حرف ڈاے

  مظفّر عازم

 2007
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 پنن گام اوسم تہ دِتۍمس مےٚ گتھ

گہے کوچہ پھیُر گوم روٗٹھم نہ وتھ

تنَے دٲیرُم کن چھُہ أتھۍ آلوُن

منَے زایہ سرمایہ سِرسٲو کتھ

خبر کیا دِوَے ٲس، وۅپر گامہ ٲس

پرٛژھُم اتھ دوپن غٲر وتھ چھَے غلط

مےٚ دوپمس پننۍ وتھ چھما مٲنڈمژ

دوٚپن پوز سۅ چھَے نا منٕچ مازرتھ

مےٚ دوپمس کھٮلس منز وسا راوٕ ما

دوپن بُتھ مہ بدلاو پانے لبتھ

بہ آس پاسہ ہٮتھ پیشکش تھوومس

دوپن پاسہ ٲسِتھ گرٕتھ چُھے شرط

مےٚ دوپمس یہِ وتھ کٔڈ، تہ وۅنۍ کوت نِہم

دوپن تانۍ شیرتھ، تہ پتہ بٲگرتھ

مےٚ دوپمس، مگر گرٛاکھ کتہ ژھانڈہکھ

دوپن ہردٕ لونتھ تہ سونتس ووَتھ

مےٚ دوٚپمس بہارس چھہ بلبل پننۍ

دوپن ہردٕ رٲچھا، متا سن تہ اتھ

اوتن واتنٲوِتھ بہ کوٚرنس غۅطن

نہ حٲضر حواسٕے، نہ حرفن ہٮکتھ

دوپُم عٲزِمس وۅتھ ؤں گو دیُن قدم

اشارَے چھُہ ٲہی ہشارس چھےٚ ستھ

٭٭٭

ژٕ دپکھ زٮتھ کیا زیون بہ دپے میوٗٹھ عذاب

ژٕ دپکھ رہبر سون بہ دپے خابُک خاب

ژٕ دپکھ لوٗسِم پاد بہ دپے تی چھُہ مراد

ژٕ دپکھ وتھ کوت وٲژ بہ تھٮکَے بیاکھ سراب

ژٕ دپکھ أمۍ ؤج ناو یہ وۅلُر کتھ گجہِ زاو

بہ دپے وِجہ ژھوٹ واو وٮتھہ کھوت وُلمنہ آب

ژٕ دپکھ من تہ بدن کوٕ چوپرٲوۍ دمن

بہ دپے چٲرتھ تار زیری رٹہ مضراب

ژٕ دپکھ ژھۅپہ چھے رِوان بلبل کونہ گٮوان

بہ دپے زٮوِ تہِ چھُہ زاپھ کن تہ سپدۍ نایاب

ژٕ دپکھ پٮنجہِ بیچھاے مالِنۍ پٔژھۍ آیاے

بہ دپے رگہ رگہ ووت زۅہرالتہِ زہراب

ژٕ دپکھ عٲزم سون تس تہ موٹھا ادٕ کرٛون

بہ دپے چُھس بہ کُتول اتھ پھورٮم نہ جواب

***

وچھس تچھان چھُہ یہ موسم، أچھن عذاب چمن

مگر یہ کۅل چھےٚ قیامت، یہ رٹہ نہ کٹھۍشِہ کفن

پکھن اندر چھےٚ وُڈن کل گرٛٮکاں گرفتارس

ٹھپس اندر چھےٚ جلس تن، وچھس اندر چُھس ون

یہنز مےٚ وتھ چھنہ سٔرمٕژ، سپار چھنہ پرٔمٕژ

نظر چھےٚ سٲلہ مژر، گژھہِ تہ گژھہِ تمن گامن

یہ ژھل چھُہ جلوہ بدل کل کڈاں وفادارن

یہِ زٲلۍ پردہ محل خانہ کٮن ستن درۍچن

یوُک کِمام تہ رینچل ورق تہ کاغذ کیمۍ

أزیک سفر چھُہ، أزیک آفتاب شوبہ وتن

نہ تُلہِ دلیل نظٲمی، نہ پھِرِ سۅخن گٲمی

توتاں چھِہ بال بےٚ مُروت یوتاں نہ وونٹ کھمن

پرن پٮوان چھنہ بلبل ترانہ زیرُ بمس

قمرۍ زٮون نہ یوتامتھ نہ پانہ کٔنڈ پھٹرن

توے چھےٚ تس تہ پننۍ طوطہ زٮو تھیکاں نابد

مظفّرس چھہ تگاں، عٲزِمس چھُہ تھاواں کن

***

ژلاں ژلاں تہ شفق شولنوو جانانن

شبس بےٚ نور کھۅتٮن گاش ووت غم خانن

دٕیاں چھےٚ پہرِ پشِچ ژھیے درٮا سنا روٗدس

دِواں چھُہ جوش یہ چشمن، تہ سگ نیَستانن

ڈوٚلُس نہ سونتہ ہوا نوٚو ووٚلُن کلس نلہ ووٹ

چھےٚ یٔندرٕ دۅس تہِ ہیکاں تھۅس أنِتھ زمستانن

تتان چھُہ رَو تہ ژھٹان نور گُلہ دُپہرُک رۅے

سۅتاں چھُہ پَو تہ رِواں شِنہ پپنۍ چھےٚ ارمانن

سمندرن تہ چھلُن توگ نہ عٲزمس گٲمیُن

غزل وُزاں چھہِ درٛمنۍ کانجن تہ پیچانن

٭٭٭

زرٕد زمین رِہِج کۅنگہ تِہج تہ حبہ خوتون

ہرُد چھُہ، نب کرِ شب از، ستارٕ ہٮتھ نژِ زون

کنن چھےٚ کارتِکس رس بہٲرۍ بلبلہ بولۍ

نکھن دُشالہ سُہ یُس ہارِ ککلہِ پٲٹس وون

یوُک سُہ واپھ أچھو بوٚر وچھس بہارک تاپھ

پگاہ تہِ پییہ نہ پۅہس پرہ سُہ آفتابُک خون

زبر رفیق سفر زٲنۍزٮن مژر تہ ہژر

وۅں گو اگر وتہِ سمکھی سُہ سۅرگواس سکون

مگر یہِ آبُ ہوا ہمنوا نہ تانس تان

وۅلر چُھ ناوِ رٹاں نم تہ وِج ژھٹاں چھےٚ جنون

تچھان چُھ از تہِ أچھر والہ بُرزٕ دٮل عٲزم

چھےٚ زیرٕ زبرٕ تِمے تازٕ کیا تھُرٮکھ مضمون

٭٭٭

تلا بہارٕ ژٕ کر زارٕپارٕ گگراین

ژرٮن چھُہ پوشہِ تھرٮن پٮٹھ گٮوُن گرٮن ڈاین

سروٗد سونچہ وُتارُک وۅکان چھُہ کاڈٮن منز
پنن نَگارٕ چھُہ پانس ددارٕ دُبراین

پننۍ وُجار کھۅپٕر ژٲنگۍتار ہٮتھ رٲوٕس

مشٲلۍ دراو گٮوان گاش ہاوِ ہمساین

پھژال ہٲر پننۍ پرٛٲنۍ سۅرمہ دٲنۍ دٕنِن

أچھن وُچھان پشیمان أچھو چھےٚ پژھۍ باین

بہار چھاوِ گٔرا گانٹہ بیٚٲر ہٮتھ عازم

دُتارٕ ہییہِ سُہ گٔنڈتھ سونتہ واوٕچن گراین

٭٭٭

کتھ چھےٚ یوسف تہ زینہ روٚس کھاریُک

وتھ چھےٚ واول وُنل، تہ ستھ وۅرٕ بٲے

جامہ والٮن چھےٚ نٔو گِلن ہاوٕنۍ

ماگنن پرٛانہِ آیہِ سۅرنے وٲے

نالہ کڈنٲوۍ زٔٹ اپزۍ رٮتہ کٲلۍ

یُہکہِ ما پھیرِ ماگ پھٮرنہ ورٲے

حٲفظن گٮوو تہ ڈیڈِ مژراوٮکھ

عٲزمن کتھ کریوو تم تتہ تٲے

٭٭٭

رفیق آسہِ رٔٹتھ اتھ شفیق اتھن منز پن

چھےٚ گانٹہ بیارِ مگر شان٘ش کھٲجمٕژ ہوٕہن

چھُہ نالہ پانہ تہِ یرٕوُن بٹھٮو تہ بالو منزۍ

ژلان ژلاں چھُہ پرٛژھاں توتہِ واوٕ ہالہِ وطن

ہوا وِسان چُھنہ میٲنس وچھس ؤسِتھ نحقے

شہن چھُہ رٲچھ کراں شیٚچھ نِواں چھُہ طرفاتن

ہوا تہ یارِ ونُک سوٚم، شِہُل تہ گوٚب گٲں گٲں

جتن کریایہِ سٮٹھا پوز عطا سپد نہ سُہ فن

سُہ ساز کتہِ انہِ عٲزم زِ آلوٮس شش رنگ

سُہ مٲنز کتہِ انہِ یۅس تس نشانہ شوبہِ اتھن

٭٭٭

اورٕ آیوو ہوا بہار ونان

سون وٲتِتھ چھُہ نار نار ونان

نٲگۍرایس چھُہ پننہِ گامُک ژُکھ

سٲنۍ ہیمال روزِ زار ونان

ٹارِ کھٔژ تس اپارِ زاڈِچ زب

وارِ کھاریُک چھُہ خارزار ونان

پٲز وُچُھنا نظر دواں ٲلِس

شراکہِ بلبل چھُہ بالہ یار ونان

زانہِ کُس تہنزِ پژھہِ چھُہ کیا معنے

یم أشس یُپ وۅشس چھِہ نار ونان

اسہِ تہِ چھا عٲزِمن امار یتھے

آنجہٲنی تہِ ٲسۍ شعر وناں

٭٭٭

نب ٲنہ ٲنہ تہ بتراتھ نیوٗل نیوٗل اسُن

سرس چھُہ سال کران از سمندرُک یاوُن

خبر تہ آسہِ أمِس واو دونژھرِتھ ترٛاوٮس

مگر تُلٕر چھےٚ تُلٕر ژھوٚر ہلم تگٮس نہ وٹن

دِگر چھُہ زاگہِ مگر دامہ چییہِ ہے گُلِ افتاب

ہُہ نورٕ نارٕ سمندر اما یہِ واتیا کُن

پرٛژھٕے چھےٚ چٲنۍ برٕژ دۅژھ تہ میون رینچہِ ہلم

ژٕ دیُن یژھکھ تہ مبارکھ، مےٚ کتھ اندر چھُہ رٹن

یہِ لولہ مصرٕ وُچھاں دولہ چُھم کتاب پران

سُہ یتھ قلم چُھنہ یاپاں، سُہ گوب سۅخن چھُہ سرن

مقام اگر نہ ونکھ، توتہِ ونتہ وق کوت ووت

شبس تہِ چھنہ سۅ شباہتھ، دۅہن تہِ دامن دُن

چکر چلٮوو قہر موسمن کٔرٕن گانگل

گلاں نہ پرون ششُر کُنہِ تہ نوٚو ہٮواں والن

کپٲرۍ تاں چھُہ کنن عٲزمن کلام گژھان

وُچھتھ اگر ژٕ سُہ پرٛزناوہن یپٲرۍ انن

٭٭٭

گٮوَن لہر تہ سمن بل تہ گُر تہ گوند تہ مشٲلۍ

یہِ دردٕ نَے چھےٚ اموب آرٕ گرز تہ ڈُب ڈُبہ وٲلۍ

یہِ سادٕ ٹیکہ بٹنٕۍ پونپرِس کران باوتھ

ہۅ واوٕ رِنگ تہِ نژاں بونہِ باڈٕوس گیہِ نٲلۍ

ڈلٕچ لہر چھےٚ دٔہِس سریہہ کران وُٹھن تہ ژلان

چھٔنِس وچھس چھےٚ کھٮلس عرقہ ژھٹھ اناں یہِ وُڈٲلۍ

ہوا ڈلاں تہ سرس منز گُرَن گِنداں گراین

وۅٹل تہ موٚت کرِ ملرن، ڈُنگل تہ وسہِ پاتٲلۍ

تٔتِس ڈٮکس چھےٚ ٗھِِران بُتلہِ روٗدٕ جٔرۍ شیہجار

فضا تُمارٕ گنڈاں رامہ رامہ بدرٕنۍ ڈٲلۍ

مژر تہ پوشہ دُپھس پٮٹھ تُلٕر ژٕہاں موٚدریر

سکوٗن سروٕ ہرَن تل جلن تہ قمرٮن ٲلۍ

شباہ تہٕ، روٗد چھلاں اتھ مندورِ پش کٮو برٛاند

دۅہا تہٕ، تاپھ ملاں مۅنہِ پھلٮن چھہِ پنجرٕکۍ زٲلۍ

گرس چھُہ دارِ گژھاں ٹھُک برس چھُہ دل راوان

یہِ وتہ وٮلٲے ہوا کوت یپٲرۍ لوگ یژکٲلۍ

غزل چھُہ ناگہ بلس بوسہ دِتھ لٮکھان عٲزم

دپاں یہِ مصرٕ چھُہ مٲنتھٕر، ژٕ ما پرکھ ہیمٲلـ̡

٭٭٭

ہۅ اوبرٕ لِش چھےٚ بہارٕچ گُڈنۍ گٔرِتھ تہ ژٔرِتھ

نظر نژاں چھےٚ یہِ مٔشرٲومٕژ کتاب پٔرِتھ

جلس منگاں چھُہ اکھ اکھ تان کان فضہس منز

شکٲرۍ کونہ چھُہ مازاں یہِ گوس تیر تٔرِتھ

ہرُد رچھاں چھُہ پننٕۍ سانتنتھ بہارس کِژ

گرٕد سنبالہِ امانتھ یہِ لنجہِ پیمُت چھُہ ۂرِتھ

زٔری تِہج چھےٚ وٹاں ہردٕکس کھلس داتھُر

بدن چھُہ بونہِ وُہاں سرسبز عذاب زٔرِتھ

خبر دُبارٕ دِواں چھا یپور ترنٕچ وٲرۍ

نتہ ٲس نظرِ ہنا دِنۍ وُڈٕر اپور تٔرِتھ

دِکھے تہ دیزِ سمندر وچھس ژۅدٲہم زون

یِکھے یپٲرۍ حباب أنۍزِ آفتاب بٔرِتھ

ژیُہا چھُہ کٲف اگر بوس ژھانژٕونہ دِیہِ ہے

وۅہَو چھےٚ وٲنس دہانس اگر مۅہر چھےٚ کٔرِتھ

ٹھِلن گِنداں چھُہ قرارس بہارٕ موت عٲزم

کۅلن شراب رلٲوِتھ پلن گۅلاب گٔرِتھ

٭٭٭

آفتابُک ہوس چھُہ اسمانس

چشمہ ووِ رٲژ ہالہِ مٲدانس

پرٛانہِ پۅستکہِ پیٚمٕتۍ چھِہ کاغذ کیٚمۍ

معنہِ بدلن دۅہَے ؤں فۅرمانس

اول وٲلِتھ چھُہ لول ازماواں

ہارِ واوُل چھُہ گتھ دِواں پانس

ۂسۍ کرَس منز دپاں چھُہ موہ ژامُت

باگہِ بٔرتِس اگادِ ریہہ جانس

دردٕ باغٕچ گرٕد دٕنِتھ جامن

ہی گلستاں وناں چھےٚ گلدانس

کٔتۍجہِ وُپھ ہِش گٔیایہِ دارِ نیبرۍ

تالوس أچھ الانزٕ گٔیہِ دیٚانس

جورِ ماراں چھِ پۅختہ چھۅکھ تہ عطا

بس ونکھ کس أکِس میٚہربانس

نالہ کرِ دٔدونس جگر سٲراب

أچھ اگر آب دِن نیَستانس

تر زبان پرٲو سر سرن والٮو

شیرِ پمپوش چھِکھ ہُریمانس

تیٖر عٲزم گراں چھُہ پوشہِ تُلِس

یار دانا وناں چھہِ دیوانس

***
سُہ خانہ مول بہارُک، سُہ نارٕ تِکھ ہیو ٹوٗر

شِہُن شُبی نہ گۅلابس أندرۍ أندرۍ کٔمۍ کور

مٔتِس چھہِ پیالہ بران پوٗرۍ کٮوو پچھمۍ کم کم

یوتاں نہ لل یِیہِ، نُند کرِ نہ دام دیُن منظور

کمن کنن پرِ مقبول شاہ دِلٕچ گلریز

کمن دِلن دِیہِ کتھ دُب دُبایہِ کن مہجور

مندورِ وٲج تٔمس دشمنو تہِ کانہہ کانہہ سیٖر

سُہ اوسہ پانہ تہِ کیٚنہہ کم بلاے گٔژھۍنس دوٗر

نِمیُز کھٮتھٕے چُھ کمیُل برٛمجہِ ژھایہِ دُبہ پیومُت

یپٲرۍ نیند تہِ گۅبیمٕژ ہپٲرۍ نیندرِ سرور

مےٚ دوپ از آسہِ مےٚ آمُت غزل ہٮتھٕے عٲزم

وُچھاں تہ سادٕ مٔتِس نٲلۍ سُے بٮگُر سنطور

***
ہوا چھُہ تٍرٕ دٕنان، شِنہ پِپنۍ شِٹھاں چھےٚ ہُپٲرۍ

خبر دُبارٕ کریا ہردٕ روچھ دورٕ یپٲرۍ

ژےٚ کم کتابہ پری وۅنۍ برمِج تہ دچھہِ پونپور

ژےٚ نَے تہ کس چھےٚ خبر لوزٕ کس کریایہِ بہٲرۍ

ژٕ یِکھ تہ تریشہ ۂتِس جۅے وُزاں سیکستانس

گژھکھ تہ پٔدۍ چھہِ دزاں شب بٮدار نظرِ ژۅپٲرۍ

وصالہ سانہِ چھےٚ ون وِگنہِ دٔرۍ کٔرِتھ نیران

فراقہ چانہِ پننٕۍ وُٹھ بناں دہانس تٲرۍ

کزُل تہِ اوس کتھا برٮم دِوان بےٚ سۅکھ نظرن

ززُر چھُہ بیاکھ سِرا وۅنۍ نِمتھ کپٲرۍ کپٲرۍ

یہ جورِ ہن چھےٚ گرن وٲلۍ پننہِ اتھہ گٔرمٕژ

گُلٲلۍ شملہ رَوَس، سنگرِ جاموار انٲرۍ

یہ میون چھۅکھ تہ یہِ سرسٲوۍ چون دستِ شفا

رٹان چھےٚ دگ تہ سہولتھ پننٕۍ پننٕۍ انوٲرۍ

فضا چھُہ نیول تہ شہپر بےٚ پھرُک ہوا دوناں

مزٲرۍ مُزکہ چھُہ کُلۍ ددرِ ژھایہِ میون شکٲرۍ

بہ چیرٕ پوژھ سرابس تہ لوٕ سپار ہٮمس

وچُھک حباب چھُہ ٲوِلۍ اچھر تُھران اچھہِ دٲرۍ

ژےٚ برونٹھہ کنہِ چُھنہ عٲزم پرٛٮژل کلام کران

سفر پسند چھےٚ خۅشبوے تہ خۅش ہوا چھُہ سوٲرۍ

***
ہِنجٲرۍ واوٕ رِنگا اکھ تہ کھٔژ دِدٕر اسمٲنۍ

یہِ مٔژ چھےٚ وٲنِجہِ زامٕژ یہ نژِ وُپھان وُپھٲنۍ

ستارٕ سٲوۍ سُلی کالہ اوبرٕ ژھایہِ تمام

ہُپٲرۍ یپٲرۍ تہ کانہہ کانہہ زُتِنۍ چھےٚ زوتاں سٲنۍ

خبر زبر چھےٚ یہِ سانٮن تمام اخبارن

مگر اگر نہ بدل کانہہ تبر نژاں چھےٚ زبٲنۍ

پھوٚرُکھ پنُن تِہ نہ واتُن دٕنِکھ سۅ مٲلۍ مندور

ؤں سامہٕن سۅ پُرن، کٔن دِنس تہِ چھنہ بہرٲنۍ

سۅ کھرٮکھ ہسٲ کھیٚیہِ کھارِکۍ زِ نظرِ ڈٲجِن ڈولۍ

نتہ ٲسۍ ڈول وزاں وِگنہِ آسہ وُنہِ وَنہ وٲنۍ

خۅدا رٔچھِن سٲ ونو کیا سُہ دۅہ تہِ ما چھُہ پکان

چلی نہ بین تہ مٲنتھٕر مَلی نہ سوٗر گۅسٲنۍ

ؤں کُس کمال چھُہ عٲزم غزل غزل چھُہ لٮکھاں

ہوا ہنا ییلہِ وولاں چھُہ پھرٛستہ پھمب چھُہ نژٲنۍ

***
وُڈاں گیایہِ نظر پانہ وُچھہِ پنُن انہار

سُہ مۅہرٕ آسہِ ہے ٲنس تہ پراوِ ہے دیدار

مےٚ زٮو دِژٕکھ تہ بہ گوسکھ اگادِ اڈٕکول شُر

زبان دِیوم یہِ سوسن سجاوِ میون مزار

سوال سٲلہ مٔتِس ازلہ آوٕلُن تہ شِکٲرۍ

سفر چھُہ نوح تہ ناوٕے، مژر چھُہ سٲدروار

ییٚلی یِوان چھُہ تیٚلی، نیٚٲوۍ پوش ہٮتھ چھُہ یِوان

وُجارٕ پتھرِ غنیمتھ چھُہ مٔتۍ مِزازٕ بہار

قلم کِمامہِ یہِ کتھ چُھکھ وناں لۅبر لولو

کراں سۅ کُکلِہ کراماتھ کوسمن چھےٚ ہُشار

زرٮن کنن چھِہ پراں سٲنۍ سادٕ مٔتۍ گُلریز

ژھرٮن مچن چھِہ براں یار ضربہ روستُے دیار

قصیدٕ چُھو نہ پراں تل پتٮن یِتھَے عٲزم

امارٕ کٔہندِ چھِہ ژالان وۅپر وَتن ہُند مار

***
رِندانہ رازٕ چھُہ کم کم گِندن تماشہ گران

بہار بونۍ تہ بلبل، تبر تہ تیر کمان

بےٚ پژھ فضا چھُہ کراں کٲزٕ پٲزٕ پروازس

یہِ لب اگر نہٕ، ہُہ نب شہپرس چھُہ تراش ہٮوان

وچھس اندر چھُہ گژھان بولہِ وٹھ بہارٕ مٔتِس

وُتارٕ وٲنسہِ چھُہ وٮتراں، شِہِتھ تہِ ما چھُہ ہٮکان

سران کیا چھُہ سمندر پنُن سنٮر زانٮس

کوَس تہِ روزِ تہ بس اوبرٕ ژھاے وُچھِہ اسمان

یہ کاروان ؤں گوژھ خٲرٕ سان گرٕ واتُن

سڑک چھےٚ بالہ تُھنگٮو پیٹھۍ رزَو چھُہ شین وسان

یہ برٮڈۍمُشِکھ چھُہ دِواں برٮڈۍ کٔڈِتھ بہارُک پے

دٕیان دٕیان تہِ چھُہ عٲزم اسُن ؤوِتھ نیران

***
وسان تہ وٲژ یہِ اختابہ کھاو خابن منز

وُنل وُزیایہِ ونُک ون ووٚلُن عذابن منز

نٹٮن تہ کھسہِ نہ تُرَے چانہِ میانہِ تعشوقٕچ

یہِ تہرِ ٹوک تہِ کاغذ کیٚمٮن کتابن منز

ہۅکھَے رٕڈیایہِ سرن منز چھےٚ گاڈٕ وُٹھ پھیشان

ستم نصیب سمندر ژماں سرابن منز

گراں گرٲنۍ چھِہ خابٕکۍ کھلونہ ؤڈراواں

مراں چھےٚ رٲژ ٲچھن منز تہ دۅہ دۅلابن منز

تُلتِھ نِیَس تہ ہوا گوشہِ گوشہِ مندچھاوٮس

وچھس وُزِتھ تہِ چھےٚ خۅشبۅے وۅزُم گۅلابن منز

دِلس چھُہ وونت وُچھان از ستم ظریف قلم

صبورٕ وول مسٲفر لیوٚکھُن بیٚتابن منز

یوٕچ صُرَے تہ أزیُک اوم کھوس ہٮتھ عٲزم

ورل سوال چھُہ تراواں سہل جوابن منز

***
کفن ؤلِتھ چھُہ رٕڈیومُت الوند سٔرۍ پیٹھۍ سر

سۅ رُدٕ رُدَے چھےٚ دِوان درٛاگہ دٮو چُھ گونژھن ور

ژھٹھا متیایہِ پُٹِن برٛٮن تہ موٗلہ پرٛٲٹِن پھرٛس

یہِ زونہ ڈب تہِ اویزان ہُہ سِنگلہ پش تہِ پتھر

برٛہاں چھےٚ وُزملہ ہو ہو أچھن چھےٚ گاش توان

سُہ ترٹہ بزُن چھُہ زِ ژٕرنٮن اژان چھہِ جاناور

طُفاں تتیاو زِ توبٕکۍ اچھر ژھٕنِن چھٔکرِتھ

دعا نٮراش الٲندِس نبس منگاں چھُہ اثر

زمینہِ زورٕ چھےٚ ژوپ ہٮتھ ہۅ بونۍ باگہِ بٔرٕژ

دکا دکا تہِ یوان چُھس پُھٹاں تہِ چھس ہر ہر

یہِ واو وۅگتہ ونس منز وٮداکھ وونگاں ہونۍ

یہ واو کوچہِ گلٮن منز گرَن چھُہ ٹھاسان بر

زمیں شناس چھُہ تھٔج نارِ پٮٹھ بہِتھ عازم

غزل گٮواں چھُہ تہ گٔنزران چھُہ پانہِ ترٕوٕنۍ تر

***
آیتَن ازلہ واوٕ ہالن وَن

کالہ اوس پھرٛستہ پھن٘ب پگَہہ پہۍ پہن

زاو بالس تہ روو وٲنِج ہیو

پوت نظر دِژ نہ ژھالہ مٔتۍ آرن

لٔج کُٹھِس منز کٔتِج تہ وُمبرن پٮٹھ

ؤج نیبرۍ دٲر عشقہ پیچانن

وَس تہ وسمت تہ نستہ وٲج کٔنِتھ

مٲنز مسول متھان چھےٚ مس والن

وۅنۍ چھےٚ غارن تہِ نارٕ ژھٹھ ژاپان

ریٚشۍ تۅرگ تراوٕہن تہ ون رٹہ ہن

ہوشہِ سان ہیٚوٚچھ نہ پوشنوٗلس نِش

مۅہرٕ دی دی زٕلاں چھِ زٮو حرفن

لوٚدرٕ پھٔلۍ ہٮتھ ملر سوار عٲزم

***
سوٚدرٕ کھۅنہِ منز منگاں چھُہ ندرٮن پن

نہ چھُہ بُتھہِ بوٚٹھ نہ چھُہ گراین عار

ہٲنزو وِجہِ واوس منگ تار

ژیُہہ اوس، سُے اوس ازلہ ابد

اتھہ گۅو، وتھ گیہِ ناہموار

دوٕہُک دیُت تہِ چھُہ نوٗنٕے نوٗن

شفہ ہُک شکھ تہِ چھُہ بٔلۍ بلغار

یارن گٔیہِ انصافس ہٲل

ال پھٹہِ آبس ڈل رٹہِ مار

از چھہِ غذا درینٹھاکن پوش

از چھُہ بہارٕے باغس بار

عرشس نکھہ ووت دوٚد فٔرۍیاد

فرشس پُٹھہ گو استغفار

رتھ چھُہ رگن منز پارٕدۍ وٮتھ

کتھ چھےٚ قیامتھ، ژھۅپہ شہہ مار

سۅندری چھاو یہِ دمہ کوٹھٕر

ٲندری پال سُہ وِرِ شیہجار

بالو پیٚٹھۍ تھٔچ ژھالر کۅل

مالس پرٛاراں دعوادار

عٲزم پالان ٲنس منز

نالان پکھہ پھُٹ جاناوار

***
ژے کیا تھٮکی یہِ مسٲفر پننۍ وُڈو تہ پڑاو

خبر نہ دۅہ کتہِ لوسٮس، ژٮتس نہ کتہِ پٮٹھہ آو

گٕتَو گٕتَو چھےٚ یہِ کۅل بُتھ تہ بانہ ازماوان

یپارِ گیٖر چھُہ وتہ گتھ اپارِ بٹھہِ چھس ناو

دپاں سِتارٕ جرٮس رٲژ ہُند زدل دامن

چھُہ دۅہ تہِ درِ تہ پھژالس پھٮرن شکھُر تہِ رٕنیاو

سُہ دَور وُچھتہ چھُہ ما کیٚم̡  ژھیچن کتابن منز

شۅنجییہِ زونہِ زٕژن تل، وژھٲیہِ سِرۍیہِ کھژاو

وٮتھَو وساں چھُہ ؤسِن،تھکھ اگر چھُہ گگراین

ودن ہٹی نہ سٔہی وۅتھ گٮون لہر ازماو

لوَے گیَس تہ ژٕنٮو مٔنزۍ چھہِ یسلہ تر درٛامتٕۍ

نتَے یوَے یہِ ونُک ون مےٚ درٛینٹھمان دزاو

أچھن متھان چھےٚ یمبرزل یہِ جاموارُک رنگ

بہٲرۍ یاوٕ چھُہ وِرۍکیوٚم کران زٔری پٲراو

وُتُش وٮداکھ تہ سۅرنَے دِلس تُجِن دُبراے

یہِ ہَے چھُہ سون سُہ عٲزم، دپٮوکھ ہَے سُہ ژجاو

***
سُہ کتہِ وُڈو کرِ پونپُر پکھَو الاو پُھکان

یہِ ماگہ واو چھُہ واپٹھ کراں تہ مانہِ وٹاں

سُہ کتہِ سُہ بلبلِ مس یَس زبور ٲس دردس

بدل مۅغل چھُہ وۅگس پٮٹھ عجب کتاب پران

کرہُن اوبُر تہ کۅہَو پیٹھۍ مٔہِس اگادِ زلُر

سبز درٛمُن تہ پتھٕرۍؤنۍ چھُہ والہ بٔرۍ ییران

ڈلُک حباب تہِ ہانژٕھے، کھٮلُک ہلم تہِ ژھورُے

ڈُنگل تہِ کم چھہِ مۅژیمٕتۍ، ڈُنگن تہِ کم چھہِ کھسان

زمینہِ کاڈ کوڈا کِنہ قدَو تھدیاے لُکھٕے

وُچھاں وُچھاں چھُہ مگر بوٚن بوٚنُے وساں اسمان

نہ پرٛاوِ لچکہ نہ پورٮس غلاف سیتارس

تُرَے گژھٮس تہ نٮسنگاہ ہۅچھن کۅلن چھُہ پھٹان

غزل ہیواں چھُہ خبر کس زہر زدس عٲزم

نتےَ اموب سُہ آوُر چھُہ وُٹھ سُوِتھ آسان

***
سرتلہِ سودا کس ییہِ راس

بازر درٛاس اتھہ ہاوان آس

مۅچھہِ منز ٲس ٹِکہ واوٕج رٲو

بُتھہِ کوٚڈ بُتھۍہُنۍ واون ٹاس

دپوَے جۅیہِ کُس باڈو اوس

یُپۍ دیُت بارو بٔٹھۍ کھٮو ترٛاس

وُہنووُن وٮتہ گژھہ وُن نار

وۅش درٛاو وقتس خۅش احساس

ان اتھہ کھن یتھ کنہِ پٮٹھ ناو

ٲسِتھ گژھہِ دیُن آسن باس

سوٗزا عٲزِم صٲبن ڈٲلۍ

چکہ چاو اوسو لوٚبوا لاس

***
ٲنہ منزۍ ہووٕہس بیٚتاب کورُکھ

وعدٕ بُزۍ سادٕ دل شباب کورُکھ

گٔیہِ ہا، گٔیہِ ہا تہ آیہِ گرٛایہِ ورٲے

آرٕ پُروِکھ تہ رٲسۍ آب کوٚرُکھ

ویرِ وارس دِتُکھ جہارس درٛوت

پوشہِ نوٗلس مٔتِس عذاب کورُکھ

وٲنسہِ پوزٕکھ سۅ براندٕ کٔنۍ تہ پوٚتُس

خٲلۍ ہلمس زدٮن حساب کورُکھ

پش وُڈووُکھ پنُن بفضلِ خدا

کار زونُکھ یوہوے ثواب، کۅرُکھ

ژُھنکھہ صبحَے سٔتیُم کدٕل آبس

کوٚرکھہ از کار، ہاں جناب کورُکھ

ۂدۍیہِ تورُکھ تہ گرہنہ ماتس زون

أچھ ؤٹکھ غٲب آفتاب کوٚرُکھ

پام اوسُکھ دِوان پنُن پمپوش

نام دارو سرس سراب کوٚرُکھ

تِژھ دپان عٲزِمس کٔرٕکھ گانگل

خاب مٔشروہس، خراب کوٚرُکھ

***
ہی تھرِ بامن وُلوِتھ واو

ژوٚل زن، کُنہِ ووتھہ سُرٕ بنہِ کاو

أچھۍ موٗراں وُچھ دۅہ کوت ووت

ٲدی ہے اختابہ کھژاو

خندٕ کرٕ ناواں چندٕ ژھیون پوژھ

مۅکھتہ دپیوہم رٹھ سوٚمبراو

أسۍ پھٹۍ زٲڈِس منز ننہ وٲرۍ

تس اوس گُر گوٚند عاصہ تہ کھراو

ہاوسہ ووٚو اسہِ کاوُن ڈون

ٲکۍ دوپ زایاو، أکۍ دوپ دزاو

وۅلرو لۅلہِ منز للہ ناوُن

کٔلۍ لیوٚکھنَے گرٛاین پٮٹھ ناو

وتہ بدلنہ چھا پٔدۍ شیہلان

موٚت مُلکس مُلکس پھیریاو

یاوٕنہ روٗٹُھے یاون راے

بـیٚیہِ ما ٹوٹھی بر ؤتھۍ تھاو

***
سونتُل وردن سُوٕنَے درٛاکھ

سانٮن بونٮن نٮتھٕہ نٔنۍ شاخ

ناگن چھنٕہ کُنہِ وُزنہِ کٔمی

وٮتھہِ کوٕ گو نٔٹۍ برنس ٹھاکھ

وق آو مکھ زن دِودارس

داہ گو دۅیہِ خٲر، شاہ گو شرٛاکھ

سرٕکھے أندروٹ، کتھ نژِ مور

پرٕکھے، شرُکھ مُژراوی واکھ

لوٕ پھیٚرِ اکہِ پھول ڈٮکہ بوڈ گُل

سٮکھ ٲس وُمبرن شرٛانٮن گراکھ

عٲزم بٔنزرِتھ ترووُتھ پور

کیا ہٮتھ بازر کیا ہیٚنہِ درٛاکھ

***
خلقن زن اوس حلقن گنڈ

ملکن کوٕ لٔج تالس زٮو

کۅلہِ گٔیہِ گلہِ زٮو نوٚٹ کوٕ پُھٹ

کتھٕ گرِ دپھ ادٕ اتھہ منزٕ پٮو

تھجہ مژِ وِرِ گو وٲنجہِ ژس

کجہِ زٮوِ کیا وون کوستورٮو

زلرٮن زامٕتۍ بٲزیگر

دابہ دوٚبوس ازماواں دٮو

***
سپارا وُمبرِ رٔژھرٲوٕم وچھس منز

پوٚتس کاغذ کیٚمٮن اتھِ کھیاوٕ ناوٕم

سۅ کتھ ٲس میٖٹھ، باوتھ کرنہ کھوٗژُس

مٔرِتھ ٲسٕم وُٹھن، واون مِٹٲوٕم

سنگر پرٛاچیم، کۅہہ دامٕنۍ انےیَم

یتھُے جۅے وارِ نِشہ وٲژٕم تہ رٲوٕم

گنےیَم کل، سمندر زونہِ دورُم

منس ییٚلہِ گراے وۅتلییم، تہ سٲوٕم

مظفّر عٲزِمس ژھاین دِتِم وٕنۍ

کُٹھِس شینہ وٕنۍ جہاتن دٲر ترٲوٕم

***
ازلہ ابد سمسار اوٚنہ مَے

منہ وٕنہِ دلِ بیدار اوٚنہ مَے

صبحٕکہ وچھہِ شیٚہجار اوٚنہ مَے

شامٕکہ نبہ دندِ نار اوٚنہ مَے

سونتٕکہ شہہ سبزار اوٚنہ مَے

جگرٕکہ چھۅکہ وۅزجار اوٚنہ مَے

مژِ وزملہِ ہنز راس رٔٹتھ

اوبرٕچہ راگہِ سوار اوٚنہ مَے

کۅہہ تٲرِتھ گوم اڈوتہِ رأسۍ

اوٚنہ مَے نہ تہ صد بار اوٚنہ مَے

حٮس چھُیہِ کس گتھ ماراں لوٗس

پکھہ پُھٹ جاناوار اوٚنہ مَے

وِلہِ وِلہِ ٹوٹھےیوہم نا

شٲہد پرٛون اخبار اوٚنہ مَے

حرفس حرفس ٲنہ گورُم

ژیے چونُے انہار اوٚنہ مَے

پژھِہ دِتہ از وژھہِ وٲنجہِ واس

مژھہِ کھش دِتھ شہکار اوٚنہ مَے

ہٲنگنۍ تہہ تہہ مژراوُن

عٲزم صٲبُن شعر اوٚنہ مَے

***
ژھایہِ رچھومکھ خابس منز

خۅشبۅے ویٔپ نہ گۅلابس منز

وُہہ وُن وَچھ تہ شِہُل آنکار

زون کھژٕم اختابس منز

کیٚنہ پھول کیٚنہ نٕکہ ڈلہ پمپوش

زٕژِ ووٚتھ پھوٚر گردابس منز

خط کیا آم جوابٕے گوم

یٮژھ دوٚبرٲوٕم تابس منز

انگ انگ کھٮوو ارامُک برٮم

رُم رُم زول عذابس منز

یُتھ چُھنہ وُچھمُت ورزُن واو

کانہہ گاڈا چھنہ آبس منز

انہِ أچھ منہِ کامنہِ ڈوٚل کھۅر

گرٮدٕ بچہِ پٲلۍ کجابس منز

امنٕچہ گونژھہِ چھےٚ کرتلہِ پین

گۅنہُک رُح چھُہ ثوابس منز

کس اتھہِ دیاوٕ امامس ناد

بٲنگی شونگ مٮحرابس منز

کم کم ٲسۍ أمکۍ بسکین

ژھایہِ چھےٚ وُنہِ اتھ کعبس منز

خابن نم دِنہِ عٲزم درٛاو

آب منداں چھُہ دۅلابس منز

***
مٔتۍ ورٕ میانہِ چھہ روشاں زٮو

کمہِ گفتارٕ چھہِ شعر پھولاں

گریشمہ کہ تاوٕ چھہ لوٕ وۅپداں

لوِ ہندِ نارٕ چھہِ شعر پھۅلاں

بیٚیہِ گو تُلہ کترِس گُمہ سران

نوِ وٮوہارٕ چھہِ شعر پھۅلان

ہردٕکہ وچھہ پھٔٹ کوٚستوٗرۍ بولۍ

سونتٕکہِ رۅیہِ چھِس شعر پھۅلاں

***
ہٮنہ آم شِہُل گام سیاہ روٗدٕ جرٮن منز

ژس ووت دِلس تام سیاہ رودٕ جرٮن منز

ریہہ ہٮتھ چھُہ کھساں سِرۍیہِ کڈاں بالہ ونن ژھٹھ

دُہ ہٮتھ چھُہ یواں شام سیاہ روٗدٕ جرٮن منز

ژرِ اوس ہُتٮن اول ہے افسوس سُہ کٔمۍ زول

پرٕ کٲس چھےٚ دردام سیاہ رودٕ جرٮن منز

ادٕ یوٗت توگُکھ تیوٗت دِتُکھ اوبرٕ نبس نار

کیا دیٖزِ تمن پام سیاہ روٗدٕ جرٮن منز

رٲہی چھُہ پریشان پننٕۍ پرٛانۍ پُرن پھٔٹ

عٲزم چُھ وۅپر گام سیاہ روٗدٕ جرٮن منز

***
ہردٕ وٲے ہردٕ رٲچھۍ دردٕچ نَے

بونہِ پرٛوو پن ۂرِتھ بہارُک پَے

رایہِ چانی چھُہ میانہِ آنگٕنہ زول

مایہِ چانی چھےٚ سانہِ گامہ دِوَے

کر اتھس تھپھ تہ ستھ سمندر ہٮتھ

پروتن ہِندۍ سفر تہِ سپدن طَے

تاپہ کراین چھےٚ از اوبر سۅ وُڈنۍ

شین وٮگلیوو ییٚمہِ چہِ گرایہِ دۅہَے

پہرِ پوشِن مےٚ چٲنۍ پٔدۍ پمپوش

وارِ ہندۍ پوشنوٗل رٔچھۍنَے دَے

وٮتھ چھےٚ پانس پنُن سفر پالان

شاٹھ شاٹھس تھٮکان چھُہ مانٹُک پَے

بالہ آرس چھےٚ سودرٕ کھۅن پراران

نیٖرۍ شیٚہجارٕ میانہِ! گرٕ چھُہ گرَے

کینہہ مہ پرٕژھ عٲزِمُن خۅدا رٔچھۍ نس

نارٕ بالس اندر چھےٚ نالان نَے

***
راتٕچ ژھۅپہ ٲس دیٖپک راگ

گٹہِ ٲس بختس ژٲنگۍ پُھلے

ژھٹھ ٲس تھچہِ مژٕ پکھہ وایاں

ریٚہہ ٲس ہنہِ ہنہِ تیزاں طے

بد بُتھہِ اوٚبرٕچ دۅکھہ لد ژھاے

اٹہ بارِ ٲسٕس تاپٕچ شے

خٲبۍ أندرۍ ڈوٚل خابس کھۅر

کعبس تنہ بیٚیہ لٔج نہ دِوے

وتہِ ٲس شاہ رگ شرٛۅکنیمٕژ

اسہِ کرٔۍ رتہ سرٔۍ پٔدۍ نحقے

بترٲژ ہندۍ بارٕجۍ اولاد

پوشس پوشس تنہِ پُژنے

تتھ بسٔۍتی پھوٚر پاگل واو

از چھہ تتٮن وٲرانہ سرے

پھرِ زن گرِ کھنجہِ وارلۍ ژھاے

بلبل اڈٕ کوٚل کرِ نہ دۅہے

سُرٕ بنہِ برادٮو زُتِنہِ الاو

یس ٹوٹھٮو تس ٹوٹھٮو دے

وتہِ ترٛوو پانس پتھ اختاب

تتہِ تور آو اسہِ گاشُک پے

پتھ ون اژٕنس کوٕ کھوژیوکھ

مۅچھِ منز سٕہہ أچھۍ تھاویمے

***
أچھ گاش ژٕہان آیہِ أچھن منز مےٚ بٔرٕم راتھ

سۅے پرٲنۍ سپار ٲس بدل آیہِ پٔرٕم راتھ

پے آم دُہٕلۍ گاشہِ ژٔندٕر کڈِ نہ بُمن واش

کھۅر تل روٹم اختابہ تٔمی آنہ تُھرٕم راتھ

لرٕ کانہِ پھٔٹٕم یام تہ لرٕ کانہ پھچایم

اچھٕ دارِ مژر اوس اچھر ڈولہِ بٔرٕم راتھ

تِژھ تٍر یوان ٲس زِ رتھ شِٹھہِ ہے رگن منز

اکھ پرٲنۍ چِٹھیا چٲنۍ ہُتٮن دارِ مٔرٕم راتھ

اکھ ساتھ سُہ ٹوٹھیوم زِ اکھ طور دٔزِتھ پٮوم

اکھ گاش پُزُم راتھ تہ اکھ لاش ؤرٕم راتھ

اکھ طفلہ نظر باز تہ کُل عُمر تہ پرتیٖتھ

ہے ٹٲنہ ژٹن والہِ یہ کۅسہ گراے پھٔرٕم راتھ

پمپوش سپٕدۍ ژٲنگۍ ڈلس نارٕ ملر ؤتھۍ

نِچہِ گاڑِ نژُن کوٚر تہ کراماتھ سٔرٕم راتھ

تٔتھۍ دارِ ہنگس اوس اویزان سُہ عٲزم

تہدار تسٕنز بٲتہ لہر فکرِ تٔرٕم راتھ

***
أچھو سومُم وچھس منز ژوٗرِ تھووُم

یہ پھٔٹۍپھٔٹۍ نیرٕوُن أٹۍ أٹۍ کڈاں چُھم

ژٔھرِس گاشس گٔرِتھ موٗرتھ ووٚنم تس

یِتھس مصرس دوٚیُم ژھونڈُم تہ ہورُم

اچھر ژٲشِم تہ رس وُچھمکھ ژمیومُت

کلٮن جاناورن ہند دود ژولُم

سُہ جلوُک نار، دٔز شیہجارٕ ہن ہن

سۅ مشکٕنۍ دار شاہ کھالاں چھُہ رُم رُم

سۅ زکھمکھ چھہۍ دِنے زولُن ونُک ون

بہ خوش بخ نارٕ بالن سینہ دورُم

صبح پھۅلہ وُن دِگر ڈلہ وُن رلٲوِم

ژہٮن منز دۅن زمانن تار تورُم

ژےٚ ہردٕچہ زونہِ ہندس پرتوَس تل

ؤہرۍ ؤریس بہارُک تاپھ چھووُم

گلالس گوو أچھن تل داغ رسوا

انٮن یمبرزلن سُے راز بووُم

مزازس ٲڈرن چھم آفتابٕچ

لگے تٕرنٮن پلن اندر مہ تراوُم

گٔرا بیوٹُھس مظفّر عٲزِمس نش

سِرا اوسُم نٹٮن پٮٹھ کھالہ نووُم

***
اوبرٕ لِشا ٲس، اسہِ دوپ کینہہ پیٚیہِ، أچھ لجہِ درٕ اسمانس کُن

نظرٕے زٲجِن، ژھایہ تہِ آیہ نہ سٲنِس یتھ وٲرنس کُن

کتھ چھنہ ونہ نٕچ، دتھ گیہِ خابن، کتھ شمہس پتھ راوٕر وٲنس

گاہ ژول چشمن برٛٮم دِتھ پانس، ریٚہہ پٔچ رسہ رسہ جانس کُن

یہ تہِ چُھنہ وپھنٕچ تۅژھ کیا ٲس نہٕ، یا ونہِ کیا اوسُم نہ شِکٲرۍ

والہ بٔرِس منز زنگ پھٔسرٲوٕم، کل روٗزٕم پھل دانس کُن

منہِ پھورمُت سٔنۍ ژور بےٚ شونکھِس، تنہِ گیہِ ہنہ ہنہِ یرٕوٕنۍ ناو

ڈٮکہ نومراواں مٮحرابس کُن، اتھہ چھُہ گژھان مس بانس کُن

تس چُھنہ وقتٕچہِ أچھ بُتھ وُچھمُت یۅس مےٚ چھےٚ بختس ٹوٹھیمٕژ

وِلہ وِلہ غزلن منز مۅلہ نٲوٕم، گِلہِ نیو گِلوِتھ پانس کُن

لوٕ پھیرۍ أکۍ کٔر سٔدرٕچ باوتھ، پرٛوِ اکہِ ؤنۍ اختابٕچ کتھ

دِل پرٕنووُم کنِرُک ہوہو أچھ لوسم بُت خانس کُن

ژھاراں نیرِ تہ کۅم کرِ واوس، پرٛٲوِتھ پھیرِ تہ سورٮس تیٚہہ

اسہِ پھوٚر شوقس مس موٚت عٲزم وٲتۍ نہ تس دیوانس کُن

***

وتہِ مشرف گو کوت پٮٹھ درٛایے، ظۅن رود نہ کٔمۍ موڈن دیُت برٮم

یادس پیٚے ورقن کاغذ کیٚمۍ وٲناکھ وتن ؤڈرٲوۍ قدم

مجلونس گو کیاہتاں بُل چُک تٔمۍ تہرِ پھلٮن کُن کھوس پنُن

مژِ لٲلہِ چھُہ نحقے پھوٚر پھوران تس پانس برٕ گٲمتۍ کوسم

یتھ ہردٕ بُتھس کُن یُتھنہ گژھکھ ییٚتہ چھا کانہہ موسم ڈیرٕ دِوان

وتہِ وٕنۍ وٕنۍ سمکُھم سونتہ ہوا وژھِہ وٲنِجہ بورمس پوشہِ ہلم

یِنہ وُپھوارس شہپر زالکھ یِنہ اظہارس وتہ کون کرکھ

ینہ پرٔۍیہِ محل کُن وتھ لبہِ دٮو یِنہ پوٚت کُٹھ اژِ کانہہ نامحرم

یتھ وٮتھہِ چھہِ وۅتھاں مدٕ مٲتۍ ملر ہُتھ وۅلرس تہِ چھُہ از پھوٚرپھوران

شۅدِ شوقہ چھےٚ درامٕژسمکھن کل تعویذٕ چھُہ لیکھاں میون قلم

وارلۍ سٕنز رتہ سٔرۍ تونتھ وُچھتھ تھاریوو بٮگٕر آواز گٔیَس

وُچھ میانہِ زمانُک لولہ قُمیُر کمہِ سادٕ صداقٔژ کوٚر برہم

***
شمہٕچہِ ریٚہہِ سٍتۍ چھووُم شام

شفقٕکہِ بُتھہِ وۅشلووُم شام

ہۅکھہِ متہِ ہٹہِ ووٚنمس کیا تام

عٲرقہ ژھٹہِ أدرووُم شام

ییلہ آم ژٔندرُک پے ہٮتھ آم

رٮتہ پتھ رٮتہ ازمووُم شام

لۅژِ لۅژِ کتھہِ لوٚژرووُم بوس

گۅبہِ گۅبہِ شہہ گوٚبرووُم شام

مۅچھہِ مۅچھہِ بوٚرمس مۅختہ ہلم

سۅچھہِ بلہ کۅچھہِ للہ نووُم شام

زخمو پننٮو کوٚرمس زول

چشمو چانٮو چووُم شام

رژھہِ رژھہِ زولُم خونِ جگر

مژھہِ کھش دِتھ رنزٕنووُم شام

پژھہِ اوس کٹھکوش وٮگلاوُن

وژھہِ وٲنجہِ وُہنووُم شام

متھ گوم برٕہن شعرن منز

اتھ کتھہ کتھہِ منز رووُم شام

وقتس تورُم ارٕور تار

صبحٕکہِ سِرٕ برٮمرووُم شام

نالس جوٚرمس تارکھ نب

سحرٕچہِ گرِ وُزنووُم شام

ییٚمہِ کتھہِ حرفن وٲنج پھٔٹ

تمہِ کتھہِ حٲرتھ کھیٚووُم شام

چشمن منز گِندٕنووُم تاپھ

سیٖنس منز شٮہلووُم شام

صبحے سوزن تاپس ڈٲلۍ

راتس کھۅنہِ کٮتھ سووُم شام

زن بہ تہِ اوسُس عٲزم صٲب

کم کم وہۍ کرٕنووُم شام

***
رَو ییٚلہِ ٹوٹھی منہِ منز وۅپداوی پمپوش

ریٚہہ ییلہ تیزی آلو دیاوی ہوشا ہوش

للہِ نازلہِ اوس نٮتھہ ننہِ تنہِ تہدار پھٮرن

حبہ خوتوٗنہِ چھُہ شٲہی وردن پوز اُکہ توش

چون تہِ اوس رُت مشورہ متہ دِتہ سفرس تن

بہ تہِ کیا کرٕہا، میون مژر اوس خانہ بدوش

کانہہ کانہہ سیر گۅبٮوو تہ کتھہِ گیہِ شعرٕ ونن

زٮو نینگلاوِتھ وٲنسہِ أکِس دوبراوٮوم جوش

مےٚ تہِ ؤژھ سٔدرس گرٛاے تہ سازس زیٖر لٔجم

زون بۅڈیمٕژ، تھلہِ تھلہِ ٲس وُچھاں خاموش

کارا ترووُکھ، وُزملہِ ژھایہِ گِتٮن کر گرٛٮند

کرٛیہنِس اوبرس پھٔٹ تہ أچھن منز گیہِ روپوش

مۅلوَن والٮو نظرن پنہ نٮن شیرِو سنگ

ہلمن لال بٔرِتھ چھِو آمٕتۍ لال فروش

***
اوٚبرٕ دٮو نَے کاسہِ منتھا تھاوِہے

وُزملٕے کرِہے، أچھی شیہلاوِہے

آبہ جۅے نَے ٲس صحراوس ڈٮکس

شبنمٕے سُلہِ ژیرۍ وُٹھ أدراوِہے

تاپھ زٲلتھ تراوِ یا شٹھٕراوِ شیٖن

زانہہ یہِ موسم تیٚہہ حدن منز تھاوِہے

آفتابس شیٚہلہِ ہے عٲرق ڈٮکس

زون ہَے ٹِکہ واوجا نژٕناوِہے

روٗدٕ رانٹھا نےَ ژھرٕے ژھایی سٔہی

یتھ الاوس کُن تہِ کیٚنہ پُشراوِہے

کاڈ کڈِہے کانہہ قلم بالا قدس

بُت پرس عشقس ألف پرناوِہے

ہے بہ کُس یوسف، بہ کتھ کیٖرس اندر

کانہہ یمن قاتل کۅہن نہناوِہے

ہر مۅکھس یُتھ گرایہ کرٕہن تالہِ میوٹھ

قلزما انہِ ہے، ڈلس منز تراوِہے

ہُتھ نبس کرِہے أچھر والو پریُن

یتھ بے حٮس بترٲژ کانہہ دٕنِراوِہے

موٚت، دُپہرن مالہ کرہے تارکن

شامہ پٔتۍ چھِٹہِ پونپرِس نژٕناوِہے

پھۅلنہ وقتن ولنہ ییہِ ہٮس واو زن

اسہ وٕنس ٹورِس تہِ برٛوٚڈ کڈٕناوِہے

ہرونِس پوشس تہِ پوشن پاے دِتھ

شبنمس سادس ودُن مٔشراوِہے

پننہِ پاگل نظرِ وٹہِ ہے توسہ توٚمبۍ

شوخ مغروٚرس وتن وتھراوِہے

مٮون ہیو پھوٚر تس تہِ آلژھۍٹینگہ وونۍ

حرکتھا کرِ ہے، وتھا ازماوِہے

شعر چھا اڈٕ ژاپہِ علِمُک بالہ گرٮز

عٲزمٕنۍ پٲٹھٮن غزل ورتاوِہے

***
سفر، أنیٖکھ سفر، تھوٚک مےٚ آفتاب وتی

بیٚتاب چشمہ تہِ کرتم مراد یاب وتی

حرف تہ میٖل کتھن زوٗنہِ گرٛہنہ ماتہ پھٮرن

قلندرن چھےٚ ؤٹتھ تھٲومٕژ کتاب وتی

سُہ دۅہ تہِ ژول دُؤتۍ ٹسنہ کٔرۍ ژھرٮن نظرن

یہ دۅہ تہِ ووت سٔرِم سِوۍ گژھاں سراب وتی

بے شوٗنکھۍسٕے چھےٚ پکاں وٮتھ مگر سمندر کُن

یہ ووٚتھ سوال وتی اتھ پُشر جواب وتی

ؤں یُتھ چھُہ تیُتھ چھُہ سُہ عٲزم پنُن قبول کرُن

قدم تجین حسابَے سُہ گو خراب وتی

***
دارٮن پردٕ سجاوان ٲسۍ

گاشس للہ وُن تھاوان ٲسۍ

توٚبروٗکھ ٲسۍ تمہِ شہرٕکۍ لوٗکھ

تالو ٹنگ سوٚمبراوان ٲسۍ

ٹینکہ بران ٲسۍ وارٮن منز

گٔنزراواں گٔنزراوان ٲسۍ

ناون اوسُکھ ژامُت آب

کٔدلن ٹھٔٹھۍ لہراوان ٲسۍ

حُسنس پننِس زالاں ژھاے

ٲنن دُہ دِوناوان ٲسۍ

قبرن ٲسۍ کرناوان ٹیپ

کفنن تِلہ جرناوان ٲسۍ

خٲبۍ أندٕرۍ ٲسۍ لایان مُش

ولہ ویرن الراوان ٲسۍ

اتھہ بُتھ چھلنَے بانگ پٔرِتھ

مسجدِ منز لر تراوان ٲسۍ

بٲیِس ژھیٚیہِ تل تھٲوِتھ ژونگ

بارٕنۍ اتھہ وُشناوان ٲسۍ

دۅدٕ کۅلہِ مۅکھہ ٲسۍ بال کھناں

امرٮتہ جۅے پُرناوان ٲسۍ

دۅدٕ ہٮڈرن ہندۍ بُتھۍ پھِرۍ خاب

مٲنتھٕر دی دی ساوان ٲسۍ

أندرِمہِ لیہِ ٲسۍ چیراں ہوٚٹ

نیٚبریُم جٹہ جوٚش چھاوان ٲسۍ

جودوٗگر گۅنماتھ تتِکۍ

کتھہِ روس کتھ ابساوان ٲسۍ

منہِ مٔچھۍ ٲسٕکھ میٲنۍ شبیٖہہ

ہُنۍ قبرن پُشراوان ٲسۍ

***
کور یچھن واپھ، بہ کوتا باوے

رٲژ لوگ شاپھ، بہ کوتا باوے

وُزملن کٲزہ کراں کالہ اوبُر

قاف تا قاف، بہ کوتا باوے

پھرٛیٹۍ گمٕژ ہٲر تہ بوٚچھ راتہ مۅغُل

یہ رتٕچ ژاپھ، بہ کوتا باوے

دارِ ترٛوپراوِ، نیبٕرۍ پٮو شیشن

وونگٕنُک چھاپھ، بہ کوتا باوے

لوگ کٔنس سٍتۍ متیومُت دٔرۍیاو

گو پشس کرٛاپھ، بہ کوتا باوے

کاو وولیاے قُمرۍ کترٲوِکھ

ٹاو گو یاپھ، بہ کوتا باوے

تھٔچ دٮوس سٍتۍ دۅہس گتھ ماراں

پٔرۍیہِ ترٛو ڈاپھ، بہ کوتا باوے

واتہِ ییٚلہِ سون شہر تپہِ کانگٕر

شرٛاونُک تاپھ، بہ کوتا باوے

وُٹھ سُوِتھ آس تہ معنے بوزُم

کتھ چھےٚ اسراف، بہ کوتا باوے

***
ییٚتہ وٕنۍ ہٲرِتھ آس تتہِ کیا چوم تہ ہاے

رُمہ رُمہ آبِ حیات گُمہ پرٛیڈیوم تہ ہاے

پرٛوِ کوڈ تھرِ پٮٹھ کاڈ لوٕ ؤژھ واوس سٍتۍ

تٔتۍنٕے تاپہ ٹیوٚکا مےٚ تہِ مازیوم تہ ہاے

ۂندریمٕژ دُبراے، وۅندِ ٲسۍ ژاپاں داغ

وُزمل ٹوٹھیٚایم، وَٹھ وٮگلیوم تہ ہاے

تنہِ ہٕندِ آگرٕ آس من سرچٲوِتھ راتھ

طوطس زاگل بیور پادن پیوم تہ ہاے

چھژِ یمبرزلہِ پوٗر چھِٹہِ پونپورِس پان

ہٲرِتھ تمہِ دربارٕ حٲرتھ کھیوم تہ ہاے

تیوٚنگلس لٲرِتھ گوس ژُہمس وُہوُن بوش

کتھہِ کتہِ اوٚن شیٚہجار متہ پرژھۍتوم تہ ہاے

کٹھکوٚش اوسم بارِ سونتھٕے روشایوم

چۅغہ ناموٗسُک راتھ بٔنزرِتھ کھیوم تہ ہاے

شرزٕسٕنزِ فطرٔژ زاس مزٕ مزٕ ژٲپٕم زون

ژٔندرُک برونتھٕے گوم توٚندرٕ تتیوم تہ ہاے

تیٚلہِ ٲسۍ وِرکیمۍ پوش تیلہِ آس ہی پھۅلنے

ہردٕ گٮواں موٚت شوق وٕنۍ سمکھیوم تہ ہاے

کھسہ وُن دۅہ راویوم ژھاین اتھِ کھیاویوم

عٲزم وتہِ سمکھیوم ڈٮکہ پرزلٮوم تہ ہاے

***
گوش تھوہکھ تہ اکھ سۅخن ونہ ہے

کینہہ تہِ ونہ ہے نہ میون بن ونہ ہے

اکھ نظر، أڈ نظر تہِ ٲسٕم کٲف

یونہِ یٔندرس سٮٹھا چھُہ پن ونہ ہے

میون نِلہ وٹھ ژےٚ کتھ لگی وٮگلتھ

ناو أتھۍ پٮٹھ شُبی تہ کھَن ونہ ہے

مۅختہ بٔنزرُم تہ پھوتہ رٔژھرووُم

پۅختہ کارس گٔیَم ونن ونہ ہے

چانہِ بازٕرۍ سُہ ہٮتھ بہ کیا یِمہ ہا

کھوٚٹ ضرب اوس میون فن ونہ ہے

صاف، ناصاف، وٲنسہِ وچھ دورُم

چانہِ اختابہ چن زٕژن ونہ ہے

چانہِ خلوکھ سرایہِ کھل سم سم

یُس چھُہ سُے اکھ حرف مےٚ ون ونہ ہے

میانہِ دُب دُب سرایہِ منز برتن

لامکانٕچ پنٕنۍ پُرن ونہ ہے

پان دٕنہ ہا پنُن اوبر تاپس

جان وۅتھراوٕہے وتن ونہ ہے

سٍتۍ اوٚنمے غزلسرا عٲزم

میون ؤنۍ ؤنۍ پیٚیی پرن ونہ ہے

***
پٲزٕ ارمان دِتِتھ، تازٕ وُڈن پکھ تہِ دِتم

ژےٚ ہِوِس پایہِ بڈِس شوٗبہِ نہ اُکہ توش کرم

کالہ اوٗبرس چھُہ ننی راگہِ کھسُن میون پسند

وُزملن تھٲپۍ کرِتھ یَنہ مےٚ وُٹھنۍ تجۍ لاکم

مےٚ چھُہ وُچھمُت سُہ أچھو نارٕ وٮتھن تارٕ تران

مٔتۍ کتھا اوس وناں شوق چھُہ موتس محرم

تن چھےٚ ییران مٔتِس خابہ ۂتِس فضہس منز

زین ما چارِ ستارن تہِ مےٚ ہیوٗ شوخ قدم

سُہ گرٛزاں نیرِ تہ سٕہہ گۅردٕ چھہِ سپداں دمہ پُھٹۍ

چھِٹہ پونپر پکھہ داران سُہ یتٮن ترٛاوِ قدم

کم نظر درٛاکھ تہ باسیوے سُہ موٚہ ہیو ییٚران

مےٚ ژٮتُرمُت چھُہ سُلی تس چھہ کتٮن تھپھ محکم

شاد مس رقص کراں وُچھ مےٚ پتھر خون تسند

ژٕ خبر کیازِ کراں درٛاکھ تمِس پٮٹھ ماتم

أزۍکہِ شبہ آو مےٚ بییہِ پیش سفر زانہِ خدا

دارِ پٮٹھ ژٲنگۍ ہنا تھوۍزِ ژے چھےٚ میون قسم

أنہ کپٹاں چھُہ زٕژن سون مظفّر عٲزم

پوشہ برگن چھُہ سُواں چاکھ سُہ الماس قلم

***
وُٹھ پھیشاں کٔنڈۍ وتہِ ہندۍ چاکھ

دوٚپہم تلہ پدۍ رتہ سرچاو

ہَتھ ہاوس وُرٕ وتھرِ کرِتھ

اکھ آلو دِتھ واپس دراو

اختابو! وُچھ زوٗنہِ چھُہ داغ

تگہِ یے تیز پہن گاہ تراو

چھٲوِتھ تِمہ وتہ ترٛٲوتھ آکھ

زیٹھٮن جامن چِھکہ وۅتھراو

پزِ ووننمہ کِنہ ٹسنہ کورن

منہِ منز تنہِ ہنز تیٚہہ وٮپراو

ژےٚ تہ ؤجۍ وٲنِس دورُتھ نوٚٹ

مےٚ تہ وِجہِ واوٕچہِ پکھہِ لیٚوکھ ناو

آلِچ منگہ چھنہ آنپَے یوت

آگر پٔچھنی پکھہ وہراو

بۅچھہِ پٮو تھنہ تے گچھہِ کُٹھہِ مود

یتھ پُیہِ موکل گاٹُل درٛاو

ٹینکہ لمس رتہ چھپہِ دِتھ پان

قوروٗنس فاتٮح پرٕناو

پوٚت آلو شہمار الٲندۍ

دِلہ دوٚر وتہ گتھ کوٚت پٮٹھ دراو

تتہِ شروپ ٲدۍ اکھ پوشہ دٮماغ

ملہ کھاہ دۅسہِ پٮٹھ تُج مشکاو

عٲزم مونڈن پڈرن تل

غزلٕکۍ رخچن پرٲوۍ پڑاو

***
اوٚبرٕ گۅبیوو أندریُم ساون

ہی تھرِ رُدٕ جرِ کرِ ارپن

حد، سرحد ژھاراں لوٗسُس

اسمانس نیٖلے یم تن

پیچانس چھم ہیٚنۍ تعلیم

ابساوُن چُھم ٲویُل پن

وتہِ وتہِ وۅتلووُن وُسجار

ظلماتس ژٔھنۍ جپٔھۍ شمہن

ژٕ تہ بہ چھہِ تھنہ پیمتۍ دُکہ ویرِ

شہہ لٕتھِ کیا ووٚن سٔہلابن

کۅلہِ پٮو مالِنۍ پتھ ون یاد

کلہ ٹھاساں ٲس آرٕ پلن

بُجرس للہ وُن لوو ارمان

بٲتھا تُھرِہا شُرۍ باشن

منتھا تھاوکھ، باوکھنا

معنے دلہ کٮن دۅن حرفن

***
لوِ کٔڈ نوِ سرٕ سونتس کل

لالس کونچُھن دلہ شیہجار

پروِ بوٚر بیٚیہ از بانبرِ ہوٚت

یمبرزلہِ ٹارٮن منز نار

کرٛہنِس اوٚبرس وچھ پرزلیوو

وزملہِ کۅسہ کتھ کٔر اظہار

کچھہِ منزٕ ؤنۍرووُم اچھہِ پوش

چشمو ژوپُم کٔنڈۍ انبار

واو شوریوو موسمس ووٚتھ بوش

تٍرِ ہانیٚوو آفتابُک جوش

لوٗسۍ پونپٕرۍ نیٚبرۍ نیٚبرۍ گتھ دِتھ

ریٚہہ چھےٚ فانوسہ مٔنزۍ وُڈاواں ہوش

لولہ سازس ؤیِم سۅ جٲدۍ نظر

نغمہ وۅپدیوم رُت رٔسیُل خاموش

***
گوم برونتٕے تہ نظرٕ وُنلے یم

ہوش روٹُھم قریب اوسُم اوش

خام کارس گٔیَم دُبانبرِ کل

نہ خطا رہبرن نہ شٔتھرن دوش

تماشہِ کیا چھہِ تگاں نوبہارکِس واوس

زِچھر تہ مویہِ چھژر لوگ ٲکِس زٔنِس داوس

ۂجی نظر تہِ سۅ ترٛاوٮم تہ ماگ وُشناوٮم

کٔجی بیاض تہ ہاوس تہ ہار شیہلاوس

شفیق شوخ مزازس چھُہ سوز ساز پسند

بہ ٹورِ ٹورِ گُلن ہند اسُن کنَو چاوس

خیالہ کٔہندِ کراں زول چھکھ شبستانس

امارٕ میانہِ وۅتھی یُتھنہ ٹیب پٲراوس

یہِ سِر اگر بہ ونکھ بارٕ کٔنڈۍ ژھٹن خۅشبۅے

سُہ پوشنوٗل ووان اوس بولۍ صحراوس

دپس مےٚ زون ژےٚ کٔمۍ لولہ خابہ مُر بوٚرنے

اگر ثبوٗت منگٮم عٲزِمُن غزل ہاوس

***
أزیُک عذاب بٔنتِھ گو یوٕچ مثال بٔنتِھ

مےٚ روو پوشہِ پگاہ پوشٕہ وُن سوال بٔنتِھ

سُہ یتھ نہ سونتہ ہوا لوگ، سُہ یُس نہ بولۍ بنیوو

سُہ شاہ پھسیوم وچھس منز تہ چُھم وبال بٔنتِھ

مےٚ وتہ وٮلٲے نصیبس رٕڈیاے وتہ ہاوکھ

مےٚ ییلہ ؤ تیلہِ چھہِ سرابٕے پھران سۅکال بٔنتِھ

ییٚمِس تہِ سۅے چھےٚ یواں ولنہ سٔدرٕ ہِل لٲگِتھ

ہُمِس تہِ سۅے چھےٚ اویزان زٲج نال بٔنتِھ

نظر چھےٚ میٲنۍ برٛہاں از بےٚ نوٗر گوشہِ دزن

وچھس اندر چھُہ مےٚ اختاب نارٕ بال بٔنتِھ

سکندرس تہِ دِتُکھ پوشٕوُن مقام یوٚہوے

قلندرس تہِ یہِ ظلماتھ روٗد حال بٔنتِھ

وُچھاں وُچھٲنۍ ڈوٚلُم نظرِ خۅش زبان عٲزم

بسان بسیوم دٮماغس اندر خیال بٔنتِھ

***
تاجہ تختس لگٮم پُھلے بختس
واجہِ کرٛانکس اگر ژٕ لیٚکھہ ہم ناو

سوسنٕچ زٮو چھےٚ چٲنۍ شیٚچھ باوان

چون پٲراو کوسمن ہند کراو

شامہ تارُکھ امارٕ آیوسے

شفقہ نارو ژٕ کٔرۍ زِ ہے ٹھٔہراو

تاپھ چھووُم تہ گاشرٕم ہن ہن

میانہِ پُژِ آفتاب پھِرۍ پھِرۍ دراو

شالمارن چھےٚ کالہ اوٚبرٕچ ژھاے

ڈل ہواوو پنُن اثر ازماو

نارٕ بالن چھُہ تُلہ کتُر لوٚگمُت

میانہِ بترٲژ کٔٹھۍشہ ووگ رٕڈیاو

ٲس دٲرِتھ وُچھم ششر گانٹن

ترٛیش ہٮتھ یُن گوژھُکھ بہارُک تاو

***
سنگس پٔچ سونتہ واوٕچ گرٛاے ساتھا

تیتھُے گوٚژھ از تہِ بے پرواے ساتھا

وچھس گٔژھ نارٕ بالس وارٕ ژھٹھ یِنۍ

أچھن گٔژھ پوشہِ ٹوٗرِچ ژھاے ساتھا

دلٕکۍ آلو چھِہ لفظن ہندۍ گداگر

مےٚ سادس ٲس پانس راے ساتھا

دما رٹھ ژلوٕنِس واوس تہِ دامن

مٔتِس خابس تہِ کر اتھہ لاے ساتھا

مہ کر، ژٲنگِس مہ گِند، جامن گنڈی ریہہ

تھواں وٲنسن چھُہ للہ وُن نیاے ساتھا

مُرِس چُھس ازلہ ابدٕکۍ راز چھاواں

ژِہِس بخچاں چھُہ پوشن پاے ساتھا

کراں کیا پرٛانہ وارن چُھکھ پتُک برٛونٹھ

مظفّر عٲزمٕنۍ رٹھ تراے ساتھا

***
زُنہ گاہ پنجرٕچہِ لٕیہِ کنۍ ژاو

کمرُک کمرے وۅلسنہ آو

ہی تھرِ لنجہِ لنجہِ پٮٹھ اوس شین

سونتہ ہواوچہِ ژنجہِ وٮگلیاو

آنگن منز کوڈ سرون کاڈ

دۅسہِ ہند بُڈٕ نلہ ووٹ وۅشلیاو

کارِ وۅگنۍ کۅکرن دژ بانگ

دارِ دمس پٮٹھ رو پرزلیاو

تھرِ ہند لوٕ پھیوٚر درٛمنس ووت

ہۅچھہِ مژِ کانجہِ نوٚو تر درٛاو

نوٚژ بُربتنہِ تہ ژھٹہِ کۅڈ واش

سُرٕ بنہِ برٛادیوو نارٕ الاو

کچھہِ مٲدانٕکہ مہرازو

اچھہ پوشو وۅتھ تن مشکاو

کۅنگہ تیٚہجہِ چھےٚ ٹوٹھیمٕژ زوٗن

ہردو! رٹھ نوٚو وردن چھاو

***
کھسان چھُہ ہٲرۍ تہ شرٛاوٕنۍ تہِ وۅنۍ تُرُن اختاب

دپاں سُہ پرون شہر از شہن دِواں چھُہ حساب

سۅ وٮتھ چھےٚ شرمہِ ہندس عٲرقس گِنداں گرٛاین

ہۅکھے چھہ ووکھہ متیمٕژ أچھن تہِ روٗد نہ آب

پُٹٕکھ سۅ پوشہِ پتھٕر پرٛانہِ ذٲژ منساوٮکھ

اگر پھۅلٮس تہِ وۅپر باسہِ پننہِ وارِ گۅلاب

ترٛٹو تہِ ہٮیوٚک نہ تِمن نیندرِ منز وُرُن ڈٲلِتھ

قلایہِ سٍتۍ کراں آیہِ گرایہِ چُھکھ سٔہلاب

بہ کھوژٕہا نہ گٹن پوز یہِ شب چھُہ بدلٕے شب

چھُہ گٲمۍ گام شۅنگِتھ کانہہ اکھا تہ وُچھہِ ہے خاب

ژھٮچو کتھو چھہِ کران اوپ ژوپ موصوٗمن

دۅژھو دۅژھو چھہِ وٮتھن آپراں دۅبن ہند آب

سوکوٗنہ سان چھُہ ہنۍ قبرِ منز تتیُک عٲزم

بٮوار آرٕ پلن پٮٹھ لیکھان نارٕ کتاب

***
وکھ چھہُ از بخ بٮدار، پیالہ تُلِو

سالہ آو بالہ یار، پیالہ تُلِو

سۅ شہِج مٲرۍ منز گۅلابٕچ ریٚہہ

بہ وُہاں موٚت امار، پیالہ تُلِو

سۅ حیا ویٔژ تہ زٮو ژھنِن نینگلتھ

بہ ونِتھ گوس خار، پیالہ تُلِو

کوسمو لوسہ نوو بوسو سٍتۍ

لالہ چھا داغ دار، پیالہ تُلِو

از تہِ عٲزم چھُہ پیالہ روٚس ٲسِن

کتھ لگن شرم دار، پیالہ تُلِو

***
زوٗنہِ پتے تارکھ ؤڈرٲوِتھ ترٛٲوٕم زۅل

تنہ گو وقتا ینہ دل سٲوِتھ ترٛٲوٕم زۅل

أزۍکہِ غمٕچ تلوار کٔرٕم شاہ رگہِ پٮٹھ تیز

پگہٕچ بیقٕل ستھ کترٲوِتھ ترٛٲوٕم زۅل

زیٖن کورُم دیوارس دۅدٕ مجنون کھوتُس

کۂۍیا دجہِ مہریٚنہِ پُژنٲوِتھ ترٛٲوٕم زۅل

کیا کیا ووٚن سرسٲوۍ ٲچھو زٮوِ توگ نہ پِھرُن

زٮوِ تہِ أچھن ہند سۅرمہ لگٲوِتھ ترٛٲوٕم زۅل

یُتھنہ ترٕیو کِنۍ تاپھ اژٮم مژِ نیٚندرِ پھرٮم

دارِ برٕے کیا لٕیہِ ترٛپرٲوِتھ ترٛٲوٕم زۅل

دل ما تمبٕلٮس، بولہِ، تہ صبحے نیندرِ پھرٮم

قُمرِس راتہ مۅغُل ۂسرٲوِتھ ترٛٲوٕم زۅل

ڈلہ وٕنۍ دِگرن پھۅلہ وٕنہِ صبحچ ترٛاے رٔٹٕم

زلہ وٕنۍ اکھ مسول برٮمرٲوِتھ ترٛٲوٕم زۅل

خٲبۍ أندرۍ دُبراین ٲسٕم پوشہِ پُھلے

لوچہِ کٔمِس تاں نالس چھٲوِتھ ترٛٲوٕم زۅل

ونہِ ییٚلہِ کوڈہس کنہِ کنہِ کوٚرہس ہم سفرو

کنہِ سومبرِتھِ اٮہرام بنٲوِتھ ترٛٲوٕم زۅل

فنکارس أکۍ کٲکۍ تگن گوٚر کوٚرنم ناو

بٮاکھ غزل تس للہ وُن تھٲوِتھ ترٛٲوٕم زۅل

***
یہ وَچھ تہ کوٗرن کیوٚم

یتُے چھُہ داش نداش

کلس چھےٚ مشکل رٲچھۍ

دِلس رٕڈیوو یاداش

کھسُن چھُہ تاپہ وُڈٕر

نکھس چھےٚ پننی لاش

پھٮرن چھُہ صبرُک اوژھ

رٕنیوو تہ سِر گو فاش

یوٚتاں سُہ وایی تونتھ

پکھن تہ کٔڈۍزِہا واش

شُرِس مہ پھر ٹینکن

مہ ون مخولہ چھےٚ آش

ژٕ میانہِ لوِ اختاب

مےٚ توتہِ چون تلاش

نظر تہ صبحٕچ درٕے

رُمس رُمس پھول گاش

دپاں سُہ اوس عٲزِم

بُڈا وُچھُم خۅش باش

***
وُزملہ ژھوٚٹ وژھِہ وٲنِجہ نار

پیژِ بنہِ کوٚرنم بخ بیدار

جنتٕچہِ کۅلہِ ووٚل گرٛاین منز

چھۅرٕ چھۅرٕ کرٕوُن گاڑٕ انبار

لونچہِ ہوا ڈوٚل اللہ ہو

یرٕوٕنہِ ناوِ تہِ دیُتنم تار

تاپہ وُڈٕر پھٔج دٔزمٕژ تال

متہِ شرٛاونہ ؤتھۍ رُدٕ فموار

لوٕ پھیٚرِ دوٚد پمپوشُک ژونگ

نارٕ الاون پھیُر شیٚہجار

شُرۍ باشو کوٚر چِرۍ گیُش تیز

کٔنۍ شروپرٲوٕم نٔنۍ ملہار

زٕژِ اکہِ دِژنم گاشہِ براتھ

دِگرن روٚٹ مندنیُک انہار

بہ تہ میون عٲزِم تکہ دِن دِن

دُنۍیا یندرازُن دربار

***
منہ سودرس ینہ گٕتھ وولے یم، تنہ ووتُم تلواس

نیٚندرِ ۂتِس چُھم نٮکہ نٮن ژاناں خابن ہند ڈبہ ڈاس

کۅم کرٕ بالس، تھٲپۍ ہواوس، زوٗنہِ زٕژن کرٕ ڈینگۍ

ہلہ بسملا، ہلہ بسملا، وچھ کتھ سفرس درٛاس

پِشنس گرٛیشمُک زر وٮتراواں برجس ٲسِم پوش

ڈلہ وٕنہ دِگرُک گلِ دُپہر ہیو ژمٹاں ژمٹاں آس

***

بحمداللہ طرفاتن کٔرِم سٲل
بٔرِم چشمن شہر صحرا سمندر
ؤں گو تاپٕلۍوتو ییٚلہ پاد لوساں
پٮ۪واں چُھس بونہِ تل ریٚشۍوارِ اندر

٭٭٭

خریدارس مۅلُک انمان رووُم
شہر سومُم تہٕ شاہ سلطان رووُم
بہٕ رودس عٲزمس ژھاین دِوان ونۍ

یوٚتاں دۅہ ڈوٚل تہٕ، ہے ارمان، رووُم

٭٭٭

مےٚ نش یکھنا، مےٚ نش یکھنا، ونان تس
کھنان روٗدُس منس اندر اہنکار
تہِ ما پیٚوسس پرن دپہس بہٕ آسے
بہٕ کوٚت نیرے، ژےٚ روٚس کُس چُھم خریدار

٭٭٭

بختس گیُندنس وقتکۍ پھیرن
شالہ ٹُنگن کرنووُن واہ
بوزو جب کر امہ دبہٕ نیرن
نیہِ گو د۔دون نیرِس داہ

٭٭٭

خابس منز کٔڈ وۅٹھ گردابن
سٔہلابس گٔیہِ عاشق کۅل
ہٕکہٕ آو واوُل بُکہٕ کوٚر آبن
تیُتھ زِ بٹھٮ۪ن پٮ۪و ہورُن مۅل

٭٭٭

أچھن تھوٚپ دِتھ دِژن نقشس کُنی رِکھ
دوٚپُن ییٚتہ یور گو بیوٚن بیوٚن بسُن جان
یہ گو مشرق: یہ گو اللہ اللہ
ہُہ گو مغرب: ہُہ گو شیطان شیطان

٭٭٭

ژھلہ گٔرۍ قلمن لیوکھ سرابس
یُس دِیہ انۍ تھوٚپ سُے لبہِ مانٛٹھ
لکہٕ متۍ ہٕکہ ژھنۍ وۅٹھ گردابس
کُس لگہ شاٹھس، کس تگہ ژھانٛٹھ

٭٭٭

أچھن تھوٚپ دِتھ دژٕن نقشس کنی رِکھ

دوٚپن ییٚتہ یور گو بیوٚن بیوٚن بسُن جان
یہ گو مشرق: یہ گو اللہ اللہ
ہُہ گو مغرب: ہُہ گو شیطان شیطان

٭٭٭

دپیٛوہس گژھ بتل یژھۍنے ژےٚ چھاونۍ

سُہ گو بڈۍبابہ نِس برٛاندس اویزان

دژوہس ٲنہٕ ستھ اسمان وچھنُک

بچارس ٹھوٚر أچھن اوسس پنن پان

٭٭٭

یمن عاشق چھہِ تھاواں پیالہ تٲبین
تمن جوین چھُہ تلپاتالہ آگُر
سُہ گو ییٚلہ تاپھ تاوی تۯیش تیزی
ژٕ یوٗتا چٮ۪کھ تہ تیوتا چٮ۪کھ تہ بییہ ہُر

٭٭٭
جوٲنی منز چھےٚ
دارِ بساں دارٮ۪ن منز
بُجرس منز چھہ
آنگن اکھ أکس پشان

٭٭٭

اگر راتس تارکھ ووَکھ
صبحس لونکھ آفتاب

٭٭٭

تس چھےٚ رٲژ ہنزٕ پٔرۍیہِ
روٗشتھ
تس چھےٚ نیٚندٕر
ٹٲٹھ

٭٭٭

درۍیاو چھہ یُپ ہٮ۪تھ یوان اورے

مگر ترٛیش ہٮ۪تھ نہٕ

ترٛیشہ ۂتس چھےٚ کٲر پٮ۪وان نوٚمراونۍ

٭٭٭

یوٕ اوسُس پگہس کُن کھسان
از چُھس یوَس کُن وسان
خبر یہ پھیرٕ کر گوم؟

٭٭٭

واو تگی نا مۅچھہ و۪پراوُن!

نار تگی نا کۅچھہ للہ ناون!

تیٚلہ کس آیکھ برٛٮ۪م دِنہ چٲرۍ

سٲنۍمشید چھےٚ مٲرۍمٔنز

واے !

اگر اتھ امام تہِ آسہِ ہے

***

أسۍ چھہ صفا پسند
گژھۍ نا آسنۍ
صفٲیی چھےٚ ژمہ ہنز  شوٗب

***

مےٚ دِژ ڈبہِ کنۍنظر
سۅٲس داں پتجہِ رٲچھ
تنہٕ گے ستہٕ ترہ ؤری
سۅ چھےٚ وُنہِ تٔتۍنٕے

***

وٮ۪تھ

ییٚلہ بٲلۍوسان ٲس یاون مٔژ

تنہِ اوسُس واوجہِ واو کراں گوٚن یارِ شہُل

وتہِ ٲس کنٮ۪ن، کھرٛاشن، کھمبرٮ۪ن

لوٚت چھہۍدِتھ شفہُک اتھہٕ ڈالاں

وُٹھ پھیشان وُچھِہ ہے کٲنسہِ تہٕ وُٹھ مٔدراوِہے تس

بٹھہِ بٹھہِ ٲس لوٗبان نیٲوۍپُھلے

لنجہ لنجہ پٮ۪ٹھ ٲسۍکوٚستورۍگٮ۪واں

پونپوٗرۍوُڈاں

ہی ٲس وِساں میٛۍٹوٹھیمٕژ چھےٚ یہ بختہ شِہج

مستانہٕ قداور رٲیل اوس

ٲمۍسٕے پاردۍگترینہِ سٍتٮ۪ن

پنہ نٮ۪ن ژھاین ور وُٹھۍنہِ دِواں

مٔژ ٲس چھِوَر مس چٮ۪تھ آساں

موٚت شوخ بےٚ سۅکھ یاوُن چھاواں

سہُ تہِ اوس دۅہا

وٮ۪تھ وٲژ یہ وۅنۍسٔتریرس منز

امِہ پرٛوو سنٮ۪ر، امِہ پرٛوو کھجر

اتھ روٗد نہٕ وۅنۍمدٕ مۅت لوچر

اتھ رٲو سۅ تیٛہہ تہٕ سۅ پارٕدۍخۅے

نہٕ چھُہ پان کھیَن کھرٛاشن چھاوُن

نہ چھُہ رٲیِل ژھاین ور دیاوُن

وُٹھ پھیشان ہَے ییِہ ترٛیشہ ہوٚتا

وُٹھ أدراوٮ۪س

ژرِ آلہِ منزے پیٛیہِ گاسہٕ کرٛٹا

للہٕ واں پکناوٮ۪س شانن پٮ۪ٹھ

٭٭٭

تھر بُتھ !

نوَم نوٚوُے سوٗٹھ لٲگتھ

پھِرۍپھِرۍاوس

پانس بُتھ وُچھان

یوسفنٕس ٲنہٕ خانس منز نہٕ

پلاسٹک سرجن سندِس

کوچس منز

وۅتلان تہٕ بۅڈان

وۅتلان تہٕ بۅڈان

اژا !

اژا !!

اژا !!!

٭٭٭

ألف

ألِفا !

سیٛدِ قدٕ قامتہٕ والیا !

ژٕے چُھکھ میٛانٮ۪ن چشمن گاش

ب پ ت ث، لرِ پیمٕتۍ

کیٛنہہ پھیرٮ۪ن پٮ۪ٹھ، کینہ پھیرٮ۪ن تل

جیمس چیمس عٲنس غٲنس کٲوۍگمٕتۍ

قافس نوٗنس یڈ درامٕژ

دالس ذالس کوٚب ژامُت

کیفس گافس لامس میٖمس

کٲنسہِ نہٕ بختس چون سیٛزر

یا چُھکھ ژٕ، زِ یتھ حرفہٕ صفس پٮ۪ٹھ

کُن چُھکھ سٮ۪دِقدٕ قامتہٕ وول

یا چُھس بہٕ، زِ یتھ اچھرٕ دُپھس منز

ژٲرِتھ روٚ ٹمکھ ژٕے تہٕ

بیٚیِس مازیوم نہٕ دل

ژےٚ تہِ نہٕ دوٚیُم

تہٕ مےٚ ہیو تہِ نہٕ بیاکھ

ارمانا برٛادٮ۪وم زِ چٲنس

کُنِرس انہٕ ہا لولٕچ ڈٲلۍ

چإنِس نوٗرانس لٮ۪کھٕ ہا اکھ حمدٕ سپار

قلم تُجوم تہٕ کتھہِ گو روٚٹ

ب پ ت یہِ روس

کتھہٕ کنۍہیٛکہٕ دِتھ لفظن واٹھ؟

چٲنِس ژٔھرۍسٕے الۍفہٕ قدس

لرِلرِ پھِرواں لٔب قلمن زٮ۪و

ب پ ت کیا

نازلہٕ الۍفا !

یہ تہِ ما چُھکھ ژٕے ترٛٲوِتھ ڈاپھ

عٲنس غٲنس منز ما چُھکھ ژٕے

اوٚکہٕ ڈوٚنگ روزتھ

قافس نوٗنس منز ما چُھکھ ژٕے کۅچھ وہرٲوِتھ

کیفس گافس منز ما چُھکھ ژٕے

پانے پانس ڈکھۍتھاواں

حرفس حرفس منز ما چُھکھ ژٕے وِہۍبدلاواں

الۍفس منز تہِ چھُہ لاما فےیا

لامس تہِ چُھ الۍفا منز باگ

کُنہِ نندٕ بانیا !

چانٮ۪ن انوارن لیٛکھہٕ ہا اکھ حمدٕ سپار

کتھ حرفس ہیٛکہٕ بٮ۪ن وٮ۪ترٲوِتھ؟

کمہِ نشہِ ہیٛکہٕ دامانہٕ بچٲوتھ؟

٭٭٭

تۯُک
أزیُک اخبارترٛکنہِ آو تہٕ خبر وُچھتھ گو س دُژیوٚت

ترُکہٕ نے تہٕ نشس کیا کرٕ !

ترُکَےتہٕ ناو کیٛتھہٕ نیرٮ۪م !

خبر ٲس :

تیار اخبارچھُہ راتو رات ترٛکان

ییٛمہِ کنۍیہ واریہن پرن والٮ۪ن تام واتاں چُھنہٕ

سٮ۪ٹھا ترٛک چھُہ تہٕ کانہہ ژھل چُھسنہٕ پوران 

عامن تہ خاصن ہنزِ زٮ۪وِ پٮ۪ٹھ آس

پنُن ناو نژان بوزنہ

پرٛاژٕ آیس وہراونہ

گونژھ گٔیَس دندن تل ...

اخبار درٛاو

٭٭٭

زاڈیُک پوش

زاڈِکہِ پوشہ !

تٕرنِس آبہ ڈلس منز وُٹھ کملٲوِتھ روز

پیچانس کُن وُچھۍوُچھۍیِنہٕ گُمہٕ سٔرۍگژھہ ہم

پیچانس چھُہ رزن تھپہٕ دی دی ٹینٹھل ٹاور وُچھنُک شوق

پیچانس چھُہ أچھی أچھ پان

زاڈِکہِ پوشہ !

چانہِ وجودٕچہِ خۅشبۅیہِ ہند مۅل

زانہِ فقط صبحک شوٚد واو

کچھِہ کۅتھہِ منز یاوُن رژھرووُتھ

دکہٕ ملرن ہندۍہلہٕ وٮ۪ترٲوِتھ

پاگل واوُک لتہٕ کرم ژولُتھ

ادٕ ہے زانہہ کُنہِ ہِلہ وتھرٕچ شیٛہلتھ ؤنۍرٲوٕتھ

تمہِ کیٛے آمہِ پنٕچ کل تھٲوِتھ دگ لوٚژرٲوٕتھ

زاڈِکہِ پوشہ کارِ وۅگُن چُھکھ

راونہٕ چانے أکۍسٕے ہِلہٕ وتھرس تہِ وچھس سنہِ تاپہ تیوٚنگُل

چانہِ ورٲیے أکۍسٕے گرٛایہِ تہِ باسہِ پنُن ژھوٚر سینہِ تُرُن

تیلہِ دپھ فٲنی کاے کھتٲوٕتھ، مُل مُژ پرٛووُتھ

ڈلہٕ کس آبِ حیاتس چونُے کارِ تھزر شیٛہلاوِ جگر

ٹینٹھل ٹاور کرۍتن کۅچھہِ کۅچھہِ

پنہٕ نے متہِ پیچانچہِ أچھ

٭٭٭

 

نہ چھُہ تاپھ پٮ۪وان

نہ چھُہ واو ڈلان

کتھ کیٖرس منز کوٚستوٗرِس کوٚرہم اول عطا

کِژھہٕ کۅہ ہِشہ قٲتل لبہٕ أندۍأندۍ

تاپس چھےٚ نِوان زٕژٕ ہیر کڈِتھ

واوس چھےٚ ژھنان پر پُژنٲوِتھ

ییٛلہِ دوٗرِ چھُہ کانہہ افتابہٕ وُہاں

چہہٕ أندرٕ چھُہ موٚٹ انہِ گوٚٹ ۂندران

یِمہٕ زٲج چھےٚ ژاپان صبحُک پے

کھسہِ گوشن نغمہٕ تہٕ وۅگہٕ ژاپٮ۪س

پھسہِ بولۍوچھس منز، وٹھ سپدٮ۪س

٭٭٭

پوٚت دِگر

مانو برٛٮ۪مہٕ ریٚنہِ زوٗنہِ ہندس شِہلس انہارس سورِ نہٕ جود

سٔدرٕے زنہٕ آو کُنہِ دۅہہٕ وٲنسہ

سورے یس مٔژ یاون تیٛہہ

تیٛلہِ کتھ گژھہِ تتھ گاہ ونہِ کڈۍتھٕے ؤتھۍؤتھۍپھوٚر

سٔدرس سپدن گرٛایہِ بےٚ سۅر

کاڈ کڈتھ وُلمنہِ کھسہٕ نٕچ روزٮ۪س نہٕ سکتھ

زگتس ہیٛیہ سوٚت سوو سکوٗنُک سوٗر پھۅلُن

سٔدرُک سٔدرٕے شِٹھہِ تُلہٕ کتریُک ٲنہٕ پوٚٹا ہیو

زوٗن مدے گنڈِ ٲنہٕ پٔٹِس

پرٛون ٲمیُک وُپھٕ وُن پھوٚرکورٮ۪س

وچھہِ کانٮ۪ن منز یادُک وٹھ

ٲنہٕ پٔٹس پٮ۪ٹھ آسہِ فقط

اکھ تھلہِ تھلہِ وُچھنُک باس

دپکھ یہ چھُہ نظرِ نٮ۪سنگاہ لوگمُت ٹھل

دے رٔچھۍنم تس

سۅے یُتھ عالم ڈیشہ

تٔمِس پیٛیہ سٲنۍٲدِچ سمکھن وِز یاد

٭٭٭

ونہٕ واندُر

تس اوس بالس کھسان کھسان

ٹھینچہِ وسان عٲرق

پان اوسُس لۅتان

آگر پٔچھنہِ آو عار

تہٕ کھولُن پنہٕ نٮ۪ن پٲزٕ پکھن پٮ۪ٹھ

تنہٕ ووت تس ونہٕ واندرس

عٲرق بند

نٲرن دگ

٭٭٭

شہِج بونۍ

ترٛیشہ ۂتِس چُھم وِزِ وِزِ آیُت زمزم ناگ

ژلہٕ وٕنہِ ہردٕنہِ تاپُک دۅہ

موٚت سروٕ شِہُل

یارِ، تہٕ ماگس وارِ اندر نژِ سونتہٕ ہوا

ٹوٹھہِ، تہٕ لوٗسۍمٕتِس کرِ ہنہِ ہنہِ مۅنہِ وُدۍتن

کتھِہ کتھہِ رتھہِ کھاراں کٲژا وتہٕ کھاول رٲژ

وُہہٕ وٕنہِ وچھہٕ کٮ۪ن سرپھن ساواں مٲنتھٕر دِتھ

لوکٮ۪ن لاوٮ۪ن پمپوش کِژ  رحمٔژ رود

دپہ سَے موج، کٔلِس یِیہِ زٮ۪و تہٕ مٔندس یِیہِ کوٚٹھ

دپہ سَے اوش، متٮ۪ن خابن دِیہ یاوُن زوٗ

رحمٔژ روٗدُک شکوٕ کراں چھم زٮ۪و روشاں، پوٚز

سٔرۍپٮ۪ٹھۍگٔژھۍتن زمزم تتھ تہِ ونو سٔہلاب

مشکہٕ ہوَس، گُل کترٲوِتھ پٲراواں ہنگ

بولہِ عشق ، ٹِھپۍکانٮ۪ن منز پُھٹراواں جل

پونپٕرۍیُس رنزٕنوو، تٔمی ہیوٚت لونچہِ گنڈُن

ماجہِ اغٲفل بانگہِ لٔٹس دِژنم ہٕکہٕ تھپھ

متۍیارن ژُھن ٹِکہٕ واوٕجہِ پُھٹرٲوِتھ دن

شُرۍشوقس ییٛلہ ییٛلہ گانگل کٔر آدن بٲجۍ

اتھہٕ ویٛسرِتھ پٮ۪و زمزمۍآبُک پیٛالہٕ پتھر

ویٛہہٕ کھاول ہِش ووٗنگاں وٲنجہِ کھاول راتھ

موج پننٕۍوۅرٕ موج بٔنتِھ ونہٕ وٲسۍکراں

اوش دپاں تُل ٹونگ سۅ مٔژ شیرین مۅیے

٭٭٭

ملاقات

از ازلہٕ وتھٮ۪ن دوٚن دارِ وۅبٮ۪ن

سمکھٮ۪و کُن ژلہٕ وُن تاپہ ٹیوکا

کُٹھہِ اندریُم گوٚٹ گو وارے موٚٹ

بییہ اوٚن گو شاہ یوسوفُن چاہ

٭٭٭

مندِنٮ۪ن ہارنۍ

کرٛاے تتیایہِ

ژھاے ژھۅٹیایہِ

پانہٕ پرَن پیٛیہ

دیوارن

کس منگۍزِ شِہُل؟

‎‎ ٭٭٭

کوٚنگی

نبہٕ چن تارن ؤنۍدِنہٕ واجِنہِ أچھۍیُس ڈیوٹھ

جلوٕ دِواں افتابس، زوٗنہِ، ستارن منز

درویشن یُس دِلہٕ کِس ظُلماتس منز سوٚر

گۅنماتن یُس پرٛکرٔژ ہنزِ شوخی منز وُچھ

گاش ییمیُک شولاں شبنٔمۍدُردانن منز

پھٔلۍلس ییمہِ کِس پوشن ہند وردن چھُہ ظہور

کتھہٕ رٹہِ ییمہِ کہِ چھُہ صحراون لوٚبمُت آکار

اتھہٕ رٹہِ ییمہِ کہِ چھُہ وۅلسنہٕ آمُت پوشہِ چمن

چھُہ تہٕ پرتو تمہِ حُسنُک پرٛتھ مثقالس پٮ۪ٹھ

کۅنگی چانٮ۪ن چشمن منز چھُہ کمالس پٮ۪ٹھ

اردو نظمہِ ہند ترجمہ۔ اصل: سلیمیٰ (اقبالؒ﴾

٭٭٭

سرٛو


کُلۍککرِ ہنا اکھ
ٹھکہٕ ٹھکہٕ ٹھس
کُلۍددرِ کوٚرُن
پُژپارٕ وچھس
بُچھہٕ وُن تچھہِ تچھہِ کوسُن تس
أچھۍکھانکھر
وُچھہِ وٕنۍ
سرٛو کرۍنس
یِم کُس پُروٮ۪س؟

٭٭٭

ٲلیوٗ پِلیوٗ

دوٚپن
بُنۍلہ وِزِ گژھہ
بانگ پرنۍ
متھ گیوم
دپس کیازِ
تمۍ ژٮ۪تُر مٮ۪ون
سوال
دوٚپن
ٲلیوٗ پِلیوٗ
***


 

منہٕ مشتاقن
وہراویو
دوٚل
پنہٕ پونپر
سنۍپوشو منزۍ
ژوٚل
***