***

بٲلـ̡ عاشق لولہ نارن زٲلـ̡  کٲتیا کٲتیا
مایہِ چانے غم امارن ژٲلـ̡ کٲتیا کٲتیا
وٲنس کیا لٔب اضطرابٕچہِ رٲژ زیٹھان زیٹھان
ژٲنگـ̡ عشقن دردِ جگرٕکـ̡  زٲلـ̡  کٲتیا کٲتیا
کٍتـ̡  بُت خانس فدا کٲتیا چھِ کعبس قۅربان
أمـ̡ سرابن اصلہ چے وتہِ ڈٲلـ̡  کٲتیا کٲتیا
وۆتھ ہوا ترِ ناوٕ کینژن تیز گٔے سۆدرس تٔرِتھ
وہـ̡  تھرى۪و پى۪ٹھٕ پێـ̡  ژرى۪ن ہندـ̡  ٲلـ̡  کٲتیا کٲتیا
کێنہہ چھِ تِتھـ̡ سرمست یِم بوزن مگر بوزن نہ زانہہ
تۯیشہِ تھوـ̡  تۯیشہ ہتـ̡  کلہ وٲلـ̡  کٲتیا کٲتیا
از چھِ وِرکێمـ̡  پوش کٔژ تام تِمن تہِ چھےٚ زردی
گُل پھۅلن یتھ وارِ بوٝزُم کٲلـ̡  کٲتیا کٲتیا
وۅنـ̡  تھٔکِتھ آس ژےٚ کُن کلہ والہ یٲری یٲری
خرقہٕ پۯٲوِم یونہِ تۯاوِم نٲلـ̡  کٲتیا کٲتیا
کوٝت بیقٕل چُھکھ پکان چُھکھ چشمہ مژرِتھ عٲزم
چھۅکھ زران چُھکھ غم اناں چُھکھ سٲلـ̡  کٲتیا کٲتیا
٭٭٭

چھےٚ زن یہ راتھ پری لوٝچ لوٝبہ ونـ̡  نازل
یہ ڈیشتھٕے چھےٚ وُہان شولوٕنـ̡  دِلٕچ منکل
بناں چُھ شامہ پى۪ٹھے میون نال تارکھ نب
سى۪ٹھا چھِ توتہِ رٹاں ٹٲرـ̡  اۆش پھێرى۪ن تل تل
بےٚ سۅکھ نظر چھےٚ ہێوان لولہ سرحدن پَے ہیۆن
دِلُک ہرن چُھ کڈان نالہ کوکلٕچ ہانکل
خطا  چھُہ میون مےٚ سۆر نار ، نوٝر منسووم
مگر خدایہ ژٕ تے دۯاکھ آنتھ رۆس ہانژل
غلط کۆرُتھ ژےٚ تھوِتھ زورٕ تٲرـ̡  میخانس
مےٚ کیا چُھ بہٕ چُھس طفلہ دِل بُلیوم رٲوٕم کل
ژٕ کٔرـ̡ زِ میانہِ جنوٝنُک بدل سزا تجویز
نہ کھٔژ مےٚ ٹارِ قیامت نہ دوزخکـ̡  موکل
دۅہَے چُھ پوشہ پگاہ از بٔنِتھ بنان ارکھۆل
خبر زمانہٕ تہِ ما آسہ بٲزـ̡  گرٕ سند ژھل
أمی امارٕ گٔرٕم ہیر آسمان کھسہ نٕچ
أمی امارٕ گٔرٕم خوٝن ہارنٕچ کرتل
ژےٚ کم خزانہ نِیی یِم وى۪داکھ دِتھ عٲزِم
گێوِن بچارٕ گێوِن بٔلـ̡  مہ کر أمِس گانگل
٭٭٭

ازٲنـ̡  پٲٹھـ̡ دِژٕتھ گۯاے زلفِ پیچانس
مےٚ زون معنہ امیُک تَے، مےٚ لوگ دل داوس
حُسُن مےٚ چون بیاں کۆر، بےٚ خۅد چُھ حُسنِ بیان
کتھن چھِ میٖٹھـ̡  دِوان وُٹھ، دِلس چُھ لۆگمُت رس
ہَیو دِلا ژٕ ٹھٔہر اکھ دما مہ کر دُب دُب
خبر سُہ ما چُھ پکاں لۆت گژھاں چُھ ہانکٕلہِ ٹھس
سۅ لٲل ٲس حسیٖن، پۆز یہ داستاں مرِ ہے
اگر نہٕ یارٕ دِہَکھ تن ژٕ نجدٕکِس بالس
بہٕ اکھ لطیٖف کتھا باوہَے گۅبی بوزٕنـ̡
مٔتی چھِ مایہِ بٔرتـ̡  نالہ مٔتـ̡ کران دارس
سفر ظہوٝر یمیُک چُھے سُہ شوق یِنہ راوی
نہ روزِ ماگہ کٔٹھِش أتـ̡  نہ روزِ تێہہ ہارس
چُھ غمزدن تہٕ متى۪ن ہند وظیٖفہ لولہ غزل
یہ پر بێتاب دِلو یُتھ نہ کھۅر ڈلی صبرس
٭٭٭

کتھ زلفِ سیاہس دِتـ̡  بۆمبوٝرـ̡ گٹَو آلو
کتھ نوٝرِ بُتھِس صبحَے پۯاراں چُھ پۯگاشُک رَو
لَے سٲنـ̡  دِوان لولٕچ دُبراے زُوَلمالن
وۅشلاں چھِ گۅلاب اکثر أسـ̡  یام نظر تۯاوو
تِمہ چشمہ وُچھِتھ صبحَے بر جستہ یمبرزل پھۆجـ̡
یِمہ چشمہٕ وُچھِتھ شامن تارکھ چھِ ژھٹاں پرتو
کیا لۆب نہٕ دِلن، کیا لۆب، فرصتھ چھےٚ حسابٕچ کس
پرتیٖتھ رچھَو لولس، وۅتھ خونِ جگر زالو
دل ژالہ ستم کوتاہ، وى۪تراوِ نظر کوتاہ
دوٝرَو تہ چُھ دل راواں، سمکھو تہٕ دِلس راوو
واوس چُھ ہُرى۪ر سپدان، شمعس تہِ چھےٚ رێہہ تیزان
یتھ نوٝرٕ زمانس منز ژھاین چھےٚ زى۪وان پرتَو
کمہِ آیہِ دِلس راتس شب خوٝن کرن ارمان
دۅہ لوسہٕ وُنُے عٲزم شێچھـ̡  بٲو سنگر مالَو
                                (1960)
٭٭٭

نوبہارن مسوَلن دیُت یارٕ سُند انہار تٲے
از چُھ میانى۪ن ہاوسن ہند لالہ نارٕے نار تٲے
بے قرٲری ہند شبا گزروو لولن، پھۆل سحر
لۆگ دِلس ظلماتٕکے دٔرـ̡ یاوٕ ٲخٕر تار تٲے
دل چُھ دم ہارُن ہێوان یامتھ چھۅکن راواں حساب
کل گنان چھم یارٕ سٕنز زخمن بناں بُلغار تٲے
پۆت شبن أکـ̡  عاشقن تُل چانہِ نوٝرانُک غزل
کۆر ستارَو زوٝ فدا، کھۆت سنگرن وۅزجار تٲے
ژٲر دِتھ لفظن ژٕ، ہێے عٲزم خیالن دیٖزِ پھیُر
کانہہ کتھا ینہٕ سپدِ تس نوزک مزاجس بار تٲے
                        ٭٭٭

پھۅلاں چُھ عشق یتھُے دل سَراں غمُک آزار
یہ پیچہٕ تاب امارُک چُھ یارٕ سند اقرار
تٔمِس غروٝر اکی جلوٕ رٲیلا پووُم
بہ شاد مرگ زِ شاید نصیبہٕ گو بیدار
دِلو غمس تہٕ جنوٝنس حساب ما سپدی
حسیٖں تہٕ لوٝچ قیامت چھےٚ یارٕ سُند انہار
شہُک سروٝد، أچھن ہند شراب، زلفُک خم
یہ زیرُبم، یہ خمارُک اثر، یہ مشکنـ̡ دار
أتی یہ جود وُچھِتھ زێو کلاں چھےٚ گۅنماتس
أتی چُھ نغمہ تُلاں لولہ ہۆت دِلُک سیتار
بےٚ سۅکھ نظر تہٕ بےٚ تاب عشق رحمتکـ̡  مرسل
چھےٚ زوٝنہِ داغ گدٲی، دِلو پننـ̡  وتھ ژھار
اوَے چھےٚ سونتہٕ ہواوس تہٕ شبنمس دٕے میٲنـ̡
زِ نابکار بہٕ چُھس مانچھ تُلرنٕے ہند یار
کراں چھُ درد جگر سجدٕ چیستانن کُن
گۅباں چُھ یام بیانس حقیقتُک اظہار
                        ٭٭٭

ژَے ۂج نظرا تۯاوکھ، لولٕچ منکل تاوکھ
ٲولـ̡  وُٹھ کملاوکھ، روٝحس شێلتھ پاوکھ
ژَے اکھ ڈالا مارکھ، واوس دل تنبلاوکھ
یامتھ دم ہێکھ، وقتس گترى۪نہِ گتھ مٔشراوکھ
زندگی راوێم معنے ژٕے نَے دل مٔژراوکھ
کنگ ارمانُک ہانے ژٕے نَے وُہوُن تھاوکھ
نظرن رێہہ لٔج ژھاراں سۯێہہ کرنس سۆمب شبنم
لالو یُتھنو رویس عٲرقہٕ پھێرـ̡  وۅتھراوکھ
ژٲنگـ̡  ارمانٕکـ̡  زٲلِم دِلہ کى۪ن تنہا گوشن
زانہہ کٲلـ̡  اتھ شنیاہس منز ما کھۅر ٹھٔہراوکھ
                        ٭٭٭
 
کلوالہٕ چُھکھ سنیومُت نادانہٕ کتھ خیالس
پگہٕچ کرو پگاہ کتھ، از بر تہٕ پێالہ حالس
حُسنس چُھ میانہِ لولُک احساں اگر بہٕ پۯارس
مجلوٝن چُھس نہٕ بیقٕل دَو کھالہٕ نٔجدٕ بالس
لولس مژر چُھ پالُن ژێے کیا چُھ بوش کھالُن
اتھِ ییہِ نہٕ چون دامن پننِس تہٕ پوشہِ نالس
مێتہِ لٔب تہٕ سٍتـ̡  میانى۪و داغو تہِ لٔب جوٲنی
یٔژکٲلـ̡ کۆر مےٚ حٲصل، ونہٕ کیا بہٕ اتھ کمالس
                        ٭٭٭

یاوُن دۅہَے چُھ ژھاراں لولُک مۆدُر شرابا
ہاوس یِتھی چھِ بیقٕل مندنى۪ن وُچھاں چھِ خابا
ٹوٝرى۪ن چھےٚ اسنٕہ چی کل، فریاد بلبلن خۅے
حسنس تہِ اضطرابا، عشقس تہِ اضطرابا
شبنم چُھ منہِ پھلى۪ن ہند ہاواں بہار ٲخٕر
دامن چھۆلُم یۆتامتھ لولُک پھۆلُم گۅلابا
تھۆد پردٕ تس نِگارس یامتھ تُلم تہٕ ڈیوٝٹھُم
یٔژکالہ کى۪ن سوالن آمُت چُھ رُت جوابا
کمہِ آیہِ باشہِ کٔرـ̡ کٔرـ̡ آشن درى۪ر کۆرُن مے
مےٚ تہِ ہیۆت سرُن حبابا، مےٚ تہِ ہیۆت سرُن شبابا
مِجہ تیٖرٕ کى۪ن چھۅکن ہند احساں چُھ شٲعرس پى۪ٹھ
نتہٕ ون چُھ کتھ شمارس مضرابہٕ رۆس ربابا
اکھ جام وصلٕکُے چێتھ زیچھر مۆٹھس فراقُک
عٲزم تہِ وُچھ مےٚ بدلٕے یاون مۆتا، بێتابا
                        (اکتوبر 1956)
٭٭٭

امارس زندگی دِژ نوبہارن
چھہِ آمٕتـ̡  لولہ باغس پوش پھٔلـ̡  پھٔلـ̡
یرادو ہیۆت حیاتس آلٕوُن سر
مرادن کوکلن خۅشبوے مٔلـ̡  مٔلـ̡
مےٚ دِژ نٔو زندگی یتھ کایناتس
ژٕ چُھکھ پۯانى۪ن خیالن پھِرـ̡  دِواں بٔلـ̡
٭٭٭

لالہ رویس سال کرٕہا، لول سرٕہا لول
شوقہٕ تٔہندے پێالہ برٕہا، لول سرٕہا لول
رایہِ میانے کایناتن تۯٲو مُژرٲوِتھ کتاب
ورقہ ورقَے وارٕ پرٕہا، لول سرٕہا لول
کێنہہ پۅتلـ̡  وہمن طلسمن ٲسـ̡  گٔرـ̡ مٕتـ̡  چوٝرٕ گوکھ
تازٕ پۅتلا پانہٕ گرٕہا ، لول سرٕہا لول
تتھ ڈى۪کس یُس شولٕہ دِوٕنووُم کٔرِتھ گُمہٕ وانہِ سران
تارکن ہند مۅکھتہٕ جرٕہا، لول سرٕہا لول
موت کرٕہن عقلہِ ہند کانہہ زال وہرٲوِتھ شِکار
دى۪وٕ بہٕ سۆدرَس تارٕ ترٕہا، لول سرٕہا لول
میٲنـ̡  پٲٹھـ̡  یتھ زندگی سٔنـ̡ سٔنـ̡  گژھان دِل داغدار
زوٝ فدا تتھ زوٝنہِ کرا، لول سرٕہا لول
آسہِ ہے نَے معرکن منز پان تۯاوُن لابُدی
لولہ چانے روزٕ درٕہا، لول سرٕہا لول
آسہٕ ہن نَے روت موکل ژٲنگـ̡  رێہہ ڈیشتھ نٹان
لوٝدرن کمہِ رایہِ کھرٕہا، لول سرٕہا لول
بٲتھ گێوٕہا، بٲتھ دى۪وٕ یِم شولہ ناون زندگی
عٲزِمُن ہیوٝ دود زرٕہا، لول سرٕہا لول
٭٭٭

لولہ والى۪ن سوسٕناون کیا زمانٕکـ̡  حٲرـ̡ ثاتھ
لۆب گٹن اندر امارن ٹھونچہِ کھى۪تھ آبے حیاتھ
موتہٕ موکل چھا کراں ہۆٹ چیٖرنٕکـ̡  سامانہٕ کم
کۆر اسی اتھہٕ رۆٹ امارن، أسـ̡  کڈاں چھِس ساتھ ساتھ
سیٖنہ دٲرِتھ ہیۆچھ مےٚ ٲخر خوٝنِ جگرس دام دیُن
زندگی ہندـ̡  ٹٲٹھـ̡  غم مٔشراونچـ̡  زٲنِم نہٕ باتھ
میانہ، پێالُک مۅے چُھ سُے اۆش یُس مےٚ ٹارى۪ن ژھایہِ ہۆکھ
کانہہ یزیدا پہرٕ دِتھ روزى۪س، یہِ چھا آبے فرات
از تہِ پزِ ہے شبنمٕکـ̡  پٲٹھى۪ن ہرُن خونے جگر
از چھِ أچھـ̡  پھرـ̡  پھرـ̡  وُچھاں بترٲژ ہندی وٲراں جہاتھ
یارِ سٕندِ زُلفُک شہُل یا زندگـ̡  ہند سوزِ غم
عٲزِمس کِژ دۅشوٕنی منز بیقرارٲری ہنز براتھ
(2 اپریل 1956)
٭٭٭

جگر زخمی أشِس لٔج دار ٲخر
نظر چٲنی کٔرِتھ گٔیہِ کار ٲخر
حیاتُک پێالہ اوسُم خٲلـ̡  باسان
بنێوو دل الفتُک مۅے خار ٲخر
بہٕ ما ہێکہ ہا تھى۪تھ پرٕ ژھیۆن پنُن پان
ژێتس پووُم اوَے دلدار ٲخر
غمُک طوفاں زرُن تۆگ لولہ والى۪ن
کرُن حسنس تہِ پى۪و اقرار ٲخر
کراں پُژپارٕ زنجیٖرن تہٕ زالن
چھےٚ لولٕچ شولہ وٕنـ̡  تلوار ٲخر
شکس دِتھ موتہٕ کى۪ن حیلن بہانن
چھےٚ سپدان زندگی بیدار ٲخر
دما خاموش عٲزم اوس لیکن
خیالن گو کٔرِتھ اظہار ٲخر
(2 ستمبر 1956)
٭٭٭

جدٲیی منز اگر زانہہ چٲنـ̡  واتاں شێچھ خبر یارو
گلالس زن پى۪واں شبنا، پھۅلاں چھۅکہ لد جگر یارو
مےٚ سورى۪و جوش لولس، گاش ارمانن ہندى۪ن ژانگى۪ن
ژٕ بتھہ پى۪ٹھہٕ زلف ڈٲلِتھ اکھ نظر ٹاکارٕ کر یارو
تھٔکِتھ ما آسہ، پیومُت رٲژ ہنزن زلفہٕ ژھاین تل
صبح بیدار گژھِ پنہ نى۪ن وُٹھن کمجار کر یارو
مےٚ باسى۪و زنتہٕ ژٕے چھکھ خشم ہاراں دۯہ ڈێکس کھٲلِتھ
وُچھِم یێلہ زوٝنہٕ گاشس سۆدرٕکے آبکـ̡  ملر یارو
یہِ محشر ڈیشـ̡ تھٕے دپہِ یا الاہی خاک کۅنہٕ اوسُس
ہراں وُچھ لولہ کافر چٲنـ̡  گُمہ یامتھ پتھر یارو
سُہ گو موٝسی، وُچھُن اکھ جلوٕ گو بے ہوش طوٝرس پى۪ٹھ
یہ گو عٲزمِ ژٕ تُل تھۆدپردٕ رویِکـ̡  سر بسر یارو
(28 اگست 1957)
٭٭٭

وُنی مۆٹھ، وُنـ̡  ژى۪تس پى۪و یار یارس
غمَو کٲژا قیامت کٔر امارس
ستم، داگِ جِگر، اۆش، غم تہٕ وہـ̡  واے
مےٚ کٲتیا ناو تھٲوِم انتظارس
چھےٚ موتس بٲزـ̡  تاراں زندگٲنی
پھۅلاں بر جستہٕ سوسن اند مزارس
ژٕ کر ہى۪متھ، پنُن مژھٕ زور ازماو
وُچھِتھ کر شوٝب آمٕژ زارٕپارس
نبٕکـ̡  تارکھ شبس میٲنِس لگن کتھ
مےٚ گۆر محراب پنہ نِس ژٲنگـ̡  تارس
ہماں چھا گۆل زٕ گٔلـ̡  چى۪تھ تۯیش ساقٕے
غلط معنے مہ کڈ میٲنِس خُمارس
یێمِس کیُت طوطہ زن بولاں چُھ عٲزِم
مبارک صد مبارک تس نِگارس
(جولاٸی 1956)
٭٭٭

جلن تنبہٕ لاوے گُلن بوش کھارے
یہِ مۆت چون سازس اگر تارٕ چارے
خبر کٔتـ̡  صٲٸب پنٕنـ̡  عٲش تۯٲوِتھ
ترَن درشُنا کرنہِ یتھ پوشہِ وارے
دما أچھـ̡  وچى۪م تَے وُہِتھ آم نارا
ہنا چشمہٕ مُژرى۪م تہٕ دِل گوم تارے
یہِ آسى۪م مےٚ شوقُک سزا تشنہٕ روٝدُس
دپاں از چُھ ساقےٕ پھِراں نٹہِ تہٕ نارے
مےٚ سازا حیاتس کۆرُم، باز زیونُم
مےٚ بوگُر محبت، مےٚ کیا موت مارے
گۆڈُم ہۆل یتھُے وۆن مےٚ أکـ̡  پۅختہٕ کارن
سُہ رتھ کونہٕ ہارے ہلم یُس نہٕ دارے
ثوابو دۅہَے تھٔلـ̡  شِہلـ̡  کُلـ̡  حیاتٕکـ̡
مہ پھس اتہ دۅلابس، مہ وس اتھ شِکارے
وُچھے عٲزمن چانہِ انہارٕ کٲتیا
ژٕ ڈیشِتھ مگر کانہہ تٔمِس کھۆت نہٕ ٹارے
(30 جوٝن 1956)
٭٭٭

یۅس اناں چھےٚ انگ زخمن تہٕ شفا دِواں بى۪مارن
مےٚ وُچھاں زٕ چشمہٕ لوسم سۅ نظر مےٚ کٔر نہٕ یارن
مہ وَن اتھ ژٕ چاکھ نالُک، یہِ اسُن چُھ پوشہِ ٹوٝریُک
مےٚ خرابہ کار زٲنِتھ یہِ مخولہٕ کۆر بہارن
چُھ سُلی گلٲلـ̡  رۆٹمُت یہِ تٔمس نصیبہٕ پھۅلہِ ہے
یہِ بہار کیا سنا ہى۪تھ چُھ پکان داغدارن
چھِ نبٕکـ̡  ستارٕ کانچھاں زِ ڈلٕکـ̡  ملر ہُرٕنـ̡  گٔژھنـ̡
یہِ مُدَے گنڈٕنـ̡  بێتابن چھےٚ پسند بے قرارن
مہ ون ؤتھِن خیال وصلُک بہٕ فدا کرن فراقس
سُہ مژر چھُنم بخُشمُت بےٚ حساب انتظارن
نہ مژر نہ گاٹہٕ جٲرـ̡  نہ کفر نہٕ دیندٲری
یہِ عجیب زندگی دِژ مےٚ پننـ̡  غمٕکـ̡  وُتارن
یہِ غزل بہٕ گوس لیٖکھتِھ مگر اکھ دعا چُھ باقٕے
مہ سٔنِن کٔنہٕے خدایا مہ سٔنِن یِمن اشارن
(28 جنوری 1957)
٭٭٭

یِنہٕ سٔہ چشمن سۯێہہ کرکھ سٔہلاب انہم یاونس
یِنہٕ سٔہ وۅش تۯاوکھ لگى۪م محبت طفانس تاونس
یِنہٕ سٔہ زانہہ میٲنى۪ن غمن ہێکھ گۯند کرٕنـ̡  تھاوُن حساب
یِنہٕ سٔہ زانہہ تھکھ سپدِ چٲنِس لالہٕ وُٹھ کملاونس
میانہِ سیٖنٕکـ̡  زخم گٔنزرٲوِتھ یِتھَے ہِش کیازِ چھى۪کھ
یِم بلن پۯاراں چھِ چٲنِس اکھ نظر سیۆد تۯاونس
میٲنـ̡  پرٕ ژھێنـ̡  لولہ ہاوس آرٕکٔتـ̡  ارمان میٲنـ̡
پٲرـ̡  چٲنِس ببرِ تن مسول بدن پٲراونس
(1956)
٭٭٭

روگہِ روگہِ روشہِ روشہِ واو ژاو باغس پوشہٕ مٔتـ̡ وُچھنے دۯاے
نازلـ̡  پھۆلـ̡ مٕتـ̡  گلِ افتابن گردنہِ رٔٹ ۂج تۯاے
بلبل نالاں، لولہ دود ژالاں، پوشن ولنَے آے
رسہٕ رسہٕ أنزرٲوـ̡  وصلٕکـ̡ شوقن حسنٕکہ دوٝررٕکـ̡  نێاے
یارٕ بلہ کارتکہٕ زوٝنہِ وٕچھ وێتھہِ ہندِ سیٖنہٕ منزٕ وۅتلاں گۯاے
ذرٕ ذرٕ دردٕکـ̡  ارماں گٔنزرن داغ تتھ سیٖنس ژاے
آرٕ وۆتھ مارٕ متہ لاراں لاراں پانہٕ نشہِ بے پرواے
ہولہٕ رۆس لو ہۆت سیٖنہٕ دورنس وى۪تھہِ کۅچھِ منز کٔرنس جاے
پۯوٕ پێیہِ، پھۅلہ وٕنـ̡  صبحن زلہ وٕنـ̡  تاپن زٲج گٹہٕ ژھاے
نتہٕ امہِ گٹہٕ کارٕ پھۯٹہٕ دمہٕ کس اوس روٝدمُت مۅکلن پاے
ینہٕ عٲزمن ہیۆت سنطوٝر وایُن خۅشہِ وٕنـ̡  ساز وۅپدیاے
تنہٕ لٔج بستی منہٕ کى۪ن جنگلن، دٔدـ̡ مٕتـ̡  دِل شێہلیاے

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

زندگی

دۅہَے دِتـ̡  زندگی ہندِ حسدٕ گتھ یمرٲزـ̡  پَے در پَے
کمن بُترٲژ ہندى۪ن تارکن میٖزانہ ڈٲلِتھ گو
یہِ کٍتى۪ن آفتابن مندِنى۪ن گو شامہٕ رنگ پھِروِتھ
یہِ کژٍن کاژٕ زوٝنن شێہلہ گاشُک بوش وٲلِتھ گو

گۅتن گاہے گژھان دل، کھوٝژمُت شُر ہیوٝ دِوان آلَو
چھےٚ موتٕچ گٕتھ حیاتٕچہِ ناوِ پۯاراں ٲس وہرٲوِتھ
أتی راوٕنـ̡  ہێواں لولٕچ نظر ژھاین گٹن اندر
دپان انسان ژھنٕنـ̡  گٔژھـ̡  ہاوسن ہندـ̡  پوش پُژنٲوِتھ

یِمن فکرن اندر راواں چھےٚ کٲژا رٲژ انسانس
یِمن رٲژن نہٕ ہلمس تۯاوِہے زانہہ تھپھ سُہ خابس منز
چھےٚ موتٕچ پژھ حیاتس، پۆز حیاتُک مۅے چُھ بٲزیٖگر
چھےٚ شاید سٲنـ̡ مێـژ کٔمـ̡  تام ٲڈٕرمـٕژ شرابس منز

یہِ موتُک اہرمن یامتھ کھمان ٲسس چُھ پۆس کھاران
چُھ لولٕکـ̡ گاٹہ جارٕکـ̡ والہ بٔرـ̡  شیران بنی آدم
پۆتُس پتھ لٲدـ̡  کھالاں والہ واشى۪ن ہندـ̡  زمینس پى۪ٹھ
ژھلن پى۪ٹھ ژھل کران یمراز گۆژھ میے کُن کرُن سرخم

حیاتٕچ ماے موتٕچ دٕے چھےٚ انسانس رگن اندر
أمی جذبن گُلَو سٍتى۪ن ہلم بۆرمُت چھِ وٲرانن
أمی جذبن شمع کٔرـ̡ مٕتـ̡ چھِ روشن أنـ̡  کھۅتى۪ن اندر
أمی جذبن ادب تن زالنُک ہێچھہ نوو پروانن

حیاتٕچ کل چھےٚ مٔژراواں بےٚسۅکھ تھاوان بێتاب عشقس
حیاتٕچ لٲل کھالان نٔجدٕ بالن لولہ مجنوٝنن
أزیُک پَرتَو چُھ کرناوان قۅرباں پگہہٕ کِس نوٝرس
یۅہَے رویس چُھ ٹھٔرـ̡  کاساں نوى۪ن سِرـ̡ ین نوى۪ن زوٝنن

زٕژن داراں ہلم أسـ̡ کھسہ وٕنِس اختابہ کِس نوٝرس
پۯى۪تھاں یاوُن چُھ یامتھ کارتیکُک زوٝنہ گاہ چھاوان
مُدَے گٔنڈِتھ چھِ روزاں نظرِ شامن شفقہ تینتالى۪ن
خبر کم شوق ہى۪تھ أسـ̡  نو بہارس نارٕ تٔتـ̡  ہاوان

گہے شبنم ہراں گُلہ ٹوٝرِکس موصوٝم لۅکچارس
یۆہۆے گۆژھ زندگی ہندس بُتھِس کانہہ تازگی تھاوُن
گہے سازن ہندِس میٖٹھِس صداوس پان پُشراواں
یۆ ہۆے ما بخشہِ فٲنی زندگٲنی پوشہِ وُن یاوُن

چھےٚ باساں زندگی ژلہ وٕنـ̡  تہٕ موتٕچ ژھاے لافٲنی
مگر پیہم چھےٚ تیٖرن کش کڈاں روزان کمان عشقٕچ
سُہ وقتا واتہِ یُس نۆمراوِ یمرازس حیاتس کُن
یِژھٕے یۆد روزِ سر مستی تہٕ بے تٲبی جوان عشقٕچ
                        (20 دسمبر 1961)
                        ٭٭٭

                        حُسن تہٕ زندگی

مۆت ہوس کیا شوخ کرہے زونہٕ گاشس نالہٕ مٔتـ̡
پوشہِ ؤتھرُک رنگ رٹہِ ہے، شبنمُک سۯێہہ پۯاوِہے
أنزـ̡ نہِ گردنہِ ولنہٕ یِیہِ ہے کوکلن ہند کوو ہیوٝ
یا قمرـ̡  سُند ہۆٹ بٔنِتھ اکھ میٖٹھ لہرا تۯاوِہے

ناگہٕ رادن ہنز، جۅین آرن فوارن ہنز وُزِنـ̡
أندرِمِس کتھ تام سۆدرس گۯایہِ وُزٕناواں یہِ جود
ڈل دٔہِس پى۪ٹھ اکھ دما آوارٕ کر تھٔچمٕژ نظر
ژُکھـ̡  دِیی موصم دِلس اکھ میٖٹھ دگ اکھ میوٝٹھ دود

ناگہٕ رادٕچ کتھ تُجِم آم اۆبرٕ ژھاین ہند خیال
وُچھتہٕ یِم کیا جامہٕ پٍراوان چھےٚ اتھ نیٖلس نبس
چھۆت اۆبُر چھا یارٕ سٕنز ریشمـ̡  وُڈنـ̡  یا جامہٕ وار
کالہٕ اۆبرُک زال چھا یا زل پری ہند پٲٹـ̡  مس

آسمانس کُن نظر کر دِگرٕ پتـ̡ زانہہ روٝد پى۪تھ
وُچھ ستن رنگن چُھ اکھ سۅنزل بناواں آفتاب
تۯاو سنگر مالہِ کُن دۅہ لوسہٕ وُن شوقٕچ نظر
قۅدرتن مٕژرٲومٕژ سۅنہٲرـ̡  ورقن ہنز کتاب

یا وۅتھکھ سونتس اندر کھاہ بیرِ پى۪ٹھ روزکھ دما
تاوٕ ۂژ تھٔجـ̡ نٲر یێمہِ وقتن چوان آسان چھےٚ آب
ژھل وُچھکھ بُترٲژ ہنز خۅشبۅے چھےٚ کیا ہوشن کراں
زن چُھ آساں لوسہٕ کُٹھ انہارِ شوقُک میوٝٹھ خاب

بارہا پھیوٝرُکھ نشاطس، اکھ سوالا تۯاوٕہَے
ما پۆکُکُھ لوٝسِتھ تھٔکِتھ سبزارٕ پى۪ٹھـ̡  ننہٕ وور زانہہ
ؤلـ̡ گژھان بدنس تہٕ سبزارس اندر کیا لین دین
کیا ونی کانہہ، پانہٕ وُچھ شعرن ہیۆکا یُتھ بور زانہہ

کایناتُک بۆڈ عجٲیب بٲزـ̡  گارا پى۪و ژى۪تس
شٲعرس پے زندگی ہند، شٲعرس موتٍچ براتھ
ہاوسن ہنز کٲنچھـ̡ مـٕژ مہرێنـ̡  کۯوہُن وردن ژھٔنِتھ
تارکن ہنزٕ چوٝنہِ لٲگِتھ موج اختابٕچ، یہِ راتھ

رٲژ ہند ناوٕے ہیۆتُم دُب دُب دِلُک سپدیوم تیز
مٹھہِ متى۪ن خابن ہیۆتُن زوٝ یُن، ہێـژٕکھ حرکتھ کرٕنـ̡
ؤہـ̡ بى۪کس دِل روو اتھ خابن ہندِس شہرس اندر
قۅدرتٕکـ̡  خاموش آلو پێے سى۪ٹھا مشکِل سرٕنـ̡

دُشمنی، یارٕز، طمع، نفرت،حیا، خٲہِش تہٕ خوف
دۅہلہِ گاشس منز چھِ روٝحس پردٕ آساں بے شمار
زندگی بدلٕے خُمارا ہى۪تھ یوان خاموش راتھ
ژھایہِ تھپھ تۯاواں رٹان اصلُک ہلم بے اختیار
رٲژ ہند کارٕے خیالن پر گنڈٕنـ̡  شہپٲزٕ سٕندـ̡
رٲژ ہند کارٕے غمن ہندِس تلاوس چھونپ دیُن
رٲژ ہند کارٕے بے سۅکھ نظرن سۅ مٔستی آلہ وٕنـ̡
یێمہِ حقیقٔژ پردٕ تُل، یۅس چھۅت کۯہُن باوان چھےٚ بیۆن

زوٝنہِ ہند پرتو ژلاں عشقس دِلُک آرام ہى۪تھ
زن وَچھس کٔمـ̡  تام آساں پردٕ تُلمُت چاک دِتھ
شہرٕکى۪ن مۆمتى۪ن پشن پۯیڈاں یۆہۆے سیٖماب ہیوٝ
ہوش آساں نێندرِ آوُرمُت، دِل آساں سٔجدٕ دِتھ

زانہہ چُھتھا وُچھمُت صبح پھۅلہ وُن تہٕ اختابُک کھسُن
یێلہِ سنگر مالن پى۪واں پرتَو تہٕ نوٝرٕچ شوخ رَو
ٲنہٕ سٍتـ̡  زن تۯٲومٕژ آساں چھےٚ یارن تاپہٕ ٹێچ
یام چشمن سٍتـ̡  لٔج، خوٝنس اندر والاں چھےٚ دَو

کاوٕ یێنہِ وٲلِس چھتھا زانہہ تھٲومٕژ شامن نظر
وُچھ بےٚ غم جاناورن کُن کِتھہٕ کنتھ روزاں چھِ خۅش
کایناتُک سیٖنہٕ چُھم باساں گۅبیومُت لوٝسمُت
کانہہ بنی آدم یتھُے ژُکراوِ بُتھ یا تۯاوِ وۅش

وُچھ مُدَے گٔنڈِتھ ہۅ کٲریٖگر کٔتِج ییراں چھےٚ اول
وُچھ ، ہۅ ژٔر کیا آپراواں آنپہٕ دۅن موصم بچن
وُچھ ہُتى۪ن ہُتھ بۯمجہِ پى۪ٹھ کیا لوٝبہٕ وٕنـ̡ یاہوٝ قمرـ̡
وُچھ ہمِس ون ہارِ ہنز رٕژ مٲرـ̡ مٔنزڈبہٕ ہٲر تن

یا کرکھ جِگرا، ونس اندر یێہکھ زانہہ شامہٕ پٔتـ̡
یارِ شاخن واوٕچو گۯایو چُھ کیا شی شی گژھان
دۅن ژہى۪ن اندر چھِ زن سیٖنس گژھاں دروازٕ ؤتھـ̡
آسہِ ما آساں یہِ کانہہ جنگٕلـ̡  پری مس بٲگراں

نظرِ گٲمٕتـ̡ آسہٕ نَے نِکـ̡ نِکـ̡ گُرَن آبس اندر
شوقہٕ کى۪ن سۆدرن یہِ ڈیشِتھ ژھانٹہٕ کیا ماراں چُھ دِل
بوٝزمُت آسی کنَو زانہہ مانچھ تُلرى۪ن ہند سروٝد
پنہٕ نێنٕے سۆدرن اندر کیا زیٖرُ بم ژھاراں چُھ دِل

آنگنس منز آسِتھٕے کوتر کھیۆلا پھل کھیووٕمُت
ژیوٝنمُت آسی خبر کیا راونُک لبنُک خیال
گژھ دِواں پھِرـ̡ ، گژھ دِوان میچھن کتھن، نوزُک کتھن
وُچھ أچھن بۯونہہ کُن یِـیی اکھ اکھ حسیٖن تَے رٕژ مثال

پوشہِ وارى۪ن ہند سى۪ٹھا کێنہہ بووٕمُت چُھے شٲعرو
اتھ اگر پِھرـ̡  دِکھ۔ وُچھکھ حسنُک عجیبٕے عالما
بس اشارا اکھ ونَے، باغس اندر اژھ پانہٕ وُچھ
بٲزـ̡ گر حُسنُک اثر، لوٕ ۂژ خۆشی، خۅشہِ وُن غما

ہوشہِ سان بوزکھ اگر ددرایہِ روٝدُک جلترنگ
ساز وُزٕناوی دِلس منز مٲرـ̡ مۆند تَے پوشہِ وُن
دِل پۯتھی یۆد سر یِمن نوزُک اشارن آلوَکھ
دامنس یۆد حسنہٕ کِس تھاوکھ نہٕ تھپھ واتکھ نہٕ کُن

پردٕ ڈٲلِتھ ہٲوـ̡  مَے حُسنٕکـ̡ فقط کێنہہ رنگ از
یارٕ سٕنز تُلہٕ ہا کتھا تتھ امتحانس درِ نہٕ دِل
پھوتہٕ کِس ہارس اندر بٔلـ̡  کیا جرُن اکھ مۅکھتہٕ پھۆل
کتھ کتھن منز راوٕراونـ̡، تِژھ بےٚ ادبی کرِ نہٕ دِل

زندگی چھے مس مۆدٕر تَے زندگی چھے لوٝبہٕ وٕنـ̡
کایناتس منز چھےٚ اکھ اکھ رژھ حسیں تَے مٲرـ̡ مٔنز
حُسن چٲنِس نآسنس آسُن بناواں، حُسن وُچھ
ؤہـ̡ تسنُد بے کار آسُن یێمـ̡  نہٕ حُسنس ماے ؤنز

کایناتُک حُسن، یاوُن یارٕ سُند، علِمُک پۯگاش
محبتٕچ دیوانہ گی تَے گاٹہٕ جارٕکـ̡  ٹھِپـ̡  تہٕ زال
یِم رلاوُکھ، یِم چھِ اکھ، یِم زندگی ہُند یێنـ̡  وۅنُن
یۆد اکھا تۯاوکھ یہِ سٲرٕے زندگی سپدی وبال
                        (6 اگست 1961)
                        ٭٭٭

                       بہار

ڈۆل بہارُک خۅش ہوا شمشاد وۆتھ کاڈا کٔڈِتھ
زن تہٕ صبحٕکہِ واوٕ کانہہ نوزُک بیدار گو
شبنمن چھِرکاو کۆر زن پۯون مس کھاسى۪ن پھِرُن
سۯێہہ وُٹھن یامتھ سپُد لالس تہٕ نارٕے نار گو

زانڈ ژٔج اۆبرٕچ تہٕ سورى۪و پردٕدٲری ہند سمَے
دۯاے پھٔٹـ̡  پھٔٹـ̡ جامہٕ ژٔٹـ̡  ژٔٹـ̡ جلوٕ ہاواں یوسمن
لول دۯامُت نظرنٕے ہنز ڈٲلـ̡  ہى۪تھ چشمن اندر
یام سبزارس کنن گو پان وۅتھرووُن وتن

پھانپھلُن ٲخٕر ہیۆتن لۅکچار بادم وارِ ہند
نى۪تھٕ ننى۪ن یژکالہ کى۪ن، شاخن ہیۆتُن بامن پھٹُن
شێچھ ہنا کٔر عام خۅش ہوٕہن ڈلس تیزے ملر
کتھ کنن یامتھ گٔیَس، ہیۆت یاونن نارا ژھٹُن

چاو کھۆت یمبرزلن تے سۅرمہٕ ٹارى۪ن بوش کھۆت
رۆٹ اشارا مسولو مس پٲرنُک سامانہ کۆر
بۆمبرَو تُج گٍنگرارَے، پوشہِ نولَو چور بم
شبنمُک گُلہِ میوٹھ کرٕنٕکہِ شوقہٕ واون مۅکھتہٕ ہۆر

موت ہیوٝ شیٖنُک چھژر ژۆل، سنگرن وۅزجار کھۆت
یا ہیۆتُن میٲنِس مدنوارس بُتھِس وۅشلُن کھسُن
زوٝن کیا شولاں ڈلس پى۪ٹھ آب چھا سیماب چھا
تس دلارامس وُٹھن پى۪ٹھ ژھالہ زن ماراں اسُن

أتھـ̡ اندر أتھـ̡  حُسنٕکِس تَے لولٕکِس جوشس اندر
زندگی ہندِس لگان سازس تہٕ سامانس جلاو
نوبہارا پھۆل حیاتس نٔو حیٲتی آو ہى۪تھ
محنتن ہۆل گۆنڈ زِ ہاوس پُورٕ کرنُک وقت آو

سنز کراں ڈل ہٲنز کیا رنگہ ناوٕ پٲرِتھ تھاونُک
سازٕگٔر زن یارٕ سٕندِ امّارٕ شیران ہارِ مس
تۯیشہِ ہتہِ وٕے تھٲوـ̡ مٕتـ̡  ژھرـ̡  کھٲسـ̡  میخانس اندر
آسہ، کس قسمت وُچھو یێلہ واتہِ ساقٕے چاوِ کس

وۆتھ دجن ڈارن کھہن منز ہولہٕ ہسہٕ کُے شور ہیوٝ
زندگی کھۆت بوش ہیوٝ دى۪و فاقہٕ پھرـ̡  وۅنـ̡  پھانپھلن
بے قرٲری تَے بێکٲرـ̡  ہندـ̡ شبن تُل ڈیرٕ از
آش آمٕژ گاش ہى۪تھ سانى۪ن امارن ہاوسن

عٲزمن ہیۆت پھۅلہ وٕنس اتھ نو بہارس داد ہیۆن
حُسنہٕ کِس تس پادشاہس الفتٕچ سوٝزٕن سلام
شوقہٕ یِتھ یاوُن چُھ ماراں ژھۅہ، گُلو کٔرـ̡  جامہٕ چاک
ہیۆت وُہُن لولٕکـ̡  الاون، دلقرارو لول آم
                        (2 اپریل 1957)
٭٭٭
پمپوش

تھێکِتھ کھٔژ زوٝن ، مہرێنـ̡  آسمانٕچ
زمیٖنن ٲنہٕ ہووُس نانپہٕ وُن ڈل
حیاتس شوق گو گُلہ میوٝٹھ کرنُک
پنُن زوٝ پیشکش تھووُم پھۆلُس جل
                        (ستمبر 1961 )

ززُر اژاں چُھ دِلس رُح ُچھ مبتلا سپدان
اگر گۅلاب مشِک دِن تہٕ بلبلن ساون
سروٝد میانہِ کلامُک فدا چُھ تس یارس
ادا یسٕنز چھےٚ وناں لول نێندرِ وُزناون
                        ٭٭٭

ڈلن دِتـ̡  شولہ زن لٔج پاردِس گۯکھ
کۯۆہُن اۆبرا ڈٔلِتھ یێلہ زوٝنہِ ہوو بُتھ
بہٕ زن فکرن سنیومُت شعر لیکھان
وُچِھتھ تلـ̡ ٹارِ تی اسُنا ژےٚ تۯووُتھ
                        ٭٭٭

گہے گژھاں چھِ پریشاں جواں دِلکـ̡ ہاوس
مژر یِواں چُھ امارن، قرار ہاراں دم
سێٹھا کُڈُر چُھ پى۪واں دِل پنُن تھوُن رٔچھـ̡ رٔچھـ̡
شمار کیا چُھ حسینن، نظر بران چھےٚ ہلم

٭٭٭

                موت تہٕ شٲعر

موت
چُھس کۯێہنـ̡  میٔــژ مرگزارٕچ، آ ورێنہِ ہند نار چُھس
یاوٕنس لُرٕپارکرٕوُن، تاوٕنُن بازار چُھس
ڈوٹھ بٔـنـ̡  بٔـنـ̡  پھۅلہٕ وٕنى۪ن ٹوٝرى۪ن کۆرُم ٹۅکہ سوٝر مےٚ
کھسہٕ وٕنى۪ن ہند تالہِ ژى۪ل چُھس، اسہٕ وٕنى۪ن بیزار چُھس
چُھس ششُر لٲگِتھ ولاں ڈارن دجى۪ن شینُک کفن
چُھس اۆبُر، گگراے چُھس، گٹہٕ کار چُھس، نبہٕ نار چُھس
گاہ طفان لٲگِتھ چُھسن دم پُھٹـ̡  کران پھۅلہ وُن بہار
گاہ ززُر ژٲنِتھ تھرى۪ن وارى۪ن تُلاں گٹہٕ کار چُھس
دۅن دِلن ہنز لولہٕ ۂژ دُبراے بوٝزِتھ چُھس خمان
محبتس ۂٹـ̡ ور دِواں چُھس، دوٝرِرُک آزار چُھس
وُڈنہِ لۆگ اسمٲنـ̡  آدم، وتھ رٔٹٕم لٲگِتھ وُنل
ناوٕ ہٲنزن لرزٕ پاواں، واو زوراوار چُھس
سوٝدرا ہِیوٝ چُھس بٔرٕتـ̡  کھل ژھرـ̡  کراں منٹن اندر
عارٕ رۆس ؤڈدار چُھس، کُل عالمُک بتہٕ مار چُھس
فلسفن ہندـ̡  برقہٕ دِتھ چُھم ژھل کٔرِتھ وۅپدُن ٖگاں
کٲتِہن رنگیٖں بیانن ہند ؤلی اوتار چُھس
خۅش کراں چُھم جونٹھ دِتھ نِنـ̡  باشہِ کرٕوٕنـ̡  لٲوـ̡  شُرـ̡
یا گُٹیُل چُھس، یا بُکرـ̡ دۆر بے رحم شہمار چُھس
بے خبر گۅنماتھ پھیران دربدر وایاں چُھ نَے
نٔخرٕ کٔرـ̡  کٔرـ̡  کیا کراں کیوٝ کیوٝ أمِس ما مى۪ون بٔے

شٲعر
ننمہٕ میونُے نوبہارُک خۅش ہوا پھۅلہٕ وٕنـ̡  سنگر
نغمہٕ میونُے یاونٕچ مستی، حیاتُک مس چِھوَر
نغمہٕ میونُے پتھ ونٕچ مٔـٕژ آرول یا ہرنہٕ ژھال
نغمہٕ میونُے بالہٕ دامٕنـ̡  دوروٕنہِ آرُک مژر
نغمہٕ میونُے زُتنہِ ہند گاہ، سونتہٕ اختابُک تژر
نغمہٕ میونُے شبنمُک سۯێہہ، پوشہِ ٹورى۪ن ہند اسُن
یا جلن ہند چُرـ̡  گِشا یُس بوٝزِتھٕے نیراں چُھ شر
پھۅلہٕ وُنُے یتھ نوبہارس میٲنـ̡  شعرن نقشہِ تُل
تتھ ہرُد کیا لاگہِ داوَس، تتھ طفاں کیا ژانہِ زر
ساز وویُم شیٖنہٕ ششرٕنـ̡  موج لٲجِم برکرے
زانہہ اگر بترٲژ پى۪ٹھ سونتن تہٕ ششرن لٲجـ̡  ہر
ساز وویُم تھل رُوَن وٲلِس کۆرُم آشن درى۪ر
یۆد وُچُھم میٔــژِ گمٕتـ̡  أکـ̡  بێالـ̡  پھلـ̡  کۆڈمُت چُھ تر
ساز وویُم کٲسبن یێلہِ زندگی گُلہِ میوٝٹھ أنـ̡
ٹٲٹھ ڈٲلێا ویرِ یێمہِ چے وُمبرِ سگہٕ نووُن ہُنر
دۅن دِلن ہند لولہٕ ہۆت دُب دُب یُتھُے بوٝزُم گیۆوُم
الفتس کھٔژ مستیا حُسنن پُھٹٕـرـ̡  ؤلـ̡  دارِ بر
موصمن، پہرى۪ن ہنزن آشن ہندُے چُھس رٲچھ در
لۆت منزٕلـ̡  بٲتھا گێوِتھ ماجن بہٕ شێہلاواں جگر
چُھس بہٕ شٲعر، زندگی ہند باشہِ کرٕوُن لالہ پھۆل
نغمہٕ میانے آش سوٝرِتھ موت پنہٕ نے موتہٕ گۆل
(22 قروری 1956)
٭٭٭

نۆو عالم

برۆنہہ تہِ اوس گردشس اندر عالم
وارٕ زن از گۆمُت چُھ بے آرام
شام واتاں دۅہس نوى۪ر راواں
راتھ پۯاناں چھےٚ از صبحنس تام

زوٝنہِ لایاں چُھ از کمند آدم
راتھ اوس راتھ وٲتِتھےٕ کھوژاں
از چُھ آدم نژاں ستارن پى۪ٹھ
خٲکـ̡ ین ہند چُھ از وطن اسمان

کالہ اوس کِبرٕ دۆد ایٹمی بم
از چُھ باساں یہِ زالہ سُند پٲزار
پگہہٕ کێن خونرن ہنز مہ کر کتھ
از نوى۪ن رۆستمن چھِ نٔوـ̡  ۂتھـ̡ یار

راتھ ٲس موٹرٕچ جہازٕچ دَو
از چھِ سفرٕکـ̡  بدل بدل سامان
بالہِ زن ٹھِل اگر کڈى۪س کانژھا
ژھالہِ اکہِ واتہِ تلپتال انسان

مرکزٕے ڈلنہِ لۆگ خیالن ہند
زانہٕ کُس آسہِ کیا أمیُک انجام
دونہِ لۆگ کارواں حیاتُک تیز
اتھ وُتاؤلـ̡ یہِ منز چُھ سورُے خام

چٲنـ̡  دۯٕے ٹٲٹھ چھم مےٚ پگہچ آش
ونتہٕ یۆد میے ونکھ ژٕ بد اى۪حساس
شامہٕ ژھمبرى۪ن اندر چُھ راواں گاش
رٲژ زیٹھاں دۅہن چُھ سپداں ڈاس

سُے چُھ ہابیٖل از تہٕ سُے قابیٖل
زُلفہٕ ژھاین چُھ از تہِ حٲصل تی
یتھ اندر لولہٕ کُے قلم چلہِ ہے
وُنہِ تہِ ڈیٖٹھٕم نہ کانہہ مےٚ تِژھ بٔستی

ٲخرس ژھارِ پۅختگی آدم
بوزِ عالم یہِ لولہٕ آلَو سون
اسہِ تہِ کیا أسـ̡  تہِ چھِس دِواں پۆد پۆد
سون منزل چُھ لوٝبہٕ وُن نند بون
(مارچ 1961)
٭٭٭

پُنِم ہنز زوٝن تٔسـ̡  زن گۯون لۆگمُت

(ٹنگمرگہِ ہندِس سینِی ٹورِیَمس منزاکھ فنکار خوتون بێمار وُچھِتھ)

خیالن ہند تھزر دردے جگر ہى۪تھ
رنگارنگ کاغذس پى۪ٹھ نقشہ تۯاوان
فنس سٔنـ̡  سٔنـ̡  امارن ہاوسن کِتـ̡
چھےٚ ٲوِلـ̡  پوشٕونـ̡  منـزٕلـ̡  بناوان
تسُندٕے فن چُھ عرفانُک شرابا
دَِلس اکھ پێالہ چٲوِتھ شولہ ناواں
دِواں فکرن نبس پى۪ٹھ واتہ نٕکـ̡  پر
خیالن شوٝخیا دِتھ شولٕناوان
چُھ زن شبنم ہراں یمبرزلن پى۪ٹھ
وُچھن والى۪ن أچھن شێہجار پاواں
مدَے گٔنڈِتھ وُچھو یۆد آبشارا
نظر زن کێنہہ لباں کێنہہ راوٕراوان
مگر دێق، زندگی ہند پۯون دشمن
پنُن طاقت تٔمِس پى۪ٹھ آزماواں
پُنِم ہنز زوٝن تٔسـ̡  زن گۯون لۆگمُت
چِھ کٲتیا دى۪و حیاتس کانپہ ناواں
تٔمِس گۆژھ عٲزمُن پیغام واتُن
اسُن ٹوٝریُک چُھ ہردس لرزٕ پاواں
فنُک طاقت چُھ یمرازس دِواں ڈنگ
دى۪قس سٍتێن جکھاں یِنہٕ دل گژھی تنگ
ژٕ تھاوُن بولٕوُن پنہ نے فنُک جل
حیاتس سٔجدٕ دیاوُکھ موتہٕ موکل
(8 اگست 1956)
٭٭٭

طوطہٕ تہٕ ہٲر

طوطہٕ

گۯایہِ چانے لولہٕ ہاوس پٲرـ̡  میٲنـ̡
سۅرمہٕ چشمن ہند چھۆلُتھ اچھِ دٲرـ̡  میٲنـ̡
کیازِ چھکھ گٲمٕـژ گۅتن ہِش ہٲرـ̡  میانـ̡
کتھ خیالس چھکھ سنیمٕژ چٲرـ̡  میانـ̡

ہٲر

کِژھ کتھا وُچھ طوطہٕ یارن میٲنـ̡  تُجـ̡
وُنـ̡  وُچھتھ نا کوترا اکھ مور پُجـ̡
ہۆٹ ژۆٹُن تس زن کتٕر تٔمـ̡  باغہ مُجـ̡
سانہِ آلیُک پے تھۆوُن تۯاوو یہِ کُجـ̡

آسمانُک حالِ بد چُھے نا خبر
ڈوٹھنَے ژٹـ̡  سنگلاتن ہندـ̡  جگر
قٕسمتس سٲنِس چُھ از کیا تام وَر
أسـ̡  چھِ ۂسـ̡  ٲسس اندر زن ہاکہٕ ژر

دَلبرا گانٹن گرى۪دن نیّت چھےٚ کھۅٹھ
آیہِ کیا شہمتھ، دِلن کیا کٔڈ مےٚ وۅٹھ
وُنـ̡  کھى۪نم، ڈیرس کرن اکھ تیٖرِ مۅٹھ
ینـ̡  کٔتِتھ زن تٕے ژھۅٹ پى۪ٹھ تۯاوِ ژھۅٹھ

اکھ أکِس امّار دیُت امّار مۆنگ
سۆر حیاتُک سوزٕ سازا ساسہٕ رۆنگ
زندگی باپتھ خبر چھَے کوٝت جۆنگ
لول زانہہ وۅپدیووٕ، موتن تۯٲوٕ شۆنگ

طوطہٕ
ماجہِ زن زامٕژ وُنی ونہٲر میٲنـ̡
لولہ کێن پانژٕلـ̡  کۅہن ہنز یٲر میٲنـ̡
چشمہٕ مژرِتھ ما وُچھِن تھٔـز کٲر میٲنـ̡
فکرِ ما پانس کتھا امہِ تٲر میٲنـ̡

یچھ ژٹان ہۆٹ آمٕتی جاناورن
رٕتـ̡  چھِ کٲتێا یم اسی لولا برن
توٕپتن، تِم کیا چھ، یم موتس ڈرن
زندگی ہندس ڈلس کِتھہٕ کٔنـ̡  ترَن

بوز کیا بوزتھ حیاتٕکـ̡  چھۅکھ بلان
گُل ہۆکھِتھ خاکس اندر سٲری رلان
بێٲلـ̡  دانا اتھـ̡  زمینس منز پلاں
پانژِ دۆہـ̡  بێیہِ ٹوٝرـ̡  ڈیشِتھ شر ژلان

آسمانس کُن وُچھِتھ کھوژُن غلط
قٕسمتس ہۆٹ لۆٹ وُچھُن اکھ چٲرـ̡  کتھ
ڈوٹھ گو ساتھا وساں ؤلـ̡  بوش اتھ
دِل ہنا کر دۆر، چُھ رُح بدنُک ہى۪متھ

زورور گانٹن گۯى۪دں بۯونہہ کُن مہ نم
وۅتھ، شکارى۪ن وارِلى۪ن ہند تۯاو غم
زندٕ پٲٹھی زندگی ہنـزِ ناوِ لم
لولہ طوٝفانُک غُلاما اکھ چھُ یَم

شێچھـ̡  ونَے، وۅتھ فکرٕ تَے غم تۯاو نژھ
بولبوشُک چُھم کسٕب، کسبس مےٚ پژھ
بوزِ یۆد کانہہ میانہِ سازُک پیونت رژھ
باوِ سٲنس یاونس محبت تہٕ یژھ

بیم تَے غم زندگی کِژ موتہٕ دگ
خۅشدلی اتھ لولہٕ باغس سونتہٕ سگ
شانہٕ ہیوٝ وۅگناو رٹھ وقتٕچـ̡  ژٕ وگ
خۅش بُتھا ہى۪تھ وۅتھ حیاتس پٲرـ̡  لگ

ہٲر
طوطہٕ یارن نۆن کٔرِتھ وۆن راز مےٚ
چُھم أمِس یاون مٔــتِس پى۪ٹھ ناز مےٚ
زندگی ہند از شروع کۆر ساز مےٚ
دِژ بہارس دِل کٔرِتھ آواز مےٚ
(2 فروری 1956)
٭٭٭

آرٕ

وُچھِتھ ہۆکھـ̡ مٕتـ̡  چمن شیٖنن گلن ہیۆت
ڈى۪کس پى۪ٹھ بالہ کِس عرقن ڈلن ہیۆت
درو، ہێندرو، کۅلو، جویو رلُن ہیۆت

گرێزٲوُن آرٕ اکھ وۆتھ گۯایہِ ماراں
شکارس زن سٕہا تھپہٕ تھارِ لاراں
نتَے ما عاشقا دلدار ژھاراں

پکاں ہۆل ہۆل چُھ زن شہمار دۯامُت
خماں، زن خشمہٕ ہۆت خوٝںخار دۯامُت
گۆمُت آرامٕ سٕے بیزار دۯامُت

کنى۪و، آرَے پلو نِشہِ بے خبر وۆتھ
دندى۪ن پنہٕ نى۪ن کراں زیروزبر وۆتھ
ڈُلٕنـ̡  دی دی تُلاں واوس مژر وۆتھ

چُھ مردا پان پنٕنُے آزماواں
جنوٝنا، طاقتٲ زورا چُھ ہاواں
دَواں دلدارٕسٕے وِلہ زار باواں

کنى۪ن اندر گۯێزان، ہى۪تھ جوش دوراں
تہٕ سمہٕ سٔترِس اندر خاموش دوراں
چُھ رندا پیالہ چى۪تھ مدہوش دوراں

ونن منز ہُے تُلاں زن سازٕ وولا
گى۪واں ونہٕ وِگـ̡ نێنٕے باواں چُھ لولا
دپاں غم اکھ مخولا، اکھ بتولا

کۅہن وۆننس ہَیو نادان آرا
پنــٕنـ̡  تھزرن بہٕ کۆرنس شاندار
ژٕ چُھکھ سنِرَن کنُے دوراں بِچارا

یہِ بوٝزِتھ خشمہٕ سان ٲسس کھۆتُس پۆس
وۅتُھس چُھے بوش تھزرُک بوز کیا چُھس
طفانا، طاقتا چُھس، رٲیلا چُھس

بہٕ پنہٕ نى۪ن مشکِلن پانے دِواں لتھ
بہٕ پنہ نے ہى۪متہٕ چُھس ژھاراں پنٕنـ̡  وتھ
بہٕ سۆمبراں رگن چانى۪ن ہندُے رتھ

سُہ ہى۪تھ دوراں نیَن کن، نمبلن کُن
دجى۪ن، ڈورى۪ں، کھہن کُن، داں ڈلن کُن
گُلن کُن، سۆمبلن کُن، مسولَن کُن

یُتھُے چُھس ہارٕچى۪ن نارَے تۯٹن منز
یُتھُے چُھس کٹھ کشى۪ن، واون، ژھٹن منز
ہِوُے چُھس زوٝنہٕ رٲژن منز گٹن منز

بہٕ دوراں چُھس تہٕ سونتس آش پھیراں
یمبرزلہ چشمنٕے زن گاش پھیران
پکھن زن پوشہٕ نوٝلن واش نیران

نٹاں رُم رُم پۅہس، ششرس تہٕ ماگس
گنیمٕژ یاوٕنٕچ زن راے باغس
خُمارا زندگی ہندِس دى۪ماغس

ہى۪واں چُھس باج بالن کوہسارن
وۅمیذن سگ دِواں چُھس نوبہارن
رگن منز رتھ براں چُھس لالہٕ زارن

رفیقا عالمس چُھس ساتہٕ ساتُک
تُلاں اٹہٕ بارِ چُھس بورا حیاتُک
مۆزوٝرا، گۯیوستا چُھس کٲیناتُک

تھزر گو پیمٕتێن ہند ہوش تھاوُن
تھزر گو تۯیشہِ ہتہِ نٕے پیالہ چاوُن
(میی 1955)

***

وى۪وٕہار کۆرُم لولس اٹہٕ بارِ چُھ خٲلص غم
یتھ ییٖژِ خدٲیی منز حصہ آو مےٚ کُس عالم
متـ̡ کرنہِ گژھو پوشن پرکالہ وساں جامن
کیا باوِ بےٚ سۅکھ لولُک انجام بنی آدم
کتھ وقتہٕ اگر سرٕ ہو یژھٕ ہو تہٕ وۅکھلـ̡ ترٕ ہو
وۅنـ̡  آولنِس اندر سیۆد ناوِ چُھ رٹہٕ نُے نم
مجلس چھےٚ بٔرتھ لیکن ساقٕے چُھ گۅتن گومُت
سازس تہِ کمٕے سنہ وٕنـ̡  رازس تہ کمٕے محرم
کیا ونـ̡  زِ تٔمس یُس میےٚ را ہ کھارِ بےٚ سۅکھ نظرن
نہ چھِ غمزٕ نِگارس کم، نہ چُھ جوش امارس کم
چشمن چُھ گژھاں یامت جانانہ بُتھیُک ہاوس
مۅختس چُھ کراں انبر مستانہ دِلُک حاتم
یا وُچھتہ فقیری منز کیا کۆر مےٚ عطا کینژن
پۯاوان چُھ خداوندی یس کُن بہ کراں سرخم
اکھ چھۅکھ چُھ دِواں طاقت ہتھ چھۅکھ چُھ زراں الفت
یِنہ چٲنـ̡  ستم سورن دیوانہ گژھن برہم
رُت اوس گى۪واں عٲزم بیچارٕ دپاں گُزرى۪و
پوشن تہِ چُھ ڈۆلمُت رنگ قمرى۪ن تہِ چُھ گومُت دم
                        ٭٭٭

خبر یہِ راتھ تہِ نیریا اگر نہٕ دلبر آم
زُوَن اگر نہٕ وفا کۆر سۅ روزِ عشقس پام
وۅزٕلـ̡ گُلالہ چھۅکن ہندـ̡  فوارٕ أشـ̡ وانِکـ̡
فیاض کیا چھےٚ خدٲیی غمس دِوان چھےٚ ینام
خبر مےٚ کیازِ چُھ از زہرٕ کھۅتہٕ کھراں میچھر
مےٚ پِھرـ̡ زِ یارٕ خدارا تلخ پہن اکھ جام
مےٚ وُچھ یہِ چیز لُکن از فریب ہیوٝ باسان
ژےٚ ما وُچھُتھ یہ خلوٝصک تہٕ محبتُک انجام
رچھان چھےٚ مێتہِ یہ خدٲیی گۅلابٕکی پٲٹھى۪ن
صبح ہران چُھ مےٚ شبنم قرار انان چُھم شام
بێشوٝنکـ̡  پٲٹھـ̡  ہیۆتُن ٹیۆٹھ مۆدُر ونُن لولُک
صفا دِلا چُھ یہ عٲزم مگر عقل چھس خام
                                (24 جلے 1961)
                        ٭٭٭

گلالہ رویہِ وُچھم شوقہٕ چو أچھو دلدار
بچارٕ دِل چُھ پریشان ہوس چُھ نارٕے نار
أزیُک عذاب فراقُک قیامتا لولس
أزیُک شباب امارُک چُھ قۅدرتُک شہکار
مےٚ تٔج نہٕ وارِ اندر زانہہ نظر کرٕنـ̡  قوبو
ژۅپٲرـ̡  اوس فقط یارٕ سند گۅلٲبـ̡  انہار
قدم ہى۪وان چُھ تُلن میوٝن سروقد یامتھ
بێتاب کیا چھِ گژھاں مۅکھتہٕ ڈالہِ ہى۪تھ فموار
سۅ وِز تہِ ٲس خبر کیا، سۅ وِز مشیا لولس
نہ گیہِ زبان وٹنـ̡  خۅش نہ زون وننس وار
پھۆلِتھ یوان چھِ ڈلس ملرنٕے اندر پمپوش
دِلُک سروٝر مہ راور غمس مہ گژھ بیزار
یۂَے نشانہ حیاتُک یٔہَے دِلٕچ دولتھ
مہ وَن مہ وَن زِ حیاتٕچ تٔچھنـ̡  چھےٚ دل آزار
یۆہۆے سفر چُھ غنیمت چُھ نۆن کمال آرُک
پنُن وجوٝد مہ راور ہۅ سۅدرٕ کھۅن مو ژھار
اگر  بێسوز شمع چُھکھ پۯى۪زل تہٕ پرتو وُچھ
مہ ون بےٚ معنہِ حیاتس، سُہ گو مرُن صد بار
سُہ وق زِ یێلہ ژٕ حیاتس سنکھ تہٕ دل راوی
سُہ وق اگر نہٕ لبکھ زانہہ لبکھ نہٕ سۆدرس تار
ہَیو از ہا چُھ پزی عٲزمس مژر آمُت
رۅخن گۅلاب ونان کوکلن ونان شہمار
                        ٭٭٭

دوسدارا دِلبرا نُندٕبون یے
تس نِگارس ہیۆت مےٚ از ونوون یے
وارِ منز رۅخسارٕکُے وۅشلُن وُچھِتھ
رشکہٕ سٍتى۪ن مَولہِ کُلـ̡ رتھ چھون یے
ہرنہٕ چشمن کُن نظر دِتھ شرمہِ سٍتـ̡
زن أچھن یمبرزلن لۆگ گۯون یے
مسوَلن ڈیٖٹھٕم پریشٲنی گٔمٕژ
کوکلن کٔمـ̡  شانہٕ ہیۆت والون یے
اکھ نظر، اکھ شربتا بیمارٕ سٕنز
اکھ خمارا، اکھ شرابا پۯون یے
یا أچھن ہند سۯیہہ، وچُھک شێہجار میون
یا دٕلُک دُب دُب رگن ہند خون یے
زندگی ہنز آش، ستھ موصم دِلٕچ
نێہہ گٹن منز گاہ، پۯێزلوٕنـ̡  زوٝن یے
 پوشنوٝلن سٍتـ̡  ہى۪تھ صبحے گى۪وان
عٲزمن دۆپ بوزِنا وِلہ میون یے
                        (25 دسمبر 1955)
                        ٭٭٭

یَنہٕ زلفو چانێو نال وۆلُم تنہٕ ووتُم یێژ بے تاب لٔتی
یاوُن مےٚ سپُد پھلوٲے پنُن زن موصوٝمن وُچھ خاب لٔتی
دنیا چُھ وناں اتھ تارک نب، سُہ چُھ دوکھٕ لُکن مےٚ چھےٚ وارٕ خبر
ژێـ̡ گامٕچہِ مسولہ زوٝنہ بۆرُتھ پمپوشو کتریوٝ قاب لٔتی
انسان حیاتٕچہِ وێتھِ اندر یرِہے بے حى۪س شہتیٖرا ہیوٝ
یہ چُھ أمہ کى۪ن سنِرَن سٔنـ̡ راوان، الفت چُھ زبر گرداب لٔتی
یٔمـ̡ سازن فرہادس ہێچھہ نوو بالن تہٕ کۅہن پُژپارٕ کرُن
غم تۯٲوِتھ بێیہِ وُٹھ کملٲوِتھ تتھ سازس دِتہٕ مضراب لٔتی
گتٕرِنـ̡  چھےٚ زمانٕچ گێوٝر تُلِتھ کُنہِ کُنہِ وِزِ مێتہِ مجبوٝر کران
نتہٕ لولس میٲنس جوش ہمیا، نتہٕ سۆدرن سوریا آب لٔتی
پۯى۪تھ انسانس چُھے لولہ مژر، پۆز دلبر عٲزم وارٕ وُچُھن
یِتھـ̡ متـ̡  چھی مشکل پٲدٕ گژھنـ̡ ، یِتھـ̡ عاشق چھی نایاب لٔتی
                                (اکتوٝبر 1956)
                        ٭٭٭

بوٝزم زِ بہار آو چُھ سرتازٕ گُلستان
بٕے زانہٕ مےٚ کتھ رایہِ سٔنِتھ دل چُھ پریشان
یێلہِ حیلہٕ کٔرتھ عقل سرابن چھےٚ ونان ناگ
منزل چھِ گژھاں دوٝر، وتن ہنز چھےٚ مشاں زان
رِندٕے چھِ براں لول شرابس تہٕ خمارس
تھالن چھِ براں مۅہرٕ تہٕ سادن چُھ مشاں گى۪ان
کیا تام وُچھوو خاب مےٚ بے تاب امارو
تعبیر پھرِتھ دۯاکھ سپُد شوق اۆرُزمان
حٲصل چھےٚ مگر آش مےٚ برجستہٕ بہارٕچ
لولس چُھ دِوان زندگی، موتس چُھ مٹاوان
بختک تہِ غلط شکوٕ تہٕ وقتچـ̡  تہِ غلط گۯاو
ہیۆن سام نرى۪ن وُچھ مےٚ ژرى۪ن پٲز بناوان
کێنہہ شوق اگر سوٝرـ̡  سپٕدـ̡ کٲر گژھیا خم
سنگر چھ، پھۅلاں یام ستارن چُھ گژھاں فان
یود کھٲسـ̡  وُچھِتھ خٲلـ̡  نٹى۪ن خوٝنِ جگر بر
یُس معنہِ غمُک زانہِ سُہ اۆش وانہِ کریا سۯان
ہا پوشہِ متیو پام یِنا روزِ امارس
ہوشس چھےٚ ہُران کٲم یُتھُے واو چُھ تیزان
٭٭٭

بۆے نَے ژےٚ یارٕ لالُک وۅزجار بالہ پانس
دِل میون لوگتھن از کتھ تازٕ امتحانس
لولس مےٚ شٲلـ̡  تارکھ ہٲوِتھ دِتُم فریبا
نتہٕ کیا ژےٚ سٍتـ̡  نىسبت لالس تہٕ ارغوانس
ژھێپھ زوٝنہِ دِژ کۅہس پتھ، تُلہ تٲجـ̡  لٔج ستارن
سُلہِ یاد پى۪و ژےٚ ڈیشتھ افتابہ آسمانس
نوزُک وُٹھن اسن پھۆل شێہلیو جگر بہارس
کۆستوٝرـ̡  یُس گُلن دیُت رتھ میون تتھ بیانس
دۅشونـ̡ کنُے چُھ مقصد أندریُم حباب پالُن
دِلبر چھِوان چُھ پانس، عاشق گنداں چُھ جانس
سرمست عاشقن کٔر پرکل یہ ہرنہٕ چشمو
گاہ پھیرـ̡  نجدٕ بالس، گاہے شراب خانس
بہتر چُھ دوٝر روزُن بدنام عٲزمس نِشہ
شٲعر چُھ شوخ آساں رسوا کری جہانس
                                (22 جنوری 1957)
٭٭٭
مٔتـ̡  متێے از پانہٕ ساقی پێالہ برِ، ٲسـ̡  تہِ وُچھو
ساز کمہِ اندازٕ تلہِ کیا ناز کرِ، ٲسـ̡  تہِ وُچھو
یتھ دمس تامتھ نگارا کھۆت نہٕ شوقس ٹارِ کانہہ
نۆو انێا کێنہہ کامہٕ دِو کنہٕ پامہ زرِ،ٲسـ̡  تہِ وُچھو
مدتھا گو وقتہٕ کِس یتھ آوٕلٕنـ̡ سٕے منز متى۪ن
دۯاو کلہٕ وال یہِ کتھ رنگہٕ ناوِ ترِ، ٲسـ̡  تہِ وُچھو
روٝد از تام سێٹھا حضرتِ عٲزم خاموش
واریاہ کٲلـ̡  آو از، کیا مۅختہٕ ہرِ، ٲسـ̡  تہِ وُچھو
۸۲ جنوری ۱۶۹۱)
٭٭٭

زُنہٕ گاش، مۆدُر مس پیمانا، نندٕبون ٲچھن تل جانان
بے تاب امارن آسُن گۆژھ کێنہہ تسلی کرنُک سامانا
کُس دود پریشان تھاوان اتھ صبہٕ شام ونن گُلزارن منز
ؤہـ̡  گُلہِ ٹوٝرى۪ن گۆژھ دل آسُن اتھ واوس کرٕہن پُرسانا
یا شوخ ستارا شامہٕ پى۪ٹھَے ژھِپہٕ گاش کراں اسمانس پى۪ٹھ
یا تھرٕ تھرٕ میٲنِس أشـ̡  قطرس یا پۯزلاں یارس دُردانا
یێلہِ أزـ̡ کى۪ن دادى۪ن تاب انُن سخ زونُم پگہُک خاب وُچھم
باساں چُھ جنوٝنس منز یۆدوَے یہِ تہِ روت انى۪ن افسانا
کتھ زیٖٹھ حیاتٕچ کۯیٖتھ سرٕنـ̡ ، وتھ یام لباں چُھس راواں چُھس
اتھ سۆدرس ژھارُن وونتھ پھۆرُم ادٕ ومبرِ زۆرُم کلہٕ سرسانا
ینہٕ ہوشن کجہِ نم ٹیبہٕ وُٹھن، تنہٕ دمہٕ پُھٹـ̡  سپدِم شوق پنٕنـ̡
دل مُژرِتھ کرٕہا کتھہٕ جورا، کلہٕ پھِرکھنا اکھ بانا
رنگ کتٍـ̡  چُھ ہاواں لولہ جنوں، کم جامہٕ چُھ عٲزم بدلاوں
گاہ کفرٕکہِ باغُک کۆستوٝرا، گاہ دیٖنٕکہِ شمہُک پروانا
(26 جنوری 1957)
٭٭٭

مہلامہٕ دِلُک ژھونڈُم لالن تہٕ گُلن اندر
پى۪و دول مےٚ دیُن لولس یێلہِ نظرِ ڈۆلُم دلبر
لولس چھےٚ پى۪واں کتھ کھێنـ̡  پرتیٖت رچھن پانس
نتہٕ چانہِ جدٲیی منز طوفان زٔرِم اکثر
شێہجار بہارن ہند حٲصل چُھ أشِس میٲنِس
شبنم چُھ یہِ پمپوشو برِ چانہِ خۆشی ہند سر
کۅہ بال ژٔٹِتھ پٲراں وٲرانہٕ گلستانن
بے تاب امرن ہند رنبـ̡  آرٕ چُھ زوراور
افسوس چُھ ہے ساقٕے مستانہ چھِ تٍریمٕتـ̡
یُس جوشہِ شىوقن پیالن سُہ شرابا بر
پێیہِ یار اگر پایس للناوِ وچھس اندر
چشمَو چُھ ہراں عٲزم کمہ ٹٲٹھـ̡  مۅللـ̡  گوہر
(دسمبر 1957)
٭٭٭

مےٚ وٕچھ اکھ حُسنہٕ مۅغلٲنیا کۯپِتھ مس
بِہتھ مستانہٕ صوٝرتھ ساز وایَن
مےٚ دۆپمس پٲرـ̡  لگہ ہے تازٕ وژنس
مگر بَے لوگتھس نوِ نٕے بلاین
ژھۆٹِس مستس پێیَم وۅنـ̡  تُھر مےٚ کھارٕنـ̡
وُنستامتھ وۆندُم زوٝ زلفہٕ ژھاین
٭٭٭

پزرٕکہِ گاشٕچ پۯوٕ پێیہِ اپزیُک گٹہٕ زۆل ژۯتھ دِتھ ژۆل
یێلہِ انسانن لتھ دِتھ وہمن کتھ ژیٖنِتھ دِل چھۆل
کۯیٹھِس کُڈرِس ژرِ پۆپ کٔرـ̡  کٔرـ̡  سونتُک غم ہیۆن جان
سیٖنُک داغا یێلہ رۆچھ لالن اسُنا تۯ ٲوِتھ پھۆل
یێمـ̡  أکـ̡  مژھٕ زور ازموو تس پى۪و راجا شاہا ناو
ٹھونچى۪و حێسہٕ تس وى۪سرٲو کھاسٕر یێمـ̡  أکـ̡  وہروو دۆل
ولولہ سٲوِتھ نێندرا پۯٲوِتھ کلہٕ یێمـ̡  بۆن کُن تۯوو
وقتٕکہ نبہ پى۪ٹھہٕ ٲخر تٔمـ̡  سٕندِ بختُک تارُکھ ڈۆل
لولٕچہِ وتہِ پزِ تس پتہٕ نیرُن یێمـ̡  وتہٕ روکن وول
نکھ وۅگنٲوِتھ مکھ سێزرٲوِتھ پھۯستٕکـ̡  پٲٹھى۪ن تھۆل
شىوقُک سازا ہى۪تھ وۆتھ عٲزِم زانن والى۪و زون
وتہِ ہند وٲقف وتہٕ گتھ منزلس وٲتِتھ مژران ہۆل
٭٭٭

یواں چُھ تنگ وُچھِتھ یام رنگ سمسارٕکـ̡
ہێوان شباب زمین آسمان بدلاوُن
اگر تگی تہٕ پنُن حسن تھٲوـ̡ زى۪ن پھۅلھ وُن
اگر پِلی مےٚ عطا کٔرـ̡ زِ، پوشہٕ وُن یاوُن
٭٭٭

یۆدوَے زرُن چُھ مشکل طوٝفان انتظارُک
لٲزِم چُھ یاونس منز وى۪وٕ ہار لولہٕ نارُک
یتھ ازلہٕ شوخ فطرت، ہُتھ ازلہٕ بے قرٲری
حُسنس مزازٕ پوشُک، عشقس مزازٕ آرُک
از باغہٕ بلبلن گٔژھ وراے ہُرٕنـ̡  بێتٲبی
آمُت چُھ واو صبحُک پٲغام ہى۪تھ بہارُک
مۅخصر ونَے حیاتُک تفسیٖر دۆن کتھن منز
شوقا کرُن بہارُک، رازا سرُن امارُک
بُترٲژ پى۪ٹھ کُڈُر یس دۅہ دى۪ن پى۪واں گزارُن
سوٝرِتھ ہێواں چُھ ژھارُن پَے بختہٕ کے ستارُک
(اکتوٝبر 1956)
٭٭٭

سکھر کر بلبلو غوغا تُلَو باوَو گلستانن
رزن ہیۆت ناز کٔرـ̡  کٔرـ̡  پان کھارُن عشقہٕ پیچانُن
مےٚ پانس گاشہِ لٕے ٲسٕم پننـ̡  وتھ پانہٕ پۯزلٲوٕم
یُتُے وۆن زُتـ̡ نہِ وولُن تارکن ہند بوش اسمانن
چُھ سر زالاں تہٕ زوٝ گالان، تہٕ گٹہِ منز گاش پۯزلاواں
شمع رۆٹ رٲتـ̡  راتس تالہِ پى۪ٹھ اوٕ کِنـ̡  شمعدانن  
وى۪تھن آرن ہِشی کتھ سونتھ ٲسِن یا ہرُد ٲسِن
قدٕر سوٕچ اگر زانن، فقط ہۆکھـ̡ مٕتـ̡  ہى۪نر زانن
یہ کیا وۆن لٲگـ̡  لٲگـ̡  از عٲزمن اتھ معنہِ گۆژھ ژارُن
مسٕچ پیالٕچ کتھا کٔرـ̡  کٔرـ̡  یہِ وُزٕ ناواں چُھ انسانن
(جنوری 1955)
٭٭٭

عاشق چھِ أچھـ̡  پِھرـ̡  پِھرـ̡  وُچھان شێہلاوِنا اکھ نارٕ تۆت
ہاوس چھِ مٔتـ̡  آلَو دِواں اکھ نالہ مۆت، اکھ نالہ مۆت
یا میانـ̡  وٲنِج ہاوسنِ شوقن، غمن ہنز آوٕرنـ̡
یا چٲنـ̡  لوٕ ۂژ لٲو تن سرتازٕ باغُک ہوشہِ پھۆت
وۆتھ لالہ ماراں ژھالہ کیا اتھ بالہ پانس چھپھ کٔرِتھ
لۆگ شوخ یاوُن تاونس تیُتھ لولہ نارس جوش کھۆت
یۆد چانہِ درشن دارِ کُن وُچھـ̡  وُچھـ̡  أچھن گژھِ گاش کم
یتھ نظرِ ڈٔجمٕژ آسہِ کل سۅے پھیرِ پۆت، ونتم ژٕ کۆت
یۆد نالہ رٹہَم پۆت شبن تلـ̡  ٹارِ نظرا تۯاوٕہم
بہٕ تہِ زانہٕ اوٕ گٹہٕ کار ژۆل، بہٕ تہِ مانہٕ اوٕ اختابہٕ کھۆت
محبت ہێکیا دوٝرى۪ر زٔرِتھ، پکھ بۯنٹھ بێیہِ ہن بۯونٹھ پکھ
بێیہِ اکھ قدم، بێیہِ اکھ قدم، عاشق چُھ گومُت آرٕکۆت
پوشِچ نزاکتھ کس وُچھِتھ، واوٕچ کٔمِس آوارٕگی
معشوق وُٹھ کُملٲوـ̡ تن، عاشق چُھ لاراں شانشہٕ ہۆت
از آے بدلٲوِتھ ذرا، دیُت عٲزمن لولُک صدا
یہ چھےٚ زوروَر شوقٕچ کتھا، بوٝزِن، مہ بوٝزِن پوشہِ مۆت
                                (اگست 1958)
                        ٭٭٭

وۅلُر اوس گۯایہِ ماراں ژھایہ ہۆل بیوٹُھس بہٕ شێہجارس
دِدٕر کھٔژ آسمانس کُن مۆدُر لولُک ترانا ہى۪تھ
امارن جوش ہیوٝ دیُتنم، دِلٕچ دُبراے تیزےیَم
بہٕ زن آمُت شرابُک اکھ سۆدُر ڈیشِتھ تہٕ بانا چى۪تھ
(1955)
٭٭٭
شعر

چُھ بار امارُک چانہِ امارُک سیؑٹھا کُڈُر نازلـ̡
مگر مےٚ سیٖنہٕ سمندر چُھ کیا یِیَم أچھـ̡  تٔلی
سێٹھا ازار زٔرِتھ گاٹہ جار ہیۆچھ عشقن
یِنو گُمانہٕ گژھی میٲنـ̡  طوطہ ما گے کلـ̡
(1959)

پگہُک وُچھو پگاہ کیا رنگ روزِ کایناتُک
یُتھ کۯوٝٹھ زیوٝٹھ دوہ چُھم حالس پى۪واں گزارُن
وصلٕچ مۆدٕر حکایت یا دوٝرِرٕچ شکایت
کتھ میٲنـ̡  کتھ چھےٚ چٲنی اتھ واتہِ معنہِ ژارُن
کُس زانہِ عٲزمس زانہہ تلخی ژلیا کلامس
کن دردٕ حٲرـ̡ ثاتن پێیہِ کوٝت کال دارُن
(21 اپریل 1957)
٭٭٭

داغ چھِم سیٖنٕکـ̡  پھۆلِتھ آمٕتـ̡  وۆتُھم ددرایہِ اۆش
کر تہٕ پوشن مال از یا بر تہٕ مۅکھتس مال از
آسہِ شاید ہیوٝ ہِوِس سمکھِتھ لباں رژھ کھنڈ قرار
میانہِ جگرٕکـ̡  داغ ژھاراں چانہِ رویُک خال از
راتھ یێمہِ سٕنزِ رایہِ ہارى۪و عٲزمن خونِ جگر
نغمہٕ وُزناواں چھےٚ تس دِلدارٕ سٕنز اکھ ژھال از
(5 اپریل 1957)
٭٭٭

گاش دِواں عالمس، پانہ گژھاں پٔلـ̡ مہِ بُزـ̡
زوٝ مےٚ پنُن شٲنگـ̡  تار روزِ اما کوت کال
(12 جون 1956)
٭٭٭

ڈل زوٝنہِ وُچھ مےٚ للواں سیٖنس اندر تہٕ زونُم
کِتھہٕ کنہٕ ژٕ رٲچھـ̡  کرہس، کۆر مَے دِل حوالَے
(15 میی 1957)
٭٭٭

سێٹھا کُڈُر چُھ پێوں عارفن دِلُک سودا
جِگر ژُھى۪ناں چُھ حُبابن سناں سناں گاہے
شِہُل امار چُھ پوشس حیاتہٕ کِس شبنم
کلاں چھےٚ یہِ مۆدٕر کتھ وناں وناں گاہے

                   ٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

        پٲغام

عجب رنگ رۆٹ الفتکـ̡ کارٕبارن
عجیبٕے چھےٚ تُلہ تۯاو یتھ کایناتس
سێٹھا تیز گومُت چُھ گردش زمانُک
سۅکھُک رَو تہِ کھسٕوُن دۅکھُک شب تہِ لسٕوُن
أتی ظۅن گژھاں وُنـ̡  سنگر مالہ شولن
أتی زن ہێوان ٲنتھٕ رۆس رات زیٹھنـ̡
یتھُے وق چُھ مۅکلُن ہێوان انتظارُک
لگان گۯون زن وصلٕکس آفتابس
یتھُے واو سونتُک ہێوان ٹوٝرـ̡  سُلوٕنـ̡
تتھُے زن خبر کُس انان سالہ ماگس
یتھُے تۯاس ششرس چُھ سپدان قلایس
تِتُھے کٹھکشِس زن چِھ پُشران یہ عالم
یمبرزل یتھُے نێندرِ ہژٕ چشمہ مژران
تِتھُے زن لگان داغ سینس گلالس

عجب مرحلس پى۪ٹھ چُھ رفتار وقتُک
کمو گاٹلى۪و رۆٹ جِلَو زندگی ہند
جران دامنس یِم چھِ تارکھ حیاتس
مگر موتہٕ چن اۆبرٕ ژھاین تہِ پالان
یِمَے ژٕکھ دِوان لولٕکى۪ن نوٝرٕ ژانگى۪ن
یمَے ژھێورنُک ہٕس دِوان واوٕ گراین
یہ بترات لٔجمٕژ چھےٚ بدلٕے طفانس
چُھ مشکل وچھنـ̡  تۯاے کتھ کُن چھےٚ وقتٕچ
مےٚ باساں لگن زالہ وُنـ̡  موتہ موکل
بدل کتھ ونان خوٝن افریکـ̡ ین ہند
یہ موسم چُھ لالن تہِ شێہجار پاوان
یہِ موسم چُھ دترِس تہِ سگ واتناوان

ہَیو نٔجدٕ ونہٕ کے مسٲفیرٕ یارو
امارس چھےٚ ستھ چانہ دیوانگی ہنز
ژٕ چُھکھ یِونہِ سونتٕچ شہِج واوٕ گۯایا
ژٕ چُھکھ پوش وُچھنَے مشک پرزٕناوان
دِوان تازگی چُھکھ ژٕ موصوم عشقس
ژٕ دُبراے چُھکھ محبتٕچ تیزراوان
یمن أنـ̡  کھۅتى۪ن ازلہ گۆٹ اوس بختس
تِمن منز شمع زٲلـ̡  چانى۪و یرادو
یتى۪ن موت وُچھتھن وتن پہرٕ تھٲوِتھ
تتی زندگی دل رۆچُھتھ لول بٲوِتھ
اگر کن تھوَکھ شێچھـ̡  ونَے زندگی ہنز
فقط اکھ محبت چُھ یُس تارٕ تاری
اگر از سنکھ از پنُن پان زانکھ
اگر از تگی لولہ مس عام تھاوَکھ
وۅتھکھ مٔدرِ ہٹہِ میٖٹھ لہرا ژٕتۯاوَکھ
زمانس امارٕچ یہِ شێچھـ̡  بوزٕناوکھ
محبت سرُن دٕے تہٕ نفرت نہ تھاوٕنـ̡
امارکـ̡ کلیمتـ̡  قمرـ̡ بولہ ناون
امارکـ̡  ژھۅکیمتـ̡  شمع شولہ ناونـ̡
أزِچ وگ رٹٕنـ̡  اش پگہچـ̡  نہ تۯاوٕنـ̡
                                (2 اپریل 1962)
٭٭٭

                        رات

وہـ̡ شبن ہیۆت زال وہراوُن، دُہکـ̡ بلبل کلێے
از مےٚ چُھم بدنس اندر گردش کران تیزاب زن
از سمندر ہاوسن ہند گۯایہ ماراں پَے بہ پَے
از دمادم ژھالہ ماراں شوخ ہوسن ہندـ̡  ہرن
از بێتابس لولہ دیوانس حرام آرام گو
از متیومُت دل چُھ گٔنزراون ہێوان پۯانى۪ن چھۅکن
دم کٔرِتھ عالم، زمیٖن تَے آسمان لگـ̡  وُچھنہِ خاب
آوسِتھ زن وۆل حیاتٕکـ̡  چُرـ̡ گِشن موتُک کفن
کیا زٔرِتھ ہێکہ دل، رٔہِتھ روٝزِتھ چھےٚ گٲمٕژ کاینات
اللہ  اللہ جود کیا کۆر رٲژ ہندـ̡  بٲزیٖگرن
از چُھ تنہا شب گُزارُن موتہٕ کھوتہٕ باساں کُڈُر
وہـ̡ گرس کٔرمٕژ چھنم از قبرِ ہنز حالت شبن
وہـ̡  یِمن نوزُک ستارن ٹٲرـ̡  آسن لوٝسـ̡ مٕتـ̡
واے کانژھا جانوارا ٹاس ہیوٝ کڈِہے پکھن
ہاے کانہہ اکھ شب بێدارا آسہ ہے یاہوٝ کران
کانہہ مۆتُے پھیُر آسہ ہے پانے دِواں پنہ نى۪ن کتھن
وٲے کانہہ ہمسایہ سُند موصم شُرُے گژھِ ہے ہُشار
باشہِ نَے کرِہے ژٕہا دیہِ ہے ہنا زورَے پہن
واے تنہٲیی تہٕ خاموٝشی، دِلس پُژپارٕ گو
اکھ صداوا، اکھ کتھا، اکھ حرکتھا گژھِ ہے کنن
تسلیا کرٕہا دِلس لۆت پٲرـ̡  تۯاواں آو آو
میوٝن اکھ دیوانہٕ آلو بوٝز ٲخٕر دلبرن
پَے وۅمیذن ہند یُتھٕے لبہ ہن مےٚ ہاوس آشہ رٔسـ̡
ہاوٕہَے شبہٕ کى۪ن سیاہ خانن پێہن دیوار ؤسـ̡
                        ٭٭٭

                        نار امارُک

نى۪سنگاہ وہِتھ آو لولُک الاوا
یہ دُنیا مٔشِتھ گو مےٚ شادى۪ن غمن ہند
سى۪ٹھا ژھۆٹ چُھ افسانہٕ موتُک حیاتُک
بےٚ سۅکھ شوق ژھاراں چُھ پَے سرحدن ہند

گُلن أکـ̡  ہلم دور بے تاب نظرن
دِلن ہیۆت سنُن اتھ حسیٖں زٲوِجارس
نظر گۯاے ہِش رٲو پوشے ڈلن منز
چھےٚ بٲزیٖگری کیا تگاں نوبہارس

گہے ؤنـ̡  ہێتِم دِنـ̡ کۅلن ناگرادن
گہے آبشارن گى۪وُن بوزنووُم
مدَے گٔنڈ أتی اتھ سنگر مالہ چشمو
أتی بالہ تینتالہ پى۪ٹھـ̡  شوق رووُم

قرارس دِتِم ؤنـ̡  تہٕ بے تاب سپدُس
أچھن بۯونٹھ کُن أنـ̡  عجب نقشہ لولن
وُنی پٔرـ̡ یہِ یِن ژھانٹہٕ واین ڈلس منز
وُنی یِن سٔمِتھ باغہٕ بلبل تہٕ بولن

أتی زن مےٚ شبنم پھێریُک رٕپھ پۯووُم
وُٹھن پى۪ٹھ أکِس پوشہِ ٹوٝرِس بہٕ ووتُس
أتی زن گیَم اکھ زٕژا آفتابٕچ
بٔڈس ٲنہٕ خانس أکِس منز بہ رووُس

پکھن پى۪ٹھ تُلِتھ نازٕ پٔرـ̡ یو بہٕ نیوٝہس
بہٕ ووتُس خبر کتھ گٔنِس جنگلس منز
ہرن ٲنتھٕ رٔسـ̡  بالہ پى۪ٹھـ̡  ژھالہ ماراں
یہ ڈیٖشتھ وُتش لۆگ امارن دِلس منز

یہ کستوٝر لولُک وُپھاں گو، تھٔکِتھ پى۪و
یمَے خاب وُچھـ̡  وُچھـ̡  چُھ دیوانہ سپدُن
اما شوقہ کِس اتھ ڈلس وونتھ آسیا
مےٚ گۆژھ اکھ مۅیا یتھ دِلس نار شێہلُن

أتھـ̡ اندر نظر پێیہِ مےٚ چٲنِس بُتھِس کُن
قرارس مژر آو، مژرس قرارا
ژِہِس منز کُنُے گو بےٚ ہوٝشی تہٕ ہوشس
ژٕ چُھکھ پۯى۪تھ سوالُک جوابا نِگارا
                        (22 مارچ 1962)
                        ٭٭٭
 
عٲزم چُھ فقط لول

دلدار وۆتھُم چٲنـ̡  غمن کۆر مےٚ دِلس ہول
کُس چُھکھ ژٕ امارُک یہ مژر ٹوٹھ تھوَن وول
دۆپمس مےٚ بہٕ چُھ لول، فقط لول، فقط لول

اچھِ دٲر ہشی ہٲر وُھِتھ طوطہ کلاں چُھس
مس کھٲسـ̡  بٔرِتھ ٹٲرـ̡  وُچھِتھ ہوشہِ ڈلاں چُھس
یێلہ دوٝر ژےٚ نشہِ آسہٕ شمع زن بہٕ گلاں چُھس

تلـ̡ ٹارِ وُچھُتھ یام، لۆبُم تیز تمیُک سیٖر
زلفُک مےٚ وُچُھم زال کۆرُم پان پنُن گیٖر
اکھ چون أچھر وال مےٚ کیُت کامہٕ دِوُن تیٖر

اکھ چون سۅخن گو مےٚ کنن ہۆٹ مےٚ غمس چوٝر
اکھ چون اسُن کۯیشہ وٕنِس تۯیشہ ۂتِس کیوٝر
اکھ چٲنـ̡  نژن ڈال وُچھِتھ وۆتھ مےٚ دِلس گیوٝر

یێلہ ہرنہٕ أچھو مۅکھتہٕ ہرُن ہیۆت مےٚ کھژٕم ژکھ
زونُم زِ فراقُک چُھ کُڈُر دود زرن سخ
مِلژار کۆرُم عام تہٕ سوریوو غمُک وق

یێلہ حسن وُچُھم شاد نِوان ژھالہٕ پھۆلُم دل
کۅچھ مایہِ بٔرٕژ دارنہٕ چے رایہِ چھۆلُم دل
غمگین اگر حُسن وُچُھم کۯایہِ تۆلُم دل

چُھس شوقہٕ دِواں ؤنـ̡  بہٕ گہے زوٝنہِ ستارن
بالن، کۅہن، ناگن، کۅلن، نالن، وێتھن، آرن
گاہ زورٕ شُرى۪ن سٍتـ̡  گنداں دۅہ بہٕ گزارن

آرام دلُک ژوٝرِ نِوان چُھم مےٚ امارا
باغن تہٕ ڈلن ہند مےٚ وُچھتھ شوخ نظارا
چشمن چُھ کھساں پێالہ چنَے لولہ خُمارا

یێلہِ بولہ وٕنێو جانورو ژھٲنڈـ̡  پننـ̡  ٲلـ̡
یێلہِ شولہٕ دِوٕنـ̡  ژٲنگـ̡  شبن شام گٔژھتھ زٲلـ̡
بیدار تھٔوِم گاش تہٕ لۅکچار سرَن وٲلـ̡

اسنُک مےٚ وُچھِم ٹوٝرـ̡  ہێواں سونتہٕ کرُن سنز
کۆستوٝرـ̡ مۆدٕرـ̡  نغمہٕ گێواں پوشہِ ڈلن منز
یِتھ حالہٕ گێوُم ، ڈالہٕ دِنُک ہیۆت مےٚ کرُن ٹنز

لولٕے چُھ مےٚ یێمـ̡  وۆن زِ حیاتس تہِ سنُن گۆژھ
یُس راز چُھ در پردٕ ژھێپِتھ وۅنـ̡  سُہ ننُن گۆژھ
یُس شوق اۆرزماں چُھ گۆمُت، جوشہِ انُن گۆژھ

یُس ژونگ گٹن منز تہٕ ژھٹن منز چُھ پۯزلوُن
تتھ رٲچھـ̡ کرٕنـ̡  گٔژھ تہٕ تمیُک گاش کڈُن نۆن
تتھ گۆژھنہٕ گژھُن زور ہوا، تیٖل گژھن چھۆن

چُھس یارٕ بہٕ یٔمـ̡  ژانگہِ پنُن خونِ جگر زول
دیوانہٕ امارُک یہ مژر ٹوٹھ تھوَن وول
عازم چُھ فقط لول، فقط لول، فقط لول
                        (اپریل 1956)

***

                        ونَے مےٚ کیازِ ہیۆت گى۪وُن

                        (ا)
مےٚ وُچُھ گُلَو بٔرِتھ ژۅپٲرـ̡  پٍرـ̡  پٍرـ̡ گلسِتاں
تہٕ استہٕ استہ واوٕ یِتھ چُھ مۅکھتہٕ شبنمُک ہراں
قمرـ̡  چھِ ہوٝ کران، تہٕ ہارِ، طوطہ، کُکِلہٕ، جل گێوان
تہٕ نار زن چُھ یارٕ سٕندِ دوٝرِرُک ہێواں ژھێوُن
                        جگر پھۆلُم ہیۆتُم گى۪وُن

مےٚ وُچھ زِ چھپھ گُلن ہنزٕے دِلن چھےٚ زیرِ ہن دِوان
تہٕ مایہ ۂتـ̡  تہٕ لولہٕ متـ̡  امارٕسٕے چھِ ژھۅہ براں
امارٕکُے تژر وُچھِتھ جگر چُھ زندگی پھۅلاں
دِواں چُھ ڈالہٕ آبشار حالہٕ یِتھ ہێواں گى۪وُن
                        جگر پھۆلُم ہیۆتُم گى۪وُن

مےٚ وُچھ زِ موج شوقہٕ ساں براں چھےٚ لول باشہِ نٕے
براں چھےٚ لول باشہِ نٕے، منگاں چھےٚ گاش آشہِ نٕے
سُہ گاش یتھ اندر سنبالہِ لٲنـ̡  ٲلـ̡  ناشہٕ نٕے
سُہ گاش پھانپھلاوِ یتھ تسُند گلالہٕ دۅد چێوُن
                        جگر پھۆلُم ہیۆتُم گى۪وُن
 
مےٚ وُچھ زِ راتھ دۯایہِ ژھایہِ ہۆل چھےٚ کتھٕ کتھا گژان
دپان چُھ اکھ مےٚ لٲنـ̡  نێاے وُچھ کمن کمن ژٹان
دپاہن چُھ بێاکھ کیا ژھى۪نن اگر رلن زٕ دل زٕ جان
یہِ بوٝزـ̡ تھٕے شفق تہِ پھۆلـ̡  تہٕ وُرٕبلن ہیۆتُکھ پى۪وُن
                        جگر پھۆلُم ہیۆتُم گى۪وُن
 
                        (ب)
مےٚ وُچھ اکھا ونان جوان دل تہِ گٔژھـ̡  خۅشی گژھنـ̡
مگر ستم چُھ کیا کرکھ، شُدٕرـ̡  تہِ ما کٔرِم پننـ̡
بہٕ ناودار، شانہٕ وول چُھس، مےٚ نس پزیا ژٹٕنـ̡
یہِ بوٝزـ̡ تھٕے زمیٖنہِ ہیۆت الگ، نبن الگ رِوُن
                                جگر دۆدُم ہیۆتُم گى۪وُن

مےٚ وُچھـ̡ نێصف شبن چھےٚ مۆنڈ موج اکھ کتاں یندٕر
تہٕ فاقہٕ پھرِ چھےٚ تٔمـ̡ سٕندێن یتیٖم نٕے پیمٕژ نێندٕر
مےٚ درینٹھ آو زوٝن زن چھےٚ مۅنڈ موج کوٝنش کھٔر
ستارٕ زن یتیٖم کٹھ ژھرِس نبس ہێوان لى۪وُن
                        جگر پھۆلُم دۆدُم گى۪وُن

مےٚ وُچھ زِ پننہِ خوٝنہٕ رنگ یُس براں گُلالہٕ نٕے
پُٹاں بٹھى۪ن تہٕ بنجرن، ژٹاں زنڈن تہٕ زالہٕ نٕے
چُھ لرزٕ مارتورٕ یێمـ̡  سُندُے کۅہن تہٕ بالہٕ نٕے
سُہ ہردٕ کالہِ دربدر، بےٚ سر، بےٚ ستھ تہٕ نۆن تہٕ چھۆن
                        جگر دۆدُم ہیۆتُم گى۪وُن

مےٚ وُچھ أچُھن چُھ بے کسن تہِ خشم ہیوٝ خمار ہیۆ
عوامہٕ کى۪ن یرادٕ نٕے ہُراں چُھ اعتبار ہیۆ
دزُن چُھ وۅنـ̡  مکارٕ نٕے، وُہاں چُھ تازٕ نار ہیۆو
سێٹھا چھِ توتہِ پتھ یِمن گژھاں وُچھُم بنِتھ نى۪بۆن
                        جگر دۆدُم ہیۆتُم گى۪وُن  

                        (ج)
مےٚ وُچھ گێواں چُھ ریڈٕووول کریوٝٹھ زیوٝٹھ دۅہ کڈان
تہٕ میوٝٹھ نغمہٕ ہى۪تھ چُھ ہٲنز شوقہ سان ڈلس تۯان
تہٕ گریوٝس تاپھ ہارٕ کُے ڈۆکِتھ کھہس اندر زران
گى۪وان تہٕ ہردٕ پھل چُھ پننہِ مێحنتُک ہێواں وى۪وُن
                                اوَے مےٚ یارٕ ہیوت گى۪وُن

                        ٭٭٭

                        عراق

تاجدٲری ہند گو سمَے گو، پردٕ نظرن چاک گٔے
بے کَسَو شانن دٕنن دِژ، بے زبانو لٔب زبان
از تہِ چھا دم کٲنسہِ یُس لاگُن خدا ہێیہِ آدمس
کُس چُھ یُس از قلزمس ٹھرـ̡  تھاوِ، وۅلرس تھاوِ ٹھان

لولہ کِس سۆدرس چھےٚ از گراین سێٹھا تیٖزی گمٕژ
بارٕ طوٝفانٕکـ̡  خیالن کارواں بیدار کۆر
راتھ اکھ شاہا لُکن تقدیر لیکھن وول اوس
ٲدـ̡  ٲدی بوٝز اکہِ گگرایہِ پیٖروپار کۅر

زندگی کٔر حرکتھا، اکھ بٔڈ کتھا گیہِ فاش از
عامہ چن راین چھِ کھۅکھـ̡  ہاواں تمَے یم ہوشہٕ ڈلـ̡
لرزٕ ۂتـ̡  موتن پتولاکن حیاتس سجدٕ دِتـ̡
ٲمـ̡  عراقن کٔرـ̡  کمن فرہنگـ̡  خداین طوطہٕ کٔلـ̡

آدمس یٔژکال گو پۯانى۪ن طنابن ٹکھ دِوان
از تہِ کێنہہ پیہم یُــپى۪ن شُپـ̡  تھاوٕنٕچ کوٝشش کران
أمـ̡  عراقکـ̡  انقلابن اکھ کتھا بے پردٕ کٔر
وُمبرِ ہندـ̡  سۆتھـ̡  پُھٹرنس گاہے ژیُہا ساتھا لگان

ظلمٕہ چن زنجیٖرنٕے کتراونکـ̡  ہاوس ہاوس پھبیاے
عشقہٕ کى۪و سرمس خیالو وق وُچھِتھ تھٔز کٲر تھٲو
مرحبا، صد مرحبا، شوقن یرادن ہند تھزر
یێمـ̡  حجاتس سٔجدٕ کۆر، یێمـ̡  ظلمگٲری آمنٲو

شۅہرٕ گو بلبل عراقٕکـ̡  ؤتھـ̡  پکھن واشا کٔڈتھ
دوٝرِ کس تامتھ یہِ بوٝزِتھ کۯێنہہٕ مازس نوٝن پى۪و
از تہِ کێنہہ بدبخت شیراں والہ واشى۪ن والہ بٔرـ̡
تُجـ̡  علم یمرازٕ سٔنز منحوس فرہنگـ̡  وارِلى۪و

اۆبرٕ ژھاین کھوژِ کیا آزاد قومُک آفتاب
زندگی شوقن یرادن ہند، امارن ہند تھزر
گۯز تُلن لوٝدر یِمن توپن بمن، طوٝفاں وۅتھن
جوش جمہوٝرُک بنیا دم ہارِ یا نۆمراوِ سر

پر گٔنڈِتھ آدم دپان از تارکن پى۪ٹھ ییرِ اول
از تہِ ہێیہ کانہہ تخت پٲرُن تس بچٲرس ؤنـ̡ زِ کیا
از تہِ عامس خام زٲنِتھ کانہہ رتس ہێیہِ دام دیُن
از تہِ یُس تھێکہِ رُستمی تتھ گاٹہٕ جارس ؤنـ̡ زِ کیا
(4 اگست 1958)
٭٭٭

بۆمبُر تہٕ بہار

بۆمبُر
وارِ ژایوس ہاوسن ہندـ̡  نارٕ تٔتـ̡  شێہلاونے
ؤہـ̡  مےٚ دۆپ یمبرزلن ہنزٕ سۅرمہٕ أچھـ̡  تسلی دِنم
ؤہـ̡  مےٚ دۆپ وچھہٕ کى۪ن چھۅکن مہلامہٕ کرِ شبنم ۂرِتھ
ؤہـ̡  مےٚ دۆپ دِمہٕ بوسہٕ ٹوٝرى۪ن دگ لۅتى۪م غم سپدِ کم
ؤہـ̡  بہٕ کۆرنس بے قرٲری تَچ بێتٲبی داغدار
ؤہـ̡  سُہ دۅہ منحوس دۅہ یێلہ زندگی پُشرٲوہم

زندگی اکھ آوٕلُن اکھ دٔدـ̡ سرَے اکھ اضطراب
زندگی اکھ ہاوسن ہنز نارٕ گٔج راحت وہم
کٲژہن دى۪درى۪ن نبس کھسٕنُک چُھ آساں مارٕمۆت
اکھ وُڈو دِتھ ؤسـ̡  پى۪وان ؤہـ̡  اڈوتی ہاراں چھےٚ دام
قطرٕ پاواں وى۪تھ ژى۪تس وى۪تھ کانچھناواں سۆدرٕ کھۅن
لونچہِ زن گنڈہکھ نبٕکـ̡  تارکھ ژھۆرُے روزی ہلم
ؤہـ̡  مےٚ کر زونُم زِ ہاوس ییٖتـ̡  آن ٲنتھہٕ رٔسـ̡
ؤہـ̡  مے کر زونُم زِ اکھ کھنگالہ گو اکھ لچھ صدم
نار زانہہ شێہلیوم نا، کٲتیا وُچھِم اپزی بہار
بوڈ اۆپا چُھس بٔلـ̡  گندان چُھس زندگٲنی ہند یہ زار

بہار

کیا دپاں چُھکھ، بٔلـ̡  گنداں چُھس زندگانی ہند یہ زار
ہے، ژےٚ نا خبرٕے زِ کن تھٲوِتھ چُھ بوزاں نوبہار
بوز ہے گلزارٕ کے نادانہ، یتھ رازس تہٕ وات
کیازِ سپدُکھ ناوۅمیدی منز طلسماتُک شکار
بوسہٕ ٹوٝرى۪ن ہند اگر دیہِ ہی نہٕ راحت تَے سروٝر
لوسہٕ ہکھ ما آش ہیتھ جل جل پھۅلُن گۆژھ نوبہار
قطرٕ نَے شێہلاۅہی، دریا تہٕ ڈل ما ژھارٕہکھ
یس پھلى۪ن تھپھ آسہِ سُے ژھانڈان کھلن پى۪ٹھ اختیار
کیا چھےٚ ارمانن تہٕ شوقن ہنز حقیقت، سٔرـ̡  زہے
کیازِ گَے اکھ شوق نیٖرِتھ ساسہٕ بٔدـ̡  ہاوس بێدار
بے قرار ٲسِتھ دِواں سوزس تہٕ سازس زندگی
سۅکھ لٔبِتھ، تھکھ دِتھ چھےٚ سپدان مۅردٕ تَے خاموش تار
دَو چھےٚ رنبـ̡  آرٕچ تھواں رٔچھـ̡  رٔچھـ̡  حیاتُک زیٖرُ بم
کیا دِواں لاشس لحد، آبس تلاون ہند قرار
زندگی ہندِس نشاطس ملہٕ کھہس پھۅلہِ سوٝر زن
یۆد ہۆکھِتھ سیٖنس اندر گژھِ ہاوسن ہنز آبشار
زندگی منز خوٝنہٕ کِس جوشس چُھ میخانُک سروٝر
شوق نٔکھـ̡  پادر سٕہن، آرام توبوٝدن سوار
مسندُک مس وال یس سنہِ تس چھےٚ نٔنـ̡  موتٕچ براتھ
نٔجدٕ ون پُھٹہٕ رتھ کرن یس، لٲل تٔسـ̡  پادن نثار
’’ساونى۪ن، لێدریمژن زوٝنن چُھ یاوُن حٲرـ̡ ثاتھ‘‘
گریسـ̡  کورى۪ن تھل رُوان ہاوس لباں کوتاہ جہار
قیس کھٔتـ̡  نٔجدن تہٕ فرہادن کۅہن ہند سینہٕ ژٔٹـ̡
عاشقن ہند روٝدٕ زانہہ افسوس تَے وُے واے کار
وُچھ ہواوس نالہٕ مٔتـ̡  کٔرـ̡  کٔرـ̡  ونان آبٕکـ̡  بُبر
وۅش اگر تۯاوو تہٕ دم ہارو گژھو موتٕکـ̡  شکار
تارکن ہنز بے قرٲرـ̡  ڈیشـ̡ تھٕے یێمـ̡  ہور دم
تس بِچارس کِژ ہشی کتھ گاش گۅٹ تَے نوٝر نار
انہِ گٹن اندر دِواں ستھ تَے ستى۪ہہ صبحُک یقین
دل دپاں یامت کرُن صبحس چھ لٲزِم انتظار
ہاوسن گژِھ، گوٝرٕ گوٝ لولہ متلایا کرٕنـ̡
ہاوسن یێمـ̡  اند ہیۆت ژھارُن سُہ زانُن نابکار
بانبراں ارمان گٔنزرٲوِتھ پننـ̡  یس سوٝرـ̡  دۅہ
یس تٔچھنـ̡  سینٕچ گۅبان تس کیُت چُھ شراوُن ماگ پۅہ
(7 اگست 1956)
٭٭٭

نژن وول
ژےٚ تۯووُتھ مس پریشان جامہٕ پٔرِتھ ہیرِ بۆن پانس
وۆتُھکھ کیا ڈالہ ماراں زن تہٕ سۅرگٕچ مٲرـ̡ مٔنز حوٝرا
کراں زن ہی تھرى۪ن پى۪ٹھ بولبوشا باغہٕ کۆستوٝرا
پھراں نغمٕچ مٔدٕر لَے عقلہِ، ہوشس، دیٖنہٕ ایمانس

گِلن دِتھ نازٕ سان یێلہِ طوطہٕ ٲسس وُٹھ ژےٚ مُژرٲوِتھ
دِلن منز پیٖر مردن کۯیشہِ وُن لۅکچار گو پٲدا
أچھن تل لولہٕ والى۪ن یارٕ سند انہار گو پٲدا
زمانٕکـ̡  بومہٕ ۂتـ̡  وق زندگی ہندـ̡  غم ژےٚ مٔشرٲوِتھ

ؤلِتھ سازٕکـ̡  سروٝدٕکـ̡  پردٕ یِم چٲنـ̡  دردٕ ۂتـ̡  آلو
چھےٚ زن خۅشبۅے گۅلابٕچ وارِ پھیراں سونتہٕ واوس منز
یہِ آلَو بوٝزِتھٕے لٔج رێہہ دِلن جوشس جلاوس منز
نژُن ہیۆت ژھالہٕ ڈیشِتھ حالہ یِتھ میخانہٕ کى۪و پیالو

تُلتھ کیا رُت غزل، اتھ معنہِ وێژھنووُتھ اشارا دِتھ
گہے دِتھ گۯاے زلفن یارٕ سٕنز مستانہٕ گی ہٲوٕتھ
گہے خوٝنی کرى۪تھ أچھ، الفتٕچ دیوانہٕ گی ہٲوٕتھ
مےٚ وُزنووُتھ ژےٚ یاوُن بے کسی اوس تھووٕمُت سٲوِتھ

مےٚ باسیى۪و خۅشدلی ہنزن وى۪تھن ہند لولہٕ آگُر چُھکھ
بُتھِس گو چانہِ مستُک رنگ ہیوٝ فکرن، غمن، دادى۪ن
گُمو چانێو شِہُل تَے پوشہ وُن سگ دیُت سۅکھن شادى۪ن
لسُن پوشن گۆژھُکھ، زن باشہِ کرٕوُن منزلیُک شُر چُھکھ

ژٹِتھ زوٝ رٲتـ̡  راتس، گاش پھۅلنس ہیوٝ مےٚ نِش وٲتِتھ
نژن ڈالا دِژٕتھ، زونُم تھێکِتھ وۅنـ̡  آوٕسیومُت چُھکھ
کٔرِتھ پونپوٝرـ̡  گتھ راتس خبر کتھ، وۅنـ̡  سۅتێومُت چُھکھ
ژےٚ وُچھمَے عارٕ بٔرژن چشمنٕے منز اۆش گۆمُت روٝزِتھ

ہێچھِتھ مسانہٕ ڈالا دِنـ̡ ، امارن ہند مژر گو یی
دِتُے پَے ہاوسو سٔنـ̡  سٔنـ̡ ، چُھ رُت سازندری ہند فن
مگر استادٕ تھووٕنکھ رٲتـ̡  راتس ونتہٕ کٔمـ̡  دردن
أچھن پھش پھش دِوان روٝدُکھ، شِکم تَے نفژٕ زر گو یی

ژےٚ لوگُتھ رۆف، پۆہۆل زن نیٖرِ تیرن ہکھ دِوان شامن
ژےٚ نۆمرووُتھ کمر، زن گۯیسـ̡ تِس گو نى۪ندٕ کٔرـ̡  کٔرـ̡  ژس
ژےٚ تۯووُتھ مس پریشان زن حسیٖنا مۅل کراں حُسنس
چھےٚ لاگاں نفژٕ دادِچ دگ کمن کارن کمن پامن

سُہ فنکارا نٹى۪ن یێمـ̡  اسنہ باپتھ لسہ نٕکُے مس بۆر
سُہ فنکارا یێمِس دادى۪ن غمن ہۆٹ چیٖرنُک فن تۆگ
قیامت نٔنـ̡  وُچھِم تس زندٕ روزُن پى۪و کُڈُر تَے دۯۆگ
أچھێن پُتنَے، زبان ہۆچھمٕژ، گۅڈن دگ، آوٕسیومُت ہِیُر

چُھ شێہلاواں حیاتٕکـ̡  چھۅکھ، حُسن گو ناگھ ہی تَے ہِل
گى۪وُن وایُن نژُن موصُم حیاتس ماجہِ ہند پھٔرـ̡  پھاہ
خۆشی ہند پوشہِ وُن پوشا، گٹن منز گاہ، یمَس کیُت پۯاہ
حُسن تَے فن لگێا ٹھونچن، مےٚ ؤژھ تھر تھر، مےٚ تھارى۪و دِل
(21 فروری 1955
٭٭٭

              حیاتُک بوش

چُھ سُے داغِ جِگر رُت عالمس کیُت
سُہ، یُس لولن امارن آدمس دیُت

دِژٕس أکـ̡  بالہٕ یارن بے قرٲری
رٔچھِن مٔتـ̡  آیہِ سیٖنٕچ داغدٲری
کُڈُر تَے کۯوٝٹھ اوسُس وق فراقُک
مگر پلزى۪و جنوٝنس گاہ دى۪ماغُک
یُتھُے أمـ̡  سام ہیۆت ہوشش تہٕ جوشس
گُمَو دیُت سگ أکِس خۅش رنگ پوشس
نشاطا شولہ نوو أمـ̡  سٕندـ̡  امارن
وُزنـ̡  لٔج آبشارن تَے فوارن
گُلابس پى۪ٹھ پى۪تھٕے شبنم تہِ شێہلیوو
معطر صبحہٕ کِس واوس ہلم گو
ژى۪تس پێیہِ باغہٕ کى۪ن جاناورن لَے
ڈلس وژھٕ گۯایہِ سیٖنس منز پیاپَے
نبن دۆپ تارکن زاگَے ہێژٕم أمـ̡
اما شوٝخی یہِ دِژمٕژ آدمس کٔمـ̡
حُسُن وۆتھ مے میے بخٕشمس نوجوٲنی
امارن دۆپ مےٚ دِژمس زندگٲنی
جہانکہِ سۆدرٕ کُے پمپوش آدم
حیاتُک کایناتُک بوش آدم
(1957)
٭٭٭

شکایت

مےٚ کٲتێا نو جواں وٕچھـ̡ مٕتـ̡ ، دپاں چُھس ہاوسس تِہندِس
کرُن گۆژھ زوٝ فدا، لولا برن تَے قٍمتھا کھالُن
چھِ یِم ٹٲٹھِس حیاتس رتھ پنُن ؤندِتھ یژھاں پالُن
مگر تیٖلُک طمع روزاں چُھ یہندس نوٝرٕکِس ژٲنگِس

چھِ کٲتیا رٲتـ̡  راتس تارٕ چاراں سازٕ سیتارس
رچھکھ یۆدوَے، سُہ آلو ہاوسن ہنز زى۪و بناں ٲخٕر
چُھ کوتا جوش سُے لولس تہٕ امارس اناں ٲخٕر
چُھ کوتا بوش کھاراں یارٕ سمندِس شوخ انہارس

چِھ محکم پژھ تھوَِتھ پننى۪ن یرادن پى۪ٹھ کمالن پى۪ٹھ
دپاں پۯزلَو، تہٕ گاہ تۯاوو، تہٕ ہاوَو عالمس گاشا
وُچھس اندر چِھ پِنواں یِونہِ پگہٕ ہٕچ مٲرـ̡ منٔز آشا
کڈاں مجنوٝن ہِوـ̡  دوہ انتظارٕکـ̡  نٔجدٕ بالن پى۪ٹھ

شبس چشمن چِھ کۯہنێن انہِ گٹن ہند سۅرمہٕ زن لاگاں
ورق پھرـ̡  پھرـ̡  کتابن، وونتھ ہیوٝ ژھاراں خیالن ہند
پۯژھاں فکرن جوابا وقتہٕ کى۪ن نوزُک سوالن ہند
نوى۪ن پرانى۪ن سِرن ہندـ̡  پردٕ ژٹنُک وق یِنس زاگاں

مگر، ؤہـ̡  ٹوٝرـ̡  کٲتیا پوش بنہٕ نُک دردٕ ارماں ہى۪تھ
گژھاں لژھِ بُزـ̡  چِھ سانى۪ن شِنـ̡  یہن اندر، ونن اندر
ونَے کیا ضایہِ سپداں وُچھـ̡  مےٚ کٲتیا لالہ پھٔلـ̡  گندر
دِلن منز وۅپدنُک ہاوس تہٕ موصم لولہ طوٝفاں ہى۪تھ

تِمن گٔژھ تُھر کھسٕنـ̡  یِم زندگی باپتھ مرُن زانن
سنُن کسبن تگى۪کھ تَے زٲوـ̡ جارن ہنز خبر تھاون
فنس یِم بوش کھارن، زندگی یِم لولہٕ مس چاون
ؤتھَتھ بے وایہِ پٲٹھی وقتہٕ کى۪ن سۆدرن ترُن زانن

شکایت چھم زمانٕچ واتناوٕنـ̡  پۯتھ أکِس یارس
کنى۪ن منز زول دِتھ گٔژھـ̡  شولہ وٕنـ̡  لعل و گُہر ژھارٕنـ̡
گٹن منز گۆژھ وسُن تَے گاش دِنـ̡  لایق شمع سارٕنـ̡
روا چھا منکلن منز سوٝرـ̡  گژھنُک موقہٕ دیُن نارس
(21 دسمبر 1956)
٭٭٭

              حیاتُک بوش

چُھ سُے داغِ جِگر رُت عالمس کیُت
سُہ، یُس لولن امارن آدمس دیُت

دِژٕس أکـ̡  بالہٕ یارن بے قرٲری
رٔچھِن مٔتـ̡  آیہِ سیٖنٕچ داغدٲری
کُڈُر تَے کۯوٝٹھ اوسُس وق فراقُک
مگر پلزى۪و جنوٝنس گاہ دى۪ماغُک
یُتھُے أمـ̡  سام ہیۆت ہوشش تہٕ جوشس
گُمَو دیُت سگ أکِس خۅش رنگ پوشس
نشاطا شولہ نوو أمـ̡  سٕندـ̡  امارن
وُزنـ̡  لٔج آبشارن تَے فوارن
گُلابس پى۪ٹھ پى۪تھٕے شبنم تہِ شێہلیوو
معطر صبحہٕ کِس واوس ہلم گو
ژى۪تس پێیہِ باغہٕ کى۪ن جاناورن لَے
ڈلس وژھٕ گۯایہِ سیٖنس منز پیاپَے
نبن دۆپ تارکن زاگَے ہێژٕم أمـ̡
اما شوٝخی یہِ دِژمٕژ آدمس کٔمـ̡
حُسُن وۆتھ مے میے بخٕشمس نوجوٲنی
امارن دۆپ مےٚ دِژمس زندگٲنی
جہنِکہِ سۆدرٕ کُے پمپوش آدم
حیاتُک کایناتُک بوش آدم
(1957)