲرتھ

*

شب رنگ مےٚ ہٲوتھ تارکھ ژلۍ
تِتھہ پٲٹھۍ ژٕ پێیہ ہم راتھ ژٮ۪تس
زن کاوٕ قمیُر ژۆل بونٮ۪و تلۍ
کم خندٕ غریبس گے مےٚ دۅہے
خابس منز لالن ہیژمکھ ملۍ
دۅہ ڈلہوُن کنۍ زنۍ ژھایہ ؤلتھ
کۅہہ پتۍ کنۍ کۆت گژھہ وتھ ہلۍ ہلۍ
پۆت ژھایہ کزلۍ أچھ ٲنہٕ بدن
تمہ بازرٕ کیا کیا ہیمہ ہا ملۍ
کم پوشہ چمن؟ کِتھۍ سروٕ شہلۍ؟
بلۍ پاد بچارن لوکن پھلۍ

*
بێیہ تہ وچھتھا زاہ
سانہ بێہہ راتھاہ
نظرِ گٔےہمٲدۍتنہٕ تہ گٔیہ وٲنساہ
درۍچہ اڈوۆتھ اوس
اجنبِس کیا راہ
چانہ گامچ راتھ
سبز ٲس کٲژاہ
پۯون بازر وُچھ
زنتہٕ کانہہ خاباہ
*
پۆت ژھایو کوٚل کۆر شٲعر اکھ
سرپھو دِژ مٲنتھر جودگرس
*

أچھ ؤٹتھ بێہہ یہ اۆند تہ پۆکھ مشراو
صورژن ہند نگار خانہ سجاو
یام وچھنس بہٕ ویُہہ کۆرن وُنلیوو
پۯانہ مندورِ نش سہ کس مےٚ وچھاو
میون دل رنگہ مۆت چھہ موصم شُر
چٲنۍ یاداوری چھےٚ سبز الاو
خاصہٕ جامن کزلۍ ونن تس گٔے
تاپھ کیا کرنہِ میون کُٹھ ژایاو
زانہ قۅدرتھ بہ کتھ اندس ووتُس
زونہ منز راتھ گٔے مےٚ یرونۍ ناو
پادشاہ یار وچھتہ کیا خۅش آس
گاش ہٮ۪تھ دۯاو، گاش ہٮ۪تھ آیاو
*
امارٕ چانہ مےٚ ژھاین تہ تُل نقاب ولو
بہٕ کیا ونے ژےٚ مےٚ کیتھ وچھ عجیب خاب ولو
مےٚ تھوو ٲنہ لبن منز سہ ساتھ مٲنتھٕر دتھ
دپیوتھ بێیہ تہ گژھیا زانہہ یہ دستیاب ولو
وُشاطٕ چانہ پری زن نژان چھےٚ ژانگِچ رێہہ
خیالہ چانہ ہوا زن وزاں رباب ولو
نێندر گمژ چھےٚ ہوٲیی کنن گۆمت آسی
دلس چھہ شوق تہ شوقس چھہ اضطراب ولو
ژٕ سون یکھ تہ پنن معنہ دۅہہ تہ راتھ لبن
ژےٚ روٚس مےٚ روٚس چھہ یہ دنیا فقط سراب ولو
بدوٗن پان پنن چھُس وچھان پانس نش
چێنے شراب مےٚ کھۆتمت چھ از شراب ولو
عجب ملک شبِ اول بہ نوش لب چہ سرود
چہ کرد گل بہ صنوبر  پرو کتاب ولو
مےٚ تگۍ نہ چانہ فراقکۍ صدم وننۍ ژھۆٹ بوز
مےٚ لول چون از آمت چھہ بے حساب ولو

*
یتھہٕ تتھہٕ یێلہ پیوس بہ تۆت وٲتتھ
تتہ ٲسکھ برٕ رۆس ہانکل دتھ
کُنہ اوس نہ کانہہ نۆن ژھایو رۆس
بۯاندس نش وٲتتھ گوس رٔہتھ
أچھ پُتنہ گٔیَم میزانہ ڈۆلس
کیا تام اوس بر ہنگس لیکتھ
کوفورچ بۅے ٲس ہوہس منز
وق جوگۍ گۆمت اوس کار کرتھ
دُبہٕ پھیرم وٲنج، تہندِ کُٹھچ
لژھہ گٲمژ اڈؤژھ دٲر وچھتھ
پۆت کھورِ بہ ووتس کوچس منز
وتہ پکونۍ گٔے ششدر روزتھ
کم کم خۅش خاب وچھم راتس
پھوٚل گاش تہ بیوٹھس سوٗر ملتھ

*
سۅنزل ؤلتھ سۅ سۅندر ٲس دارِ پٮ۪ٹھ شولان                      
نظر ہێچم نہ تلتھ تھۆد مکانہ اوس وچھان
عجٲیبات چھہ انہ گۆٹ یتھُے چھہ دۅہ لوسان
یہ میون کٹھ تہ بہٕ دوشوے چھہ اکھ أکس کھوژان
مےٚ ہیۆک نہ یُہکہ گٔژھتھ تۆت وکانہ گو کیہتام
سۅ ہردٕ بونۍ مےٚ  یژکال آسہ ہے پۯاران
مرُن لسن چھہ بدستِ خدا دیِو رۅخصت
سراندیپ چھہ واتن تہٕ وق چھہ ژیر گژھان
دۅہے نٹاں چھےٚ یێمی وقتہ میانہ ژانگچ رێہہ
نصف شبس یہ خبر کُس چھہ زنتہٕ ہیرِ کھسان
مندورِ ہند سہ وضعدار ٲخری بسکین
خدایہ پانژھ شےٚ دۅہ ہٮ۪تھ سہ کونہ نظرِ گژھان
ڈلان سونتہ ہوا آسہ گل زمینس منز
سۅ آسہ دٲن تھرٮ۪ن تل شفق شفق وۅشلان

*
ژیے رۆس ییٖتٮ۪ن ورۍین جگرو
سێکِلٮ۪ن ہنز گیہ مےٚ ونن جگرو
آگر پٔچھنیا ہش راتھ  کۯہنۍ
کزلاوان شٮ۪ن طرفن جگرو
انہ گٹہ منز بدلٕے مخلوقا
زن ناد دوان مۅردن جگرو
تِتہ آسیا یێلہ اسۍ  زٕے آسو
کر چھاوٕ بہٕ چٲنی تن جگرو
نسبت چھس چٲنس جگرس سٍتۍ
گُلکار چھہ میونے فن جگرو*

*
زیٹھ شِہج مٔژ نێندرا تۯاوو بونٮ۪ن تل
آسہ دۅہا اسۍ دۅشوے راوو بونٮ۪ن تل
کرۍتن کیا کرِ وقتس تھٲو اسہ مٲنتھٕر دتھ
زون تہٕ تارکھ نب اسۍ چھاوو بونٮ۪ن تل
اسہ وٕنہ ہۅنجہ اسۍ شیرِ اکس اکھ لاگو پوش
بتھۍ وۅشلاوو تن شێہلاوو بونٮ۪ن تل
یتھۍ منز خۅش گژھہ تتھۍ منز پتہ اسۍ تۯاوو ڈاپھ
ہوہس منز مندورٕ بناوو بونٮ۪ن تل
سازندر یێلہ پتھ کالک کانہہ بٲتھ تُلن
اسۍ تہ الاوس ۂر پِلناوو بونٮ۪ن تل
زنتہٕ گژھو اسۍ بازر کم کم چیز ہٮ۪مو
لال جوٲہر اسۍ خرچاوو بونٮ۪ن تل
بۯونہہ کنہ ٲستھ باسہ سٮ۪ٹھا دوریمتۍ اسۍ
ٲکھتھ مٲکتھ یێلہ اسۍ راوو بونٮ۪ن تل
اژۍتن کانژہا بۯۆنہہ کن پێےتن وٲتتھ کانہہ
ٲکھتھ مٲکھتھ بر دِتھ تھاوو بونٮ۪ن تل
یتھ وقتس منز اکھ نۆو وامق نٔو عذرا
ناو پنن اسۍ پتھ کن تھاوو بونٮ۪ن تل

*
پۯانہ وقتچ مۅلٕل کتاب وچَھو
پۯون بازر چھہ خاب، خاب وچَھو
اکھ پۯزلوُن ژیُہا تہ ساس پزر
میون بوزکھ اگر سراب وچَھو
ویرِ لوگُن یہ کہنزِ اور مہ سن
شیرِ لٲگتھ تمس گلاب وچھو
ساز وایا چھہ کُس پرستانک
ناگہ رادس تُلو نقاب وچھو

*
چھکھ جاے کرتھ یمن دِلن منز
تم سوٗر ملتھ بہتھ ونن منز
بُتھ خاب گۆمت یوان أچھن تل
اکھ ساز وزُن گژھان کنن منز
کر عشق دِیَکھ نہٕ پۆت نظر زانہہ
تم موڑ یوان یمن وتن منز
تٲبینہ گژھی پری ژےٚ قافچ
تپ روز کران ژٕ جنگلن منز
حٮ۪س رود نہٕ ۂر  دِمو الاوس
کۆت وٲتۍ خبر کتھن کتھن منز
دوہ راتھ یمن مُدے گٔنڈتھ چھس
کم یادٕ خزانہ چھم لبن منز
*

اکھ پۯون شہر

کولرج سندِ ناوٕ


اکھ پۯون شہر
اندۍ اندۍ چھس تھۆد سنگین قلاے
زن نرِ پلناوان اسمانس
دروازس پٮ۪ٹھ حبشی جورا
ننہ کرتلہٕ  ہٮ۪تھ ننۍ نیزٕ تُلتھ
چار ٲیینہ لٲگتھ پاسکھۍدر
یتھ درۍیاوس کنہ ہند یہ کدٕل
پتھ کالہ وٹٕسۍ گومت اجدر
وُنہ شہرس کن وہرٲوتھ  ٲس
اتھ ٲسس منز اکہ پاسہٕ بہِتھ اکھ
اکھ جودگرا اکھ ساسہ وُہُر
أچھ أمۍ سنزٕ زوتاں کوتر رتھ
وُچھ طوطس کتھہٕ کنہ کٲر وُٹھٕن
کَس تام جِنس زوٗ  آسہ کھسان
بلۍ بۯادیومت اوس کورِ أکس
شہرس منز رنگہ مندورِ سٮ۪ٹھا
بانلۍ پھۆلۍمتۍ پٮ۪ٹھ بُرزٕپشن
زن نار وُہاں سبزارن منز
زٲلۍ پنجرن ستہٕ رنگۍ شیشہ جٔرتھ
خوجہ زادٕ چھہ دارٮ۪ن کھۅن دی دی
تھزٕ کارِ یپٲرۍ، زٲنپانہٕ ہُپٲرۍ
زُنہ گاش چھہ شولان کوچن منز
پۆت آنگن تاپس گہہ ماراں
خۅجہ بایہ بہِتھ منز سروٕ کُلٮ۪ن
زٲلۍ وانکن کۆستوٗرۍ نافہ ملاں
سِوۍ ہرنہٕ چھہ اندۍ پکۍ ژھالہ تلاں
ہُتھ تاپہ ٹێکس نِش ژھایہ ۂلس
سۅنہٕ کورِ براں ہۍ تھرنٕے گۅڈ
رۅنہ ہٹۍ چھِکھ زن رۅپہ تارٕ وزاں
بازر کیا مہرێنۍ ہیو پٲرتھ
وانن منز کم کم چیز کٕننۍ
وق پانہٕ چھہ یێتہ کھۅر ٹھہرٲوتھ
تلۍ ٹارِ وُچھاں "بہٕ تہ کێنہہ ہٮ۪مہ ہا"
لوکن ہندۍ پھۅلہ ونۍ ڈٮ۪کہ چھہ ونان
خوش باش چھہ یم خۅش حال چھہ یم
اسہٕ وٕنہ چھکھ أچھ نورٲنی بتھۍ
زن موصم شُر دۅدٕ سٍتۍ چھلِتھ
ہتھ کوچس منز اکھ جودگٔرنۍ
بۯونہہ کنہ اکھ وُہہ ونۍ منقل ہٮ۪تھ
اکہ بدلٕے گاچکۍ ژٲنگۍ پَیان
"پۯٲنۍ ژٲنگۍ دِیو، نوۍ ژٲنگۍ ہێیِو"
ٹنۍ ٹنۍ ہیوٗ گو، ہسۍ ما چھہ پکان
شہزادس سٲلس نیرُن چھا
رنگہ ناو چھےٚ پۯاراں گاٹھس پٮ۪ٹھ
منز شہرس ہیوٗ اکھ پۯون دُمٹھ
سنگستانا سرپوش سِرن
اکہ اندٕ چھِس بۅن پاتالس
ہتہٕ واد کنِوۍ ہێرٕ پٲوۍ وسنۍ
اۆت وسنس وٲنج گژھہ آسنۍ
ہُتھ ٲنہ کُٹھِس کن بلۍ مےٚ وچھم
پانو مےٚ دِلس زن تھُھ ہِش لٔج
ہیے بایا اکھ کتھ بوزکھنا
کۆت دۯاکھ ژٕ قرمزۍ فرد ولتھ
پۆت پھیر تہ مےٚ تہ نِتہٕ پانس سٍتۍ
*

سروٕ کُلٮ۪و منزۍ سۅ وَتھ
خوبصورت پۯٲنۍ کتھ
زانہ خدا رٲچھ کتھ
آرٕ کرتھ بونہ ستھ
روزٕہا اتھۍ منز کھٹتھ
ٲنہٕ وچھتھ گۅو مےٚ متھ
ادٕ تہ نو مژراوٕ أچھ
خٲبۍ اگر زانہہ وچھتھ
میانہ وۅندُک چھکھ ژٕ سۅکھ
کونہٕ وۅندس منز رچھتھ
کوچہ نٮ۪بر یام دۯاس
اوس گۆمت ورۍیہِ ہتھ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔

 

 


1۔  یا باملۍ پوش: یم پوش کشیرِ ہندٮ۪ں بُرزٕ پشن ﴿بام: پش﴾ پٮ۪ٹھ پھۅلان ٲسۍ۔
2۔ شہپال: اکھ افسانوی کردار ﴿داستان امیر حمزہ﴾

*

اسۍ ما وٲتِتھ پێے پتھ ون
سۅرنے واینۍ  ہش چھےٚ گژھن
بدلٕے معنے ژورُکھ میۍ
بدلٕے معنے اوس کتھن
أچھ مُژرٲوتھ  گوس وُبٲلۍ
پھیران اوسس دردٕ نیَن
چٲنِس گامس نکھہٕ ووتُس
زٕژٕ ہِشہ چھم لٲرتھ پادن
لالن ہند یێلہ ہاوس چُھے
پۯانٮ۪ن دیوارن تل کھن
دۅسہ تل تاپُل وۅسہ آیاو
انہِ گٹہٕ کٲژا چھس وۅہوَن
منہٕ آنگن منز راتھ وُچھم
کُن زۆن شُر اکھ زوٗنہ گندن
گۅڈہ یێتہ گاہ پٮ۪و افتابُک
تتہ چُھس لر تۯٲوتھ سونچن

*
أچھ چانہ چھےٚ زن لُکہ بٲتچ لے
ننہ وانہٕ دواں پتھ کالُک پے
مشرووتھسا؟ ادٕ پٲرۍ لگے
یِنہٕ ٲنہٕ لبن منز نظرِ گژھے
نکھہ وٲتتھ واون ژھٮ۪ورووس
ژانگچ رێہہ لٲگتھ آیاسے
یۆدوے ژٕ نبُک تارکھ لاگکھ
شُرۍ پٲٹھۍ ہلم دٲرتھ روزے
پھیرتھ آیوکھا زانہہ، وچھہکھ
مٲنتھٕر دِتھ تھوتھس جود گرے
فضہس منز مشۍمتۍ خاب وڈان
بونٮ۪ن تل کُس وایاں سۅرنے
تیُتھ صورت خانہ چھہ یادٕ وۆتُر
شٲعر ٲستھ ما سۅرمہ کھٮ۪مے
*
خۅش خاب راتس کیا وچُھتھ
صبحس ژٕ ہٲرتھ بیوٹھکھا
یا میانہ شعرچ سبز تێہہ
نتہٕ چانہ گامُک خۅش ہوا

*
اۆبر ڈالُن اتھو تہٕ کاڈ کڈُن
بالہٕ تیغس کھسن تہ زوٗنہ گندن
تتھ مکانس نہ ٲسۍ دارِ نہ بر
تتھ مکانس اندر مےٚ اوس اژن
کٲر نحقے بہٕ چھس نہ نۆمرٲوتھ
تہۍ تہ زانہہ وُچھزہون سہ کارِ وۅگن 
وُچھنہ آسیا سۅ دارِ کنۍ دۯامژ
نیر  با پانہٕ وۅنۍ مہ وچھ پتھ کن
راتھ  ٲسا مےٚ سٔنجہ تۯاے اچھن
راتھ اوسُے مےٚ دردٕ گام گژھن
*
چانہ انہارٕ میون شعر ونن
ٹوپہ تل تاپہ ٹیۆک کھٹتھ تھاون
ہیرِ گو ٹھس تہٕ دل ہیۆتن راون
ژھاے ہش گیہ تہ ژٲنگۍ ہیۆت کھۅژن
ٲنتھہٕ رۆستُے چھہ سۆن تِہ دیانک سر
بۆٹھ تِہ وسہون چھہ کھور گۅژھ نہ ڈلن
دۅہلہ تس ژھاے ٲس گنۍ تہٕ بٔرٕژ
راتھ کیُت از سہ شخص گۆژھ نہ مرُن
أچھ گٔیی پُتنہ، ہۆل گۆوُے نرِ ہۆر
پۯون زۆل اوس چون گۆژھ نہ کھنن
کونہٕ امہ پێٹھۍ وڈان چھہ جاناوار
تتھ قلایس اندر اژن تہ وُچھن
راتھ مٔژرووتھس بہٕ خابس منز
کۆت گیایکھ ژٕکوچہ کنۍ توکن
**

﴿فرد﴾
عاشقی بایہ سبز نارٕ دزن
**
بالہٕ دامنۍ پکاں پکاں بعضے
پرۍیہ آلو کنن گژھان بعضے
آش دپوَے چھےٚ کێنہ سۅ ما زانہہ ٲس
ہنگہ تہٕ منگے چھہ دل پھۅلان بعضے
زانہ کُس آدمس چھہ کیا ڈیشن
راتھ کیُت زوٗن بُتھ کھٹاں بعضے
پۯانہ مندورٕ، نوٗرٕ درۍچہ، قلاے
دۅہلہ کم خاب چھس وچھاں بعضے
پانہ کُس پژھ کری اگر ژٕ ونکھ
سبز رٲژن بہٕ چھس وُہان بعضے

*
لولہ چانے کرۍ مےٚ ہوہس نالہ متۍ
بونہ شہلس گٔے مےٚ سینس نارٕ تتۍ
دردٕ گامچ وتھ وُہان ٲس ہردٕ بونۍ
زانہ قۅدرتھ رات کیُت کم اور کھتۍ
أچھ وچھان زیر و زبر  گٲمٕژ سۅ لٔر
دل وناں بسکین آسن وُنہ تہ اتۍ
زونہ گاشس منز نێبرۍ ڈٔج چھاے ہش
نارٕ لمبکھ ہورٕ کنہ وتھۍ بالہ پتۍ
ژانگہ رۆس رێہہ راتھ خابس منز وچھم
آیہ کیا کیا راوراں اسۍ نیندرِ ہتۍ

*
دۅہ لوس روشہ روشہ أچھن منز سماں چھہ خاب
پھۆل گاش روگہ روگہ خبر کۆت گژھاں چھہ خاب
وٲناکھ رٲژ ہند یہ کۯہُن کال زونہ گاش
کھوژاں چھہ ژٲنگۍ زانہ خدا کیا وچھاں چھہ خاب
پۯٮ۪تھ ساتہ باسہ نێندرِ سۅ ؤژھمژ چھےٚ وُنۍ وُنی
پۯٮ۪تھ ساتہ تس وبٲلۍ اچھن منز وُزان چھہ خاب
شہرُک سہ اکھ مکانہٕ چھہ تۆبرُک ژٕ گژھ تہ وُچھ
یتھ بُرزٕ دتھ پشس تہ کُٹھٮ۪ن منز بسان چھہ خاب
دۯایکھ مےٚ نش تہٕ ٲنہ لبن دٕہ ہیۆتن وۅتھن
آیکھ مےٚ نش تہ دٲن تھرٮ۪ن تل گنداں چھہ خاب
پھیران گہے چھہ دردٕ نیَن بازرن گہے
اسۍ کِتھۍ چھہ خونہ ملۍ چھہ ہیواں غم کٕنان چھہ خاب

*
نٮ۪صف شب اوس دیدمانہ وچھم
زون کھٔژ چانہ دارِ کنۍ اسمان
ورگہٕ وۆتھ یام ووت شہرس منز
سانہ گامُک سہ ناگ خۅش گزران
ق
بٲژ سٲری گرکۍ ژےٚ اندۍ پکۍ چھی
پانہ ون با ژٕ کیازِ چھکھ کھوژان
کیازِ پتھ کن وچھتھ ونیومے نا
پۯانہ مندورِ کنۍ ژٕ کیازِ گژھان
پے ژےٚ اوسُے زِ تتھ مندورِ اندر
ہتھ ؤری ہٮ۪تھ چھہ ما کٔہنۍ روزان
آسہ ہے کُس ژےٚ لونچہ یس  لمہ ہی
درۍچہ کنۍ کمۍ سنا ژےٚ ہووُے پان
کمۍ ژٕ تورُکھ قلایہ پێٹھۍ ٲخر
کیُتھ پکھل گُر مےٚ کونہ فکرِ تران
وِگنہ ونہ وُن کنن گۆوُے مونم
ژٲنگۍ رێہہ وُێہہ کٔرتھ بنیا انسان
مانہ ہا خاب ما ژےٚ وچھمت چُھتھ
پۆز یہ پونپر وچھتھ بہ چھس حٲران
سرتلیو پہرٕدر ژےٚ اوسُے سٍتۍ
کیازِ اوسکھ ژٕ کھوژۍ کھوژۍ پکان
ہیرِ وولُکھ یمو أچھن تھۆپ دتھ
آسہ ہے ما تمن یۆہے فرمان
کیا ژےٚ ستۍمِس کُٹھس أژتھ وچھتھا
    ہوٗ بہ ہوٗ تی یہ پۯٲنۍ ٲسۍ ونان
کیا سۅ ٲسا پری مۆدر مس چٮ۪تھ
پۯانہ وقتک سہ جنگنامہ پران
ٲنہ اوسا تمس وچھاں ژھاین
چشمہ آسا تمس پزی شولان
نافہ اوسا تمس ہراں جامن
نظرٕ آسا تمس شراب وُہان
ساز ٲسیا پزی وزاں پانے
مُرژٕ آسا تمس نمان تہ نژان
ہتھ ؤری ہٮ۪تھ یہ آیہ بوزان لوُکھ
دۯاو سورُے سہ پۆز وچھان وچھاں
وۅنۍ نبا یورکُن ژٕ پھیرکھ زانہہ
پانہ کیہتام چانہ أچھ چھےٚ ونان

*
تلاو پۯون تہ تتھ منز سہ سرتلیو اکھ مور
وچھتھ وُتارٕ وۆتھم تیُتھ دبارٕ گوس نہ تور
مکانہ سبز کنٮ۪ن ہندۍ تہ لوکھ ٲنہ بدن
دپان پۯون شہر اکھ بستھ چھہ بالہٕ اپور
سہ اوس بونہ پھٔرس تل تہ بونۍ ژٔٹ گُٹلٮ۪و
وچھان وچھان ہۆکتھ گو سہ ناگہ راد بچور
ملر وۅتھاں چھہ لبن ووکھہٕ زونہٕ گاشس منز
خدایہ تھاوٕ ؤٹتھ أچھ گژھآن چھہ آبُک شور
مندور پۯانہ چھ اندۍ اندۍ قلایہ مٲنتھر دتھ
اپٲرۍ پکنہ دپان لُکھ گژھان چھہ پتھ کُن کھور
وچھایہ راتھ مےٚ بدول جمال خابس منز
گرکۍ پۯژھاں چھہ مےٚ از کیازِ چھکھ ژٕ اور نہ یور

*
مےٚ یسند عشق چھہ کھنتھ دلس خطہٕ خالہٕ کنۍ چھہ سہ خاب ہیو
نِشہ آسہ باسہ پزر چھہ یی گژھہ دور پۯزلہ سراب ہیو
گہے آسہ زونہ مُدے گٔنڈتھ گہے آسہ ٲنہٕ لبن سنتھ
کنہ ساتہٕ مژرنہ آو اگر تێلہ میٹھہ قصہ کتاب ہیو
یَنہ چانہ کوچہ نێبر سہ لۆگ تنہ تس لسُن گو اموب گۆب
سہ چھہ از تہ اورۍ نہ یورۍ ہیو سہ چھہ از تہ خانہ خراب ہیو
تمہ چانہ گامہ نٮ۪بر ہنا رنبہ وُن سہ ناگ مژھیُل چھہ کیا
یێلہ یێلہ تپٲرۍ بہ دۯاس زانہہ مےٚ لگان سہ آب شراب ہیو
لٹہ ساسہ وُچھ سہ یمو أچھو وُنہ توتہ ویۆد چھنہ بتھ تسند
سہ خمار یُس چھہ تمس أچھن سہ خمار تس چھہ نقاب ہیو
ژێتہ لفظہ پھیرٕ گۆوُے ہنا مےٚ تہ آو یکوٹھ کھر کتھن
نہ سوال چون سوال ہیو نہ جواب میون جواب ہیو

*
صورژن ہند الاو بونٮ۪ن تل
وُچھتہٕ ہردُک جلاو بونٮ۪ن تل
یورٕ گو تورٕ ما سہ واپس آو
زونہ منزۍ بلۍ گیاو بونٮ۪ن تل
ہاے افسوس وۅنۍ چھہ کانیومت
پۯانہ وقتک تلاو بونٮ۪ن تل
نوش لب واتہ، ونعجب ملِکس
ژونگ زٲلتھ ژٕ تھاو بونٮ۪ن تل
آسہ ہے کُس سہ سبز پوش منوش
کُس مے شامس وچھاو بونٮ۪ن تل
بختہ بۆڈ چھکھ ژٕ  شہر تۯٲوتھ آکھ
گام ووتکھ تہ راو بونٮ۪ن تل
اوس کُس یور نۆن تہ زۆن چُھنہٕ کانہہ
کمۍ سٲ ہیۆت میون ناو بونٮ۪ن تل
وہۍ مےٚ کیا گو بہٕ کیازِ واپس آس
وہۍ مےٚ سورُے مشاو بونٮ۪ن تل
*
اکہ بدلٕے آیہ چھہ ساز وزان تتھ کوچس منز
یٔندرازنۍ گترنۍ ما چھے نژان تتھ کوچس منز
درۍچن پٮ۪ٹھ بدلٕے ژٲنگۍ دزاں تتھ کوچس منز
کم کم انساں ششدر چھہ گژھان تتھ کوچس منز
یتھ وقتس منز افسانن ہندۍ تم ٲنہٕ بدن
انسانن کیا کیا نظرِ گژھاں تتھ کوچس منز
دیوارن محرابن چھےٚ جٔرتھ بغدادچ راتھ
انسان خبر کۆت کۆت واتاں تتھ کوچس منز
بر ہنگن بدلٕے اچھرن منز کێہتام لێکھتھ
ژھۆٹ بوزِو بدلٕے لُکھ چھہ بساں تتھ کوچس منز
اکھ شخژا اکھ بس دورِ وچھاں آساں توکن
دۅہہ اکہ تمۍ وچھ افتابہٕ کھساں تتھ کوچس منز
کم جِتنہٕ کرس لوکو ادٕ یوکن پھیورا زانہہ
خابس منز ننہٕ وورُے واتاں تتھ کوچس منز
تس شخژس سۅرنے باساں کٲرتھ ناگ کنن
خاندر ہرگاہ کُنہ دوہہ آساں تتھ کوچس منز

*
کھٔژ زون آسمٲنۍ دلس گو گمانہٕ چون
لجہ اپسرایہ نژنہ کنن گو ترانہٕ چون
ہمسایہ نیک چھی دۅہے استادٕ روزۍ نے
لوٗکو وۆنم چھہ سروٕ کُلٮ۪ن منز مکانہ چون
کستام سبز پوش منوشا یپٲرۍ آو
بدلٕے زبٲنۍ منز سہ ؤنتھ گو فسانہٕ چون
پۆز بوز خٲبۍ وچھ مےٚ دۅہے کم نوینہٕ رنگ
پۆز بوز خٲبۍ وچھ مےٚ دۅہے ٲنہٕ خانہ چون
یۆدوَے زنہٕے وچھتھ نہ بہٕ چھس توتہ خۅش نصیب
تس کیا ونو چھہ باگہ یس آمت زمانہٕ چون
رنبہٕ ونۍ خیال چٲنۍ دِلس چھم وُتٕش دوان
یم یم غزل مےٚ لیکھۍ تمن گو بہانہ چون
بوزم ژٕ خاص وقتہ گیوان چھکھ مقام راست
باسان چھم مزازٕ چھہ ما صوفیانہ چون*

*
یێتہ تارکھ زونہ گندتھ
نیراں اتھواس کٔرتھ
پتہٕ سۆدرن تارٕ ترن
ولہٕ یارٕ گژھو پتھ ون

یێتہ اوبرٕچ ژھاے بہِتھ
آبس زن مٲنتھٕر دِتھ
ناگن زن خاب وُزن
ولہ یارٕ گژھو پتھ ون

یێتہ پتھ کالکۍ گۅنماتھ
چھاواں بغدادچ راتھ
دامانہ رٹتھ قرنن
ولہ یارٕ گژھو پتھ ون

شہہ پالن[2] جود کرتھ
یێتہ برٕ رۆس ہانکل دتھ
تھٔومژ چھےٚ طلسماتن
ولہ یارٕ گژھو پتھ ونگچھہ کُٹھہ منزٕ پھۅکھ لٲیتھ
پۆت ژھاین بۯمرٲوتھ
یۆت ژانگچ رێہہ چھےٚ گژھن

ولہ یارٕ گژھو پتھ ون
............................

1.To read this file with its regular font, the latest version of Gulmarg Nastaleeq needs to be installed. The file was typed with this version of the font (having all the previous characters plus some more) for mobile phones more commonly used by our readers.             2. Muzaffar Aazim' note on Surat Khaneh is being published in the 31st volume of Neab.

صورت خانہ

قاضی غلام محمد

1997

 ---*---

سرنامٕہ

Poetry is understood best when understood
generally and partly۔ S. T. Coleridge

شاعری معنی آفرینی ہے قافیہ پیمائی نہیں                          غالبؔ                              

غیر ممکن ہے جو اسباب و علل کی رو سے
خواب میں شعر میں ممکن نظر آتا ہے میاں
                           قاضیؔ   

کاشکی گل کنی چراغ خرد
در اساطیر آشکار منم
                                                                                  قاضیؔ   

*** *** *** *** *** *** *** *** *** *

ترتیب

***         بدلٕے صورژ بدلٕے کتھ  

***         اسۍ ما وٲتِتھ پێے پتھ ون
***       پۯاران بہ اوسس راتس بلۍ

***       أچھ چانہ چھےٚ زن لُکہ بٲتچ لے

***       خۅش خاب راتس کیا وچُھتھ

***       چانہ انہارٕ میون شعر ونن

***       اۆبُر ڈالُن اتھو تہٕ کاڈ کڈُن

***       بێیہ تہ وچھتھا زاہ

***       بالہٕ دامنۍ پکاں پکاں بعضے

***       أچھ ؤٹتھ بێہہ یہ اۆند تہ پۆکھ مشراو

***       پۆت ژھایو کۆل کۆر شٲعر اکھ

***       لولہ چانے کرۍ مےٚ ہوہس نالہ متۍ

***       امارٕ چانہ مےٚ ژھاین تہ تُل نقاب ولو

***       دۅہ لوس روشہ روشہ أچھن منز سماں چھہ خاب

***       یتھہٕ تتھہٕ یێلہ پیوس بہ تۆت وٲتتھ

***       نٮ۪صف شب اوس دیدمانہ وچھم

***       مانہ ہا خاب ما ژےٚ وچھمت چُھتھ

***       سۅنزل ؤلتھ سۅ سۅندر ٲس دارِ پٮ۪ٹھ شولان                      

***       تلاو پۯون تہ تتھ منز سہ سرتلیو اکھ مور

***       ژیے رۆس ییٖتٮ۪ن ورۍین جگرو

***       مےٚ یسند عشق چھہ کھنتھ دلس خطہٕ خالہٕ کنۍ چھہ سہ خاب ہیو

***       زیٖٹھ شِہج مٔژ نێندرا تۯاوو بونٮ۪ن تل

***       صورژن ہند الاو بونٮ۪ن تل

***       پۯانہ وقتچ مۅلٕل کتاب وچَھو

***       سروٕ کُلٮ۪و منزۍ سۅ وتھ

***       چھکھ جاے کرتھ یمن دِلن منز

***       اکہ بدلٕے آیہ چھہ ساز وزان تتھ کوچس منز

***   اکھ پۯون شہر ﴿ کولرج سندِ ناوٕ﴾

***       یێتہ تارکھ زونہ گندِتھ